مسكت جوالها وصارت تدق على بيت ماريا ما احد يرد..

عندها هي جوال اماني.. دقت عليها ..

اماني كانت تتغدى ... جوالها عالأرض بينها وبين نور من شافت اسم شهربان ارتبكت...

نور انتبهت للأسم :

ــ اماني جوالش يرن..

اماني :

ــ ها...

ام مجتبى:

ــ ويلي يابتي لهالدرجه اختش مريضه .. من دي فلافة ايام وانتين حالش مو حال .. ودودها المستشفى... وان شالله ماعليها الا العافيه

اماني بأرتباك:

ــ ان شالله..

ردت على شهربان وقامت من على السفره..

نور مستغربه وفي بالها:

ــ غير الا شهربان .. مايستدعي هالقومه...!

اماني في المطبخ ..

شهربان:

ــ ويش حال ماريا ويش فيها اليوم غايبه..

ــ تعبانه شوي .. مصخنه.,,

ــ متأكده..

ــ ايه لويه ويش صاير؟

ــ لا بس ابله زكيه سألت عنها على شان الأختبار ..

ــ ان شالله بتروح هي بعد كم يوم وبتختبر بس تصير زينه...

ــ ان شالله .. زين لويه ماترد على التلفون..

اماني ارتبكت:

ــ يمكن نايمه .. واخواني مشغولين مو في البيت..

ــ المفروض مايخلوها لحالها بنيه في البيت..

اماني تبغى تغير الموضوع:

ــ وانتين ويش فيه صوتش ..

شهربان تتنحنح.:

ــ ويش فيه..

ــ مبحوح..

ــ لا بس شاربه عصير مثلج من شوي..

ــ يعني.. واخبار امش واخوش..

ــ الحمدلله بخير..

ــ صحيح اخوش بيروح ايرلندا؟

ــ مو ايرلندا .. فنزويلا..

ــ يووو .. قالت لي ماريا ونسيت اسم البلد..

ــ ايه هو للحين متردد بس الأحتمال الأكبر انه يروح

ــ الله يوفقه ان شالله..

هدوء شوي ...

اماني ماهي عارفه تسكر وشهربان المتصله..

شهربان ماهي عارفه كيف تقول اللي سمعته..

اخيرا شهربان تجرأت شوي:

ــ أأأأأأأأأ ... سمعت في المدرسه اليوم ...

هي ما بتكمل كلامها.. اماني فهمت ويش بتقول شهربان... مشت بسرعه لعند براد الماي وكان جنبه كاس زجاج... حركته وطاح على سراميك المطبخ وتكسر..

اماني:

ــ اوووه.. تباعدي عن القزاز لا يصوبش .... غناتي شهربان اكلمش بعدين ايثار طيحت كاس فيه عصير باشيله بالسرعه قبل لا يصوب احد.. مع السلامه ..

وسكرت...

ام مجتبى قامت المطبخ لأماني... لقتها متوقله تلم القزاز وهي تصيح...

ام مجتبى:

ــ بسم الله على عمرش ... لا تشيليه بأيدش لا تتصوبي..

انتبهت لأماني تصيح..

ــ يو ويش فيش ... دافعة بلى عن عمرش ..,؟؟ صوبش !! ويش صاير !!

اماني تمسح دموعها وتصطنع الضحكه:

ــ لا بس خلعني .. وماريا عورت قلبي وهي تكلمني .. لازم اوديها مستشفى زي ماقلتي...

ام مجتبى تمسح على ظهر اماني:

ــ ايه وديها لازم... واذا تحسي شي يعورها خليني امرخها..

ــ ما منش قصور تسلمي عمه..

ــ سالمه من الشر والكدر.. ماريا اختش مافي منها الله يخليها و يبلغكم فيها.. تقوم بالسلامه ان شالله..

اماني تبلع الحزن غصة مابعدها غصه...

ــ ان شالله...







شهربان ماسكه الجوال ومذهوله..

ــ لويه اماني ما سمعتني.. لويه تحججت بالكاس وسكرت.. بأصبر .. باشوف تتصل فيني تالي لو لا .. اذا ما اتصلت ويش باسوي .. ويش بااااسووووي..







بعد يومين...



في بيت يوسف ..

اماني مع حسن ويوسف في المجلس ومسكره الباب ..

وماسكه اوراق نتايج التحاليل...

ــ اختكم سليمه.. ومافيها أي مكروه.. والتحاليل والفحوصات تثبت الكلام.. لويه هالأزمه صار ليكم خمسة ايام و مأزمينها وياكم.. السبت عندها اختبارما خليتوها تروح .. التلفون وفاصلينه صديقاتها صارو يتصلو علي .. بيت عيالي و متأزمين وياي يفكروها مريضه .. بتموت البنيه وهي في الغرفه محبوسه.. لا اكل ترضى تاكل ولا شرب ترضى تشرب..... والله ماني عارفه ويش اسوي ...



حسن :

ــ انا اللي مانى عارف ويش اسوي.. فيني اللي مكفيني.. يعني الحين ان صدقت هالورق مابقدر اكذب كلام الزفت اللي اتصل .. مو ضروري تكون سوت شي خطير .. المهم سمعتها الحين صارت بالطين ومو بعيده يكون فضحها .. والناس مابتصدق كلامش .. ويش بتسوي ساعتها.. بتوزعي ورق فحوصاتها على بيوت الفريق..

اماني من قهرها:

ــ تسخر.. تسخر قاعد.. تزيدني هم على همي..

يوسف رجع من برى و حامل علبة كيك من محل ماريا تحبه..

حسن:

ــ حنا في ويه وهو في ويه...

يوسف بقهر:

ــ ماتااااكل صار ليها 5 ايام اكلها اكل عصافير .. عالماي والهوا عايشه.. بتموت...

حسن:

ــ دلع بس دلع.. ما خربها الا هالدلع..

اماني بقهر:

ــ بسسسسسس عااااد.. داويش هالقلب اللي عليك.. تصدق كلام ولاد الحرام على اختك وتكذب الطب .. ماعليك منه.. خله يدلعها... ويش اللي قاهرنك.. الله عاد من زود دلالك ليها... وشان اذا بتخترب بتخترب من معاملتك والضغط يولد الأنفجار..



ولا يسمعو الا صوت ماريا على باب غرفتها كانت بتطلع الحمام بتسبح :

ــ حتى انتين.. تقولي اذا بخترب ..

اماني راحت ليها :

ــ لا غناتي مو قصدي شي ..

ماريا ودموعها تصب :

ــ حتى انتين تحسي اني ممكن اكون وحده خربانه في يوم...

اماني ضمت ماريا على جنب وصارت تفرك في ذراعها وهي تصيح:

ــ لا غناتي لا والله... هدي هدي ..

ماريا والدموع تتزايد:

ــ اهدي ويش ... تعبت اني.. ياليت الموت ياخذني ويريحني من هالعذاب...

ــ لالا.. لا تقولي كذا... ادخلي الحمام الحين واطلعي واكلي لش كيك اكو يوسف جاب لش من اللي تحبيه..

دخلت ماريا الحمام..

اماني :

ــ تعبتنا تراك بكلامك.. اذا بتقول شي قول شي فيه الخير والفايده لا تزيد نيراننا حطب..

ــ اقول مصختيها يا اماني وانا ساكت عنش .. ماكني اخوش الكبير

ــ على عيني وراسي .. بس خلاص البنيه بتموت بين ايدنا وانت بدل لا تعالجها تمرضها زياده..

ــ هه.. هههههه.. اعالج ويش .. كلام الناس اللي انتشر وصارت حديث مجالسهم...؟ سمعتها الزينه اللي بتعلق فيها وفينا لآخر العمر..؟؟

يوسف :

ــ بس .. بس .. بسسسسسسس .. خلااااص ..

ويرمي علبة الدونت عالأرض ...