ماريا فتحت عيونها : ــ هالمفعوص النتفه.. تعرف بعد تنفخ هااا..اكيد انت الغلطان وحطيت اللوم على باقر .. تسويها ..
محمد يصفق كوب الحليب في التبسي و ينكب منه شوي وبحمق :
ــ يالله صباح خير .. سديتي نفسي..
ويتركها يروح غرفتهم بياخذ شنطته ..
ماريا تصرخ فيه وبلا وعي: ــ تعااااال.. ياقليل الأدب ..
الا بطلعة وداد من غرفتها ...
ــ ويش .. مين اللي ادبه قليل؟؟ ..
ماريا بهمس مختلع: ــ يماااه بسم الله على عمري..
و بأبتسامه مصطنعه : ــ لا ماصاير شي .... صبحش الله بالخير..
محمد طلع من غرفتهم متوجه للباب بيطلع لأبوه:
ــ تقول اني قليل ادب...
وسكر الباب وراه..
وداد فتحت عيونها : ــ يعني ويش قصدش .. ماربيناه عدل
ماريا حطت السندويشه : ــ لالا.. ماقصدي كذا...
ــ اجل ويش قصدش بقلة الأدب !!
ماريا في بالها : ــ ويلييي ناقصه اني كنت الأم على شان يطلع لي ولدها بعد .. ما اخس منها الا هو....
وداد بقهر : ــ ماتردي .. صحيح معفنه و قليلة حيا و زفته ..
ماريا : ــ هييييييييه حدش عاد.. من الصبح تفلتي علي كلام..
ــ انتين اللي بديتي
ــ آسفه زين حقش علي ..
ــ ويش اسوي فيه اسفش .. يالطرمه يالبهيمه..
ــ اه اه ... اني طرمه وبهيمه.. زين مشكوره رحم الله والديش..
وتركت ماريا الصاله وراحت تخلص بقايا امورها قبل لا تروح المدرسه
وبالسياره .. قبل لا يمشو بعد ماحمت
حسن : ــ ولد عمتك وينهو.. ماناديته يروح ويانا جميع.. >> بالعاده هم يروحو مشي ..
محمد وبملل : ــ باقروه يقعد من الفجر من زمان هو في المدرسه.. >> شداب بس على شان لا ينزل يناديه ولا يبغاه يوصله خله يمشي..
ــ حشا يفتح الباب؟؟
ــ ويش دراني عنه..
حسن يضرب محمد على راسه من ورى:
ــ ياقليل الأدب رد على ابوك عدل..

ومشو للمدرسه..



باقر امه توصيه ينتبه لروحه ويهدي باله ..:
ــ اكو خالك بيروح المدرسه و اكيد بيقول للأستاذ انه خالك وعباره محل ولي امرك فلا تخاف ان شالله بيعدو السالفه على خير بس لا تعودوها.. يللا بالسرعه اطلع الحق على خالك الحين اكيد بالسياره ويا محمد....
طلع باقر يلبس جوتيه.. مالقى جوتي محمد .. عرف انه سبقه للمدرسه.. مع انه مو عوايده .. محمد مايرتاح باله الا اذا تحرش في باقر طول المشوار...
التفت لقى الكراج مافيه سياره..
كان بيطلع بدون مايقول لأمه.. بس اماني لحقته بتعطيه مصروفه نساه...
انتبهت للكراج خالي .. فسألت باقر:
ــ وين خالك..وولد خالك..؟؟ برى ينتظرو؟؟
باقر : ــ لا .. راحو..
اماني استائت من الحركه و بأستنكار: ــ راحو؟!!!!
ــ ماهي برى سيارة خالي..
اماني: ــ حسبي الله ونعم الوكيل .. ماعليه ياولدي .. روح تمشى لين توصل.. انتبه لروحك..
اماني دخلت الصاله الا ماريا طالعه بتلبس جوتيها .. قبل لا يجي عبدالأله..
انتبهت لوجه اختها مبين عليه مستاء:
ــ ويش فيش خيه..؟؟
اماني : ــ ماتوقعت هالأخو توصل فيه لهالدرجه.. تخيلي راح المدرسه هو وولده بالسياره وتركو ولدي اللي يسمع مدرسه غير لو بيثقل عليهم .. زين ما انتبه هو ينبهه ولده يقول له عن اللي يروح وياه المشوار كل صبحيه... صحيح مافيه احساس
ماريا بقهر : ــ لا هو ولا مرته ولا ولده .. هالثلاثي عجيب.. مافيهم خير.. الله يستر من فراتوه بس.... توي مشابقه مع ودادو.. بعد من الصبح
اماني : ــ ههه ايه .. سمعت الوقعه.. بس ماتدخلت خفت اتدخل وتقوم القيامه...

بيب ببييب

ماريا تركض : ــ يؤيؤ .. عبدالأله وصل..
اماني : ــ انتبهي لا تتشدخي..
ماريا لبست جوتيها مقلوب: ــ اووه مقلوووب
ــ هههههههه ساعدش الله .. مابيطير تعرفيه انتين مايمشي الا بش.. دام شهربان وياه... عساش لو قد ويه تتأخري..
ماريا تطالع اماني على جنب : ــ باي بس باي..
وطلعت..
اماني تتنهد : ــ الله يسعده هالرجال ويوفقه.. وقف وياي امس وقفة اخو...