غربة الأوطــــــــــــــــــان...

[* Red Rose *]

مرحبا اموووورة

تسلمي والله على البارت الرائع

ياربي ماريا كسرت بخاطري ما تستاهل اللي صار اليها بسبب العقربة ريماسوه

والحمدلله ان ناجي رجعت اله ذاكرته واتوقعه هو اللي يردد مع قيصر

وعبد الستار مسكين كيف بيقدر يعيش مع امه بعد ما سمع قصته

الله يفرج عليهم

وننتظر جديدك

[Princess]

امريكا ..

والوقت عندهم صباح..

قيصر فاتح نافذة عيادته.. وقاعد ينظفها .. ويحس بتعب في جسمه مانام عدل من التفكير في اللي صار...

شوي طرت على باله ابيات للشاعر العراقي .. (حكمت البيداري) .. فصار يمول فيها عوايده مع صوته الحزين..

أبوس الأيادي

وأبوس القدم

لمين يردني؟

يامين ومَن!

بحضن أمي الحنونه ..

أغفى وأنام..

و ارتاحلي..

شي ساعة زمن .!

وأنسى المآسي

الدوخت راسي

إلقطعت أنفاسي

من غریب ..

ومن قریب...

ومن أعز ناسي ..

وأحب ناسي !!

اللي يبيهم ..

واللي بيهم..

قلبي المسكين

صدق وأئتمن ....... ..

ولا يسمع قيصر عند النافذة الا صوت وباضافه من عنده ..

ــ آآآآه يازمن....

التفت لمصدر الصوت عند النافذه...



تقرب منها وهو مو شايف احد بس متأكد انه سمع الصوت من ناحيتها..

هو وصل ليها و طل براسه الا يلاقي ناجي يطفر عليه..

ــ وااااااه...



قيصر من الخلعه صرخ صرخه ورجع على ورى و يطيح عالأرض..

ناجي مات من الضحك ويدخل له من النافذه... وهو يهدر عليه:

ــ انا اول مره في حياتي اشوف نافذة بدون شباك حرامي.. منفذ سهل للحراميه..

قيصر مو مستوعب السالفه... و نسى خلعته و ألم طيحته ويطالع في ناجي مستغرب..

ناجي مد ايده لقيصر ويحاول يقلد لهجته:

ــ ولك يازلم شفيك تباوعني هيج ..<< تباوع = تطالع.. ’’ هيج = كذا

قيصر بهدوء مستغرب:

ــ سامي.. اقصد.. ناجي.. انت تعرفني؟؟

ــ شلون ما اعرفك وادل عيادتك ؟

قيصر بلا شعور يقوم واقف وهو فرحان.. ويضم ناجي بالقوه :

ــ ارجعت لك الذاكره كلش .. تذكرني يا سامي .. تذكرني..

ناجي وهو مو قادر يتنفس ويضحك على قيصر وفرحته:

ــ ناجي انا ناجي.. ما نسيتك اصلا ..

قيصر يترك ناجي وهو مستغرب..

ــ وشلون.. شلون مانسيتني وانت اول ما شفتني انكرتني...



ابتسم ناجي .. وبهدوء :

ــ كنت خايف عليك.....

ــ من شنو.. !!











اماني مع يوسف بالمجلس مهي مستوعبه اللي صار .. خصوصا ان حسن سكر عليه باب غرفته من زمان...

يوسف بألم وهدوء:

ــ انا احمد ربي مليون مره ان حسن ما ذبحها.. لو تشوفيه بالمره كان منفعل..

اماني ساكته وترتجف ..

يوسف :

ــ مانى داري ويش نسوي.. كلميها عاد خلها تقول لش منهو هالرجال خلنا نشوف كيف بنتصرف

اماني بصوت متقطع:

ــ ماصدق اني.. مستحيل ماريا تسوي هالفعل .. مستحيل ... شوف .. شوف والله هي كانت وياي

وتطلع من شنطتها فراشة الأسواره:

ــ هذي فراشة طاحت من اسوارتها.. يمكن طيحته في الشارع عالباب واحد علقه..

يوسف ومهو داخله مخه السالفه:

ــ زين .. خلش من الأسوار ويش دراه اسم اختي ماريا,.. ويش دراه ويش لابسه.. ووين تدرس .. ويش دراه عن الشامه اللي في بطنها..

اماني تحس نفسها مهي بالدنيا..

ــ ماعلي منك.. ولا من اخوك.. اختي واعرفها مستحيل تسويها.. اقول لك مستحيييييييل...



وقامت تشوف اختها...

يوسف سند راسه عالجدار وشبح بعيونه و من القلب اطلق تنهيده...

[Princess]

في بيت ابو مجتبى.. مجتبى يكلم اماني في جواله:

ــ ايه.. لا خليش وياها اجل .. لا تحاتي الجهال خلاص ماعليه اصلا قلت ليهم يروحو ينامو ... ماتشوف شر ..

وسكر ..

ام مجتبى :

ــ ويش صاير؟

مجتبى:

ــ تقول اختها ماريا ماشافوها الا طاحت عليهم مصخنه مره.. ومسكينه ماحد حولها مرت اخوها في بيت اهلها واخوانها مابيعرفو يعتنو فيها..

ام مجتبى تنهدت:

ــ ايييه هالماريا وعلى قلبي هالبنيه.. كثر ما احبها كثر ما هي معوره قلبي .. خوش بنيه مافي منها.. الله يغير حالها ..

نور كانت في غرفة امير ترتب اغراضه في شنطه استعداد لنقله الى المدرسه الخاصه فيه... سمعتهم يسولفو على ماريا..

طلعت:

ــ ويش فيها ماريا؟؟

ابو مجتبى:

ــ يقولو مصخنه.. يبغى لش تروحي بكره ليها تشوفيها ..

ــ يوو توها ويانا مافيها الا العافيه.. وعلى قلبي ماريوه..

في مجلس بيت ابو مجتبى..

فرات و محمد و باقر و ايثار منسدحين بينامو ..

لأن اساسا بيت ابو مجتبى صغير..

ايثار كانت تنام مع عمتها نور.. و امير و احمد و باقر في غرفة وحده..

نور كانت تحوس في غرفة امير ترتب اغراضه و امير مو راضي ينام ..

وهي ناويه تسهر تذاكر وماتبغى ازعاج ..

فقال ليهم مجتبى ينامو كلهم في المجلس... وبعد اقناعات يالله رضو يسمعو الكلام انهم يسهرو في المجلس لين تجيهم النومه خصوصا انهم كلهم مخلصين مدارس واجازتهم بدت ..

انسدحو الصبيان في اقصى شرق الغرفه جهة باب المجلس الخارجي والبنات في اقصى غربها جهة الباب الداخلي

محمد :

ــ اف مكيفكم حار... زيدو برودته..

ايثار:

ــ هذا حده...

محمد:

ــ اشترو واحد جديد.. بدل هالقديم الحار...

فرات :

ــ مو حار اني بردانه..

محمد :

ــ انتين كل بردانه... يا ام عظام >> لأن فرات ضعيفه مره فيعيب عليها بهاللقب

فرات حمقت:

ــ اني ام عظام.. كان تسبحت قبل لا تنام يامقطن ولا بتستحر..

محمد يقعد قعود:

ــ انا مقطن.. يا يا يا....

ايثار فتحت عيونها اول مره تسمع هالسبات...

باقر :

ــ خلاص عاد .... ويش هالكلام !!!

محمد:

ــ اسكت انت ولا تسوي حالك....

فرات بحمق:

ــ اباقول لأبوي تقول كلام وصخ.. صبر لكن...

محمد:

ــ طقي راسش بالطوفه زين...

سكتو شوي..

رجع محمد:

ــ افففففففف .. طفش .... باقروه ماعندك سوني ...؟

باقر وبهدوء:

ــ لا...

محمد: ــ لو ادري جبت السوني حقي .. بس بزهق اصلا ..

ايثار وببراءه:

ــ لويه بتزهق اكو عندنا تلفزيون في المجلس

محمد:

ــ ماتعرفو تلعبو به انتون.. ويش عرفكم..

باقر حمق فيه:

ــ لا انت ابو العريّف...

محمد عصب:

ــ ناقص انا جعفروه على شان انت بعد هنا

باقر فيه الضحكه:

ــ اسمه الأستاذ جعفر

فرات بأستغراب :

ـ ابو العريف ؟! يعني ويه ابو العريّف

باقر وهو يضحك:

ــ هذا استاذنا الررياضيات يسمي اخوش ابو العريف ..

فرات:

ــ لويه؟

ــ لأن كل يسوي روحه فاهم و احسن واحد وهو خرطي كل يحل خطأ

فرات:

ــ هههههههه ويو ويويو ويويويو.. ابو العريف..

محمد:

ــ ياكلاب يا حمير ياحيوانات...

ايثار ببراءه:

ــ بل هذي حديقة حيوان..

ــ انطمي انتين .. يابقره..

ايثار خافت منه .. سكتت..

باقر:

ــ نام بس .. عورت راسنا بكلامك الباايخ وهدرتك..

محمد شال البطانية:

ــ انت البايخ يا ... يا...

باقر مستغرب منه:

ــ ويش فيك انت.. خلااااص ..

محمد يحط صبعه على خشمه و بحركه يستفز بها باقر:

ــ اششششششش.. انطم..

باقر انقهر منه... بس حاول يتماسك اعصابه .. خصوصا ان امه ماهي في البيت... وهم ضيوف وياهم..

غاده مهي قادره تنام.. صار ليها يومين .. قضت الخميس والجمعه لحالها في غرفتها.. اهلها خافو عليها يفكروها مريضه.. وهي تعاني من عذاب تأنيب الضمير..

ماهي عارفه ويش تسوي.. خايفه تتكلم وتنفضح.. وخايفه تسكت و تعيش طول عمرها في عذاب...

بالطرف المقابل كان عبدالأله .. ايضا النوم مفارق عيونه.. خصوصا بعد ما خلاص غسل ايده من سالفة ماريا .. وقرر انه يسافر ويترك احلامه و حبه وراه... وينتبه لمستقبله... والله يعوض عليه ان شالله....

و هناك ريماس.. اللي تعاني من مرض حب التملك .... و اكثر ما يستفزها في الحياه ان احد يتجاهلها ..... اضافة للخباثه و الدهاء.. تخطط كيف راح تنشر الخبر في الديره كلها وفي المدرسه قبل بأقصى سرعه ممكنه.. وكل همها من هذا كله فقط عبدالأله و اهله يغيرو نظرتهم في ماريا... اولا... و كسر لخشم ماريا اللي كانت تقول عنها دايما شايفه حالها عليها ثانيا......

في بيت عبدالستار...

عبدالستار و امه و وداد بالصاله... وهو يكلم المحامي بالجوال..

ــ يعني ويش الحين.......... يــــــــالله.......... طيب جزاك الله خير...

انهى عبدالستار المكالمه وهو ينتظر امه تساله عوايدها بلهفه ويش صاير..

هدوووء .. !!

وداد التفتت لأمها مستغربه ... للحين ماتكلمت ولا سألت!!

وداد:

ــ ويش قال لك المحامي...

عبدالستار وهو متضايق:

ــ يقول كل الأدله ضده انه متعاطي ولازم ياخذ العقوبه ...

وداد:

ــ يعني مافيه امل يطلع حتى بكفاله !

ــ ما اظن..

ام عبدالستار وبهدوء:

ــ الله كريم...

وقامت غرفتها..

وداد: ــ اني ماني داريه عن امي ويش فيها متغيره احسها...ويش فيها تتوقع؟

عبدالستار يحرك كتوفه بمعنى مادري وفي باله:

ــ انتظرش اماه.. انتظرش تعيدي لي الكلام وانا صاحي..

وداد تتصل على حسن .. تلاقي الجوال مقفل.. تسكره وبحمق:

ــ ياعلي عفر تهوست اني مادري ويش صاير من متى وجواله مقفل ... اباشوف ازدهار سواقها اذا مانام يجي يوديني

ــ مو سواقش هو على كيفش وياه .. توه موصلني البيت مكحين كان خليتيه يرجعش البيت.. والله انش سالفه..

ــ اهووو.. راح عن بالي..

عبدالستار في باله:

ــ الا برود و قلة ادراك... الله يعينك ياحسن ..!!

وداد : ــ خلني اكلم حماتي اول اشوف ولادي امر عليهم مره وحده...

عبدالستار:

ــ يعني مصره على ازعاج العالم ؟

ــ ايه ويش يقعدني و هالرجل مادري ويش فيه ووين واديه.. باروح بيتنا..

وفي غرفة ماريا...

اماني بهدوء بعد ماتكلمت مع ماريا ..

ــ هو تقدري تروحي المتستشفى.. والتحاليل تثبت انش ماسويتي شي...

ماريا تشاهق ومهي قادره تقول ولا كلمه...

وقفت اماني :

ــ اباروح اكلم اخوش حسن وبكره الصبح نروح المستشفى زين..

ماريا قاعده عالسرير :

ــ اني ماسويت شي .. لويه اروح واسوي تحاليل على شي ماسويته ...

اماني تضم راس اختها وتمسح عليه:

ــ بس على شان يقتنع اخوش.. لا تخافي غناتي.. باصير وياش

الا جوال اماني يدق..

ــ هلا وداد... لا .. خليهم ناموا الحين .. عادي ويا ولادي .. اجازه... هذاني في بيت اهلي ... ماريا مريضه....... حسن.... في الغرفه نايم مافيه شي.... حياش

سكرت اماني وهي تتحمق:

ــ مرت هالأخو عليها برود عجيب يرفع الضغط...توها متفرغه تدق وتسأل

وداد وهي تتمغط :
ــ هونت ماني رايحه بيتنا.. ابانام الكل نام ولا داقين لي خبر..

وركبت ....

ظل عبدالستار تحت في الصاله .. منسدح عالكنبه..

تذكر موقفه مع ماريا وازدهار لما ضربوه ولما ساعدوه يسترجع الذاكره وصار يضحك..

ــ والله هاللي اسمها ازدهار خوش وحده بس لو تتغطى...

ويرجع يعاتب روحه:

ــ استغفر الله اف من هالبنات يخلو الشباب غصب طيب يرتكبو ذنووب...

وغفت عيونه..

وبعد تقريبا ساعه الا يسمع حس احد ينزل الدرج..

فتح عيونه شويه لقاها امه... فرجع سوى حاله نايم

ولا يحس الا بها تغطيه بشرشف .. وتمسح على راسه... وصوت انفاسها كنها قاعده تصيح...

حس بالألم في قلبه..

تمنى انه ماسمع الكلام اللي قالته له لما كان في غيبوبه.. تمناها كانت وياه كذا من اول ما اوتعى على الدنيا...

من سمع خطواتها عالدرج تركب ..

انقلب جهة المسند في الكنب .. دعس وجهه و هو متكتف وشاد على روحه.. و سالت دمعه من عيونه غصب..

[Princess]

في بيت ابو مجتبى .. الساعه تقريبا 12 الليل .. الكل نام...

قعدت ايثار بتروح الحمام .. البيت فيه 3 حمامات...

واحد في غرفة امها وابوها ..

الثاني مشترك للعايله

الثالث للمجلس وخارجي

..

طلعت للحمام الثاني لقت نور تسبح.. محمد مانام.. شافها وهي قايمه للحمام..

ايثار سمعت صوت الماي .. فقعدت على باب الحمام تنتظر عمتها تطلع..

بس شكلها توها داخله وبتطول وايثار محصوره مهي قادره...

قررت انها تتشجع وتطلع من المجلس لحمامه الخارجي..

فتحت باب المجلس وهي ترتجف .. ومحمد يراقبها..

عرف انها بتروح الحمام..

طلعت ايثار خطوتين شغلت ليت الحمام وفتحته..

ردت طلعت وهي منصرعه شافت وزغه كبيره .. ناسيين نافذة الحمام مفتوحه فدخلت..

وهي راجعه المجلس وميته من خوفها من الوزغه ...

الا تتفاجأ بمحمد واقف ليها في الظلمه عالباب وهو مغطي روحه بالبطانية...وبصوت خافت:

ــ اووو..

هي من شافته صرخت حد ماعندها...

وقعدت عالأرض...

طلعت نور من الحمام الا تسمع الصرخه...

مجتبى راسه خفيف.. سمع الصرخه وقعد من نومه.. وطلع يشوف ويش صاير!!

باقر و فرات قعدو من النوم..

باقر قام يركض لأخته:
ــ ايثار .. ويش فيش

ايثار وهي ميته صياح على باب المجلس الخارجي قاعده ولا هي راضيه تقوم..

محمد رفع البطانيه عن وجهه وصار يهدي فيها .

ــ هذا انا يالجبانه ياخوافه

باقر فهم السالفه ويطيح في محمد دسسسست..

فرات صارت تصيح...

نور بفوطتها ولابسه مشمر دخلت المجلس عالسريع:

ــ ويش فيكم مانمتو للحين .. دقيقه بس بلبس ..

الا تصادف اخوها في وجهها وهي رايحه غرفتها

نور هي اللي اختلعت وشهقت .. :

ــ يمه

مجتبى ببرود ومو داق خبر لشكل نور : ــ. ويش هالصريخ

نور وهي مستحيه تبغى تدخل غرفتها بالسرعه :

ــ مادري شبقه روح شوفهم..

دخل مجتبى وصارت يفك باقر عن محمد.. وباقر مستميت ضرب في محمد

مجتبى :

ــ خلاص يا باقر خليه

باقر وبعصبيه:

ــ ما اخليه.. صبرت عليه واجد .. ما اخليه

مجتبى من الحمق في ولده اللي مو راضي يطيع ولأول مره يصفعه كف

باقر من الصفعه بهت و طلع برى الحوش ...

محمد صار يزحف بالبطانيه وتلوت وانسدح وصار يصيح عالصامت..

مجتبى راح لأيثار:

ــ ويش فيش ..؟؟ قومي...

ايثار مستمره بالصياح ومهي راضيه تقوم..

يمسكها ابوها ويحاول يرفعها وهي تثقل روحها و ترجع تقعد.. وهو فيه النوم ومو في كامل قوته..

مجتبى عصب .. شباق وعناد ولا يدري ويش صاير ..!!

ويصرخ فيها

ـ قوووومي

الا بجية نور تركض ...

ومجتبى يحاول يرفع ايثار انتبهت نور لشي في الأرض تحتها....

ايثار وهي تصيح وتشاهق:

ــ امااااه... امااااه..

مجتبى :

ــ ويش فيش ويش صاير

ايثار والكلام يتقطع تقطيع:

ــ محمد.. خلعني .... بالبطانيه.. فكرته شششبح..

مجتبى وفيه قهر من محمد التفت له لقاه متلحف عدل بالبطانيه ولا كأن صاير شي..

حاول يكتم قهره ماله مصلحه بولاد غيره بعد يشابقهم في نصاص الليالي...

ــ محمد مايستحي.. قومي بابا خلاص .. بسم الله عليش...

ايثار ابدا مهي راضيه تتحرك...

توقلت نور جنبها تهدي فيها.. وصارت تركز نظرها في الظلمه ويش هذا للماي اللي تحتها... وفهمت لويه ايثار مهي راضيه تقوم..

نور:

ــ خلاص ياخوي روح نام اني باخذها تنام هي و فرات وياي بانام هونت.. روح ماعليك منهم...

ــ زين خلها تقووم.. مابتقدري عليها

نور بهداوه وهمس واشارات تفهم مجتبى سبب عناد ايثار ولويه مهي راضيه تقوم...لأنها منحرجه منه..

ولما فهم مجتبى اللي صاير .. عوره قلبه على بنته... التفت بيشوف باقر ويش حالته من بعد الصفعه..ماشافه في المجلس وتذكر انه طلع الحوش ...

نور تهدي في ايثار:

ــ قومي غناتي عادي .. لا تصيحي اني يوم كنت في الروضه كنت ابول حتى في سريري... مو انتين بعد من الخلعه.. قومي غناتي لا تخافي...

ابتسمت ايثار و تطمنت لعمتها وقامت وياها..

نور :

ــ فرات اخذي مناماتكم انتين وايثار وديهم غرفتي وخل الأولاد ينامو هنا..

[Princess]

باقر برى الحوش يصيح قاعد يصيح...

الا يسمع ابوه فوق راسه وبهدوء:
ــ احم.. كح..

بالسرعه باقر يمسح دموعه ويشد على روحه ...

قعد مجتبى جنب ولده... تنهد :

ــ صيح ياولدي.. اذا فيك قهر .. طلع حرتك.. حتى الرجال يصيحو... الله لا يحرم اختك منك.. ماعليه ما كنت ادري انك تضرب ولد عمتك من قهرك عليها...

باقر يحاول يمسك دموعه...

مجتبى.:

ــ رجال ولدي .. تصرفاته اكبر من عمره.. اعرفه .. عاقل و طيب والكل يحبه.. صحيح اني قاسيت واجد في غيابي عنكم .. وتعبت بس ماكنت احاتي امك واختك ابدا... لأنك وياهم.. بتخاف على اختك وتحميها.. وبتطاوع امك و تعاونها...

ويضرب مجتبى ظهر ولده على خفيف ويصير يمسح فيها..

ــ رجال ولدي رجال...

ابتسم باقر و الدموع من العين تتناثر...

كاظم منسدح ويفكر في اللي صاير له...

ــ مالي غير المحامي أأمنه على املاكي و انزل الديره كل اسبوع يوم واشوف الوضع لين اخلص هالسنتين اخلصهم واتخرج و اقابل الحلال تالي... شكلي باطول اكثر من يومين .....

الله يستر عليك ياصادق اذا وصل لك خبر شركة ابوك.. اشتريها ! مادري اشتريها و افك ازمتهم..... ممممم يمكن يمديني اشتريها لو بعت الأراضي.. بسأل المحامي وباشوف .... ويش باسوي...

قيصر وهو شاد على كوب الشاي .. وهو فاتح عيونه:

ــ يعني ما ﭽنت ناسيني.. بس على شان لا ياخذوني استجواب كمشتبه به.. وعلى شان لا يآذوني العصابه اللي كانو مستغلينك...

ناجي:

ــ ايواااا.. ويوم اني حسيت نفسي طلعت من سالفتهم وصرت على بر الأمان.. ودريت ان العصابه خلاص انتهى امرها... اطمأنيت وقلت برجع لك..

ــ واذا طلع عليك شي ورجعو لك..

ــ لا تخاف خلاص انتهت القضيه.. وانت انا توي اتعرف عليك..

قيصر وعيونه يبين فيها فرح مو طبيعي:

ــ ولك يازلم شقد آني فرحت برجعتك .. ما تتصور شقد ﭽنت حزنان لما ما إعرفتني..

ناجي يضرب كتف قيصر:

ــ ولك يازلم على شان تعرف شقد احبك...

ويتحسس بيده الخاتم اللي بالسلسال اللي اهداه اياه ستيف... وبحزن:

ــ ستيف .. هالأنسان ماعمري بنساه بعد... لين اموت..

قيصر وبنبره هاديه وحزينه:

ــ باين عليه كان يحبك هواي..

ــ على مدى سنتين في هالغربه ماكان لي احد غيره... يخاف علي اكثر من خوفه على روحه..

ويشد على الخاتم :

ــ مديون له في حياته وباظل مديون له حتى بعد موته..

هدوووء والحزن ارتسم على وجه ناجي

قيصر يبغى يغير الجو والسالفه..:

ــ ايييه ياناجي والله و إطلعت سعودي ومن القطيف .. آني قايل هاللهجه هاي خابرها ..

ناجي:

ــ هههههه ليش ؟! شكلك تعرف احد عدل من القطيف ؟؟ اعترف اعترف....

قيصر وعلى ملامحه بين الأسى... .. حزن ماعمر ناجي شافه في عيون قيصر..

ناجي بارتباك:

ــ قيصر .. ويش فيك؟

يتنهد.. ويحط كوب الشاي على الطاوله..

ــ ايه.. اعرف.. شلون ما اعرف...

ــ مين ؟ وويش فيك لما جبت هالطاري اعتفست احوالك..

قيصر بأبتسامه:

ــ ابوي.. آني هم مثلك سعودي ومن القطيف..

ناجي فتح عيونه:

ــ هاااااا. شلون...!! ويش تقول..!!؟؟

ضحك قيصر ضحكه تخفي وراها حكايات ألم..

ــ آني امي عراقيه.. ابوي سعودي..

ــ مانى فاهم..؟ شلون يعني انا من عرفتك وانت تقول انك عراقي وابوك خطيب منبر و اخذه النظام الجائر وامك ماتت من القهر عليه و عندك اخوان بس ماتو ومدري ويش كله تأليف ..!!
ابتسم قيصر :
ــ ما اعرفك مثل هالسا على شان احجي لك قصتي الحقيقيه... ماتعلقت فيك مثل هالسا ﭽنت ناوي احـﭽي لك بس انت اللي بديت و ﭽـذبت علي وبعدها هربت ومالقيت لك اثر ..
ناجي مستحي و متأسف..
ــ آسف .. والله آسف الظروف اللي عشت فيها جبرتني على هالشي
ابتسم قيصر ..
ــ عارف حبيبي عارف .. وعلى شان هييج آني هالسا بحـﭽـي لك قصتي الوالد كان عاش بالعراق سنين درس بالحوزه ..

ــ اها.. شيخ يعني؟؟ غربل الله شرك لويه ماقلت لي من لول..

ــ ايييه.. رحم الله ديك ايام ..

ناجي حس في سالفة قيصر سر .. ماحب يستفسر اكثر .. الا اذا قيصر بيقول له من نفسه..

سكت..

شوي .. الا قيصر بهداوه:

ــ ابوي كان يدرس بالحوزه.. تزوج امي وعاش معها 6 سنوات بعدها توفى.. وكان ابوي من الأصل يتيم بين 7 اخوات واعمامه ولاة امره من زغره.. لما توفى الوالد كان عمري 3 سنوات و اختي الـﭽبيره 5 سنوات... محد سأل عننا وقتها ولا عرفنا منو عماتنا ومنو اعمام ابونا.. كلش ما كان احد معترف بينا بس كان صاحب والدي بالحوزه يزورنا بين فتره وفتره . سميناه عمي من كثر ماتعلقنا فيه. بعد 10 سنوات توفت الوالده.. وظلينا مالينا غير الله وعمي .. كان لينا هو و زوجته مثل الوالدين....وبعد ثلاث سنوات ولد عمي خطب أختي و تزوجته و اخذها معه السعوديه وكلهم ردوا للوطن.. إلا آني اصريت ابقى.. وظليت لحد ما تخرجت من الثانويه بعدها.. بمعدل عالي يسمح لي اقدم على بعثة لأمريكا... قدمت والله كتبها ليا.. فبعت البيت و هاجرت الديار....

ــ طيب شلون جيت لحالك كيف دبرت عمرك ومعيشتك..!!

ــ ﭽـنت ادرس بالنهار واشتغل في مطعم اسلامي بالليل .. ساع بالتنظيف وساع بتوصيل طلبيات.. و اجرتي تكفي لي سكن بغرفه. في حي عربي حبيته هواي.. غالبية الساكنين بيه عراقيين .. وبيه عشت احلى ايام عمري وبيه حبيت... لحد ما تخرجت من الجامعه.. خذوني بمستشفى خاص لجل شهادتي وصرت اشتغل هناك لحد ما اقدرت اوقف على رجولي و اشتري لي سكن اكبر بهالحي و افتح بيه عياده لجل اساعد اهاليه.. وتزوجت اللي حبيتها الله يرحمها .. والباقي انت تعرفه....

ــ الله يرحم والدينا ووالديكم.. موتانا جميعا وموتاكم..

قيصر:

ــ انت بعد والدينك مرحومين؟

ناجي:

ــ ايه قبل لا اجي امريكا...

قيصر وبأسى:

ــ ايييه يا خوي ..صار لي هنانه تقريبا فوق الـ 10 سنوات... الغربه صعبه .. ما تذوق منها الا المرار.. غربتنا ياخوي وطن... وماعاد لنا وطن غير الغربه..

سكت ناجي..

شوي وبهدوء:

ــ قيصر.. ليش ماترجع وياي ..

التفت له قيصر:

ــ وين.. ؟ السعوديه قاصد؟ شتريدني اسوي هناك..

ــ ايه .. انت سعودي ولك الأحقيه في وطنك.. ويش تسوي بالغربه.. ؟؟ اللي تسويه بالغربه سويه في بلدك... انت ما شالله عليك طبيب ناجح و عندك شهاده من جامعه معروفه هنا وشهادة خبره من مستشفى كبير وموثوق .... بتلاقي لك رزق اكيد و اختك قريبه منك..

ــ آني شايل هالفكره من راسي كلش..

ــ طيب لييييش

ــ ولك ماعرف احد .. 10 سنين ظليت هنانه ويالله قدرت اتعايش ... شلون بيه اكمل باقي عمري في بلد ثالث .. صحيح ذقت المرار بس عشت اجمل ايام عمري بهالحي .. ما احس نفسي اقدر اخليه..

ــ انا وياك.. والله ماباخليك.. وباعرفك على الناس هناك..

ــ وشغلك هنانه .. شنو راح تسوي وياه ؟

ــ ايييه شغلي من زمان طار.. صار لي سنتين ميت شلون تبغاهم يرجعوني.. الله يجيب الرزق هناك..

بعد يومين... (( يوم الجمعه ))

في الرياض ,, الشباب في شقة نوري قاعدين يعلبو كوره في البلاي ستيشن .. ومعاهم صادق

الدور بين محسن وهاني..

محسن:

ــ بل عليك ياقردانوه.. كم قول للحين .. بل بل

هاني :

ــ اوهوووووو اول مره اشوف نخل يحسد..

ــ نخل اللي ينخل عظامك.. مو نخل

ــ لا تقول لي قردانوه ماباقول لك يالنخله

نوري :

ــ هيه قردانوه ونخلته.. متى ان شالله بيجي دوري ويا صطيف .. زهقتونا لعبكم بارد..

محسن:

ــ ايه انا بعد زهقت من اللعب ويا هانيوه .. يملل

وحط القير ..

ــ اللي يبغى يلعب بدالي يكمل..

ايمن اخذها..

ــ عيد المباراه من اول

هاني :

ــ مانى..

ايمن:

ــ ويش بعد العب وياك من الشوط الثاني

هاني :

ــ مو شغلي في محسنو مالعب عدل 2 \0

محسن:

ــ مالعبت عدل ها .. مالعبت عدل...

ويعص الحبه ويطفي اللعبه..

هاني :

ــ يلعن شكلك..

محسن يطالع فيه على جنب:

ــ وشكلك..

مصطفى بهدوء كان ماسك كتاب يازعم يذاكر شوي بس ماله مزاج..

ــ نفسي في يوم ما تتشابقو و ترمو كلام على بعض

محسن:

ــ صطيف ..

مصطفى :

ــ ها..

محسن:

ــ ذاكر بس بابا .. مافي قرقر واجد..

مصطفى يسكر الكتاب ويرميه على جنب:

ــ اهوو زهقان انا..

نوري :

ــ ها ايمنو بتشوف احد يلعب وياك لو ويش ؟

صادق :

ــ انا بلعب وياه...

وقام صادق يلعب مع ايمن..

[Princess]

وبين ماهم يلعبو..

هاني :

ــ مادريتو اخر خبر طازج توه ..

نوري :

ــ ويش بعد... خير اللهم اجعله خير..

هاني : ــ قضيه صايره في الديره قضيه..

مصطفى :

ــ قضية ويه بعد.. يامكثر القضايا

هاني :

ــ يقولو في الثانوية الـ......... للبنات فيه بنيه خربانه كل يوم تطلع ويا واحد ويوم اكتشف واحد منهم انها كذا كل يوم مع واحد فضحها عند اهلها...

محسن : ــ بل ياااجميل الستر..!

مصطفى : ــ استغفر الله ويش هالسوالف الماصخه..

نوري : ــ اف .. نفس مدرسة خواتي...

هاني : ــ عاد انا اقول تستاهل اللي جاها... ماحد قال ليها تلعب في الصبيان

ايمن : ــ عاد الصبيان بعد ما ينحدو... كان ماذبحوها اهلها...

هاني : ــ اهلها... اوووه شان على اهلها... هنا المصيبه ان اسم البنيه وعايلتها معروفين..

نوري : ــ لويه من بيت مين..؟ اباقول لخواتي ياخذو الحذر

مصطفى : ــ لويه تبغى تعرف الله يستر على الجميع .. والله حرام .. انتون تغتابو عباره الحين

هاني: ــ والله لا غيبة في فاسق.. استغفر الله بالعكس على شان لا يصادقوها ولا يقربو منها...

اسمها عاد مميز.. ماريا علي الـ....... بس عاد ويش اسم ابوها مادري..

مصطفى رفع حاجبه.. وفي باله..:

ــ مر علي لقب هالعايله !!

صادق وبلا وعي:

ــ يوسف اللي ويانا هذا لقبه..

مصطفى اندهش وتيقن ان كلام صادق صحيح...

بعد مافتح جواله.. وشاف اسم يوسف ..

نوري ارتبك:

ــ يمكن تقرب ليهم.. مو شرط من اهله...

ايمن : ــ ماليكم شغل بالناس...

هاني يسأل صادق:

ــ هو عنده خوات ؟

صادق:

ــ اتوقع ايه كأنه ماعنده ام حسب اللي عرفته بس عنده خوات ثنتين او ثلاث أي قد مادري لكن..

هاني :

ــ مايندرى يجوز ....!!

مصطفى صرخ فيه:

ــ ويش اللي يجوووز .. استح على وجهك ولا لك شغل بالناس...

هاني:

ــ وانت الحين ويش اللي حارنك ماتكلمت عن خواتك انا.....

مصطفى :

ــ خواتي لو مو خواتي هذي اعراض ناس.. الله يهديك بس ..

هاني :

ــ اوووه انت ما الواحد يقول شي الا طلعت لينا فيها بالمصلح المطوع..

ــ حسبي الله عليك.. انتقم الله منك دام هذي سوالفك .. مطوع هااا.. يعني اللي ينصحك ويعلمك الصح من الغلط مطوع... ومطوع زين.. ماتسمع برايه.. ويش فيه المطوع بلى في شكلك ماعندك غير السوالف الماصخه..

ــ بلى في شكلك انت يا دب يا فقيل الدم...

نوري يصرخ فيهم:

ــ خلااااص صلو على محمد يا شبااااب.. منتون جهاااااااااال

هاني:

ــ انا لو متكلم عن اخته على هالوقعه اللي مسونها ماعليه .. الا ماله شغل

مصطفى : ــ خوات الناس عباره خواتي...

هاني : ــ استررررررر يا اخو الكل.. اخو بالجمله.. .. اساسا خواتك ينخاف منهم.. ماينخاف عليهم...

محسن ونوري هم الوحيدين اللي يدرو ان مصطفى الحين وحيد امه وابوه وان ماعنده خوات غير دانه..

ايمن وهاني يدرو انه عنده اخت صغيره توفت بس مايدرو هل عنده خوات ثانين او لا.. مع ان هاني كان اكثر واحد وياه ايام المدرسه بس مصطفى ماكان يرتاح له ولا يحب يسولف وياه وايد كثر نوري ومحسن..

مصطفى من بعد كلام هاني ..

ارتبك و تذكر اخته دانه .. جت له الغبنه ... وبهدوء :

ــ ويش قصدك..

نوري يمسك مصطفى ويحاول يدخله الغرفه:

ــ صل على محمد اخوك.. امشي وياي خلاص...

مصطفى مقاوم سحب نوري وبهدوء يكرر سؤاله:

ــ ويش قصدك؟

هاني بقهر:

ــ دخلوه الغرفه عني لا ارمي كلام يجرحه... دخلوووه...

مصطفى يصرخ في هاني:

ــ اقووووووووول لك ويش قصصصصصصصصدك...

هاني يصرخ فيه:

ــ بينخاااااااف منهم اذا يشبهوك وطالعين عليك لا تخاف عليهم ما احد يبغاهم...

محسن :

ــ لااااااااااا .. لهنا وبس خلاص .. مصختها هانيووو..

هاني:

ــ هو اللي جبررررررررررني .. ماحد قال له..

مصطفى و الوانه تغيرت ويحس بالقهر في داخله.. دخل غرفتهم وكفخ الباب..

نوري :

ــ هاني ما احد قال لك من قبل انت حيوان..؟!

هاني :

ــ ويش انت بعد..

محسن:

ــ انا بعد اقول وقليل حيا وماتستحي...

هاني:

ــ ايه ايه اوقفو كلكم في صفه..

نوري :

ــ انشب بس انشب ... اساسا ويش اللي جيب هالفتنه دي كلها وهالشبقه ها غيرك انت لما جبت السالفه

التفت هاني لصادق اللي كان جالس جنب ايمن..

صادق مختلع من الشبقه اللي صارت.. ولا يسمع الا هاني يقول..

ــ والله مصطفوه ما انقهر الا لما قال صادق انه يوسف من بيت الـ.......... وقامت الهدره...

محسن و نوري يطالعو في صادق ..

صادق يحس انهم يقولو له بعواينهم:

(( انت سبب الفتنه.. انت ساس البلا..))

قام وبهدوء :

ــ مادري انا.. مالي شغل في شي ... اباروح انام....

نوري :

ــ يلعنكم ويلعن السهر وياكم.. مانى قاعد انا بعد

..

محسن:

ــ خذني وياك..

ودخلو نوري ومحسن يشوفو مصطفى.. لقو مصطفى منسدح ومغطي جسمه كله ..

محسن يتقرب من مصطفى بيكلمه..

نوري منعه .. وطلب منه يخليه يهدأ لحاله..

صادق طلع من شقتهم وركب شقته...

هاني ظل في الصاله مع ايمن..

هاني ببرود قعد...

ــ تلعب وياي قيم...؟

ايمن:

ــ مممم يمكن بس مشتهي ببسي باروح ميد بشتري وباجي نشفتو ريقي بهالشبقه ..>> ميد كانت البقاله الوحيده القريبه لعمارتهم والمفتوحه 24 ساعه..

هاني ينتظر ايمن يقول له تبغى وياي...... بس يعرفه بخيل ومابيقول..

طلع هاني من محفظته 5 ريال:

ــ جيب لي وياك

وطلع ايمن..

هاني بعصبيه:

ــ اف منهم.. مسووين من الحبه قبه.. خربو مزاجي ..

[Princess]

دخل صادق الشقه لقى حبيب والسيد و مراد قاعدين يتابعو فلم بالتلفزيون...

حبيب:

ــ ها صادقووو ويش فيه وجهك منخطف .. ويش سامع من الجماعه..؟؟

صادق قعد :

ــ الحين يوسف من بيت الـ........... صح..

مراد التفت:

ــ ايه صح..

السيد:

ــ لويه تسأل .؟؟ توك تدري يعني؟؟

ــ لا بس سامع سالفه توي تحت قومت شبقه ..

حبيب:

ــ ويش سامع..

مراد:

ــ وويش دخل يوسف فيها؟

صادق:

ــ يقولو بنيه اسمها ماريا الـ......... تطلع ويا صبيان و واحد اكتشف انها تخونه ففضحها عند اهلها..

السيد حط ايده على راسه:

ــ ياقوة الله.. يادافع البلا .. ويش هالكلام.!

حبيب :

ــ ياساتر.. لا ماتوقع انها من اهل يوسف .. يمكن تشابه اسماء.. يوسف رجال والنعم فيه..

ولويه تشابقو اصلا هناك !

صادق بأرتباك:

ــ مادري انا لما قلت ليهم ان يوسف من هالعايله...

مراد يقاطع صادق ويصرخ فيه:

ــ بسسسسسس....... عمى في عينك..

صادق :

ــ مادري انا.. يمكن مي اخته..

مراد يحس بالغيره و نبضات قلبه تتسارع ..

ويتذكر قبل لا يروح يوسف انه وصاه بس يوصل يكلمه من تلفون البيت ... بس يوسف مر عليه يومين وما اتصل .. والسيد وحبيب يتحججو انه يمكن فيه شي طارئ حصل .. او نسى مع اهله والتهى...

مراد بعصبيه يمسك صادق:

ــ مين اللي قال لك.؟؟!!

صادق:

ــ شدخلني انا .. هدني..

مراد يصرخ فيه:

ــ اقول لك من مين سمعت هالكلاااام..

ــ من هانيوووه ويش بتسوي يعني..

ويرمي مراد صادق..

ويطلع يدق الأصنصير .. ولما شافه بيطول..

نزل بالدرج وهو مره حده محممممق...

الا يصادفه ايمن راجع بيدخل شقتهم.. ويدفه مراد ويدخل قدامه..

هاني وهو يلعب بالسوني :

ــ هاا جيت...

ولا يشوف الا واحد يسحب وايرات السوني من الكهرب و يرميهم في وجهه...

:

ــ مين اللي وصل لك هالكلام...

ــ عمى... ويش تبغى انت بعد... ولويه داخل كذا هجوم ماتعرف تطق الباب..

الا يسمع ايمن وراه:

ــ مادري دخل وياي فجأه....

مراد وبعصبيه وانفعال:

ــ اقوووووووووووول لك مين اللي وصل لك هالكلام عن البنيه من شوووي

هاني : ــ اوهووووووو ويش هالليله دي ماصارت دي سالفه انقالت وصلت لك مسررررررع

مراد : ــ زي سرعه وصولهااااااااا لك.. مين اللي قايل لك هالسالفه لا العن ابو خامسك الحين..

هاني :

ــ و انت ويش دخلك.. وحده من خواتك هي ...لو انت واحد من المغدورين من طرفها سااابقااا!!

بقس من مراد على عين هاني خلاه يصرخ من قلب...

وتقوم العركه..

ويطلعو نوري ومحسن من الغرفه يتراكضو.. يفاككو بينهم..

وينزل حبيب والسيد لمراد يمسكوه...

مراد وماخلى ولا سبه ولا كلمه على هاني...

ــ ماعندك شرف انت.. ماتخاف على خواتك من كلام الناااس.. بس فالح تسمع الأشاعات وتنقلها,.,,

ويرفع يدة السوني وبالواير حقها يصير يشلوووط والشباب يحاولو يمسكوه..

وتصيب حبيب شلطه:

ــ اححح وخناقه..

ايمن ماقدر صار يضحك على الصامت من رد فعل حبيب..

الكل يوخر عن مراد.... مره هايج حده..

ماقدر عليه الا نوري كتف اياديه و صار يهدي فيه..

مراد :

ــ بتقول لي ياكلب مين الكلب اللي وصل لك الكلام لو ويش...والله ماباخليك .. صدقني ..

هاني :

ــ ويششششششش بتسوووي يعني..

مراد :

ــ انت تجرأ بس وعاندني.. لأجيب اجلك..

هاني يستفز مراد:

ــ روح بس بابا.. روح...

ويفلت مراد نفسه من نوري ويرجع يهجم على هاني ويدوس ببطنه في القاع.. وكل ماحاولو الشباب يوخروه ابدا مستميت...

اخرتها هاني وهو مفطس والكلام يتقطع وياه من الألم :

ــ ححححسسسسسساااامووووو

هدأ مرااد وفك شويه عن هاني:

ــ حسام.. حسام الـ........ لو واحد غيره

هاني مستغرب من مراد انه عرفه على طول:

ــ ايه حسام الـ.........

مراد:

ــ الـ..... الـ............ لكن اراويه الزفت... خلني بس اتأكد .. والله بيدي بدفنه..

السيد وحبيب خايفين اول مره يشوفو مراد كذا مستميت و معصب ويهدد ويتوعد...

ومهم مستوعبين الكلام اللي سمعوه.. السالفه قويه وفيها اعراض ناس..!!

طلع مراد من الشقه .. وهو طالع ووراه حبيب والسيد

هاني بقهر:

ــ من اشكال حسامووو.. اكيد زيه هالزفت هذا...

السيد سمعه والتفت عليه :

ــ اذا هو زفت ومن اشكاله.. فأنت كذلك.. والا لويه يوصل لك الأخبار..

وطلع..

نوري خلاص وده يمسك هاني ويزنطه بواير السوني... وبقهر:

ــ سودت وجههنا الله يسود وجهك على هالسالفه اللي مادري من وين جايبنها لينا...

هاني:

ــ الشرهه مو عليكم على اللي يجيب ليكم اخبار البلد..

محسن:

ــ طاح حظ دي اخبار ...

وبعد ربع ساعه لما هدأ الوضع شوي..

اتصل هاني في حسام :

ــ انت يازفت ويش عرف مراد فيك..

حسام:

ــ مراد.. أي مراد... لا تقول مراد الـ........

ــ ايه ويش عرفه فيك

حسام وهو منصرع:

ــ هااا.... ابوي.. ابوي يشتغل في شركة ابوه... وكان وياي بالثانوية...

ــ والله انك رحت بستين داهيه منه اجل..

ــ وانا ويش دراني ان من قرادة حظي مراد جارك. وبعدين ويش دخله في الموضوع..؟؟!!

ــ مو هو يعرف واحد من نفس العايله وصديقه الروح بالروح..

ــ ياساتر اما طلع اخو البنيه..

ــ انت صدق سويت شي ..؟؟

ــ لاااااااا انا ماسويت شي لما دريت ان ريحتها فايحه... فضحتها بس..

ــ اشك فيك ياملعون .. والله اني اشك فيك..ترى مرادوه مستميت وان طلع الكلام صدق بيجيب اجلك مالي شغل فيك

ــ روح بس فارقني..

وسكر حسام وهو يفكر في باله:

ــ مرادووه الملعنه خش بالسالفه.. ياااااااااااللله وانا اقول راح الرياض وافتكينا منه ومن لعانته.. ويش هالقراااده...

في امريكا...

ناجي في السفاره... بعد ما ادلى بالمعلومات الشخصيه عنه .. طلبو وسائل اتصال بعائلته..

ناجي ومع الأسف ماكان يحفظ الا رقم البيت ورقم اخوه يوسف ..

لأنه كان دايما يتصل بهم ويتفقد احوالهم... بهالرقمين..

رقم البيت يرن وما احد يرد عليه

ورقم يوسف غير موجود بالخدمه..

احتار ناجي في عمره كيف يتواصل وياهم ويخبرهم انه حي ويستقبلوه برجعته..

وفي نفس الوقت تهوس عليهم...

احد المسؤولين بالسفاره:

ــ لا تقلق ربما غيرو ارقام هواتفهم او منزلهم.. ستعرف ذلك فور وصولك الى هناك.. كن مستعدا لبقية الأجرائات.. سنقوم بترحيلك بعد 3 ايام من الآن...

طلع ناجي لقيصر اللي كان ينتظره برى ..

ناجي :

ــ ثلاث ايام وبرجع للوطن..

قيصر بهدوء:

ــ الله معاك.

ناجي:

ــ مافكرت يعني باللي قلته لك..!؟

قيصر :

ــ الله ييسر لك امورك راح توحشني..

ناجي ابتسم على مضض:

ــ ايه .. على راحتك ياخوي...

وهم راجعين للعياده

لقو سيارة غريبه على باب العياده واقفه....

نزل منها رجال اجنبي وسأله:

ــ هل انت قيصر ؟

ناجي :

ــ مين دا !؟؟؟

الى الملتقى...