نرجع لعبدالعزيز شوي..
طلعت وريف من عنده .. عرف انها مسويه له بلوك .. ومايستبعد الديليت ..أكيد خسرت احترامها لي... طيب انا شسوي .. لازم يجيها يوم وتعرف الحقيقه ..إذا مو مني ..أكيد من اغلاطي الغبيه ..بخليها يومين واذا ماشالت البلوك ابرسل لها عالايميل ... او عالمنتدى اذا اضطريت ..آآه ياوريف وش سويتي فيني
راح عبد العزيز يتمشى في المنتدى من ضيقته يقرا المواضيع ولا يدري هو وش يقرا .. يحاول يسلي نفسه عن همه .. بس كان الهم مسيطر عليه .. وريف موب عنيده واكيد بعد كم يوم بتسامحني وأنا مابقي لي كثير كلها شهر وأرجع السعوديه وأخطبها من أهلها
فجأه شاف موضوع بالنقاش الجاد بعنوان ((سذاجه وحقاره)).. ماهمه العنوان كثر مالفت انتباهه الاسم اللي تحت العنوان ... خواطر مكسوره .. هذي وش جايبها هنا؟؟
فتح الموضوع وبدا يقرا .. ياربيييييييييييييه وش هالكلمات .. وش هالألفاظ .. لو جابت سكين وغرستها بقلبي أرحم من هالكلام ... اكيد تقصدني أنا ... الا مليون بالميه ..هذي تستخف برجولتي..
بس اللي انا سويته مو شويه.. ضحكت عليها ... وعلى مشاعرها فتره موب قصيره .. عرفت اسمها وحاولت اعرف عائلتها مستغل طيبتها اللي فعلا بهالمواقف تكون سذاجه.. حتى لو غلطتي كبيره أنا ما أستاهل هالكلام القوي الجارح ..
فتح عبد العزيز على رد جديد وكتب
((أختي خواطر..
شكرا لعبق حروفك التي عطرت القسم ..لا أنكر ان للقسم جماله .. ولكن وجودك فيه زاده جمالا وروعه..
تساؤلك واضح .. وصريح وأعتقد أن الرساله وصلت..
سأجيب على تساؤلك..
لماذا لا أضع نفسي في كرسي الطرف الاخر .. أي بمعنى .. مالذي جعل هذه الورقه تتلوث بسواد الزمن.. ربما لا حول لها ولا قوه.. ربما غلطه لوثتها .. ربما هذا السواد جاء لأن لا كامل الا وجهه تعالى ..
ربما .. وربما .. وربما .. وشكوك كثيره ... وإحتمالات أكثر .. ولقطع الشك باليقين سأجلس مع الطرف الاخر .. وأستمع له حتى أقتنع بطهارته ..أو أقنعه بنجاسته
شكرا لرحابة صدرك..
اخوك ..كبرياء الجرح))

بعد ما كتبت وريف موضوعها نامت .. حست انها طلعت شوي من اللي بقلبها ...

عبد العزيز كان رده ثالث رد .. ياربيه انا داخل الموضوع مافيه الا انا أمداهم يدخلون ويردون الناس..
جاء المشتكي حبه وقرا الموضوع ...
استانس.. حس انها كتبت هالكلام والمشاعر معميتها .. وعشان كذا ما انتبهت للي قاعده تكتبه
فتح رد جديد وأول شي سواه حط ابتسامه بأول سطر وثم

((

اختي خواطر
سمعنا بالأزل ..أن الاعتراف بالحق فضيله .. حينما تنحني الهامه أمام الملايين لنعلن بأننا خُدعنا .. بأننا في لحظة ضعف كنا غايه بالسذاجه.. هذا بحد ذاته إنجاز ..لأن الشجاعه بتطبيق ((قل الحق ولو على نفسك))
اختي عزائي لك بموت مشاعرك حينما أعلنتي لا مكان للمشاعر هنا ..
هنيئا لمن قتل تلك المشاعر .. ليس كرها مني لك.. بل بالعكس لأنه أثار قلمك ليكتب في النقاش لنستمتع بكتاباتك
أظن بأن طريقة القتل كانت محترفه للغايه لأنه جعلك تتخلين عن طريقك بعالم النت الذي طالما كنتي تتباهين به
اخوك.. المشتكي حبه))


عبد العزيز كان مداوم على الموضوع .. خاف أحد يفهم إنه المقصود .. قرا رد المشتكي وجن جنونه هالحقير هالوقح شلون يتكلم عنها كذا .. هذا لازم ينحذف رده .. وريف مو ناقصه .. لازم ينحذف الرد قبل تشوفه وريف لاااااااازم
كتب عبد العزيز رساله خاصه لمشرف النقاش عشان يحذف رد المشتكي .. بس كان رد المشرف ان المشتكي ماقال شي غلط .. هي بنفسها كاتبه عن السذاجه بالموضوع ... وبعدين اذا صاحبة الموضوع طلبت الحذف راح أحذفه لها
عبد العزيز مسك راسه :آآآآآآآآآآآآآآآآخ بينفجر راسي .. كل هذا بسببي... بس صادق المشتكي.. انا قدرت اغير طريقة وريف بالكتابه .. يعني انا قتلت مشاعرها؟؟؟آآآآآآآآآآآآآخ شهالحاله والله ماقصدت

بعد ساعتين فتحت وريف السجن اللي حبست نفسها فيه ...
راحت لأمها : سلام يمه
امها كانت تتفرج عالتلفزيون : هلالالالا وغلالالالا حبيبتي وش هالنوم
وريف عيونها منفخه من البكا :شفتي عاد.. وشلونك انتي
ام وريف بإستغراب : يمه وش فيها عيونك .. إنتي باكيه؟؟
يووووه كيف قلب الام يحس:لالا يمه مافيني شي
شادن توها داخله الصاله تناظر وريف بزعل
وريف: شدوووون ياشينك وانتي ماخذه بخاطرك
شادن ابتسمت لها وقامت جلست جنبها : اموت واعرف وش فيك؟
وريف: انا دايم كذا نفسيه ههههههههههههههه

وريف صح كانت تتغصب عالضحك .. بس هي من توفى أبوها ماخلت أحد يشوف ضعفها .. من توفى أبوها ماسمحت لأحد إنه يتشمت بدموعها

بعد ما تأكدت وريف ان شادن مو زعلانه عليها .. وبعد ما سولفت مع أمها شوي طلعت تشوف أصداء المناقشه .. هذا أول نقاش لها ..
فتحت المنتدى وقرت الرد الاول وردت عليه كان رده عادي..
الرد الثاني.. وكان من مشرف النقاش يرحب بطلتها بالقسم وردت عليه..
الرد الثالث من كبرياء الجرح..قرته .. وله وجه يرتز بمواضيعي بعد .. انا لو مو خايفه احد يشك من المنتدى كان قلت للمشرف يحذف الرد .. حسبي الله عليه ونعم الوكيل .. وانا اشوفه كل شوي غلطان بكلمه ... كل شوي قاط كلمه طلع ولد .. الله يوريه بإخته عشان يعرف يقدر بنات الناس..سوت إقتباس لرده وردت عليه..
((هلا اخوي
اتمنى ان الرساله من جد تكون وصلت للي ابيها توصل لهم ..
مشكور على مرورك وردك .. وردي بالعامي لأني اعرف ان مالك خبره بالفصحى..))
مشت بالردود الرابع .. الخامس.. السادس..
.. الســـابـــــع..
السابع كان رد المشتكي .. قرته وانصدمت .. هذا وشلون يكتب كذا؟؟ انا مشاعري مقتوله .. ومن قتلها ؟؟؟ انسان تافه ضفته عالماسنجر ... الا والله تخسي انت واياه... انا غبيه تسرعي بالكتابه بهالنقاش فضحني .. اللحين كبرياء الجرح على باله انه غالي عندي .. حسبي الله عليك من رجال يالمشتكي..وانا انحت هامتي يالكلب...
أخذت نفس لين هدت وسوت اقتباس وردت عليه..
((لا أعلم هل أحادثك بلغة المشاعر التي تمت تنحيتك من حمل لوائها لسبب تعرفه..
أم أحادثك بلغة الذكاء التي لا أظنك تجيدها ..
أم أحادثك بلغة الشموخ الذي لا أعتقد بأنك تعرفه ..
ولو كنت تعرفه .. لآمنت بأن من يحمل صفة الشموخ أمثالي .. لا ينحني .. بل يقف صامدا لتصطدم به كل عقبات الحياه وتنحني هي ليعبر فوقها متخطيا اصعب المواقف للوصول الى الغايه وتحقيق الهدف ..
فـ كيف تنعتني بالإنحناء.. لا يقع اللوم عليك .. فمن لايعرف صفة الشموخ يجهلها ...
اما عن حديثك عن قتل مشاعري... فمن تكون لتحلل مشاعري .. أو لأسمح لك بالتطاول عليها .. اتمنى أن تعزي نفسك لشيئا لك قد كُسر في هذه الصفحه بأعين الناس..
الشئ الوحيد الذي إكتسبته من ردك هو بأنني إقتنعت بأن لكل بياض سواد يخدشه .. وبياض نقاشي لا يهزه سواد ردك ..
خواطر))

كلامها كان قوي .. وباين إنها ما تأثرت بكلام هالتافه المشتكي.. بس إن كان اعتراف كبرياء حطمها مره.. فـ رد المشتكي .. حطمها ألف مره.. الحقير يعرف لعبة الشعور وفاهمها ..فهم قصدي .. عرف اني انقتلت .. عرف اني متحطمه من موقف.. يااااااااااارب كبرياء مايكون فهم اللي يقصده المشتكي..
قرت الرد اللي بعد المشتكي.. كان من وحده إسمها ((حولا بس مركزه))
اسمها يضحك .. بس مالي نفس أضحك
الرد كان
((صاحبة السمو الشعوري..
خواطر مكسوره..
شعورك مهيمن على كلماتك التي تعتبرينها صريحه ومواجهه.
صفاء روحك رأيتها بموضوعك الذي تعمدتي فيه الجديه..
يالروعة جديتك.. تشبهك تماما..
فـ هي صافيه كصفاء روحك ..
حازمه كعقدة حاجبيك..
بريئه كإبتسامتك..
شــامــخـــه..
كحزنك..
....
<<اعرف أصف حكي بنت عمو؟؟؟
ههههههههههههه يلاا هذا اللي طلع معي نص ساعه وأنا اعصر مخي..
بنت عمك الحلوه اللي تبدا بحرف اللام وبين قوسين راعية الدبابيس<<وجه يغمز ))

وريف قرت الرد وتفجرت ضحك .. هالخبله وش مخبصه هههههههههههههههههههههههههههه أجل بنت عمك الحلوه اللي تبدا بحرف اللام راعية الدبابيس آآآآآآآآآآآآه يابطني لميس ذي موب صاحيه .. الله يسعدها مثل ماضحكتني هههههههههههههههههههههههههههههههههههههههههههههه
ذي فضيحه .. ليتني ماعلمتهم اني خواطر آآه يابطني هههههههههههههههههههههههههههههههههههههههه
فكرت وريف شوي
وريف:بس حلو.. حلو مررره.. اللحين إذا قرو رد لميس بيحسون إن فيه جانب مشرق بحياتي .. وإني انا ماسمحت لهم يعرفون هالجانب..يعني جملة قتل الشعور اللي تكلم فيها هالبهيمه المشتكي .. بتتبخر من أذهان الناس بعد رد لميس..

إقتبست رد لميس وكتبت
((حبيبتي .. كنت ناويه اذا شفتك أمردغك بعقال اللي خبرك عشان تعرفين تردين زين أجل راعية الدبابيس..ههههههههه الله يرجك..
بس عشان خاطر الكلام الحلو اللي كتبتيه بسامحك بس بشرط انك تردين رد ثاني تجاوبين فيه على تساؤلي
سلمتي ياقلبي عالرد))
ارسلت الرد وهي حاسه ان الجمهور بينصدم من ردها ...

لميس قرت رد وريف وماتت من الضحك واتصلت على وريف
وريف: الله يرج ابليسك
لميس: ههههههههههههههههههههههههههه طيحت هيبتك يقولون عندها بنت عم مخفه
وريف: يالدبببببببببببه اصلا من النك نيم أغسل يدي منك ههههههههههههه
لميس: ههههههههههههههه فديتك بس موضوعك جنان .. يالله عاد وش رايك بردي تحسيني مثقفه؟؟
وريف: الصراحه ايه
لميس: بلاك ماتدرين
وريف: وشهو؟؟
لميس: انا وأمة لا اله الا الله متجمعين عشان نكتب رد مثقف مثلك
وريف: هههههههههههههههههههههههههههههههههههههههه الا على هالطاري بسألك
لميس: سمي ؟؟
وريف : وين عمتي مريم ؟؟
لميس: هاااه ؟؟
وريف : عمتي مريم وش فيك؟؟
لميس: من قال لك عليهااا"؟
وريف : لمييييس علامك؟؟ امي قالت لي
لميس صوتها تغير : توفت من كم سنه بالخبيث
وريف دمعت عينها : الله يرحمها ويغفر لها يارب

عبد العزيز قرا رد وريف عليه .. وجرحته انها تتكلم معاه بالعامي .. ليش انا جاهل؟؟؟
وصل رد وريف على المشتكي حبه .. كان هذا الرد الوحيد اللي خفف عنه ضيقته .. حس وريف انها ماتأثرت ولا انجرحت منه .. بس وريف تكابر
وصل رد حولا ومركزه وانصدم ان هذي بنت عمها ... خخخخ صدق مرجوجه .. ماتنلام فيكم وريف ..
قرا رد وريف على بنت عمها بس إنصدم من كلمة ((أمردغك بعقال اللي خبرك))
اكيد تقصد ولد عمها عبد الرحمن... اكيييييييييد هو .. معقوله حبته عشان خفة دمه؟؟؟ وانا وش دخلني؟؟؟
دخلني اني احبها .. احبها وابي اتزوجها .. حتى لو ماكانت حلوه يكفيني طيبتها .. اسلوبها .. تحملها للظلم اللي عايشته طول هالسنين
’,
’,
مرت يومين والردود عالنقاش كانت تتزايد ماشاء الله .. وعبد العزيز مدوام عالموضوع أكثر من صاحبة الموضوع..
راح يطل عالمتواجدين.. شاف خواطر مكسوره تنزل خاطره بقسم الخواطر
بـــــــــــــــــــــــــس!!!
هذي الخاطره هي اللي تحدد موقف وريف مني أكيد هدت ثورة مشاعرها اللحين ..
كان على نار .. ربع ساعه هي المده المستغرقه بكتابة الخاطره نزلت الخاطره كان عبد العزيز يسوي تحديث لقسم الخواطر لين شافها نازله كانت بعنوان
((لماذا ياهذا))
عبد العزيز:أكيد تقصدني ...

يتبع ....