عفا الله عن خطا غدر الخناجر والضلوع ابطـال بسامح واتركك تحـت الظـلام الحالـك لحالـك
دخيلك وفر دموعك تـرى هـدر الدمـوع اذلال وترى ما فيه احد يصبر مثل صبـري بغربالـك
انا عيب علي أنقـض كلامـي والرجـال افعـال واذا قلت اقطع احبالـك ترانـي بقطـع حبالـك
عشان اكسب هدب عينك تجرعت العذاب اشكـال وليتـك تـرأف بحالـي علشـان ارأف بحالـك
مسوي في حياتـي شـي مـا يذكـر ولا ينقـال حشا حتى العدو وهو العدو مـا يعمـل اعمالـك
تمسيني على الهـم وتصبحنـي علـى الغربـال قلطنـي فناجيلـك وتقـصـر عـنـي دلالــك
تحملت التعب لجلـك وانـا حملـي يهـد جبـال رحلت من العذاب وما وقفـت الا علـى جالـك
علامك كل ما جيـك متواضـع جيتنـي تختـال معاك اليا متي بصبر وصبـري معـك يحلالـك؟
مثل ما اقبلت لعيونـك لـزوم تلـد لـي باقبـال ومثل ما قد حشمتك حس واحشم قلبي اشوى لـك
أنا محـدن بجابرنـي أسايـر معـك هالمنـوال ترى لاني تبيع لـك ولا نـي باصغـر عيالـك
أنا جيت اعشقك نبض ومشاعر ما اعشقك تمثـال أنا جيت اسكنك واحياك وابقى فيـك وابقـى لـك
أنا جيت بظما عاشق تعب يطرد سـراب الـلال أنا جيت استفز رضاك مـن فرقـاك والجـا لـك
أنا ما همت بك عاقل أنا كنـت اعشقـك بخبـال أنا ما كنت احبك حي أنا كنـت اعشقـك هالـك
تخيل من كثر ما اخـاف تلقـى للزعـل مدخـال أخاف اخطي على طيفك وادوس برجلي ظلالـك
تبعتك والعـرب تتبـع رعـود البـارق الهمـال وانا شفت المطر يتبعـك فـي حلـك وترحالـك
كأن اللي خلق حسنك خلقني مع جسـدك ظـلال وصرت اقرب جسد يمشي معك باقفـاك واقبالـك
أبـي قلبـك يحـس انـه فقـد بمحبتـه رجـال ملكته من هدب عين وخسرت رضـاه باهمالـك
صحيح ان الفراق اقسى ولكـن الوصـال محـال أنا صعبن علي أرضي غرورك واضعف قبالـك
بعد مـا حققـت عينـي فبعـدك للرقـاد امـال أعود للسهر؟ -- يـا خـوي فـال الله ولا فالـك
ببدل نظرتك فيني واجي لـك كـل يـوم بحـال بكون اقرب مـن ثيابـك عليـك ولا تهيـا لـك
بالمك وانثرك واجمعك وارجع وانثـرك باهمـال بخونك وازعلك وارضيك وازعل منك وارضى لك
أبرسم بالثرى وجهك وابدفـن صورتـك برمـال أبشكي للعرب فرقـاك واضحـك عنـد عذالـك
أبهديك الوصال فراق واهديـك الفـراق وصـال بسوي مثل ما شوفـك تسـوي وافعـل افعالـك
عشان تعرف من فينا الزعول ومن وسيـع البـال أبيـك تـذوق فنجالـي وانـا بـذوق فنجـالـك
نصيحة واحتفظ فيها قصر معك الزمـن أو طـال أبي تسمع كلامـي زيـن وتحطـه علـى بالـك
اذا حبك هبال اطفال لك عنـدي هبـال اطفـال ولا وابشر بعد بهبـال حـب مـا هـو بهبالـك
واذا قصدك تهين اسمي عشـان تشمـت العـذال ترى لا انته ولا غيرك ولا عشرة مـن اشكالـك




اختكم
سمرااااااااااااااااااااء