`·.¸¸.·´´¯`··._.· (اسف على قلبي .. مو عليك ياحبي) `·.¸¸.·´´¯`··._.·

[كيان مجنون]

معرووووووووووووووووووووفه
~~~~~~~~~~~~~~~
ننتظر التكمله

[دمعة الاحزان]

تسلمي امووووووووووووور ع القصه
موفقه
وفي الانتظار

[أمل الظهور]

حركات الاحداث

اتوقعها هاذي اللي كان يحبها ..مو ...


يلا مو مو كملي ..ارحمينا لكي نرحمك باللقاء خخخ...

نفسي تخلي القصة تخلص مع اللقاء حركتات صح ...

سي يووو

[.:روح وريحان:.]

يسلمو اميرة على التكمله وماباقولش ابغى الحلقة الجاية طووويله اخاف ينكسر كيبوردكم من معكم يحلو القاءوالقصة خلينا راضين احسن
خخخخخخخخخخخ

[بوفيصل]

يسلموووووووووووووووو والله يعطيكي العافيه

ولا تطولين علينا بالتكمله اوكي

مع خالص تحياتي بوفيصل

[العنود]

مشكووووره خيتووو
وبليييييييييييييييييييز
كمليييييييييها
ولا تطولي علينا
لا عدمناك
تقبلي تحياتي
العنود

[hope]

قصه روووعه بجد والله

مشكوورة يالغلا

وانتظر تكلمة القصة

تحياتي

[نور الهدى]

معروووووفة على قولة خواتي الي قبلي


يالله بنتظار التكملة



تسلمين خيتو

[mrboch]

ننتظر تكملة القصة الحلوة
ويعطيك ألف عافية خيه

[Princess]

يسلموو جميعا على التفاعل
ومثل ما قلتوا معروفه
بس ياترا ويش كنتوا تتوقعوا سبب هالجيه
يللا اقروا هالحلقه وقولوا لي صح توقعكم والا كان شي ثاني

الحلقه الثانيه والعشرون

ودخلت الزبونه..
ماجد ما رفع عينه عليها .. قال تفضلي .. بدون ما يطالع .. ولكنها ما قعدت.. رفع ماجد راسه وما سمع الا صوت مر عليه من سنين
ــ هلا ماجد كيف حالك
رفع ماجد عينه بيشوف مين هذي
وتفاجأ بالمره..:
ــ سحر.. انتين سحر.. والا غلطان
ابتسمت ابتسامه بارده .. صفرا .. والشحوب كان طاغي عليها كأنها في الخمسين من عمرها
ــ ايه سحر اني .. اخبارك ماجد عساك بخير

سحر.. حبيبة ماجد الأولى.. اللي صارت المشاكل بسببها.. وتركته بعدها..

ــ الحمد لله بخير.. تفضلي.. بويش اخدمش..
جلست سحر وعينها على الأرض كانت بالمره متغيره.. حزن طاغي عليها.. ووجها ذبلان ومخطوف لونه لو تغطيه استر لها وارحم لحالها بس هي مهي متعوده..
وبنبره مخنوقه .. قالت جمله.. تقطعت تقطيع يالله طلعت وخلفت وراها دموع:
ــ ابغاك تسامحني..
ماجد وبكل استغراب وبنبره مسخره
ــ اسامحش.. هه.. بدري والله على ويش والا على ويش
وتقطع سحر كلامه..
ــ ماجد اني تعبانه.. ويالله حصلتك.. وابغاك تسامحني مافيني حيل على العتب
ــ العتب ؟؟ ما بينا عتب...
ــ سمي كلامك الحين اللي تسميه اني جايه اعتذر ,, واتمنى السماح.. ما باقي شي من عمري ما باقي شي.. ارجوك سامحني
وصارت تصيح صياح فظيع..
صب ليها ماجد ماي .. شربته وتنهدت من قلب..
ــ سامحني ارجوك .. ويوسف بعد اتمنى توصل له اعتذاري
ــ يوسف بعد ويش فيه اثنينكم بلاء في حياتي .. وعلى فكره تراني خاطب ومبسوط ومانا قاصر مشاكل اوكيه
ــ هه.. ومين قال لك اني اعتذر عشان ارجع لك.. .. قالت هالجمله ودمعتها تنحدر.. وكملت: اني خلاص ايامي معدوده
ــ ايامش معدوده ,,خير ان شالله
ــ ماجد ابغى ارتاح.. ابغاك تسمعني للآخر وبعدها اتمناك دخيل الله تسامحني
ــ طيب قولي << قالها بكل تجهم..
ــ اااا.. الصراحه.. من قبل ما تعرفني ... اني بنت ماني اوكيه
ماجد استغرب منها ومن صراحتها هذي وقطع كلامها وهو يسخر
ــ هه مو اوكيه وليش بالله ..
ــ ماجد لو سمحت ممكن تسمعني للأخير وما تقاطعني
ــ طيب .. تفضلي ..
ــ من يوم اني في اول ثانوي واني اعيش حاله انحراف لا حسيب ولا رقيب اطلع وادخل بكيفي.. مع اللي ابغى ووقت ما ابغى.. الوضع في بيتنا عادي .. ما احد فاضي لأحد.. ابوي دوم يروح امكان بعيده لشغله.. وامي مشغوله بإخواني .. واخوي بطالي عطالي وهمه بقلبه و بالشوارع يدور رزقه واني تايهه بينهم وضايعه ..
وتسكت شوي ...: وتتنهد من قلب وتكمل كلامها ..
تذكر ياماجد يوم تصيدني نازله من سياره غريبه .. كذبت عليك ومنت اول ولا اخر واحد كذبت عليه فحياتي.. حتى اللي كنت راكبه وياه كذبت عليه.. كنت العب بالنار.. كنت بس طلعات وما سويت شي قوي بس ماهمتني سمعتي. وشرفي اللي راح يضيع فيوم من البلاوي اللي اسويها ...
والكذب كان عندي فنون.. بس يا ماجد.. ما حبيت احد في حياتي كثر ما حبيت ولد اخوك يوسف.. من جد استجنيت عليه.. وكان قاهرني ليش ما يعبرني.. كل الشباب يتمنو اشاره مني وهذا شايف حاله علي ليش.. فيوم كنت لحالي في البيت.. وجا هو يبغى اخوي.. دخلته المجلس.. وقلت له شوي وانادي عليه.. واصلا اخوي ما كان في البيت.. ومهلت شوي ورحت ليوسف واني ..

وصارت تصيح صياح ندم وقهر ,,والكلام يطلع بغصه

طبعا يوسف انصدم مني .. قام لي زي المجنون وعطاني كف على وجهي وقال لي كلام قهرني داك الوقت بس الحين ندمانه لأني رميته وراي وما سمعت كلامه..
قال لي:
ــ اذا انتي منتي خايفه على شرفش وسمعتش... انا خايف على شرف وسمعه صديقي وانا في بيته وتراني مو من النوع اللي فبالش .. انتبهي لروحش الله يستر عليش قبل لا يوقع الفاس بالراس.. واسف على عمي يوم يحبش من جد .. حرام هالخيانه هذي بحقه.. انا كنت سامع عنش كلام بس قلت لا حرام.. اظلمش بحسب كلام... لآنه في شباب طايش وعديم اخلاق اذا البنت ما عطته وجه يطلع عليها كلام واشاعات بس الحين تأكدت بنفسي ..
كنت اشوف عمي مرتاح ومبسوط وياش عمي هذا اخوي وما ارضى اخونه انا,,, استغفري ربش يابنيه والله يهديش..
وطلع عني وهو مقهور.. واني شابه حريقه شلون يتجرأ ويضربني.. وليش يسوي فيني كذا واني اللي حبيته ومن القهر قررت .. اني اصير فلتانه زود وزود
وكثرت طلعاتي وامتدت حركاتي للألعن والأخس وكل يوم مع مصيبه.. لين فيوم صار اللي اكيد لأي شخص بيسوي سواتي .. اكتشفت اني حملت مرض الإيدز من حوالي سنه وهو فيني .. وبالكثير 3 او 4 سنين وخلاص انتهي.. الحين صار لي 3 سنين و7 شهور.. هه.. صرت احسب ايام عمري.. ما حسبت افعالي وحاسبت روحي قبل.. طبعا ما يحتاج اوصف لك حال اهلي.. واني العار ليهم..ماجد دخيل الله ابغاك تسامحني ويوسف بعد اتمنى يسامحني.. لأني كذبت في حقه.. وقلبت السالفه عليه.. ارجوك ياماجد

ماجد.. مذهول من الكلام.. صار يفكر بحاله.. باللي سواه.. بدنيته شلون تقلبت وتغيرت طبايعه عشان وحده ما تسوى
ويوم طاح الفاس بالراس جت تتعذر ووتتوب وياكثر هالأصناف..صار يفكر بيوسف اللي كان اكثر من اخو بالنسبه له وشلون ظلمه وقسى عليه وشلون علاقتهم الحين بسببها
ضحك ضحك من قلبه.. صابته ردة فعل عكسيه
ــ بالله عليش.. متأخره في اعتذارش لويش ها.. لو مااللي فيش الحين.. كان اقسم باللي خلقني ما راح تفكري حتى انش تهوني عن فعايلش مو بعد تعتذري..
صارت سحر تصيح وصياحها يزيد..
ــ ارجوك يا ماجد .. سامحني .. وربي ندمانه ادري الندم ما ينفع اللحين ادعي لي ربي يسامحني وسامحني انت بعد
ــ روحي الله يسامحش دنيا واخره.. روحي الله يساعدش على بلاش
قامت سحر .. وهي مبتسمه والدمعات تتناثر
ــ شكرا ماجد الله ييسر لك ويوفقك .. مع السلامه وادعي لي بالرحمه والمغفره
ــ مع السلامه. والله يغفر لش ويسامحش.
طلعت سحر وتركت وراها افكار وهواجس تدور فبال ماجد.. حاس نفسه مو طايق الدنيا مو طايق نفسه.. ما شاف روحه الا بعفويه يدق على سجى ويقول ليها انه جاينها حالا..
سجى خافت .. نبرة صوته ما عجبتها ..
ويوم وصل .. وجلس وياها,, مسك ايدها .. وصار يطالع في سجى وعيونه حزينه
ــ احضنيني يا سجى .. تعباااان ..
سجى خافت عليه ويش فيه .. حضنته وصار يصيح..
سجى ماتت من الرعب .. ماجد يصيح.. ماجد الشديد .. تشوف دمعاته وبحراره وحزن عنيف ..
ــ ماجد حبيبي ويش فيك
وهو كل ما كلمته عصرها ودمعاته تزيد..
ــ سجى .. انا قارف نفسي .. قارف دنيتي .. قارف سواتي.. سجى.. يوسف ولد اخوي.. محتاجه.. ابغاه.. ابغى اريح قلبي.. من سنين تعبان وانا دوم متخالف وياه.. ظلمته وتعبته.. ابغاه.. سجى ويش اسوي..
سجى مهي فاهمه شي.. ويش صاير .. ماجد حبيبي هدي واقعد وقول لي ويش صاير
,, وحكى ماجد القصه لسجى ...
سجى بهتت.. ومهي عارفه ويش ترد ويش تقول.. كيف صار كذا وليش ومسكين يوسف هو اعظم الضحايا في هالسالفه..سجى دقت على جنان بسرعه
ــ الوو هلا جناني اخبارش عمري
جنان وصوتها فيها النوم .. نومة عصريه بعد المدرسه
ــ ااا ااه.. تمام حبيبتي .. اخبارش انتي
ــ الحمد لله اسفه عمري قعدتش من النوم بس ضروري
ــ لا عادي خير عسى ما شر
ــ عطيني رقم يوسف بسرعه
ــ ويش صاير
ــ لا بس عمش يبغاه..
ــ ولويش مو عمي اللي يكلمني
ــ جنان عمش تعبان ويبغى يوسف يوديه المستشفى
ــ ياعلي سلامته .. زين سكري واني شوي وارسله لش
ــ الله يسلمش غناتي يللا باي
وشوي جاها الرقم
وعلى طول سجى دقت عليه

يوسف كان مع قاسم يتفتلوا بالشوارع
ويدق الجوال ..
يوسف يطالع الرقم بدون اسم..
ــ ما يندرى مين.. خخ قاسموه تتوقع ولد والا بنوته
ــ هههههههه صدق متفرغ..
ــ لا شكلها بنوته
ــ لويش يعني
ــ من الرقم ..خخ تحليل فاشل بس البنات يحبوا الأرقام السهله واللي تكرر اكثر من رقم ..لا شكلها بنوته.. شوف هذا هو سكت.. لو ولد قلع الدنيا عشان ارد.. خخ ..
ــ هههههه.. لويش كم الرقم..
ــ والله فله هالرقم ********** شي هااا
قاسم من سمع الرقم ضرب بريك..
ــ وويعه.. ويش فيك كل هذا من حلاة الرقم بغيت تكسرني انت..
ــ عيد الرقم..
ــ هههههه لويش تبغى تشتريه حلو صح
ــ يوسفوه مانا فاضي لمصاختك .. مو **********
ــ ايه بل عليك تف تف لا احسدك صدق بسيط بس مو تحفظه من اول مره وبهالسرعه..
ــ هذا راقم سجى .. يوسفوه هذا رقم سجى
ــ هااا.. احلف .. ويش صاير ..
ــ ما ادري .. دق عليها وشوف
وما مدى يوسف يدق .. الا يكتشف ان رصيده خلص .. خخخ اخر مكالمه له مع قاسم قال طلعته بيشتري بطاقه شحن.. ونسى..
ــ اوهووووو وقف عند اقرب سوبر ماركت بشتري بطاقه..
ــ ايهييي علينا.. بعيده شوي اقرب وحده.. خذ كلمها من رقمي
ــ اوكيه ..
دق يوسف .. سجى شافت الرقم وانصرعت.. قاسم هذا.. وش جابه...
يمكن يوسف وياه,, بس ليش يوسف ما يدق بجواله ؟؟
.. يعني ما فيه رصيد,, !!
وصارت تقلب الفكر.. وماجد ضايق باله وتعبان وهي ماحبت تضيق باله زود بقاسموه.. وهي تفكر وتفكر.. ويش تسوي تخاف ترد ويطلع قاسم صدق .. لييين سكت عن الرن..
يوسف: ــ ما ردت
ــ ااه.. اكيد ما بترد .. دامه رقمي .. اقول ارسل لك من عندي رصيد بس ..
ورسل يوسف رصيد ... ودق على سجى..
سجى من شافت رقم يوسف قالت فبالها:
الحمد لله ما رديت من شوي معناها قاسم هذا,, صدق ما يستحي ومتفرغ
ــ الوو هلا يوسف
ــ هلا مرت عمي خير ان شالله
سجى استغربت اول مره يسمع صوتها في التلفون وما عنده رقمها شلون عرف انها هي
ــ تعال بسرعه بيتنا عمك يبغاك
ــ عمي يبغاني ,, ليش ويش عنده... وانا مشغول برى .. ومع واحد مو بسيارتي
ــ يوسف ارجوك تعال ضروري
يوسف خاف .. سجى تترجى
ــ ويش صاير خير ..
ــ تعال وانت بتعرف..
ــ اوكيه مسافة الطريق..
ــ يللا مع السلامه
ــ الله يسلمك
قفل يوسف وهو مستغرب ..
ــ اقول ابو القواسم وديني بيت عمك
ــ خير ويش صاير..
ــ ما ادري .. بس شكلها السالفه قويه ترجى سجى وعمي يبغاني ضروري ما يندرى ويش عنده الله يستر..
ــ ان شالله خير عموما انا بنزل بيتنا بعد بس تخلص عطني خبر عشان اوصلك اوكيه
ــ اوكيه
ووصل قاسم يوسف بيت عمه
ودخل يوسف المجلس.. ويوم جت سجى بتطلع عنهم ماجد ما رضى قال ليها تلبس عباتها وتقعد وياهم..

والى اللقاء في الحلقه ا

[كيان مجنون]

ممكن اطول الجزء........

والا القاء ماخذ الولي والتالي ومو مخلي صبع صاحي...

على كل نتنظر على احر من الجمر....

[أمل الظهور]

مومو

شكلي بنام نومة اهل الكهف ولا خلصت قصتك ...

يلا عاد ننتظر خيتوو

[.:روح وريحان:.]

يسلمو على التكمله

[بوفيصل]

يسلمووووووووووووووو علي الحلقه لاكن مره ثانيه

نبغهااااااااا أطول ما تشوفيناا متحمسين مع القصه

ولا تطولين عليناااااا اوكي

مع خالص تحياتي بوفيصل

[أسيرة الأحلام]

اوهووووووووووووووووووووووو

اميرووووووووو كمليها بسرعه

يسلمووووووووووووووووو يالغلا

ندري اللقاء ماخذ كل وقتش

الله يكون بعونش

خخخخخخخخخخخخخخخخخخخخخخخخخخخ