امير يحبي على ركبه بتردد لين وصل لعند مجتبى وفي حضنه ولاده...
قعد وراه..
وصار براسه يضرب ظهر مجتبى على خفيف وهو يصرخ و يون .. وينادي .. يبا..
وشوي يزيد الضرب والصريخ ..
ام مجتبى كلما شافته بهالوضع و ينادي على ابوه..
تذكرت حال ابو مجتبى و زاد الحزن عليها..
مجتبى يلتفت له يحاول يهديه:
ــ امير .. ويش فيك..؟؟؟
زدات نوبة الصريخ وصار يرفس ..
نور راحت له تركض .. مسكته وصارت تسحب فيه..
وقامت ام مجتبى تعاونها عليه.. لين دخلوه الغرفه ..
وصارو اللي برى الصاله مايسمعو الا صريخه و ام مجتبى تهدي فيه
ــ سميت عليك بالله و محمد وعلي .. سمت على عمرك الزهرا ام الحسن وحسين..
نور:
ــ امير .. امير اهدى حبيبي .. هاك.. هاك ارسم..
ويمسك امير الورق وعلبة الألوان ويرميها حد ماعنده ..
تصقع في باب الغرفه وتتنفر الألوان لبرى..
ايثار قامت من حضن ابوها .. وراحت تلم الألوان وهي تمسح دموعها وتحاول تتماسك و تضبط نفسيتها..
جمعت الألوان وراحت صوب امير مسكت ورقه وصارت ترسم جنبه ...
وهي تنشد له ومع كل كلمه تسحب نفس و تشاهق :
بالألوان .. بالألوان أرسم بيتاً للأجيال
فيه أزهار و طيور و به باب و له سور
سأرتبه لما أكبر و سأجعله أكبر أكبر
وله ساحة ألعب فيها و به شجر عال أخضر
من بدت تنشد و ترسم جنبه.. هدأ و صار يراقبها ويردد وراها اخر كلمه ...
ام مجتبى قعدت بتعب :
ــ لا اله الا الله ما تعرف لك الا هالقمر..
نور بأبتسامه:
ــ ياغناتي هالقمر ...
وقعدت جنبها تمسح دموعها...
في الرياض ..
يوسف يسوي كمادات لشفيق من بعد الخلعه اللي تعرض ليها وقعدته في الحمام.. ارتفعت حرارته..
مراد قاعد يحوس في لاب توبه .
ــ ايوااا هذي وصفه طبيعيه لتخفيض الحراره..
حبيب قاعد على سرير يوسف :
ــ ويش هي؟
مراد يقرأ الكلام المكتوب :
ــ تنتشر أمراض البرد حاليا وخصوصا الأطفال: ويعاني الكثير من ارتفاع درجة الحرارةويهرع الكثير الى مخفضات درجة الحرارة والتي لها مساوىء كثيرة, ولكن أنصح اخواني أنيستعملوا
شوي رفع حاجب مستنكر..
السيد كان وياهم في الغرفه...
ــ ويش ؟!
مراد بأبتسامة سخرية يكمل:
ــ يستعملو نبتة الرجلة (البقلة الحمقاء) والموجودة لدى بائعي الخضار, تعصر وتوضع علىسائر البدن وبعد نصف ساعة على الأكثر ستدهشك النتيجة.
كاظم وياهم ايضا قاعد عالأرض مستند على سرير يوسف ووراه حبيب على طول .. الا يدحن ضحك:
ــ البقلة الحمقاء .. ويلي اباموت...
حبيب:
ــ ويش تطلع دي عرفنا البقل بعد بقلة حمقاء .. والله حاله .. ماعندنا لا ذكيه ولا حمقاء ... اهو بس عنا.. ويا هالوصفه..
السيد وكان قاعد جنب حبيب :
ــ قول لو عندنا ويش خانته وحنا مسبحينه في بقل ... !!
صادق كان وياهم خش عرض يبغى يشاركهم السوالف.. وبهدوء:
ــ لا ... وشفيق بعد..
التفت له يوسف :
ــ ويش قصدك..؟؟
صادق حس روحه غلط..:
ــ لا .. ولا شي..
يوسف وهو يعصر الخلقه ويحطها على جبهة شفيق :
ــ فلتقل خيرا او لتصمت..
صادق ارتبك .. قام وطلع عنهم..
السيد:
ــ يوسف ويش فيك عليه.. خف عنه شوي..
يوسف :
ــ قهرني بتصرفه .. كأنه مايدري بحالة شفيق و الوضع الصحي اللي هو فيه..
اقلها استنجد بأحد .. اصرخ حد ماعندك .. دافع .. حتى لما رحنا كلنا لشفيق ما كلف على عمره ورجع ويانا.. لا والحين قاعد يتمسخر..
حبيب بهدوء:
ــ ياخوك لا تلومه يمكن من النوع اللي مايعرف يتصرف ..
كاظم :
ــ انا اشهد انه ما يتكل عليه ولا يعرف يتصرف في شي
الا بصفقه جايه على راس كاظم من ورى .. وكان حبيب اللي صافقنه :
ــ انت الحين اللي فلتقل خيرا او لتصمت
كاظم تكتف :
ــ هااا .. ابصمت..
ويحط كفه على بوزه..
مراد يسكر لاب توبه...:
ــ ماليكم الا الفيفادول...لو بنادول عالأقل ..
السيد:
ــ صح صح.. لحظه باقوم اشوف كأنه عندي ..
شوي ورجع السيد:
ــ افا مخلصه..
مراد:
ــ اباقوم اشتري له..
يوسف يمسكه..
ــ اصبر بنشوف الشباب تحت يمكن عندهم واجد عليك طلعات اليوم ومداور..
اتصل يوسف بمصطفى .. وسأله..
مصطفى:
ــ لحظات اشوف الشباب واذا عندنا بنجيبه ليكم واذا ماعندنا بتصل عليك
سكر مصطفى وهو كل ثقه في ايمن ما يخلى على طول عنده يخاف على صحته...
راح له الغرفه وكان معاه محسن منسدح يحوس في جواله..
مصطفى :
ــ ايمن عندك بنادول لو فيفادول؟
ايمن :
ــ لا..
محسن :
ــ شداب توي شايفنه البارحه يشرب بندول والعلبه متروسه..
ايمن يطالع في محسن على جنب..
محسن:
ــ بل عليك.. عطيه وبشتري لك اذا خلصت..
ايمن بقهر:
ــ طرار عندك..
محسن:
ــ انا داري اجل تشدب وهو عندك..
مصطفى :
ــ انا لله.. الحين ويش ..
ايمن قام بيطلع له:
ــ زيين هذانا باعطيك... كم وحده تكفيك.. وحده لو فنتين.؟؟
ــ العلبه كلها..
ايمن فتح عيونه:
ــ بل لويه؟
ــ مو الي لأنها لشفيق مصخن وعيب علينا نودي ليهم بالعدد نعطيهم الكرتونه يستخدمو اللي يحتاجوه.. احسن
محسن:
ــ ايه دام كذا ولا يسمونا شقة البخيلين..
ايمن متردد..
محسن يقوم له وينهب العلبه من ايد ايمن ويعطيها اياه...
وبقهر:
ــ وحريقه قلت لك بشتري لك وحده لا تموت..بل بل ...
ايمن :
ــ فارق مابغى شي منك..
مصطفى :
ــ علي ياعلي يلعن يومه بندول اللي بيخليكم تتشابقو..
الا بدخلة نوري عليهم:
ــ ليش من متى ماتشابقو...؟؟ ويش صاير الحين..
مصطفى :
ــ انا باودي البندول محسن يعلمك السالفه..
وطلع مصطفى..