ذايب في هواهم
((الجزء الثاني والثلاثون))
بسم الله الرحمن الرحيم
((المستجدات في هذا الجزء...
-أبطالنا لازالو مشغولين كلن منشغل بشيء يشغله أصحاب الدوامات بالدوامات وأصحاب الدراسه بالإختبارات
-اليوم الأربعاء ورانيه أول وحده من أبطالنا تخلص أختبارات وراح تنزل الشرقيه
يعطيكم العافيه
تابعونا))
ع
م
ر
الغياب مايغير مافي القلوب
د
ا
م
القلوب إللي نعزها تعزنا
:*:*:*:*:*:*:*:*:*:*:*:*:*:*:*:*:*:*:*:*:*:*:*:*
الساعه 10:11م في المطار ...
رانيه فتحت الرساله قالت تكلم صديقتها: والله مدري وش فيهم كلهم صايرين طيبين
سلمى: ههه حرام عليك , ماقلتي لي من مين الرساله ؟
رانيه: من جسور خالي "قرأت لها الرساله وقالت: رديت عليه أترك عنك الرسائل تراني خست في المطار
سلمى: ههههههه ياويل قلبي ع صديقتي اللي ماتعرف تجامل
رانيه: إذا أنا في جده يحبوني خلني أجلس معاهم يومين يملون مني لكن خليني أتغلى
سلمى وهي قايمه تسلم ع رانيه وتتباوس معاها: أبري ذمتي حبيبتي حلليني وخلينا نشوفك في الإجازه
رانيه: مبرية الذمه محلله يالغلا وأنتي بعد خلينا نشوفك , وبشريني إذا ولدتي
سلمى: إن شاء الله
رانيه: لاتنسي إذا بنت سميها رانيه عشان تصير خفيفة دم مثلي
سلمى: ههههه إن شاء الله , تعالي نوصلك
رانيه وهي تناظر شاشة جوالها: لاعيوني ما أركب مع متزوجين , هذا هم وصلو"ناظرتهم: ماشاء الله الجيش كلهم جايين
عبير راحت تركض لرانيه مطنشه اللي معاها: الحمد لله ع السلامه رنوش
رانيه: الله يسلمك , جنبك نفرين سلمي عليهم
عبير سلمت ع سلمى: ووين النفره الثانيه ؟
رانيه: في بطنها
سلمى وهي منحرجه: فضحتينا رنوش
عبير: ههه ماتهون عن سوالفها رانيه , الله يتمم لك ع خير يارب
سلمى: إن شاء الله , يلا زوجي وصل
رانيه ودعت سلمى وراحت مع عبير السياره وجلسو يسولفون , جاسر اللي توه راكب: بل عليك كل هذي أغراض !!
رانيه: أهم شي سلامتي وبعدين نهاية السنه مفضيه الشقه
جاسر: خلاص آسف , الحمد لله ع السلامه
رانيه: يسلمك , وأنت وش جيبك عن حساب ثالث ثانوي
وائل: شسوي يا أختي أحبك وبعدين باقي لي ثلاث أيام وأخلص
رانيه: بالتوفيق , طبعاً عبوره الحلوة بتنام معي
عبير: أفآآ عليك كم عروسه"قرصها وائل وقالت بتلعثم: أأ رنوش عندنا
رانيه: مدري وش وراك , غريبه بتجين بيتنا بدون شروط وسين وجيم
عبير: خلاص إذا ماتبيني أجي لك
رانيه: لالا ياخي خل نطلع حرتنا خلصنا إختبارات وأنت جسور ما أوصيك بالطلعات الزينه
جاسر: آآآخ بس أنا المفروض يسموني السواق جاسر أنزلو بس
رانيه وهي تنزل: ههه وأنا وين أشوف لي خال مطيع مثلك
جاسر: أصبغيني باهلكلام يالمصريه
أم مشاري: أهووووو خل أسلم ع بنتي "ضمت رانيه"
جاسر يقلدها قبل لاتبكي: أهئ أهئ يابعد قلبي وحشتيني أهئ أهئ
أم مشاري ضربته ع ظهره: أستح أنا أختك الكبيره
جاسر وهو يتحرطم: وأنا دوم مهزأ أففف
بعد ماسلمت رانيه ع الكل قالت تستأذن: يلا باخد لي دش سريع وباجي أجلس معكم "ناظرت وائل: وعيال ثالث ثانوي خلهم يذاكرون
وائل تنهد عقب مارقت رانيه السلم: هالفضيحه عبيروه تعبت وأنا أرقع لها
الكل: ههههههه
سيف: وأنتو مخروشين تودونها معاكم المطار بتفضحكم
عبير: جب يلا جب خلني أعبر عن شعوري بنت أختي بتنخطب خل أفرح , أبو مشاري بتفاتحها في الموضوع ولا أنا أكلمها
أبو تركي: أنتي لو بكيفك جبتي الشيخ وملكتي فيها الحين
أبو مشاري: هههه خلها ترتاح
أم تركي: يلا عاد ملينا فاتحوها في الموضوع , ع ماتفكر والتحاليل من جد يمللون هالجيل
أبو تركي يناقرها: وأنا أقول عبور ع من مرجوجه
أم تركي تناقره: عليك
عبير وقفت بينهم بهبال: صلو ع النبي خلاص أنا طالعه عليكم أثنينكم
أبو تركي: ياللي ماتستحين
عبير وهي تسمع تهزيأهم ناظرت وائل وجاسر اللي يضحكون قرصت جاسر من القهر ...
جاسر: آآآخ يانحيسه
أبو تركي قلب التهزيئه ع جاسر: كم مره قلت لك لاتقول نحيسه
رانيه..نزلت وأبتسمت لمن شفت جمعة أهلي وأحبابي جلست جنب جدتي من زمان ماناقرتها خخخ ...
أم تركي: أتركي شعري يارانيه
رانيه: مقدر ع الحرير يجنن يارب أجيب بنوته مثل شعرك
أبو تركي يأشر ع رانيه بيده: تعالي تعالي أنتي
جت رانيه جنب أبو تركي وأبو مشاري وعبير وراها , أبو تركي يكلم عبير: وأنتي وش اللي جابك
عبير: أشجعها رافعه علم أنصر أخيك ظالم أو مظلوم
سيف: أعوذ بالله وش دخل الظلم وما الظلم تعالي الله يهديك بس
عبير راحت جنب سيف وهي تتحرطم وأذنها عند أبو تركي وأبو مشاري ورانيه ...
سكت أبو مشاري من المقدمه الطويله العريضه وقال أبو تركي يكمل: ماشاء الله عليك تدرسين وكبيره ومو ناقصك شي
رانيه وهي شارقه بالشاي: كح كح قل لا إله إلا الله جدي لاتحسدني
أبو تركي مل منها كل شوي تناقره: من زينك , المهم خطبك واحد مدري شسمه"ناظر جاسر: شسمه اللي خطب رانيه
جاسر وهو يضحك ع شكل رانيه اللي شربت الشاي كله دفعه وحده: راشد الـ*****
رانيه وكأنها تمون عليه قالت لا إرادي: رشووووووود
أبو تركي: بعده مايصير شي وتسمي الولد رشود ما أقول إلا الله يعينه إذا صرتي من نصيبه
رانيه أنحرجت من نفسها: يلا أنا نعست
عبير: تكفــــــــــــى جسور جيب الكاميرا تراها ماتحصل إلا في العمر مره رنوش مستحيه
رانيه ضربتها ع ظهرها: جب لا كف الحين
سيف: حتى وهي مستحيه تهاوش
أبو مشاري أشر لهم يسكتون: الولد خوش ولد ولا عليه كلام والكل يمدح فيه
رانيه تقاطع أبوها: بس بس ما أقدر أذوووووووب
أم تركي ضربتها ع راسها: شتذوبين أعملي أدب
سيف: أنا مستغرب هذي كيف بتعرسونها "شافها أستحت: تراه تقي نقي
عبير: ههههههه تقي نقي لايكون من المبشرين بالجنه
أبو مشاري: نفسي أشوفكم ماخدين الأمور بجديه
رانيه قالت بسرعه: خلاص راح أقول لك رايي , شوف اللي تشوفونه بس أبي أكمل دراستي في جده وأجي البيت كل أسبوع عجبه أهلاً وسهلاً ماعجبه أبناء منصور تارسين القصور"قامت ركبت غرفتها"
سيف ناظر الموجودين وهو يضحك: هههههههه في ذمتكم هذا وجه عروس الناس يقولون بفكر أسبوع وناس يفكرون شهر هذي في خمس دقايق قالت رايها
عبير: زمن السرعه ياولد أختي
أبو تركي: شسوي أنا تخيلو لو أرد ع الناس الحين بيقولون مرجوج
أم تركي: وش عليك أنت رد عليهم أهووو
أبو تركي: ما ألوم المرجوجين , قومي بس نروح البيت
جاسر تنهد: طبعاً السايق جاسر اللي بيوصلك
أم تركي: الله يخليه لي وأشوفه معرس قولو آآآميــن
الكل: آآميـــن
عقب ماطلعو بيت أبو تركي , أم مشاري: لاتردون ع الناس الحين خلو البنت تفكر من حقها
أبو مشاري: مابنقول لأ من حقها , بس هي اللي ردت من الحين
أم مشاري: أنتظرو لاتردون بروح أقول لها تفكر "ركبت غرفة رانيه لقتها مع عبير"
رانيه وهي تمسح دموعها: يعني شكلي كان يفشل ؟
عبير: لاياقلبي بس فاجئتينا بردك
رانيه وتشهق: وأنا وش يدريني أنهم يفكرون أسبوع قالو لي الولد زين قلت اللي تشوفونه مثل المسلسلات
عبير وهي تضحك: الناس يقولون بيصلون صلاة أستخاره ويتغلون شوي ناس يفكرون بالشهر وأنتي مره في زمن السرعه حتى مادريتي من ولده اللي خاطبك
أم مشاري دخلت وهي مبتسمه: فكري يايما لاتتسرعين
رانيه: زين متى أرد عليكم
عبير: بعد نص ساعه ولا أقول لك الحين , عن الهبال لازم تجلسين مع واحد من خيلانك أو أخوانك يعرف عنه كل شي يعلمك عن طريقة حياته وشغله و.......ألخ>>>
رانيه: لالالالا مابي مابي , شنو أنا بنت خجوله يتكلمون لي عن ولد أستحي
عبير: اللي بيستحي مثلك ولا لايستحي
أم مشاري اللي تعبت من بنتها: فكري زين يايما ترى الولد
رانيه قاطعت أمها: لاتتكلمي لي عنه أستحي , أنا قلت اللي يشوفونه أبوي وأخواني وخوالي وعمومي
أم مشاري تنهدت: براحتك , يعني هذا آخر كلام عندك
رانيه: أيوآ
عبير: يلا خيو ريحتنا من إنتظار رايها كفايه بننتظر التحاليل وتحديد موعد الملكه
أم مشاري: الله يسوي اللي فيه الخير , رانيه يما فكري ع الأقل لو بس شوي بكره قبل مايتصل أبوك يرد ع الناس برجع آخد رايك
رانيه: إن شاء الله "طلعت أم مشاري"
عبير..مقدر ع حركات رانيوه يمكن لو حد مايعرفها يقول أنها جريئه وماتستحي لكنها مستحيه خدودها حمران وهي تجادل عارفه أن كل هالهبال اللي سوته من الحيا ناظرتها ليقيتها سرحانه فطست ضحك مايناسبها ...
رانيه..مابي أحط في بالي شي ولا أشغل نفسي بتفكير خليتها ع ربي اللي يجي من الله حياه الله ماتفرق معي أهم شي أن الولد زين شنو بيكون ردي مثلاً لو ماقلت اللي تشوفونه؟ هذا ردي سواء الحين أو بعدين ليه أعقد الأمور , دعيت ربي أنه يسوي اللي فيه الخير والصالح لي سواء أن كان الولد من نصيبي أو لأ ...
عبير..ناديتها شكلها نامت ياربي وش فيها أنقلبت وين الفضول والقتله حتى ماعرفت من اللي خاطبها يلا بكره تعرف , أنقلبت للجهه الثانيه خل أنام أحسن لي ...
:*:*:*:*:*:*:*:*:*:*:*:*:*:*:*:*:*:*:*:*:*:*:*:*
السبت الساعه 3:40م في فيلا عبد العزيز ...
رزان..تعودنا أيام الإختبارات ننام في بيتنا أنا وبنات عمتي , كان الوضع جداً إيزي لأن بابا في البيت معانا وعمتي يعطيها العافيه لازم يومياً تجي إذا ماسوينا غداء تجيب لنا غداء من عندهم وتتطمن ع مذاكرتنا وتشوف طلباتنا وخالي نفس الشي , وحتى فيصل مايقصر بس مايجلس معي كثير عشان أختباراتي وزواجنا قرب ...
ملاك: ماتحسون أن في شي مو طبيعي صاير
عهد: خد لك بدوجارد البيت , رنوش ردت ع موضوع خطبتها واليوم راحو للتحاليل وأكيد يتناقشون في هالمضوع
ملاك: لالا في شي ثاني
دانا: لا ثاني ولا ثالث , طيب ماتحسون أن كل شي صار بسرعه عكس خطوبتي
رزان: أي والله كل شي حار بحار بس أحسن , مللونا مدري متى بيملكون
عهد: أكيد عقب ماتطلع نتايج التحاليل
ملاك: صدقوني في شي ثاني مو بس موضوع خطبة رنوش , قومو معاي "البنات سلمو أمرهم لله وقامو مع ملاك"
عبد العزيز: هلا هلا ببناتي تعالو أجلسو
ناصر: أخباركم مع المذاكره ؟
البنات: الحمد لله
ملاك: وش هالإجتماعات من ورانا شاللي تخططون له ؟
فضيله: ههههه مايفوتكم شي , نفكر نسافر معاكم في الإجازه
البنات بصوت واحد: يـــــــــــــــــــــــــــس
دانا: ومن اللي بيرافقنا ؟
عبد العزيز: العائله الكريمه كلها بس فيصل مايقدر ياخد إجازه لأن إذا أخد إجازه الحين مايقدر ياخد إجازه لزواجه , وسلمان عنده شغل
ملاك: ماما طلبتـــــــــــــــــــــــــك بلييييييييييييز
فضيله: عيوني آمري
ملاك: أبي حور تروح معانا بليييييز
فضيله: ههههه تصدقين تونا نقول نبي نروح مع أهل فارس صرنا عائله وحده لكن أتوقع نسافر بعد ملكة رانيه وراشد
رزان: إن شاء الله تضبط التحاليل
فضيله: إن شاء الله , بكره الصبح بتطلع
دانا: ماشاء الله خطوبتهم حار بحار كل شي صار بالسرعه
ناصر: أنتو تقولون كل شي صار بالسرعه وراشد يقول مل وهو ينتظر
عهد: هههه لازم يمل من التفكير , إلا صحيح ماقلتو لي وين بنسافر ؟
فضيله: حالياً بس مكه والمدينه عشان زواج رزان وفيصل قريب
دانا: حلو , طيب مانبي نروح في السياره نبي طيران
عبد العزيز: أيوه طيران عن طريق جده لكن مافيه عن طريق الطائف
دانا: لكن عمتي تخاف من الطائره
ملاك: عااادي أم تركي شوي وتتعود وبعدين بتتشجع إذا شافت الكل بيروح
رزان: قلتو لهم ؟
فضيله: لا للحين مافاتحت حد في السالفه إن شاء الله بعد ماتطلع نتايج راشد ورانيه
عهد: حلو حلو بس كم عائله بنصير ؟
فضيله: هي الرحله اللأهل واللي يعز عليهم , حالياً أحنا وبيت أبو مشاري وبيت أبو تركي وعشان ملوك بقول لأم وافي
ملاك ضمت أمها: أحبـــــــــك ماما
رزان: ياااااااااي بتصير الرحله وناسه
دانا: أفا أفا مرت أخوي فيصل مو معانا وتقولين وناسه
رزان تأثرت: حقه فيه العافيه إن شاء الله بدعي له
عهد: خد لك هذي تقول بدعي له زين إذا خلاك تروحين
عبد العزيز شاف نظرات رزان حب يطمنها: لا كلمت فيصل إن شاء الله بتروحين معانا
دانا: تعورون القلب هذي فهد مو معاها وأنتي فيصل مو معاك
عهد: جب لانطرد فارس
دانا: هههههههههه حررررررررره
ملاك: لاتستانسين واجد تراه مابيصير معاك في غرفه
الكل: ههههههههههههههههه
دانا أنحرجت: نحاستك وتفكيرك الأسود
فضيله: إن شاء الله تطلع نتايج راشد ورانيه سهاله ولا يصير فيها غلط عشان بعد ملكتهم نسافر
رزان: ماعليه ع الليله الزينه وتحديد الملكه والحجوزات مو بهالسهوله
فضيله: لا تحاتين إذا ع الليله الزينه ترنا شفنا إن شاء الله بعد ماتطلع نتايجهم بأربع ليالي
دانا: ياربي وش هالخطوبه كل شي حار بحار
رزان: ههههه الله يتمم لهم ع خير يارب , ملوك وعهود حبايبي قومو ذاكرون بكره عندكم أختبار ولا ترى عهود أشتكي
بعد المناقر والهبال قامو ملاك وعهد يذاكرون والباقي ضلو يخططون للسفره ...
رزان دخلت غرفة فهد اللي جالسه فيها عهد: عهووود حبيبتي بكره عندك أختبار
عهد: لحظه شوي حبيبي , بس شوي رزان .. تعالي كلمي فهد
رزان: هلا حبيبي فهود............تمام الحمد لله........بخير ربي يسلمك.........ههههه عهود ثالث لاتشغلها ترى أشتكي عليك..............أحلف!! كذااااااااااااب..............ياقلبي عهود.......طيب بخليكم براحتكم بس لاتطول عليها بكره عندها اختبار............بيباااي,
رزان..عطيت عهود الجوال ياربي هالبنت وش قد كتووومه يومين مابيكلمها فهد ولا قالت لأحد لو ما فهد قال لي , الله يعينه فهد ويعينها ...
دانا مسكت رزان لاتصدمها: أنجنيتي رزووون
رزان وهي تجلس ع سريرها: ياربي دانوه أنا ماشفت ولا باشوف وحده كتومه مثل عهد أختك
دانا: ليه وش صاير بعد ؟
رزان: فهد عنده أختبار طبعاً كالعاده أيام الإختبارات مايرجعون شققهم بيجلس في الجامعه يذاكر ولا بيكلمها يمكن للإثنين أو حتى للثلاثاء
دانا: ياااااااربي , طيب أول مره أسمع يعني أور ردي يحمل معاه جواله ويكلمها
رزان: يقول دكتور حيوان متحلف فيهم ومانعهم من الجوالات وحتى الابتوبات
دانا: هو أحسن عشان تتفرغ عهود للمذاكره بس بتنشغل بالتفكير ع الله بس تجيب نسبه
رزان: إن شاء الله ماتنزل نسبتها , يلايلا قومي بكره وراك أختبار
دانا: وأنتي قومي ذاكري لبعد بكره
رزان: ههه المشكله مايمديني أتشمت بكره ماعندي أختبار وأنتي عندك بعد بكره العكس يوم لك ويوم عليك
دانا رفعت أكتافها: حـال الدنيآ
:*:*:*:*:*:*:*:*:*:*:*:*:*:*:*:*:*:*:*:*:*:*:*:*