بعد العشاء الكل توجه للنوم... في غرفة السيد وحبيب وكاظم ..
السيد : ــ مالاحظتو شي عالعشا.؟
كاظم : ــ صادقوه ساكت ما علق على شي
السيد : ــ هههههه غربلك حاط دوبك ودوبه .. لا .. مراد ويوسف مالاحظتوهم؟
حبيب : ــ مو على بعضهم.. من رجعتهم من برى وخصوصا يوسف شكله صاير له شي..
السيد : ــ حتى مراد ما يضحك من نفس و لا يشاغب عوايده..
حبيب : ــ مايندرى ويش صاير بينهم ..
كاظم قايم من سريره.: ــ مافيه الا الخير ان شالله..

وراح يدور في مخابي بنطلونه المعلق ..
طلع باكيت دخانه و الولاعه وطلع عنهم..
حبيب : ــ نسى حظي ماشرب المرضعه قبل لا ينام..
السيد : ــ الله يهديه مادري متى بيبطل هالعاده ..
طلع كاظم لقى صادق في الصاله منسدح على الجلسه و يقرأ في كتاب..
كاظم في باله : ــ لو دوده لاعت شبدها .. الله يساعدك.. والمشكله كل الكتب اللي يقراها ماليها علاقه بدراسته.. مستر عبقرينو..
دخل الحمام وشغل الهوايه وقعد يدخن..

في غرفة يوسف ومراد.. شفيق كان تعبان مره.. بمجرد انه قعد عالسرير استسلم للنوم..
يوسف يتأمله و يتذكر قصته و المعاناه اللي عاشها ويحس بالحزن على حاله...
التفت لقى مراد غريبه ولأول مره منسدح بدون مايحط السماعات في اذونه..
هدووء..
الا مراد : ــ يوسف..
يوسف مايرد عليه ساكت ..
مراد : ــ ادري بك مو نايم.. بس حبيت اتأسف على الموقف اللي حطيتك فيه اليوم.. تصبح على خير..
يوسف ظل ساكت و ما رد عليه...


عبدالستار في غرفته حاط قدامه كيس فيه ابر جديده فاضيين من الصيدليه ... يتأملهم والأفكار تتزاحم في راسه..
ــ هالأشياء تقطع شكي باليقين.. ليش هالأبر..؟؟ وليش خاشنهم فوق الكبت.. ما يستخدموها الا مرضى السكري وللمستشفيات .. والمدمنين.. يافتحي بتذبحني.. مافيك انت لا سكري ولا غيره.. !!
عبدالستار حاط ايده على راسه ويضرب على خفيف يحس روحه ضايع .. وفتحي حتى وان واجهه متأكد انه راح ينكر..:
ــ مالي الا اسحبك زي الغنمه لمستشفى الأمل و اسوي لك تحاليل ولا هالعذاب..


في شقة نوري و الشله..
محسن : ــ اول مره في حياتي اشوف واحد يسوي رياضه قبل لا ينام
أيمن : ــ لا تنسم عضلاته لازم قبل النوم وبعد النوم..
نوري وهو حامل حديد اثقال في كفه اليمين..يرميها لكفه اليسار:
ــ بتسكتو لا اصك خد واحد واحد فيكم..
محسن : ــ بل .. وحشني مصطفوه ماصار له يومين غايب
نوري : ــ اي والله حلى الشقه فديته..وينهو شان يقعد على ظهري يعورني
ايمن : ــ اففف تزهقو.. .. اقوم انام احسن لي..
نوري : ــ أي والله احسن لك .. مو حاصل لك صطيف تتجاكر وياه..
محسن : ــ إلا وين هانيووه..؟؟
نوري : ــ في الغرفه نايم عفر
محسن طل عليه ورجع يضحك :
ــ منسدح يبربر في الجوال ..
نوري : ــ ايه اعظم من بنيه..
وقفو عند الباب يتصوخو ويش يقول ..
هاني وكان يحش مع اللي يكلمه في واحد بيخطب : ــ ههههههه ايه وتالي ... لا عاد ما اصدق ... عاد هالمجنون مادور يخطب الا بنت هالحسره ... يلعن يوم الحب ياشيخ... وبنت عمته يعني... هههههههههه .. هذا مهرها وهي بنت عمته.. حسباله بيسوي له تخفيض ....... اقول احسن حواجبي شوارع ان قدر ياخذها...... ويه ويبغى ابوها نص راتبها كل شهر.. ويلي اباموت........ هههههههه متأثر بطاش ماطاش.. مسكين شكله بينسحب ...... لا تقول عاد.,.. لا بالله هذا عيشة محقة قشره.. ....... الله لا يبلانا.... وويش الحين حدد متى عقده..... اهاا ما حللو..... خخخ بيشنق روحه ان طلع مافي توافق ....
انا داري..... ايه المهم خبرني التفاصيل بعدين.. ويش بعد صار مِنّيه مناك

محسن فيه ضحكه وكاتمنها ..
نوري يمسح على وجهه بقهر : ــ آآآخ هالمخلوق باشك في رجولته..

ماريا و اماني رجعو البيت ..ووداد وحسن مسوين ليهم استجواب على اللي صار..
حسن : ــ الحمدلله عالسلامه ... انا مافتحت جوالي الا مليون مكالمه من وداد خلعتني .. متأكدين قال بيرجع مايحتاج نروح له...!!؟؟
اماني بهدوء والحزن مبين فيها : ــ هذا قوله والله..
حسن : ــ كثر الله خيره هالعبد الأله رجال وقت الشده ما اخاف عليكم وهو جارنا
ماريا بأبتسامه : ــ ماقصر .. الله يحفظه
وفي بالها: ــ هالأخو يمدح في الكل ويسأل عن الكل الا اخوه..
وداد تطالع في ماريا على جنب : ــ يظل رجال غريب..
حسن : ــ لا انا صراحه ما اعتبره غريب منا وفينا حسبة اخونا.. من ايام المرحومين وهو كل في بيتنا يلعب ويا ماريا ويوسف واخته شهربان .. ما شفنا منه لا عيب ولا مذمه..
ماريا : ــ هههههه تذكر
وفي بالها: ــ يمه زين طراه حس فيني عفر احش فيه في مخي خخخخ
أماني بأبتسامه بارده : ــ مايضحكني شي… كثر شبقاته ويا اخوش يوسف لما يوسف ينقهر منه لويه يمسكش لو يمرجحش ويجي يشتكي عبدالأله عندي.. هالظريفين..
ماريا : ــ جهال ويش فهمنا..
وداد بقهر تضرب ضربات: ــ ايه الجهال تكبر و تكبر الذكريات..
ماريا تطالع وداد على جنب وفي بالها : ــ اووه بدت..
حسن : ــ اقوم انام انا بس .. وراي بكره قعده من الفجر
وداد : ــ اووووف اني مافيني نوووم...
حسن : ــ اسهري ويا خواتي..
ماريا : ــ تصبحووووون على خير وراي مدرسه..
وانسحبت غرفتها..
اماني : ــ بااقر .. باقر حليت واجبك قبل لا تنام..
وانحاشت ورى ماريا ..
وداد بقهر : ــ استرررر .. يعني اني الميته عالسهر وياكم.. رقيه وسبيكه.. مااالت بس
محمد طلع من غرفته : ــ امااااااه
وداد اختلعت ونقزت : ــ أُو صاقعه .. خلعتني ويش تبغى .. مانمت للحين؟؟
ــ قلتي لأبوي عن بكره..؟؟
ــ اوووه نسيت .. غربلك الله ما تذكرني لويه ؟؟
ـ كم مره اذكرش .. بكره الأستاذ مابيدخلني الا اذا جى ابوي..
ــ زين اذلف نام باقوم اقول له..

دخلت وداد لقت حسن منسدح وعلى وشك النوم... ولعت الليت:
ــ بكره مشرف المدرسه يبغاك
ــ أي مدرسه..؟؟ << ماهو في وعيه
ــ مدرسة فرات... اني داريه عنك أي مدرسه.. حمدوه ..
استوعب حسن الموضوع:
ــ تسخري حضرتش .. ويش يبغو...؟
ــ متشابق ويا باقروه و ....
قاطعها بقهر : ــ افففففففففف انا اقدر انام قبل لا يتعكر مزاجي .. هالمنتحس طايح الحظ ما يتعب من الشباق ويا هالفقير المسكين في البيت لاحقنه للمدرسه.. حسبي الله عليه مسود وجهي في كل محل..
ــ لا تسب فيه وباقروه هو اللي مبدي
ــ بذمتش ويش مسوي له ؟
ــ ها.. آآآ << ماقال ليها محمد
تداركت ربكتها:
ــ اهوووه… ولدي مايسوي شي .. ولد اختك متعيلف اكيد
حسن بسخريه: ــ ايه عصفور الجنه وملاك الأرض حمود .. حاشى عليه يسوي شي .. تشه يسوي شي دا!!!...القطوه تاكل عشاه..
ــ اسخر اسخر.. اني اول مره اشوف ابو يسخر على ولده بدل لا يدافع عنه..
ــ والله العدل عدل .. و اللي يمشي سيدا ما احد يتعيلف فيه..
ــ اسكت احسن لي..
ــ وباقر ويش ؟؟.. قالو بعد يبغو ولي امره؟
ــ ويش علي منه اني..
ــ و علّه ان شالله طفي الليت بس...<< وغطى وجهه بالبطانيه...
وداد بتهكم : ــ هذا اللي ماخذينه منك العلايل و السبايب ..




ام مجتبى صار ليها كم يوم هادئه وماتاخذ وتعطي من بعد سالفة بيع البقره مره مفتشله من ابو مجتبى…
وماليها وجه خصوصا بعد ما درت لما وصلت الفلوس لأبو رمزي انه متأسف كان متأمل تكون نور لولده.. و يخبرها ان ابو مجتبى اتصل عليه يخبره انها راح توصل له المبلغ لأنه مايقدر يقوم...
و علمها انه قال لأبو مجتبى عن السالفه و اذا ماعنده مانع دام سدد ديونه يجي ويتقدم ليها رسمي ... بس ابو مجتبى تحجج بدراسة نور بعدها صغيره وفي ثالث ثانوي وراها نسبه ودراسه جامعيه.. ومن هالرد فهم ابو رمزي انه مافيه امل...

حتى لما درت بسالفة مجتبى ولدها …
اماني اللي خبرتها مو هو... مقاطعنها بالمره...
فصارت بينها وبين نفسها تصيح و بنفس الوقت فرحانه انه ماصابه شي ..
حدها بس كل ليله تمرخ رجوله وتلفهم له.. ولا كلمه..

ابو مجتبى قاعد يتأملها وهي تمرخ ... شوي ماشافته
يضحك لحاله ..
ام مجتبى مرتابه منه ودها تساله على ويش الضحك بس لازالت ماليها عين..
ابو مجتبى يرد يضحك بينه وبين نفسه .. ويزفر من قلب :
ــ تذكري ؟؟
ام مجتبى بغت من الله يكلمها.. و بهدوء مرتبك : ــ ويشوو؟؟
ــ يوم انحاش منش ليلة العرس..
ام مجتبى ماقدرت صارت تضحك....:
ــ ايه لما سألك ابوي المرحوم لويه انحشت ويش سوت فيك.. فشلته عن حساب زين ماذبحوني.. الا حضرتك تقول "" >> وتقلد على ابو مجتبى وارتباكه ذيك الليله بطريقه مضحكه:
ــ ويش دراني ويش اسوي وياها يعني ....
ــ ههههههه اصقعش مابغيتي من الله اكلمش قلبتي علي مسخره..فعلا ويش دراني ابو 17 سنه ياهل ديك الحزه اجل الحين ابو 17 كنه ابو 25
ــ يعني اني الضبعه المفتهمه خلف الله علي ام 13 سنه ماعرف كوعي من بوعي...ويش خلاك تذكر؟
ــ مو لأني لما انحشت خبطت في كم ارض و كم محل و انا حافي لين تكسرت عصاقيلي تكسير وتالي مرختيني واول مره احد يمرخني ونفس حالتش الحين مرتبكه وساكته ولا حس
ام مجتبى تضرب ساق ابو مجتبى على خفيف وهي مستحيه : ــ استح عاد...
ابو مجتبى يضحك عليها : ــ ايييه.. رحم الله ديك ايام.. كانت خاليه من الهموم و المشاكل ..
وبهمس : ــ لا تعودي تتصرفي من وراي في شي .. لا بيكون حسابش اعسر من هالشكل..
ام مجتبى وقلبها يصافق : ــ ان شالله .. حاشى علي اعودها..
ــ امرخي اجل عدل.. يللا...