المشاركة الأصلية كتبت بواسطة اميرة المرح
مرحبا
كنت باسال نفس سؤال اخوي نبراس... ويش هالأشياء المباحه ....؟؟؟
المسأله مو مسألة غير وما غير..
المسأله مسألة عرف ..
ومثل مايقول المثل خالف تعرف ...
اذا كنتي بأي مباح بتلفتي النظر وسط مجموعه مختلفه عنش ..
هنا المشكله..
بس في الدول الثانيه الرجال هو الرجال .. لكنهم مثل ما يقولو متعودين وشبعانين شوف
غير عندنا..
لو بتكلم في مسألة العبايه
تعودنا سنين نشوف الراس
فجأه صارت الكتف دخيله..
في البدايه كانت وسط.. لا واسعه ولا مخصره
لفتت نظرنا حنا البنات مو بعد الشباب
شوي تخصرت.. وتزكرشت وتبرقشت
شوي رجعت مع الموضه ووسعت..
فراشه و سمكه و مدري ويش .. تحت ايدها الوحده شراع...
المسأله مو سخرية منهم ..
يظل المراجع الكرام فتواهم في هالمواضيع .. حسب العرف .. وكفى لا تفصيل ...
طيب النقاب بعد عليه كلام واشكاليات..
المراجع الأكارم البعض حرم بالكامل والآخر افتى بالعرف ..
انتين في ديره كلها غطى ليش تطلعي عيونش...؟؟ وتبغي ما تلفتي نظر رجال هالديره..
عن نفسي .. واني بنيه.. تلفت نظري بعض هالأشكاليات
مو بعد الرجال..
غير هذا... كل بلد ليها عرف معين..
على سبيل المثال .. جميع الدول ماعدا العرب.. الميك اب اللي نحطه حنا في المناسبات.. هالصارخ والسموك وغيره... هذا بحد ذاته مشكله اذا شافوه على وجه اي امرأه فيهم.. الله يدفع البلاء و يكرم القارئين... في نظرهم العاهره فقط هي اللي توضع هالمساحيق على قولهم هالكثر على وجهها.. فهالشي يلفت نظر رجالهم ..
في اليابان .. كمثال آخر .. مشكله ومصيبه اذا حطت البنت عطر ريحته تفوح.. عطورهم كلها ناعمه وخفيفه والا يكتفو بالمرطبات للجسم واللوشن.. لأن حكم اللي تتعطر بعطر فواح نفس حكم اللي تتمكيج صارخ ... بالنسبه ليهم... وينظرو ليها بنظرة دونيه من الجنسين..
هذا وهم مو مسلمين ولا يعرفو الحرام والحلال....
في كلا الحالتين عكسنا هم تماما.. نموت في الصارخ والعطر الفواح ,,,,طبعا بين بعضنا حنا البنات ..
فصراحة ما الوم رجالنا
لأن بلاوي هالزمن ماهي قليله
ولو بيغض النظر
وين ما يفر وجهه بيلاقي شكل ...
غصب عنه بتنتبه عيونه ...!!!
ماهي دعوه مني الى التبصبص
بس هالله الله بالنوايا الحسنه.. و الأستعاذة من بليس وشروره
العجل ياصاحب الزمان..
دمتم بخير
وبحفظ الرحمن
رد مع اقتباس
المفضلات