غربة الأوطــــــــــــــــــان...

[الفراش الفاطمي]

يلا بانتظار البارت اموره مو تتاخري
تحياتيـ ..

[عطر الكون]

وين البارت اميره

[دموع الوحدة]

خلاص قررت
:(
بقرا البارتات كلها وبقعد اتابع وياش
تعبت من كثر ما ادخل واشوف خلصت لو بعدها
بس
اموووووووور
مو تلعبي بنا ولا تحطي اجزاء
ترى عندي ثانوية عامة
اذا ماقدمت زين
بقول منش هاااااااع
عاد شوفي لش
حل
خلاص يوم الخميس ان شاء الله سهرانة عليها
فقط تسجيل حضور
سأعود
موفقة
ومثل باقي الاعضاء
ننتظر البارت الجديد لووووووول

[لا تعليق]

يللا يللا ..

[أمل الظهور]

ياليل ياابو لمبه


<<ردد ياليل مااطولك

[دانهـ العشآق]

ترن ترن ~>الساعات تدق وأحنا ننتظر ..

معذووووره ياقلبي عذرتك ع الزحمه لأن مرينا فيها كلنا~>مايحس باحال إلا المجرب ..~

ويلا هالله هالله بدراستك والروايه ملحووووق عليهآآآ ..~

وننتظرك بشوق تكتبين لنا البارت بحماس ونفسيه مفتوحه أحسن من العجله وزنقة الدراسه ..~

ننتظرك لكن باللي تقدري عليه ..~

تحيآتي

[Princess]

مرحبا ياحلوين
آسفه عالتأخير من جد..
قالت ليكم امول السبب

ادعوو لي اني رجعت للدراسه في الكليه بشروط اجيب معدل عالي والا بيرجعو يفصلوني
هالظالمين... المتشرطين.. ... فلازم اشد حيلي شويات ..

دموع الوحده.. مادري متى باخلصها هالروايه ياخيه لذلك مارديت عليش ولا عطيتش حتى توقع بعدد البارتات.. لأني على حسب الأحداث اختم رواياتي مو على العدد....
مالي كار بش اذا ماجبتي نسبه عاليه لا سمح الله..
اخاف الله يبلغش السنه الجايه وتتخرجي وتصيديني في الكليه تدوسي بطني.. << ويش عرفها بش يامهلوسه..

لكن فعلن فعلن .. راسي دايرن اليوم ماركز الا بكاسة شاي و حبتين فيفادول..
والله الود ودي اريح بعد بس ماني حابه اتأخر عليكم اكثر... خصوصا ان الليله وليلة الخميس وليلة الجمعه.. راح يكون زواج بنت عمتي .. الفال للعزاب يارب .. فراح اختفي عنكم

تعاليقكم عسل على فكره.. و التخمينات رهيبه..
شي يصيب وشي يخيب .. ومن متابعتكم بتعرفو نسبة نجاح تخيلاتكم..

تعجبوني فديتكم .. وربي لا يحرمني منكم
تفضلو الجديد..
ومسامحه عالقصور..

[Princess]

بعد ساعه ..
مراد طلع ليهم بالسفره وهو مره مشتقق ..
ــ طاح الغداااا.. يللا يللا...
حبيب : ــ ياعيني ... نجي نعاااونك....؟
مراد : ــ لا .. بس استريحو واستعدو...
الكل قعد على السفره ينتظرو المكرونه العالميه..
الا بجية مراد حامل الصحن .. هو ما حطه في الوسط
الا الكل فتح عواينه..
كان شكل المكرونه مثل الكيكه ملصقه في بعضها بشكل الصفريه... لأنه لما حطها في الصحن.. على طول قلب الصفريه عليه فطاحت فيه و هي متماسكه << تخيلتو الشكل p:!!

كاظم : ــ يَه كياهي << داااويش !!
السيد : ــ ياسااااتر !
صادق : ــ كيكه دي..!! لو مكرونه !!
مراد وبعده واقف صار يضحك... قعد وهو ماسك ملاعق على عددهم.. و يغرزهم في المكرونه..
ــ مو مهم الشكل المهم الطعم... بس حتى الشكل .. ابداااع ما حصلش..
حبيب يسأله : ــ شخلتها ؟
مراد بإستغراب : ــ لويه .. شيه يشخلوها؟؟
حبيب يضرب جبهته من الدهشه : ــ آآآه ويلي
مراد : ــ لويه بعد تضرب روحك.. سمو سمو بالله انا قلت ليكم مو مهم الشكل ...
كل واحد يطالع في الثاني مو متجرأ يبدي ...
مراد : ــ لا اشادخ بكم صار لي ساعه.. يللا بسم الله انا بابدي
يوسف صار يضحك... و بدى وياه..
شوي ثنينهم ظلت اللقمه في بوزهم .. و كل واحد فيهم يطالع الثاني بإستياء ..
مراد طلع اللقمه ورماها عالسفره وصرخ :
ــ حااااااالي...
يوسف بلعها بصعوبه.. وحط الملعقه...
حبيب بأندهاش : ــ ويه..؟؟ حالي !!
مراد : ــ شدراااني..!!!
السيد : ــ هههههههههههههههههههه حطيت من الغرشه اللي غطاها ازرق!!
مراد : ــ ايه .. مو ملح هاااااااااا... سكر طلعت..
كاظم : ــ خخخخخ مشكل عاد .. شان ذقته
مراد بعصبيه : ــ شدراااني عنكم انتون بعد تحطو السكر في غرشه مكتوب عليها salt
صوت بطن حبيب من الجوع طلع..
حبيب يمسح عليه : ــ لا تزعل حبيبي .. ويش بيدي عليك ما ضبطت الطبخه..
مراد : ــ ويش نسوي فيه الحين..!!!
حبيب : ــ ههههه طبخ طبختيه يالرفله اكليه... هذا مهيرش اكليه ماحد يشاركش فيه..
كاظم : ــ ويه ويه ويه.. يعني ويه بعد..!!
حبيب : ــ آآه مادور يسألني الا انت... مافي معلوم بابا .. مافي معلوم..
كاظم : ــ دَلْ كَششششششش << ظرييييييف
حبيب : ــ اه اه.. لا تسب هاااا..
صادق بأبتسامه بارده : ــ لو ويانا شفيق اكله ولا ينرمى...
يوسف انقهر من كلام صادق :
ــ لا تغتاب الرجال في غيابه...
صادق بأستغراب : ــ ما اغتبته..
يوسف وبنبرة صوت عاليه : ــ ويش قصدك اجل بياكله الحين حنا ما اكلناه هو بياكله !!!
صادق انقهر من يوسف : ــ رووح زين...
يوسف يصفع الملعقه عالصحن : ــ قلة حيا
صادق : ــ ويش قلت انا الحين.. كلامي واقعي ماجبت شي من عندي حق ويه محمق .. مالك شغل..
كاظم : ــ هيه هيه .. التزم بحدك ولا تغلط على يوسف
حبيب يفلص كاظم وبهمس ساخر : ــ الزم حدودك ياحظي ..
صادق : ــ انت ويش دخلك بعد...!!
مراد : ــ آآآآآآآآآآآآآآآآآآآآآآآآآآآآآآآآآآآآآآآآآآه
كلهم سكتو وصارو يطلعو فيه..
مراد : ــ يلعن شكلكم كلكم زين.. مسووين شبقه على سالفه ماتسوى...
يوسف : ــ لا تسوى .. عندي انا تسوى..
الكل مستغرب اول مره يشوفو يوسف بهالأنفعال..
صادق بنبره مسخره : ــ دافع عنه..درينا خويك.. واذا رجع هنا وصل له كلامي زين...
رمى الملعقه وقام...
يوسف يصرخ فيه : ــ اخلاااق زفت... فارقنا بس..
السيد مو مستوعب ... هذا يوسف؟؟
وحبيب اعظم منه.. قعدو واحد عن يمينه وواحد عن شماله..
السيد : ــ صل على محمد اخوك ويش فيك عصبت فيه لهالدرجه
يوسف : ــ اللهم صل على محمد وآل محمد.. ماتشوفه كيف يتكلم على الرجال في غيابه..
حبيب بهدوء : ــ ماقصده سوء .. قصده حرام النعمه تنرمى ولو شفيق موجود ما يمانع بياكل...
يوسف يطالع في حبيب بنظره تخوف ... : ــ انت بعد تقول زيه!! درام قالو لك شفيق !!؟؟
حبيب : ــ يمه ويش فيك... خيوو انت ادرى بشفيق .. مو ياكل الشي المعفن و ما يمانع و ...
يوسف يقاطعه : ــ انت ماتدري ويش فيه لو تدري عذرته ..
السيد : ــ انا لله... هدو ياشباب... والله المسأله ما تحتاج كل هالأنفعال
كاظم و بعفويه : ــ وياه هوس ..
يوسف وبهدوء : ــ شفيق يوم الأربعا بس وصل الديره تنوم بالمستشفى... و طلع الخميس ..
السيد : ــ ياسااتر .. خير ويش فيه وويش دراك..
صار يوسف يحكي ليهم قصة شفيق...

قيصر بهدوء : ــ سامي .. نِمِت ؟؟
سام : ــ لا ...
قيصر : ــ آني أريد اسألك سؤال.. واتمناك تجاوبني اعليه بصراحه..
سام : ــ على حسب..
قيصر : ــ لا .. بتجاوبني ..ان شالله.. إنت شنو مخبي في حياتك !!؟؟
سام : ــ ياليتني اعرف..
قيصر : ــ؟؟!!
سام يتنهد : ــ ما اذكر شي الا إني لقيت نفسي مع شخص صار يهتم فيني و يعتبرني مثل ولده ويخاف علي ...بس كل هذا كان... بمقابل
قيصر : ــ مقابل ؟؟ شلون يعني!!
سام يبتسم ويرد عليه بالأنجليزي : ــ لا ينبغي عليك معرفة ذلك...
قيصر : ــ إيه .. براحتك...

شوي..قيصر قام بالسرعه وهو ماسك كتاب ثقيل من كتبه و يرفعه بيفلع به راس سام...
سام انتبه له و دفه عنه: ــ ويش فيييك
قيصر : ــ أريد ارجع ذاكرتك.. بلكت تحچي و تريحني...
سام : ــ هههههههههههههههه هذا وانت دكتور تبغى تكسر راسي ..
قيصر يقعد وبقهر : ــ اففففففففف .. ولك يابه سكوتك هاي دبحني .. ما تخاف ابلغ عنك الشرطه.. شقد انت واثق فيني !!
ــ كل الثقه ..
ــ ما اصدقك.. كل الثقه و آني ماعرف عنك كُل شي .. بس اسمك و لا هو اسمك بالأساس..
ــ والله لو اذكر شي او اعرف شي راح اقول لك..
ــ آني ما ريد الماضي.. أريد الكاين فيك هالسا.. واسباب الضربه هاي اللي بذراعك.. اذا على هوا ما تقول انك واثق ...
سكت شوي..
ــ سامي .. سامي.. سااامي... خابرني اصدق إنك نِمت.. طيب على مودك . .. الله كريم...
وصار ينشد بهدوء موال.:
ظلمةوالدرب هواي ابعيد
وسفه بعد موخلصن سنيني
فايت قطارالزمن وآني انتظر هناك
ماخذ احباب القلب وآني ناسيني
الحزن امغيم علي ويمطرهموم
والفرح زعلان وما عاد يجيني
امقضي العمر بل الحسرة والونات
وجمرة الغربة شكثر تچويني
اذا جوعان اشبع بعبرة ألم
واذا عطشان دمع العين يسقيني ...
ولابيت
طحت افـ .. بير الحزن والحسرة.. ولا...بيت
وروحي لنداء الوطن لبت..ولا...بيت
وتالي لاوطن عنـــــــــدي... ولا...بيت
غريب بلا وطن واشقد خطية !!
ومات ابن العراق بس وصاني وصية
ومن تجي بغدادقل إلهالاتلطم عليه
لان قلبها مايتحمل مصايب ولا اذية
وسلم لي اعلى دجلةوالفرات هناك
وقول إلهم ابنكم اشقد عطشان مَـيّه
بس وسفه عليه لا ما تلحقون
لان صارت اسرع منكم هل المنية
و إجت بغداد تنحب وتبچي و تون
على ابنها وتلولي هيّه
دلل لوه يل الولد يبني دلل لوه
فراقك يالحبيب شقد يصعب عليه..

سام عاطي ظهره لقيصر.. سرح في عالم ثاني مع الموال ... وبهدوء انسلت دمعته ...

ما سمع قيصر الا سام يزفر زفره من قلب .. : ــ تدري ياقيصر.. رغم الحزن والهم اللي فيك .. احسدك..
قيصر : ــ هههههههه من شوي چنت نايم هالسا للحسد صحيت.. قالوها محسود الفقير بموتة الجمعه.. على شنو تحسدني ياحسره..؟؟
ــ احسدك.. تذكر اهلك وناسك.. تحس بالحنين ليهم.. تعرف بلدك.. حتى وان كانت ظروفك اليوم قاسيه عليك و مستحيل انك ترجع له .. يبقى فيه امل انك ممكن في يوم ترجع.. عكسي انا..
وبهدوء و الأسى يتكسر في كلامه : ــ لا وطن.. لا بيت.. ولا هويه...
قيصر يحط كفه على كتف سام : ــ آني شقلت لك.. حبيب قلبي .. راح اساعدك باللي اقدر عليه.. بس افتح لي قلبك شوي...
سام يحس بأريحيه مو طبيعيه مع قيصر .. و الود وده مايرجع للعصابه ويفتح له قلبه.. بس خايف عليه يتأذى من طرفهم او يصيبه أي شي لو حاول يختفي عنده وعرفو مكانه..
يحس نفسه ورط روحه في مشاكل ماليها آخر....وفي باله...

ــ اذا جى الوقت المناسب ياقيصر اوعدك .. بتعرف كل شي ...

[Princess]

في بيت ابو مجتبى وبعد وداع أحمد... الشبقه قايمه بين باقر و ايثار .. و ملاحق من وداي لوادي .. امير مشغول ويا الرسم...
وهم يراكضو باقر بالغلط داس على اوراق امير و تكسفت بعض رسماته..
حمق امير وصار يصارخ.. وشال شوي زين من الألوان في ايده ورماهم على باقر .. وقام له يلحقه..
باقر خاف منه خصوصا انه اكبر بـ 5 سنوات تقريبا فيقدر عليه لو صاده بيدوس بطنه... ينسى امر ايثار اللي كان يلحقها يبغى يطيح فيها بدست و يصير يراكض لا يصيده امير..
ايثار وقفت وصارت تشجع امير :
ــ ايواااااااا عمي صيده .. نتفه.. تنتيف .. هالغبي .. تستاااهل .. هههههههههههه...

وبالغلط تعثر امير في واير التلفون و فصله ... وكان هو التلفون الوحيد في بيتهم...

ولا ارتاح امير الا لما صاد باقر ومسكه بين اياديه وصار يضرب يضرب فيه..
باقر يصارخ ويصيح..
جت نور بالسرعه : ــ وييييش فيكم... ؟؟
باقر : ــ الحقيني..
صارت نور تحاول تفك باقر من بين ايادي امير .. اول مره تشوف اخوها بهالعدوانيه..
ــ على ويييش عااااد..
ويرفع امير ايده و بالغلط تضرب عيون نور ..
نور عيونها حساسه بالمره من يصيبها شي ضربه لو غبار على طول لازم تغطيها...
نور : ــ آآآآآآآآه عيوني ... امااااني تعالي لولدش شيليه..
باقر : ــ وه وه اباموت.. خلاص اميرررر خلااااص و الله ماكنت ادرررري
ام مجتبى توها داخله البيت راجعه من عند مرأه ،، شافت الوقعه وامير فوق باقر ومخمد على انفاسه وبصرخه. :
ــ اميررر
امير وقف على طول .. وعيونه شابحه... يطالع في امه اللي كانت مره معصبه .:
ــ ويش صاير ؟؟ على ويش هالعركه...!!
امير و بدون سابق انذار يرد عليها بصريخ :
ــ وررق .. وررررررق ...
ام مجتبى وقفت وهي مذهوله...:
ــ ورق ... !!
وتطالع في نور : ــ قال ورق !!!
ايثار بفرح : ــ الله حفظها.. مكحين صرت كل اقول له ورق ورق لين عرفها.. شاطر عمي..
ام مجتبى و على وجهها يبين الفرح الممزوج بالدموع : ــ يالله ياكريم تهديه .. يالله تغير حاله و لا تخيبني...

ابو مجتبى داخل الغرفه يصرخ حد ماعنده : ــ يـــــــــــــــــــــاعرررب >> طريقه جديده مبتكرنها في مناداة ام مجتبى ... ام مجتبى يقهرها هالنداء .. وابو مجتبى يستخدمه عناد فيها اذا قاهرتنه من شي
ام مجتبى ماردت عليه ..
رد صرخ.. : ــ يااااااااااااااااعرررب...
ام مجبتى حاقره .. راحت المطبخ لقت نور تحط قطره في عيونها و تستعد لتغطيتها..
ام مجتبى : ــ ههههه ساعدش الله ماقول الا الله يعين اللي بياخذش..
نور منقهره و متعوره : ــ شدخله... !!
رد ابو مجتبى : ــ عرررب و نااايبه..
ام مجتبى : ــ انا لله
وترد عليه : ــ ويه يارئيس البنقاليه
وتروح له الغرفه..
ابو مجتبى : ــ هههههههه صرتو بنقال !!
ام مجتبى : ــ مو حنا..
ــ والله هذا قولش .. وكلكم راع وكلكم مسؤول عن رعيته..
ــ هههههه غربال.. ويش تبغى..؟؟
ــ قلاص ماي..
ــ علي بن ابي طالب حلال المشاكل.. كل هالصريخ فزعت عرب الأمه.. على قلاص ماي.. لعن الله يزيد
ــ لا .. قلاص ماي حق ابل ريقي قبل لا ابدي السالفه..
ــ ياجميل الستر يالله..

محسن يسأل نوري : ــ كلمتو مصطفى؟
هاني : ــ توي البارحه اسأله ....
نوري : ــ الحين نكلمه...
ايمن : ــ تو الناس.. تفرغت حسنه من صلواتها...
محسن : ــ بل .. حسنه.. أي حسنه بعد..؟؟ امثال شياب خخخخخ
أيمن : ــ ام اللي جابتك..
محسن : ــ بل عفر سبه دي.. استح ها .. استح..
ايمن : ــ اف منك..
محسن : ــ صاير زفوت منتحس تدري لو ماتدري..؟!
هاني : ــ اففففففففف منكم.. انا مانى داري شلون متحملين بعض ثنينكم في غرفه اشوى مانى وياكم
ايمن : ــ احقره..
محسن : ــ هو والطوفه واحد..
ايمن : ــ انا طوف ..
محسن : ــ لا جدار..
ايمن : ــ هي هي هي بااااايخ..
محسن : ــ زيييك..
نوري : ــ هيييييييه زي الجهال سكتو .. هلا مصطفى هلا حبيبي.. اخبارك..
مصطفى : ــ هلا نوري .. الحمدلله تمام..
ــ اخبار الأهل ..
ــ وياك بخير... انتون ويش مسويين.. ماعليه مسامح قول لهاني مارديت البارحه عليه جوالي كان صامت..
ــ اهاا.. توقعناك نايم.. ويش بتجي اليوم ولا بعد بكره ..<< السبت مصطفى ماعنده محاضرات..
ــ لا افكر اتأخر شوي .. اتطمن على الوالده اكثر
ــ اها.. تقوم بالسلامه ان شالله... الا ويش اخبار شفيق ؟ ويش سويت وياه روحتكم..؟؟
مصطفى و صوته تغير:
ــ شفيق.. شفيق الله يسلمك اسأل يوسف عنه ويش اخباره ويعلمك..
ــ اوف.. ليش ويش سوى لك..
ــ سالفه طويله عريضه... لا تخسر روحك رصيد و زي ماقلت لك تبغى تعرف ويش فيه اسأل يوسف..
ــ زين ... نشوفك على خير مع السلامه..
سكر نوري الجوال والفضول ذابحنه:
ــ ما يندرى شفيق ويش مسوي لمصطفى.. يقول لي اسأل يوسف..
و يدور في جواله على رقم حبيب .. هو الوحيد من الجماعه اللي عنده رقمه..

ام مجتبى تضرب صدرها...
ــ ويه.. بعت البقره !!! ويش هالوقعه.. لويه.....؟؟؟
ابو مجبتى بإنكسار:
ــ مفكره انتين باقدر ارجع فلوس ابو رمزي خلال سنه... بعتها و بكره روحي ودي له الفلوس...
ام مجتبى : ــ عاد خساره توها ولدانه وحليبها وافر... حوبة ولدها العجل يوم نفصله عنها.. هذا هو لا رضع منها ولا حنا تهنينا بحليبها.. يللا على الله العوض..
ابو مجتبى يطالع في ام مجتبى وببرود مقهور ومخيف :
ــ متحسفه على بيعة البقره اما بتش ماكنتي متحسفه على رهنها بهالطريقه ....
ام مجتبى حست الأرض كأنها تزلزل من تحتها.. من شكل ابو مجتبى وهو يكلمها بهالطريقه..
تلعثمت مهي عارفه ويش تقول : ــ ويش بيدي.. غصب عني.. متأمله ان بندبر المبلغ..
ابو مجتبى ينسدح و يغطي وجهه بالغتره : ــ اششش اششش... لا تتأملي .. ولا تعيديها.. واحمدي ربش النفس عليش راضيه و هالمره بامررها لش هالحركه .. مره فانيه ادري بش تصرفتي من وراي حسابش بيكون عسير ..
ام مجتبى وبخوف : ــ ان شالله..
وفي بالها : ــ ياعلي والله طلعت يا ابو رمزي خوان هذا واني مأمنتنك ولا كأني كلمتك لين ادبر المبلغ.. ويش خانتي الحين اني في نظر ابو مجتبى... !!

نوري يقص على محسن و ايمن وهاني سالفة شفيق بعد ما ركب ليوسف وعلمه بها..
محسن : ــ ياااربي مسكين هالشفيق مبين عليه اصلا انه فيه شي مو طبيعي
هاني : ــ والله و لا في الأفلام سالفته.. الله يعينه ويعوض عليه..
ايمن : ــ يبغى له يتعالج..

وداد تداور في البيت مابين غرفتها و الصاله ... هدوووء .. وفي بالها:
ــ صاير الجو ممل ... << اشتاقت للشبقات..
توجهت لغرفة ماريا بتشوفها ويش تسوي..
فتحت الباب شوي شوي لقتها نايمه..
سكرت الباب وهي معصبه : ــ نايمه هالحزه وبكره مدرسه .. خيشة نوم هالبنيه...
مسكت جوالها و اتصلت على ازدهار.. لقت رقمها مقفل ..
دقت على شقتها.. ماترد عليها..
وداد : ــ افففففففف منش انتين بعد ماصارت دي المفروض اني اللي انقهر انه شافش مو انتين..
شوي وصار بليس يلعب في راسها وتتذكر سؤال ريلها مين هالمرأه و هي الغبيه تجاوبه وتعرفه عليها .. لا و تقول له هذي هي اللي كل اتكلم عنها ....
ــ غبيه اني غبيه.. كأني سويت دعايه لصديقتي عند ريلي..
صارت تضرب في راسها : ــ خبله اني خبله..

فرات : ــ امااه.. ويش فيش !!

وداد انحرجت : ــ هاا.. ولا شي .. راسي يعورني شوي..
ــ اماه زهقانه اني...
ــ ويش اسوي لش ...
ــ محمدو في المجلس ويا اصحابه يلعب سوني.. و علاء ما يعرف يلعب وياي.. وحشتني ايثار .. متى بترجع..
ــ اف .. ماصارت دي يومين غابو فيهم.. ياليت على طول يظلو هناك.. خلنا راكدين
وفي بالها تقول : ــ لا ان شالله.. صاير البيت بدونهم صخه وملل << عن جد وحشتها الشبقات..
شغلت وداد التلفزيون وصارت تفرفر فيه حطت قناه من القنوات .. ولا انتبهت لشريط الأخبار الا كاتبين خبر :
ــ انفجار بئر بترول في الخفجي تابع لشركة ............ اسفر عن وقوع عدد كبير من الضحايا و اصابة العديد بجروح خطيرة...

وكانت نفس الشركه اللي يشتغل فيها مجتبى..
فتحت عيونها و فهت شوي زين...

حست روحها مهي مصدقه اللي قرته...!!

دخلت على ماريا وصارت تقعدها وهي ترتجف :
ــ مارريااا.. مارريااا قومي .. ماررييووووو...
ماريا وبتعب وهي تتثاوب حد ماعندها: ــ هاااااه ويش تبغي..
ــ قومي قومي كلمي اماني اختش .. قومي عاد..
ــ اكلمهااا لويـــــــــه..
ــ قومي اكو الأخبار يقولو انفجر بير بترول في شركة ريلها..
ماريا فتحت عيونها وبذهول : ــ هاااه...

يوسف ومراد في الغرفه قاعدين... لحالهم...
يوسف يفكر بطريقه يفتح فيها سالفة مجلد الصور مع مراد,, ومو عارف من وين يبدي..
وتوه بيتكلم.. الا جوال مراد يرن.. مراد يطالع في الرقم و يتأفف من قلب:
ــ افففففففف ناقصنه .. هالمتفرغ...
ويرد بحمق : ــ مو قايل لك لا تتصل خلاص .. بطلت اضبط انا... شغل التضبيط طلقناه.. فكني يا اخي ... هااا... ويش ... ولا حتى بألف .. !! نسيت آخر مره ويش سويت..؟؟ ابلشتني وطحت في مشكله من تحت راسك... خلاص مالي شغل... شوف لك احد غيري..
سكر مراد الجوال ورماه على جنب وهو مره معصب ..ويكلم في روحه
ــ يلعن شكله هالـ..... الــ......
يوسف فتح عيونه الكلام كان من العيار الثقيل : اف.. شوي شوي ...
مراد : ــ تروح وياي؟
ــ وين؟
ــ نجيب للشباب اكل من برى ضريبة خرابي للمكرونه مساكين اكلو نواشف .. لا ينشفو في العشا بعد..
ــ اوكي .. مشينا...

[Princess]

شغل مراد سيارته.. الا هي ام بي سي اف ام.. الأخبار...
يوسف يسمع الخبر..
ــ لازالت التحقيقات جاريه في شأن حادثة انفجار بئر بترولاين التابع لشركة ...... بالخفجي والذي اسفر عن مقتل البعض و تعرض الأخرين لأصابات خطيرة..

يوسف فتح عيونه...
ــ شركة... شركة .. الـ.......
مراد مستغرب : ــ ويش فيك؟؟
يوسف وهو متبلعم: ــ شركة صهري.. هناك.. يشتغل..
مراد : ــ اوووه .. لا ان شالله ماصابه شي .. اتصل على اختك وشوفها..
ماريا تتصل على اماني ..
ان الهاتف المطلووب.. لا يمكن الأتصال به الآن... >> مخلصه بطاريته وما انتبهت له اماني ..

يوسف نفس الحاله.. ويتصل لمجتبى .. نفس الشي جواله مقفل ...

تتصل ماريا بيت ابو مجتبى .. يرن يرن ولا احد يرفعه.. << مفصول الواير..
يوسف : ــ اففففففف مشغول البيت.. هذا وقته
سكرت ماريا السماعه الا يرن التلفون رفعته وهي متصروعه.. الا هو يوسف ..
ــ هااا خيه.. وين اماني.. ويش صاير؟؟
ماريا وصوتها يتقطع وهي مره ترتجف وتحس نفسها مو بالدنيا:
ــ مادري.. مادري... اتصلت ماترد جوالها مقفل وبيت عمها مايردو.. يوسف خايفه اني.. مادري ويش اسوي..؟؟
ــ هدي هدي خيه.. وين حسن؟؟
ماريا بدت تصيح:
ــ في الجبيل .. محولينه الحين هناك.. ومايرجع الا متأخر..
يوسف يمسح وجهه : ــ انا لله.. و الحل.. !! كلمي زين اخت مجتبى .. المشكله ما عندي رقم اخوه.. أي احد من هالبيت ماعرف رقمه..
ماريا خلاص تحس نفسها في فلك عظيم ودموعها تتناثر بلا شعور..:
ــ ماعندها جوال... يوسف .. يوسف اباروح بيت ابو مجتبى..
ــ مين بوديش ؟؟
ــ باكلم عبدالأله جارنا.. يوديني.. لازم اروح ماني قادره افكر..
ــ زين روحي وبس توصلي وتشوفي اماني كلميني..

سكرت ماريا و اتصلت على طول بيت جيرانهم..
ــ شهربان.. غناتي الحقيني .. وين اخوش..
شهربان انصرعت : ــ ويش فيش غناتي !! ويش صاير !! عبدالأله في الحلاق..

ومن عرفت شهربان السالفه على طول اتصلت في عبدالأله.. اللي كان منسدح توهم حاطين الرغوه للحيته.. الجوال يرن مره ومرتين..
عبدالأله : ــ دقيقه بس..
رد على اخته وهو محمق: ــ ويش فيش يالمتفرغه .. هذا وانا قايل لش باروح احلق دام ما رديت عليش تصري على الأتصال لويه؟؟
من قالت له شهربان السالفه .. و ان ماريا حالتها حاله..
مسك عبدالأله الفوطه ومسح الرغوه: ــ جاي جاي.. يلا زين..

مراد يحاول يهدي في يوسف اللي كان متوتر .. ومو عارف ويش يسوي له ..
لا هو عارف يروح وياه مطعم حق يشترو الأكل ولا عارف يرجعه الشقه...
صار يدور وياه في الشوارع .. من وادي لوادي .. عل وعسى يوصله اتصال يطمنه...
شوي خشو في وادي ما يسمعو فيه الا صوت تفحيط ححححححححححححح
ودخان وسياره تطفر ليهم فجأه......

الى الملتقى..

[أمل الظهور]

ياااااااااااعلي ويش بيصير على مجتبى عاد توني بقول لك هالمجتبى مثل لبن العصفور


حتى ماسمعنا مرته تكلمه عفيه عاد امور انتي حبابه مو تموتي الرجال اوكي


علشان خاطر ام مجتبى اللي ماتهنت بهالاولاد <<بتقلبها جنازه من الحين


وصدق خوان بو رمزي مالت عليه وعلى وجهه بس زين ابو مجتبى مسكين باع البقره

ولايبيع بنته تفشلت عرررررررررب هههههههه


وهههههههههه مع طبخه مراد توقعنا يبدع وتصير حركات ماهقيناها منه


خخخ ودادوه اهـ منها مسويه للروايه جووو اخيرا ضربتها الغيره والوسواس


وويه ياساتر ويش هالتفحيط وهالوادي لايكون ذاك الوادي اللي نروحه اذا حبينا نغامر

<مصيرها بتتكفخ


يسلم فكرك غناتوه

[طفلة تحت المطر]

يآآلله سترك

ان شاء الله مجتبى مآآفيه إللآ العآفيه

و يوسف ومرآد !! والسيآآره إللي متجهه جهتهم ؟!!

يمكن هدي السيآآره هي السنوره السودىآ ؟!

بس صرآآحه لوو أني من قيصر كآآن شدخت سام بالكتاب كآآن يتدكر

وعبدالإله مآآ بيهون عن مآآريآآ

بس أبوو مجتبى ويش درآه عن الرهن ؟

**

ننتظرش

[جـــــوان]

اني متابعة ليكم

حتى لو بدون تعليقات

البارتات روووعة

[Habit Roman]

ياويلي ويلاآآآآآآآآآآآآآآآآآآآه أمور عفية لاتموتين مجتبى مسكين صاير ماليه دور في هالرواية على الاقل خليه يتحجى حجوتين ....<<< نقلبت عجوز

ويوسف ومراد ... إن شاء الله مايصير ليهم شيء بدون شيء يوسف متوتر وبعد يصير ليه شيء كان خواته يصيرون لاحول ولاقوة

ودادوه زين منها جلست ماريه ماقامت تتشمت كعادتها

عررررررررررررررررررب عجبتني مرررة

تسلموا حبيبتي

ننتظر البقية

تحياتي

[الفراش الفاطمي]

روعه هالبارت
تعليق
هاااااااا اميروه بدينا بالقتل <<<حشا مجرمه
لاتقتلي مجتبى عااااااااااااااد<<<< عفر هي ملك الموت
ان شاء الله ماصار شي ليوسف ومراد
ومسكين كاظم بسرعه انتشرت قصته
وبس
بانتظار البارت الجاي
تحياتيـ . .