انت نام ..



مو مهم انك رميت ..


قبل شوي جمرك ..
بين جفون العين ..
وبغفوة منامي ..!
نام ..
لايهمك إن قلبي ..
كان قبل شوي في مرمى سهامك ..
وكان حبك متّقي..
ضربة سهامي!
لا يهمك لو يموت قلبي ..
على سدرة أمانك ..
وفرحتي.. وهديل حمامي!
لايهمك صبحي المذبوح ..
واحزاني ..
وظلامي!
انت نام
لايهمك مُر بمراية كلامي ..
لاعتب قلبي عليك ..
لا.. ولا حنظل ملامي ..
نام بسم الله على حلمك ..
من اشواك الأرق ..ومن عطش صحرا الورق ..
ومن ألم فالقلب دامي ..
نام.. ياللي ..
من كتبت اسمك محيت من نخيل الذاكرة
كل الأسامي ..
ومن رسمتك غيم في عمري وانا ..
بموت ظامي !
نام ..
لا يصحّي غفوتك ,,
صوت الضمير ..
أو تقولي حزني منك ..
ولاّ من قاسي كلامك ..
«ربَّ حزنٍ»
يقتل ابن آدم كذا..
من غير رامي!
نام ..
انت ليلك يا غلى امك قصير ..
أما ليلي .. في مدى عيني امتنامي ..
يمدي لو بنام باكر..
والا بعده ..
ولا لما اطوي آخر صفحة في قصة احلامي ..
المهم ان انت / نام !