غربة الأوطــــــــــــــــــان...

**Princess** · 04-02-2010, 03:08 PM

شوي الا يسمع قيصر صوت رجال يناديه... التفت له لقى زوج اخته وجنبه واقفه اخته ...

وكل واحد توجه للثاني وبالأحضان .. وصارت زكيه تصيح وهي تمسح على راسه ووجهه وبعتب:
ــ 10 سنين ياخوي ما نشوفك .. والله لو ما الرسايل والصور اللي تراسلني بيها ما اعرفتك.. يــــــــالله شقد اتغيرت ...ناجي يراقبهم من بعيد ويحس قلبه ينبض بالقوه من الفرح لقيصر ومن خوفه من لقائه هو بأهله..قيصر بعد السلام التفت لناجي ونادى عليه..
ــ هاي رفيجي بالغربه.. ناجي علي آلزوج زكيه يسلم عليهزكيه من سمعت الأسم.. خطرت على بالها ماريا .. نفس الأسم..
ناجي:
ــ اوكي اترككم الحين انا.. قيصر ..بيننا ان شالله اتصال
ــ ان شالله عزيزي.. الله يفرح اهلك بشوفتك .. طمني بعد ما تشوفهم وعلمني شصار عليك
ــ ان شالله.. مع السلامه

وتركهم ..وبالسياره زكيه سألت قيصر :ــ تعرف كل اشي عنه ؟
ــ مثل شنو؟
ــ عنده اخت اسمها ماريا..؟؟
ــ ايه مره كلمني عنها وقال انها الزغيره و اخت ثانيه ﭽـبيرة اسمها اماني اذا ما خانتني الذاكره
ابتسمت زكيه:ــ يعني اخوها فعلا .. غريبه
ــ شنو الغريب في الموضوع؟ تعرفين خواته.؟
ــ بلي اعرف ماريا .. ادرسها بالثالث الثانوي هالسا.. ما شالله عليها بنت و النعم فيها...ــ مثل اخوها إطلعت عليه ..
ــ بس الغريبه انها ما تكلمت عنه بشي مع اني ذكرت كم مره و ذكرت غربتك.. ﭽم بنت قالت ان عندهم اخوان و اقارب بالغربه الا هي ما ذكرت شي
ــ ايييه ياخيتي ما تنلام يوم ما تذكر شي .. هالناجي حكايته حكايه.
ــ ليش شنو حكايته..
ــ آني اخبرﭺ...

وصار قيصر يحكي لزكيه سالفة ناجي....
ناجي بالمطار محتار في عمره .. ظل ساعتين وهو يفكر هل يروح بيتهم الحين ..
والا يقعد في المطار للصباح .. خايف يروح ويخلعهم بهالفجر وهم نايمين.. خايف يروح وما يحصلهم اصلا...!!
وبين ماهو يمشي بالمطار ومحتار في امرهالا نداء للمسافرين الى فنزويلا .. ان الرحله قريبه بعد ربع ساعه التفت عبدالأله والنوم في عيونه يحس نفسه نعسان.. يطالع لوحة الرحلات الرقميه بالمطار هو نزل عيونه الا يجي نظره ناحية ناجي اللي كان يمشي وبيطلع..عبدالإله مو مستوعب الموضوع صار يفرك عيونه,... ويتأمل في ناجي ومو مصدق ..هز راسه بالسرعه ..
ــ لااا.. اكيد يتهيأ لي .. من النعس..حس قلبه يرقع بالسرعه لما تذكر ماريا.. صار يسلي روحه ويصبرها:
ــ انا الظاهر من هالماريا قمت اتخيل اشياء عجيبه..التفت يدور ناجي بين المسافرين., مالقاه اختفى...

حمل اغراضه ومشى في حاله الى الطائرة....

ماريا .. وباقي على اذان الفجر ساعه وعن حساب الكل نايم...
وهي مو جاينها نوم بعد سالفة غاده واعترافاتها... طلعت من غرفتها .. طلت على ولاد اخوها لقتهم نايمين.. شوي تسمع صوت بالمجلس .. يوسف يكلم مراد جوال و حسب اللي فهمته من كلامه انه مراد ضرب حسام ويوسف قاعد يحذر فيه وينبهه ينتبه لروحه لا يرسل له حسام احد يتولاه و يآذيه....
صارت تتذكر مراد بالمجلس وشلون كان شهم و راعي اخلاق عاليه وشلون كان مصدقنها اكثر من حسن اخوها وكيف مضحي بروحه بس يدافع عنها وعن شرفها وكيف يحب يوسف و مستعد يسوي أي شي على شانه..
ابتسمت وطلعت برى الحوش..
وهي برى الحوش تشم شوية هوا.. الا بطلعة يوسف هو الآخر
ــ بسم الله خلعتيني .. ما نمتي ؟
ــ لا مو جايني نوم... ويش فيه مراد؟
ــ لا .. مافيه شي بس متصل يقول لي ويش سوى..
ــ اهااا..
انتبه يوسف لكيس زباله مرمي في الحوش فشاله بيطلعه برى..
وهو راجع بيدخل البيت .. ناجي انتبه له وكان بالتاكسي قريب يوصل ..
وبالسرعه وصل ونزل الا يوسف دخل وسكر الباب وراه
ناجي وقف عالباب وقلبه يراقع ميت من القلق والخوف وكيف بيقابلهم وخايف عليهم من الصدمه
طق الجرس . جرسهم محترق ما فتحو له..
صار يطق في الباب
يوسف مع ماريا لازالو في الحوش...
ماريا اختلعت:
ــ اسمع صوت الباب ينطق..
يوسف:
ــ ويش .؟ مين مافيه احد الشارع يوم اطلع
شوي يزيد الطق...
يوسف :
ــ أي والله... مين دا اللي جاي هالحزه..
يوسف خاف جى على باله مراد لا يكون حسام حد عليه ناس يضربوه وجاي يلتجي عنده.. او احد من طرف حسام وجاي البيت..
يوسف :
ــ ادخلي داخل اباشوف مين...
ماريا دخلت المجلس ووقفت ورى النافذه تراقب ...
وقف يوسف عند الباب .. مد ايده والتخامين تتزاحم في راسه يا ترى مين وراه..!
فتحه... وتسمر مكانه ..
ناجي واقف قدامه...!!!!!
ناجي بأبتسامه و اغراضه عالأرض فرد ذراعينه ليوسف ...
ــ يوسف .. ويش حالك ياخوووي
يوسف مرتبك صار يرجع على ورى وهو فاتح عيونه..
ــ نننننااجي !
ناجي دخل الحوش وهو يتأمله:
ــ يالله والله كنت خايف اجي وما القاكم
يوسف بعده مصدوم..
ماريا داخل في المجلس تركز النظر على اللي دخل .. فتحت عيونها...
وبخوف :
ــ ننااااجججي.. هذاا .. نااااججييي !!
ولا تشوفه الا هو ويوسف بالأحضان
يوسف يشد عليه ويضرب فيه على ظهره وبلا شعور صار يصييح:
ــ وصلنا خبر انك متت.. و رسلو لينا بقايا اغراضك اللي شافوهم بعد الأعصار... فقدنا الأمل سنتين وهذي الثالثه .. وتطلع حي .. انت حي.. آآآآآه مانى مصدق الحمدلله.. الحمدلله ياااااربي لك الحمد...
ماريا وهي متصروعه طلعت من باب المجلس الداخلي الى غرفة اخوها حسن وصارت تشدخ في الباب...
قام حسن وهو معصب .. ووداد تتحمق على الأزعاج..
فتح الباب وصرخ في ماريا:
ــ ويش عندش بعد..
ماريا و الكلام يتقطع تقطيع وهي تأشر برى الحوش:
ــ ننناااجي .. ناجي ناجي..
حسن مو مستوعب ويش تقول ..
ــ ناجي.. أي ناجي.؟ لايكون اخوش؟ خرفتي شكلش .... فارقي غرفتش لا اطيح فيش دست بهالفجريه
وداد قامت :
ــ ويش تقول دي .. ماريوه الظاهر فيش شي .؟ ويش مرضش بالضبط اللي وصلش لحالة هلوسه

الا باب الصاله ينفتح ويدخل يوسف ووراه ناجي..
حسن من شافه تبلعم وصار يحك عيونه مو مصدق ..
وداد انصرعت دخلت الغرفه بالسرعه ولبست مشمر وطلعت تطل مين دا وويش صاير
ماريا تنحب وهي مهي مصدقه :
ــ اخوووي .. قلت لك ناااجي ...
ناجي فرد ذراعه ليها.:
ــ تعالي خيه.. تعالي
..
راحت له ماريا وارتمت بحضنه وصارت تنحب نحيب.. وهو يهدي فيها و يطالع في حسن اللي لازال مو مصدق .. وبلا شعور وعفويه صار يفرك في وجهه وعيونه ... حق يصحصح...
وبهدوء تقرب منه :
ــ ناجي.. انت فعلا ناجي..
ناجي بأبتسامه وهو يرتجف:
ــ ايه يا خوي.. انا ناجي يابو محمد..
حسن انهار....
يوسف بالسرعه مسكه وقعده عالكنب .. وقعد ناجي على ركبه قدامه وايده على ركب حسن:
ــ انا ناجي ياخوي.. رجعت مافيني أي شر .. رجعت ليكم بالسلامه
حسن حضن راس اخوه وصار يصيح وهو يحمد الله ويشكره ويحس نفسه مو مستوعب الموقف
وداد وهي متغطيه تمسح دموعها.. :
ــ الحمدلله عالسلامه ناجي..
ــ هلا الله يسلمش مرت اخوي .. عساكم بخير..
ــ بخير وين كنت وويش صار عليك ولويه قالو انك ميت..
ناجي صار يحكي ليهم اللي صار له في امريكا من بعد الأعصار...

اذن اذان الفجر....
وفي بيت عبدالستار...
عبدالستار كان في غرفته غرقان بالتفكير .. يفكر في حقيقة جنسيته.. وهل يروح سوريا والا لا.. هل يلتقي بأهله الحقيقين لو يسكت وينسى السالفه ... اخذته الأفكار ... خلص الأذان .. وبعد ربع ساعه انتبه لروحه...
طلع من غرفته بيتمسح ...
مر على غرفة امه لقى بابها مفتوح شوي وقف وراه يسمعها وهي تصيح وقاعده على سجادتها ..
حس عليها اكيد تصيح على شانه... هي من بعد ما قالت له الحقيقه بلسانها ومن بعد ما اكتشف حقيقة اصله و خبرها بهالشي وهي متضايقه و عايشة بالذنب ..

اصدر صوت متعمد... انتبهت له.. مسحت دموعها ومسكت المسباح تسبح فيه..
قعد جنبها ..
مقابل القبله...
تنهد... وبهدوء..
ــ لو قالو لي اهلك هم جيرانك.. مارحت ليهم.. كيف سوريا !!
وقفت ام عبدالستار عن التسبيح... صارت ساكته... وما التفتت له وقلبها تحسه يراقع..
عبدالستار بهدوء:
ــ قالو الأم مو اللي ولدت.. الأم اللي ربت... معقوله بعد 30 سنه اروح لناس بحياتهم ماشافوني واقول ليهم انا ولدكم ! لو اترك ناس تربيت معاهم من طفولتي لشبابي ... لا والله ما اسويها وانا مخير..
ام عبدالستار ماهي عارفه ويش تقول ... الدموع احتقنت في عيونها..
عبدالستار يتنهد وبأبتسامه ويرفع راسه يطالع السقف ..
ــ الا اذا عاد ما تبغوني ... و حابين اني ارجع لأصلي هذا شي ثاني..

ما خلص عبدالستار جملته الا امه استدارت له وطوقته بأياديها.... وصارت تصيح من قلب :
ــ لا والله الود ودي ما تروح عني أي مكان..
عبد الستار متفاجأ من تصرفها...
سكتت شوي ... وبعد تنهيده من الأعماق كملت كلامها:
ــ مهما قاسيت الويل مني ومهما فضلت اخوانك عليك.. مهما آذيتك ومهما سويت فيك... تظل لك مكانه في قلبي .. وما ارضى عليك... الله يعلم بي يوم صارت وياك سالفة ابرار شقد تكدرت عليك.. الله يعلم شكثر تمنيتك تنساها و تعيش حياتك مع غيرها... وياما وياما لحيت عليك تاخذ غيرها.. مو على شان تتركني و افتك منك حاشا والله.. بس كنت حابه تكون جنبك انسانه تسعدك.. تنسيك العذاب اللي عشته في حضني .. تنسيك الضيم اللي سقيتك اياه.. تعطيك الحنان و تحسسك بالحب و الأمان.. وتكون لك لوحدك.. ما يشاركك في حبها احد.. ولا تهتم في احد غيرك... ولا تفضل احد عليك... و...

عبدالستار نكس راسه يقاطع امه و يبدي يصيح وياها :
ــ ادري .. والله ادري ... و الله الوحيد العالم شقد انا احبكم كلكم.. انتين و اخواني .. ولا فكرت في يوم انقلب عليكم.. صحيح قاسيت وعانيت .. صحيح حسيت بالغيره والتفرقه بالمعامله .. بس ظليتو ليكم الأولويه والأهميه في حياتي.. وظليت اسعى لأنال رضاكم و محبتكم... لا تفكري ولا تحاتي ولا تحطي أي شي في بالش ... بتبقي امي وببقى ولدش مهما كان... و الحقيقه اللي عرفتها خلينا ندفنها للأبد.. يكفي اني ولد حلال ويكفيني انكم اهلي ...

و لأول مره .. تطبع ام عبدالستار قبلة رضا و محبه .. دافيه وكلها حنيه على جبين عبدالستار
قبله .. نسته الألم و العذاب.... خلته يبكي بصوت مثل الطفل ...
وبكفوفها صارت تمسح دموع طفلها الكبير ... تبتسم... و تدعو له من الصميم..
ــ ربي يوفقك ولا يحرمني منك.. و يخليك لي على طول...

**Princess** · 04-02-2010, 04:02 PM

مراد .. نام له 4 ساعات.. وصحى .. وعلى اطول راح ليوسف ..

وفي المجلس ...

مراد :

ــ اولا لازم نبلغ الهيئه هنا عن وجود فساد بالمدارس من تحت راس طالبه حق يتخذو الأجرائات المناسبه ويساعدونا ... ثانيا.. نتفق مع الهيئه ان يستخدمونا طعم للبنت انا و انت... وحسام بيكون وسيلة الأتصال .. ثالثا.. حسام بيطلع برى السالفه هو وصديقة اختك .. وعدته هو بهالشي مقابل انه يساعدنا وصديقة اختك لأنه اعترف لي ان ما كان ناوي ابدا انه يخربها ولا يطلع وياها لا هي ولا غيرها بس ماسنجر وتلفون مجرد امضاء وقت وتسليه شكله خايف عليها والله العالم انه تعلق فيها فعلا وناوي يخطبها ... ما استبعد هالشي منه هي صفرية ولقت غطاها.. فخلنا نستر عليهم مقابل المساعده..

يوسف مو عارف كيف يعبر عن مشاعره تجاه هالمساعده العظيمه .. وبهدوء وفي عيونه تبين اللهفه:

ــ زين وهالبنيه حسب اللي اعرفه و سمعته ان ابوها مدعوم و عندها واسطات.. مو بعيده تنقلب السالفه عليك

مراد :

ــ ههههههه لا تجبرني افتخر ...الفخر مو زين .. نسيت انا ولد مين؟

يوسف ابتسم...

مراد طق على صدره:

ــ انا بس اكلم ابوي واطلب منه مساعده يوديها هي وطوايفها ورى الشمس هاللي ماتسوى قليلة التربايه..

يوسف :

ــ زين وشلون بنبدي الخطه..

ــ انا الحين بطلع من عندك وباروح الهيئه وبابلغ عن هالبنيه..

حسام من يوم يومه داهيه اغبر كان يكلمها هي وغيرها برقم بدون اسم فما فيه شي ضده غير الكلام اللي لو حصل له شهود ينقضو صحته يطلع بريء من أي شي ... فهو اللي بيتصل عليها وبيقول ليها انه تعرف على ثنين شباب خلها تشوفهم حق نضبطها...

ــ ههههههه ولويه ثنيننا لويه مو واحد منا..

مراد يسخر:

ــ نرضيها بجميع الأشكال و الأذواق..

ــ ههههههههه اما انك نحيس...

ــ هههههه المهم.. وهالغبره بعد ماتجي في مجمع... حسب اللي اعرفه من حسام أي واحد تبغى تلفت نظره وحست نفسها فشلت وماعطاها وجه.. ما تستحي ابدا انها تكلمه قوية هالعيون ولا بعد تعطيه رقمها.. ساعتها الهيئه بيكونو موجودين و يصيدوها بالجرم المشهود..

ــ لكن كيف ما بتعرف الهيئه اخاف تصير لينا فضيحه بالمجمع

ــ لا الهيئه يعرفو يتصرفو بسرية كامله اذا طلبت منهم . ابوي يعرف ناس وايد وضباط ليهم بهم علاقه عندهم ومسؤولين... وانت شايف بنفسك صارو في مواقف تستدعي انهم ما يظهرو للعلن .. ماتشوفهم الا فجأه طبو عالمشتبه به...

ــ زين واذا انكرت وجابت ادله ملفقه و طلعت من السالفه ؟

ــ الهيئه يا خوي مابترحمها.. اكيد بتفتش جوالها وبيشوفو اللي يثبت عليها التهايم و اكيد بيستدعو اهلها.. ولو حصل وفلتت من الهيئه.. مابتفلت من اهلها.. ولو حصل واهلها مستهترين .. قلعتها المهم اختك بنطلعها براءه يعني بنطلعها براءه..

ــ وشلوون عاد بيصير هالشي لو فلتت..!!

ــ الله يخلي وسائل الأعلان.. انترنت وصحافه...

ــ بل ... ويش بتسوي !

ــ اولا مقال ويش طوله بالنت.. اذا ماعندك مانع ينذكر اسم اختك الكامل وحكايتها وانها مظلومه و اقوال حسامووه وصديقة اختك بأسماء مستعاره... و الهيئه ممكن يدعمو المقال بتفاصيل معاينتهم للحادثه و لو احتجنا لأي شي الله يخلي الماديات تسوي الهوايل

ــ نرشيهم يعني ..!!

ــ هههههههه يوسفو غربال انت .. الرشوه ماتصير الا للباطل ولأخفاء الحق.. مو لأظهار الحق و اخفاء الباطل..

ــ اجل لويه الفلوس؟؟؟

ــ ياخوي هالوقت يحتاج الفلوس ... في كل شي .. المهم ننشر المقال بالمواقع ونرسله عالأيميلات.. وابوي يعرف ناس وايد صحفيين يشتغلو بالجرايد وتعرفو الصحافه تحب هالسوالف دي فلو اقول له يساعدنا ما بيمانع ... و ننشرها بكم جريده و تنفضح هالجراره دي و تطلع براءة اختك كأحد الضحايا... ها ويش قلت؟

يوسف ابتسم:

ــ عن نفسي .. مادري .. احس موافق .. بس مادري عن اخواني و اختي راعية القريحه ويش موقفها..

مراد:

ــ المفروض ما احد يرفض .. الحين انتشر اسم اختك ظليمة مع اشاعة فاسده.. ما توافقو تنشروه لأظهار الحق .. مايصير ..

ــ خلاص اجل ما يحتاج اسأل احد خلنا نتكل على الله..

ــ اجل اكلم المنتحس حساموه و ارد لك خبر ..

طلع مراد من عند يوسف .... وكلم حسام اللي رد له الخبر بعد ساعه انه في الليلة الجايه ريماس بتروح المجمع الفلاني وضروري يتواجدو فيه...

مراد سكر من عند حسام واتصل في ابوه خبره بالسالفه بالمختصر .. وطلب منه المساعده..

ابو مراد:

ــ لك اللي تبغى.. و مستعد زي ماقلت اخلي هالبنت السخيفه تروح بستين داهيه.. بس بشرط..

مراد :

ــ ويش ؟

ــ تخلص هالسالفه وتروح لندن على طول لا مجال للرفض

مراد سكت ...

ابو مراد:

ــ ما بتطاوعني .. انسى اساعدك.. وانت عارف وداري مساعدة ابوك كيف تكون..

مراد بهدوء:

ــ ان شالله يبه.. لك اللي تبغاه.. بس ياليت تمهلني لين اخلص هالسمستر اموري في الجامعه و اعمل اجرائات الأنسحاب ...

ــ ايه .. هذا ولدي.. خلاص بس يجي وقتي كلمني وان شالله لك اللي تبغاه..

سكر مراد جواله.. ابتسم بهدوء..

ــ الله يحلها ويفرجها... وتنتهي على خير...

اتصال وصل لهاني ... وهاني كعوايده مع الذهول والدهشه من الخبر المفجع...

سكر وهو منصرع :

ــ تخيلوووووووووووووو.. ابو صااااادق جيراننا فوووق تعرفووه..

نوري :

ــ لا ويش عرفنا به..

هاني:

ــ اقصد صادق اللي تعرفوه... ياحظي

ايمن:

ــ ايه ويش صاااير في ابوه !

ــ اوووووووه.. سالفة شايده ماتنقال...

مصطفى :

ــ ويش بعد.. من سوالفك اللي ماتخلص ..

هاني:

ــ ابوووه افلس .. وذبح امه.. واستخف في مستشفى المجانين الحين...

محسن:

ــ بل .. بل .. ول ول ول ول .. اللهم ادفع عنا البلااااااء ...

نوري :

ــ يـــــــــــالله ويش هالمصيبه...

مصطفى :

ــ ويش الحين حالة صادق اجل..

هاني:

ــ الله العالم .. ابتصل فيه اشوفه..

دق عليه لقى جواله مسكر..

نوري:
ــ غريبه لكن ماسمعنا شي من اللي فوق

ايمن:

ــ يمكن مايدرو..

هاني:

ــ تتوقع يعني مايدرو!

مصطفى :

ــ انا اتوقع لأن الصبح وانا طالع اشتري خبز للفطور شفت حبيب وقال لي انه لحاله ويا السيد بالشقه و ماجاب لي سيرة .. يعني موضوع صادق يستاهل ينقال عالأقل يقول امه ماتت يدري بنا نعرفه و بنتعنى لفاتحتها على شانه..

نوري:

ــ لاااا .. شكلهم فعلا مايدرو.. خلني ابركب اشوفهم..

**Princess** · 04-02-2010, 04:03 PM

طلع نوري وركب للسيد وحبيب ..

طق بابهم.. فتح له السيد:

ــ ياهلا حياك الله تفضل..

دخل نوري .. يحس الوضع طبيعي..

نوري :

ــ كح... ويش اخبار باقي الشباب ما اتصلو صايرين لحالكم .. اكيد وحشوكم..

حبيب:

ــ من ناحية وحشونا.. وحشونا... عاد ولا واحد فيهم له حس لو خبر دي كم يوم..

نوري تأكد انهم مايدرو..

نوري :

ــ توي سامع خبر ..

السيد:

ــ اكييييييييد من هانيووه

نوري:

ــ ايه خبركم وكالتنا الأخباريه العالميه ...بس الخبر يخوف ولا ادري مدى مصداقيته..

حبيب :

ــ ويش بعد.. لا يكون طلعت مو ولد ابوي

السيد ماقدر جت له ضحكه وصار يحاول يكتمها..

نوري :

ــ لا .. يقول ابو صادق قتل امه و استخف..

السيد:

ــ هههههههههههههه دليل الصواريخ العالميه باااين... شلون.. وجدته اصلا متوفيه من سنين.. قال ويه ابو صادق قتل امه

شوي سكت السيد وانتبه للكلام اكثر وفتح عيونه:
ــ وووويش تقوول

حبيب :

ــ انا داري عنك.... حنا سمعنا منه انه فيه مشاكل بين اهله بس هالشي ..؟ ويش تقول نوري

نوري وهو خايف:

ــ انا مادري جيت اقول ليكم اللي سمعته حق تتأكدو وتتطمنو عليه.. حاولنا نتصل به جواله مقفل..

حبيب رفع جواله واتصل :

ــ أي والله.. ياساتر تتوقع يعني صحيح... مالينا الا كااااظموووووووووه البارد نسأله..

اتصل حبيب في كاظم بالسرعه.. رفع كاظم.. الا يسمع حبيب صوت قرايه... درس فاتحه..

فتح عيونه:

ــ كاظموه انت فوين؟

كاظم وصوته تعبان:

ــ في فاتحة ام صادق

حبيب فتح عيونه وصرخ في كاظم صرخه:

ــ ولعنننننننننننه يا الباااارد ياللي مادري ويش اقول عنك.. ولويه ما اتصلت فينا وقلت لينا حق نأدي له الواجب من وين تجيب هالبرود يـــــــــــــــــا من يجيب قالب فلج ويشلخه على مخك...

كاظم انفعل على حبيب:

ــ ماكان فيني مخ ساعتها اكلم احد ولا اتصل على احد .. متصل تشابقني بدل لا تقول معظم ليكم الأجر

حبيب اختلع من حمقة كاظم:

ــ ويش فيك اخوك.. مو قصدي والله.. الله يرحمها و يحسن اليها ويساعدكم.. بس ما توقعنا ما ندري من طرفكم ويوصل لينا الخبر....

كاظم: ــ لأن الموته ماكانت طبيعيه..

ــ ها.. يعني صحيح اللي سمعناه..

ــ ويش ؟

ــ انها مقتوله و ان...

كاظم يقاطع حبيب:

ــ ايه صحيح..

ــ انــــــــــــــا لله وانا اليه لراجعون.. عموما اخوك وين الفاتحه خلنا بننزل نخلف على صادق مايصير بعد..

وعلم كاظم الشباب محل الفاتحه.. واتفقو مع نوري واللي يبغى يروح وياهم انهم ينزلو الليله يباتو في الديره ويرجعو يوم ثاني العصر بعد ما يروحو للفاتحه ...

في الصاله .. مصطفى و محسن جالسين يشاهدو التلفزيون

مصطفى مقهووور حده في هاني واشاعاته وهدرته الماصخه اللي ماتجيب ليهم الا البلاوي

محسن:

ــ ويش فيك مصطفى..

مصطفى :

ــ ولو ان السالفه اللي وصلها هالمره صحيحه بس قاهرني بهالطبع الخايس فيه ماحد سالم منه ومن سوالفه ..

ــ منهو.. هانيوه تقصد..
ــ وفيه غيره ....

ــ تبغى اعاقبه لك بطريقة محترمه..

ــ شلون..

محسن :

ــ ممممممم.. نفشله بطريقه ما .. اما العالم..

ــ كيف !

ــ مممممم.. ممممممممم .. ممممممممممم .. ايواااا .. بسسسس

وفتح محسن جواله.. ركب فيه السماعه.. و حطها في اذون مصطفى..

محسن:

ــ خخخخخخخ اسمع باحطها نغمه لهانيوه وهو مايدري وباخصصها لي نغمه لرقمي الثاني باخزنه بدون ما يدري بأسم ( هكر ) ماهو عنده رقمي الثاني عنده بس رقم .. وبتصل فيه بكره وهو بالفاتحه...

مصطفى من سمع النغمه مات من الضحك:

ــ الله يغربلك يامحسنوووه .. والله انك داهيه.. اباموت ههههههههههههههه اتخيل شكله ساعتها .. والله ام الفشششششششششششله

محسن:

ــ هعهعهعهع يستااااااااااااهل...

وفي اليوم التالي ...

في الفاتحه... بعد ما وصل لمراد ويوسف الخبر ايضا..

تجمعو الشباب في الحسينيه..

وبين ماهم يخلفو على صادق...

دق محسن على هاني ...

ولا يسمعو الناس بالفاتحه الا صوت:

ــ امبااااااااع.. إمئئئئئئئ... مااااااااااء.. بااااااااااااااع...

الكل فتح عيونه.. واللي جت له الضحكه...

هاني صار يضحك ويحاول يكتم ضحكته ويكلم نوري:

ــ مين دا المتخلف اللي نغمته غنم..

مصطفى يحاول يكتم الضحكه ويهمس لمحسن اللي حاط اتصال تلقائي وشغال برقمه الغريب اتصال على هاني..:

ــ محسنوه خلاص بنروح النار الناس في ويش وانت في ويش

ــ خله هالأغبر حركه بسيطه نكاية فيه..

واحد من الموجودين بالفاتحه :

ــ اتمنى صاحب هالنغمه المحترمه.. يحترم اصحاب المصيبه و يسكت جواله..

هاني يدخل عرض :

ــ عاد الله يهديه مادور الا غنم.. خخخخخ استغفر الله.. شباب اللي جواله ياليت فعلا يسكته لأن مصخت السالفه..

محسن خلاص يحس روحه بيضحك .. مو قادر ... صار يكح حق يداري ضحكته..

مصطفى ماقدر .. انسحب من الحسينيه يازعم بيدخل الحمام...

شوي واحد جنب هاني ...

ــ لو سمحت.. الصوت يجي من ناحيتك.. اتوقع انه جوالك..

هاني بأبتسامه عريضه:

ــ لا عااااد.. شدعوه ماعرف نغمتي..

الكل تقريبا صار يطالع بجواله.. والكل متوجه بالنظر على ناحية جلوس هاني

نوري طلع جواله وكذلك ايمن..

ايمن يهمس لنوري :

ــ يادي الفشيله الصوت ناحيتنا و الكل عواينه علينا

نوري يشق حلقه بأبتسامه ويقلب جواله ناحيتهم والغنم لا زال يبنبع ... يراويهم انه مطفي مو هو..

ايمن كذلك بين عليه انه موهو..

نوري يهمس لهاني:

ــ هانيوه يالعله طلع جوالك خلهم يشوفو مو انت

هاني وفيه الضحكه:

ــ اما انك بعد..

هو ماطلعه ولا يشوفه الا يولع ويطفي ورقم غريب والبنبعه على اصول

محسن ماقدر انسحب من الحسينيه هو الآخر بهدوء بدون ماينتبه له احد ...

هاني من الفشيله تقلبت الوانه وكل اللي بالحسينيه عيونهم عليه ..

كاظم بقهر:

ــ يه كياهي .. شرم شرم .... << ماهذا.. يال العاااار !!

صادق يطالع في هاني ومستغرب من اسلوبه الحضاري هذا

هاني خلاص يحس مغص في بطنه وفشيللله.. حطه صامت...

نوري وايمن منصدمين..

ويحسو بالأحراج... فتباعدو عنه شوي..

هاني ماقدر يتحمل النظرات.. العواين كلها عليه بأستياء وانسحب من الحسينيه..