مر اسبوع عليهم اليوم هو موعد زيارة ام سلمان لأم وريف.. واختارته وريف لأن ام زياد اليوم بتطلع يعني ماراح يكون أي موقف محرج لامها ان شاء الله
فجر:طيب وشادن بتروح مع امها؟؟
وريف: ما ادري عنها
فجر: تدرين شلون.. اتصلي لها قولي لها اني أبجي تتذكرين موقفها معك ايام السوق كانت طيبه
وريف: والله صادقه
راحت وريف طقت على شادن الباب ..إفتحت لها شادن : نعم
و ريف: بغيت أقولك ان فجر وأهلها بعد شوي بيجون يزورونا .. اذا فاضيه تعالي اقعدي معنا
شادن: طيب ان شاء الله
راحت وريف وقفلت شادن الباب .. كان عندها رغبه انها تشوف أهل فجر ليش؟؟ ماتدري
لبست وكشخت وسوت شعرها وطلعت ..
وريف إنبهرت بشكل شادن وبدون ماتنتبه لنفسها : شدووووووون تجننين
شادن اللي تعودت على رسميتها مع بنت عمتها : شكرا
وريف صحت من الكلمه: انا بروح المطبخ
وريف كانت لابسه بنجابي بيج واورنجي وفارقه شعرها الناعم وحاطه على نص جبهتها سلسه وراسمه عيونها ..
اما شادن كانت لابسه تنوره لين الركبه بيضا وبلوزه حمرا وملفلفه شعرها المتدرج على برا ومكياجها احمر يتناسب مع لون بشرتها الفاتح
’,
’,
سلطان اللي نزل بيروح لأصحابه لقى امه ودانه أخته جالسين
سلطان: مساء الخيرات
دانه بإبتسامه : هلا والله
ام سلطان: هلا يمه بتطلع؟
سلطان:ايه ابطلع تامريني بشي؟
ام سلطان: الله يوفقك
سلطان: الا يمه وريف ماردت عليكم؟؟
دانه: ههههههههه اثقل يابوي
ام سلطان: لا والله ماردت
سلطان: يمه طلبتك اتصلي عليهم إسألي لهم اكثر من اسبوع
ام سلطان : زين هات التلفون
اتصلت وردت عليها ام وريف
ام وريف: الو
ام سلطان: هلا ام وريف شلونك ياوخيتي؟
ام وريف عرفت راعية الصوت وتضايقت : هـ هـلا هلا ام سلطان
ام سلطان: وشلون القمر وريف ؟؟
هنا سلطان ابتسم ابتسامه واسعه
ام وريف: والله الحمد لله بخير
ام سلطان: الا علامكم طولتو علينا بالرد؟
ام وريف : والله يام سلطان ان ولدك ماينعاب والبنت مالها خاطر بالعرس
ام سلطان ناظرت بولدها اللي على اعصابه واقف على راسها
ام سلطان: زين يصير خير مع السلامه
ام وريف: مع السلامه
سلطان اللي خاف يوم شاف امه مو على بعضها : يمه بشري؟؟
ام سلطان : وجع يوجعها تحمد ربها احد خطبها تقول مالها خاطر بالعرس
سلطان إنصدم من رفض وريف له كان ساكت
دانه: يمه الله يهداك علامك عالبنت كل شي قسمه ونصيب
ام سلطان : ولدي ماينعاب وما اكون ام سلطان ان مازوجته شيخة البنات
سلطان: بـــــــــــــس يمه .. انا غير وريف ماني متزوج
طلع من عندهم ودخل غرفته وقفل عليه .. ليش هي ماتبيني... رجال واصلي الحمد لله وموظف وراتبي زين وسمعتي حلوه الحمد لله .. وشكلي مقبول وناظر بالمرايه اللي كانت قدامه..طالع بجسمه اللي كان مليان شوي .. معقول؟؟ معقول رفضتني عشاني متين؟؟؟؟ اوعدك يا وريف كلها كم شهر وتشوفين سلطان اللي تبين
رن الجرس وراحت وريف تركض تفتح الباب
وشافت حرمه كبيره وجنبها فجر ابتسمت لهم ودخلتهم وسلمت عليهم وشافت جوري وراهم
وريف: انتي اكيد جوري
جوري: صح ههههههه
وريف: اسم على مسمى ربي يحفظك
جوري طارت من الوناسه .. ودخلتهم وريف على أمها اللي كانت بالصاله الداخليه
نزلت شادن من الدرج اللي كان مقابل للصاله .. فجر ماصدقت اللي تشوفه .. شادن تبتسم معقول؟؟؟ لا وكاشخه ونازله تسلم علينا ..
سلمت عليهم شادن وقعدت معاهم
فيصل: يلعن يوووووووووووومك اش هذا
عبد العزيز : ههههههه وش فيك؟
فيصل : ولا أرق بنت تكتب هالكلام
عبد العزيز: والله ياخوك فتحت الوورد وتخيلت نفسي بنت وبديت اكتب
فيصل: بس جد انت فظيع.. عمري ماتخيلتك تقدر تكتب
عبد العزيز : تصدق ولا انا ... اول ما كتبت هالكلام ضحكت على نفسي بس بعد مامدحتني خواطر .. قريته حسيته شي حلو
كان الكل مشغول بالسوالف قامت شادن تصب لأم سلمان الشاهي وريف في حالة ذهول شديده من بنت خالها ..
فجر: وريف
وريف: هاه
فجر: وش فيها شادن اليوم ماهي طبيعيه
وريف: علمي علمك..
دق جوال فجر : هلا سلمان
شادن ابتسمت ولاحظت وريف هالإبتسامه ..
فجر: انت عند الباب؟؟ زين اللحين بنطلع لك.
سلمان كان ينتظر اهله بهالوقت وصل زيادالسياره شكلها غريب .. قرب من شباك السياره وقال: سلام عليكم
سلمان: هلا وعليكم السلام
زياد: تبي شي ياخوي؟؟
سلمان: لا والله بس أنتظر أهلي هنا
زياد: افاا وواقف عند الباب؟؟ حياك تفضل
سلمان: اسمحلي مستعجل
زياد: لا والله انزل البيت بيتك
بهاللحظه طلعو البنات وامهم من البيت
جوري (((كاشفه وجهها )): من اللي مع سلمان
فجر: اتوقع ولد خال وريف زياد
سلمان: هذولا الاهل طلعو
زياد: اجل المره الثانيه مافيه فكه
سلمان ابتسم : ان شاء الله مع السلامه
ركبت ام سلمان قدام والبنات ورا
سلمان: هاه انبسطتو؟؟
جوري: اخيررررررررررررا شفت وريف تجنن
فجر قرصت جوري: عيب
جوري: وش اللي عيب ؟؟ والله من جد البنت تجنن
فجر: طيب عيب تمدحينها عند أخوك
سلمان: هههههههههه يمه انبسطتي؟
ام سلمان: ياحليلها امها والله العظيم تنحط عالجرح يبرى
سلمان: اهم شي انبسطتي
ام سلمان: ايو والله الحمد لله
فجر: قلت لك يمه بتتونسين
داخل البيت ..
وريف: هاه يمه وش رايك فيهم؟؟
ام وريف: ماشاء الله عليهم اول ماشفت ام رفيقتك قلت ياربيه هذي متكبره وشايفه نفسها بس طلع العكس
وريف: وفجر اش رايك فيها؟؟
ام وريف تضحك : هههههه لو عندي ولد خطبتها له
وريف: هههههههههههههههههههههههههه
زيادعند الباب : احم احم ياولد
وريف قامت بتطلع غرفتها : اصبر يازياد ابطلع فوق وانت ادخل
ام وريف: تراكم اخوان ماله داعي تتغطون.... ادخل ياولدي طلعت وريف
زياداللي توه راجع من التمرين : ههههههههههه ايه اخوان بس مايجوز تكشف عندي شخبارك عمتي؟؟
ام وريف : الا يجوز انا مرضعتكم مع بعض
زياد: هاااه؟؟ مرضعتنا مع بعض؟؟
ام وريف : ايه يوم كنت صغير ياولدي صارت مشكله بين امك وابوك طلقها لمدة سنه وانا اللي رضعتك ذيك الفتره
زياد: ورا ماقلتو لنا ؟؟؟؟ ليش ساكتين؟؟
ام وريف: وليش نقول؟؟
زياداللي انفعل : الله واكبر تحرموني من اختي طول هالسنين وتقولون ليش؟ وبعدين افرضو لو تزوجتها ؟؟؟ بكره يطلعون عيالي هم عيال اختي .. ترى هالأمور مالازم ينسكت عنها
ام وريف: انا وابوك موجودين وعارفين انكم اخوان
زياد: ما احد يضمن عمره ياعمه
ام وريف :عاد هذاني قلت لك
زياد: هههههههههههه والله نكته ..إصبري ابتصل عالوالد
زياد: الو سلام يبه..
ابو زياد: هلا ياولدي هاه شخبارك؟؟ شخبار اصابتك؟
زياد: لا لا اللحين الحمد لله وان شاء الله المباراه الجايه ابلعب مع الفريق
ابو زياد: الحمد لله أجل
زياد: اقول يبه
ابو زياد: سم
زياد: اقول صدق وريف اختي من الرضاعه؟؟
ابو زيادسكت وبعد تفكير : ايه ايه عمتك رضعتك سنه كامله
زياد: يبه وليش ماقلتو لنا؟؟
ابو زياد: هذاك عرفت اللحين
زياد: طيب يبه ابسلم على اختي
ابو زياد: عندك عمتك استسمح منها
زياد: يبه هذي اختي وشلون استسمح منكم
ابو زياد: اوووه تراي مشغول وانت اشغلتني
زياد: زين زين مع السلامه
زيادالتفت على عمته : عمه ناديها لازم اشوفها
ام وريف: صاحي انت
زياد: ايه صاحي الحمد لله
ام وريف : ياولدي وشلون
زياد بدا يعصب: ياعمه احرمتوني من اختي بعمري اللي راح واللحين بتحرموني منها بقية عمري؟؟
ام وريف: ياولدي اللي يسمعك يقول ماعندك خوات .. هذي هي شادن ماشاء الله
قاطعها زياد: شادن تسمينها اخت؟؟ شادن اصلا مااحس انها كائن حي .. حتى يوم انصبت وسويت عملية الرباط الصليبي بركبتي ماكلفت على عمرها غير بكلمة سلامات .. ووريف اللي بنت عمتي كانت هي اللي تطبخ لي وتحط لي ..
شادن اللي كانت توها مبدله ملابسها وبتنزل تجلس مع وريف وعمتها سمعت اخر كلام .. معقول يازياد هذي فكرتك عني.. هذي فكرة الناس .. انا ماتحس اني كائن حي .. طلعت غرفتها وقفلت على نفسها ..
رد مع اقتباس
المفضلات