الساعه 4:00م في فيلا أبو تركي ...
حنين..كلنا مصدومين محد عارف كيف يتصرف الموقف صعب ,, معقول في ناس بهالقساوه وأحنا نزين للمكله نسمع من الجيران أن الولد ملكته الأسبوع الجاي ومحد منهم كلف عمره يقول لنا حتى مرت أخوهم اللي معاهم في البيت!! ,, جلست مو عارفه كيف أتصرف شفت عبير المصدومه رايحه لغرفتها وأم تركي ع الكنب والكل حولها يهدونها والرجال اللي يزينون برا كلهم دخلو المجلس الكل كان في حالة صدمه وذهوووول محد حسب حساب هالشي ,, فكرت في سيف ياقلبي أكيد متضايق تذكرت كيف كان يسولف معي وأحنا في السياره عن سوالفهم هو مع عبير لمن كانو صغار وأنه مو متخيلها عروسه جت جنبي نرجس حسيتها أنقدتني قمت معاها ...
في نفس المكان ,, مشاري..صدمه محد حسب لها حساب البيت قبل ساعات الفرح يملي أجوائنا لاكبير ولا صغير الكل مبسوط لملكة عبير دلوعة الكل اللي الكل يشوفها صغيره فجئه كذا كل شي ينتهي,, كلهم دخلو داخل المجلس أنسدت نفسنا حتى عن الأكل اللي توه واصل ,, جلست أفك الزينه اللي علقناها ع البيت لاتشوفها عبير ينكسر خاطرها ,, أنتبهت لرانيه داخله ناديتها قبل تدخل تشوف الوضع وتنصدم ع الأقل أمهد لها ...
مشاري: رانيه
رانيه: هلا أبو نور
مشاري يحاول يبتسم: هلا والله رنوش
رانيه بمزحها المعتاد: ليه تشيل الزينه لايكون الهيئه خالك حرم الزينه
مشاري ضحك بدون نفس: رانيه بقول لك شي
رانيه وكأنها حست بشي قالت بخوف: شنو؟
مشاري: أنتي كبيره يارانيه وعارفه أن كل شي قسمه ونصيب
رانيه تأكدت أن في شي: مشاري تكـــــــلم عبير وش فيها؟
مشاري: مافيها إلا العافيه بس
رانيه: حرقت أعصابي بس شنو؟!!!!!
مشاري: مالها نصيب مع الولد
رانيه من الصدمه تسندت ع الجدار والأكياس طاحت من يدها: مشاري أكيد تمزح
مشاري: ياليتني أمزح
رانيه دمعت عينها: طيب كيف وليش!!
مشاري: مدري يارانيه علمي علمك بس وحدة من الجيران أتصلت لأمي وقالت لها أن الولد ملكته أسبوع الجاي كلمنا أهله وللأسف الخبر طلع صحيح بمعنى أصح ألغو كل شي بدون لايبلغوننا
رانيه صرخت: كله من اللي ما تتسمى مرة خالك عارفه أنها ماتحب عبير ولا تتمنى لها الخير كنت حاسه أن في شي بيصير
مشاري حاول يهديها: رانيه صيري عاقله أهدي عشان جدتي وعبير كلهم متضايقين بس هالشي قسمه ونصيب ماله داعي تبكين
رانيه: كيف ما أبكي خالتي وحبيبتي أشوفها مبتسمه وبهالسهوله يجي من يخرب فرحتها وينتزع بسمتها وما أبكي
مشاري: اللي صار صار والبكي ماراح يغير شي أدخلي داخل هدي جدتك سولفي مع خالتك الله يعوضها إن شاء الله
رانيه: ما أبي أدخل أبي أروح البيت وصلني كيف أقدر أدخل وما أشوف الإبتسامه ع وجوههم !! كيف أدخل وأشوف الزينه معلقه وكل شي أنتهى
مشاري: رانيه حبيتي هدي حالك أمسحي دموعك وغسلي وجهك عشاني أنا ولا مالي خاطر عندك
رانيه: تكفى مشاري وصلني البيت
مشاري: يعني أخوك الكبير ماله خاطر عندك؟!!
رانيه: صدقني مشاري ما أعرف أتصرف في هالمواقف
مشاري: ماعليه رنوش عشان أخوك بتصل لنرجس تجي لك عند الباب طيب؟
رانيه بقلة حيله: طيب
رانيه..تضايقت بجد ماتوقعت هالشي يصير ياقلبي عبورة الله يصبرك شفت حنين ونرجس جايين لعندي بعد ماسلمت عليهم مسكتني نرجس من يدي وسألتها ...
رانيه: كيف عبير؟
نرجس: توه الحين الوضع أستقر نوعاً ما بدأنا نسولف بس عبير في غرفتها
رانيه طاحت دمعه من عينها: أكيد متضايقه
حنين مسحت دمعة رانيه: أفا عليك رنوش أهدي لازم تكونين أقوى من كذا إذا أنتي تبكين وش خليتي لعبير صيري هادئه وأدخلي سولفي مع عبير ونامي معاها الليلة هي محتاجه لك الحين
نرجس: صحيح رنوش أدعي إن الله يعوضها ,, الحمد لله أنها أفتكت منه من الحين إذا هذا أوله ينعاف تاليه
رانيه..عقب كلام حريم أخواني اللي ينحطون ع الجرح ويبرى دخلت سلمت ع خلاتي كانو طبيعيين يسولفون لكن ماخفى علي الحزن اللي في عيونهم حتى أنا كنت بارده مالي خلق ضحك وطناز حاسه أنه مو وقته ,, أذن وتوزعو خلاتي ناس راحو يصلون وناس طلعو وجدتي راحت غرفتها ترتاح وأنا رحت أصلي خلصت صلاتي ورفعت كفوفي دعيت ربي أنه يسوي اللي فيه الخير لنا ولجميع المؤمنين والمؤمنات ويصبر خالتي عبير ويعوضها خير ,, ذكرت أن الليلة الجمعه فتحت كتاب الأدعيه وقرأت الدعاء بخشوع ...
حنين..دخلت الغرفه وأنا أسمعها تقرأ آخر مقطع من الدعاء ...
((فَإِلَيْكَ يارَبِّ نَصَبْتُ وَجْهِي ، وَإِلَيْكَ يارَبِّ مَدَدْتُ يَدِي ، فَبِعِزَّتِكَ أَسْتَجِبْ لِي دُعائِي ، وَبَلِّغْنِي مُنايَ ، وَلاتَقْطَعْ مِنْ فَضْلِكَ رَجائِي ، وَاكْفِنِي شَرَّ الجِنِّ وَالاِنْسِ مِنْ أعْدائِي . ياسَرِيعَ الرِّضا إِغْفِرْ لِمَنْ لايَمْلِكُ إِلا الدُّعأَ ،فَإِنَّكَ فَعَّالٌ لِما تَشأُ ، يامَنْ إِسْمُهُ دَوأٌ ، وَذِكْرُهُ شِفأٌ ، وَطاعَتُهُ غِنىً ، إِرْحَمْ مَنْ رَأسُ مالِهِ الرَّجأُ وَسِلاحُهُ البُكأُ ، ياسَابِغَ النِّعَمِ ، يادافِعَ النِّقَمِ ، يانُورَ المُسْتَوْحِشِينَ فِي الظُّلَمِ ، ياعالِماً لايُعَلَّمُ ، صَلِّ عَلى مُحَمَّدٍ وَآلِ مُحَمَّدٍ ، وَأَفْعَلْ بِي ماأَنْتَ أَهْلُهُ ، وَصَلَّى اللّهُ عَلى رَسُولِهِ وَالاَئِمَّةِ المَيامِينَ مِنْ آلِهِ وَسَلَّمَ تَسْلِيما))
رانيه..قفلت الكتاب وأنا أحس براحه عقب ما خلصت من الدعاء ضميت الكتاب لصدري ,, رفعت راسي أنتبهت لحنين أبتسمت لها ...
حنين: تقبل الله
رانيه: منا ومنك
حنين: كان قلتي أنك بتقرأين الدعاء كان أجي أسمعك
رانيه: وش دعوه تسمعيني صوتي مو حلوو
حنين: بالعكس شي رهيييييب
رانيه: تسلمين ,, عبير طلعت من غرفتها؟
حنين: لاوالله للحين ما أشوف عسى بس دعيتي لنا
رانيه: أكيد وأنا أقدر أنساكم
حنين: الله يخليك لنا
رانيه: طلعو خلاتي؟
حنين: مو كلهم أم فارس ومشاعل وأمك هنا والباقي طلعو وخواتك وبنات خالتك أم فارس كمان موجودين
رانيه: تأقلمتي ع الوضع مع خلاتي وبنات خالتي
حنين: أي ماشاء الله ينحبون كأني أعرفهم من زمان
رانيه: من ذوقك ,, حنين أبي أروح لعبور بس مو عارفه كيف أقابلها
حنين: إذا كنتي متوتره وماتقدرين تمسكين نفسك لاتروحين لها حاولي تهدأين وبعدين روحي لها
رانيه: أيه أنا قلت بروح لها إذا طلعو كلهم
حنين: أيوة كذا خليك قويه
رانيه: ههههه نقوم الصاله نجلس معاهم؟
حنين..رحت مع رانيه الصاله ياحليلها هالبنت ع ضحكها وهبالها إلا اني أكتشفت اليوم أكتشاف خطير أنها حساسه بالمره ,, جلسنا في الصاله كنت أحس أني جالسه مع أهلي كانو يتكلمون بدون قيود كنت جاسه بين لمى ورانيه سمعت صوت رجولي ماميزته تغطيت وعدلت جلستي ...
فتحي: السلام عليكم
محد رد السلام غير أم فارس-أم مشاري: وعليكم السلام
فتحي ببرود: من ميت عندكم؟
مشاعل بتأفأف: أعوذ بالله من الشيطان الرجيم
فتحي: خير وش صاير ؟!!
أم فارس وقفت له بهدوء: ياخوي اليوم كنا نزين لملكة عبير وسمعنا أن مطر خطب والأسبوع الجاي وملكته
فتحي بنفس البرود: خير يعني الرجال يبي يخطب !!
أفراح قامت بعصبيه: شنو اللي الرجال يبي يخطب ع الأقل يقولون لنا يعطونا خبر مو يخلونا تحت الأمر الواقع وأحنا نزين ومبسوطين يصدمونا
فتحي: مو ملزومين يقولون لكم أهم شي العروس والمعرس يدرون الله يبارك لهم هذا بدال ماتفرحون لهم
ليلى بطناز: أبشرك راح أكون أول الحضور وراح أرقص في ملكتهم "قامت وقفلت وراها الباب بقوووة"
فتحي: صدق ماعندها أحترام لخالها ماكأني أكبر منها يما فيها شي لو الولد يبي يخطب؟
جهان اللي كانت قباله: ياخي أفهم محد معترض ع خطوبته الله يبارك له بس أحنا معترضين ع الطريقه اللي وصلنا فيها الخبر
فتحي مسك يدها وقال بحده: قصـــري صوتك
جهان: آآآه أترك يدي
فارس دخل ع صرخة جهان مسك يد فتحي وقال: بعد عن أختي
فتحي: أوووو خريج فرنسا وصل ,, لايكون أنت يامثقف معترض ع الطريقه
فارس: خالي لو سمحت أحترم حالك ما أبي أغلط لأنك أكبر مني
فتحي طلع بعصبيه وهو يتحرطم: يعني الولد بيخطب لازم يستأذن منهم
فارس قرب من جهان: جهان توجعك يدك؟
جهان وهي شوي وتبكي: لا "طلعت جوالها من شنطتها"
أم تركي: يايما ياجهان لاتطلعين من بيتنا زعلانه
جهان أبتسمت غصب عنها: كلي راضيه عنك يا أغلى الغاليات بس تعبانه شوي بروح بيتنا أنتظر ثامر
أم مشاري: أنتظريه هنا أنا ياذوبك تقومين ماعليك من خالك
جهان بكذب: باخد لي أغراض من البيت "وطلعت"
أم فارس: فارس يما ألحق أختك هي حامل ماتصلح لها لعصبيه
فارس..طلعت وراء جهان وأنا من جد معصب وش هالخال اللي مايبرد قلب حد ,, والله زين سوت جهان يوم طلعت لاتدخل العقربه مرته وترمي عليها كلمة من هنا ولا من هناك ,, شفتها وافقه عند الباب عرفت أنها ناسيه المفتاح فتحت لها الباب ودخلت وراها ...
فارس: لا تضايقين نفسك ولا شي
جهان: بالعكس أصلاً كنت حاسه أن الكل ظالم خالي فتحي ومرته ع كلامهم عنهم واليوم تأكدت أن الكل ع حق وما أعتب عليه إذا هذي سوايا مرته في أخته وهو ساكت
فارس: جدي حده متضايق
جهان: من اللي مو متضايق يافارس خليها ع ربك الله يعوضها إن شاء الله
فارس: إن شاء الله ,, كيفها عبير؟
جهان: من سمعت الخبر دخلت غرفتها بهدوووء وللحين ماطلعت
فارس: الله يعينها "قال يغير الموضوع: كيف البيبي؟
جهان: الحمد لله يسأل عن خاله
فارس: هههههه خاله بعد يسأل عنه ويستناه يشرف
جهان: يلا مابقى شي "رن جوالها وقالت تستأذن: يلا جا ثامر
فارس وقف معاها وأخد شنطتها يوصلها لها: الله يسلمك مو تضايقين نفسك
جهان: تطمن عطيني شنطتي
فارس: بوصلها لك وبسلم ع ثامر بالمره
في نفس المكان في سيارة سيف ,, حنين..ركبت السيارة محتاره مو عارفه وش أقول لو من وين أبتدي سلمت وأحترمت سكوت سيف شفت عيونه تايهه وباين أنه متضايق حطيت يدي ع فخده وقلت...
حنين: حبيبـــي
سيف: همممـ
حنين: الله يعوضها خير إن شاء الله لاتضايق نفسك
سيف: إن شاء الله
حنين..خيم الصمت السيارة مرة ثانيه لفيت وجهي شفت سيف لاف عند بيتنا أستعديت عشان أنزل من السيارة وقبل أسكر الباب دخلت نص جسمي وحطيت يدي ع يد سيف وقلت...
حنين: في أمان الله حبيبي ,, أنتبه لنفسك لاتسرع
سيف..هزيت راسي لها وأنا مبتسم ع أهتمامها فيني وخوفها علي الله لايحرمني منها ,, لفيت الدركسون للبيت وأنا أحس نفسي تعباااان من رجعتي من الدوام وأنا في بيت جدي أساعدهم والخبر صدمنا ,, يلا الله يعوضها خير ...

:*:*:*:*:*:*:*:*:*:*:*:*:*:*:*:*:*:*:*:*:*:*:*:*

الساعه 8:30م في فيلا أبو تركي ...
جاسر..بعد ماجلست في المجلس وأنا أغصب نفسي ع الكلام أنتهت الجلسه ع خير والحمد لله ,, توزعو أخواني ورجال خواتي وأبوي دخل يرتاح وأنا دخلت البيت كلهم طلعو مافيه إلا مشاعل ورنوش موجودين في الصاله سلمت عليهم ورحت لعند غرفة عبير طقيت الباب مرة ومرتين وثلاث ماردت خفت وقمت أوسوس فتحت الباب لقيته مفتوح شفتها ع السرير ضامه رجلينها لصدرها بصت وسرحانه ناديتها ...
عبير بصوت مبحوح: هلا جاسر
جاسر: ممكن أدخل؟
عبير وهي تتحاشى تناظر في عيونه: تفضل
جاسر جلس قبالها ع السرير: عبير تبكين!!!!!
عبير..ماتحملت سؤاله طول الفتره اللي راحت وأنا أضغط ع نفي بالقوة ماسكه نفسي لا أبكي , كنت أسمع تعليقاتهم ع الموضوع وتهديأهم لأمي والكلام اللي قاله فتحي مع كل كلمه ينزف جرحي أكثر لقيت جاسر ضامني لصدره وهو يهدأني ...
جاسر..صعب علي أشوف أختي اللي هي روحي الثانيه أقرب إنسانه لي تبكي!! ماتحملت دموعها ضميتها لصدري كان نفسي أسوي أي شي عشان لاتطيح دمعه من عينها كان ودي لو أقتل هالمطر ولا أشوف دمعه في عين عبير قلت أهدأها ...
جاسر: ماعليش حبيبتي الله يعوضك خير الحمد لله أن أحنا عرفناه من البدايه أنه كذا قبل ترتبطين فيه
عبير وهي تشاهق في البكي: جاسر محد فاهمني محد فاهم شعوري الكل ع باله أني أبكي لأني أبي أتزوج "سكتت هي تشهق في البكي"
جاسر بحنان: فضفضي أنا جاسر أخوك أسمعك
عبير وهي لازالت تشاهق في البكي: جاسر أنت أكثر واحد عارف أني ترددت كثير في هالموضوع لأني مو مستعجله ع الزواج ولأني ما أبي أتقرب من نهى أكثر
جاسر: هذي نهى ماتحس دام الشي جا من طرفها الحمد لله أنك تخلصتي منه قبل تتقربين منها أكثر
عبير: مو سالفة أتقرب منها أكثر أو أني مستعجله ع الزواج أنت لو تفكر فيها تخيل الناس اللي عزموهم والزينه المعلقه ع البيت في دقايق كل شي ينتهي ومحد يعرف شنو السبب , الكل بيجي في باله أنه سمع عني شي ولا وش اللي خلاه ينهي كل شي خلال يوم وليلة الكل راح يشك فيني
جاسر ضمها مرة ثانيه: خلاص حبيبتي أهم شي أنتي واثقه من نفسك والناس ماترضى ع شي وتدور شي تتكلم عليه , أنسي السالفه وتخيليها حلم مزعج وكأنك صحيتي منه مثل الحلم تصحين منه وكل شي ينتهي
عبير: إذا أنا تخيلتها حلم ونسيت تتوقع أن الناس بيتخيلونها حلم وبينسون!!
جاسر: عبير حبيبتي لاتفكرين بس في نفسك ولا بس في كلام الناس فكري في أمي وأبوي وخواتي وبنات خواتي كلنا نحبك وبنتضايق إذا شفناك متضايقه صيري عبير الحبوبه المرحه اللي شوفتها مبتسمه تبهج القلب
فتحي فتح الباب وناظرهم من فوق لتحت وقال بعصبيه: وين جالسين حنا!! ضامها وشوي وتنام معاها أستح ع وجهك رجال وش طولك وش عرضك تغلط مع أختك
جاسر قام بعصبيه: كلن يرى الناس بعين طبعه , وبعدين رجال وش طولك وش عرضك تشك في أخوانك أختي متضايقه جلست معاها أهديها فيها شي؟
فتحي: لا ياحلوو ياخوفي بس تشوفها مرة ثانيه متضايقه و........
جاسر صرخ فيه وهو رافع يده: أحترررررررم نفسك ع الأقل أستح ع وجهك حس لأختك اللي قبل ملكتها بيوم يوصلها خبر أن اللي خاطبها الأسبوع الجاي ملكته كله يهون إلا مرتك العقربه اللي معانا في البيت ولا فكرت حتى تعطينا خبر أن بيت خالتها ألغو الموضوع
مشاعل ورانيه سمعو الصراخ وراحو عند غرفة عبير , دقايق وأبو تركي وأم تركي جو وراهم ...
أبو تركي: بــــــــــــــــــــس
فتحي: يبا هذا ولدك مو محترم نفسه يغلط علي وعلى مرتي , غير جلسته مع "وهو يأشر ع عبير: هذي وكأنها مرته
أبو تركي: هذا كلامك لي وأنا أبوك أحترم الشيب اللي في راسي تتهاوش مع أخوانك قدامي وكأني بزر ماله أحترام تخليني أغلط عليك وأهزأك وأولادك صارو طولي "فتحي طلع وقفل الباب وراه بقوووه"
جاسر باس راس أبوه: آسف يبا وحقك علي
أبو تركي: لا تتأسف ولا شي ياولدي
جاسر: راضي علي يالغالي؟
أبو تركي: هو أنا أقدر أزعل
مشاعل قالت تغير الجو: قام يتغزل أبو تركي أطلــــــــع يالغزل
أم تركي: هههههه وكيفها بنتي الصغيره؟
عبير أبتسمت: الحمد لله
مشاعل وقفت جنب جاسر: ضاع كرتنا ياجسور
رانيه: ههههههههههه دورنا أنا وعبورة نتدلع أنتو شيبتو
عبير..ردت روحي لمن شفتهم حولي ويخففون عني حسيت أن عندي ناس يحسون لي ويهتمون لي , فديت رنوش نامت معي مشاركه وجدانيه خخخخ ياحليلها ع رجتها إلا أنها حساسه صايره أنا أهدأ منها ...

"مابنكسر صابر لو فرصتي تمضي ..
والحظ لو عاثر بصنع أنا حظي ..
لو تنثر أحلامي برجع أرتبها ..
لو تصعب أيامي بعيش وما أحسبها ..
يامسهل الدنيا مهما تعاندنا ..."

:*:*:*:*:*:*:*:*:*:*:*:*:*:*:*:*:*:*:*:*:*:*:*:*

تم بحمد الله الجزء العشرون
((هذا الجزء
-بسام وأقتناعه أنه يطلق شهد وسفره للخارج تتوقعون شنو ينتظره؟وشهد شنو ينتظرها وكيف راح تكون حياتها بدون بسام؟
-بيت أبو تركي وصدمتهم بإلغاء أهل مطر الملكه بدون لايعطونهم خبر ,, عبير تتوقعون كيف راح تكون نفسيتها؟
-فتحي وعدم مبلاته ,, تتوقعون إلغاء خطبة مطر وعبير , نهى لها يد فيه؟
-قرب الإختبارات النهائيه اللي كل ما أقتربت زادت معاها دقات قلب أبطالنا وبذات رزان لأن بعد الإمتحانات باسبوع راح تكون ملكتها ...
يعطيكم ألف عافيه
تابعونا
تحياتي))

.
.
.

.:دانهـ العشآق22:.