غربة الأوطــــــــــــــــــان...

[أمل الظهور]

مااااااااااانيييي كتبت رد طويل عريض وجى علتي وانا اسوي تحديد والون ويمسح ياربي


بجي بعدين اعيدهم

[أحبك ياغلا عمري]

جزء حلووووووووووووووو
ننتظر الجزء الجديد

[أمل الظهور]

بااااك




حمد لله على سلامة مراد وطلع من الشر



ومن طيبته سامح يوسف بسهوله <كف


مرادوه صارت فضيحته بجلاجل مسكين كله من صادقوه وهانيوه


ام عبد الستار ياويلي عليها طلعت تكسر الخاطر <<< اول مره



ربي يرجع له ذاكرته ويصحى من الغيبوبه ويخطب ازدهار >سطار


وشوو كمااان ..



العصابه وهم متشابكين كانهم صحيح فيلم اجنبي خخخ


بس ربي يستر لايتوهق قيصر وسام معاهم ويرجع سام لاهله ويفرحون بوجوده



اخيرا قرينا هالبارت نشفت ريقنا عليه من امس المغرب


يسلموو اموره يعطيك الف عافيه

[Princess]

مرحبــــــــــــــــــــــــــــــــاااا
كل عام وانتم بخيررر
ومتباركين بمولد النورين..
وربي يخليكم ولا يحرمني منكم
ومن هالتواجد اللي اعجز اوصف شعوري واني اقرى تعليقاتكم و توقعاتكم الحلوه
من جد لو بارد على وحده وحده فيكم ما بيسع المتصفح من شكري وامتناني وتقديري..

تفضلوو هدية المولد
..

[Princess]

بعد 4 ايام ...



في الباص ... من الرياض الى الشرقيه..

كاظم راجع بيشوف سالفة الوصيه ... يوسف قرر ينزل وياه من زمان مانزل وبيشوف اخوه يدبر له جوال بدل اللي انسرق ...

كاظم:

ــ كم يوم ناوي تقعد هناك ؟؟

يوسف :

ــ مادري افكر نص اسبوع.. من زمان ماشفت اهلي..وبنفس الوقت ابغى ارجع بالسرعه على شان مراد..

ــ اما انا في المشمش اقعد يومين على بعض.. اشوف بس ويش السالفه وبس اخلص برجع.. اذاكر في الشقه مع الشباب ارحم... معور قلبي مرادوو...

ــ ويش اقول انا.. دي 3 ايام حالي مو حال مانى متصور السمستر الجاي وهو مو ويانا بالسكن..وعاد وين .. لندن مره وحده... الله يغربل اللي كان السبب كيف وصل الخبر لأبووه..

ــ الحين ويش بالضبط خلاص بس يخلص هالسمستر وبيسفره يدرس في لندن على حسابه؟

ــ ايه هذي نظرية ابوه على قولته .. مو واثق فيه ولو هبب في لندن ولا احد يدري ولا يهبب في البلد وينفضح..وان رفض بيقطع عنه المصروف وبيفلس من الجهتين لا الرياض ولا لندن..

ــ الله يكون بعونه مانى متخيل هاللي صار للحين.. مسكين والله.. لو احس عندي مكان كان اخذته وياي يغير جو في هالأجازه..

ــ تصدق حتى انا فكرت بهالشي بس بيتنا صغير وما ابغى مرت اخوي تتلاسن لو تضايق اخوي بشي من طرفي.. عاد تسميها دي اجازه.. ؟؟ بريك نذاكر فيه الأختبارات اللي بتكرفنا الأسبوع الجاي.. الشقه تظل احسن للمذاكره من الهياته و تجمعات الأهل والأصحاب..

ــ ايه .. على قولك... الا مايندرى ويش اخبار شفيق..

ــ الله العالم من انسرق جوالي وانا مادري عن احد

ــ عاد هو الله يهديه ما احد عنده رقمه الا انت..

ــ لا ومصطفى اتوقع بعد عنده..

ــ صحيح .. غريبه والله

ــ ما استغرب .. لأن مصطفى حباب وخفيف دم

كاظم يطالع يوسف بنص عيون:

ــ يعني احنا الكريهين ثقال الدم

ــ ههههههههه.. لا والله مو قصدي..

ــ تندل بيتهم انت؟

ــ ايه .. ليش نسيت موقعه؟

ــ انا محل اذا رحته مره وحده مستحيل اذكر وين يكون لو يسألوني عنه..

ــ استر عليك ماتنفع سواق..

ــ الله يخليك هذانا في الديره اسوق وين باروح يعني..

ــ يـــــــــاساتر عليك..





آخر يوم في الدوام بالمدرسه الثانويه قبل اجازتهم للمذاكره..

قررو البنات يتجمعو في بيت ابو مجتبى.. فكل وحده حملت معاها لبسه على شان على طول يروحو هناك...

انتبهت ريماس للأكياس عند شهربان و ماريا .. ان فيهم ثياب...

واستغلت كونهم طالعين وقت الفسحه.. ودخلت الصف ..

[Princess]

غاده تدور بالساحه على نور وشهربان وماريا مهي شايفتنهم.. فتوقعت انهم في صفهم.. فراحت تشوف..

ريماس فتحت كيس ماريا... وشافت الثياب اللي فيه..

صارت تقلب في البلوزه والبنطلون..

وابتسمت بخبث وفي بالها :

ــ هه.. اباشوف وين ناويه تروحي ياحلوه..

حاولت تطويهم على نفس وضعيتهم... وهي بتطويهم طاح من مخبى البنطلون سوار ..

شالته ...

ــ شكلي اخلي هذا دليل ... اراويش حق تعرفي مره ثانيه تشوفي نفسش علي يالزباله..

و التفتت بتطلع الا تشوف غاده قدامها ... غاده طبعا شافت كل شي سوته ريماس..

ريماس خافت..

ــ غادوه.. قسم بالله ولا كلمه تقوليها تفهمي .. لا تعرفي ويش باسوي فيش

غاده مختلعه من اسلوب ريماس الهجومي:

ــ ويش .. ويش بتسوي..؟؟

ــ حسام.. باخليه يتركش..

غاده: ــ والله اذا كنتي ناويه على اذية ماريا.. طقاق يطق حسام..

ريماس بخباثه:

ــ طقاق ها.. ان ماخليته يفضحش بكبر الديره.. صبري ..

غاده اتسعت عيونها وشوي يوقف قلبها...

ــ يفضحني !! ويش بتخليه يسوي؟؟؟

ــ والله ياحلوه زي ماعرفتش عليه اقدر اعرفه على غيرش .. و اخليه يرميش زباله وفوق هالشي اقدر اخليه يفضحش و ينشر مقاطع الفيديو حقتش في كل مكان..

ــ مقاطع فيديو؟ أي مقاطع

ريماس ترفع حاجبها بخباثه:

ــ كذبي عاد وقولي مافتحتي له الكام بالماسنجر ولا مره .. وماشافش ولا مره غير الا شافش مره بالبيجاما ومره متعدله لزواج ومره بسبورت خساره بس مسويه روحش محتشمه على الطل عرض ازياء تسوي له ويا وجهش ..

غاده خلاص حست روحها بتموت حسام يقول لريماس كل شي...

ريماس : ــ صحيح ماشاف شي خطير ..... بس تعرفي التقنيات ويش تسووي..

واتوقع سمعتي كيف الواحد ياخذ صورة من فيديو ويقدر يركبها على أي شي صح لو لا

غاده حست الدنيا تدور بها...وبصوت مخنوق:

ــ ريماس.. من صجش هالكلام..

ريماس بتطلع من الصف وهي محمقه:

ــ اييييييه من صجي .. اذا شفتش قلتي لماريا أي شي من اللي سويته

ــ زين لويه انتين سويتي كذا..؟؟ ويش عندش؟ لويه شفتي ثيابها.. تبغي تشوفيهم قولي ليها ببساطه.. ولويه ماخذه الأسوار..

ــ قالو لش مصفعه على خلاقينها حق اقول ليها باشوفهم لو باموت على خراخشينها على شان اخذهم.. .. وبعدين ويش ابغى في اللي سويته مو شغلش..

وحطت صبعها على خد غاده:

ــ باي ياحلوه.. وقد اعذر من انذر..

غاده خلاص مهي قادره تشيلها رجولها..

قعدت على طاوله من طاولات الصف .. وهي تتنفس بالقوه.. وتفكر في بالها..

ــ ويش اسووي .. ويش هالورطه.. ويش تبغى ريماس من ماريا... ولويه هالتهديد..

غطت وجهها بكفوفها ولا شعوريا صارت تصيح..

الا جرس الفسحه يعلن نهايتها..

صارت تحاول تمسح دموعها بالسرعه..

الا بدخلة ماريا وشهربان ونور..

نور : ــ ويش فيش غاده...

ماريا : ــ يؤ تصيحي؟ على ويه..

شهربان : ــ يوووو.. ويش صاير ولويه في صفنا قاعده وحنا تحت بالساحه..

غاده وبصوت يتقطع :

ــ ما.. ماشفتكم..

وانخرطت في نوبة صياح

البنات مستغربين منها ويش فيها بالضبط؟

شهربان:

ــ ياعلي غادو لا تقولي على شان ماشفتينا جيتي هنا وقعدتي تصيحي

نور تفلص شهربان :

ــ ههههه بلا سخريه يانحيسه..

ماريا:

ــ صدق غاده ويش فيش.؟

وصارو يهدو فيها..

غاده:

ــ تعبانه .. احس بطني يعورني..

والتفتت على نور:

ــ شكلي ماباجي وياكم اليوم.. اعذروني

مسكت نور ايد غاده..

ــ قومي الحين نروح صفنا وان شالله يبرى بطنش..

وطلعو رايحين صفهم الأدبي..

ريماس واقفه على باب الصف وتطالع الموقف ..

ابتسمت ابتساماتها المعهوده وفي بالها: ــ ايه كذا تعجبيني..

شهربان : ــ ماصدق عوار بطن.. غادو ماتفوت جلسه لو يزورها عزرائيل

ماريا تضرب شهربان : ــ حشا اللهم ادفع البلا هههههه نحيسه عليش تشبيهات تجيب الهم..

بهدوء: ــ بس بيني وبينش صحيح ماصدق اني بعد ...

شهربان : ــ اني اللي ماني قادره اصدق سالفة عبدالستار...هههههههه

ماريا : ــ غربلش كل ساعه تذكريها.. بس الحمدلله الغيبوبه فادته يومين وهو بلا وعي...

ويومين استعاد في خلالهم الذاكره.. سبحان الله

شهربان وهي ماسكه بطنها: ــ اجل يوم الله قومه بالسلامه ويبغى يتذكر ماذكر أي شي ولا أي احد الا ضربة المقلى من ازدهار..

وتكمل كلامها بحماس : ــ ذكيه ازدهار يوم جابت المقلى وياها المستشفى .. وراوته اياه.. ماقلتي لينا كيف خطرت على بالها هالفكره..؟؟

ماريا: ــ كانت مع وداد وامها .. في بيتنا.. لما شافت امهم تصيح وتقول مو راضي يتذكر شي .. وشوي ماشافوها الا تبغى المقلى اللي فلعته به... وعلى طول فهمو عليها ويش بتسوي...

شهربان: ــ هههههه عاد اللي ما استوعبته في السالفه انكم عودتو مشهد يوم الفلعه انتين وياها بالمستشفى.. اتخيل العالم تسمعكم ..ويش بتقول

ماريا: ــ خخخخ هو احنا ماصارخنا وقلعنا الوديان بصوتنا... بس يعني مثلنا آخر مشهد مر عليه

شهربان وهي تحرك حواجبها: ــ حلاته ينعاد وانتين بداك المريووول وبلا عباه....

ماريا : ـ كفففففففف هذا اللي نااااااااقص

شهربان : ـ خلاص خلاص .. بس عيدي حركة ازدهار...

وقفت ماريا..: ــ هههه .. نحيسه..

ومسكت دفتر :

ــ ازدهار هاللون واني اصرخ بصوت نزيل .. رجاااال.. رجاال... ماسكه المقلى .. وتلوح به.. وعلى راااسه

وتضرب راس شهربان على خفيف بالدفتر

شهربان : ــ نفس الخفه ضربته بالمقلى للمره الثانيه..هههههههههههههه اتخيله قال عنكم مجانين...

ماريا: ــ هو من شاف المقلى بينزل فوق راسه غطاه بكفوفه وصرخ صرخه صروعنا .. تالي حسيناه انبهت وتغير حالته.. وشوي الا يكلم كل واحد بأسمه..

شهربان : ــ يــــــــــــــــالله... رهيب المشهد... تصدقي عاد عجبتني اني هالأزدهار خخخ ماحسها تناسب مرت اخوش ودادو.. بس تدري قصة رومنسيه.. هذي ينقال ليها حُب المقلى

و ضمت كفوفها: ــ الله وناااااااااسه الموقف خياااالي ولا في الأفلام...

ماريا : ــ حسبي الله عليش.. استحي عاد..

ومسكت الدفتر وكفخت راسها به الا بدخلة استاذة زكيه.. وبأبتسامه عريضه:

ــ هاااااا شبيكن ... السلام عليكن..

البنات كلهم فتحو عيونهم والفرحه مهي سايعتنهم...

ــ عليكم السلاااام ..

واللي تقول : ــ اخيرا استاذه مابغينا نشوووفش من دي 3 ايام من قالو اني بترجعي لينااا...

استاذه زكيه بأبتسامه:

ــ ايه.. كان عندي شوية امور قلت لازم اصفيها قبل لا ارجع الكم.. المهم شخباركم وش مسووين في الماده.. ان شالله ما اهملتوها.. السبت بنطيكم اختبار باللي اخذتوه

البنات : ــ اوووو... استاذه مابنجي

زكيه: ــ مو على كيفكم باقي الكم 3 دروس على نهاية المنهج ولازم اختبركم .. الحمدلله العربي خلصتوه و الأنجليزي .. راح اخذهم بدل..

البنات: ــ اووو..

زكيه وهي تمسح السبوره تلتفت عليكم:

ــ ولك ما اشتقتو لي..

وحده من البنات بأبتسامه عريضه:

ــ اشتقنااا لش بس ما اشتقنا للكيميا..

استاذه زكيه : ــ اللي اشتاقت لي بتشتاق لمادتي.. يللا يابنات شهلو خلونا نخلص ..

شهربان بهمس :

ــ مايندرى ويش اللي غيبها 3 ايام

ماريا : ــ على ما تثبت برائتها ويرجعو اوراقها وملفاتها وكل شي يخصها بعد الفصل..عند نور الخبر اليقين

شهربان: ــ ماني قادره على نورو في ادبي وتموت على استاذه زكيه كان دخلت علمي...

ــ ههههه ظريفه يكفي علمتها في سنة اولى.. وبعدين خبرش في نورو ماتطيق لا الفيزيا ولا الرياضيات..

ــ المهم ابغى التفاصيل اني اليوم ذكريني اقول لنورو تقصها كل يوم انسى بالمدرسه وانتين تلفون ما تحبي تكلمي

ــ ماحد قال لش تغيبي يومين

ــ ويش اسوي ظروف ياخيه ظروف .. المشكله اني استحي ادق بيتهم نورو ما احد يرفع التلفون الا يا اخوها يا ابوها من صاقعه..

ماريا : ــ زيييييين وصاقعه سكتي لا تهدر علينا الأستاذه..

[Princess]

في امريكا...

الدكتور يكلم قيصر :

ــ على مايبدو ان صديقك هذا ستطول غيبوبته... لقد مضت قرابة 3 ايام وهو على هذه الحاله..

قيصر:

ــ ما تأثير تلك الغيبوبه على وظائف الدماغ الحيويه؟

ــ لا يوجد تأثير يشير الى أي دلاله سيئه على حالته... اعتقد انه اذا استيقظ سيكون بحال افضل..ولربما يستعيد ذاكرته...فما جرى عليه من صدمات كفيل بأن يعيدها اليه..

طلع الدكتور من الغرفه.. الا بدخلة احد عناصر التحري على قيصر:

ــ مرحبا.. الم يستيقظ؟؟

قيصر :

ــ اهلا بك .... لا مازال على حاله.. تفضل بالجلوس ..

ــ المشكله لدينا اننا ننتظر استيقاظه ليدلي بما يعرفه عن تلك العصابه وسبب تواجدهم معه ولماذا ارادو قتله.. لأننا لم نجد أي دليل او ملف اتهامات سابق عليه..حتى بعد الأشتباه به ورصد تحركاته..

قيصر تذكر جويل بس سكت.. وحاول يداري عالموضوع وكأنه مايعرف شي : ــ لا اعتقد انه له علاقة قريبه بتلك العصابه.... ربما وان وجد أي شيء ضده فلربما كان استغلالا له ولضياعه وانعدام حيلته.. حيث لا يوجد مايثبت هويته ولا من أي بلد هو..!!

ــ هذه المشكله .. الم تستطع التعرف عليه من خلال لهجته من أي بلد عربي هو؟ لنرى قائمة المفقودين اذا تم التبليغ عنهم عند السفاره ..

قيصر : ــ لا لم استطع ان اجزم على وجه التحديد من أي بلد.. بداية اعتقدت انه عراقي مثلي .. ولكني بعدها صرت اشك في كونه سعوديا او بحرينيا..

ــ ايعني ذلك ان نبحث في كلا السفارتين هنا...؟؟؟

قيصر : ــ اعتقد .. لربما تتوصلون لشيء ما..

ــ حسنا شكرا لك.. تأكد من الأتصال بنا.. فور استيقاظه..

قيصر: ــ حسنا لكم ذلك..

وطلع التحري ..

قيصر يمسح على شعر سام وبهدوء:

ــ ولك شقد تحملت التعب ياصاحبي... شقد الناس تحبك.. اخ لو تدري ان الزلم مات فدوى الك.. شنو راح يصير لك... الله يقومك بالسلامه و تذكر ذكرياتك وتنسى كل اللي جرى بيك من بعد ما نسيتها...

في غرفة التحقيق ..

كف على وجه مارك...

المحقق:

ــ تكلم .. والا سيزيد سكوتك من سوء وضعك.. من اللذي امرك بالقتل؟

مارك وهو مربوط وعلى الكرسي:

ــ كل .. كل ما اعرفه قد قلته..

ــ كيف لي ان اصدقك.. انت هنا تكذب .. وزعيمك اقدم على طعن نفسه والأنتحار قبل ان نأخذ اقواله ذالك المعتوه..

مارك صار يصيح :
ــ لست انا .. بل سام..سام يعرف كل شيء...

المفتش بعصبيه يصرخ فيه:

ــ اصمت .. من الأمس وانت تلصق التهم في شخص بلا هويه وعلى مايبدو انه مختطف من قبلكم و تم استغلاله.. وفوق هذا وذاك لا يوجد أي دليل يدينه .. وانت اطنان من الأدله عليك وعلى زعيمك اخرها عملية قتل المدعو ستيفن باراك من عصابتكم ..

ــ لم اكن.. لم اكن اقصد قتل ستيف..

الا يعاجله كف ثاني:

ــ لم تكن تقصد ستيف .. بل كنت تقصد سام.. النتيجه واحده.. في كلا الحالتين انها عملية قتل.. سواء كان المغدور سام ام ستيفن... تكلم هيا و اعترف ببقية العمليات التي قمتم بها وبشركائكم فيها ...

ويكبو عليه ماي بارد مررره ..

مارك بشهقه:

ــ سأعترف .. سأعترف..... فريدرك نيكولاس ..هو من حرضني على عملية القتل... لبناني يحمل الجنسية الأمريكيه...

ــ ومادوافعه من ذلك؟

ــ بسبب احتيال سام على اخته ...

ــ هاااقد الى ذكر سام.. مابالك الا تعرف احد تلقي عليه التهم غيره؟ كيف لشخص لم يتواجد في ملفات الوكاله الفيدراليه .. ولا أي شي ضده .. ان يكون فردا في عصابتكم..؟؟

ــ لقد .. لقد كان فردا سريا.. لم يمضي على وجوده بيننا سوى عامين.. لم تتم الا 3 عمليات على يديه اكثرها ربحا كانت مع جويل

ــ ولو اني لا استطيع ان اصدق كلامك الغير منطقي هذا.. ولكن من هي جويل ؟

ــ اخت.. فريدريك نيكولاس...

المحقق:

ــ مممممممم فريدريك و جويل نيكولاس... ايها الحارس .. اطلب من التحري ان يجمع معلومات عن هذين الشخص..

وبعد ربع ساعه.. وصلو الأوراق

[Princess]

المحقق على طاولة التحقيق وقباله مارك وهو مره دايخ ابتسم بسخريه:

ــ فريدريك .. عضو في منظمه سريه عالميه مختصه بتهريب المخدرات.. انه احد المشبوهين المطاردين من قبل الوكاله اختفى لمدة اربع سنوات... و اخيرا قد ظهر..

ويقلب الورقه. ويضحك بسخريه اعظم:

ــ جويل .. تزوير ماركات عالمية مشهوره .. وبيعها بنفس السعر..ههههههههه اكاد لا اصدق انهم اتوا بين يدي اخيرا... كيف لي ان اترك تلك الأدله عليهم واصدق كلامك.. بالتأكيد دافع فريدرك من القتل ليس اخته وحسب لربما يملك سام دليلا ضده ..

ويقوم ويروح ورى مارك ويمسكه من شعره ويسحبه على ورى .. وينزل قريب اذونه ويهمس له:

ــ لذا من الأفضل لك ان تقر وتعترف بكل شيء..

مارك ودموعه تصب :

ــ اسأل توم.. اسأله عن سام فهو الذي جلبه الينا.. وسيثبت كلامي..

ــ توم... تقصد ذاك العجوز توماس رامون .. حسنا... ايها الجندي استدعي ذلك العجوز الى هنا..

ودخلو توم على المحقق وقعدوه على كرسي قريب من مارك..

وصار المفتش يدور حوالين توم..

ــ اعلم واننا لم نمارس عليك اساليب التعذيب لأنك اعترفت بما لديك اولا.. ولكبر سنك ثانيا.. ولكن لم تذكر لنا في اعترافاتك شخصا يدعى سام.. ومارك هذا يؤكد انك تعرفه..

توم بهدوء:

ــ نعم اعرفه..

مارك ابتسم بفرح والتفتت للمفتش:

ــ أرأيت.. أرأيت إنني لا اكذب..

المفتش :

ــ اصمت.. اكمل يا رامون .. مالذي تعرفه عنه؟

توم :

ــ كان صديقا لأبني في السكن ومقربا منه كثيرا وكان يعمل في احد الشركات الكبيره هنا في حين كان ابني طالبا بالجامعه.. في ولاية فلوريدا..

مارك يطالع في توم مو فاهم ويش اللي يقوله...

توم يكمل:

ــ كان على حسب كلام ابني انسانا عظيما و ذو اخلاق عاليه لم اجد مثيله رفيقا لأبني فلقد ابعده عن كل رفاق السوء الذين كان يقضي ايامه معهم و اعتنى بدراسته فأرتفع معدله بشكل ملحوظ بعد ان كن آيسا منه وكنت متوقعا منه ان يترك دراسته الجامعيه في أي لحظه.. وانا الذي بذلت الغال والنفيس لأجل التحاقه بها و علقت عليه الآمال..

سكت توم شوي وملامحه تغيرت..

المحقق:

ــ اكمل !

توم والكلام يتقطع تقطيع:

ــ ولكن بعد حدوث اعصار كاترينا .. غرق ابني .. وتوفي .. ولقيت سام مغمى عليه .. فأخذته عندي.. وقررت ان اتبناه عوضا عن ابني خصوصا بعد معرفتي بفقدان ذاكرته واعتباره من ضحايا الأعصار ليفقد اهله بذلك امل عودته اليهم..

المحقق فتح عيونه:

ــ عودته اليهم؟؟ اتعني انك كنت تعرفه جيدا من أين يكون هل هذا يعني ان سام ليس اسمه الحقيقي؟؟

توم :

ــ نعم... فهو ناجي الـ ......... مسلم.. و سعودي الجنسيه...

المحقق بدهشه:

ــ هذه قضية جديده.. تعتبر بمثابة الأختطاف والتستر والتزوير .. عدة قضايا مختلطه .. !!

توم :

ــ اعترف بذلك واتقبل أي عقاب سيحل بي.. فأنا وبعد ان قررت ان اتبناه.. ولسوء الوضع المعيشي وسماعي للزعيم جون وحاجته لعضو سري .. قمت بتقديمه اليه.. ولم يكن لديه أي مفر من ذلك.. فبمجرد دخوله يعتبر خروجه امرا مستحيلا ومن يجرأ على ذلك فالقتل مصيره !!

المحقق مندهش:

ــ اووو .. هاقد انظم الأستغلال و الاستعباد الى القضايا السابقه.. !!

ويلتفت لمارك:

ــ مارأيك بهذه الأعترافات وهذه الأدله يا سيد مارك

مارك فاتح عيونه ويحس نفسه شوي وينفجر من القهر

ولا شافوه الا يضرب راسه بحافة الطاوله

مره ومرتين وثلاث

المحقق صرخ فيه:

ــ هييييه ايها المجنووون..

ويجو الحراس يمسكووه.. وهو مستمر بالأنفعال والمقاومه.. خذوه وسحبوه ورموه في سجن انفرادي..

المحقق يكلم توم:

ــ الآن.. هل تستطيع ان تدلي بأقوالك هذه امام المحكمة .. و هل تملك جواز سفر ناجي.؟؟

توم: ــ نعم مستعد للأدلاء ولكن الجواز قد ضاع من الأعصار..

ــ اذن ليس هنالك حل سوى السفاره لنرى كيف يمكننا الأتصال بأهله.. مالم تعود له ذاكرته.. لكن لماذا لم تخبرنا عنه مسبقا..

ــ لقد عرفت ان لادليل ضده فلماذا اذكره واجلب لنفسي قضايا اخرى ..

ــ يالك من وغد .. عالأقل اعترفت و لديك امانه... وذلك سيخفف عنك العقوبه!!

في بيت ابو مجتبى..الشله متجمعين.وغاده فعلا اعتذرت وما حضرت وياهم..

. ونور تعيد السالفه لشهربان...

شهربان...:

ــ والله من يومين ما تصروعتو لما سمعتو بالمكيرفون وحنا بالحصه المديره تعلن ان استاذه زكيه بريئه من التهم الموجهه ليها و انها بترجع للمدرسه...

ماريا: ــ عاد ماقاهرني في السالفه شي الا لويه ماشهرو برملوو السخيفه دي ..

نور : ــ قلت لش المديره عاقله.. قالت لرملووه واستاذة زكيه.. كل وحده فيكم ادت يمين المهنه.. وانها بتأدي واجبها على اكمل وجه.. وهاليمين كل وحده فيكم وضميرها.. سواء حافظت عليه لو نقضته...

شهربان بحماس : ـ إيــــــــــــــــه... وتالي !!؟؟

نور : ــ حطت قرآن كبير قدامهم.. وقالت ليهم.. الله حسيب رقيب .. كل وحده تحط يمينها عالقرآن وتحلف انها بريئه من كل تهمه منسوبه ليها.. وتقسم بالله على هالكلام... والقرآن شاهد عليها راح يكون يوم القيامه.. ان كانت تشدب..

شهربان : ـ اهااا.. يعني وطلع عندها حبتين ضمير واحساس وخوف من الله هالست رمله وخافت تقسم عالقرآن...

نور : ــ لاااا اسمعي بس اللي صار ... هي استاذة زكيه على طول حطت ايدها ووجهها مايخفي أي كذب .. وقسمت وماقالت غير الحق.. وحتى رمله حطت ايدها لكن يوم جت بتقسم.. وجهها بين عليه .. وعيونها وشوي تصيح ولونها مخطوووف تقولي احد خالعنها لو مرعوبه من شي .. ينعرف ...

ماريا: ــ اييييه ولكنها قسمت بالأخير ام الصواريخ

شهربان متصروعه : ــ حرررريقه تحرق ذمتها الوسيعه..!!

نور : ــ ومع ذلك بين عليها الكذب .. فتخيلو ويش قالت المديره؟..

شهربان : ــ لا تقولي .. سالفة جهاز كشف الكذب اللي سمعت بها.. صحيحه ايه ماعليه هين هين..

ماريا صارت تدحن ضحك..

نور : ــ هههههه حظي انتين وياها.. والله فيه جهاز كذا.. المديره هددت فيه وقالت بتوصل السالفه للمحكمه والكاذبه فيهم بيكشفها الجهاز..

ماريا: ـ بل بل .. صدق عااااد... كيف دا.. اكيد اختراع ياباني..

نور : ــ والله بالضبط مادري كيف يكون.. بس اللي اعرفه انه صحيح موجود ويستخدم للمجرمين ..

ماريا: ــ اموت واعرف كيف!!

شهربان : ــ لا تموتي ولا شي... الليله قاعده عالنت و مسويه بحث عن جهاز كشف الكذب واجيب لش التفاصيل... << اللي ماتعرفه تسوي زي شهربان ;)

نور : ــ المهم رملو تعرف هالجهاز .. فخافت على عمرها تصير فضيحتها بجلاجل... ماشفناها الا بهدوء تأسفت..

شهربان : ــ يصقعهاااااا ماخافت من ربهااا خافت من الفضايح..

نور : ـ استاذه زكيه بعدها طلبت من المديره تعلن خبر برائتها ولما سمعت رمله بالهكلام خافت ان ينقال كلام ضدها ايضا .. فصارت تترجى استاذه زكيه انها ما تعلم عليها...

ماريا تكمل السالفه : ــ طبعا استاذه زكيه طيبه اكيد تنازلت..

شهربان : ــ وصاقعه لو اني ما اتنااازل

نور : ــ تنازلت ليها بشرط قوي .. انها تستقيل من المدرسه وتشوف ليها مدرسه ثانيه ماتبغى تشوف رقعة وجهها..

ماريا : ــ و الحين مع الأسف بتنتقل بسمومها لبنات ثانين مع انها المفروووض تنفصل

نور: ــ ولكن لأن عندها دعم قوي من الوزاره.. وورائها ظهر يسندها

شهربان: ــ عساه ينكسررر..

ماريا : ــ فإنها نفذت بجلدها .. تلك الملعونه..

شهربان ونور : ــ هههههههههه

نور: ــ بس وقفت وياي مرت اخوووي خووش وقفه لولاها ماقدرت اتكلم ولا كلمه

ماريا تدق صدرها: ــ اختي .. تعجبش افا عليش

[Princess]

نور تبحلس عليها: ــ لو ماتعجبنا ماخذناها لأخوووي

شهربان تفلت كلام : ــ اخذي الفانيه بعد

ماريا تعطيها نظره..

شهربان : ــ يماااه.. اساسا لو يسمعني اخوي قصبني..

نور : ــ الا على طاري اخوش ويش الحين

شهربان : ــ محتار على عمره..عطوه مهله 3 شهور يفكر...

نور:

ــ اوه من قده يقولو له يفكر بعد..

شهربان :

ــ مو لو وافق مابيرجع الا بعد 3 سنوات وامي حازبه وحاطه الهم في الفكر على هالسالفه ...وغير ان البيت بيفضى مافيه رجال ..بس هالشي مقدور عليه خالي الصغير بيسكن ويانا..

نور : ــ اهاااا ....هي ويش بالضبط الشركه اللي قدم عليها وطلع فيها اسمه

ــ شركه في فنزويلا جديده المالك يقولو سعودي ويشجع نظام السعوده بس خارج البلاد

بياخذهم وبيعطيهم كورس سنه.. وبعدها بيشغلهم براتب عالي .. بس مافيه رجعه الا بعد 3 سنوات .. سنه دراسه وسنتين تطبيق .. وبعدها يقدر ياخذ اجازه..

ــ بـــــــــل الله يساعدكم.. حنا اخوي احمد ويالله افتكينا من غربة دراسته..بس الحمدلله طلع بفايده قويه و دخلنا امير مدرسه خاصه..

شهربان:

ــ حركاااات.. الحمدلله...

وشوي صارتوتضرب ضربات بكلامها:

ــ ايه.. مو اخوي ينتظر متى نتخرج.. يبغى يعرس على قوله قبل لا يسافر

نور : ــ ويش دخل تخرجش

شهربان تأشر بعيونها على ماريا..

نور : ــ اهااا.. اذا رجع.. لويه العجله

شهربان: ــ خايف تطير بأرزاقها العصافير..

نور وشهربان التفتو ناحية ماريا

اللي كانت فاهمه عليهم..:

ــ اني من رايي يروح يشوف مستقبله احسن له والله يرزقه بعدها ببنت الحلال اللي تسعده

نور :

ــ بل..

شهربان فهمت ان هذا رفض بطريقه غير مباشره فسكتت ماباليد حيله !!

بالمستشفى .. مع عبدالستار...

عبدالستار يطالع في امه اللي ماشالت عيونها عنه وفي بالها تجول الأفكار..

ــ سمعني يوم افضفض لو ماسمعني... لااا شكله ماسمعني لو سمعني كان بينت ردة فعله..

عبدالستار:

ــ والحين ويش آخر المستجدات في قضية فتحي؟؟

وداد:

ــ أبد... الله يكون بالعون.. كل شي ضده وخلاص ثابته عليه التهم.. وفي انتظار امر المحكمه على شان العقوبه..

عبدالستار:

ـ لااا .. لازم نوكل له محامي..شوفو احسن واحد وانا بتكفل بأتعابه

ام عبدالستار الدموع في عيونها محتقنه وهي عارفه ويش تقول...

الا بدخلة حسن عليهم.... من شاف وداد وامها موجودين طلع..

عبدالستار يكلم وداد:

ــ ويش فيه رجلش .. صراحه بدون ماتزعلي من يجي وانتين هنا ينحاش

وداد مختلعه:

ــ يؤ .. والله ماسويت له شي.. ويش درااني .. يمكن يبغانا ناخذ راحتنا وياك

عبدالستار:

ــ تاخذو راحتكم من أي ناحيه.. اقول قومي الحقي عليه شوفيه ويش فيه

حسن برى قاعد على كراسي الأنتظار .. وبكفينه ضاغط على راسه:

ــ مو قادر اشوفها.. مو قادر بعد اللي سمعته منها.. ياترى عبدالستار لو يدري بها ويش قالت له وهو مو في وعيه.. ويش بيكون موقفه... آآآه ياصاحبي مادري ليش هموم الدنيا كلها فوق راسك.. الله يغير حالك و يطمن بالك...

الا وداد :

ــ ويش فيك قاعد هنا

حسن نقز من الخلعه..

وداد : ــ بسم الله ويش فيك اختلعت

حسن عصب:

ــ خلعتيني ويش فيني بعد؟

ــ ويش مسويه فيك اني؟

ــ ويش ؟

ــ عبدالستار يقول من تجي واني هنا تنحاش

ــ اقول.. اللي يدري مبروك عليه انه يدري.. واللي مايدري رجاء لا من عنده يفتي

ــ يعني ويه.؟

ــ يعني اخذي امش اذا ماعندكم سالفه وتيسري وياها عندي سالفه ويا عبدالستار

ــ يؤيؤ ويش هالسالفه اللي ماتنقاااال قدامنا ؟!!..

ــ اقول .. انا اللي باروح احسن..

ــ على كيفك..

ــ يصقعش من مرأه...

وطلع من المستشفى...

رجعت وداد للغرفه..

عبدالستار بهدوء:

ــ الا اقول خيه.. دي صاحبتش من وين؟

ــ من الـ ........ لويه؟؟

ــ بس كذا اسال..

ــ ترى مهي متزوجه..

عبدالستار وملامح وجهه تغيرت:

ــ ويش قصدش؟

ــ يعني اذا عجبتك لو شي .. شان تفك اسرك شوي..

ام عبدالستار ولأول مره بحنان تحط ايدها على صدر عبدالستار:

ــ ايه ياولدي شد عمرك واي شي في بالك ودك يصير مالك الا طيب الخاطر

عبدالستار ونبضاته تتسارع.. وفي باله...

ــ بعد اللي سمعته.. مانى داري كيف للحين هادئ و مابين لي أي رد فعل.. والحين حتى لو بابين رد فعل مابقدر اذا هذا راح يكون حالش وياي.. بنتظرش متى بتقولي هالشي قدامي.. وانا في وعيي.. بنتظرش اماه..

في بيت حسن..

يوسف قبل لا يدخل البيت شاف على عروة الباب كيس .. فتحه الا داخله سوار بناتي..

استغرب منه.. قال يمكن دي حركات فرات لو وحده من حريم البيت ناسيتنه في محل وجابه جاهل واستحى يدخل..

دخل الصاله..

ــ ياهووو.. اين انتم..

هدووء لا مجيب..

حسن .. بعده مايوصل البيت

وداد في المستشفى مع عبدالستار وولادها ودتهم لأماني ..

ماريا مع شلتها

تلفون البيت يرن..

يوسف رفع السماعه...

ــ الووو..

في امريكا...

الممرضات يقعدو قيصر المنسدح على كراسي الأنتظار.. ويبشروه ان سام صحى من النوم

قيصر يركض لسام..

ومن يشوفه وهو صاحي ياخذه بالأحضان..

ــ الحمدلله على سلامتك حبيبي سامي... اخيرا صحيت..

سام وهو مستغرب وبتساؤل :

ــ من انت؟ ومين سامي ؟؟!

يوسف في بيتهم.. يصارخ في المتصل:

ــ مين انت ياحيوااان.....

تقفل الخط

رمى يوسف السماعه..ورفع السوار وهو يطالع فيه ..

يترجف ومبهووت من اللي سمعه...!!

الى الملتقى...

[أموله]

(= ... مراحب ,ـ،
///
سـآآم،، واعليا عليكّ مسكينّ ،.. اهمّ شي لاياخذوّ الشرطهّ!!..
ستيفّ" كفووّ واللهّ خوشّ صاحبّ بس ّ ياربّ ماماتّ )=
.. يوسفّ"_| مستفقلهّ دمهّ آنـآّ مدريّ ليهّ .!!...
مرادّ ": اخيرااّ ظهر ّ الحقّ!!... (=،،نظلم بقوهّـــــــ،ـ،
عبدّ الستّار :" يؤؤؤؤؤؤؤؤؤؤؤؤؤّ يتيمّ مسكينّ!!.. يتيتمّ... كسرّ خاطريّ المفلوعّ بالمقلىىّ ... <p=
ام عبدّ الستّـأر ": اييّ رضيتّ عنهاّ بس بعدهاّ باطهّ شبديّ...< (:
حسنّ ": ههههههههههّ نكتهّ مع قصايدّ احمدّ مطرّ نكتتتهّ ،،"..××
قيصرّ/:: زينّ سووىّ لحقّ سامّ ولا شانّ ماتّ اللحين!!.ّ
ابو مجتبىىّ :" ههههههههههههههههههههههههّ حركاتّ هربّ ليلةّ عرسهّ نكته هههههههههههههههّ مسكينهّ ام مجتبىىّ

اميرهّ جزءّ قميلّ ومثيرّ واكشنّ وشسمهّ كل شيّ ،،!
يخبلّ,, حويووّ وقميلّ ويصيحّ ويضحككّ ويخوفّ .. < ×(
.. مو غريبهّ عليكّ امورهّ مبدعهّ دومـَأّ
يعطيكّ العافيهّ تسلمّ اناملكّ .،:

[أموله]

الله كتبتيّ بارتّ بقراهّ < انتظريني (=

[أموله]

يؤؤّ احسسّ المتصصصلّ من طرفّ ريماسووه يتبللىىّ علىّ مارياّ!!...
ريماسووو سخييييييييييييييفهّ حمارهّ ... ثقيلةّ دمّ!!.. لزقهّ *.*
يووسفّ انشالله مايصدقّ المتصصلّ. ..
ساميّ ويلي ّ الحمدّ لله ّ اشووووووووووووووووووووووووووووووووووووأّ .. هههههّ
...^_^... عبد الستارّ .. اي ّ خلهّ يستناهاّ لينّ ماتقولهّ@.!
مرادّ مسكينّ بيروحّ لندن!!ّ؟؟ احسهّ بيكونّ وحيد ):
....^_^.. اميرهّ جزءءّ حلووّ ^.*

[دمعة على السطور]

اللهم صل وسلم على محمد وآل محمد وعجل فرجهم وفرجنا بهم ياكريم وألعن من آذى فاطمة ..

علي علي علي عليييييييييي >>متفاعلة ويا الأحداث الساخنة

قبل كل شي متباركيييين غناتي وايامكم سعيدة يااارب...

ياعلي هذا يوسف ماجى إلا في هالوقت ....المتصل اكيييييد من طرف ريماسووو وقام يقووول ان ماريا كانت وياااه ونست هالاسوااار ....
ياعلي استغفر الله يرموها في عرضها وهي ياغافلين لكم الله ......>>>تتخيل وتصدق تخيلها ....

هيييييييييييييييييية و سام رجعت له الذاااكرة ونسى كل شي صار له يوم فقد الذاكرة ...

هيييييييية واستاذة زكية رجعت ورملة هالأذية طااارت وجعلها إن شاء الله للمقبرة ...

وعبد الستار عور قلبي ...يعرف كل شي وساكت وصابر..الله يكون بعووونه :(

اممم شكله من نصيب ازدهااار اقصد هي من نصيبه >>كلا واااحد ...فكيها

الله ينتقم من هالريماااااااااااس ..من جد خلتني اطلع من طوووري ودي ازنطها على هالفعايل وش هالنفسية المريضة اللي عندها....!!

>>ماعليه اعذروني الليلة مووولد واني مستااانسة واجي اشووف الأحداث وانفعل لازم تظهر نغمات الفرررح وعلامات الانفعال يختلطوووا هنااا....

ويحدث تصادم في المشاعر والحروووف

مراد ماااافي يسااافر.........!! لاتسفريه أميييييييرة.....

عجبتني قفزة الأحداث ....والحكاية للقارئ على لسان أحد شخصيات القصة كان جداً مميز ماشاء الله .....

اممم وشو بعد اللي ماتكلمت عنه>>اقول اخلصي هدرتي بما فيه الكفاية ..

وشوو هالأحداث ياأمووور ...تفاعلت بقووووة وياهم .....يعطيك العافية حبابة

وربي يسلم فكرك ياااارب...

مشتاااقة اقرأ الجديد ...متى ..!!.>>>صدقت... شافتش كتبتي بفترات متقاربة... تفكر كل يوم كذا

مووووفقة يالغالية بحق محمد وصادق آل محمد..

دمتِ بعين الاله...ولتحوطكِ ألطاف الطهر..

[بلسم جروحي]

اللهم صلِ على محمد وال محمد
متباركه بالمولد
وكل عام وانتم بخير
البارت كان حماااس
عبد الستار حمد لله رجعت ليه الذاكره هع وشكله بياخد ازدهار الله يبارك ليهم هع
سام بعد صحى من الغيبوبه ونسمع عن قريب عودته الى اهله
جويل بعد والله طلعت ماهي قليلة تزور الماركات
مارك بقووس وماي باررد في هالحال واردى
رمله تستاهل الي صار فيها
زكيه انتصرت وظهر الحق انها بريئه
عجبني جهاز كشف الكذب هههه ماعرفه يبغى لي اسوي بحث مثل شهربان
ام عبد الستار واخيرا تعدل اسلوبها مع عبد الستار
يؤ سوار ماريا اكيد من ريماسوه مدبره السالفه
وغاده شكلها مابتعترف بشي الي شافته بتخاف من تهديد ريماسووه
يالله اميره لاتتاخري علينا بنتظار البارت ..
موفقه ..

[looovely]

ســـــــــــــلااااااااااام..
ما شاء الله ..اللهم صلي على محمد وآل محمد
مُبـــــــدعة.. كما عهدناك ..مُــــــبدعة بكل مافي الكلمة من معنى
توني اكتشف الرواية>>أكتشاف عظيم
الزحمة وقلة دخولي..يمنعي عن جديد الشبكة
بس بجد وأني اقرا الحوار اعيش أحداث الرواية وكأنما شخصياتها تمثل أمامي
وهذا أن دل أنما يدل على دقتك في الكتابة وتمكنك منها
حاولت اقرا ما استطيع اليوم وسأكمل في الغد
زغللت عيوني..من الساعة اربع واني متربعة في المتصفح هع
كلما قلت هذا آخر بارت والباقي بعدين..ماتقصري فينا أميرة..تنهي البارت بالتشويق
ذكرني بمسلسل برزن بريك..كلما قلت هذي آخر حلقة أرد أحط حلقة جديدة
لكن لي لقاء جديد..لأكون من المتابعين
وأبرز شخصيه عجبتني حبيبوووه..بصراحة خفيف دم واحسه مره يونس
وبشكل عام شلة الرياض كلها احليوووه..لأن دائماً يكون فيها أحداث مشيقة وضحك ووناسة
ادخل معاهم جوا..لأنهم زي حالتي خخخخخخ..واعليا واعلى حالي متغربه:( ..يمكن عشان كذا عشت بين أحداثهم:)
طبعاً في ناسات ماعجبوني..زي ودادوه..هداااااااااويش..وش هالمرت الأخو البلشه
الله لا تبلانا يارب..يادافع البلا ياكافي الشر..الساااااااااانها متبري منها
الله يستر من الجاي بعد
يعطيك ربي الف عافيه عالمجهود..تستحقي الشكر من الأعماق
فـ شكراً لفكرك..وأناملك التي رسمت حروفها على هذا المتصفح..فجتمعا معاً ليرسمو البسمة على شفتي كل زائر
فـ لتحفك رعاية الله وحفظه