روايتي الأولى ::ذايب في هواهم::

[دانهـ العشآق]

النهــــــــــــــآآيهـ // مابعد النهايهـ ..
*نبدأ بفضيله .. الأم الحنونه المتفاهمه مع أولادها وعلاقتها الحلوه مع طالباتها اللي كانت السبب في نجاح بنت ورغبتها في الدراسه وقامت بدور الأم والعمه والخاله في حياة رزان بعد فقدها لأمها بصراحه أمنيه أن كل أم تصير صديقه لبنتها مثلها ...
.
.
فضيله: أحيي كل بنت تنمي مواهبها .. وتكون طموحه ومخططه لمستقبلها .. وترضي ربها ووالدينها .. وتكون عنصر فعال في المجتمع .. وتصل إلى القمه بمجهودها وترفتع راس أهلها وكل اللي يعزونها ويتمنون لها الخير .. وتبني لها مسكن لآخرتها وماتفكر فقط في الدنيا .. وماتكون مثل ريشه وين مايجيها الهواء يطيرها ...
..
فضيله وهي تناظر عهد اللي لابسه بلوزه علاقي ع الرقبه وفوقها جاكيت صوفي مفتوح ودبتها قدامها .. قالت: عهوووود أنتي تتدفين وولدنا لأ وش هالغش
ريهام بتأييد وهي تسكر جاكيتها: صح عهود دفي ولدنا
عهد وهي تبتسم: ماحب تبين دبتي أحس شكلي غلط
عبد العزيز وهو راجع من برا وسمع جملتها الأخيره: تولدين بالسلامه يابابا "أشر ع اصناديق الفواكه اللي وداهم المطبخ: هذا أفكادو وسفرجل نادرين الوجود دورتهم دواره بس عشانهم زينين للحوامل عاد ما أوصيك أكلي منه
عهد: تسلم ياخالي الله لا يخلينا منك
ناصر دخل بعد عبد العزيز بفتره ومعاه صناديق سفرجل وأفكادو أشر عليهم: هذول أكلي منهم ياعهد تراهم زينين
الكل: هههههههههههههههههه
ناصر ؟؟؟: وش فيكم ؟
ريهام: خلاص أرحمونا بنخصص ثلاجه للسفرجل والأفكادو كلكم ماتجون من برا إلا مع كراتين ترى مو لصالحكم عهود تصير دبه !!
الكل: هههههههههههههههههههه
:*:*:*:*:*:*:*:*:*:*:*:*:*:*:*:*:*:*:*:*:*:*:*:*
*مها وأسامه حياتهم ولا أحلى مع ريان ودانيال رغم عصبية أسامه لكن مها بطريقتها قدرت تتفاهم مع أسامه وتخفف من عصبيته ...
.
.
مها: كلن له طبعه .. وأسامه حبيبي وأبو أولادي أحبه بكل أطباعه .. من رايي العصبيه تتعالج بالهدوء .. أحياناً لمن أسكت أو أقول جزاك الله خير أسامه يقول لي آسف ولو أنه ناذراً مايعتذر إذا كان معصب لكن كسبته بذكائي .. بعكس لمن أتهاوش معه أفتح باب مسكر وأنا تتعب نفسيته وهو تتعب نفسيته ...
أسامه: شسوي بعد جابت راسي وأدبتني .. أحبــــــــــــــها ربي لايحرمني منها ...
:*:*:*:*:*:*:*:*:*:*:*:*:*:*:*:*:*:*:*:*:*:*:*:*
*فيصل ورزان -->>لاتعليق // أمزح بقول .. حبو بعض من لمن كانو صغار وحققو حلمهم وتزوجو .. فيصل اللي كانت رزان بالنسبه له كل حياته وقف معاها في موت أمها وواسها وبين لها أن الله مثل ماياخد يعطي وساعدها في تعبها لمن حلمت بناصر وورد .. ورزان حبها لفيصل مايقل عن حب فيصل لها تحبه وتعشقه وتخدمه بعيونها .. واليوم فيصل ورزان يعيشون الحياه بحلوها ومرها مع بعض وماليين عليهم حياتهم ناصر وورد ...
.
.
رزان: بوجود فيصل طعم حياتي يكون حلو .. والمشاكل يصير لها طعم ثاني .. وكل مشكله نحلها مع بعض ويكبر حبنا رغم كل المشاكل ومصاعب الحياه .. رغم وفاة خالتي وأمي الله يرحمهم قدام عيوني لكني لقيت الشخص اللي يحافظ علي ويحميني ويفديني بروحه .. صرت ما أبخل عليه بشي أساعده وأخدمه بعيوني بدون لا يتكلم أحس له وأنفذ كل طلباته ...
فيصل: يارزون ياحبيبتي شعور متبادل .. أنا ورزان قلبين في نبض واحد .. نكمل بعض .. ما أتخيل حياتي بدونها ربي لا يحرمني منها ...
...
رزان: فيصصصصصصل تعال
فيصل وهو جاي لها: هلا
رزان: وأنت يعني ما تعرف تمسك واحد من أولادك أقلاً بس وأنا أشتغل
فيصل وهو منزل راسه: شسوي ما أقدر أشوفك في النهار وبذات في رمضان
رزان: أقوووول خد بنتك وروح أنا وحده أرضع ومو ناقصه أصوم شهرين كفاره
فيصل لف شاف رزان ترفع شعرها قال وهو منزل راسه عشان لايصير شي لايحمد عقباه: اللهم أني صائم اللهم أني صائم
فضيله قالت لفيصل اللي قريب يصدمها وهو نازل من السلم: فيصل فيصل درينا أنك صائم قوم بس حرك نفسك نادي رزان
فيصل: يماا عاد فهمي معاناتي لو أركب لها مابنزل لكم
فضيله أنحرجت ضربت فيصل: أعقل هاااا "نادت نصور الصغنون: نصووووري عمري
ناصر الصغنون وهو يركض وضحكاته تملي المكان هرب عنها ...
ناصر أبو فيصل ع باله أن فضيله تناديه قال ببراءه: نعم حياتي
فيصل يناظر خواته اللي توهم جالسين: هههههههههههههههههههه طلع رومنسي الوالد
الكل: ههههههههههههههههه
:*:*:*:*:*:*:*:*:*:*:*:*:*:*:*:*:*:*:*:*:*:*:*:*
*دانا وفارس .. حبيت أحيركم في البدايه مع دانا وميولها لراشد مدري بس حسيت أن البنت تتأثر باللي حولها ودانا كان أخوها يحب بنت خالها وأختها تحب ولد خالها فكانت تشوف قدامها ولد خالتها وكان تخمين من طفله اللي هي غلا إن راشد راح ياخد دانا .. لكن الحياه قسمه ونصيب ودانا خدت فارس ورغم كل المشاكل اللي صارت في البدايه لكن حبهم كان أقوى من كل شي والمشكله الأخيره كانت سبب في هدوء فارس من بعد عصبيته بمعنى أصح رب ضارةً نافعه .. ولا زالو دانا وفارس يعيشون الحياه بمرها وحلوها سوا ومالي عليهم حياتهم ولدهم الوحيد جاد .. وعلاقتة دانا ببنت خالها رزان اللي حتى في الحمل والولاده الأولى لرزان وافقتها فيهاا وعسى الله لايفرقهم ...
.
.
دانا: حليت مشكلتي ياقاتل يامقتول أنا حلفت قلت لو ما أخلي فرووس يترك عنه هالعصبيه ما أكون دانا .. الحمد لله أمنيتي تحققت وفارس هدأ كثيييييييير بعكس أول ماتزوجنا .. صحيح عانيت من عصبية فارس والمشاكل اللي صارت لكن ربي جعل لي بعد عسر يسر والحمد لله ...
فارس: أنا فارس يجيبون راسي .. لكن أشهد أن الغاليه غيرتني حتى ناس يقولو لي مسحور خخخ .. صرت بااااارد ومتفاهم والكل لاحض .. يلا محلاها كل واحد يكمل الثاني .. عسى الله لايفرقنا ...
...
دانا وهي تصارخ ع جاد المتعلق في رجلينها: جاااااااااااااااااااااااد
فارس اللي توه راجع من الدوام: خير خير هالصراخ
دانا: مابقى شي ماحاسه لي مو عارفه أسوي شي
فارس: طيب ليه مانزلتي تحت يساعدونك عليه ؟
دانا: كنت تحت بس خالك جا وجلس في المطبخ وماعرفت أشتغل ركبت أكمل شغلي
فارس أخد جاد: ماعليه حبيبتي أنا راح آخده بطلع معاه الحديقه لين مايأذن
دانا وهي تمسح العرق اللي في جبين فارس: ماتقصر , إذا تعبان خليه
جاد: لالالا ألوح نينه مع بابا
فارس"قرص جاد في خده": يلا مابقى شي ع الأذان بنزل معاه شوي
دانا اللي نست المفاجئه من حوسة جاد: تيب ننتظركم "وهي تغط ع كلمة ننتظركم"
فارس: ليه بتنتظريني تحت ؟
دانا: لا هنا أنا و "مسحت ع بطنها"
فارس والفرحه مو سايعته: يعني يعني دانا أنتي حامل ؟
دانا هزت راسه وهي تشوفه مبسوط ...
فارس: يعني راح يصير عند جاد أخو وأنا بصير أبو مره ثانيه ؟
دانا: ههههه أيه وش فيك فارس ؟
فارس ضمها: عسى ربي يخليكم لي ولا يحرمني منكم
دانا بعدت عنه: فروووس أنا صايمه الليله بنحتفل
فارس: هههههههههههههه "وطلع مع جاد وهو ماوده يطلع"
:*:*:*:*:*:*:*:*:*:*:*:*:*:*:*:*:*:*:*:*:*:*:*:*
*عهد وفهد .. عهد اللي حبت فهد في مراهقتها رغم أنه قدام عينها من أيام طفولتها .. وع حلم برئ تزوجو وكانت شخصياتهم متقاربه من بعض الهدوء والخدود الحمرا هع .. لكن مع بعض يعيشون حياتهم ع عكس مايشوفون الناس لأنهم مايبينون مشاعرهم ويحلون مشاكلهم بينهم وحتى لمن حملت عهد ببنتهم مريم مادرو الأهل إلا بالصدفه ومع كذا فحياتهم لها طعم خاص ويعيشون حياتهم بهدوئهم ورومنسيتهم وماليه عليهم حياتهم بنوتتهم اللي جت متأخره وأنتظروها كثير وسموها ع أسم المرحومه مريم ...
عهد: يمكن الكل تعود علي هادئه ومالي دور كثير .. لكني عايشه حياتي مع فهودي عسى ربي يخليه لي .. وماشيه ع قانون أستعينو ع أموركم بالكتمان .. هو الكتمان حلوو بس أحياناً يتعب النفسيه .. لكن إذا حياتي ودنيتي كلها يشاركني همومي فما أحس له داعي حد ثاني يعرف أني متضايقه بذات ع سالفة تأخري في الحمل .. يلا بالكتمان أنحلت المشكله ولا حد درى والحمد لله ...
فهد: أنا وعهد مطبقين قانون كتمان أسرارنا عن الناس .. والحمد لله تعلمت أني أحل مشاكلي بروحي بذات لمن توفت أمي وكبرت المسؤليه علي .. يمكن قبل كان عندي هموم وأشياء أحاتيها وللحين لكن الله كريم وهذا حال الدنيا .. لكن لمن أحس أحد يفهمني ويشاركني هموممي وينحط ع الجرح يبرى أعيش حياتي لحظه بلحظه .. وتتم الحياه في عيوني بطعم متلون ونعيشها بكل ألونها .. عسانا مانعدم أغلى أحبابنا ...
...
فهد وهو يناظر عهد: الحمد لله ع السلامه
عهد وهي لسه تهلوس: أنا ولدت ؟
فهد: أيه حبيبتي ولدتي جبتي لنا مريومه
عهد ناظرت أركان الغرفه: تيب أبي أشوفها
فهد: شفتها تهبل صغنونه الحين هي في الحضانه "أتصل لهم يجيبون مريم وأبتسم لمن دخلت السستر تدف السرير"
عهد ناظرت فهد وردت ناظرت مريم: فهد هذي بنتي ؟
فهد: أيوه ياعيون فهد , قمر مثلك
عهد: عسى ربي يخليكم لي
فهد: ويخليك لنا
:*:*:*:*:*:*:*:*:*:*:*:*:*:*:*:*:*:*:*:*:*:*:*:*
*مرام .. اللي سافرت للخارج برغم كذا كانت محافظه ع نفسها وتعرف كيف تتعامل مع الناس في دراستها وبرا .. يمكن ناس كثيرين ينتقدون اللي يدرسون بالخارج بس البنت اللي تحافظ ع نفسها سواء في بلدها أو في الخارج .. المفاجئه أنها نزلت المملكه وتقدم لها واحد من أصحاب عمها كان سفير سعودي محترم .. ووافقت عليه وتزوجو ...
...
مرام..صدمتي محد يتوقعها لمن تقدم لي يونس بغيت أتغطى من الفشله .. لأن صار لي موقف معاه أول سنه لي بالجامعه كانت بلكونة غرفتي التبديل زجاجها عاكس وهو يشوفني وبما أنه محترم قال لي (أسمحي لي بس ترى زجاج غرفتك التبديل عاكس) كنت أبي أختفي ولا ماشافني إلا واحد من البلد وصديق عمي !! يوم تقدم لي صدمــــه ...
يونس وهو يناظر مرام: سرحانه في شنو ؟
مرام: هههههههه تذكرت أول موقف جمعنا
يونس: هههه الحمد لله أني أنا اللي شفتك لو واحد من البريطانيين كان أنبسط لهالمواقف
مرام: اللي يشوفك ما أنبسطت عارفتك زين يوم شبعت من المناظر قلت لي
يونس: ههههههه حرام عليك إن بعض الظن إثم
مع السوالف تغير الموضوع , مرام: باط جبدي الثاني اللي في بطني
يونس أبتسم: بس شعور حلو أن يكون عندنا توئم
مرام: أبي أجهز كل مره مانشوف إلا واحد منهم اللي هو ولد والثاني شنو ولد ولا بنت لهدرجه يستحي مدري تستحي مايبونا نشوفهم
يونس: تدرين أنا أتمنى أنها بنت عشان تروح هي وأخوها بعثه
مرام: هههههههههههههه ماشاء الله من الحين مخطط لمستقبلهم !!
:*:*:*:*:*:*:*:*:*:*:*:*:*:*:*:*:*:*:*:*:*:*:*:*

[دانهـ العشآق]

*ملاك .. حبيت أنبه ع نقطه أن أحياناً الأهل يغفلون عن البنت في فترة مراهقتها بدون قصد فممكن أنها تنحرف أو تتأثر بصديقاتها .. لكن الحمد لله أهلها أنتبهو لها وهي ع وشك أنها تنحرف فقدرو يتداركون الوضع ويحلون المشكله .. وقريب راح تصير ملاك عروس ع واحد ماتتوقعوه أو يمكن توقعتوه (وائل) ...
.
.
ملاك: مدري شاللي خلاني أروح بهالطريق .. لكن أحس النت يجدب لأشياء غصب عني حتى لو كنت حاطه لي خطوط حمراء ما أتعداها .. لكن الشيطان شاطر شوي شوي ماصحيت لنفسي إلا لمن نبهوني أغلى ماعندي عسى ربي لايحرمني منهم .. نصيحتي أن هالأشياء بتكون مجرد تسليه ودقايق ننبسط فيها وتعدي ممكن أننا ننسها أو نذكرها وننبسط منها أو نتضايق لذكرها .. لكن اللي مثلي راح يكون هالشي عبره له إذا حصل .. تمنيت أموووت مليون مره لمن حسي بالغلط اللي أسويه .. ولليوم وأنا ألوم نفسي ...
...
ملاك..كنت جالسه في غرفتي وحدي متضايقه صحيح أني تركت عني كل هالخرابيط لكن يظل لها أثر سيء يمكن أثبت لأمي وخواتي أني تغيرت .. لكن أخوي فيصل بكره ملكتي وهو للحين ماجا لي يشوفني يسلم علي ببرود .. خايفه أن أخوي لسه شايل بخاطره علي وينظر لي ع أني أنسانه منحرفه ووين ماجاها الهواء يطيرها ...
فيصل فتح باب غرفة ملاك بهدوووء لقاها منسدحه ع السرير ع باله نايمه لف بيسكر الباب نادته ...
ملاك بصوت مغبون: فيصـــــــــل
فيصل: هلا ملوك
ملاك..من زمان ماسمعت أخو يناديني ملوك لا شعوري رحت ضميته هذا أخوي الوحيد أبيه يرضى عني وفكرته تتغير عني ...
فيصل المستغرب من ردة فعل ملاك: ملوك حبيبتي وش فيك ؟
ملاك لاحياة لمن تنادي كل ماتكلم تتمسك فيه أكثر ولا هي راضيه يبعد عنها كانت تردد كلمات فيصل مايفهمها ...
بعد نص ساعه وفيصل يحاول يهدأ ملاك ويفهم منها السالفه وهي تبكي , فيصل رفع راسها عن كتفه: ملوك روحي دورة المياه غسلي وجهك وأهدي وتعالي فهميني وش صاير لك
ملاك هزت راسها وسوت اللي قال لها عليه فيصل .. رجعت وبيدها إكلينكس وتمسح دموعها اللي تطيح ع خدها لا إرادي ...
فيصل: ملوووووووك خوفتيني وش صاير
ملاك وهي تشهق في البكي: فيصل أنا آسفه
فيصل: ع شنو ؟ !!
ملاك: عارفه أنك شايل في قلبك علي وودك ربي ياخد روحي ويفكك مني و .........
فيصل قاطعها: بل بل بل .. أنا مو حقود لهدرجه , ع شنو كل هذا ؟
ملاك نزلت راسها: عشاني كنت قبل أ................
فيصل قاطعها: أنتي قلتيها قبل , وأنتي شاللي مبكيك الحين ؟
ملاك وهي تبكي: لأني أشوفك تصد عني وتعطيني نظرات تكرهني في نفسي أكثر وإذا تناقشتو في موضوع وطرو الجانب السيء منه تناظرني .. حتى نصور وورد لمن آخدهم طوالي تجي تاخدهم مني كأنك تقول مابي هالنجسه تنجس أولادي .. وإذا طلعنا تعطي الكل إهتمام إلا أنا
فيصل وهو منصدم: أنــــــــــــــــــــــــــــــــــــــــا !!!
ملاك وهي تشهق في البكي: أيوه أنت
فيصل: ملوك وربي مو قصدي ولا فكرت أصلاً في هالأشياء
ملاك: فيصل أنا مو بزر أنا أفهم وأتأثر
فيصل: وربي ملوك مو قصدي هالشي يمكن أنتي تتوهمين عشانك حاطه في بالك هالأشياء ومتوقعتها مني وبعدين هالسالفه مو صايره الأمس أو اليوم هالسالفه مرت عليها سنوات مو غبي أنا عشان أحاسبك ع شي من سنتين أو أكثر
ملاك تأثرت من كلام فيصل وزادت في البكي ...
فيصل: عمري ياملاك ماشلت في قلبي ع وحده من خواتي , حتى لو غلطتي مجرد يتصلح سلوكك أسامحك ليه أنا أنسان وكل أنسان يغلط
ملاك: ..............................-->>قالتله عمرها تبكي ...
فيصل ضربها بمزح: ملكوووو ماعندنا عرايس يبكون
ملاك..تعجبني أبتسامة فيصل أخوي أحس لها معنى , بشرته القمحيه وعيونه العسليه واللي محلي أبتسامته الغمازه اللي في خده ع جهة اليسار وفكه اللي تفصيلته تبين كل أسنانه المرتبه .. غصب عني أبتسمت ...
فيصل اللي تعب يراضيها: هالدلوعه هذي والله مو مصدق أنك كبرتي وبتصيرين عروس طول عمرك بتضلين في عيني دلوعتنا الصغيره , إلا ملكوه طلعتي كل اللي في قلبك ولا في شي بعد شايلته في قلبك ؟
ملاك وهي تشهق: أيه بعد خواتي كلهم لمن أنخطبو جلست معاهم وسولفت لهم عن رجالهم إلا أنا
فيصل قرص خدها: والله أنك تجيبين أفكار مدري من وين , خواتك أزواجهم أصحابي بس وائل ما أختلطت معه كثير علاقتي فيه سطحيه فاللي علي أني سألت عنه مع بابا والله ماحطيت في بالي شي ملوك وش فيك ؟
ملاك ضمته: أحبك يا أحلى أخو في الدنيا
عهد دخلت وملاك ضامه فيصل قالت بطناز: لا حوووووول ملوك تبين تتعودين ع الحضون من الحين
ملاك أنحرجت وبعدت عن فيصل وراحت في تفكيرها وتوترها ومحاتاتها ع اللي راح يصير بكره ...
:*:*:*:*:*:*:*:*:*:*:*:*:*:*:*:*:*:*:*:*:*:*:*:*
*سيف وحنين .. يمكن بدايتهم غريبه وبذات أن سيف ماقدر يأذي حنين عشانه يحبها وهذي بالناذر تحصل للأسف شبابنا لمن تحصل لهم فرصه أنهم يختلون ببنت بجمال حنين يمكن أن الشيطان يدخل بينهم مع العلم أن (مامن رجل أختلى بمرأه إلا والشيطان ثالثهما) -->>بما معناه , وكانت مجازفه لمن قامت حنين تتواصل مع سيف ولو بالمسجات ممكن أن ولد مثل سيف يتركها لكن الحمد لله تزوجو ورغم المشاكل اللي صارت لهم إلا أنهم قدرو يتغلبون عليها ويعيشون الحياه مع بعض بكل ألوانها مع بناتهم فدك وفداء .. وبنتظار ولي العهد ...
.
.
حنين: مجازفه لمن تواصلت مع سيف بالمسجات سيف قبل الخطوبه أعتبرها لحظة طيش أو لحظة غباء مع أحترامي لنفسي .. صحيح أني ساعدته وكانت نيتي صافيه بس لو حد درى راح أروح فيها .. مدري كيف أنا سويت هالشي لليوم متفاجئه من نفسي .. كان بإمكان ولد مثل سيف أن يساعده رجال أو شيخ ياكثر الرجال الملتزمين والشيوخ .. لكن قلت هالشي عقب ماطاح الفاس في الراس مافكرت في هالشي لحظتها .. الحمد لله اللي صار صار والله جاب العواقب سليمه .. المهم عندي علاقتي الحين مع سيف وبنوتاتنا والبيبي ...
سيف: للحين مو مستوعب اللي صار .. رغم أني تواصلت مع حنين بالمسجات قبل الخطوبه لكني محترمها وأحبها وواثق أنها ماتواصلت مع حد غيري .. بس أحس أن كل شي في حياتي غريب حتى الطريقه اللي حبيت فيها حنين وتزوجتها كل شي غريب .. والمشاكل اللي صارت لنا .. الحمد لله رب العالمين ع النعمه اللي ربي عطاني وياها .. نصيحتي أن مو كل الشباب مثلي وأصابعي ماهي سوا ومو أي ولد يكلم أو يتواصل مع بنت راح يتزوجها مع أحترامي ...
...
حنين وهي تركض وراء فدك وفداء: تعااااااااااااالوووو تغدو وجعتو رااااسي
سيف اللي صحى من النوم ع صوت صراخهم: وش فيكم ؟
فداء راحت وراء حنين: أنااا ماتعبت ماما هذي فدك
فدك: لا أنتي "وقامو يتهاوشون"
حنين: عززز الله ولدت ولاده مبكره من بناتك
سيف: فــــــــدك فدااااااء خلاص
فدك-فداء بصوت واحد: آثفين
سيف: يلا أعتذرو للماما وأخوكم
قامو يسلمون ع حنين ويبوسون راسها , فداء برجتها جلست ع بطن حنين ...
سيف: فدااااااااااءء لا تعورين الماما وأخوك
فداء باست بطن أمها واسها: آثفه أخويي وماما بعد أنا آثفه
حنين ضمت فداء: مقدر عليها هذ عجوز قريييح اللي يشوف هي الكبيره
سيف: تذكرني برانيوه أختي لمن كانت صغيره نفس الحياله والحركات
فداء: تيب ماما يلا حطي الغداء بابا جوعان
حنين-سيف ضحكو ع حيالة فداء: هههههههههههههههههه
سيف: والله وصرتي تتوسطين فيني مثل الرجال اللي يجلسون جنب الشيخ في المجلس ويآكلون الأكل اللي جنب الشيخ كله والناس ع بالهم الشيخ اللي ياكل
حنين: هههه بنتي هذي فيها عرق خفة دم ولقافه غير طبيعي
سيف: فداء خدت رجة رانيوه وفدك خدت هوءك , واللي في بطنك بياخد مغامراتي
حنين: ههههههه لا تكفى بس ...
:*:*:*:*:*:*:*:*:*:*:*:*:*:*:*:*:*:*:*:*:*:*:*:*
*هدى .. الدخيله في حياة حنين وسيف وحاولت كذا مره أنها تنتقم وتخرب حياتهم لكن حبهم كان فوق كل شي .. للأسف في ناس مثل هدى في مجتمعنا أستغلت كبر أمها وأبوها في السن وصارت تبيع شرفها في وسط بيتهم وتأكل أمها وأبوها من فلوس حرام .. لكن نهايتها أن فضيحتها ع كل لسان ومافي ولد يتزوج بنت مثلها فصارت هدى لعبه في يد اللي مايخافون ربهم أمثالها .. وأمها تسمع كلام الناس لكن ماتصدقهم ...
...
هدى وهي ترتجف: لالالا يما لاتخلينها تدخل
أم هدى ببراءه وع بالها أن صديقة هدى اللي جايه وهو أساساً ولد تعود يقول لأم هدى أنه صديقتها وتدخله غرفتها قالت: يايما البنت من زمان تنتظرك
هدى..ليه أتغلى كذا ولا كذا أنا تعبانه أقلاً أرفه عن نفسي شوي , قالت: خليها تركب لي الغرفه يما
: هلاااااااااا والله باللي تتغلي علينا
هدى ضحكت بمياعه: ههههههههههههه شدعوه بس يالحب النفسيه ماتساعد
: الحين نعدل لك النفسيه وأبو النفسيه
هدى: أول هات ماعندك
: الحين أوريك كل ماعندي "حملها وهدى مبسوطه خلى جسمه داخل البلكونه ويدينه اللي فيها هدى برى وهو ناوي يرميها من الطابق الثاني ...
هدى بخوف: أكيد أنت تمزح صح "هزته: نزلني
: مو أنا اللي وحده مثلك تسرق فلوسي وتاخدني كتسليه وأسكت
هدى..كذا ولا كذا راح أموت لكن مو أنا اللي أموت هالموته وأسكت له ولأشكاله ...
"بحركه منها الولد ماحط حساب لها حطت ثقلها كله ع يدينه لين ما طاح هو معاها من الطابق الثاني .. ماتو وهم غارقين في المعاصي .. ماتو شر موته .. مابقت غير فضيحتهم ع كل لسان لكنهم راحو والفضيحه والفاجعه صارت ع راس أهلهم .. فكو المجتمع منهم لكن فضيحتهم ع كل لسان لكن ربي مايضرب بعصا .. والله لا يجعل في مجتمعنا ناس أمثالهم ...
:*:*:*:*:*:*:*:*:*:*:*:*:*:*:*:*:*:*:*:*:*:*:*:*
*رانيه وراشد .. رانيه اللي رسمت الإبتسامه ع وجوهنا بضحكها وهبالها وكانت محبوبه عند الكل ولقافتها وصلتها لراشد وع قولها في مثلها المشهور (في اللقافه ثقافه) .. يمكن أحياناً تكون الصدف سبب في جمع قلبين مثل طيحتها في ملكة دانا ودراستها في جده .. ونسيت أقول لكم رانيه وراشد تزوجو وينتظرون ولي العهد ...
.
.
راشد: رغم أني أفتقدت أشياء كثيره من لمن كنت صغير لكن ربي ساعدني وقدرني أني أكون نفسي وأحقق نجاح وأساعد غيري .. وطموحي كان له دور كبير في نجاحي .. ورزقني ربي برانيه اللي عوضتني عن حنان الأم والأبو وقريب راح أصير أبو وراح أربي ولدي أحسن تربيه عشان يصير مثلي وأحسن مني ...
رانيه: لمن أشوف مكانتنا الإجتماعيه أنا وراشد أحمد ربي وفي نفس الوقت أنبسط أن أحنا أتفقنا وباللي نقدر عليه حققنا أكبر نجاح .. والحمل حيل متعبني الله يعينني ويعن راشد ع دلعي ^_^ ...
...
رانيه اللي كانت راجعه من ملكة ملاك وهي معصبه لأن سرقو جوالها ...
راشد وهو يتلثم بشماغه ع شكل رانيه وهي تدعي ع اللي سرقت جوالها كان شكلها يضحك , قال: خلااااص رانيوه مابتعيش المره ع دعواتك
رانيه: خليني أبرد قلبي .. عساها ياربي ماتضل عساها أنفلونزا الخنازير عساها تصدمها سياره ولا تلاقي لها أسعاف "ضربت راشد ع فخده: وأنت مامنك فايده أدعي عليها معاي
راشد يستهبل: أنتظري بس أتوضأ تستجاب الدعوه أحسن
رانيه: والله فيني حره أمبى أعرف من اللي سرقت جوالي
راشد: لاتحرين نفسك أنتي حامل وبعدين جوال بداله ألف بكره رجعتي من الدوام أجيب لك معاي جوال
رانيه: أدري فيك مابتقصر .. بس منقهره كيف هذي سرقت جوالي لهدرجه مافيها ضمير لكن كله من العواين اللي تقول رانيه من خدت راشد وهي كل يوم جوال واللي تقول .....
راشد: الناس ماترحم يارانيه بس ولا يهمك راح آخد لك اللي أحسن منه
"دخلو غرفتهم ومانامو إلا يووووم خلصت رانيه دعواتها ع اللي سرقت جوالها .. شوي إلا يصحى راشد ع صوتها تبكي ...
راشد: بسم الله حبيبتي وش صاير لايكون عشان الجوال ؟
رانيه وهي تبكي: أحس نفسي مختنقه أبي أطلع
راشد وهو نعسان ويجبي قام بدل ملابسه وغسل ع السريع وطلع مع رانيه .. وصلو الكورنيش وقامو يمشون ...
رانيه أشرت ع كرسي فيه شباب: أبي أجلس ع هذاك الكرسي
راشد: أنجنيتي ماطاحت عينك إلا ع هذاك الكرسي ياكثر الكراسي كثراه في الكورنيش خل نجلس ع اللي جنبه
رانيه: مابي مابي أبي هذاك الكرسي روح قومهم
راشد أستسلم وقوم الشباب من الكرسي وجلسو هم شوي وقالت رانيه تعبت وتبي ترجع البيت ...-->>الله يعينه عليها وتولد بالسلامه يارب ...
:*:*:*:*:*:*:*:*:*:*:*:*:*:*:*:*:*:*:*:*:*:*:*:*
*فتحي ونهى .. يمكن ماتكلمنا عنهم كثير أو أغلبكم مايعرفونهم .. أذكركم أن فتحي ولد أم تركي اللي كان سكانه مرته .. ع رغم أنه هو الرجال إلا أن زوجته متحكمه فيه وحتى ع أهله وكان يحبها بغباء لدرجة أنه كسر خاطر أخته عبير عشان زوجته .. لكن رب العالمين أحياناً يبتلي الأنسان عشان يراجع تصرفاته وينتبه لنفسه فلمن الله عطاهم ولد معاق تحسنت علاقة نهى مع أهل زوجها وأنتبه فتحي من غفلته وأعتذر لأهله وصارت علاقته مثل ما المفروض تكون من زماان وقدرو هو ونهى يتفاهمون بشكل طبيعي ...
...
نهى: لا نتأخر ع موعد الولد
فتحي: إن شاء الله بس تصدقين نهى أحسه يوم عن يوم يتحسن بفضل الله
نهى أبتسمت: الحمد لله
:*:*:*:*:*:*:*:*:*:*:*:*:*:*:*:*:*:*:*:*:*:*:*:*

[دانهـ العشآق]

*جاسر .. اللي كان الأخو اللي تتمناه كل أخت والولد اللي تتمناه كل أم اللي وقف في وجه الكل عشان أخته .. ولمن قرر يتزوج طلب في زوجته شي واحد (تحب أهله وأمه وأخته بذات) الله رزقه بالزوجه اللي تسعده وسبحان الله ع أنه ماتشرط إلا أنه أخد بنت تقول للقمر قوم وأنا أجلس مكانك يمكن تكون صدمه بالنسبه لكم أن جاسر تزووووج سديييييم ...
.
.
سديم: ع أني عشت حياتي صعبه وأمي وأبوي منفصلين ومات أبوي .. لكن جاسر عوضني عن كل اللي فقدته صار حياتي وروحي وعمري وحبيبي اللي ما أقدر أعيش بدونه ...
جاسر: عمري ماشفت ولا راح أشوف أنسانه بروعة سديم .. حبي لها أكبر من كل شي ...
...
سديم بدلع: جااااااسر جسووووري
جاسر طلع لها من وراء الباب وباسها في خدها: عيووونه قلبـــــه عمـــره
سديم بنفس نبرة الدلع: تقبل الله
جاسر: منا ومنك حياتي , كل عام وأنتي بخير
سديم: وأنت بخير
جاسر جهز محفظته بيعطيها عيديتها طلع من محفضته عديتها وقال: لحظه أول شي راح أعطي أمي
سديم أبتسمت: أكيد لو مافيك خير لجنتك ونارك مستحيل يكون فيك خير لي
جاسر ضمها بحنان: فديت الفاهمه
سديم وهي ع صدره: تصدق جاسر وجودي جنبك أغناني عن أشياااء كثيره .. كنت أسمع البنات يتكلمون عن أبوانهم في العيد وكل يوم .. لكن أنا ماكنت أشوف أبوي إلا يوم العيد .. السنه أبوي ميت ماجا عطاني عيديتي .. ما أتصل قال لي أستعدي بنطلع رحله .. الله يرحمك يابابا ...
جاسر ضمها: الله يرحمه حبيبتي .. أنتي عندك أم بالدنيا
سديم: وهذا اللي مخليني أعيش لليوم لأن أمي ماخده دور الأم والأب في حياتي .. حتى لمن مات أبوي ماتغير علي شي ماكنت أشوفه لكني ذكرته يوم العيد لأنه كان يذكرني في هاليوم بس ...
جاسر أبتسم: وأنا أذكرك في كل يوم
سديم: وأمي بعد
جاسر: سدوووووووووووم قمت أغار من عمتي لا أمنعك عنها
سديم: لا والله .. أنت تعرف أن أمي هي صديقتي وجنتي وناري و......................
جاسر قاطعها ببوسه: وأنا زوجك وحبيبك وكل حياتك
سديم ناظرته بغرور: ياوااااثق
جاسر: ليه مو من حقي أثق ؟
سديم وهي تحط راسها ع صدره وتمسح ع ظهره بيدينها: ياقلبي أكيد من حقك توثق
"بعد دقايق من اللي هم فيه نزلو يسلمون ع الأهل ويتغدون معاهم .. بعدها طلعو راحو عند إيمان يتعشون عندها .. بعد ماطلعو من عند إيمان جاسر أقنع سديم تسلم ع أهل أبوها أقلاً بس تسلم وهو ينتظرها بره"
:*:*:*:*:*:*:*:*:*:*:*:*:*:*:*:*:*:*:*:*:*:*:*:*
*عبير .. البنت المتعلقه في أخوها اللي كان أخوها هو صديقها وحياتها كلها .. ع الرغم أن بنت أختها تزوجت قبلها وهي أصغر منها لكن صدرها كان رحب وسبحان الله .. الله عطاها الزوج اللي تتمناه كل بنت ع دين وخلق ومال وجمال يمكن عرفتوه هو عبد الله صديق راشد ...
*عبد الله .. الولد الطيب اللي الكل يحبه فقد زوجته وتأزمت نفسيته وجلس 3سنوات بدون زواج ويمكن مال شوي من الفراغ اللي في قلبه بس كان عنده الأخو والصديق اللي ينصحه ومايرضى له يروح بهالطريق وساعده .. إلى أن الله أراد وزقه ببنت ولا كل البنات (عبير) يمكن لقى صعوبه أنه ينسى خطيبته الله يرحمها وكان ينادي (عبير) في بداية خطوبتهم (سجود) لكن عبير بطيبة قلبها قدرت تكسبه وتخليه مايشوف غيرها ويذكر سجود بالخير ويدعي لها بالرحمه ويعيش أيام حياته مبسوط مع زوجته ومايشوف غيرها ...
...
عبير ودبتها قدامها أستقبلت عبد الله اللي توه جاي من المسجد ...
عبد الله: تسلم لي الغاليه , عيدك مبارك
عبير: من العايدين ياقلبي
عبد الله: هاا أخبارك اليوم ؟
عبير: الحمد لله , تأخرت حبيبي
عبد الله: شسوي عيد وزحمه والشيخ طول في الصلاه وبعدها قرأ أدعيه وأستحيت أطلع من المسجد
عبير: في ميزان أعمالك ياربي , كان نفسي أروح معك قسم النساء لكن سلّم وأنا بدبتي
عبد الله: ههههههه , ترى أتصلو علي ينتظروننا ع الغداء
عبير: وأنا جاهزه بس كنت أنتظرك
عبد الله وهو واقف عند المرايا ينتظرها تخلص: طيب لا تطولين
عبير فاجئت عبد الله ركبت فوق الكرسي اللي قبال التسريحه لين ماوصلت مستوى راس عبد الله وهي تعدل شماغه ...
عبد الله ماتحمل شكلها: هههههههههههههههه عبور أعقلي ههههه عبور لا تطيحين
عبير مسويه نفسها جديه: يلا عاد أوقف مثل الناس لا يخترب شماغك شوي وبخلص
عبد الله: لاتطيحين هههه عبيرووووه مو بايع عمر ولدي
عبير مسويه نفسها سوبر مان تبي تنط وتعرقلت عبد الله مسكها ...
عبد الله: شفتي أنك دبه لو بعدت عنك شوي كان طحتي .. مو صااحيه
عبير: شسوي متعوده ع نفسي رشيقه وجسمي خفيف بس ولدك الله يهديه ع الله بس يرجع جسمي
عبد الله: يارب "قال بسرعه وهو يجلسها ع الكنبه: شوي شوي واجي عبوره مو تتحركين
عبير وهي متروعه: طيب
عبد الله جاب باقة ورد وهو ينفخ من الركض طوالي حطها عند أنف عبير وهو يحركها ...
عبير: عبوووودي بعدها عني
عبد الله برومنسيه: خليها تاخد عبيرها منك
صحاهم من اللي هم فيه صوت الجوال , رد عبد الله وهو منقهر عشان الجوال خرب عليهم الجو: ياخي ماتقدر تفك الناس من خشتك ؟
راشد: هههههههههههههههههههه الظاهر أني متصل في وقت غلط
عبد الله: زين أنك عرفت , أخلص علينا وش تبي
راشد يناقره: كيفك عبووور
عبير اللي تسمعه لأن عبد الله حاط الجوال سبيكر: بخير الحمد لله كيفك وكيف بنت أختي ؟
راشد يناقرها: قلنا عبود أنتي وش دخل خشتك توني مكتشف أن أسمك عبود
عبد الله: ولا حد يزعل مرتي هو فرق حرف واحد
راشد: لا إله إلا الله حتى التدليع يسمعونه مثل بعض حتى الحروف ماقامو يفرقون بينها
عبد الله ضم عبير: لأننا مخلوقين لبعض أنا عبد الله عبود وزوجتي عبير عبوور
:*:*:*:*:*:*:*:*:*:*:*:*:*:*:*:*:*:*:*:*:*:*:*:*
*وافي .. الشاب الطموح اللي يحب دارسته يمكن لاحظت شي في الشباب أنهم يبون حوريه من الجنه ويتشرطون لمن يقررون أنهم يتزوجون ويتعبون أهلهم وهم يدورون لهم عروسه .. لكنه تزوج بنت أقتنع بجمالها وعاش معاها حياه سعيده .. رغم أن مو الكل يحسها بالجمال اللي طلبه وافي لكن سبحان الله هالشي من رب العالمين أنه يوفق بين القلوب ويخلي الزوجه في عيون زوجها غير كل البنات والزوجه بعد تشوف زوجها غير عن كل الأولاد ...
.
.
وافي: قوه حبيبتي
رجاء بتعب: يقويك
وافي جلس جنبها: وش فيك ؟
رجاء: مدري مو قادره أقوم من ع السرير من صحيت أحس بصداع فضييييييييع وحايمه كبدي مو قادره آكل شي
وافي: قومي قومي نروح المستشفى
رجاء تدلعت شوي في النهايه أقنعها وافي وراحو للمستشفى ...
الطبيبه طفشتهم تسأل: طيب ممكن يكون في حمل
وافي: يادكتوره تونا متزوجين ماصار لنا شهر
الطبيبه: نشوف ماراح يضرنا شي تحصل كثير
رجاء: لالا أنا متأكده أني مو حامل بس تعب
الطبيبه: يمكن تكونين حامل من الخطوبه
وافي رفع صبعه في وجه الدكتوره: والله والله ماسوينا شي
رجاء ضحكت ع أنفعال وافي وكأنه بزر في الروضه يبي يقول إجابته: هههههههههههههههه
الدكتوره: هههههه , براحتكم لكن بعض الأدويه تأثر ع الحمل
وافي: حمل وحمل قلنا لك مافيه حمل
في النهايه حطو ع رجاء مغدي وكالعاده عطوها وصفات .. ركب وافي السياره وفي يده كيس الأدويه .. قال: صرتي زينه حبيبتي
رجاء تستهبل: لا لسه أنا رجاء
وافي قرصها في أنفها: هههههههههههه دلوعه
:*:*:*:*:*:*:*:*:*:*:*:*:*:*:*:*:*:*:*:*:*:*:*:*
*حور .. من صغرها كانت صاحبة ملاك ولليوم أحلى صداقه أن الصديقات يكونون قلبين بنبض واحد .. رغم أن ملاك أنحرفت شوي إلا أن حور قدرت تحافظ ع نفسها مع أن صديقة روحها ملاك أنحرفت شوي لكن فرحت لصديقتها من كل قلبها لمن أنحلت مشكلتها وقدرو أهلها يحلون الموضوع قبل يكبر الموضوع .. والله حقق أمنيتهم اللي كانو يتمنونها بهبال أنهم يسكنون في بيت واحد وياخدون توائم أو أثنين يقربون لبعض .. ملاك تزوجت وائل أخو رانيه وحور تزوجت ولد خالته محمد وصارو في بيت واحد ملاك في الطابق الأول وحور في الطابق الثاني ...
.
.
حور نزلت شقة ملاك: قوووه مليك
ملاك: يقويك , وين حمودك عنك ؟
حور: ع قلبي هو تعباااان
ملاك: صدقتيه أنتي أكيد يتدلع عليك وأنتي مصدقته
حور: هههههههههههه يالدبه عن جد تعبان تونا راجعين من المستشفى
ملاك: أوووب أووب كل هذا ووائل مايعرف !!
حور: أنا الحمد لله توني تطمنت أنكم عايشين يتهيأ لي حمودي مامرض إلا من محاتاته لكم .. ميتييييييييييين مانسمع لكم ولا صوت ولا نفس
ملاك: ياخي عرسان جدد عندهم أمور لازم يخلصونهم
حور ضربتها ع ظهرها: دبببببببه وخري عني بس بروح لحمودي أبرك لي من مقابل وجهك
ملاك: مررررررره عندي وؤلي القمر وش لي بالنجوم !!
:*:*:*:*:*:*:*:*:*:*:*:*:*:*:*:*:*:*:*:*:*:*:*:*
*أنهار .. البنت المجده اللي كانت موفقه بين دراستها وهوايتها وشغلها في مشغل أمها .. حنونه ع أهلها وحبوبه وحركيه حياتها كلها شغل .. الصدفه جمعتها بموسى في سفرهم رغم أنهم ماحبو بعض قبل الخطوبه ويمكن مافكرو في بعض لكن الله كاتبنهم لبعض .. وأبشركم ترى أنهار حامل ومتنسيه ع موسى من تشوفه تقلب كبدها-->>مسكين ياموسى .. هو ينام في بيتهم وهي تنام في شقتها ...
...
موسى كالعاده أشتاق لأنهار وسوى مغامره وراح شقتها: أحم أحم أنهااري
أنهار اللي كانت جالسه ع الكنبه شافته وأستفرغت كل اللي في بطنها: أطلــــــع برى موسى حرام عليك
موسى طلع وتسند ع الجدار: الله يعينني بس لين ماتولدين "ناداها من وراء الباب كالعاده: كيفك ؟
أنهار: الحمد لله بس يرحم والديك لا تدخل مدري وش ماكل أنت
موسى"شنو اللي وش ماكل توني مفرك أسناني" قال يجاريها ويتطنز ع حضه: ماكل ثوم طال عمرك
أنهار: أيه أنا قلت مره مره الريحه لاتطاق روح فرك أسنانك
موسى تنهد: إن شاء الله
"وتمو ع هالحال لين ماولدت أنهار بالسلامه ورجعت المياه لمجاريها^_^"
:*:*:*:*:*:*:*:*:*:*:*:*:*:*:*:*:*:*:*:*:*:*:*:*
*سمانه وخالد .. سمانه اللي فقدت أمها من صغرها وعاشت في عند مرت أبوها وكانت حياتها ضرب وأهانات وشتايم وكانت تعيش في بيت مايشجعها ع أنها تكون بنت مؤدبه وشاطره ومؤمنه وتخاف ربها كانت تعيش بين أخت منحرفه وأخو خمار ومنحرف لكن سبحان الله , الله ماضيعها .. لقت لها اللي ينصحها وقدرت تتفوق في دراستها .. والصدفه جمعتها بإنسان ولو أنه مايعرفها أشتغل بفلوسها وكون نفسه وفي النهايه تزوجاها بصدفه ماكانت تخطر ع بال حد .. ورغم الصعوبات والمشاكل اللي مرو فيها سمانه وخالد وأبرزها عدم رضا أهل خالد بسمانه وتأخر سمانه في الحمل وكلام الناس إلا أن قدرو يتغلبون ع كل الصعوبات ...
...
خالد قبل يروح العمل راح يبوس بنوتته الصغنونه اللي توها في اللفه: بابا أنا بروح العمل أجيب لك ريال لا تتعبين ماما"الصغنونه قامت تطلع أصوات وتناغي ببراءة الطفوله"
سمانه: خلودي خلودي شوفها تضحك
خالد جلس جنب سمانه وهم يلعبون مع الصغنونه: قمر سمسوم طالعه عليك
سمانه أبتسمت رغم الصعوبات والآلام اللي قاستها في الحمل والولاده إلا أن سعادتها ماتنوصف عشانها قدرت تسعد خالد ...
خالد: يلا حبيبتي أنا رايح الدوام توصيني بشيء؟
سمانه: سلامتك يالغالي دير بالك ع نفسك وأنتبه للطريق
خالد وهو يسمع نصايحها أشر ع عيونه: من عيوووني وأنتي ديري بالك ع نفسك والصغنونه
سمانه..بعد ما طلع خالد ضميت بنتي لصدري عسى ربي يخليهم لي ولا يحرمني منهم هي وأبوها وأخوها ...
:*:*:*:*:*:*:*:*:*:*:*:*:*:*:*:*:*:*:*:*:*:*:*:*

[دانهـ العشآق]

*شهد وبسام .. حبيت أناقش موضوع فك الخطبه .. ممكن العصبيه وعدم التفكير في عواقبها يفقدك أنسان غالي يمكن يرجع لك ويمكن يروح عنك بدون لا تعتذر له ولا تودعه .. شهد اللي عاشت مع مرت أبوها الطيبه لدرجة السذاجه وكانت سبب لإنحراف بناتها بدون لاتفكر بعواقب طيبتها وتساهلها مع بناتها وهم مراهقات .. شهد رغم أنها أنخطبت صغيره لكن كانت الخطوبه أنقاد لها من الإنحراف وراء خواتها ع الظروف اللي مرت بها وفك خطبتها بسبب غلطة أختها .. يمكن هالشي الكل تضايق وزعل عشانه لكن هالشي زيد إيمان شهد وقربها من ربها أكثر .. بعد رجعة شهد لزوجها والحاله النفسيه اللي صابتها وكرهها للحياه بإرادة بسام وتمسكه في شهد قدر يبني معاها حياه سعيد ويفتح معاها صفحه جديده وينسيها كل اللي شافته من مر في حياتها ...
...
بسام..كنت أسوق السياره مثل مجنون وأقطع الإشارات كان بودي حد يوقفني يقول لي ليه تقطع الإشارات .. كنت أبي أصرخ أقول للعالم كله مرتي بتولد أنا بعد ساعات راح أصير أبو وحبيبتي وزوجتي راح تصير أم ...
,’بالإراده نهدم المستحيل,’
:*:*:*:*:*:*:*:*:*:*:*:*:*:*:*:*:*:*:*:*:*:*:*:*
راح يوحشوني شخصياتي .. راح يوحشني فيصل وجرئته-->>جب لاتعطيك رزان كف ع عينك .. ورانيه وهبالها وصراخها .. وهنادي وخفة دمها .. وراشد وحبه لشغله .. وعبير وجاسر ومناقرهم مع أم تركي .. والثلاثي المرح اللي في المجمع السكاني رؤى-ريهام-هناي وعروستهم الجديده رانيه اللي كلمت شلتهم وصارو رباعي راح توحشني سهراتهم .. والبنات وحفلاتهم وأسفارهم .. غلا السي أن أن ووكالة الأنباء تبعها .. عهد وفهد وهدوئهم ورومنسيتهم .. رزان وسوالفها وقت حملها .. نسيم وناسا وتجسس ملاك عليهم ههههه ياحليلهم ينعدون من الأبطال .. ملاك وحور وخططهم بعد زواجهم .. راح يوحشوني اللي تابعوني وشجعوني وراح توحشني تعليقاتهم ...
واللي ماذكرتهم يسمحون لي بس دموعي طاحت يعز علي فراقكم ...
أنا يالــي ذايــب فــي هـواهـم.. ~
روحـي مـاتـتـحـمـــل جفـاهـم.. ~
عينـي مـاتـغـمـــــض بـلاهــم.. ~
روحــي مــاتـهــــوى سواهـم.. ~
أنـكتـــب في أسمـــي غلاهـم.. ~
قلمي تعب من وصـف حلاهـم.. ~
الله لا يـحـرمـنـــــــي منهـــم.. ~
:
*
:
*
:
*
شبكة الناصره الثقافيه ..
.
.
.
.:دانهـ العشآق22:.

[دانهـ العشآق]

السلآم عليكم ..
أول شي لن أنساكم ..
*سفيرة الأحلام*
أول وحده ردت علي في أول بارت نزلته وهي بالأساس اللي أقنعتني أنزل روايتي لأني بالبدايه ماكنت متشجعه ..
*أعشق أبي*(الطماعه) ههه أمزح
طلبت مني بارتين وعلى ما أعتقد للحين ماخلصت قراءه
*مجنونه وحلوه*
معاي من أول مانزلت الروايه للنهايه شكر خاص لهاا ..
*أميرة الشوق*
مع سفيره طبعاً هم الثنتين اللي أقنعوني وسوو لي محضر وتهزيء عشاني مارضيت أنزل الروايه وطبعاً وعدتني أميره بتعليق ع كل شخصيه~>أنتظر تعليقك
*أحلى ماخلق ربي*
عندي أحساس يقول أنها تقرب لمجنونه وحلوه ههه يعطيها العافيه تابعت معانا
*حلم لطيف*
لها عوده وبانتظارهاا
*snek*
.
.
أشكركم جميعاً وسوري إذا في حد ما ذكرته ...
~..~..~..~
بالنسبه لروايتي ..
طبعاً هذي مو أول مره أكتب روايه لكن أول مره تصير عندي الجرئه وأنزل .. الروايه اللي كتبتها قبل كذا كانت بنفس العنوان (ذايب في هواهم) كانت جداً بسيطه ونفس الشخصيات بس محدودين ماعجبتني بالمره بصرآحه .. قررت مره ثانيه أكتب روايتي بنفس العنوان كتبت26جزء وصحيت من النوم يوم ثاني لقيت أخوي المتفرغ مفرمت الكومبيوتر [[أحباط]] .. تحبطت عن جد وخلاص قلت ماراح أكتب روايه وتأزمت لكن صديقتي قالت لي فكرتك مره حلوه وحرام عندك موهبه وكذاا ~>هذره طويله لين ما أقتنعت .. بعدين قلت لسفيرة الأحلام وأميرة الشوق أني كتبت روايه ومانزلتها ودلوني ع شبكة الناصره يعطيهم العافيه وأصرو أني أنزل الروايه .. في النهايه نزلتها ^_^ ...
بالنسبه لأشياء داخل الروايه (اللهجه)
اللهجه كانت سعوديه ماتدل ع منطقتنا لأن أساساً الكلام عندنا أختلط من المدارس والجامعات كلامنا صار كوكتيل فحبيت أوحد اللهجه مو لشيء ثاني بس والله والله أعتز ولي كل الفخر بلهجتنا .. وكلامي بعد كوكيتل بس لازم يكون مصلصل وأنعرف أني من البلد هع ...
شي ثاني ..
ماحبيت أدخل في المذاهب وهالأشياء بذات أنها أول روايه لي وحيبت أنشر الروايه بين أهلي وناسي أو بالآحرى ناس من منطقتنا ...
.
.
.
يعطيكم العافيه جميعاً
ونلتقى في روايه ثانيه لكن الصيف الجاي إذا ربي أراد ...

وأي سؤال عندكم أو أي أحد نسيت أتكلم عنه قولو لي هع

تحياتي القلبيه لكم:: .:دانهـ العشآق22:.

[مجنونة وحلوة]

واااااااااو البااااارت ولا احلى...
احلى ماخلق ربي..
عندي أحساس يقول أنها تقرب لمجنونه وحلوه ؟؟
{ايه اقرب لها تصير بنت عمي..}

[احلى ماخلق ربي]

داااااانهـ العشااااااق
يسلمووووووووووو عالرواااااااااااية
ننتظر الروااااااية الجايه.........ْ

[دانهـ العشآق]

هلآوي والله خيتووو ]]مجنونة وحلوة[[ ..

متابعتك الأروع غناتي ..

لاعدمناك يارب ..~

وأنا في الإحسآس محد يجيبني طالعه ع رانيوه ~>متأثره الأخت خخخ

الله خليكم لبعض ويعطيكم العافيه ع المتابعه

///

[دانهـ العشآق]

هلآوي وغلآ فيك ]]أحلى ماخلق ربي[[

يسلمك ربي ..

عوافي ع المتابعه ويعطيك العافيه ..

والروايه الجايه أفكر أكتب روايه وأنزلها الصيف الجاي إن شاء الله ..

لا عدمنآك يارب

///

[اعشق ابي]

ههههههههههه يا حليلك
اي والله طماعة طلبت البارتن بعدين حسيتك تكتبيهم سريع ما حبيت ارد
حبيت اخلصها
بصراحة رواية قمة في الابداع
بس في شي احس الاسماء مافي باهل البيت والصلوات على محمد قليله وكلمة يا علي ما نورت الرواية
بس بجد عجبتني عندك حس ابداع مرهف
انتمنى من كل قلبي توواصلين مسيتك في الكتابة
اي صح غلوي كم صار عمرها وشخبارها
اسعدتني روايتك صحيح اني بس يجي موقف يصيح استهبل ولا احس فيه بس كانت الرواية فيها جزء كبير من الحزن
ويالله باااي واصلينا بجديدك
ولا تزعلي مني الي على قلبي على لساني

[دانهـ العشآق]

هههههههههه
هلآوي والله وغلآ ]]أعشق أبي[[
أيه توقعت أصلاً مافي حد مداه يرد لأني كاتبه الروايه من زمااان ومراجعتها صرت أنزل البارتات بسرعه ع حسب اللي يخلص قبل هع ..~
تسلمي غناتي كلك ذووووق ..~
الأسماء هذول صاحباتي كل وحده جابت لي أسم بنتها واللي حامل وتدور لها أسماء وأتحفتني بالأسماء اللي حصلت عليهم ع قول أم شوق يعني تحس الأسماء شي مختلف بس كنت حالفه مابي أسم ساره في الروايه أحس نص الروايات البطله يكون أسمها ساره !!

صح أنبني ضميري أني طاوعت صاحبتي في هالشي قالت لي خلي أشياء اللي من جماعتنا يفهموها بحيث أنها ماتتدخل في المذاهب وكذا مع أن الصلآة على محمد وآل محمد وكلمة ياعلي دائماً ع لساني وكل من يقرأ الروايه يصلي ع محمد وآل محمد وينادي علي حلآل المشاااكل ..~
تسلمي تسلمي غناااتي ..~
غلوووووي تسلم عليك هذاكي مسويه قصة حب مع الوليد أخو حور وحنين وأنهار وصار عمرها 10 سنوات وأحلوت وصارت تشبه رزااان ~>قلت إذا نسيت حد ذكروني وبقول لكم نهايته
وأنا كمانتو أسعدني مرورك يالغلآآ ..~
إذا جا موقف يصيح أني أصيح وياهم خخخ .. بس حلووو تعالي أستهبلي ويايي ~>الأخت صايره أم دميعه أقل شي يبكيهااا ..~
تصدقي ماحسيت للجزء الكبير من الحزن حسيت أن كلها ع بعضها صايره الأحداث مسخره وطناز بس لاتخلو من الحزن يمكن إذا قرأتها مره أخرى أحس للجزء الكبير من الحزن فيهااا ..~
إن شاء الله ماراح أبخل باللي أقدر عليه .. ومره ثانيه إذا بنزل روايه باحاول أنزلها في بداية الإجازه عشان ما يصير ضغط مع أني توني الأمس مبديه دراستي بس عشان اللي يدرسون ..~
شدعوووه ما أزعل وأعرفي أن الحال من بعضه واللي في قلبي ع لساني وهذا أحسن شي ماحب المجاملات .. وبعدين كل تعليقاتك بتفيدني في روايتي الجايه عشان تصير أحسن ^^
يعطيك العافيه غلآتو
///

[دمعة طفله يتيمه]

اللهم صلي على محمد وآل محمد
قصه في قمة الروووووووعه
عجبتني بقووووه
بس موت مريم احس ماله داعي
وعندي شي بعد ...
كيف هم في السعوديه وجوازات بعد!!!
بس في النهايه قصه روووعه بكل معنى الكلمه

موفقه لكل خير وصلاح
يلا نبغى شي جديد منك...
ربي يعطيك الف عافيهـ
دمتي بود.

حوائج مقضيه بحق الزهراء

[دانهـ العشآق]

اللهم صلِ على محمد وآل محمد
]]دمعة طفله يتيمه[[
تسلمي غناتي مرورك اللي عجبني بقوه ^^ ..~
موت مريم هذي فكرة صاحبتي الشريره حتى أنا لآخر لحظه متردده أكتبه أو لأ بس يلا هذا قضاء الله وقدره ~>مصدقه الأخت ..~
يؤؤؤؤه شكلي خرفت بس ما أذكر يعني أني كتبت جوازات متى ؟! ~>مفهيه ..~
تسلمي غناتي ع التشجيع والدعوات الروووعه ..~
وإن شاء الله أتحفكم بالجديد إذا الله أحيانا ..~
وربي يقضي حوائجنا وحوائجكم بحق الزهراء وأبيها وبعلها وبنيها ..~
لا عدمنآآك غلآتو ..~
///

[اعشق ابي]

يالله عجل نننتظر الرواية الجديدة

[دانهـ العشآق]

إن شاء الله الصيف الجآي ويكون أول رد منك يالغلآ ^^