في هذا الموضوع ان شاء الله راح احط سوالفي مع يدتي الله يرحمها ويغفر اليها
بحق محمد وآل محمد الطيبين الطاهرين
والموضوع هو من خلال مجاستي ليدتي -جدتي - عليه الرحمه وسردها لبعض الوقائع التي جرت في زمانها -حيث ان عمرها وصل لأكثر من 100 سنه
وبصراحه عندها تجربه في الحياة وكنت أجلس معاها لفترات متباعدة صحيح لكن ما كانت تبخل عني بشي اذا سألتها عنه وتكونت عندي مجموعة من التجارب والقصص التراثيه وحبيت انكم تعرفوها
فغالباً نحن نأخذ التراث من بعض الأشخاص الذين عرفوا عنه من خلال أشخاص آخرين وهنا التجربه من خلال شخصية عاشت التراث وحملته لجيل آخر من أجيالنا
إنشاء الله هالموضوع يحوز على رضاكم ويقدم اليكم شيء من التراث
وان شاء الله راح أحط الكلام بالعامية - يعني زي ما نتكلم به مع بعضنا البعض، وهو على فترات يعني كل ما رجعت الذاكرة شوي بنحط اليكم جزء من الكلام والأحداث والتي يتخللها بعد بعض المواقف الطريفه وسرد لبعض الأشياء التي حصلت في الماضي

اتمنى الإفادة للجميع

أول شي صلوا على محمد وآل محمد وأقروا الفاتحة لروح المرحومة يدتي الله يرحمها
-------------------------------------------
قبل كم سنه وأنا رايح أعايد على الأهل - يعني قبل ما أتزوج
رحت أكيد الى يدتي العزيزه - مو علشان العيديه -
رحت أزورها
أنا:- السلام عليكوووووووم
يدتي:- عليكم السلاااااااام
أنا :- هلا وغلا ، هلا بيش
يدتي :- يا هلا بالمهلي يا مرحبا ، تعال أقعد تعال
أنا :- ( بعد ما حبيت راسها وعايدت أبها ) :- هااه كيف حالش الحين ، ان شاء الله زينه
يدتي :- الحمد لله ، يوم الله عطاني الصحه
أنا :- يدتي با أسئلش لول يوم انتين بعدش بنيه وقبل ما تعرسي ويش تسووا في العيد
يدتي :- الله يغربل ابليسك ، ذكرتني
أنا :- أهم شي ما تتضايقي مني ولا با أقوم
يدتي :- لا لا بس ذكرتني بلووول
أنا :- يالله دانا طلعت قلمي والأوراق
يدتي :- ( بعد ما جلست فتره لتسترجع الأحداث ):- شوف يا ......يا ولد ....( وكانت كا تسميني الا بإسم أمي )
شوف فيه سنه من لسنين اللي راحت كنا في بيتنا اللي في الديره وأني ويا أبويي الله يرحمه قاعدين وجت أمي الله يرحمها وقالت الى ابويي
ويش يا أبو فلانه ما بتروح الى الشيخ حق الفطره ترى بكره العيد
قال اليها ابويي ...خلاص با أروح الحين برزي اليي البيزات علشان الفطره
ولا تنسي تطلعي الى ......( اسم يدتي) فياب يديده حق تعيد
وكان ابويي يحبني مرره وكل مره يروح محل لازم أييب اليي شي

ويم يا الصبح طلعنا ويا بيت .....ورحنا نعايد على قرايبنا
واللي يعطينا آنه واللي يعطينا قرشين واللي يعطينا فلافة قروش
هذا الغني مررره وفيه واحد من قرايبنا يخش اليي والى بت عمي كل وحده فلافة قروش للعيد ويعطينا وياها
أنا :- يمه وكم عمرش ذاك الوقت
يدتي :- يعني حول الست حول السبع
أنا:- زين ويش كنتو تلبسوا في العيد
يدتي :- ويش نلبس يعني ، نلبس يا طويل العمر بخنق ونلبس فوب مكشكش ونلبس نعال يديد لازم ونتحنى ويحطوا الينا ابهاتنا وامهاتنا مشموم ولازم نتبخر أما الريال يلبسوا فوب ابيض يديد ويلبسوا غتره بعد يديده ولازم يحطو اليهم خنه حق يصيروا خنينيين
أنا:- زين ويش تقولوا ..ويش تلعبوا في العيد
يدتي :- نلعب وإحنا نقول أناشيد
أنا :- زي ويش أمي
يدتي :- أني با أقول لك شوي لكن اذا يا أحد ما ني مكمله زين
أنا :- ما عليه أماه
يدتي :- نلعب لعية حليوه ، وهي اذا قرب أذان الظهر
نوقف على يدار من اليدران كلنا البنيات
ونقول نشيده علشان يأذن بسرعه ونروح نتغدى
والنشيده تقول :-
أمايي أبغى لقمة
واللقمة من البرمة
والبرمة تبغي حطب
والحطب من النخله
والنخله تبغي قدوم
والقدوم عند الحداد
والحداد يبغي فلوس
والفلوس عند العروس
والعروس تبغي رجل
والرجل يبغي ولاد
والولاد يبغوا حليب
والحليب من البقر
والبقر يبغوا حشيش
والحشيش من اليبل
واليبل يبغى مطر
والمطر من عند الله
لا إله إلا الله
محمد رسول الله
علياً ولي الله
لا اله الا الله

وبعد كذه دخلوا أولاد خالتي وقاموا يعايدوا بيدتي
وسكتت يدتي عن الكلام المباح بعدما طلع الصباح
-----------------------
ان شاء الله عجبتكم سالفة يدتي

والتكمله قريباً