ضعنا يا صبرنا...

[عوامية صفوانية]

اهئ اهئ اهئ

الراوية اتصيح مؤثر جداً هذا البارت

الله يعطيش العافية خيتو اميرة المرح ابداااااع بجد


واتوقع اللي متصل على علا خالتها أمل وبجيهم بعد لبيت ليلى ان شاء الله

واللي بيكفل علي في قضيته شكله ابو علا ،،، (( اهم شئ يطلع من الشرطة ))

وان شاء الله تثبت براءته يا الله يا كريم


مشكورة خيتو على هالبارت المؤثر

جداً روووووووووعة وتسلمي

[للدموع إحساس]

مســـــــــــــــــــــــــاء الخير ،،
حسبي اللهـ ونعم والوكيل على الظالم ،،
هذا حميدو لو بس يطيح في أيدي لأقطعة تقطيع اليهد ،،
ناكر العشرة والمعروف ،،
كان زين ديكـ المرة خلاه علي يغرق وفكنا منهـ الزفت ،،
لا حول ولا قوة إلا بـ اللهـ العلي العظيم ،،
شكلي عصبت بـ القوووة ،،
قهرني هاالنحييييس ،، لكن يجيهـ يوم ،،
و الحين علي ،،
من إلي بيكفلهـ ،، أممممم أعتقد شخص من طرف علا ،،
يمكن أخوها ،،
وهذي ريموه بعد للحين نايمهـ ،،
ولا تقوم تشوف أبوها ،، يا صبر أيوب ،،
أني بطلع الحرقيهـ في كل من أشوفهـ اليوم ،، هع هع
خيوووه ،،
يعطيكـ ربي ألف ألف عاااااافيهـ ،،
على هيكـ بارت مأساوي ،،
وبـ الأنتظار بـ فارغ الصبر ،،
تحياااااااااااتي ،،
للدموع إحساس ،،

[زهور الريف]

بسم الله الرحمن الرحيم

اللهم صل على محمد وآل محمد

وعجل فرجهم

اهئ اهئ

جزء حزززززززززين

مسكين علي والله انه ما يستاهل

وهذا هالخايس حميد ما توقعته يسوي كذا بصاحبه

والاخس جاسموه يعني ولد خالتك تسوي فيه كذا..!!

ايه يالدنيا صحيح الناس صاروا يخوفوا

(( ههههههههه عشت الجو الظاهر))

بس بصراحة ابدااااع ما شاء الله

الله يوفقك يالغلا وسلامات الشاحن ما يشوف شر

سيووو

[دمعة على السطور]

ياعلي
لهذي الدرجة وصلت في حميد
وين الصداقة
وش أصله دا؟؟
ياعلي
مره تأثرت
من دخلت أم علي البيت واني جسمي يقشعر ..
وحاسة بإحساس الأم بفقد ضناها..
مأجورة الزهرا صلوات الله وسلامه عليها..


حرام اللي قاعد يصير لعلي حرام
بس لازم يظهر الحق لازم..
بانتظار البارت الجديد بكل شوق وحزن...
وهذي علا مرة عجبني تصرفها زي ماتوقعت..
يعطيك العافية خيتي الغالية أمورة..
موفقة لكل خير إن شاء الله تعالى..
دمتي بعين المولى الجليل..

[**جوان**]

...

..

يؤيؤ

ويشسوى ابــن .... << عيب يابنـتـ..


ليش كذا لو يطيح في ايدي << ويش بتسوي يازاعطهـ




بـس جزء مره روعـهـ

مشكوره خيووه ونستنـى الجـزء الجديد ..


.. تـحيــاتــيــ ..

...

..

[Hussain.T]

يا الله

جزء رووووووووعة واكشن .

ننتظر التكملهـ ع ـلى أح ـر من الج ــمر.

تحياتو

[*زهرة البنفسج*]

امورة مو قايلين الش لاتصيحينا

قصة روعه وتصيح بصراحة

التوقع كان صح ان علا بتودي هلكيكة الي ليلي

امورة طلب حبيبتي ممكن

هلمقطع الي حسين الأكرف ممكن تقولي لي وش اسم عنوان المقطع

عفر عجبتني
تسلمي عزيزتي اميرة وانشاء الله لاب توبش يصلح

[دمعة الاحزان]

امور مشكورة ع الجزء وكان قصير وقلت الك امس
وانا مو جايه اتشكر لانك تعرفي راي قلته لك امس
بس وين الجزء الجديد
يلا نقراه الليله اذا مالي نصيب الحين
عوافي عليك وربي يوفقك
والف شكر الك

[آخر شقآوهـ ..~]

حمــــــــــآآآر حميييدوه صحيح طلع قليل ذآت طآح حظه <<بدون شي طايح
إيه والله طآيح حظ وفعايه سوده زيه <<<محمقه الاخت الله يستر
الله يكون بعون هلمسكين الفقير علي..إهيء إهيء
الصبر مفتاح الفرج ..
تسلمين حبيبتي
يعطيك العافيه
ننتظر

[Princess]

مرحبا
يعطيكم الف عافيه
و مأجورين
و لا خلا ولا عدم من هالتواجد الرائع والمتابعه والتعليقات الحلوه...

هذا المقطع للغالي الشيخ حسين الأكرف حفظه الله.. من اصدار
اولياء..
قصيدة..
الكاظم عليه السلام..
ملهمتي في احداث القصه.. اضافه الى باب الحديد في صورة التصميم للروايه..
(( الباب لبيت قديم من بيوت القطيف .. شكراً لصاحبه على الصوره))
للتحميل والأستماع..
من هنا...

واليكم الجديد...

[Princess]

الحلقة التاسعه..



كان المتصل اخوها مالك ,, وصلها بيت ابو علي وقالت له هي ما بتطول نصف ساعه بالكثير فقال بينتظرها...

ــ هلا علا .. اسمعي بمشي الحين انا خليش ساعه اذا تبغي واذا ما تبغي اطلعي الحين مستعجل طلع عندي مشوار ..
علا محتاره تشوف حالة بيت ابو علي ما حبت تخليهم لحالهم...
ــ لاا خلاص روح وتعال بعدين...
ومشى مالك.. علا مهي عارفه شلون تتصرف ويا الجماعه .. الكل منهار والصمت مخيم عالمكان مافي الا الدموع..
شوي الا ام علي بصوت مبحوح:
ــ الله عالظالم.. ولدي يروح حبوس.. ابو علي .. شوف احد يكفله ..
ابو علي بتعب و بنبره متكسره : ــ مين..؟؟ اشوف مين...؟؟ شايفه حالتي تخليني اقدر اشوف احد.. ماكان عندي الا هو ولدي الوحيد وسندي... على الله وعليه ..
وين اروح ها .. وينا...؟؟

علا حست بغصه.. ماهي عارفه ويش تسوي وويش تقول ,, بودها تساعد بس عارفه ابوها حق المعرفه وعارفه اكثر الناس كيف تنظر له وكيف تتجنبه .. وباصمه بالمليون حتى لو طلبت منه يساعد بيقول ماله علاقه غير انه اساسا مهو في البلد..

واخوها مالك ما تدري به وخايفه لو كلمته يصير سين وجيم ويسأل وايد .. بس جى على بالها و قررت تكلمه...

ظلت ساكته ماحبت تدخل وتعطيهم امل وبعدين تخيبهم..

وفي بيت ابو جاسم.. ام جاسم تحوس بالمطبخ.. الا بدخلة جاسم ولدها..
ــ قوه..
ام جاسم بدون نفس من قهرها فيه على هياتته ونحاسته ويا ابوه ماردت عليه..
جاسم متضايق حده صار يتنفس بالسرعه ويشاهق :
ــ باموت انا.. باموووووووووووووت..
امه خافت .. تركت كل شي في ايدها وراحت له تركض
ــ ويش فيك؟؟؟ بسم الله على عمرك..؟؟؟
ــ ولد عمتي علي ..
ــ ويش فييييه؟؟
ــ خذوه الشرطه اليوم.. حبسوه..
ام جاسم انصرعت .. ضربت صدرها..
ــ لويه..؟؟ ومتى؟؟؟ ومين قال لك..!!

جاسم تذكر تهديد حميد .. وخاف على عمره ...
ــ مادري .. سمعت من حميد الصبح.. يقول خذوه..
ــ الوووويه زين..
جاسم بصعوبه بالغه و بغصه..
ــ يقول لقو في طراده حوايج ..
ام جاسم بهدوء مليان ريبه وخوف...
ــ يعني.. ويييه..؟؟!!
جاسم سكت...
امه : ــ ويييييه تكلممم.. مخدرااات؟؟
جاسم انصرع ..
ــ لااا.. لااا.. راديوات وجولاات.. بوقات الفريق هالفتره متهم فيها هو..
ام جاسم دارت بها الدنيا..
ــ لاا عاد.. علي...!! مستحيل ...!! ماصدق !!! وشحوال بيت عمتك ؟؟ درو؟؟
ــ اكيد درو... مادري ... باموت..
ــ ويلي عليك يا ولد حماااتي... روح.. روح نادي ابوك.. خله يجي ...

جاسم خايف من ابوه ان راح له دفنه في مزرعة ابو ناصر .. وماله عين اصلا يروح بعد هالبلوه يحس رجوله ثقيله وضايق باله ونفسه..
ــ مانى رايح.. مانى..
ــ وخنااااااااااااااااقه.. اروح اني المَره.. البس عباتي واروح له بين الرجال ابو جاسم هد الزراعه وتعال شوف مصيبة ولد اختك.. مالت علينا على هالولد .. اذلف لا بارك الله فيك.. جعلك نايبه... تستاهل كل فعايل ابوك فيك ..
وصارت تدعي وهي رايحه تلبس عباتها..
زينب سمعت الصريخ في البدايه قالت شي معتاد من امها وابوها ناحية اخوها
بس لما سمعت اسم علي .. وطاري عمتها تصروعت ..
طلعت تركض..
ــ ويش صاااير؟؟؟
علمتها امها باللي قاله جاسم..
زينب بلا وعي صارت تصيح.. لبست عباتها..
ــ روحي انتين بيت عمتي اني باروح لأبوي باقول له..
ــ انتبهي لرووحش.. امانة الله..
جاسم واقف متيبس ولاااا كلمه..
طلعو عنه .. ظل هو يدور بالحوش .. وهو يفرك في راسه.. يحس نفسه مخنوق متضايق.. كان في حوشهم كم دجاجه يتمشو مرت عليه وحده طيرها بشوته ..
ابدا ماله خلق ..
دخل غرفته اخيرا وقفل عليه الباب...
زينب وهي في طريقها لمزرعة ابو ناصر .. طلع ليها عادلوه من احد الزرانيق..
ــ اووووووووووه
زينب مهي فاضيه له و مره نفسها في خشمها وحالتها حاله..
ــ وخخخخخخخخر عني زيييين
ــ ووووينااا بتتتررروحي؟؟
ــ ويش دخلك.. تباااعد...
عادل يعاندها ويجاكر..
ــ بتررروحي بيييت عممي ابببو عللي بببارووح اياااش..
ــ حريقه تحرقني .. ويش عرفك بي . مكتوب على عباتي اني زنبوه.. . ياعلي بتذبحني انت.. فااارق خلني امشي مو فاضيه لك..
ـــ بببااااااااااااارررروح اياااش...
ولا يسمعو الا صوت واحد يصرخ..
ــ عادلووه.. هيه..
عادل من شافه انصرع ..
ــ حححححححح صيدددني..
وهرب..
التفت زينب وهي متصروعه.. لقته اشرف في سيارته ..و كان بيروح مزرعة ابو ناصر متصل عليه ناصر يبغاه ضروري هناك...

اشرف انتبه ليها وهي تمشي بسرعه .. شوي وتركض وطريقها نفس طريقه..
كانت المزرعه على بعد 5 دقايق تقريبا بالسياره..

وصل قبلها وهو شاك في الأمر .. وين رايحه هالبنيه ومين هي ؟؟
ودخلته المزرعه قابل ابو جاسم .. وتذكر كلامه وياه ذاك اليوم انه بيكلم ابوه .. وضرب جبهته وهو مفتشل :
ــ اوه نسيييت ما كلمت ابوي ولا ذكرته .. ويش هالفشيله..
تقرب من ابو جاسم:
ــ قواك الله عمي ..
ابو جاسم ينفض ايده من الرمل ..
ــ هلا .. هلا بيك يا ولدي يقويك .. شحوالك؟
ــ الحمدلله بخير... وين ناصر ؟؟
ــ راح مناك .. الناحيه الغربيه للزراعه..
ــ زين.. باروح ليهم..
اشرف رايح ليها الا ابو جاسم يكلمه:
ــ ياولدي تعال... نسيت...
اشرف وقف وغمض عيونه وهو مفتشل وفي باله:
ــ ياعلي الله يستر ,, عليك مخ يا اشرفوه قوطي .. يا فشلتي من الرجال
التفت لأبو جاسم..
ــ خير يا عمي..
ابو جاسم بأبتسامه :
ــ لمبة سيارتك اللي داخل مولعه عفر ما سكرت الباب عدل..؟؟
اشرف ابتسم :
ــ هههههه ايه ما سكرته.. تسلم عمي..
ورجع بيسكر باب السياره انتبه لجواله نساه داخل .. شاله..
ــ ونسيت جوالي بعد..
ابو جاسم ابتسم في وجهه ورجع يحوس في الأرض ..
اشرف تنهد داخل قلبه وفي باله..
ــ مسكين ابو جاسم الهم ماكل قلبه تلاقيه ناسي وحتى لو متذكر مستحي يتكلم.. الله يغربل شري .. خلني اكتب مذكره في جوالي حق لا انسى.....

وصار يكتب ومدة هو يكتب الا بدخلة زينب الزراعه ما انتبهت له كان متسند على كبوت السياره.. فكرت السياره مافيها احد.. طالعت قدامها يمين وشمال مافي احد وهي غايب نفسها من الركض .. فتحت وجهها ووصلت لأبوها وهي تصيح ..
ــ يبااااا الحققق..

ابو جاسم انصرع ورفع راسه شكل بنته صروعه اول مره في حياتها تجي له الزراعه و تصيح ومهي طبيعيه... قام يركض .. مسح الرمل في وزاره ,,
ــ ويش صااير ويش بها امشش؟؟؟
زينب تحاول تاخذ نفس مهي قادره من الركض والصياح:
ــ مو امي .. وولد عمممتي .. علي.. خذوه الشرطه ويبغو كفيل له..

اشرف انتبه ليها من دخلتها ومتحرج لأنه شافها.. غض النظر .. بس الفضول دفعه انه يطالع حالتها مهي طبيعيه .. دموع و صياح وشكلها مصيبه..
تنحنح..
ــ احم يالله..
ابو جاسم غطى بنته..
ــ يا رجى الله...
اشرف : ــ خير يا عمي ويش صاير... ؟؟
ابو جاسم بلا وعي من الخلعه:
ــ خير .. ان شالله خير... ياولدي روحتك لناصر تكفي كلمه قول له ابو جاسم طلع من الزراعه ضروري خله يعلم ابوه.. باشوف ويش حل علينا من مصيبه..
اشرف : ــ عساه خير.. عمي اوصلك اسرع.. لا تمشي...
ــ لا ياولدي ما نبغى نكلف عليك...
زينب مهي قادره مبين عليها التعب وتتنفس بسرعه...
اشرف : ــ ياعمي البنيه تعبانه من الركض وانا جاي شفتها وراي .. مافي كلافه اركبو واوصلكم..
زينب منحرجه.. نعالها من الركض والطريق في هالجو البارد كله طين و حالته حاله..
همست لأبوها .. همس مبحوح .. ومن التعب صاير مسموع ..
ــ نعالي وصخ ... خلنا نمشي يبا
اشرف سمعها :
ــ عمي.. السياره وراعيها يفدوكم.. تفضلو.. تتنظف السياره شدعوه..
ابو جاسم ماله وعي ولا بالة شي .. باله بالة ولد اخته..
ــ تسلم يا ولدي ماقصرت.. امشي انا بتصرف ..

فتح ابو جاسم باب السياره الخلفي وخلى زينب تقعد ورجولها برى.. فصخت نعالها ورفعته لأبوها..
اخذه وراح لبركه رفيعه فيها ماي كان يتجمع فيها ماي المطر و اذا احتاج الزرع يسقوه .. يفتحوها ويخلو الماي يجري له..
الماي فيها للنص .. و ابو جاسم قصير ما يوصل ..
اشرف كان يكلم ناصر يقول له بيتأخر شويات وعلمه عالسالفه بسرعه و قال له يقول لأبوه..
خلص المكالمه وانتبه لأبو جاسم وهو يحاول يغسل نعال بنته.. راح له ..
ــ جيبه عمي ,, عنك انا اغلسه..
ابو جاسم تلون وجهه وحس بأحراج:
ــ لا ياولدي خليه.. مو مقامك.. تكرم... خليه عنك..
ابتسم اشرف :
ــ عمي .. جيبه شدعوه.. وانت من الخلعه صاير منت طبيعي روح اركب انا باغسله..
كان اشرف طويل .. ركب عالبركه و غطس النعال في الماي.. ولما طلعه ابتسم.. وفي باله..
ــ هههههههه ما شالله رجولها صغيره..
طلع لسانه وابتسم.. ورجع يهلوس ويا روحه..
ــ استحي يااولد..

راح السياره ركب وعطى النعال ابو جاسم..
ابو جاسم دار لبنته وعطاها نعالها::
ــ وين راحت امش ؟
ــ بيت عمتي..
اشرف :
ــ اوديكم بيت ابو علي يعني..؟؟
ابو جاسم :
ــ ايه الله يخليك.. ماعليك كلافه..
اشرف ابتسم : ــ عمي .. لا كلافه ولا شي..
ــ الله يطول عمرك ويحفظ شبابك و يبلغ اهلك فيك..


تابع<<

تابع <<<

[Princess]

وصلو بيت ابو علي .. عادل كان واقف على بابهم.. من شاف اشرف بالسياره..
وابو جاسم قدام ونزل ونزلت زينب ..
قام التصفيق والجباب..
ــ كلوووووش هيه .. هيه.. معارررريس هههههههههههههه .. زينب زفوووهاااا فففي سييياااارة .. زززينب مييين هذذذااا اللي ركككبتي وييياااه ... ريللللش؟؟؟
زينب فتحت عيونها..
وهي تطق باب بيت عمتها:
ــ ريلي في عينك..
اشرف مو قادر على كلام عادل وكان يحاول يكتم الضحكه.. بس لما سمع زينب بعفويتها وهي تعبانه ومحمقه وماليها نفس .. وهي تقول ريلي في عينك
ماقدر.. فقعها ضحكه..

ولا يشوف الا ابو جاسم يصرخ في عادل صرخه تطفره لآخر الفريق.. خلاه ينحاش من الخوف...

فتحت علا الباب لأنها لابسه عباتها..
زينب انصرعت وفي بالها... ويش جيبها دي !!!! وعلى طول لا سلام ولا كلام..
ــ وين عمتي؟؟؟
ــ داخل..
ــ زين تغطي ابوي وياي..
تغطت علا و دخلت داخل.. ودخلو ابو جاسم وزينب المجلس .. لقو ام جاسم قاعده جنب ام علي تواسيها..

ام علي من شافت اخوها قامت له حضنته وصارت تصيح وهو يخفف عنها..
ــ لا تصيحي خيه.. بنكفله.. ان شالله بيطلع.. هونيها وتهون..
ــ والله ولدي مو كذا... حسبي الله عالظالم..
زينب راحت لليلى حضنتها.. وصارو يصيحو..
ليلى تعصر زينب بالقوه و صياح:
ــ اخوي مو كذا.. لا تصدقو..

ريما قعدت من صريخهم وصياحهم...وصايره طول الوقت تحقق .. :
ــ وين كان البارحه..؟؟ حق ويه طالع...؟؟ ولويه متوتر..؟؟ ياعلي .. الله يستر
ليلى عصبت فيها:
ــ لا تحققي الحين.. فينا اللي مكفينا ولا تهدري وتزيدينا هم على همنا..
ريما حمقت:
ــ وانتين كل تسوي حالش ... يعني هو اخوش بس مو اخوي.. ترى حتى اني احاتيه .. بس مستغربه منه حق ويه طالع الفجر في هالمطر والصبح جو خذوه..
زينب حمقت فيها وبلا وعي صارت تصرخ:
ــ يعني ويه.. هاا.. ويه... وياهم انتين بعد تتهميه.. لو ويش قصدش .. سكتي بس واللي خلقش مافينا شدة هدره..
ريما حمقت وصارت تصرخ وتصيح: ــ ويش فيكم انتون علي .. كلكم علي .. افففف وانتين ويش دخلش .. حشا.. ماصار شي وانتين تتلقفي
ليلى مافهمت مقصد اختها: ــ ماصار ويه.. كل هذا وما صار.. الله كريم.. يدبرها ان شالله ويحلها لينا..
زينب فهمت عليها.. جتها غبنه وسكتت..
ريما ما سكتت وصارت توضح: ــ اقصد زنبوه اني .. ماليها دخل في علي .. لا تسوي حالها بعد هو اخوي ترى وهو بس ولد عمتها ماصار شي ..
ليلى خلاص وصلت حدها هم في ويه وهي في ويه .. علا تحس نفسها ضايعه قاعده وياهم بس تصيح وتراقب الوضع..
ما سمعو الا ابو جاسم يصرخ في ريما:
ــ ولعنه.. لا حيا ولا حشيمه.. انشبي ..
ريما زادت صياح:
ــ ويشو انشب.. حق وييييييه..
ابو علي ببرود و بصوت مذبوح الم:
ــ ريما.. اطلعي برى هالمكان..
ريما: ــ حتى انت.. وين اروح..
ــ ارجعي .. نامي.. فكينا من هدرتش..
ريما وصياحها يزيد: ــ ماني نايمه..
ابو علي يصرخ صرخه مافي حياته صرخها على بناته:
ــ ريمووووووه ذلفي لا قسم بالله اقوم لش...

ريما خافت وطلعت وهي تصيح وتتحمق بينها وبين نفسها.
ــ كلهم علي .. مادري اذا قمت لي ويش بتسوي..
دخلت غرفتهم و كفخت الباب...
علا مستنكره من تصرفات ريما.. هي الغريبه عنهم متأثره وحزينه و ابدا ماجاها شك من ناحية علي مع انها ما تعرفه.. وهذي اخته قاعده تحقق و تشكك وتزيد جرحهم جرح...

اشرف رجع الزراعه.. لقى ناصر ومعاه مالك..
اشرف كشر حواجبه وفي باله..
ــ لو ادري به هذا موجود ما جيت..
سلم عليهم...

ناصر : ــ عليكم السلام.. هاا .. وصلته؟؟
ــ .. ايه الله يكون بعونهم شكلها سالفتهم سالفه..
ــ ويش صاير ..
ــ مادري بالضبط بس اللي فهمته ...
وصار اشرف يعلم ناصر بالسالفه..
مالك فتح عيونه: ــ لا تقولو هو اللي شلح البي ام حقتي كفراتها هذيك الليله...
ناصر : ــ حسب الكلام .. يجوز هو..
اشرف : ــ تاهمينه هو .. شكله بريء ماله شغل
مالك : ــ ياعساه.. ويشو ماله شغل.. بيحجزوه وبيتهموه منا والطريق اكيد صايدين عليه شي..منهو هو بالضبط .. هذاك اللي يشتغل سماش صح ؟؟
اشرف حمق فيه: ــ خلاص خل الرجال بحاله..
ــ ويش فيك تدافع.. لا يكون نسيبه؟؟
اشرف بلهجة قهر: ــ ايه ويش عندك؟؟
ــ هههههههههههه من وين لوين.. ؟؟؟؟؟؟؟؟؟
ناصر ماعجبه الوضع:
ــ خلاص انت وياه .. كل تشابقو.. يلعن شكلي يوم اتصل فيكم..
اشرف سكت..
مالك قام يستظرف :
ــ هههههههه يلعن شكلك زين
ناصر : ــ بعد.. اقول انشب .. اسمعو.. سمعت الليله فلم رهيب في السينما في البحرين بيعرضووه.. شرايكم نروووح.. انا الصراحه متحمس له سمعت به من فتره ويمدحو فيه ما يتطووف..
مالك : ــ ماااااا عندي مانع...
اشرف : ــ ولا انا...
ناصر : ــ جوازاتكم وين؟؟ عندكم لو في البيت..
مالك : ــ انا في صندوق السياره ماشلته ..
اشرف : ــ لا انا في البيت باروح اجيبه و اجيكم..
ناصر : ــ اوووكي .. ننتظر..

وبس رجع اشرف ليهم.. انطلقو البحرين.. ونسى مالك اخته في بيت ابو علي...

ابو جاسم رجع بيتهم .. بدل ثياب الشغل وراح قسم الشرطه.. و صار يحاول يخلص اجرائات كفالة ولد اخته...


قريب يأذن المغرب.. ولا رجع ابو جاسم..
ام علي الدقيقه تمر عليها كنها ساعه والساعه كأنها دهر..
ليلى وام جاسم وزينب وعلا حواليها...

علا طلعت جوالها بتتصل في اخوها طول عليها بزياده قريب يأذن المغرب
ليلى ابتسمت في وجه علا..

ــ يعطيش العافيه غناتي.. ضايقناش بهمنا.. ماقصرتي...
علا بأبتسامه هاديه:
ــ الله يعافيش .. ولو .. ماسويت شي ...باشوف اخوي..
اتصلت عليه.. وانصرعت.. رنة جواله مهو في السعوديه..
مالك من سمع رنة جواله وهم في كوفي شوب في البحرين.. ضرب جبهته..
ــ اوووووه
ناصر : ــ بسم الله ويش فيك .. ومين المتصل ؟؟
مالك يأشر عليه دقيقه.. ويرد على اخته:
ــ هلا خيه..
ــ اهلين.. وينك.. يللا تعال تأخرت..
مالك مو عارف ويش يقول:
ــ انا.. بعييييييد ..
علا انصرعت:
ــ من الرنه عرفت.. لا تقول في البحرين..
ــ ايه..مسافة الطريق وباجي..
ــ لالا.. خلاص لا ترجع.. بادبر عمري
ــ ويش بتسووي؟؟
ــ بتصل على خالتي امل .. باشوف حسين اذا يقدر..
ــ زين.. اذا ماقدر اتصلي علي..
ــ اوكي..

سكر مالك .. ورمى جواله عالطاوله .. وحد ما عنده :
ــ افففففففف
ناصر : ــ هذا ويه.. طيرتنا...ويش صاير
ــ خخخخخخخ نسيت اختي..
ــ نسيتها ؟؟ وين؟؟
علمهم بالسالفه..
ماقدرو عليه ثنينهم ضحك..
مالك يطالعهم على جنب:
ــ اضحكو.. ويش وراكم..
ناصر : ــ ههههههههههههه خوش اخو.. والله سالفه.. اشوى ما عندي خوات كل اخوان..

تابع>>

[Princess]

علا مرتبكه.. مهي عارفه ويش تسوي وحاسه بأحراج.. وهي ما تندل الطريق وتحس بيتهم بعيد.. اتصلت على خالتها امل.. اللي قبل لا تروح لعلا رسلت ليها رساله وخبرتها باللي بتسويه...

ــ هلا خاله..
ــ هلا وغلا .ها بشري ويش سويتي؟؟
ــ اني ويا ليلى بعدني..
ــ اووووه تمام حركات.. طابت ليكم القعده...
ــ الحمدلله
ــ ويش فيه صوتش ؟؟
ــ بعدين.. متى يرجع ابو سجاد؟؟
ــ لويه..؟؟
علمت خالتها بالموضوع..
امل : ــ ياعلي ويش بيدي عليش توه طالع من ساعه رايح العمل وخبرش دوامه نايت شفت..
علا قامت وقفت عند باب المجلس:
ــ الحين ويش اسووي..
ليلى قامت وراها .. حست عليها متوتره وفهمت السالفه..
مسحت على ظهرها :
ــ ابقي معانا لليل ..

التفت ليها علا لقت في عيون ليلى حزن دفين.. مهو وليد هاليوم وهاللحظه..
حست في عيونها الذبلانه المليانه تعب كلام وايد..

ارتبكت من طلبها وابتسمت.. وبهمس :
ــ تسلمي غناتي.. ماعليه بدبر لي احد يرجعني..
امل : ــ ها.. ويش تقولي؟؟؟

ليلى تكلم علا بعتب هادئ : ــ يعني.. محنا قد المقام .. نسيت..
ورجعت لأمها ومرت خالها وزينب بتقعد وياهم
علا تأثرت .. ماكان هذا قصدها من الرفض..
امل : ــ الوو .. علا وينش..
ــ هلا..
ــ ويش كنتي تقولي..؟؟
ــ لا.. كنت اكلم ليلى.. تبغاني اظل وياهم لليل
ــ تمام.. ظلي وياهم لرجعة مالك.. رجعته يمر عليش..
ــ استحييي اول مره فرضا تأخر..
ــ عادي بيت ابو علي طيبين.. وناس اجاويد.. وليلى خوش بنيه.. وصدقيني مابتصيري ثقله عليهم الا اذا عاد تصرفتي زي ذاك اليوم.. فخلش آدميه لا كف..
علا ابتسمت..
ــ ان شالله.. باكلم مالك اجل وباقول له..
ــ على خير..
اتصلت في مالك وقالت له رجعته يمر عليها..
صار يهدر..
ــ بيت ناس غريبين يمكن اتأخر انا للفجر ويشو تقعدي هناك لهالحزه..
طلعت علا من المجلس وبهمس صارت تكلمه:
ــ ويش تبغاني اسوي ريل خالتي دوامه نايت شفت.. ارجع مشي ؟؟ ما اندل..
ــ والله ما تدري عمتش ان ما حد فينا في البيت الفجر الا تشب حريقه.. وثاني شي ويشو تقعدي هناك.. وتعااااالي.. هم بيت ابو علي .. علي ولدهم اللي خذوه اليوم الشرطه صح..
ــ ايه..
ــ ويش عرفش بهم انتين بعد..
ــ مالكوه .,, مو تحقيق هو.. اعرف اخته خويتي من ايام الدراسه.. خلاص قلت لك رجعتك مر علي..
ــ احمدي ربش ابوهم اعمي والا شان رجعت لش من البحرين..
ــ حرام عليك.. استحي عاد.. ويش لي اتصل فيك لو منتظره ريل خالتي احسن لي المشكله يرجع الصبح متأخر اعظم منك..
ــ تبغي اكسر رقبتش.. خلاص باي .. رجعتي امر عليش باي..
ــ باي..

ناصر واشرف يطالعو في بعضهم..
مالك : ــ ويش فيكم..؟؟
ناصر : ــ لا ... ابد ...سلامتك.. غريب عجيب .. شباق مو مكالمه ما بقى احد من الرايحين والجايين ما تفرج علينا..
ــ ههههههههه ويش اسوي بها.. عملت لي قلق كل شوي متصله..ذكروني بس رجعتنا الفجر اوصلكم وامر عليها لا انساها بعد..
ــ على خير..

.. وراحت علا لليلى.. قعدت جنبها وهي مستحيه :
ــ بقعد لين يرجع اخوي من البحرين بيرجعني..
ابتسمت ليلى : ــ حياش الكريم..

واذن اذان المغرب...
ولا خبر عن ابو جاسم ولا علي ... تمسحو و صارو يصلو..
خلصو من الصلاه.. وظلت ام علي كعادتها على سجادتها.. وهالمره دعاها يفطر القلب ..و تردد بألحاح و ألم ..
ياراد يوسف على يعقوب.. رد ولدي علي سالم من الشر ..

الا باب بيتهم يطق..
هالباب اللي صدى طقته مخيفه..
فتحت ليلى الباب الا هو خالها ابو جاسم .. وعلى وجهه ارتسمت ملامح الحزن
ليلى قلبها انقبض.. ظلت فاتحه الباب..
ابو جاسم:
ــ سكري الباب يا بتي..
ليلى بهمس مرتعب:
ــ وين اخوي؟؟
ابو جاسم وهو رايح المجلس:
ــ الله كريم يا بتي .. الله كريم...
سكرت الباب... وتسندت عليه وصارت تصيح...
ابو جاسم دخل المجلس وتغطت علا .... تلقته زينب وام جاسم..
ابو علي صار يسأل:
ــ علي.. جبته؟؟ طلع..
الا بجية ام علي وهي بأحرام صلاتها.. باب المجلس كان قريب من باب الطريق .. شافت ليلى متسنده على الباب وتصيح..
خابت امالها..
جرت خطواتها للمجلس .. ووقفت على الباب... و بصوت متقطع:
ــ ما رضيو يطلعوووه؟؟
ابو جاسم بأسى:
ــ يقولو كم يوم يبغوه يحققو وياه.. وتالي بيطلعوه على كفالتي .. كم يوم بعد وبيرجعو يستجوبوه.. لين يخلصو الأجرائات.. اذا قدر ينفي عنه التهمه مدة التحقيق بيفرجو عنه.. اذا ماقدر بيحبسوه مده حسب تهمته و نوعية السرقات..

ام علي ماقدرت.. قعدت على الباب ورفعت احرامها غطت وجهها وصارت تصيح... وتنحب وتصرخ وتضرب فخذها... :
ــ ويلي عليك ياولدي .. ويلي عليك يا شباب.. ويش بيدي عليك

ورجعت حالة الصياح للجميع...

وفي الصندقه.. حميد يشيل أي شي يصير دليل ادانه له.. جمعهم بيبيعهم في اسرع وقت للجماعه اللي يتعامل وياهم... الا بجية الذيب ..




الى الملتقى..

[آخر شقآوهـ ..~]

آآآآخ ويلييي عليك يآآآعلي يامسكيين الله يفرجها علي
الله كرييم .. الله يكون بعون أهله ..
حــــــــرآآآم على حميييدوه تصقعه اللي ماعنده ذرة إحساس
الله يطلعه برآءة يآآرب ..
تسلمين قلبو ع الجزء
يعطيك العافيه

[آسوآآر الآلــمـ]

يالله أحس علي مسكين

الله يعييييين بالجزء الجاي

أحس التهمة بتلبس فيه

ننتظر الجاي أختي
_______