يوسف جاي جهة غرفة اخته ماريا منهار ويحاول يداري دموعه...بعد ماطلب منه مراد يروح يسألها.... هل تعرف أي بنيه في المدرسه مو زينه و ليها حركات مع صبيان أو وخصوصا لو مر عليها اسم حسام.... فتعطيه اسمها يتحرى في امرها ...

ويقف عالباب الا يسمع ماريا تصرخ في غاده وهي تصيح :

ــ وبأي حق تطلع الكلام علي .. وبأي حق تسكتي و تداري .. ليش .. ويش مسووويه فيكم اني!!

غاده و بنياح شديد:

ــ ريماس ماسكه علي اني اكلم حسام و هددتني بتفضحني اذا تكلمت...

ماريا :

ــ لالالا.. ماني مستوعبه الكلام.. شلوون ....

الا باب غرفتها يطق بالقوه ويفتحه يوسف:

ــ يالله يالله...

وبعصبيه و من عيونه يتطاير الشر صرخ في غاده:

ــ قلتي حسااام !

غاده اختلعت وبالسرعه تغطت وهي ترتجف ...

وصارت تزحف ناحية ماريا من الخوف..

يوسف بلا شعور دخل الغرفه و صار يصرخ في غاده:

ــ فسري لي الكلام اللي سمعته .. يعني اختي مطعون بشرفها وكل الكلام اللي انقال عليها ظليمه من طرفش ..

غاده بأنفعال و صياح:

ــ ايه .. بس غصب عني مو مني..

يوسف يصرخ فيها:

ــ غصب عنش ويه.. قومي قدامي ... بالسرعه قومي..

غاده تتمسك في ماريا وهي وراها.. وميته خوف:

ــ وين.. وين اروووح...

يوسف :

ــ ماريا البسي عباتش والحقيني المجلس وياها بالسرعه...

وطلع عنهم المجلس ..

ماريا وقلبها شوي و بيطلع من الخوف والصدمه و هالموقف ..

وخرت عنها غاده وهي تحس نفسها مو مشتهيه تطالع في وجهها...

لبست عباتها وبهدوء:

ــ امشي وياي..



في المجلس ..

مراد:

ــ ويش صار ... ويش هالصريخ !

يوسف :

ــ شوي وبتعرف ..

الا يسمع يوسف صوت اخته اماني بالصاله جايه تشوف ماريا وتتطمن عليها..

و تتلاقى بماريا وغاده طالعين من الغرفه بعباياتهم..

اماني مختلعه من شكلهم وحالتهم .. :

ــ وين بتروحو؟ وويش فيكم ..؟؟ ويش صاير !!

ماريا :

ــ يوسف يبغانا بالمجلس ..

ــ ويش صاير ! لويه مين في المجلس !

ــ مادري

الا بطلعة يوسف ليهم وشكله هو الآخر يخلع و حالته حاله :

ــ هلا خيه تغطي ودخلي ويانا

اماني:

ــ ويش فيكم.. ويش صاير وقفتو قلبي ! حسن داخل بعد !؟

يوسف :

ــ لا ادخلو الحين انتون وبتعرفو ويش صاير..



دخلو..

مراد اختلع.. ثلاث نسوان داخلين عليه المجلس..

صار يطالع في يوسف ومستغرب منه.. ويش صاير ...!

يوسف بهدوء:

ــ تكلمي يا بنت الناس وقولي اللي عندش

غاده ترتجف و مهي عارفه كيف تتكلم..

يوسف صرخ فيها صرخه:

ــ تكللللمي عيدي الكلام اللي سمعته من شووي

اماني حمقت على يوسف:

ــ لا تصرخ على بنت الناس كذا .. شوي شوي عليها .. وويش تبغاها تقووول؟؟؟

يوسف بأنفعال:

ــ انتين ما تدري عنهااا .. بتتكلمي لوووو ويش !

غاده وهي تتأتأ ..

ــ اني.. اني ...





في بيت ابو صادق ...

ابو صادق بعد ما تحسنت حالته شوي ..تعبان ويهلوس من القهر اللي صايبنه... واقف في المطبخ يشرب ماي...

و يفكر ويش بيسوي بعد ما باع الشركه... وسدد ثلاث ارباع الديون.. ولا يسمع الا ام صادق وراه :

ــ مادورت تبيعها عاد الا على كاظم !

ابو صادق ساكت عنها ومنشغل في همه...

ترجع ام صادق :

ــ ويش بتسوي الحين.. ويش بتشتغل .. وشلون بنعيش .. اما دا كاظموه عديم اخلاق و مامنه فايده ...

ابو صادق بتعب منفعل/:

ــ احمدي ربش يامره انه مارفع علي قضية ووداني السجن .. احمدي ربش وقفت السالفه لهنا.. ومع ذلك الديون ما تسددت كلها..

ــ ويه ويه.. الشركه والمصنع انباعو ولا تسددت..

ــ لا بس اموال المساهمين ترجعت باقي ارد حقوق الشركاء بعد فك الشراكه..

ــ ويلي .. ويلي ويلي .. ومن ووووين بترد حقوووقهم

ابو صادق :

ــ السيارات بينباعو و البيت بعد بيجيبو ليهم مبلغ محترم يوفي اكثر الديون....

ــ هااااااا.. وويش تبغانا نسوي بعدهاأأأ... بتقعدنا على بساط الفقر ... ويلي ماني قادره .. راسي اباموت.. صااادق .. صاااادق وينك يااا ولدي .. بعد الشغالات و السواق وسفرناهم قلنا ما تقدر تدفع رواتبهم من زمان

تبيع السيارات والبيت لويه...

ابو صادق بحمق :

ــ وانتين عديمة احساااس لويه .. ما تفهمي لو مادفعت بدخل السجن..

ــ قول لكاظمو يتصرف مو وارث مال قارون خله يساعدك..

ــ لو يسجنووني ويقطعوني ما طلبت منه... وبعدين خايفه على ويه .. خايفه على الورثه ما اورثهم غير الفقر .. هو الا واحد..

ــ ايه ايه.. عايرني كل يومين بهالواحد,. ماحد قال لك ما تتزوج ,,

ــ انا قادر اتحمل وحده حق اجيب عله ثانيه على قلبي

ــ اني عله.. ماغير انت وولد اخوك وام الفلفل جدته حسبي الله عليها الله لا يحللها ولا يبريها

ــ لا تدعي يامرأه .. كل هذا اللي فينا حوبتهم

ــ حوووبة ويه.. جعلها ما تتهنى في قبرها .. عساها حريقه تحرقها هي وولدها وولد ولدها.. شلة هالهنود مسودين الوجه وووو

ــ خلاااااااااص ياا مرأه

ــ خلاص ويش واني اشوفك استجنيت .. وقالب علي ... وناوي على خرابنا ودمارنا. .. بتبيييع البيت والسيارااات كل منهم... ومين بيشتريهم منك هالفتره...!

ــ مو شغلش ياعساه كاظم..

ــ كاظم بعد !! لا شكلك خرفت وقعدت.. اني لكن الشرهه علي اللي اسمعك.. والا انت يبغى لك يرفعو عليك قضية حجر من زمان.. لأنك كبرت .. سفهت.. و خرفت..

ــ انا.. انا..

ــ اييييييييه انت.. خل بس يجي ولدي صادق ويشوف لك حل ... تعب قلبي منك

ــ لاااا .. مصختيها حددددش يامرأه
ــ لا مصختها ولا شي ... صبرت عليك وايد اني .. وجودك وعدمك في هالعايله.. ما استفدنا منك غير الفلوس والحين الفلوووس بحححححح ويش اكلنا من معاشرك غير القهر والحسره !

ابو صادق بلا شعور ومن فرط العصبيه والأنفعال شاف في سلة المواعين سكين .. شالها وهو معصب ..

ــ بتسكتي لو انحرش

ام صادق صارت تستفزه:

ــ لا بعد بتذبحني.. لا تقول بتبيع اعضائي بعد وبتتاجر في جسمي حق تسدد بقايا ديونك.. تسويها انت تسويها.. شيه متى انت صار فيك قلب

هي مامداها تكمل كلامها الا ابو صادق عاجل عليها..

ضربه ...

ضربتين...

و الثالثه اوتعى على صريخ ولده صادق اللي كان راجع من البقاله ..

رمى الأغراض وهو يصرخ في ابوه ويوخره عن امه

والدم يسيل ..

ابو صادق انتبه لروحه ولفعلته..

صار يتأمل الدم اللي يفور من ام صادق و ايده الملطخه به..

رمى السكين وهو يرتجف..

طق فيه عرق و صار يضحك يضحك بلا شعور .. واستجن...

صادق حاضن امه يحاول يشيلها وهو ميت من الرعب مو قادر ولا هو عارف ويش يسوي..

فأتصل على كاظم يجي يسعفهم ....









في بيت يوسف ...

اماني بعصبيه وانفعال:

ــ يعني اللي صار كله مدبر ومخطط و انتين اللي قلتي لريماس عن شامة اختي !!



ماريا حست الأرض انشقت وبلعتها من الأحراج قدام مراد اضافة للصدمه

غاده وهي تصيح:

ــ بدون قصد ومن زمان... و الله ..

اماني صارت تضرب في غاده وتدف فيها بقهر :

ــ والله .. الله ياخذش وياخذها ياعديمين الأنسانيه..

يوسف :

ــ خلاص خلاص ..

غاده وهي تصيح:

ــ اذبحوني اقتلوني .. سوو فيني اللي تبغوه

مراد بلا شعور ضحك عليها سخريه:

ــ نذبحش ويش نستفيد من ذباحش... لازم نستفيد من تصريحاتش ...

اماني وهي مرتبكه ومهي عارفه ويش تقول..

ــ ويش نسووي الحين .. !

مراد :

ــ خلو الأمر علي .. حسام بتصرف انا وياه. هو ويا هالريماس... وجعلها توصل السالفه للشرطه والمحاكم...

غاده صارت تصيح:

ــ اترجاكم .. ما ابغى انفضح. والله اهلي ان درو بيقتلوني والله احلف ليكم بالله اني ما عمري طلعت وياه حدي تلفون وماسنجر .. بس اهلي مابيصدقوني لو طلع كلام

اماني ردت هجمت على غاده تدف فيها وتضرب :

ــ قولي لروحش ..حق تحسي باللي سويتيه في اختي ..

جوال غاده يرن...:

ــ والله اني ندمانه و ماني قادره اعيش لحظة راحه من بعد هالسالفه .. فجيت واعترفت بنفسي .. الحين باروح بيتنا... جاني السواق

مراد:

ــ هو الحين نفعتينا بأعترافش.. و بتساعدينا وايد .... فخليش على اتصال بماريا حق وقت ما بغيناش تكوني موجوده,..



وطلعت غاده..



يوسف :

ــ ويش بتسوي بالضبط؟

مراد:

ــ خليها علي

يوسف:

ــ لا تورط روحك ياخوي بالمشاكل

ــ لا تخاف قدها وقدود..

ــ ياخوي اخاف يآذوك ديلا ولاد الحرام..

ــ قلت لك لا تخاف.. شرفك هو شرفي واللي يدوس لك على طرف كأنه داس علي بكبري

اماني وهي تصيح :

ــ الله يحيي اصلك ويبارك فيك .. و يوفقك ياكريم ...



ماريا قامت بهدوء ولا كلمه انسحبت من المجلس وفي مشيها يبين الأنكسار والألم..

مراد معوره قلبه وكلما غض النظر عنها رفع عينه اليها و كاسره بخاطره على انكسارها...

وفي نفسه:

ــ والله لآخذ حقش لش بيدي...