طلع حبيب من الشقه وهو يتحلطم:
ــ زين بعد دي ثالث مره يخلص الخزان ويجي يهتم فيه مو سالفة ألأصنصير بعد...
ركب حبيب السطح...
وتوجه للخزان بيفتح الماي
الا يسمع صوت ونين...
التفت حبيب لقى شفيق قاعد في زاويه و يون..
حبيب رجع على ورى بالسرعه وشهق:
ــ بسم الله ويش مقعدنك هنا... في هالحر !!!
شفيق يرفع راسه وعيونه تفيض هموم والكلام يتقطع تقطيع ..
ويرتجف كأنه في عز البرد:
ــ ابرجع... ابرجع القطيف .. مالي قعده وياكم خلاص..
حبيب قعد جنبه وصار يهديه:
ــ صل على محمد .. ويش جاب هالطاري .. قوم انزل وياي الحين .. يوسف ومراد طلعو يبلغو الشرطه ترى عنك على انك مفقود..
ماشاف حبيب الا دمعه انسلت من عيون شفيق بعفويه :
ــ ما اجيب الا المشاكل.. لازم ارجع..
حبيب يمسكه ويبغاه يقوم
شفيق يسحب ايده من ايد حبيب .. ويقوم لحاله .. يمشي وخطواته تحكي ألم و مراره...
ينزل على الدرج.. وهو يتذكر مواقف الشباب وياه ومحاولتهم يدخلو السعاده الى حياته..
يذكر مواقفه اللي يسويها فيهم وكيف مسبب ليهم رعب وقلق ...
فتح حبيب ماي الخزان ونزل يركض ورى شفيق ...
دخل شفيق الشقه..
السيد قام له بالسرعه وهو مستانس :
ــ هااا وين كنت خوفتنا عليك..
شفيق ما يسمعه في عالم ثاني...
يكمل مشي الى غرفتهم..
صادق في الغرفه قاعد..
دخل شفيق و لا كأنه يشوفه وكان وراه السيد مستغرب منه ويسأل فيه وين كنت وويش فيك..
ماشافو الا شفيق كسر الهدوء و الصمت اللي فيه... و يدور على السيد ويصرخ فيه:
ــ خلاااااااااااااص...
صادق طفر مختلع..
حبيب دخل عليهم .. الا يلقى السيد واقف و فاتح عيونه يطالع في شفيق !!
حبيب يعرف السيد اكره ماعليه احد يرفع صوته في وجهه بدون حق..
صار يتأمل في السيد اللي كان مذهول وفاتح عيونه و حواجبه عافسنها مستاء من حركة شفيق ...
حبيب صار يمسح على ظهر السيد ويهمس له:
ــ هدي اخوك حالته حاله
السيد وهو يحاول يداري غضبه :
ــ.. الذنب ذنبي يوم اخاف عليه و اسأل عنه .. الظاهر ابدا ما بالغ صادق في كلامه عليه
شفيق سمع كلام السيد.. وكان يطلع شنطته من تحت سريره...
بهدوء رد:
ــ انا آسف.. ضايقتكم.. وعذبتكم معاي.. بس خلاص بتفتكو مني..
السيد سكت عنه وطلع من الغرفه..
حبيب صار يحاول في شفيق .. بس شفيق ابدا مُصر ..
وقاعد يلم كل اغراضه .. و ناوي ينزل القطيف قبل نهاية الأسبوع... وبلا رجعه..
حبيب وهو يحاول الا بالسيد يناديه:
ــ تعال بس اتصل في المساكين اللي طلعو يدورو عليه ويبلغو الشرطه..
شفيق بهدوء:
ــ روح اتصل عليهم وخلني بحالي ...
طلع حبيب وراح غرفتهم للسيد اللي كان مره مستاء و مقهور..
حبيب :
ــ عاد سيدوه ويش فيك تفلت كلام
السيد:
ــ والله هو اللي بدى.. الواحد يندم انه خاف عليه لو فكر فيه.. دايما يتصرف تصرفات تخلينا كلنا بحاله ووضع مو طبيعي .. وملزومين نسكت و نراعي مشاعره.. والله كلام صادق الحين صحيح عندي .. ليش حنا ماعندنا مشاعر.. ؟؟ مالينا قيمه ولا احترام عنده..؟؟؟ يقدر ان حنا اكبر منه وخايفين على مصلحته.. .. يحس انه فيه ناس بتحاتيه فلا يتهور ويتصرف أي تصرف يخليهم ياخذو مواقف سلبيه منه
حبيب يهدي فيه:
ــ غصبن عليه انت تدري مو بيده... مريض هو.. نسيت !!
السيد:
ــ ومريض اللهم ياكافي مين اللي صاحي بهالدنيا.. ؟؟؟ نتجارم وياه ليش ؟؟؟ خله يتعالج و يرحم روحه ويرحم اللي حواليه
ماسمعو الا شفيق وكان قريب باب غرفتهم جاي بيعتذر للسيد ومصدوم لما عرف الحين انهم كلهم يدرو بسالفته و انه مريض ...
ــ يعني تدرو بمرضي ومعاملتكم دي كلها من باب الشفقه و كسرة الخاطر .. حاولتو تتحملوني كلكم بس على شان ماتجرحوني.. وانا اللي كنت استمر بتصرفاتي وما راعيت شعور واحد فيكم..
وبنبره مخنوقه و مبحوحه بالكاد يطلع معاها الكلام:
ــ آسف .. وربي آسف .. خلاص راح انهي مشاكلي وياكم اليوم...
وتركهم ...
السيد صار يمسح وجهه بيده :
ــ انا لله ..
حبيب :
ــ احس روحي صخنت.. ويش هاليوم دا....
السيد بهدوء:
ــ اتصل في مراد ويوسف .. بتطلع الشمس وهم بعدهم برى..
حبيب دق على يوسف .. لقى رقمه مقفل..
حبيب:
ــ غريبه مقفل يوسف .. يمكن خلصت بطاريته
دق على مراد .. مره ومرتين
الا يسمع صوت النغمه كلما جى ليها تصير قريبه
صادق دخل وماسك جوال مراد:
ــ نساه هنا...
حبيب يضرب جبهته:
ــ اوووه لا حول الله.. ويش نسوي الحين !!!
السيد يضحك بأستياء :
ــ هه هههه.. والله هم يضحك.. خلاص مانى قادر انا.. عن جد مو طبيعي الوضع...
الا بدخلة كاظم عليهم .. ينشف شعره و يدندن ,, شوي وهو يدور سألهم:
ــ وين كريم الشعر ... شعري ناشف احسه...
حبيب :
ــ خذ لك.. الناس في جلبه و العجوز تدور رجل..
كاظم :
ــ هااا!!
السيد :
ــ خخخخ مثل حبوبي
كاظم:
ــ ويه !!
حبيب:
ــ اقول استريح...
كاظم باستياء:
ــ شندراهيه تومي ديرا ... << خرابيط من عنده بيشوف ردة فعل حبيب
حبيب يطالعه على جنب:
ــ اقول .. لا تخربط .. ترى افهم لك..
كاظم ماقدر صار يضحك..
السيد ابتسم ...
الا يسمو صوت باب الشقه..
فزعو ركض يشوفو مراد ويوسف
..
حبيب مو عارف ويش يقول:
ــ شفيق ... شفناه..
كاظم طفر :
ــ بل ولا يقولو !!!!!
حبيب:
ــ انت تشيه تدري وين الله قاطنك
يوسف :
ــ ها ... صحيح... وين كااان !!
مراد :
ــ اوووه عاد بلغنا الشرطه حنا.. الله يهديكم كان اتصلتو عليناااا!!!
حبيب بأستياء/:
ــ مين قال ما اتصلنا .. انت جوالك هنا نسيته وانت ويش فيه جوالك مقفل ؟
يوسف يحوس في مخباه:
ــ جوالي !!.. وين جوالي اصلا..
مراد :
ــ يمكن نسيته بالسياره
حبيب :
ــ الحين ويش بتسووو...؟؟
مراد :
ــ افففففف والله مشكله الحين... دام بلغنا لازم نروح و نلغي البلاغ...
يوسف :
ــ ولو ما الغيناه مشكله بتصير صح
مراد وهو مره ميت من التعب:
ــ مشكله في الغاءه حتى... الله يعين.. بطلع الحين باروح الغيه بالسرعه قبل لا يدورو و تزيد المشكله ..
يوسف :
ــ اباروح وياك..
مراد:
ــ لا ارتاح.. روح شوف شفيق ما يسمع لأحد غيرك.. انا شويات وراجع..
وطلع مراد..
حبيب:
ــ مسكين مراد ابتلش بنا ماتسوى عليه عنده سياره تحت ايده..
يوسف في قلبه يلوم روحه:
ــ كل مني انا اللي اقترحت سالفة هالرحله.. لو قاعدين في الشقه ماصار هذا كله... وانا اللي اصريت نبلغ الشرطه... يالله عدي هالسالفه على خير..
وراح يوسف بيشوف شفيق .. لقاه نايم.. وهو بالواقع يسوي روحه... و الهم شاغل فكره.. والدموع تنسل على خدوده..
كاظم:
ــ خلاص انا تعبت .. انهيار تام مو قادر ابانام... تمسووون على خير
صادق نام من زمان من رجع شفيق ..
حبيب حاول يواصل لين يرجع مراد بس ماقدر تركهم وقام هو الأخر
بقو السيد و يوسف ينتظرو مراد يرجع..