الساعه 5:36م في شقة خالد وسمانه ...
سمانه وهي تبخر خالد: أدعي لي
خالد: إن شاء الله أكيد بدعي لك ,, إلا أقول سمسوم تعالي معاي ترى المسجد فيه قسم نساء
سمانه تتهرب: لا الحين يبي لي أتحمم وأبدل ملابسي
خالد: توك متحممه وإذا ع تبديل الملابس أنتظرك
سمانه نزلت راسها: ما أقدر أروح معاك المسجد
خالد توه مستوعب: كان قلتي من البدايه ياشيخه ,, يلا مع السلامه
سمانه..وصلته للباب ياربي فشلة كنت أسمع البنات يقولون لي عن مواقف كذا مع أخوانهم لكن أنا ماعشت مثل علاقة كل الأخوان مع بعض ,, توني الحين أعيش الأخوه ومع مين مع زوجي لفتت نظري كلمة زوجي فز لها قلبي أي زوجي ليه أنكر هالشي وأنا مهما أنكرت أو تناسيت أنه زوجي ما أقدر أغير الحقيقه خالد زوجي ,, شغلت التلفزيون أبي أشوف شي شاهدت شوي وبعدها فتحت شنطتي عدت ع مذاكرتي ما أبي مستوايي يتغير سمعت صوت طق ع الباب ...
سمانه: مين؟
غدير: أفتحي الباب أنا غدير
سمانه: هههههههه هلا وغلا
غدير: وش تسوين؟
سمانه: والله طفشانه أفتح كتاب وأسكر كتاب من الطفش
غدير: ههههههه طيب ليه ماتنزلين لنا؟
سمانه ماعرفت شنو تقول: لا بس خفت أنكم مشغولات ولا شي
غدير: حلوة هذي مشغولات قومي بس قومي أنزلي معاي
سمانه: لا غدور خلينا نجلس هنا أنا تعبانه
غدير: أوكي بتصل ع سحور والجوهرة يجون معانا
سمانه..الحمد لله أني قدرت أقنع غدير أنهم يجلسون معاي في الشقه ,, ماحبيت أقول لها أنا ما أرتاح لنظرات أخوها عمر مهمها يكون هو أخوها وأكيد أنها ماراح ترضى عليه سولفت مع البنات وونسوني لين ماطلعو لأن خالد أتصل قال لي إذا أبي شي ولا شي لأنه ع وصول ضليت أنتظر خالد وصل وأبتسمت له ...
سمانه: تقبل الله
خالد: منا ومنك صالح الأعمال
سمانه: كيف كانت المحاضرة
خالد: روووعه إن شاء الله مرة ثانيه آخدك معاي
سمانه: إن شاء الله "سكتت فترة"
خالد: سمانه فيك شي؟
سمانه: لا بس اليوم طارق أرسل لي رساله
خالد: طيب وش رايك أغير رقمك أريح لك؟
سمانه: مدري أخاف إذا غيرته يعرفونه عاد أنا أظل طول عمري أغير في رقمي
خالد: مو شرط تعطينهم الرقم خليه بس أنا وأمي وخواتي وأبوك إذا بغاك يقدر يتصل لي
سمانه: مدري اللي يريحك
خالد: خلاص إن شاء الله بكره رجعتي من الشركه أطلع لك رقم جديد عطيني جوالك الحين
سمانه بإنصياع: تفضل
خالد: وش طابخه لنا اليوم سمسوم؟
سمانه: الحلى اللي يحبه قلبك دقايق وأكون عندك
خالد..أبتسمت ع برائتها عن مزحه أقول لها سوي لي حلى هي تسوي عن جد ,, حمدت ربي مليون مرة لأن أمي أنسانه متفهمه ماتخلي سمانه تطبخ لأنها لسه صغيره لكن سمانه ماشاء الله عليها ذوق رجعتها من المدرسه تنزل تساعد أمي وإذا سوت الغداء أو أي طبخه في الويك آند لازم تنزل لأمي تذوقها ...
سمانه: لاحول لمتى بضل واقفه
خالد: ههههه سوري سرحت شوي
سمانه: اللي ماخده عقلك تتهنى به
خالد..والله محد ماخد عقلي غيرك الله يقدرني وأسعدك ,, أكلت من الحلى اللي سوته وأنا مستمتع بطعمه يمممممـ صدق أن الحلو مايجي منه إلا الحلو ^_^...
:*:*:*:*:*:*:*:*:*:*:*:*:*:*:*:*:*:*:*:*:*:*:*:*
الساعه 7:12م في فيلا عبد العزيز ...
دانا بطفش: رزانوه والله إذا ماتقومين معي ما أدخل بيتكم
رزان: دانوه حرام عيك أستحي
دانا: وش فرقت يعني توك تتعرفين علينا أنتي؟
رزان: لابس الحين غير
دانا: لو فيصل موجود في البيت عذرتك بس مافي إلا أحنا مقابلين وجهك 24ساعه وتستحين منا
رزان: تخيلي كأني مفجوعه ماصدقت تخطبوني أنام في بيتكم
دانا: ياناس الله يعين أخوي ع هالبنت ,, الحين بتروحين معي ولا لأ؟
رزان: لا طبعاً
دانا: أفففففف عنيد هالبنت عنيده شكلك مابتدخلين بيتنا إلا بعد الزواج
رزان: دانوه تونا راجعين من السوق وراسي مفتر وأفتر أكثر من حنتك
دانا: طيب أنا ماراح أنتظر العشاء بروح بيتنا
رزان بنبره تكسر الخاطر: دانوه لاتخليني بظل في البيت بروحي
دانا: لاحول بيطردوني خالي وعمتي منك كم أسبوع صار لي معاكم
رزان: طيب مو يقولون الصديق وقت الضيق أردها لك في الأفراح
دانا غمزت بخبث: في الأفراح ها بتنامين معانا بس مو في غرفتي
رزان ضربتها: أفكارك سوداء مثلك
دانا: هههههههههههه "سمعو صوت ناصر يناديهم ,, دانا بصراخ: هلا بابا
ناصر: هلا والله بنتي ترى العشاء جاهز تعشو عشان أوصلكم البيت وأنا رايح الشركه
دانا سحبت يد رزان ومشت معاها الدرج تنط فيها 3درجات في نفس الوقت ورزان مسلمه أمرها لله ...
مها ضحكت ع شكل رزان: هههههههههههههههههه ياقلبي رزون مرة وحدة مسحوبه
ناصر: هلا هلا هلا باللي ماتبينا
عبد العزيز: هلا ببنتي اللي منخشه عنا
ريهام: هلا بأختي اللي ماتنشاف
هنادي: هههههه هلا بالقمر المستحيه منا
مريم جت لرزان من وراء وباستها في خدها: كيفك ماما؟
رزان أستحت ع ترحيبهم وحمرت ردت البوسه لأمها: بخير ماما الحمد لله
عهد: مرت أخوي أنا هنا
رزان أبتسمت بخجل: هلا عهوده
ملاك: هنا هنا رزون أنا
رزان راحت جنب ملاك سلمت عليها وعقب ماتأكدت أنها سلمت ع الكل جلست جنبها: هلا وغلا ملوكه
روابي: خالتي ردان ماما بتستري لي فثتان لمكتك "نطت في حضنها"
ريان بغيره وهو يضربها ع فخدها: أزان أزان "رزان حطته ع رجلها"
هنادي: هههههه من الحين ريانوه لزق في مرت خاله
عبد العزيز: تعالو تعالو خلو بنتي تآكل
رزان: عادي بابا آكل خليهم جالسين
مها: تتدرب عشان في المستقبل إذا صار عندها أولاد
مريم: متى ياربي الله يبلغنا ونشوف أولادها ملتمين عندها يارب
الك: آآآآآمـــين
فضيله: خلو البنت تآكل وجهها راح من الحياء هي ياذوبها تنزل تسلم تحرجوها
ناصر: أنا زعلان على رزان
رزان: ليه خالي ماعاش اللي يزعلك
ناصر: كذا التغلي كلهم يجون البيت إلا أنتي لهدرجه مانستاهلك
رزان نزلت راسها: تعرف خالي أمتحانات وثالث....
ريهام قاطعتها: وحيا
الكل: هههههههههههههههههههههه
هنادي: أخبارك مع التجهيزات؟
رزان: الحمد لله
مريم: بعد قلبي بنتي تجهز لي ولها
رزان وهي تعدد ع أصابعها: أفااا عليك كم غاليه وحنونه وتجنن ومحد في الدنيا يسواها ,, كم أم عندي أنا!!؟
مريم باستها: والله مو عارفه كيف بتروحين عني
هنادي..ناظرت في رزان وعمتي مريم كيف يتمازحون ويسولفون بصراحه قليل إذا شفت بنت علاقتها بأمها كذا ما شاء الله عليهم ,, عمتي مريم محبوبه عند الكل كبير وصغير حتى راشد وسوالفه ومزحه معاها وربي أنهم يونسون ...
دانا: هناااااااادي
هنادي: هلا
مها: تكلمك دانوه وش فيك؟
هنادي: سرحت شوي
ريهام: اللي ماخد عقلك...
الكل: هههههههههههههههه
هنادي: ماعليش دنووووش ما أنتبهت لك ,, آمري عيوني
دانا: أقول لو في الملكه نخلي أمي وعمتي يطقمون
هنادي: حلووو بشرط يكونون جلابياتهم ع ذوقنا
ريهام: بصراحه الجلسه مو شي بدون رؤى حاسه أن شي ناقص ريوف وصراخها
مريم: أتصلت لها شوي وبتجيب لي ريوف
هنادي: ماشاء الله عليك ياعمتي أمس بطوله وأنا أحاول معاها أبي ريوف تنام معي ولا لانت كيف قدرتي تقنعينها
عبد العزيز: هذي الغاليه من يقدر يردها
مها: أي والله تصدق خالي حتى أسامه يلين إذا قلت له عمتي مريم قالت ع قولته مقدر أرد طلب لأم فهد
فضيله: حتى راشد أذبح عمري عليه عشان يجي ينام مع فيصل وفهد بالموت يرضى بس إذا كلمته أم فهد طوالي يرضى
عهد: وطلعاتنا لازم ندخل عمتي مريم في السالفه عشان يقتنع أبوي
ملاك: عطينا المقادير عمتي
مريم: تفتفتفتفتفتفتفتفتف بروح لشيخ يقرأ علي لاتصكوني بعين
ناصر: ههههه صايره العروس يمدحونك وش عليك
هنادي: سر المهنه ياملاك
مها تأشر ع ملاك: أنتي آخر وحده تتكلمين لمن كنا في المدرسه نذبح عمرنا نبي نغيب لا ماما ولا بابا يلينون وأنتي مدري كيف تقنعينهم
ريهام: هالجيل كلهم ورزان ودانا من نفس الطينه ,, أخف وحدة فيهم يمكن عهد
فضيله: والله أنتو ع زمنكم غير وهم غير
هنادي: لازم ع النهايه تدليع
قطع نقاشهم عبد العزيز: يلا أستأذن تآمروني بشيء؟
الكل: سلامتك
ناصر: يلا اللي بيروح معي في طريقي "لف لرزان: يلا ليه مالبستي عبايتك؟
رزان: بجلس مع أمي
ناصر: عن التغلي يلا ألبسي عبايتك بيتنا صاير ظلمه من زمان مانورتينا
عهد: صح رزون تعدلي معانا عشان بكره ملكة عبير نروح سوا
مريم: يلا رزون روحي مع بيت خالك مو حلوة تردينهم
هنادي بخفة دم: ههههههههه رزون عمتي تبي تفتك منك
رزان: هههههههه صح ماما ؟
مريم: لا ياقلبي بس غيري جو شوي روحي أنبسطي والصباح بتكون معي ريوف
فضيله: مانضرب رزون يلا قومي
رزان..أستحيت ع وجهي كلهم يحاولون يقنعوني مو حلوة أردهم في نفس الوقت مدري كيف أحس بعد شهرين وشوي ملكتي أحس فشله أروح بيتهم اللي في كل مكان فيه موجود صورة له وكل زاويه فيه لي معاه ذكرى حلوة معاه ,, جهزت ملابسي والميك آب ونزلت ع السريع ركبت السيارة طول الوقت كنت سرحانه وأفكر كيف بدخل بيت عمتي وكأني أول مرة أدخل هي مو أول مرة بس هالمره غير ,, دخلت وأنا أسمي بسم الله مدري ليه حسيت أني مو قادره أرفع راسي دخلت وجلست ع كنب الصاله شفت صورته قبالي نزلت راسي ,, رفعت راسي شفت البنات يتطنزون علي وعمتي وخالي راحو ينامون ...
ملاك: ههههههههه الظاهر أن الأخت تتخيل نفسها جالسه معاه من جد
دانا: بعرف بس هذي كيف ليلة الملكة إذا الحين الصورة قدامها مستحيه منها كيف ع الطبيعه وجهاً لوجه!!
رزان: دانوه لاتذكريني أتوتر
دانا شافت حياها وقالت بخبث: تخيلو لو فيصل يسوي لنا مفاجئه وينزل اليوم البيت
عهد: هههههههههههه حلوة أتخيل رزون طول هالفتره منخشه ولمن جت بيتنا وأخيراً يجي فيصل
ملاك شافت توتر رزان: خلاص أعقلو لاتروح بيتهم مشي مو ناقصين مغامرات
دانا: أتخيل يصير فلم آكشن تركض وتطيح جزمتها((تكرمون)) ويلحقها فيصل وإذا وصل لها يلبسها وياها
الكل: هههههههههههههههههههههههههههههههه
عهد: ياشيخه زين إذا ماجاب الشيخ يملك فيهم
ملاك: والله هذا فصول مغامراته أعظم من عدنان ولينا تتوقعين منه كل شي
رزان بخوف: أبي أروح بيتنا
دانا حركت حواجبها بخبث: قفلنا الأبواب
رزان تنهدت وبصوت واطي: يعني مايقدر يدخل
ملاك: ههههههههههههههههه بنت خالي الذكيه فديتها
عهد: أفسخي عبايتك مافيه حد ولا صدقتي أن فصول بيجي
رزان وهي تفتح أزرارات عبايتها: صاير بيتكم غير
ملاك: لأنك عروس طالع النور غير شكل
رزان: لاتذكروني ينمغص بطني
عهد: ههههههه صحيح خلو بنت خالي تعيش العزوبيه لآخر قطره
دانا: خخخخ حلوة لآخر قطره كلها شهرين وشوي وتودع العزوبيه
بهبال كانو عهد ودانا جالسين وفي الوسط بينهم رزان وقبالهم ع الأرض دانا ويخططون للملكه والآكشن ورزان مستحيه .. رزان تناديهم مايجاوبونها مندمجين جلست بالعرض بحيث أنهم مايشوفون بعض راحو يكملو سوالفهم من وراء ظهرها وهي تتلقى الضربات مع الحماس ...
عهد وهي تبعد ظهر رزان: يااااخي هذي قطعت علينا سوالفنا صايره الحاجز بيننا لو نقومها يكون أحسن
دانا حطت يدها عند صدر رزان ودفتها ع الكنب بحيث أنهم يشوفون بعض ويكملون سوالفهم ...
"وجلسو ضحك وهبال ومثلكم عارف سهرات البنات وسوالفهم لين ماقامو يتثاوبون ...
عهد: يلا خل ننام من الحين عشان نروح السوق من الصباح يآآآآآه يازين طلعة الصباح إلى غير المدرسه
دانا: اللي يسمعك يقول أنا بنام أصلاً يصرفنا نروح السوق مواصلين ورجعتنا ننام وإذا صحينا نروح ملكة عبور
رزان: صحيح خل نتصل ع رنوش أكيد الحين قالبه الدنيا
:*:*:*:*:*:*:*:*:*:*:*:*:*:*:*:*:*:*:*:*:*:*:*:*
رد مع اقتباس
المفضلات