فني الصيانه بعد حوالي النصف ساعه وصل مع مالك العماره .( ابو خالد )..

وقاعد يحاول يشوف حل ...

نوري والعرق يصب منه.. وهو يهوي على نفسه ببلوزته..

ــ يالله حررر موووت .. ويلي عليك يا مصطفى..

ويلصق في باب الأصنصير وينادي:

ــ مصطفى.. تسمعني؟؟!!

ولا من مجيب ...

نوري متوتر حده.. يوسف يحاول يهدي فيه ..

حبيب : ــ ان شالله ما بيصير الا الخير .. مايسمعك شكل الأصنصير معلق في النص فما يوصل له صوتك..

نوري : ــ ان شالله .. يارب .. يارب

ويسأل حبيب ابو خالد:

ــ صار لينا حنا مستأجرين سنتين ماشفنا هالحاله.. هالشي صار من قبل ؟؟

ابو خالد :

ــ لا اول مره ..

حبيب :

ــ من كم سنه هالأصنصير؟؟

ابو خالد :

ــ طبعا من اول ما بنيت العماره



السيد صار يتلفت حوله ... العماره قديمه و حالتها لله...

محسن بهدوء يسأل :

ــ بل ... من اول مابناها... اول مره تصير هالحاله؟؟ يعني اول مره بعد فني الصيانه يجي يكشف ؟؟

ابو خالد وبهدوء وعفويه:

ــ ايه اول مره

نوري شب حريقه:

ــ حشا.. المفروض تعمل صيانه دوريه للعماره .. لا يروحو السكان ضحايا... تلاقي العماره فوق الـ 50 سنه من انبنيت << قالها بقهر وصيغة مبالغه

ابو خالد عصبته لهجة نوري الأستفزازية:

ــ لا ياشيخ لا تمخصها عاد... ماصار لها 13 سنه..

نوري يكفخ وجهه ويصير يفرك فيه بكفه و يتباعد كم متر عن ابو خالد..

يوسف يطالع نوري خلعته الحركه

محسن يهمس ليوسف:

ــ هذا نوري اذا عصب يخفف غضبه كذا... لو مايسوي هالسواة من زمان كفخ المالك وكرفسه تكرفس...



داخل الأصنصير .. مصطفى .. متربع بجلسته وفي الزاويه ومسند راسه للجدار ..

ماسك علبة البندول بيده اليمين وكأنها كاس .. و عاصر عليها بالقوه..

العرق منه يصب .. وهو مابين الموتعي والفاقد للوعي ...

بهمس متقطع مابين الحين والآخر ينادي :

ــ دا..نه..



يوسف برى قلبه مو راضي يوقف عن النبض .. ونبضه مو طبيعي..

نبض خوف .. ترقب .. ويلوم نفسه كل دقيقه ويحس انه السبب لما كلم مصطفى و خلاه يجيب ليهم البندول...



الكل طلع من الشقه ماعدا شفيق المريض...

و صادق بالصاله مستحي من الكل....

وتوزعو اللي تحت واللي فوق واللي يتنقل مابين فوق وتحت ..

مابين امل و رجاء ودعاء ان الله يفرجها و يفتح هالأصنصير ...





ريماس تكلم غاده عالماسنجر...

غاده زعلانه وماليها نفس ترد..

ريماس :

ــ ويش فيش حاقرتني ؟؟

غاده :

ــ مافيني شي..

ــ شدابه...

ــ ويش تبغي؟؟

ــ بل يعني من غير مطرود اخلصي قولي اللي عندش وفارقينا

غاده ماردت..

ريماس :

ــ ويش صاير فيش خايسة نفس .. خايفه من الأختبارات النهائية باقي اسبوعين يا غناتي لماذا التوتر..؟؟؟ اذا ما جبتي نسبه زينه لا تخافي باأأمن لش واسطه...

غاده ماترد ..

ريماس:

ــ وحريقه .. تكلمي مين .. الدفش حسامووو؟؟

غاده ردت:

ــ لا : ( ياليت...

ــ اف اف .. عرفنااا لويه هالدفاشه... حسام مو شابك.. استر عليش وحشش هااا

ــ ما يكلمني ..

ــ ها.. لويه؟؟

ــ سالفه طويله..



ــ ويش صاير؟؟؟ لويه مايكلمش خايب الرجا.. قولي لي واراويش فيه...

ــ يقول مامني فايده.. ماعندي جوال ولا ني راضيه اعطيه رقم بيتنا... وهو مو تبع مسنجرات ذاك الزود.. فما بيفضى .. ولا بيكلمني الا اذا فتح المسنجر ولقاني راسله له رقمي ..



ــ اهاااااا والله انش عذبتيه عذاب ماتسوى عليه هالخمس دقايق اللي تكلميه بهم في هالمدرسه ولا بعد بصيغة انثى وبالخش وبالدس..

ــ : ( ويش اسوي .. ابوي وامي مو راضيين ياخذو لي جوال



ــ ابو التخلف درينا انهم يقولو ماله داعي .. سواق خاص عندش ومايتأخر عليش.. وكل محل تطلعيه نطلعه وياش .. وبيوت صديقاتش عندنا ارقامهم .. لويه جوالات !!عدااال.. ماعليش اني عندي جوال زايد جوالي القديم بدون كام .. و باخذ لش شريحه

ــ ويش تقولي .. لالا.. تبغي اهلي يذبحوني



ــ عبط مستفحل فيش انتين والا ويش .. ويش دراهم..

ــ كيف ويش دراهم..

ــ والله مايبغى ليها شي يالبقره.. حطيه صامت وهزاز وخشيه في غرفتش مو لازم تسوي اعلان ترى عطوني جوال..

ــ صدق ...

ــ صدقين.. خلاص بلا عبط بكره اجيبه لش..

ــ ياعمري ريماس الله لا يحرمني منش

ــ ايه حق تعرفي فايدتي...



ريماس في بالها اشياء و اشياء تبغى تعرفها من غاده..

ومفكره زين مازين شلون تسالها عنهم...

ريماس:

ــ غادوه.. فيش شي مميز..

غاده وبكل ثقه:

ــ عيوووني الحلوووه..

ريماس :

ــ مالت عليش .. خبله والله.. اقصد شي غريب يعني في جسمش .. مممم علامه فارقه هيك شي ..

ــ ممممممم لا مافيني شي غريب ... زي ويه مثلا يعني

ــ اني قايله انش بهيمه...

ــ داويش انتين كل تسبي فيني

ــ ههههههههههه احبش لأني..

ــ يعنووو

ــ زيي مثلا .. اصابع كفي اليسار الخنصر و البنصر طول بعض ..

ــ يووووو صحيح؟؟ ما انتبهت

ــ هههههههه ويش اللي يخليش تنتبهي وهي في ايدي اليسار... مممممم وزي مثلا الشامات... فيني في رقبتي من ورى شامه كذا قد الزيتونه...

ــ يوووووووو زي ماريوووو بس مو في رقبتها .. ماتبين انتين من شعرش كل منزل على رقبتش...

ريماس فتحت عيونها وشلقت بوزها شبرين..وفي بالها...

ــ وصلنا خير .|. والله انش عبيطه يا غادوه..

ريماس بتساؤل:

ــ وين شامتها ماريا..؟؟ ماشوفها تبين اذا مو في وجهها ولا رقبتها..

غاده وبعفويه تامه:

ــ في بطنها فوق سرتها على طول..

ريماس خلاص مهي قادره من الفرحه على هالمعلومات الخطيره:

ــ وانتين ويش دراش بها دي ؟؟

ــ ههههههه مره رايحين بركه اهلي وقالو لي اعزم صديقاتي فراحو وياي شهربان و ماريا.. وحنا نسبح شفناها وصرنا نتحرش فيها.. خبرش ماريوو بيضااا خخخ ماحد قال ليها تلبس بجامه خفيفه...وحتى شهربانو عندها وحده بعد فوق كوعها اليمين...

ريماس بأبتسامه خبيثه:

ــ اهاا شهربانو بعد

وفي بالها:

ــ لا دي مانبغى منها شي ...