ذايب في هواهم
((الجزء السابع والثلاثون)) .. ماقبل الأخير&
بسم الله الرحمن الرحيم
((المستجدات في هذا الجزء...
-مرت الأيام تطوي بعضها وكلن يعيش لحظات حياته سواء بحلوها أو مرها ...
-رجعة العرسان من شهر عسلهم بالسلامه وفرحة الكل بخبر حمل رزان
-ولادة حنين ببنوته مثل القمر وقرة عين الكل لهالخبر
-أنشغال معظم أبطالنا بالمدارس وكالعاده دراسه وزنقه
-بقى شهر ع زواج دانا والكل مزحومين في التجهيزات
تابعونا))
"من يعرفك يحبك ..~
ومن يحبك يهواك ..~
ومن يهواك ماينساك ..~
ومن ينساك مايعرف غلاك ..~"
:*:*:*:*:*:*:*:*:*:*:*:*:*:*:*:*:*:*:*:*:*:*:*:*
الساعه 10:33م في فيلا ناصر // بالتحديد في الصاله ...
كانو البنات جالسين يذاكرون شوي ويسولفون شويات .. رزان كانت منسدحه بطولها ع الكنبه وناشره شعرها ع المخده وتلعب فيه وهي تذاكر .. دانا كانت طاقتها رسايل مع فارس وشويات تذاكر .. عهد كانت ماسكه كتابها وتروح وتجي في الصاله الكبيره ...
دانا: عهدووو وجعتي راسي كأنك مروحه
رزان: هههههه سنه أولى جامعه لازم
عهد: بكره عندي كويز أبي أذاكر مثل الناس عشان لايصير علي صعب في النهائي
فضيله جلست ع الكنب: بالتوفيق يايما , وأنتو رزان ودانا لايكون كلكم عندكم كويزات ؟
دانا: لا ماما بس هذي الشطاره مدري من وين نازله علينا قولي لا إله إلا الله
فضيله: لا إله إلا الله , بس أقووول قومو نامو ترى وراكم جلسه من صبح ربي
دانا: ترى محاضرتي ماتبدي إلا الساعه 9ونص
رزان: وأنا محاضرتي تبدأ الساعه 8
فضيله: حتى ولو لازم تريحون جسمكم عشان تركزون
عهد: شدعوووه ماما شايفتنا أول أبتدائي نامو بكير وأصحو بكير
الكل: ههههههههههه
فضيله: بس في وحده منكم توها حامل ووحام يعني تنام كثير ووراها جلسه عشان طلعة رجلها للدوام
رزان: هههه أثاري الكلام موجه لي , لايكون بس مليتي مني عمتي ؟
فضيله: لا حبيبتي بس ما أبيك تتعبين أعرف الحمل في بدايته متعب وتحتاجين راحه
رزان: شدعوه عمتي شايله جبال ع راسي تراني منسدحه وماخده راحتي , بس ولا يهمك تراني أنتظر وصول فيصل
عهد: اليوم فيصل
فيصل قاطعها: وش فيه فيصل ؟!
عهد: بسم الله الرحمن الرحيم لو طاريه الجنه أحسن لي
فيصل: لاوالله وش شايفتني قدامك ؟
عهد: أقووول لو أناديك من هنا لين الصبح مابتسمع لكن خلك تسمع أسمك"وهي تقلد صوته: وش فيه فيصل ؟!
فيصل وهو يستند ع الكنبه بتعب قريب من راس رزان: آآآآخ اليوم الشباب الزفوت متعاونين علي ومسويين فيني مقلب قومي دانا لاهنتي جيبي لي جلاس مويه
دانا: من عيووووني بس لاتقول المقلب إلا إذا جيت
فيصل: جاهزه للطماشه رووحي بس
رزان وهي تعتدل في جلستها: كيف الشغل اليوم؟
فيصل رفع حاجب: تمام
دانا: أحلى جلاس مويه لأحلى أخو شنو المقلب؟
فيصل: بل بل بل خليني أشرب المويه قبل وأرد نفسي بعدها أقول لك
دانا جلست جنب رزان: طيب ياعاااالي المقام
فيصل: إلا وينها ملوك ما أشوفها؟
عهد: حضرتها ع النت يقال أنها تذاكر
فيصل: أنتبهو لها السنه أول ثانوي مايبي له لعب بزاين مثل متوسط
فضيله: الله يعين , يلا تآمروني بشي أنا بتطمن ع ملاك وغلا وبنام؟
الكل: سلامتك "ورقت فضيله الدرج وهي تسمعهم تصبحين ع خير , نومة العوافي .. وترد عليهم"
فيصل عقب ماطفشوه البنات يسألونه عن المقلب قال لهم: اليوم أنا عامل حسابي ع نص دوام حتى قلت بمركم في الجامعه كنت مفضي نفسي عدل جيت بطلع شفت ع مكتبي ملفاات الدنيا طلعو الشباب الزفوت مستأذنين وشغلهم كله تركوه ع راسي
الكل: ههههههههههههههه
رزان: ماعليه إن شاء الله خير لك
فيصل ناظر رزان: وأنا أشوـوـوف ناس زعلانين علينا الحين عرفنا ليش ع قلبي
رزان بتعجب: أنا !!
فيصل: لا حبيبي نصووور والله نسيت أسأل عنه
عهد-دانا ضحكو في نفس الوقت كانو مبسوطين لفرحة أخوهم بحمل مرته ...
رزان: لا نصوري شاطر مايزعل ع أبوه
فيصل: هو شاطر بس دلوع طالع ع أمه
رزان بعناد: لا ع أبوه "وقامو يتعاييون كل واحد يقول طالع ع الثاني"
عهد طفشت منهم: بـــــــــس خلاص طالع علي خوب مو أقرب له من الطرفين مرت خاله وعمته
الكل ضحك ع تصريفة عهد , فيصل: يلا خواتي نستأذن تآمرونا بشيء؟
دانا-عهد: لاتسلم بس أنتبه لرزان والبيبي
فيصل: آآخ بس ولا حد يقول لي أنتبه لنفسك إن شااااء بنتبه لهم وأنا بالطقاق
رزان دخلت جنبه في المصعد وقالت تراضيه: شدعوه أنت فصولي أبو نصور الغالي الكل بالكل
فيصل يسوي نفسه بيبي زعلان: أمبــــح
رزان تعانده دخلت الشقه وقامت تحوس وتدور وتشيل وتحط في الأغراض , فيصل: رزااااااان أجلسي
رزان تسوي نفسها بريئه: بحط لك العشاء
فيصل راح جنبها: ياللــــــــه وش قلنا .. مو قلنا كفايه حركتك في الجامعه والروحه والجيه في البيت أرتااحي
رزان جلست جنبه ع طاولة الطعام وهي تحط باقي الأطباق: وهذي قعده
فيصل وهو يحط يده ع بطنها وببتسامه: تصدقي رزون"لمن شاف علامات الإستفهام ع وجهها: طلع لك بطن شويات
رزان أبتسمت لفرحة فيصل: قالت لي مها في بداية الحمل يرتفع البطن شوي .. بعد فتره يرجع ينزل طبيعي يعني مو تخافين إذا رجع نزل .. بعدين يرتفع بالتدريج
فيصل: وبعدين يطلع البيبي وأنا أصير أبو ورزاني تصير أم
رزان هزت راسها بأيوه وضمو بعض ...
:*:*:*:*:*:*:*:*:*:*:*:*:*:*:*:*:*:*:*:*:*:*:*:*
الساعه 8:15م بعيد عن المنطقه الشرقيه بشويات .. في جده بالتحديد في شقة رانيه ...
رانيه قامت عن فوضة البنات: هلا ماما.......أهلين......أنا !!......من قال؟.........لا الكلام مو صحيح..............والله العظيم ماتكلمت لأحد............."أنفجرت تبكي: شسوي في حالي يعني؟........أهم شي تأكدتي.........يلا مع السلامه.........لا مافيني شي........ماعليه.............إن شاء الله.........بيباي,
رانيه..أففف أففف يعني الواحد مابيرتاح من شر الناس لا في البلد ولا في الغربه , حتى وأنا في جده أدرس في حال ماسلمت من شرهم.. الحين بالله كيف بقول لبنت خالتي لاتوافقين ع خطيبك لأنه يحب وحده من قبلك وكيف بيوصلها الكلام مني وأنا في جده .. أنتشر الخبر وحطوها فيني أنا .. وش دخلني عمري لا بشرت حد بخبر حلوو أو نصحت أحد ولا يطلع علي هالكلام كله ...
سلمى نطت على رانيه: رانيووووه يالدبه قومي أكلي لك شي
رانيه أبتسمت: مابي الحين أكلو عليكم بالعافيه
سلمى بهبال: أيــــــــه صح ذكرت روميوو بيمرك أكيد بتتعشين معاه في المطعم
رانيه تصرفها: بالضبـــط
سلمى: قومي قومي بدلي لايجي الرجال وأنتي بهالحاله
رانيه..ع قول سلوم قمت بدلت ملابسي عشان راشد بيمرني ماكشخت بزياده لأن النفسيه ما تساعد بس تزينت بشي بسيط وحلوو رن علي راشد ونزلت له ...
راشد: نورت سيارتي
رانيه: تسلم , أخبارك؟
راشد: الحمد لله ماشي حالي توني راجع من عند العمال الله ياخدهم ع هالكماخه عافسين لي الدنيا لو أشتغل بروحي يكون أحسن لي
رانيه: ههه ماعليه تحملهم شوي ويتعدلون ع يدك
راشد: الله يعين , ماخاطرك في آيسكريم؟
رانيه: لا مو مشتهيه شي
راشد: تبين الصدق توني الحين ماكل آيسكريم بس معاك يطلع له طعم خاص , ومدامك ماتبين رجعتنا ناخد لنا
رانيه: أوكي
راشد نزل ع صوت المسجل: وش فيك حبيبتي ساكته؟
رانيه: ولا شي سولف أنت
راشد: وين خاطرك تروحين؟
رانيه: المكان اللي يريحك
راشد: لا أنتي اليوم مو طبيعيه , وش رايك نروح الشقه أشوفك عدل لأن ما أعرف أسولف معاك من وراء حجاب
رانيه: اللي يريحك
راشد وهو يلف الدركسون ويبركن السياره: هذي العماره اللي أنا ساكن فيها
رانيه: بالمره حلووه "قالت لمن فتح لها راشد الباب: ميرسي
راشد فتح باب شقته وهو يحك شعره بحرج: أممممـ هو الصراحه يعني أنا ما أعرف أرتب بس حاولت أكون مرتب عشانك بتجين معي الشقه
رانيه ناظرت الشقه فيها إن مو مرتبه مره كأنها شقة بنت ناسيه ترتبها بس بالنسبه لولد مرتبه قالت تراضيه: لالا باذره طيبه
راشد: هههههههه مقدر ع كلامك , تجين المجلس ولا مالك خلق بلايستيشن؟
رانيه: أوكي خل نروح المجلس بس مو الحين تشغل البلايستيشن "رن جوالها لفت فمها لمن شافت الرقم: هلا جاسر.........أممـ.....أهاا.......أيه........لالا عادي........مع راشد........طيب باي......يوصل وأنت بعد سلم..........بااي,
راشد: وش عنده جحا ؟
رانيه: أبد يسلم عليك
راشد لاحظ وجهها تغير قرب منها: رانيتي غناتي لاتخبين علي وش فيك؟
رانيه: مافيني شي بس متضايقه شوي
راشد: ماعليه فضفضي لي قولي شاللي مضايقك
رانيه: السالفه ماتسوى عادي لا تهتم
راشد: طيب أنا أبي أعرف قولي لي عشان أرتاح وترتاحين
رانيه: بس بنت خالتي متقدمين لها ووصلها كلام أن خطيبها يحب وحده من قبلها وقالو أنهم سمعو مني وأنا مالي دخل
راشد: طيب ليش تزعلين نفسك إذا مالك دخل وواثقه من نفسك؟
رانيه: مو سالفة واثقه مو واثقه الإنسان حتى لو حبب نفسه للناس وحلى أخلاقه يجونه ناس يخربون عليه
راشد لمن شافها بكت جد حط راسه ع صدره وهو يسمعها: شنسوي بعد هذا هم الناس
رانيه: تخيل راشد بياخدون الناس فكره عني أني بخوره وما أغبي شي
راشد: ياقلبي تقدرين تثبتين لهم العكس , أنا أقول لك أول مافتحت محلي كان عمي يساعدني شوي أنا كنت بالقوه متحمس وأبي أعتمد ع نفسي وكان شرطي أني أرجع لعمي اللي أخدته منه تخيلي أن الناس لمن شافوني نجحت قامو يتكلمون قدامي ومن وراي يقولون مستحيل ينجح بهالسرعه أكيد يسوي شي غلط أو.........>> ياحبيبتي كلام الناس مايرحم واللي بيتابع الناس وكلامهم مابيخلص ولا بيتهنى لابنوم ولا بأكل ولا شي .. ع أقل شي يتكلمون شافو واحد ناجح تكلمو شافو واحد فاشل أو عطالي تكلمو ع قولتك أرضاء الناس غايه لاتدرك
رانيه أرتاحت من كلام راشد ولو أن حازه في نفسها السالفه قالت: في ناس يهمونك في دنيتك ويغنونك عن الناس كلهم ووجهة نظرهم هي اللي تهمك وتشجعك وترد روحك "مسحت بيدها ع ظهره: الله لا يحرمني منك
راشد باس راسها: ولا يحرمني منك , ع أني فقدت أمي وأبوي وأنا صغير وتحملت مسؤليات أكبر من عمري إلا أني حسيت أن أمي داعيه لي لمن حصلت ع جوهوه مثلك
رانيه أبتسمت: وأنا لمن تغربت للدراسه تضايقت عشاني مفارقه هلي لكن لمن أشوفك أتخيل نفسي شايفه أهلي وناسي وكل أهل الشرقيه
راشد: تصدقين ماكنت موافق ع مشروع جده لكن سبحان الله ربك يدبر طلع لي مشروع جده وخديتك جت كل الظروف سهاله من ربي الله يرحمك ياعمتي هي اللي شجعتني ع مشروع جده
رانيه: الله يرحمها أم فهد الكل يذكرها بالخير
راشد قلب الموضوع مسخره: تدرين ليه هي كذا "لمن شاف علامات الإستفهام ع وجهها: لأنها عمتي
رانيه: ههههههههه "ضلو يضحكون ويتطنزون لين ما تغيرت نفسياتهم"
راشد: تصدقين رانيووه أنك حساسه بزياده
رانيه: الكل يقول لي ع شطانتك إلا أنك حساسه بس شسوي في نفسي
راشد: ههههههههههههه أحس تغيير روتين إذا فضفضنا لبعض متعودين ع الضحك والطناز
رانيه: إذا فضفضنا معناتها فاصل إعلاني
راشد: يعني فاصل ونواصل !!
رانيه: لابجد شي حلوو حتى أني أرتاح إذا فضفضت لك أحس في حد يفهمني
راشد: بـــــس غربل الله إبليسك خليتيني أستحي , قومي معاي أعلمك كيف تصممين نغمات عشان في المستقبل تساعديني
رانيه: طيب بس مابي أتأخر بكره وراي جامعه
راشد: ركبي لك المنبه بعد ساعتين عشان لايسرقنا الوقت
رانيه: طيب حبيبي
:*:*:*:*:*:*:*:*:*:*:*:*:*:*:*:*:*:*:*:*:*:*:*:*
الساعه 10:44م في فيلا أبو وافي ...
بعد ماطلعو الحريم تمددت حنين ع السرير ببطئ ومليت نفسها ...
أنهار وهي تلف الصغنونه: ياقلب خالتها يالوووح خالتها ياعمر خالتها تااه أغي خالتوو
حنين: لاترفعيها كثير ترى توها راضعه
أنهار حطتها جنب حنين وجلست جنبها: أخبارك اليوم ؟
حنين: مثل كل يوم مو عارفه أنسدح مثل الناس , صحيح يادبه ليه خبيتي عني موضوع الخياطه؟
أنهار: والله مالي شغل رجلك قال لي لاتقولين لحنين , وأنتي وش يدريك؟
حنين: أنا تعبانه ومو مستوعبه كلام الدكتور يقول لي الخطر زال واللي خايفين منه ماصار أنا نفسي كنت أهلوس أفتكرت ع الدكتور يهلوس معاي بعدين لمن صحيت قالت لي الدكتوره نفس الكلام سألت سيف شالسالفه وقال لي
أنهار: هههههههههههههه بس زين اللي سوى عشان لاتخافين وأنتي حامل الحين الحمد لله ولدتي بفدووكه اللي مثل القمر فعادي لو قال لك
إيمان اللي توها جايه من المطبخ: فــدك فدوووك أغي "باست خدها الصغنون: نامت عني الدلوووعه وأنا مابعد أشوفها مفتحه
عبير اللي كانت راجعه معاها وجاسه بعبايتها تنتظر جاسر: هههه يلا خيرها بغيرها
أنهار تناظر حور: والأميره متى بتقوم عن الابتوب وبتنام؟
حور: بزر أنا بزر تسألوني متى أنام؟
أنهار: طيب ياكبيره تسمحي تاخدي لابتوبك وتروحين فيه مكان ثاني لأن رجل أختك بيدخل الحين؟
حور وهي تسحب الجارجر من الكهرب: طيب وصحيني قبل تنامين
أنهار: طيب "وطلعت مع إيمان وحور عشان سيف بيدخل"
دخل سيف سلمت عليه عبير وسولفت معاهم هو وحنين .. بعد ربع ساعه تقريباً وصل جاسر , عبير: يلا تتربى في عزكم مع السلامه
سيف: أفاااا عبور أجلسي مامداني أجلس معاك بعدين أنا أوصلك
عبير: لو أبي أجلس ما أستحيت منك بس عندي شغل تعرف آخر ثلاث مواد وأفتك
حنين: موفقه ياقلبي ولا تخلين أي وقت البيت بيتك
عبير: أكيد لازم أجي أتطمن هذي بنت الغالي سيوووف
سيف: سيوف هااا سيوف شقووول هالبزر أقول لها خالتي صدق الدنيا جواره
حنين-عبير: هههههههههههههههههه
عبير: يلا لا أنزف عن أذنكم "بعد ماسلمت طلعت وركبت السياره سلمت ع جاسر: قوااهم الله
جاسر: يقووويك كان جلستي بعد 5دقايق
عبير: شسوي والله كنت بعبايتي بس طلعتي مع دخلة سيوف وأضطريت أسلم عليه وأسولف وياه
جاسر: وأنا أنلطع برا
عبير: طيب سوووري وش فيك؟
جاسر: مافيني شي بس منبطه كبدي رانيه في جده وضيقو خلقها "سألته عبير وش صاير وخبرها بالسالفه"
عبير: ع قلبي رناشووو ع شطانتها إلا أنها حساسه , يلا معاها راشد أكيد طيب خاطرها
جاسر: ع قولتك , أنا الحين قاعد أحاتي موضوع بنت أختك وكأن الموضوع يخصني لأن رانيه تقول يقولون مني وإذا ماوافقت البنت أو طلعت تحاليلها مو أوكي بينكسر خاطرها وبتكرهني
عبير: لا إن شاء الله توافق عن أقتناع و يطلع تحليلها أوكي
جاسر: والله أحياناً تصير أشياء يصير ودي أفني الحريم من هالوجود بخوووره مايقدروون يخبون شي
عبير: الله يعين
جاسر: أخبار فدك ؟
عبير: أي فدك؟
جاسر: بنت سيوف ولا فهيتي توك جايه من عندها
عبير: هههههههههه ماتعودت ع أسمها , بخير الحمد الله تجنن مثل القمر
:*:*:*:*:*:*:*:*:*:*:*:*:*:*:*:*:*:*:*:*:*:*:*:*