وصل لسيارة مراد ...
مراد مسند لحيته عالدركسون من شاف يوسف استانس وانتبه للرجال اللي يمشي وراه وشكله المريب ..
شوي الا بصرخة يوسف فيه: ــ والله ان ظليت وراي راح ابلغ الهيأه عنك..
الرجال وقف وبأستياء: ــ وش بلاك يا بزر .. انت الخسران...

مراد فهم السالفه فتح الباب وصرخ في الرجال :
ــ هييييييه يا جحلط >> جحلط كلمه نجديه تعني المتسكع في الشوارع بلا فايده اللي ما يخاف على سمعته ولا يهمه كلام الناس عليه.. عديم المنفعه زي مانقول حنا صايع..

الرجال : ــ انا جحلط ..!! وش عندك .. تبي شي ؟؟ تدري .. انت تنفع بعد.. ورى ما تقنع خويك ..
مراد ما مسك عمره ... هجوووم على الرجال .. وعطاه ضربه فلته عالأرض ..
تجمعو شباب بعضهم يمسكو مراد ويوسف يحاول وياهم يهديه.. وبعضهم تصفيق و تشجيع عالعركه..
مراد : ــ تفوو على امثالك يا خايس <<< عذرا عالمصطلحات.. بس لزوم شخصية مراد

يوسف ومراد ركبو السياره.. ومشو...
الرجال مسك شماغه و هو يمسح الدم من على بوزه بعد بقس مراد العنيف ..
طلع جواله وسجل رقم سيارة مراد..


في امريكا ... الشرطه لازالت تبحث عن موقع جون اللي كان مركد كل عمليات النصب و هادئ لين يستتب الأمن بعد سالفة جويل الأخيره..
جون يضرب ايده عالطاوله ويصرخ في ستيف :
ــ اين سام .. هذا ليس وقت التسكع في الشوارع ونحن الآن في بداية الفجر .. والشرطة تبحث عنا في كل مكان
ستيف وهو ميت خوف : ــ لا اعلم سيدي .. لقد ترك المكان من اول الليل
مارك بصوت هادئ : ــ لن تأتي المصائب لنا الا بسببه .. ذلك الطفل عديم المسؤوليه..
ستيف في باله : ــ يال حقدك يا مارك...

ستيف يحاول يتصل على سام.. جوال سام صامت ولا يرد..
سام نايم مع قيصر .. اللي ما غفت عيونه... ويفكر في سام وكيف ممكن يساعده...



مراد ويوسف وصلو العماره الا شفيق توه نازل من التاكسي ..
يوسف بفرح ::
ــ هلاااا شفيق..
شفيق ابتسم ومستانس بهاللقاء الحار اللي ماكان يتوقعه:
ــ هلا فيك يوسف ..
ــ الحمدلله على سلامتك ماتشوف شر ... ان شالله الحين احسن..
ــ الحمدلله .. ويش دراك؟؟
ــ مصطفى قال لي..
شفيق وبريبه ..: ــ ويش قال لك فيني << خايف لا مهدي علم مصطفى باللي فيه بالضبط مايبغى احد يدري
يوسف ابتسم : ــ لا بس قال لي فقر دم حاد..
ويضرب ظهر شفيق : ــ عاااد ياخووك اهتم بروحك اكثر و اكل ..
شفيق ارتاح ويفكر ان الشباب ما درو بحقيقته..
مراد : ــ هلا شفيق .. الحمدلله على سلامتك..
شفيق ورده ماكان بحماس مثل مارد على يوسف : ــ هلا .. الله يسلمك..
مراد استاء.. حس بالفرق في المعامله.. حاول يسوي روحه ما حس..
ركبو الشقه.. الا حبيب رافع ثوبه للركبه وملوتنه على خصره .. << ثوب بيت
ودايس على فوطه مبلوله وقاعد يتمشى فيها عالبلاط >> مو فارشين الشقه كلها ..
وقاعد يغني : ــ عالبساطه البساطه .. ياعيني عالبطاطااا..
ومسح قايم رايح وجاي..

انتبه لشفيق :
ــ هلاااا شفيق وسهلاااا حي الله ابو الشباب

الكل قام يسلم على شفيق
شفيق مستغرب ومستانس ماتوقع ابدا هالترحيب ..!!

والكل يسأل عن اخباره.. ماعدا صادق ما احد علمه عن سالفة شفيق ولا يدري به..
فصاير ترحيبه عادي حده كيف الحال والحمدلله عالسلامه..

شفيق بيدخل حس بالرطوبه عالأرض وكان لابس ثوب .. رفع ثوبه لفوق لا يصيبه ماي
حبيب ابتسم : ــ ماي هذا شفيق .. نظيف .. لاتخاف
شفيق ابتسم لحبيب ابتسامه بارده وظل رافع ثوبه لين وصل للزوليه وقعد..
السيد يهمس لحبيب : ــ انت تقول ماي هو لا .. لا تنسى حالته..
حبيب : ــ بس كنت ابغى اطمنه..

مراد وهو رافع الكيس : ــ شبااااب جبت ليكم عشااا
كاظم نط من الغرفه : ــ وووو.. أي خُدا.. أي خُدااا .. ميت جوع انا .. ويش جبت..
مراد : ــ معجنات ومشويات .. ومقبلات..
السيد : ــ ما شالله كفارة الغدا يعني ..
مراد : ــ خخخخخخ ايه.. يللا غسلو
حبيب : ــ دقيقه بس باوصل للمطبخ..

السيد انتبه لملامح يوسف فيه شي ... فقرر بعد العشا يقعد وياه يشوف ويش فيه بالضبط..


عبدالستار في غرفة فتحي الوقت اول الليل ... فتحي توه قاعد من النوم وطلع..
عبدالستار ينبش في اغراضه وضع فتحي مو عاجبنه ابدا..
عفس الدنيا فوق وتحت...
ام عبدالستار دخلت عليه : ــ ويش تسوي ؟؟
عبدالستار اختلع : ــ هاا.. ادور على جواز فتحي... << كان يدور عالجواز و اشياء ثانيه شاك فيها..
ام عبدالستار : ــ جوازه عندي سبقتك..قلت له يعطيني اياه .. ماعطاني اياه الا بفلوس هالنحيس.. والله هالفتحي وضعه مو عاجبني
عبدالستار في باله : ــ الله يستر على ويش صرفهم هالفلوس... ؟؟!!
ام عبدالستار : ــ عاد ياولدي اذا فيه شي تدري به عنه علمني .. كلمه خله يركد شوي عن الصرف صاير مو طبيعي...
عبدالستار يحاول يطمن امه : ــ ان شالله مافيه الا الخير هو بس يسهر واجد و لا يشتغل زي الخلق .. ماعليه اكلمه لش ...

طلعت ام عبدالستار من الغرفه..
عبدالستار ظل يدور .. يدور مالقى شي ..
وهو طالع من الغرفه لفت نظره .........
الى الملتقى..