غربة الأوطــــــــــــــــــان...

[أمل الظهور]

ياعلي ياعلي


لايكون هي ام عبد الستار قتلت زوجها


ومراد ليش ماطلعتيه بهالبارت


ان شاء الله تطلع الحقيقه ويصدقوه ويطلع ويكسر عين هالصادق اللي اسمه عكس فعله


واحمد رجع ومارجع معاه سام اصبت بخيبه امل توقعته يرجع معاه



ونور ازمه وتعدي ان شاء الله


وحلم ماريا خوفني صراحه خاصة كلام ابوها لها ربي يستر انقبض قلبي


بارت يقنن تسلم يمينك




ننتظر الاحلى

[*زهرة البنفسج*]

وحشتينااااااااا يالغلا اموره اش هللغيبه ..

::

ان شاء الله امتحاناتك كلها اوك..

::

يسلموعللجزء الحلو

[دمعة على السطور]

اللهم صل وسلم على محمد وآل محمد وعجل فرجهم وفرجنا بهم ياكريم وألعن من آذى فاطمة ...

ياعليييي ماااافي نبغى مراد يطلع...... >>

وش هالصاااادق دااااا يعل القلب راح ونشرها عند نشرة الأخباااااار وكان زين لو الخبر صادق!!!

يوسف مانقدر نلومه بالكامل.....مع إنه ظن بالسوء...!! والمفترض مايفكر بهالطريقة باللي اعتبره اصدق صديق لقلبه..

والسيد ماشاء الله عليه راعي واجب ..بيض الله وجهه >>>

وهذا سام مادور يطلع إلا لما أحمد سافر...شكله والله اعلم بعد جهد وتفكير وضياع راح يرجع لقيصر...

ياعلييي هذي أم عبد الستار هي اللي قتلت زوجها يعني

نور وأماني باين بيروحوا المدرسة وبيدلوا بدلوهم .....تستاهل هالرملة دي

حسن مسكين داير راسه بين وبييين....... الله يعينه يااارب...

أمووور حبيبتي تسلمي يارب ويسلم جهدك وتفكيرك وقلمك وحبرك ياااااااااارب...

ويعطيك العافية ع الباااااارت الحماسي ...لدرجة خلانا على أعصابنا ...

دعائي يشملك بحق هذه الليلة العظيمة ..

موفقة مقضية حوائجك بحق الحجة ..

دمتِ بعين المولى الجليل

[حلم لطيف]

يامطول الغيبات جابو الغنايم

لا تتأخري بالجديد

يعطيش العافية

موفقة

[الفراش الفاطمي]

يسلمو اموره لش وحشه انتين وبارتاتش
البارت روعه واكثر
خساره سام ماصاد احمد قبل لا يرجع البلد
ونور مسكينه الله يستر عليها
وكمان ابله زكيه مسكينه
وبعد ازدهار مسكينه
وبعد ماريا مسكينه <<<< حشا حشا يوم المساكين
وبــــــــــــس
تحياتيـ ..

[دلوعة المنتدى]

امورة غلاااي برد الله قلبش يالغاليه ,,
بارت مرة روووعة
اني حاسة فعلا ان ام عبد الستار هي اللي قتلت زوجها من القهر ’’
بالانتظاااااااار غلاي

[Princess]

مرحبا
الهي يسلمكم ويحفظكم من كل مكروه
ويدوم هالطلات الحلوه والتعاليق الروعه..

بداية قبل لا انزل البارت..
هذي صورة لوعد الخنصر... بتعرفو في البارت ليش حطيتها..


وهذي الموسيقات اللي كنت اسمعها واني اكتب البارت
هنا
و
هنا

تفضلوووو البارت...

[Princess]

رجال شايب فوق ام عبدالستار ماسك رقبتها ويحاول يفطسها....

ام عبدالستار تجاهد لتتخلص من ايده وهي تنادي:

ــ عبدالستاااار.. تعال شيل ابوك عني..

ابو عبدالستار وبقهر :

ــ بقتلش... بقتلش مثل ماقتلتيني...

ــ عبدالستااااار

ــ عبدالستار ها.. عبدالستار..... لا عبدالستار ولا غيره بيفكش من ايدي..

ــ آآآآه... خليني ... قتلتك افعالك.. ماقتلتك اني..

ــ حسبالش ما عرفت انش عطيتيني دوا غلط يشبه دواي... جبتي لي الجلطه و يطلع الغلط مني ومن غشامتي..

ــ ماااحد قال لك ما تقرى..

ــ اقرى هااا... الحين بقرأ على روحش الفاااتحه..

ــ آآآآآآآآآه....

ــ زي ما ذبحتيني وبتذبحي عبدالستار الحين.. بتنذبحي انتين بعد...



وتصحى ام عبدالستار مفزوعه وهي تصارخ وتصيح... وتقعد وداد من النوم منصرعه من صريخ امها..

ــ بسم الله الرحمن.. ويش فيش اماه..؟؟؟

ام عبدالستار تضم وجهها بكفوفها مغطيتنه.. وتصيح...

ــ تعبت.. اعصابي تدمرت... ويش اسوي بحياتي... الله يعاقبني على افعالي الماضيه الحين..



وداد مستغربه من امها .. ويش تقصد بأفعالها الماضيه...!!!

ــ اماه عبدالستار ان شالله بيصير زين.. وفتحي ماعليه مكروه ان شالله بنوكل له محامي شاطر و ما يصير الا كل خير

ــ عبدالستار.. بكره.. بكره لازم نروح له...

وداد مستغربه من التغير المفاجئ على امها...

انسدحت وداد وسدحت امها جنبها... واللي سرحت تفكر في عبدالستار.. ومواقفه وياها من صغره.. عمره ماضايقها والا عاندها في شي .... خصوصا من بعد وفاة ابوه.... كان دايما يتقبل كل السب والشتم والتهزيأ منها وان ما كان مذنب في شي ..!!



كانت تتمنى منه يثور ويغضب على شان تمسكها حجه عليه في تعصيبها انه عاق ليها.. و تفرغ قهرها في ابوه اللي تزوجته وفي بالها انها فقط بتورث الخير العظيم منه...



وداد تقطع سرحان امها بسؤال تعودت تسأله اياها من لما كانت صغيره...

ــ اماه ويش فيش على عبدالستار .. ماكأنه ولدش..؟؟

ليتغير السؤال هالمره تغيير بسيط..

ــ اماه ويش اللي غيرش على عبدالستار وهو اللي طول عمرش ما اعتبرتيه ولدش..!!!

هالسؤال هد حيل ام عبدالستار... واجبر الدموع تنسل من عيونها بلا شعور...

وبهداوه.. تنهدت من عميق خاطرها......

وغطت عيونها بذراعها على امل انها تنام......



في مكان قريب من مقهى الأنترنت.. وبعد وصول حبيب والسيد واتصالهم بعناصر الهيئه الليليه

وصلو ليهم.. واقتحموا المقهى ... وفعلا لقوا ثنين شباب مثل مابلغهم السيد.. وفوق كونهم فاتحين المواقع .. كانو بوضع مخل للأداب.. فتم سحبهم الى مقر الهيئه...



وهناك....

وبعد استجواب بعدة وسائل .. اعترف ولد المدير انه هو الفاعل وان هذا صديقه اول مره يجي وياه...

ومع اخذ شهادة الهندي و التستر عليه كونه الشاهد على شان لا ينقطع رزقه ويطرده مدير المقهى....



احد عناصر الهيئه: ــ مراد الـ .........اطلع ربعك ينتظرونك..

مراد وقف وتوازنه مختل .. من التعب و الصدمه طول النهار ماغفت عينه..

ــ هاااا..

ابتسم في وجهه المصلح :

ــ مسكنا الفاعلين وطلعت براءه..

مراد يضحك وعيونه محتقنه دموع:

ــ هه.. والله... تأكدتو اني بريء .. تأكدتو اني ماسويت شي..

هز المصلح راسه..:

ــ ايه نعم... والبركه في ربعك.. حبيب و هادي... ماقصرو... ساعدونا في القبض عليهم..



طلع مراد والفرحه مهي سايعتنه.. يحس نفسه خلال نص يوم مات مظلوم .. وردت له الروح منتصر...

تلقوه حبيب والسيد.. خذوه بالأحضان...

مراد ولأول مره يبكي من قلب بين ذراعين حبيب.. اللي صار يشد عليه ويمسح على ظهره ويهدي فيه..ومراد يتشكر فيهم

السيد صار يمسح على راسه وبهداوه:

ــ لو ما كنا حاسين انك بريء ماسوينا كل هذا... بس الله مايضيع المظلوم,, ومصير العدل ينصفه...



ركبو سيارة الهيئه قالو بيوصولهم << تكفير عن اللي صار..

بما ان الوقت فجر و التكاسي قليلة...

ركب حبيب قدام.. والسيد ومراد ورى...

مراد سند راسه على السيت مرفوع.. وغفت على هالوضعيه عيونه...

التفت له السيد وبأبتسامه على شكله التعبان :

ــ والله بريء مثل الأطفال.. الله يجازي اللي كان سبب ضياعك في اول شبابك...





في المستشفى....

وبين ماكانت الممرضه تحقن مغذي عبدالستار ببعض الأدويه لعلاجه...

تعثرت بواير المغذي وهي ماتدري وطاحت على عبدالستار وهو نايم...

خافت على عمرها وعليه لا يفكر انها متعمده لو شي

قامت بالسرعه..

انتبهت ان وضعه مو طبيعي..

ماتحرك.. ما ابدى أي رد فعل .. ولا اختلع وقام من نومه

خافت..

تحسست نبضه شافته ينبض...

صارت تصحيه بهداوه...

ما يقعد...

خافت اكثر ..

فنادت على الدكاتره....

جو بالسرعه .. وصارو يعملو له فحص ليحددو حالته...

وبعدها اعلنو انه في حالة غيبوبه مفاجأه.... نتيجة ارتجاج المخ من اصابة الرأس.....!!





يوسف في الشقه حاضن مخدته ومتسلف جوال كاظم يتسمع عزاء واناشيد فيه ..

حاط السماعات والكل نايم ..

وهدووء الا هو يفكر في اللي صار ويترقب جية حبيب والسيد... انقلب جهة منام مراد...

كان لاب توب مراد محطوط فوقه.. و مو مطفي .. عامل له وضع استعداد..

فصايره اللمبه حقته تولع وتطفي ... قدام عيون يوسف ..

ماشاف يوسف روحه الا قايم ويفتح الاب توب ...

الا يشوف صورته هو مع مراد ..

لما طلعو رحله تصورو بالجوال ومراد رسلها لللاب توبه وحطها على سطح مكتبه...

الدمعات بلا شعور صارت تتقاطر على الكي بورد...

سكر اللاب توب وهو منفعل ...

(( لا تلمني.. لا تلمني .. لو قسوت عليك.. لا تلمني .. لا تلمني .. انا منك وانت مني.. لما لا يرضيك عتبي.. فأنا ما خنت حبي .. لا تلمني .. لالالا.. تلمني ))

انشوده الشيخ حسين الأكرف... طلعت فجأه له بين مقاطع العزاء

حركت في خاطر يوسف الكثير من المشاعر..

حس برعشة تسري في جسده بالكامل..



تذكر مراد وهو يستجديه ويحلف انه مظلوم..

تذكر قسوته عليه والنظره اللي عطاها اياه...



صار يقارن بين نفسه اللي كان مراد يعتبره اقرب قريب وبين السيد و حبيب اللي واقفين معاه بهالشده...



قام وهو مقهور من نفسه.. طلع برى الصاله وهو ماسك الجوال.. والسماعات في اذونه يسمع الأنشوده..



وهو يمشي بالصاله ويحس الشقه ضايقه به..

جى بيفتح الباب بيطلع ينتظر حبيب والسيد على باب العماره.....



مامداه بيوصل له يفتحه الا ينفتح ويدخلو السيد وحبيب ومعاهم مراد وكان يتمغط ويميل رقبته ويثاوب من قلب....

يوسف اختلع من دخلتهم فجأه.. وانرمى الجوال من ايده.. وانفصلت السماعه عنه وصار عالميكرفون...

كيف آذاك انفعالي ! والحبيب لا يبالي ..
فيك قد أجريت دمعي .. وهو غالي !
لستُ موجوعاً لحالي ..
إنما فيك انشغالي ..
هكذا في الحب طبعي واشتعالي ..
صاحبي طف من خلالي ..
للمعالي والكمال ِ ..
فإذا أخلفت ظني .. بك أو خنت التمني .. لا تلمني !!



الكل وقف مذهول وصمت..

الكلمات جت بالصميم.. خصوصا ليوسف..

[Princess]

مراد وكأن النوم طار من عيونه .. بلا أي كلمه يطالع في يوسف ...

وبلا وعي يوسف قعد على ركبه.... وكفوفه عالأرض وضعية الأنحناء او الحبو..والدموع تتقاطر من عيونه:

ــ آسف مراد... آسف على ظني فيك...

الكل تفاجأ من حركة يوسف دي..

حبيب والسيد يطالعو في مراد الواقف يطالع في يوسف..

وشوي توجه مراد ليوسف ..

يوسف وهو لسا عالأرض لما وصل له مراد حضن سيقانه وشد عليهم .. وهو يصيح من قلب:

ــ سامحني ... المفروض انا اكون اول واحد وياك بهالشده...

مراد نزل ليوسف وحضنه وبهدووء ولا أي رد..

ويوسف يشد عليه ومستمر بالصياح..

رفع السيد الجوال من على الأرض وطفى الأنشوده...

و ضرب ذراع حبيب على خفيف .. واشر له براسه بما معناه خلنا نتركهم بروحهم ونروح غرفتنا...

يوسف يترجى مراد يسامحه.. ومراد ساكت مايرد عليه

مراد بهدوء بعد ما اخذ يوسف حيفه من الصياح...

ــ ما باسامحك

يوسف رفع راسه يطالع في مراد..

مراد بأبتسامه عريضه:

ــ الا اذا وعدتني ماتظن فيني طول حياتك...

يوسف يمسح دموعه بالسرعه وبصوت مبحوح وبلهفه:

ــ اوعدك... وعد...

مراد يمد كفه اليمين:

ــ صافحني وعد عربي

يوسف يصافحه ويشد على كفه..

مراد يمد خنصر كفه اليمين.. وبأبتسامه عريضه..

ــ و ايضا وعد اجنبي..

يوسف ابتسم ومستغرب منه:

ــ دا خصام... الأبهام للمصالحه

مراد يهز راسه..

ــ لالا.. جيب خنصرك اليسار يللا..

يعانق خنصر يوسف اليسار خنصر مراد اليمين..

ويمد مراد ابهامه اليمين ويلامس به ابهام يوسف ... ويضحك..

ــ زي اليهال ها لول اذا تشابقنا وحنا صغار مع احد.. نمد الخنصر و نصرخ.. خاصمناك... دقايق وبالأبهام نصرخ والفرحه مهي سايعتنا.. خاويناك..عند الأجانب هذا يعني مع بعض في الخصام وفي المصالحه.. وعد عالطريقة الأجنبيه.. بكل ثقافات العالم... اوعدني تبقى معاي على طول فااااااهم...

يوسف يضحك ويحس كأن ثقل كبير انزاح من على صدره ...

ــ ايييه... اوعدك..

ــ ان اخلفت وعدك بطبق عليك العقوبة..و خنصرك دا بقطعه..

ويشد مراد على خنصر يوسف بالقوه

يوسف يضحك:

ــ يفداك.. والله لا يجيب خلاف..

وقامو غرفتهم....

وفي الصباح...

جوال مراد يرن..

رفعه وبتعب:

ــ هلا..

ــ صدق خذوك الهيئه..!!! ويش مسوي من هباااب !!

طالع مراد المتصل عدل.. لقاه واحد من الشباب اللي كان يعرفهم بالديره..

و من زمان ماسمع صوته وكان مقرر يقطع علاقته بهم كلهم..

لأنهم رعاة مصالح وما يتقربو منه الا على شان فلوسه...

والا يكون ولد صديق ابوه ...

او يكون الأباء على علاقة مصالح من العمل..

وهذا ابن الحالة الثالثه...

مراد وبنبرة تملل:

ــ ويش دراك حشا مسرع وصل الخبر.. << طبعا هاني ماقصر وانتشر الخبر

ــ ههاااي مو مصدق ويانا ما انمسكت طول عمرك ويوم رحت الرياض انصدت.. شكلك مخاوي جماعه مو محترفه زينا

مراد تنرفز منه وحاس بالذنب والأسف على ايام قضاها وياه...

ــ ويش تبغى الحين .. لويه متصل !!

ــ خخخ بس اباقول لك استعد لأبوك ترى وصل له الخبر

مراد قعد قعود على المنام وهو مذهول..

ــ هاااااا... حشا وصل لتايوان

ــ خخخخخخخ حظي ابوك الحين في الصين ويا ابوي توي مكلم ابوي البارحه ودريت منه.. وسأل عنك ابوك وقلت له الحقيقه.. ما اخبي شي انا افا عليك... والله يستر عليك .. ابوك ترى طايح وجهه بين العالم ..

ــ طيح الله حظك.. صحيح حيوان ولئيم...و يطيح وجهه لويه وانا ماسويت شي ..

ــ مو الكل يدخل هذاك المكان وهو مهبب ومسوي السوايا وبس يطلع يقول ماسويت شي .. مين اللي بيعترف على روحه ...

ــ وانت متصل حق تحرق اعصابي .. يافااااشل

يوسف فتح عيونه على هدرة مراد والتفت له..

مراد بعصبيه قفل في وجه المتصل ورمى الجوال على جنب ورمى روحه وهو معصب على المنام وشاد عالشرشف ... وستين مليون الف عفريت فوق راسه يلعب..

يوسف ماحب يكلم مراد وهو على هالحاله .. فغمض عيونه لين يهدأ بعدين يشوف ويش فيه...

شوي ماشاف الا مراد قام اخذ فوطته.. بيسبح..

خلص ولبس .. اخذ جواله ومفتاح سيارته وطلع..

يوسف قعد عالسرير .. والفكر شاغلنه:

ــ ان شالله خير !!

في المستشفى.. اول الصباح عالساعه 6 ..

اخذ حسن اجازه من العمل وراح يلازم عبدالستار...ليصدمه خبر الغيبوبه..

ــ انا لله وانا اليه راجعون ماصارت دا مقلى.. حشا طابوقه الله يغربل اللي كان السبب.. ويش الحل الحين ؟؟ هل بتطول حالته؟؟ هل وضعه سيء لهالدرجه..!!

الدكتور:

ــ لا هو الحين في غيبوبه مؤقته لين يستقر وضعه و راح يفوق ان شالله قريب...

ــ مايحس يعني ابدا..

ــ ممكن مايحس بشي.. ممكن بس حاسة السمع تكون متيقظه... لذلك انصح وبشدة اذا كنت مقرب منه تلازمه وتحكي له أي شي يحبه او أي شي متعود عليه عل وعسى يفوق و يتذكر شي ..

حسن صار يفكر ..

ــ شي يحبه!! شي متعود عليه... مممممممم ,, ما غير قصايد احمد مطر ..

في امريكا...

الوقت اول الظهر .. سام مو عارف وين يروح...

وخايف يرجع لتوم ويصادفه اللي كان يصوره ويتلبس معاه ...

توجه لمطعم بيشتري له اكل..

ولما جى بيحاسب...وبيطلع من مخباه فلوس..

طلع الورقة اللي لقاها بدرج توم...

فتحها ولقى الرقم وتذكر..

وصار يفكر:

ــ اتصل لو ما اتصل... اخاف يكون كمين... ممكن آخر آمالي يكون هالرقم... شكله احد يعرفني .. ليش توم خاشنه عني... بتصل وباشوف...

وعلى شان لا يوصل للمتصل به رقم جواله.. اتصل عليه من كبينه...

قيصر كان مزكم.. ومرتفعه حرارته شويه.. ومقفل العياده.....

قام وهو يجر روحه من التعب... وعوايده اذا اتصل احد على العياده يرد عليه بالأنجليزي:

ــ مساء الخير

سام .. استغرب.. الصوت غريب عليه ماعرف صوت قيصر متغير من الزكام .. و فوق هذا انجليزي.. وكأن الآمال خابت وياه.. بس حب يعرف بالضبط ليش عند توم الرقم...ومين هذا...

سام وبالأنجليزية:

ــ مساء الخير .. من المتحدث ؟

ــ انت المتصل فكيف تسألني ذلك.. من انت؟

ــ انا وجدت رقمك في مكان ما ..

قيصر وكأنه ميز نبرة الصوت... من زمان ماسمع صوت سام..

حاول يستدرجه:

ــ هكذا اذن.. وهل انت معتاد على الأتصال بأي رقم تجده امامك..؟؟

ــ لا ولكن اعطيت هذا الرقم من شخص ما .. قال انك على معرفة بي؟

قيصر ويحس روحه شبه متأكد ان هذا سام... وبتساؤل:

ــ هل انت سام ؟

سام والآمال شويه ترجع له:

ــ نعم.. من انت وماذا تريد مني...

ابتسم قيصر ...

ــ واخيرا... منذ متى وانا انتظر اتصالك هذا...لدي امانة لك يجب ان اسلمها ..

سام مستغرب :

ــ امانه,.... ماهي؟؟ ومن انت...

ــ اذا التقينا سأخبرك بكل شيء.. فقط حدد لي الزمان والمكان وسوف آتي لك...

ــ حسنا... مارأيك ان التقي بك بعد 4 ساعات... في الحديقة العامه

ــ حسنا اذن... سألتقيك هناك..

وسكر قيصر السماعه .. بدون مايصرح لسام عن هويته...

ــ والله ياسامي وطحت بين ايديني.. لك وحشه يازلم شقد كنت قاسي ..!!

[Princess]

الساعه 8 الصباح ...

حسن عند راس عبدالستار يقرأ ( الرجل المناسب ) من ديوان لافتات 6 :

بإسم والينا المبجّل…
قرروا شنق الذي اغتال أخي
لكنه كان قصيراً
فمضى الجلاد يسأل…:
رأسه لا يصل الحبل !!
فماذا سوف أفعل ؟…
بعد تفكير عميق
أمرالوالي بشنقي بدلاً منه
لأني كنت أطول…

ضحك حسن .. وتنهد:

ــ هههه ياساتر.. والله هَم يضحك.....

ويكمل ..

بـ (( يحيا العدل )) :

حبسوه
قبل أن يتهموه…
عذبوه
قبل أن يستجوبوه…
أطفأوا سيجارةً في مقلته
عرضوا بعض التصاوير عليه:
قل… لمن هذي الوجوه ؟
قال: لاأبصر…
قصوا شفتيه
طلبوا منه إعترافاً
حول من قد جندوه…
و لما عجزوا أنينطقوه
شنقوه…
بعد شهرٍ… برّأوه…
أدركوا أن الفتى
ليس هو المطلوب أصلاً
بل أخوه…
و مضوا نحو الأخ الثاني
و لكن… وجدوه…
ميتاً من شدةالحزن
فلم يعتقلوه……!!

حسن والأبتسامه ما فارقت شفته:

ــ ههه والله حاله.. عفر هالمطر .. خطر.....!! وخذ الحذر !!

ويكمل بـ (( كابوس )):

- الكابوس أمامي قائم....

- قمْ من نومكَ
- لست بنائم.!!!
- ليس، إذن، كابوساًهذا ........

وسكت حسن . لما وصل للنهايه. وقف وماقراها...... ورفع حاجب وحاجب:

ـ أه عبودو.. بتوديني بداهيه بهاللي تحبه..!!

سكر الديوان وابتسم..:

ــ اشوووف لك شي ثاني تحبه ارحم لي..هههههه.. ايوااا... اجيب لك عزازي حبيبك صالح الدرازي موو احسن لك من هالقنابل خخخ.....

وطلع يجيب له..

بالمدرسة الثانويه.. وعند المديره.. اماني و نور .....

المديره بأستغراب فاتحه عيونها:

ــ وعلى أي اساس تبين نصدقك ونتهم استاذه رمله.. وش دليلك؟؟

نور وهي ترتجف :

ــ احلف لش بالله شفتهم بعيوني..

ــ ومين غيرك شافهم؟؟

ــ ابله زكيه..

ــ ترجعين وتقولين لي ابله زكيه... تحبينها انتِ ..؟؟ طيب عاذرينك استاذه زكيه كانت من نخبة المدرسات الممتازات عندي.. بس كل شي كان ضدها ومافي شي يثبت براءتها من الكلام اللي طلع عنها.. و استاذه رمله بنفسها شهدت مع بنت انها جت لها اكثر من مره تشتكي تصرف استاذه زكيه الغير مسؤول والمنحرف معها.. شهادتين ضد شهاده وحده منك كيف تبين نصدقك ونكذبهم؟

اماني تقاطع المديره:

ــ طيب يا استاذه ممكن تستدعي البنت اللي شهدت. و استاذه رمله.؟؟

ــ استاذه رمله طالعه اجازه يومين.. استدعي لك البنت ليش ما استدعيها واسمعي كلامها بنفسك...

واستدعو البنت ....

في المستشفى...

ام عبدالستار دخلت على عبدالستار... و ملامحها تحمل من الأسى الملايين...

طلبت من وداد تخليها بروحها....

وداد طلعت من الغرفه وهي مستغربه.. وتتثاوب :

ــ والله بعدني نعسانه .. الله يهديش يا امي شان جيناه العصر...

الا على حظها تشوف ازدهار جايه..

ازدهار من شافتها.. فرحت بنفس الوقت غاورت عنها ماودها تعاتبها ولا تبدي معاها أي نقاش حاد...

وداد تقربت منها وسلمت عليها..

ازدهار:

ــ اخيرا جيتو..

ــ مادري ويش فيها امي البارحه طول الليل مانامت تصيح ومصره نجي.. ومن غبشة الغباش واني البس ولادي للمدرسه تبغى نجي ... واني اصبرها تمهل لـشوي..

ــ قلب الأم بعد ويش مايتحمل... بما انش جيتي .. امشي وياي ناخذ لينا فطور على ما تخلص امش وتخليش تدخلي ..

وراحت ازدهار مع وداد ياخذو ليهم فطور..

ام عبدالستار عند راس عبدالستار.. حانيه راسها وبألم اطلقت تنهيده.. وصارت تصيح وبصوت مبحوح:

ــ اباعترف بسر ..حتى ولو كنت ما تسمعني... دخيل الله افضفض واطلعه من قلبي وارتاح...

هالسر .. تعبني .. ودمر حياتي.. وهاللي فيك الحين وفي فتحي نتيجة هالفعله الشينة...

ابوك... علي آل.... كان انسان بخيل موت مع انه غني مره وقاسي ولا يعرف الرحمه ...

تزوجني الثالثه ... اول وحده عاش معاها 35 سنه وماجاب ولاد..ولما ماتت كان مأكد انها هي اللي ماتجيب لأنها كانت مريضة.. وصبر عليها لأنه يحبها... وهو كذاب .. لأنها كانت بنت عمه وخايف من اهلها و بخيل ما يصخي يتزوج عليها ثانيه ويفتح بيتين... فصبر عليها لين توفت...

وتزوج وحده ثانيه مطلقة وعندها بنت عايشه مع ابوها... عاش معاها سنتين و طبعا الله ماكتب الخلفه و خلالهم .. ماصبرت المرأه عليه وعلى بخله فطلبت الطلاق ,, فحصل ليها...

بعدها .. تقدم لي ... وكان صديق ابوي .. كنت وقتها كبيره بالنسبه لذاك الزمن.. عمري 28 سنه... ابوي على طول وافق وجبرني.. كانو اهلي خايفين من العنوسه.. وبنفس الوقت كنت ابغى اهرب من مرت ابوي القاسيه .. وافقت عليه واني ماني مقتنعه.. وكنت اصبر روحي ..

ماجاب خلفه .. وشايب .. خيرته بيموت .. وبورث خير و باعيش حياتي وباعوض كل سنين الحرمان....ولاقيت الضيم منه و المهانه كان دايما يعيرني اني كنت عانس عند اهلي ولو ماهو كان ظليت لين اموت.. مين اللي بياخذني ؟؟؟ واني لا بذاك الجمال ولاني بذاك الذكاء .. !!

مرت 4 سنوات عذاب واني وياه كأنها 40 سنه..وهو يتوعد ان مرت الخامسه واني بعدني بدون حمل بيطلقني وبيتزوج غيري... لين فجأه وبدون أي توقع مني حملت ..

وكانت ساعتها فرحته عظيمه.. اما مشاعري ماكنت اقدر اوصفها.. هل هي الم لكونه ابو ولدي .. ام هي فرحه لكوني حامل وما بتضيع سنوات الشقا معاه هدر......

ومع الفحوصات.. انصدمت صدمة عمري .. طلعت حامل حمل كاذب.. من الحاله النفسيه اللي عشتها وياه .. من الخوف والرعب اللي سببه لي في حياتي... صار هالحمل ...

خفت اقول له... و يتخذ هالشي ضدي ويطلقني وارجع بيت ابوي بالخساره و الهم فوق همي...

خبيت هالشي عنه...

ومرت 8 شهور.. وبداية الشهر التاسع اقترحت عليه اجيب دايه تولدني في البيت وادعيت له لأن هذا ارخص من غرف المستشفيات وعملية الولاده .. وشي اكيد وافق..

استأجرت دايه كنت اعرفها... اغريتها بذهب زواجي عطيتها اياه بشرط تدبر لي طفل .. وقت ولادتي وتدّعي انها ولدتني..

وفعلا وعدتني انها بتجيب لي طفل من دار الأيتام يكون حديث ولاده ... و الذهب مقابل كتمانها لهالسر.. وصار اللي صار وجابوك لي ..

و اشتغلت ام عبدالستار بنوبة صياح عنيفه.. وصارت تكمل والألم يجرعها غصة بعد غصه..

ــ جبتك .. ونسبتك لعلي آل ... ,, بس تأكد يا ولدي انك ولد حلال .. بس يتيم .. قالت لي انك انولدت لأم وابو اجانب بس مادري من أي بلد بالضبط الزوج توفى بنفس يوم ولادتها.... حاولو المستشفى يتصلو بأهلك بس ماقدرو ولا احد رد عليهم ... فما ليهم حل الا الملجأ يتكفلو بك..

وشدت على ايد عبدالستار.. وهي تصيح:
ــ ولد حلال انت.. بس نسبتك بالحرام الى ابو غير ابوك.. بدون علمه.. وعشت وياه لين وصل عمرك 10 سنوات. ماتت خلالها الدايه ومات السر وياها.... والحال ماتغير.. كنت متأمله يجي الخير بجيبتي لك .. كنت مفتكره اني بتخلص من العذاب وبتبدي سنين الراحه بوجودك..

لقيت ابوك يهتم فيك و يصدمني صدمة العمر لما ادري انه كتب كل ورثه بأسمك.. وبس حقي في الورث لا زياده فيه .. هذا اللي صفيت به بعد 14 سنه عذاب وياه..

تركني اني وجدك وصيين عليك على ورث لا يعد ولا يحصى.. لين تكبر وتستلمه...

قتلته من قهري.. سممته بجرعة دوا زايده مو دواه.. دوا له مفعول معاكس لحالته المرضيه.. وهو كان معاه القلب والسكري.. ولا يعرف يقرأ ..ومتعود اني اللي اقدم له الدواء.. فطلعت من سالفة موتته انه شرب دواء بالغلط واني ما ادري به من جهه ... ومن جهه ثانيه ظليت في هالدنيا من بعد موته .. خسرانه حياتي.. لا ورث عظيم زي ماكنت احلم.. لا ولد من رحمي يساندني..

جبتك وكل ظني انك بتكون لي دوا.. ولكنك ما صرت لي غير العذاب....

ومن خوفي من اهلي.. ومن كلام الناس لو تركتك ولو اكتشفو الحقيقه المره.. صبرت عليك.. وتركتك تعيش وياي.. عل وعسى استفيد من هالورث و استظل بظله لين اخر عمري...

الدموع تتقاطر على كف عبدالستار و بصوت بالكاد يسمع:

ــ سامحني .. اغفر لي خطاياي.. خلني اعيش بقايا عمري مرتاحه...

عبدالستار ولسا بالغيبوبه..

دمعه انسلت من عيونه....

دليل انه فعلا حاسة السمع عنده متيقظه وسمع كل اللي قالته امه..

بس ما شافته امه لأنها حطت راسها عالسرير وهي ضامه كفه..

[Princess]

حسن برى واقف سمع كل الكلام.. اعصابه مشدوده... مو عارف كيف يتصرف

استدار و تسند عالجدار وهو فاتح عيونه بذهول...و انفاسه تتزايد بسرعه...

الا بجية وداد و ازدهار..

ازدهار من شافت حسن خافت .. وانحاشت بعيد..

وداد قربت من حسن..

ــ حسن .. ويش فيك...؟؟

حسن وبلا وعي يهمس و لسا في حالة ذهول:

ــ علي آل .. ,, ماهو ابو عبدالستار.....

وداد:

ــ هااااا.. ويش تقوووول !!

حسن يمسك وداد:

ــ سكتي .. لا تفضحينا.. امش توها تكلمه... سكتي لا اذبحش تفهمي .. ماكنش سمعتي شي ...

ومشى عنها بيطلع من المستشفى وهو مو مصدق ولا مستوعب اللي سمعه....

وداد انهارت على كرسي من كراسي الأنتظار..

وجتها ازدهار وهي مستغربه من حالتها:

ــ ويش فيش ؟

وداد بذهول:

ــ حسن قال لي حاجه غريبه !!

ــ ويش هي....

وداد تخاف من حسن عدل .. وتدري ان هدد فهو يطبق وعيده..

ــ لا ولا شي .. حاجه شخصيه

ــ اها يعني.. الله يعينش... ماخلصت امش؟؟ ما بتطلي على اخوش..

وداد في بالها:

ــ اخوي !!! والله ماني فاهمه ولاني عارفه شي منك يا حسن ولا من امي ..!!

في المدرسة الثانويه.. البنت وهي ترتجف وتصيح..

اماني تهدي فيها:

ــ اذا تخافي الله وتخافي يصيبش عقابه والله يبليش مثل ما بليتي احد بريء بتهمه .. تكلمي وقولي الحقيقه ولا تخافي..

نور وهي تصيح:

ــ ارجوش .. قولي الحق ..

والتفتت للمديره:

ــ ارجوش استاذه اعطيها الأمان.. واوعديها انش ما بتجري أي عقاب ضدها..

صارو يهدو فيها.. ويوعدوها انها لو كانت كذابه ماراح تتعاقب..

المديره:

ــ ترى والله ان تحرينا اكثر في الموضوع واكتشفنا انك كذابه راح تنفصلين بس قولي الحق من الحين وحتى لو كان ضدك وراح نسامحك.. والله نوعدك

البنت خافت تنفصل وتبتلي بمرت ابوها ويزوجها ابوها غصب...

ونور عارفه انها فوق كونها كذابه وشاهده زور هي راعية البلوه مع استاذة رمله...

البنت بصوت مخنوق:

ـ كذبت.. ايه كذبت....

المديره تسمع وبهدوء:

ــ طيب يا بنتي ... بهداوه قولي لنا... كذبتي بخصوص ايش بالضبط؟

ــ اسسسستتاااذذذه ززززكيييه.. ماسسسوووت لي ششششي

المديره منصرعه:

ــ متأكده.. طيب ليش قلتي عنها مسويه لك كذا..؟؟؟

البنت زادت الرجفه عندها وصارت تصيح بشكل هستيري..

وهم مستمرين بتهدأتها..

ــ استاذذذذه رمممللله هي السسسببب....

وصارت تقول ليهم الحقيقه بالتفصيل .....

في بيت ابو مجتبى..

ام مجتبى و احمد وامير و ابو مجتبى قاعدين يفطرو و يطالعو في التلفزيون .... برنامج وثائقي عن الزواج الشعبي القديم... في دول الخليج...

ام مجتبى:

ــ اييييه رحم الله ايام لول .. لا كلافه ولا تعب في هالزواجات..عالبساطه .. وعيشه هنيه ومرتاحه

ابو مجتبى :

ــ وصغار كنا نعرس عالنيات ولا ندري ويش صاير

ام مجتبى تطالع ابو مجتبى على جنب :

ــ ايه مافي واحد اعظم منك على نياته على مستوى الفريق كله ...

احمد يطالع في امه مستغرب:

ــ لويه ويش سوى ابوي..

ابو مجتبى يعدل قعدته :

ــ احمممم.. اآآآآح.. بس يامره عن الفضايح..

ام مجتبى وبعدها تطالع ابو مجتبى على جنب:

ــ والله انت اللي جبت لروحك الكلام.. عالنيات هاااا..

ابو مجتبى وملامح وجهه مبين عليها الخجل واللي كان يداريه بالصلابه وتكشير الحواجب..

احمد بألحاح وهو يشرب في كاس الحليب الصاخن:

ــ عاد اماه .. قولي ويش صار...؟؟

ام مجتبى :

ــ الله يسلمه ابوك ليلة عرسنا انحاش...

احمد كان يشرب الحليب نزل الكوب وشرق :

ــ كح كح كح.. هههههههه كح ههههههه .. انـ كح كح ـــحاااااش!!

امير صار يضحك ويأشر على ابوه:

ــ انحاااش.. انحاااش هههههههههه

ابو مجتبى :

ــ اوهووو .. زين لش فضحتينا وشرقتي الولد..حتى اميرو بيمسكها علي..

ام مجتبى تطق على ظهر ولدها:

ــ حلو ... حلو.. صحه وعافيه..

احمد وهو يبولع مو قادر..

ــ ويش اللي نحشه !!

ابو مجتبى يسبق ام مجتبى ويعترف:

ــ ويش دراني.. ويش اسوي وياها انا ديك الحزه.. طلعت النخل ويش يقعدني وياها.. خبري بها كنت وياهاونتراقع من ضلع لشرب... وما ميش غير اللعب .. فجأه يقولو لي دي مرتك.. داويه دا!!! << الضلع والشرب .. مصطلحات في الزراعه (( بالنخل)) الضلع هو مجرى الماء الضيق مابين الشروب لسقايتها (( جمع شرب )) وهو تخطيط الأرض الزراعيه لزراعة المحاصيل (( شرب رويد _ شرب بصل _ شرب طماط ... الخ )) << قولي والله

ام مجتبى:

ــ تخيل يعني ياولدي اني عروس بليلة عرسي منحاش رجلي ويش بيقولو عني العالم.. غير الا خلعته و فر مني.. بس تصدق كان الوضع عادي وياي .. نمت ولا كن في شي صاير.. تعبانه من صفقة الناس على راسي طول النهار..

احمد وهو مو قادر من الضحك:

ــ وتالي يبا وينا نمت..

ابو مجتبى وهو ياكل الصموله ويبلع:

ــ نمت في النخل بعد ويه .. ويوم فاني طاح فيني ابوي بدست بالعسو .. فشلتناااااااااا معرس ونايم ليله هنا ويش بيقولو اهل مرتك... ههههه رحمة الله عليه...

احمد ماقدر من هالسالفه ضحك ضحك.. وامير يضحك على ضحكه ..

احمد:

ــ أي والله عالنيــــات... سالفه جديده بالرغم من قدامتها

ابو مجتبى يطالع ام مجتبى بنص عيون:

ــ غربال يغربل امك .. زين لش ضحكتي الولاد علينا...

ام مجتبى:

ــ ههههه سالفه مرت ماضرت...

[Princess]

هدوء شوي .. الا احمد رجع يضحك..

ابو مجتبى والخجل لسا فيه وبعصبيه يداريه:

ــ آحااااااا.. يللا خلاص عاد..

احمد يحاول يبلع الضحكه قد مايقدر.. يوم حس روحه ماهو قادر انحاش الغرفه...

ام مجتبى:

ــ ياغناتي هالولد وحشتني ضحكته من زمان ماشفته يضحك هاللون...

ــ ايييه الله يخليه ويخلي البقايا سند وذخر ..

ــ يالله..

ــ يبغى لي اتعاون مع مجتبى.. شوي منه وشوي من معاشي التقاعدي.. ونساعد احمد على تكاليف مدرسة امير .. مايصير كل شي عليه... بعد توه يشد روحه وفي اول شبابه ... مايمديه يستلم الشغله تتراكم الديون على ظهره..

ام مجتبى وهي تشيل تبسي الفطور:

ــ ايه الله يحلها ويفرجها ان شالله ...

في امريكا

وبعد 3 ساعات.. الشرطه داهمت مقر عصابة جون.. ولموا كل الأفراد .. وقبلها اخذو توم ايضا... ماعدا جون قدر ينحاش عوايده من الممر السري لبرى المقر ... ومعاه مارك و ستيف ....

ولما قدرو يأمنو روحهم.. صرخ جون:

ــ اين سام..

مارك وبأنفعال:

ــ لعله من بلغ عنا.. هو مختف من قرابة الأربعه ايام او اكثر..

جون فاتح عيونه:

ــ ماذا تقول؟؟

ــ اتصل عليه وانظر هل سيرد عليك لأثبت لك صحة كلامي

جون منصرع من كلام مارك..اتصل

سام كان في طريقه للحديقه العامه.. لما شاف مكالمة جون.. مارد عليه....

جون بعصبيه:

ــ انه يتجاهل الرد... ماذا يعني ذلك...!!

مارك يلتفت لستيف اللي كان مختلع من اتهامات مارك واستغلاله هالوضع ضد سام...

ــ ستيف لقد سمعتك و انت تحرضه علينا ايضا....

جون:

ــ ماذا تقول!!

مارك طلع جواله وفتح مقطع تسجيل..

ستيف فتح عيونه بذهول..

كان المقطع آخر كلماته لمارك لما وصاه يهرب .. ويختفي ....

ستيف طاح على ركبه والرعب محوطنه ويش بيسوي فيه جون الحين !!...

انتهى المقطع .. جون طلع مسدسه بيقتل ستيف وبعصبيه:

ــ ايها الخائن اللئيم..

ستيف حط ايده على راسه و انحنى مثل الطير المذبوح...

مارك يدف ايد جون وتطير الرصاصه بالهوا...

جون بعصبيه يلتفت لمارك ويمسكه من منحره..

ــ ماذا انت ايضا.. هل تريد ان تموت معه..!!؟؟

مارك وهو بالكاد يتنفس:

ــ استمع الي قليلا ايها الرئيس .. ان سام يعلم كل مخططاتنا ويعرف ممرنا السري وجميع مخابئنا وسيدلهم علينا بالتأكيد.. دعنا نستغل ستيف كرهينه لنرى ان كان سيأتي لأنقاذه

جون يفلت ايده من منحر مارك:

ــ وماذا ان بلغ عنا نحن الثلاثه ولم يهتم بأمرنا..,

ــ من المستحيل حدوث ذلك..

والتفت لستيف..وكمل كلامه:

ــ فلست تدري عمق العلاقه بينهما . لدرجة تدفع ستيف ان يهديه قلادته التي تركه اهلها بها رضيعا.... اراهن انه سيأتي راكضا لأنقاذه..

جون :

ــ فلنرى ذلك..

قيصر في الحديقه كان لابس قبعه ينتظر وصول سام..جالس على الكراسي..

يتلفت يمين وشمال متى يوصل ...

سام قريب يوصل .. من بعيد قيصر عاطنه ظهره فما يبين ملامحه عدل..

شوي رساله جايه لسام من جون...وكانت رسالة فيديو..

فتحها لقى جون ساحب ستيف من راسه وموجه على رقبته سكينه..ويصرخ فيه:

ــ تعال الى المخبأ المعتاد الذي بجوار قبو السيارات ان كنت لا تريد ان تراه ميتا.. تعال الى هنا في غضون نصف ساعه..

وانتهت المكالمه...

سام فتح عيونه وهو مذهووول..

ــ ستيف .. لا,,. لآااا.. مايصير .. مستحيل...

واستدار بيروح للقبو.. ركض

في هاللحظه انتبه له قيصر وقام..

ــ عرفني سام وبتهرب مني.. ولك وين رايح..

وصار يركض والتعب ماكل جسده.. ورى سام يتبعه...

[Princess]

في المدرسة الثانويه...

في الصف الثالث علمي..

ريماس تهمس في وسط الحصه:

ــ شفت نور طلعتي من شوي مع وحده شكلها اختها لو شي بمكتب المديره ومعاهم البنيه اللي تهمت استاذه رمله..

شهربان وماريا قاعدين قدامهم على طول..

شهربان قاطه اذونها تتصوخ..

البنيه اللي جنب ريماس تتسائل:

ــ ظنش ويش صاير...؟؟

ــ ويش دراني من مصييبه....

شهربان تفكر وفي بالها:

ــ مايندرى ويش صاير الله يستر هي نورو دي يومين مو على بعضها

و بصبعها لمست من تحت لاتحت ماريا اللي كانت سرحانه اصلا في عالم آخر لا هي مع الدرس ولا هي مع الهدره اللي وراها..

انتبهت على شهربان تكتب على كتابها..

ــ نور بالمدرسه شكلها مع اختش اماني والله يستر..

ماريا وعلى ملامحها علامات الأستغراب.. حركت ايدها بمعنى .. ليش!؟

شهربان حركت كتوفها بمعنى .. ــ ما ادري ...

وفي مكتب المديره .. اتصلت المديره برمله و زكيه وطلبت منهم يجو فورا ....

واتصلت بلجنة اللي كانت مسؤوله عن عملية الفصل السابقه لتفتح القضيه من جديد بعد الأدلاء بالحقائق..

في قبو سيارات ...

مارك مصوب سكين على رقبة ستيف ..

ستيف وهو معصب :

ــ كنت لتقتلني بدون ان تتصل عليه

مارك يشد شعر ستيف بالقوه:

ــ اخرس .. وماللذي سأستفيده من قتلك..

ــ انت حقود جدا.. من تظن نفسك

ــ نعم انا كذلك.. ابقى صامتا والا اذقتك العذابات حتى يجيأ اليك..

جون حاط رجول على رجول ويدخن.. وكل سيجاره يطفي عقبها في بدن ستيف ..

ــ خائن فعلا.. ايها اللقيط اهذا جزاء من احسن اليك...

ستيف يتحمل الألم وفي قلبه يتمنى بشده ان سام مايجي و يكمل طريقه..

سام وصل للقبو ودخل ..

دخل وراه قيصر بهدوء بدون مايلاحظه... ورمى روحه ورى احد السيارات وهو ميت من التعب ..و يحس شوي وبيغمى عليه

وصل سام وعلى بعد كم متر من مارك وستيف وجون.. وقف وصرخ فيهم:

ــ اترك ستيف وشأنه.. ان كنت تريد شيئا فخذه مني..

ستيف يهز راسه وفي عيونه الدمع محتقن.. بمعنى لاتقرب ياسام و روح اتركني..

ومارك مستمر بالشد عليه ومو راضي يفكه..

سام :

ــ ماللذي تريدونه بالضبط..؟؟؟

جون بأنفعال قام ورمى السيجاره:

ــ من انت بالضبط.؟؟ عميل سري ؟؟ متحري ؟؟؟ من تكون..

سام بسخريه:

ــ كيف اكون كذلك وقد عاونتكم في مختلف العمليات لمدة عامين.... اترى في حياتك عميلا ام متحريا ساذجا الى هذه الدرجه !

جون يصرخ فيه:

ــ سأريك ايها الوغد

قيصر منخش ورى احد السيارات ورجوله مهي شايلتنه من الرعب والكلام اللي يسمعه..

مسك جواله وهو يرتجف واتصل عالشرطه..

ــ الووو.. الشرطه.. اريد التبليغ عن عصابة وعملية اختطاف وتهديد بالسلاح.. انا مختبأ في قبو سيارات........

وصار يوصف ليهم المكان...

جون يتقرب من سام...

ــ يعز علي قتلك برصاصة واحد.. اريد ان اخنقك بين يدي هاتين لأتلذذ قليلا بتعذيبك ايها الخائن..

سام يتراجع على ورى ..

ويمسكه جون وتقوم المعركه.. ضرب ومضارب..

ومارك مو عارف لا يترك ستيف ولا يدافع عن جون.

جون وفي ايده المسدس صار يضرب سام به..

سام يحاول يقاوم ويتماسك..

ولأن سام جسم رياضي وعضلات.. نال جون منه ضرب مو شويه..

قلبه عالأرض ومسك ايده اللي فيها المسدس وصار يضرب يضرب فيها لين طفر المسدس من ايده.. بعيد عنه..ناحية مارك..

بقس . على خد جون.:

ــ لم اشأ ان اعيش هكذا.. انت من اجبرني على تلك الحياه

بقس ثاني :

ــ ليتني كنت اعرف من اكون لكنت تخلصت من هذا الشقاء كله..

بقس ثالث:

ــ كفاك استعبادا للناس و تخريبا لأخلاقياتهم واستغلال فقرهم وعوزهم..

جون شوي شوي يغيب عن الوعي من الضرب القوي..

انتبه ستيف لمارك يمد رجوله يحاول يقرب المسدس منه

استغل تركيز مارك في تقريب المسدس وعاجل عليه بمسكه قويه ليمينه عوجها وخطف السكين واستدار لمارك يبغى يمسكه لقاه مسك المسدس ومصوبنه ناحية سام اللي كان جالس على بطن جون و يضرب فيه..

وطااااخ..

ستيف رمى السكين وراح يركض ..

ــ سام كن حذرا... .,. لالالا...

وارتمى فوق سام.. غرقان بالدم بعد ما صابته الرصاصه ...

وسام اصطك راسه بعمود من اعمدة القبو بالقوه.. وسال الدم...

صوت سيارات الشرطه..

مارك منصرع من الوضع..

الثلاثه مغمى عليهم مايندرى حيين لو ميتين

قيصر اعظم منه يحس رجوله ماتشيله من الرعب..

مارك يحاول يهرب الا السيارات حوطت المكان...

وطلعو الشرطه له..

ـ قف مكانك انت محاصر...

الى الملتقى..

[دمعة على السطور]

اللهم صل وسلم على محمد وآل محمد وعجل فرجهم وفرجنا بهم ياكريم وألعن من آذى فاطمة ...

ياعلي طبت عليهم الشررررطة ...

ليكون بس ياخذوا سام وياهم .........!!

بس بعد زين سوى قيصر.........على الأقل لايروحوا خلق الله ضحايا .....

عجبني المشهد ..اقصد الجزء اللي كان يوسف بوحده ويلوم نفسه...ولما تم الصلح بينه وبين مراد وعجبتني وفاجئتني حركة الخنصر مع بعض...احنا نعتبرها خصام فعلاً......

هههههههههه ذكرتيني بأيام الطفووولة ياأمووور..

ايييييييه والحين عرفنا حقيقة قصتش ياأم عبد الستااااار ...طلع مو ولدها يعنيييييي....

الله يعينها على مابلاها ..اني احس أمور كثيرة في حياة الانسان تكون طفولته أو طبيعة حياته السابقة لها تأثير فيها اقصد أم عبد الستار قبل لاتتزوج تبغى تفتك من الحياة اللي عايشتنها...ومرت أبوها قاسية عليها .....فصار كل تفكيرها بنفسها وحبها لذاتها وبس........وتبغى تتزوج عشان غرض مادي....وحتى اللحظة اللي قبل لاتدمع عيونها على عبد الستار هي تفكيرها بنفسها اكبر من كل شي وطبعاً لاننسى ولدها غمضي العزيز الغالي عندها ......>>أحس ماقدرت اوصل المعلومة اللي ببالي بس المهم يعني لأن فيوزي بدت تضرب

وهذا الغريب اليتيم هو اللي عزها وحباها وطلع ولد أصل .......ياسبحان الله.. >>متأثرة ويا عبد الستار بقوووة ....

ونوور وأماني زين راحوووا وشهدووا ...ياالله متى بس نبرد حرتنا في هالرملة ونشوووفها مطرووودة وبعد يقتصووا منها هالمجرمة هالأذية دي...الله يكفينا الشر ...

هههههههه ضحكتني سالفة أبو مجتبى يووم يهرب ليلة عرسه .....حسيتها جاية تلطيف للأجواء والأحداث الساخنة :)

عجبتني اشعار المطر ههههه مع كونها اكشنات وقتل ومشااانق ......بس تعابيره حلوووة ...

أمور ياغناتييي تسلمي ع الباااارت وأحداثه الدسمه.....من جد شد أعصاااب هالباااارت ...

تصدقي واني اقرأ اتخيل كأنه مسلسل وأني قاعدة اشاهد كل حدث صوت وصورة واتمعن ملامح الوجوووه وتعابيرهم مع كل حدث...

ماشاء الله عليييش معوذة بالله والنبي ياغناتي :)

دعواي لقلبك لايزول...

موفقة لكل خير إن شاء الله تعالى

دمتِ بعين المولى الجليل

[حلم لطيف]

ياااااااااااسلام وأخيرآ

أني مصدومة من سالفة عبد الستار مسكيييييييييييين والله
بسرعة بسرعة قولي لنا ولد من في الأخير بيطلع خخخخخخخخ
الأحداث إحلووووووووووووت كثييييييييييييير

نستنى الجديد ولا تتأخري علينا رجاءآ لا أمرآ ههههه