كاظم يقلب في اوراقه وهو جالس بالملحق...

ويتذكر اللي صار له من يومين...

المحامي :

ــ اذا بتشتكي على المحامي راح يكون عمك ضمن الشكوى ومو بعيده يكون حكم المحكمه السجن بسبب التزوير و اغتصاب مال الغير... ففكر بالموضوع وشوف هل بتحل الأمر وديا مع عمك وتسترجع حلالك والا بترفع الدعوه...

يتذكر لما راح لعمه اللي كان تعبان وصادق جنبه ... وقبل لا يتكلم كاظم ويقول أي شي .. فاجأه عمه وهو يصيح ويترجاه يسامحه.. ويعطيه صكوك كل مال من ورث ابوه نهبه منه.....

يتذكر عمه وهو يسال صادق عن الشركه والمصنع هل عرضهم للبيع والا لا...

فرصه وجت لعند كاظم بدون لا يقترح...

انسحب من المستشفى بهدوء حامل اوراقه ... وصار يفكر في طريقه يشتري فيها المصنع و الشركه...بدون لا يجرح ويحرج عمه وولد عمه بعد ماشافهم بهالحاله...



كاظم..ينتبه من الذكريات ويجي على باله الحل :

ــ بس .. مالي غير مراد يساعدني اكيد بيقدر بحسابه..

اتصل على مراد:

ــ هلا مراد.. وينك؟ طالع..

مراد:

ــ في طريقي الى الديره..

ــ ها..

ــ جاي الديره نازل..

ــ هههههههه والله كنك تحس اني ابغاك في شغله.. لويه نازل انت.. وبهالليل

ــ سالفه ابغى اتحرى منها وراجع . وابرد لي الليل .. اسمي نايم طول النهار.....الا بسألك تدل بيت يوسف انت.؟

ــ كأنه قال انه بحي الـ بالـ...... ..،، بس وين بالضبط مادري..

ــ اهااا .. يعني ماتعرف شي ازيد من اللي اعرفه... ويش بغيت مني انت.؟؟

ــ عندك فلووس..؟؟

مراد مستغرب:

ــ سلف يعني..

ــ لاااا سلف ويش .. تشتري بهم حاجه..

ــ مانى فاهم عليك اكيد الفلوس بيشترو فيهم حاجه.. هههههه ويش تقول اخوك..

ــ بالمختصر تقدر تشتري شركة ومصنع عمي منه وبعدين اشتريهم منك..

ــ بل .. بل .. ههههههه قالو لك ويش مو لهالدرجه.. ابوي يقدر لكن.. اذا حاب هالشي على عيني وراسي ...

ــ تسلم ماتقصر حبيبي .. توقعت ما بتردني..

ــ افا عليك بس .. المهم انا بعد ساعتين كذا بوصل .. ويش رايك بدل لا انزل بيتنا اجي عندك..

ــ حياك الله ..

ــ بانام وياك..

ــ افا عليك حياك..

ــ تسلم . مانى مشتهي انزل البيت لحالي..موحش ومافيه غير الحارس...

ــ اوكيه انتظرك...







الساعه 12 الليل ....

فتحت ماريا عيونها وصارت تتلفت .. وعلى بالها تتذكر انها كأن شالوها و الحين هي بالمستشفى...

التفت يمينها على الطاوله حقت الأكل .. لقت علبه...

قعدت .. لقت مكتوب على الكرتونه..

ــ سامحيني طاحت و تعفست شوي .. .. يوسف

فتحتها لقت كيكه ... صارت تتأمل المكتوب عليها..

Happy Birth day Mareya

انتبهت ماريا ان اليوم عيد ميلادها... وانهم دخلو يوم جديد ...

صارت تضحك وعيونها تفيض بالدمع.. وكلما ضحك الدموع تزيد..

التفتت لقت جنب الكرتون صحون بلاستك وملاعق..

بلا وعي صارت بأصابعها تمسح الكريمه وتلحس اصابعها.. وتاكل من الكيكه بأيدها.. وهي مستمره في الضحك والصياح..

لين آخر شي خلاص .. انتابها صياح .. صارت مع كل لقمه ترفعها مثل الطفله تاكلها وهي تشاهق وتصيح..

اكلت شوي زين منها .. خربتها زياده على خرابها... سكرت العلبه ومسحت ايدها بالنشاف .. انسدحت ورجعت تضحك وتصيح... وتحاول تتماسك بس ماهي قادره...

صارت تسمع صوت المريضه اللي جنبها وهي تتأفف تبغى تنام مهي قادره من صوت ماريا

ضمت ماريا بوزها بكفوفها وعيونها تصب دموع.. وماغير تشاهق و تبلع الحزن قد ماتقدر...



وفي قلبها تصيح من الألم:

ــ أمااااه.. أمااااه...





في الملحق .. كاظم نايم .. ومراد يتقلب ويقلب افكاره.. ويش بيسوي في موضوع حسام.. وكيف بيقابل يوسف ويتحقق منه..



بالطرف المقابل شهربان النوم مجافي عيونها...

شوي تذكرت غاده.. وموقفها في آخر يوم شافتها فيه.. ليش كانت بفصلهم.. وليش كانت تصيح...

دقت عليها رنه. وسكرت..

غاده كانت قاعده.. شافت رنة شهربان.. وكانت بتموت من الضيقه ...

اتصلت عليها.,.

شهربان ردت:

ــ هلا غاده..

غاده وبتنهيده من قلب وصوتها متغير:

ــ اهلين...

ــ ويش فيه صوتش..؟

ــ انتين بعد ويش فيه..؟؟

شهربان:

ــ متضايقه.. احس باموت من الضيقه ماني عارفه ويش اسوي.... ابغى اقول لش حاجه واحسش تعرفي شي عنها..

غاده ارتبكت:

ــ لويه يعني تحسيني ابعرف؟

ــ ريماس .. انتين قريبه من ريماس .. سمعت منها كلام اليوم و..

قاطعتها غاده:

ــ ريماس قطعت علاقتي بها من زمان..

ــ من متى !

ــ من.. من .. من يوم الأربعاء..

ــ على شان كذا كنتي تصيحي.؟

ــ ايه..

ــ ودي وحده تسوى الواحد يصيح عليها... لويه كنتي تصيحي؟

ــ خايفه.. خايفه منها....

ــ لويه..

ــ خايفه تطلع علي كلام لو شي ...

شهربان بتساؤل :

ــ يعني انتين تدري بها تطلع كلام وكذا.. تسويها يعني..

ــ ايه تسويها ليش لا..

ــ زين ابسألش انتين قلتي ليها مره ان في بطن ماريا شامه؟

غاده ارتبكت ...

ــ مادري .. ماتذكر.. لويه هالسؤال؟

ــ بس صايره سالفه..

ــ ويش صاير..

ــ ماشي .. مهم.. ابانام تصبحي على خير

ــ وانتين من اهله..

سكرت شهربان وهي تفكر .. هل معقوله ريماس تكون مطلعه الكلام على ماريا.. بس ليش . ويش اسبابها...

غاده ظلت ماسكه الجوال .. وقعدت تصيح مهي عارفه ويش تسوي ..



ويوم ثاني .. الوقت في امريكا المغرب ..

ركب ناجي الطياره.. مستعد للرجعه .. قلبه يحسه بيطلع .. من جسمه..

خصوصا انه ما كلم اهله.. ولا ردو عليه.. مشتاق ليهم.. متهوس عليهم.. وخايف عليهم من الصدمه...

قعد على كرسيه.. سند راسه عليه وغمض عيونه.. وصار يتذكر قيصر اللي ودعه وبالأحضان البارحه .. و اعتذر منه انه مايقدر يودعه بالمطار.....

تركه مع اصدق الدعوات انه يعيش حياته بالطريقه اللي تريحه وتناسبه...

وبين ما ناجي يفكر في قيصر..

انتبه ان في احد جلس جنبه...

التفت عليه .. وفتح عيونه وهو مذهول:

ــ قي.. قيصررررر

قيصر مبتسم:

ــ شلون تريد تروح لحالك..

ــ يعني ويش .. بترووح ويااي..

هز قيصر راسه..

ولا شاف الا ناجي ناط عليه ويمسكه من رقبته وهو يصارخ:

ــ يااااااااااعمررري انت ...

قيصر وهو مستحي والناس بالطياره يطالعو فيهم..

ــ اركد يابه .. فضحتنا.. شنو بيقولون عنا..

ــ ههههههه ماعلي منهم... متأكد.. بتروح وياي.. مابتروح مع مجيد..

ــ ارجع لأصلي و بين اهلي وناسي اللي من لحمي ودمي احسن لي والا شنو رايك..

ــ على راسي وفي عيني .. الله لا يحرمني منك..

ــ هههههههه خلاص خلاص على هونك عليا شويه.. ذبحتني من الكلام الحلو...

ــ وعيادتك..؟ ويش سويت فيها.. واختك كلمتها..

ــ تركتها عند واحد ثقه راح يبيعها ويرسل لي الثمن.. واختي ايه كلمتها وقلت الها اني جاي

ــ مانى مصدق .. ابدا مانى مصدق.. اكيد اختك طايره من الفرح..

ــ تريد اقرصك..

ــ سطرني بعد.
ــ يالله . .. اختي.. ماشفتها من اول ما تزوجت وراحت السعوديه..وآني بعدها بفتره هاجرت.. يعني تقول اكثر من 10 سنين....

ــ يالله ما اتخيل موقفها لما تشوفك.

ــ موقف اهلك اصعب .. هم فاقدينك .. منت غايب عنهم..

ــ خايف والله من ردة فعلهم.. خايف يصير فيهم شي

ــ لا تخاف وان شالله مابيصير الا كل خير ...



سكت قيصر وصار يفكر في باله:

ــ يالله يا ناجي ... وآني الـﭽـنت احسب روحي بس اللي احبك هواي... الله لا يحرمني منك...



وطارت الطياره ... متوجهه الى ارض الوطن..