غربة الأوطــــــــــــــــــان...

[الفراش الفاطمي]

الحمد لله ع السلامه اموووووره
تقبل الله <<<<<<< ادري متاخره بس الظروف وماتسوي
التعليق
اتوقع ان سام هو المفقود
بس فاقد الذاكره
اممم هيك خطر على بالي
وبــــــــس
تقبلي مروري
تحياتيـ ..

[Princess]

مرحبا

الف عافيه
يسلمووو على التعاليق الحلوه.. تابعو وتعرفو نتيجة تخامينكم..
مشكورين على الصبر...

يقولو .. الصبر مفتاح الفرج
وقد ماتصبرو قد ما اعطيكم..

هالمره الجزء بعد طويل قد الجزء السابق..

تفضلووو..

[Princess]

ترك سام جويل على اتفاقهم..
وتوجه الى الفندق بيشوف الرجال ....
قلبه كان يدق بشكل مو طبيعي.. وهو يتذكر موقفه مع الرجال .. خصوصا استغاثته ياعلي..
صداع يرافقه من بعد هالحادثه بشكل مو طبيعي...

يــاعلي ..
يــــــــــاعلي ...
يـــــــــــــــــا علي...

.
.
.
كلما قلبني الهم سأشكو ياعلي ..
حينما يهزمني الدمع سأبكي يا علي..

نوري : ــ صطيييف جوالك يرن..
محسن : ــ مصطفى يسبح ..
ايمن كان قريب من جوال مصطفى ويشوف مين المتصل ..
ــ ابوه .. المتصل ... الله يستر..
نوري : ــ لويه يعني..
ايمن : ــ مادري عن نفسي امي عادي متعود تتصل بين فتره وفتره .. بس ابوي ما يتصل الا اذا فيه شي شايد..
محسن : ــ بل .. فال الله ولا فالك ..
هاني بهمس : ــ شخبار مصطفى هالسنه..؟؟
نوري : ــ والله ياخوك على حطته.. الهدوء سنه عن سنه بيذبحه.. آخر شي اشك بيصير اطرم..
هاني : ــ سمعت امه بعد تعبانه نفسيتها..
محسن : ــ المرجع لله.. من يوم ما ماتت دانه و امه حاطه اللوم على روحها انها اهملتها.. مرضت و تعبت نفسيتها... الله يجبر خواطرهم ويعوضهم ان شالله..
نوري : ــ الله كريم يشد حيله ابو صطيف و يتخرج ويتوظف .. يتزوج ويجيب دانه مصطفى..
هاني بأبتسامه عريضه : ــ اتمنى .. وربي .. احبه هالمصطفى.. هادئ وحباب و متعاون و طيب ...
محسن : ــ أي والله.. ما للشله طعم بدونه..

ايمن ساكت.. هو الوحيد اللي يتجاكر وايد مع مصطفى.. يحس بتأنيب الضمير ... على هالتصرفات السيئه منه .. بس ماعمره اعترف ولا بين لمصطفى ولا ذرة اسف ناحيته..

شهربان .: ــ الوو .. السلام عليكم..
ايثار : ــ عليكم السلام...
ــ موجوده ماريا..؟؟
ــ ايه دقيقه...
حطت ايثار السماعه ونادت :
ــ خاااالتي .. خاااااله .. تلفووون
كانت ماريا منبطحه في غرفتها .. بس صاحيه.. فقامت تشوف مين المتصل ..
الا بطلعة وداد وهي متعدله وحركات بعد ما عدلتها ازدهار وراحت البيت ...
وصارت تصرخ على ايثار ..
ــ مين المتصل.؟؟؟ وحق ويه رافعه التلفون انتين اصلا؟؟
ايثار تبلعمت : ــ صاح واني قريبه ورفعته.. يبغو خالتي ماريا
ــ تخلخلت ضلوعش .. اذا صار بيت ابو اللي جابش ارفعي تلفوناته.. وخري بس ..
وسكرت السماعه في وجه شهربان ..
شهربان بعد ما سمعت الصريخ كله : ــ بل ... صاقعه ..
ايثار .. صارت تتأمل في وداد اللي اول مره يشوفوها بمكياج كذا في غير المناسبات...
وداد انتبهت عليها..
ــ خير .. ويش تطلعي ..؟؟
ايثار ابتسمت.. وببراءه :
ــ خاله.. بتروحي عرس ؟؟
وداد حست بالفشله ... يعني ويش معروف عني ما اتعدل الا لعرس..
ــ مو شغلش.. فارقي لأمش ..

تركت ايثار وداد .. التفتت وداد لقت ماريا جنبها..
وداد بأرتباك : ــ قمتي .. صح النوم..
ماريا ساكته وتطالع في وجه وداد..
رن التلفون .. وداد وماريا مدو ايدهم بيرفعو السماعه..
ماريا خافت من وداد فتراجعت .. وداد:
ــ الوو..
شهربان اختلعت.. : ــ سلام.. موجوده ماريا؟
ــ لأ .. حياش ..
طوط طوط طوط
شهربان فتحت عواينها :
ــ بل صدق منتحسه.. << متعوده عليها من تتصل على ماريا و ترفعه وداد مافي امل تصيد ماريا..
ماريا ...: ــ مين المتصل؟
وداد : ــ غلطانين ..
ماريا : ــ مرت اخوي .. حليو اللبناني عليش..
ــ أي لبناني.؟
ماريا ترفع حواجبها و تأشر براسها على مكياج وداد..
وداد : ــ تسخري ويا وجهش...
ــ لا والله ما اسخر ..
ــ لا تسخري ويش هالحركه البايخه اللي سويتيها..
ــ ماسويت شي .. !!
ــ شايفه حالش انتين على ويش هااا..
ــ الحين ويش صااير...!!
وداد تغير الموضوع و تعلي صوتها :
ــ ولويه غايبه عن المدرسه اساسا.. تتميرضي ماصارت دي..
ــ تعبانه كنت..
ــ الله والتعب دا اللي يكسر بعضه..
ــ ويش ضارنش بغيابي..!!؟؟؟
ــ بس .. لعانه.. عله على شبدي احسش .. ماشتهي اشوف وحده قاعده لا شغله ولا عمله..
ــ يعني لازم اكرف حق ترتاحي حضرتش
ــ حضر لش جني في ليلة مافيها ضوا قمر
حسن بيدخل البيت ويسمع صريخ وداد...
ــ ويش صاير فيكم..؟؟؟
وداد معصبه كانت ومكشره .. هي لفت وجهها الى حسن بمكياجها
عفويا حسن شهق شهقه من تكشيرتها و الألوان :
ــ بسم الله.. سكنهم مساكنهم

هو قال كذا.. زيدي ياوداد قهر :
ــ ويش شااايف .؟؟؟. جنيه؟؟؟. لو ام حمار.. ؟؟؟ لو ام رعام..؟؟؟ لو الرااااعيه..؟؟
حسن : ــ لا تصرخي ولا ترفعي صوتش علي.. وبعدين لويه هالتعصيب .. مايليق التعصيب ويا هالصبغ ..
حمقت وداد وشوي وتنفجر ..
دخلت غرفتهم.. وبالنشاف ومزيل المكياج صارت تمسحه وهي تسب وتلعن...

حسن : ـ افففف .. انا لله و انا اليه لراجعون.. الله يصبرني بس...
جى بيفتح باب الغرفه لقاها مقفله..
ــ وداد.. افتحي..
ماترد ولا تفتح..
حسن عصب :
ــ يلعن ابو شكلش .. بتفتحي لو اكسرهالباب واكسرش وياه..
ماريا مسكت اخوها تهدي فيه..
حسن معصب :
ــ الواحد يرجع من العمل تعبان يبغى يرتاح يلاقي هم وكدر .. ضيق الله عليش عيشتش من مرأه..
فرات في غرفتهم تراقب الشبقه وتصيح..
علاء نايم قعد من الصريخ وصار يصيح..
محمد ماهو في البيت طلع ويا الصبيان.....

اماني وولادها مسكرين عليهم باب المجلس .. ابعد عن الشر وغني له..

ماريا تسحب في اخوها وتهدي فيه:
ــ ابو محمد روح نام في غرفتي .. اخزي بليس ..
ــ الله يلعنها ابليس هي ابليييس..
طلع حسن من البيت وهو مره معصب حده...

ظلت ماريا بالصاله مبهوته ومتصروعه ماتسوى عليها هالغزل في وحده ما تستاهل!!...
وصارت تهدي في ولاد اخوها ...

شهربان : ــ اففففففف ويش اسوي اني ويا هالعله.. متى ياماريو تاخذي لش جوال وافتك من هالحاله..
عبدالأله سمع تحمق شهربان : ــ ليش ويش صاير..؟؟
ــ العله مرت اخوها كلما اتصل ترد هي وماترضى اكلمها..
ــ ليش؟؟
ــ ليش بعد .. كأنك ماتعرفها .. صايره عليها اعظم من مرت ابو..
تغيرت ملامح عبدالأله
شهربان : ــ احم... ويش فيك صرت حزين..
ــ ها.. لا بس كسرت خاطري..
شهربان تجاكر فيه : ــ إيه .. صعب كسررررر الخواااطررر..
عبدالأله يطالعها على جنب..
شوي ..
عبدالأله : ــ ويش رايش اخليش تكلميها بطريقتي الخاصه..؟؟
ــ شلون..؟؟
ــ اتصل انا..
قاطعته شهربان : ــ مجنون انت.. ويش بتقول ..؟؟ موجوده ماريا؟؟
عبدالأله يدف راس اخته:
ــ انا قايل مخش ملوخيه.. عبيطه باقول انا عبدالأله بسأل بس اذا بكره بتروح بنتكم لو لا ..
اختي حاولت تتصل عليكم كذا مره ماعطيتوها فرصه..واذا ردت علي بإيه او لا.. باقول ليها ممكن اختي تبغى تكلم بنتكم حق امر ضروري وبما اني رجال اذا هي تستحي على وجهها بتوافق .. اذا هي قوية عين حدها بتقول لي بعد لأ ..
شهربان : ــ تتوقع يعني تضبط...ولو اني اشك انها قوية عين..
ــ حنا نجرب ما بنخسر شي ..

اتصل عبدالأله..
وكانت ماريا بالصاله لحالها..
ردت هي : ــ الو..
عبدالأله : ــ السلام عليكم ..
ــ عليكم السلام..
عبدالأله نسى جزء من النص المتفق عليه وعلى طول سأل :
ــ ماريا بتروح بكره المدرسه لو لا؟
ماريا فتحت عيونها .. رجال متصل بيتنا ويدري بي غايبه ويسأل بكره باروح المدرسه لو لا..
بأرتباك سالت : ــ مين معاي؟؟؟
عبدالأله ارتبك ازيد : ــ انا.. عبدالأله .. سواق الميكرو.. بس اسأل على شان امر عليها لو لا .. اختي اتصلت من شوي و ..
ماريا جتها ضحكه.. وقاطعته بعفويه : ــ اني ماريا... بكره باروح ان شالله تسلم اخوي...
هي ماقالت هالجمله.. عبدالأله سكت .. وقلبه صار يراقع.. ومد السماعه على شهربان وقام عنها..
شهربان : ــ ويش فيه اخوي..فهّى فجأه..
ــ الوو..
ماريا : ــ هلااا شهروبه..
ــ اهلين حظي .. سلامات ماصارت دي .. شحالش..
ــ الحمدلله.. ههههههه ويا وجهش ويش هالحركه انتين واخوش..
ــ ويش اسوي انقذنا..
الا بطلعة وداد من الغرفه شافت ماريا ماسكه التلفون.
ــ اففف .. لا تطولي ابغى التلفون..
شهربان سمعتها: ــ بل طلعت الراعيه ..
ماريا بهمس : ــ ايييه .. اباسكر المهم بكره باروح ومشكورين عالسؤال
ــ افا عليش بس غناتي.. خلاص بكره نكمل سوالفنا.. باي ..

سكرت ماريا ودخلت غرفتها.. الوضع جدا وياها طبيعي.. هي تعتبر عبدالأله زي اخوها من صغرهم لعبت وياه وكبرت وياه .. و آخر شي يوديها المدرسه في الثانويه.. ابدا ماكانت تحمل ناحيته أي عاطفه غير الأخوه..

بعكس عبدالأله اللي من سمع صوتها وشكرها له هاللحظه تلخبط كيانه .. ويحس نفسه في عالم آخر ...

شهربان تدري بأخوها.. وتدري بصديقتها.. كانت دايما تحاول تغير احاسيس ماريا تجاه اخوها بأي طريقه.. تجاكرها .. تمزح وياها.. عل وعسى تبين أي شعور يخليها تبني على اساسه ان ماريا ممكن تفكر في عبدالأله كزوج مستقبلي ..

عبدالأله اللي ينتظرهم متى يتخرجو حق يتقدم ليها ... على بال مايكون نفسه في هالفتره و يجمع مهرها...

شهربان خايفه على اخوها من الرفض .. خصوصا ان في كذا حوار بينها وبين ماريا تأكد ليها ماريا انها ماتفكر في الزواج بعد الدراسه و تفكر تشد حيلها حق تروح بعثه تدرس برى .. واذا ما حصل ليها برى البلد بتروح الرياض ويا اخوها يوسف .. ماريا كانت تبغى تبعد قد ما تقدر عن البيت و مشاكله.. وتبغى تكون نفسها و تبني مستقبلها...

سام من دخل الفندق وكان الوقت ليل في امريكا...
توجه لغرفة توم دخل وقلبه مقبووض..
من دخل لقى توم يقول للرجال:
ــ هاقد وصل منقذك..
وقف الرجال بأبتسامه امتنان و شكر وبالأنجليزيه :
ــ شكرا لك ...
سام عيونه على وجه الرجال و على الخلقه اللي في ايده...
تمتم بهدوء وبالعربيه :
ــ العفوو..
الرجال تغيرت ملامحه بأندهاش :
ــ تتحجى عربي ؟
سام ابتسم : ــ ايه..
توم عرف انهم صارو يتكلمو عربي .. بس مايفهم ويش يقولو..
الرجال : ــ آني قيصر من العراق .. و انت ؟
سام يحس روحه في حلم وبهدوء : ــ انا.. انا يسموني سام... من وين.. ما ادري...
قيصر يطالع في سام مستغرب : ــ يسمونك.. وماتدري..؟؟

سام مسك ايد قيصر وطلع وياه برى الفندق ...
وظل يمشي يمشي .. شوي يزيد السرعه وقيصر مو عارف ويش فيه ولويش يسحبه كذا؟؟
وقف قيصر .. سام من قوة وقوف قيصر المفاجئ فلتت ايده و طاح على ركبه..
قيصر قعد جنبه بيشيله:
ــ سلامات .. شبيك ..؟؟ ليش طلعت هيج ..!!
ولا شاف الا سام يتنفس بسرعه ومع تنفسه يشاهق و تطيح دموعه ..
قيصر خاف عليه..
ــ تراك ارعبتني .. قوم هسه ويايي ..
سند قيصر سام على كتفه ومشى وياه شوي طلب تكسي ركبو ..
سام ساكت .. وقيصر يطالع فيه ويفكر في باله..:
ــ هالزلم شفيه.. وشلون ما يدري منين اهو ... عجيب امره ..!!

[Princess]

وصلو مبنى قديم نسبيا.. في منطقه بعيده شوي ..
نزل قيصر .. وطلب من سام ينزل وياه..
نزل سام وهو مرتبك ..
ــ وين حنا؟
قيصر : ــ لهجتك ماهي غريبه عن لهجتي .. بس مانك عراقي .. !!
سام رجع كرر السؤال.. ــ وين حنا..؟؟
قيصر يأشر على المبنى :
ــ هاي عيادتي .. هنانه اشتغل و اسكن..
سام : ــ دكتور يعني انت..؟؟
ــ إيييه.. آني دكتور ..
ــ في امريكا..؟؟
ــ ياخوي هنانه حي عربي .. حي المغتربين العراقيين .. و آني فاتح هالعياده اترزق منها و اعالجهم بأثمان رخيصه..
ــ حي عربي !!
ــ شهالحجي يابه.. هالسا انت عربي وما تعرف ان في امريكا احياء عربيه؟؟
سام رجع التشويش لذاكرته.. يذكر انه يمشي في احد الأحياء..
صار يتلفت يمين وشمال .. يطالع في البيوت والمحلات.. يحس روحه عاش من قبل في منطقه تشبه هالمنطقه..
مسك راسه و صار يون :
ــ آآآآه..
قيصر خاف : ــ سلامتك .. شفيك؟؟
ــ تعبان..
ــ خلينا ندخل و ارتاح عندي الليله .. تفضل ..
ودخلو العياده...

دخل قيصر المطبخ يسوي ليهم شاي ..
سام صار يتأمل المكان..
كان بسيط للغايه.. دخل غرفة جانبيه كانت غرفة قيصر .. لقاه معلق فوق سريره صور لأهله ..
وجنبهم صورة لأنسان مو غريب عليه شايفنه من قبل ...<< صورة الرادود باسم الكربلائي الله يحفظه..
لقى مسجل عالتسريحه .. شغله وكانت لطمية يامهدينا ادركنا لباسم الكربلائي :
ــ دنيانه صارت مظلمة وننتظر طلعت بدرك ..... يا وارث آدمبالعلم كنز العلوم بصدرك
أيوب مثلك ما صبر والصبر مل منصبرك .... يا عصة موسى وحكمته يا شبه نوح بعمرك
يا وارثَالزهراءِ.... بالحُزنِ والأرزاءِ
يا بن الهداة الأطهار
يا مهدينا أدركنا ...
قيصر واقف ورى سام ومستغرب منه ... يتأمل شفايفه تتحرك مع اللطميه .. ويردد ..
يامهدينا ادركنا.. بالله لا تتركنا..
شوي صار سام يفرك وجهه .. وراسه يحس بصداع مو طبيعي..
طفى المسجل و قعد عالسرير و اصابعه شادنها بين شعره ..
قيصر بهدوء: ــ إنت.. مسلم ...؟؟؟ و شيعي !!؟؟
سام رفع راسه وعيونه حمرا .. يتأمل قيصر .. يحس كل شي مألوف له بس مو عارف ويش السالفه وشلون هو كذا وويش اللي صار له بالضبط..
سام : ــ مسلم...؟؟ شيعي؟؟
قيصر : أنت تصلي ..؟؟ تصوم..؟؟ تعرف رسولك وأئمتك؟؟؟
سام خلاص مو قادر يستوعب الكلام يحس اشياء يعرفها ومايعرفها....
قيصر حط تبسي فيه اكواب الشاي عالتسريحه وقعد على ركبه قدام سام.. وحط كفه على ركبة سام..
ــ سام.. انت مريض ؟ تعرضت لحادث .؟ انت فاقد الذاكره ؟؟ وين اهلك .. منو الك هنانه..؟؟
ــ مادري مادري..
سكت قيصر .. بس خلاص .. عرف السالفه.. فعلا باين عليه فاقد الذاكره.. فقرر يساعده بأي طريقه..
قعد جنبه وحط ايده على كتفه..
ــ هدي راسك من التفكير .. وخليك مرتاح..
شوي الا طاب عليهم ياهل .. عراقي .. وفي ايده طاسه مغطيه..
ــ عمووو قيصررر .. وينك من البارح.. شكو ماكو.. يسلم عليك ابويا و امي اتنغصت الك هاي الباجه ... << .. شكو ماكو... ويش الأخبار.... الباجه .. كراعين و مرق و حوسه .. اللي يبغى يتعرف عالمكونات اكثر يسأل الشيخ قوقل..

ــ مشكور حبيبي .. سلم عليهم هواي.. << هواي = وايد
ــ عمي.. اشفيه وجهك مضروب ضرب..؟؟؟
ــ لا بس اتكربست << طحت من مكان مرتفع
ــ اتكربست هيج.؟؟ عمي ماخبري فيك كلكجي
ــ هههههههه آني كلكجي يا زعطوط زغير .. تعال اكربسك..

انحاش الولد وهو ميت ضحك .. فتح قيصر الطاسه وجاب خبز .. مد على سام يشاركه..
ــ اتفضل هالكرص ويلا ناكل.. آني احس مصارين بطني تتعارك من الجوع.. << الكرص = قرص الخبز
سام ما بغى..
قيصر ..
ــ طيب براحتك.. اكل الفقارى هاي الظاهر ما يعجبك.. اشرب الجاي..
مسك سام الشاي وصار يشرب فيه وهو مره مو في الدنيا..
قيصر :
ــ اللللللله.. خوش باااجه ام جبووري .. تسلم اياديج..
شوي يوم خلص .. تنهد:
ــ الحمدلله.. إيييه.. قاسيه الغربه .. قاسيه..
سام اخيرا تكلم و سأل قيصر :
ــ لحالك ساكن هنا؟
ــ إيييه.. من تخرجت من الجامعه قلت برجع للعراق..ابويا كان خطيب منبر .. خذه النظام الجائر وعذبوه في سجن ابو غريب وتوفى.. امي ماتت من القهر عليه.. اخواني ثنين منهم خذوهم النظام الجائر بعد و كَتلوهم .. ما بقى احد غيري آني و اختي.. اختي كبيره .. تيسرت الله سهل امورها وتزوجت سعودي .. آني كِنت وكتها اصغر واحد..
سام حس بالأسف : ــ الله يرحمهم جميعا..
ــ ويرحم المؤمنين والمؤمنات..
قيصير يكمل السالفه بأبتسامه..
ــ اييييه صِرت اشتغل شغل الزمال .. من محل لمحل .. ما خليت ولا شغله ما اشتغلت بيها هنانه..جمعت قرش على قرش.. 4 سنين .. ليما إقدرت اشتري هالبنايه.. كانت تعبانه حيل .. عدلتها وعاونوني الجيران ... وصِرت اعاونهم باللي تعلمته... اداويهم.. و اخفف اجراحاتهم << الزمال = الحمير وانتم بكرامه..
سام عيونه يبين عليها التفاعل .. انشد ويا قيصر .. ساكت ويتأمل فيه..

[Princess]

قيصر فهم عليه .. وصار يكمل كلامه:
ــ الوكت يمر اطوووويل .. اليوم سنه .. الوحده صعبه و مُره ..
سام يقاطعه : ــ طيب ليش ماتزوجت..
قيصر يتنهد من قلب بأبتسامه معبره : ــ اتزوج.. مو آني تزوجت.. والله أخذ امانتها...
سام بنظرات تساؤل ..
قيصر : ــ فشل كلوي
سام بأسف : ــ الله يرحمها...
ــ كانت هي دنيتي و أنيستي في غربتي.. عرفتها من الجامعه.. حبيتها وحبتني .. تزوجنا ..
عَشت وياها 3 سنوات .. بعدها مرضت.. تعبنا وعجزنا نلاقي متبرع ينفع معها.. ولما لقيناه.. طلب مبلغ ماهو شويه.. صِرت اتسلف و اجاهد ,,, صرت اترجاه اعطيه نصف المبلغ و بعد العمليه اقسط له الكماله.. بس هوا عيّا .. بعدها... الله ما كتب لها تعيش .. تأخرت آني وفاركتني ...ومن يومها ما فكرت بالزواج كلش..

سكوت عم المكان.. سام متأثر بقصة قيصر ...
قيصر يقطع الصمت :
ــ صاموط لاموط .. ما تحجي لك شوي سامي.. من هالسا راح اسميك سامي ..
سام : ــ صاموط .. لا موط؟؟
ــ ههههههههه ايوا هذا اكبر دليل انك مانك عراقي .. هاي دلاله على الصمت التام وانقطاع الكلام
ــ اهاااا..

الساعه 3 ونص العصر في الرياض....
السيد اليوم عليه الطباخ..
حبيب في الصاله .. مع شفيق و يوسف .. وكاظم..
صادق قاعد معاهم بس بعيد شوي وماسك كتاب يقرأ فيه..
مراد في الحمام يسبح ومقلع الدنيا اغاني .. من اغنيه لأغنيه..
كاظم بهمس : ــ ودي انطح اثنين في هالشقه ...
حبيب : ــ احلى ياثور .. مين هم..؟؟
يوسف : ــ عرفتهم.. اكيد ....
وصار يحرك عيونه اتجاه صادق و اتجاه الحمام..
حبيب يضرب ظهر يوسف : ــ هههههههههههههه والله وصرت تفهم له احسن مني..
صادق : ــ اف .. اضاءة الصاله ماهي اوكي .. ماتناسب للقراءة
كاظم بقهر : ــ اطلع الطريق ضوا الشمس يمدحو فيه..
مراد طلع من الحمام بفوطته :
ــ لاويه مافيه رشاش.. الماي قض راسي قضاض << على طول يصب من البيب
كاظم التفت لمراد : ــ ركب انت فيك الخير والبركه.. حنا كذا عاجبنا..
مراد : ــ بل .. ويش فيك انت.. اففف خايسه نفسك على فكره..
ودخل الغرفه يلبس ...

حبيب يمسح على ظهر كاظم:
ــ هدي اخوك عاد.. ماخبرنا فيك بهالعصبيه.. وانت بارد ياحلاتك.. والله مايليق..
ــ ما ظنتي بيخلو فيني هداوه ...
يوسف قام يشوف السيد ويش يسوي في المطبخ..
ــ الله يعطيك العافيه
السيد : ــ يعافيك ربي..
ــ ويش تسوي.. ؟؟
السيد وهو يقطع جزر..:
ــ صالونه ..
ــ ما شاء الله تبارك الله.. والله شاطر سيدنا .. صالونه مره وحده..
ــ ايه ياخوك الغربه تخلي الواحد يتعلم كل شي اذا يبغى يعيش صح ..
ــ عقبال ما اسوي قوزي ..
ــ هههههههه قوزي مره وحده..استر يالمتفوق.. ان شالله ربي يسمع منك..
ــ اساعدك في شي ..؟؟
ــ ممممم حاليا لا ..
ــ البطاطس للحين ما قشرته ولا قطعته.. اهو عنك باسويه..
ــ ماتقصر والله.. باخلص الجزر عن حساب وباسويه..
ــ لا انا باسويه.. تخصص بطاطس مقلي..
ــ ههههههه اكو تعرف ..
ــ يعني .. في بيتنا اذا جعت ادبر روحي .. بطاطس مقلي .. بيض .. اشياء خفيفه..
ــ ليش ما تاكل ويا اهلك..؟؟
ــ ايييه.. الوالد والوالده الله يرحمهم..
ــ اوو.. آسف .. الف رحمه عليهم..
ــ لويه تتأسف اخوك..
ــ وانت كنت عايش لحالك؟
ــ لا وياي خواتي و اخوي واهله..
ــ زين اشوى.. الله يردك ليهم وترفع راسهم بك..
ــ يالله..
ابتسم يوسف : ــ وانت سيدنا؟
ــ انا..
ــ ايه.. اهلك ويش ؟
ــ الله يطول بعمرهم.. امي وابوي .. و اخو اكبر مني متزوج و ثلاث خوات اصغر مني ..
ــ الله يخليهم يارب و يسعدك ويسعدهم
ــ تسلم حبيبي...
شووي الا بجية كاظم يركض لدرام المطبخ .. مره حالته حاله يحس روحه بيرجع..
شفيق دخل الحمام من بعد مراد فما لكاظم الا المطبخ..
حبيب جى وراه:
ــ يالله كاظموه لا تحرق نفسك خله يولي ..
يوسف : ــ ويش صاير...؟؟
حبيب : ــ تجاكر ويا ولد عمه وتالي قامو يتكلمو هندي مافهمت .. !!
كاظم بقهر : ــ يلعن شكله .. قاعد يعايرني الخايس .. اقول له تالي بطلع وياك نشوف لك شقه ما رضى يبغى ويانا غصب .. على قوله ما بيقعد ببلاش .. لا ويعايرني يقول جدتي هي اللي تدفع لي اجار الشقه وهو كلمها لا تدفع خلاص بيدفع هو عنا ثنينا بما انه دلته علي ,, الحيوان يعرف يسوي روحه طيب ومسكين..
السيد : ــ كاظم دقيقه ..لا تقول هو ولد عمك داك اللي قلت لينا عنه... الغني بناوة جدتك وكل كله شباق وياها .. << البناوة .. ابن الضرة..
ــ ايه ماغيره..
حبيب : ــ بل بل .. ويش لي انا اتكلم و اقول له استريح كم يوم.. كل مني ..
كاظم : ــ لا والله حتى لو ماقلت له.. بيتلزق هو فيني غصب طيب.. انا مانى داري ما يفش عني لويه..
حبيب : ــ يفتش اخوك .. يفتش .. يفش يعني يقعد .. يفتش يعني يتركني في حالي..
كاظم : ـ حبيبوه..
ــ هااا
ــ كف على وجهك..
ــ ههههههههههههه قوم بس لوعت شبدي وانت حاضن هالدرام...

يوسف : ــ طيب ليش ما تتصافى وياه و تفتحو صفحه جديده.. اعتبره اخوك الصغير..
كاظم قام واقف : ــ اخوي الصغير.. هههههه قال ويه اخوي الصغير..
وطلع من المطبخ..
حبيب : ــ مسكين كاظموه.. ناقص ضيم وقهر..
يوسف : ــ لويه ما يبغاه لهالدرجه...؟؟
السيد : ــ كاظم عزيز نفس بشكل مو طبيعي .. وفوق هذا ياما وياما تكلم عن عمه وولد عمه وشلون عمه اخذ ورث جده وماعطاه حقه بحجة ان ابوه متوفي و حقه بيوصله مصروف لجدته وهي تتكفل فيه..ياما وياما اعتبره صغير وما يحق له يتصرف في ورثه ..
يوسف : ــ ياعلي.. فأما اليتيم فلا تقهر... عديم انسانيه لهالدرجه..
حبيب : ــ وما خفي كان اعظم..
يوسف : ــ ويش بعد..؟؟
حبيب : ــ هو يتيم ام ماتت من جابته.. ابوه توفى بعد كم سنه في حادث.. عاش كاظم ويا جده وجدته .. صراحه عيشة ملوك .. ما شالله جده تزوج 3 و جدته الرابعه.. ثنتين طلقهم وظلت وحده ويا جدته جابت ما شاء الله بنات.... فقام جده تزوج جدته وهو كبير يازعم يبغى الولد .. حزتها جدته كانت صغيره كذا في اواخر العشرينات وجده عمره خمسين سنه.. و سبحان الله ..جاب منها ابوه و بعد سنه على طول حملت مرته الأولى وجابت عمه....

السيد : ــ عاش جده ما شالله سنوات. وصارت مشاكل بين نسوانه الثنتين الهنديه جدة كاظم و السعوديه جدة صادق.. بس الله يشهد و الجد يدري ان سبب المشاكل السعوديه.. وجدهم شديد ولا عنده فيها.. فطلق السعوديه.. وظلت جدة كاظم الهنديه.. خيره كافه عافه ولا هي راعية مشاكل....

حبيب : ــ وبس تخرج كاظم من المتوسطه.. توفى جده.. وورث عمه كل شي .. عطى خواته لأنهم فاهمين وعارفين هالسوالف ووراهم رجال .. ورثهم.. بس هاليتيم المسكين اكل حقه..ولا احد يدري طبعا ان فيه اشياء بأسمه .. جده مسجلنها من خوفه عليه ولمستقبله..

[Princess]

يوسف : ــ يالله طيب ليش مايروح يشتكي..
السيد : ــ مافي شي يثبت ان هالورث من جده.. وطبعا دايما يتحجج ان ورث كاظم بيوصله مصرووف اذا كبر و بلغ.. والله كبر وبلغ ومرت سنين وهذا هو جامعي وابدا.. لا حس ولا خبر..
يوسف : ــ شلون. ليش ويش ورثه بالضبط.؟؟
السيد : ــ جده الله يسلمك ... خلى لكاظم ارضين وعماره .. كتب هالشي في صكوك و اخفاهم بالسر عن عم كاظم في حياته.. علّم بس المحامي بأمرهم.. بس المحامي الله يهديه قبل رشوه من عم كاظم.. مبلغ مو هين..
يوسف ــ كم يعني؟
السيد : ــ نص مليون.. مقابل انه يعطيه الصكوك حق الأرضين و العماره..
يوسف : ــ ياساااتر باع ضميره بنص مليون..!!!

حبيب يقرض في الجزر : ــ اييييه .. هالفار الأقشررر..
السيد : ــ والله ماغيرك الفاار.. لا تاااااكل الجزر كله بعدي ماحطه في الصاااالوووووووونه...
حبيب فتح بوزه : ــ ها تبغاه؟
السيد : ــ يعوووووووو عليك.. فارق برى ..
حبيب : ــ هههههههههههه كمل القصه بس ...ديده حبابه...
و يسوي نغمه حزينه.. والسيد يكمل:
ــ ههههههه غربال يغربلك.... ايه .. المهم.... باع ضميره بنص مليون.. و العم باع ضميره بالدنيا.. و اخذ العماره و الأرضين..
يوسف : ــ زين ويش دراه كاظم بسالفة الورث..؟؟
حبيب : ــ المحامي جت له حوبه.. صابه حادث وقالو له بيجيه شلل نصفي ..
يوسف : ــ ايواا فحس على دمه وقال لكاظم بالسالفه..
حبيب يشبك كفوفه ببعض بحركة الرجاء وطلب الصفح :
ــ كاظم.. ارجوك .. سامحني .. الله عاقبني .. لأني سويت فيك كذا..
السيد يضرب حبيب بملعقة الخشب على قفاه:
ــ هههههه نحيس.. عن السخريه هااا .. .. ماعلينا... طبعا مافي فايده الأعتذار ما بيرجع الحلال .. خلاص العم كوش على كل شي .. و زور الصكوك بأسمه .. و مو بعيده اتلف الأصليين .. وانتهت السالفه ..
يوسف : ــ بس الله ما يكلف كل نفس ذنوب غيرها
حبيب : ــ شلون يعني...؟؟
ــ يعني صادق شدخله اذا ابوه كذا؟؟
السيد وهو يحط الخضره في الصالونه:
ــ ايييه.. هذا ولد هالعم كان يتصدق على كاظم ويسوي روحه راعي الحلال وكاظم الفقير المسكين.. حقود على كاظم بشكل... ياما كاظم اشتكى الجوع ولا يرضى ياخذ منه ولا ريال.. ماعمرنا طلعنا رحله وطلع ويانا ولا سافرنا وسافر ويانا.. بالأجازات يشتغل صيفي .. بس على شان يوفر لروحه معيشه..
يوسف : ــ عمه ما يعطيه شي ؟
حبيب ...: ــ يعطي جدته كلفة السكن و كم ريال زياده مصروف له.. بس حق كاظم اكثر من كذا بواجد.. كذا مره يتكلم كاظم على ولد عمه .. بس شلون راح عن بالي انه هذا هو ماغيره..
السيد : ــ حتى انا والله قلت يمكن ولد عم ابوه او شي كذا بس من شفته منفعل عليه عرفت... وسألناه وتأكدنا ان هو ماغيره..
يوسف : ــ جدته تدري بالسالفه..؟؟
حبيب : ــ ماتقدر تسوي شي هالعم يخوف مو بعيده تتكلم ويسفرها الهند..
يوسف : ــ انا لله شكله كاظم تعبان.. باروح اشوفه..

دخل يوسف على كاظم لقاه متكرفس زي الربيانه.. على سريره..
يوسف : ــ كاظم.. نمت؟
كاظم بهدوء وصوته يبين فيه الم : ــ لأ..
ــ ويش فيك..؟؟
ــ مافيني شي ..
ــ صوتك مو طبيعي ..!!
ــ بطني شوية مغص ..
ــ اها.. اجيب لك حبوب..؟؟
ــ لا .. مايحتاج..
ــ زين براحتك..
يوسف بيطلع من الغرفه الا يسمع كاظم..
ــ حرام يعني,,؟؟
وقف يوسف والتفت لكاظم.. اللي كان صوته ينقلب مبحوح شوي شوي..
ــ حرام يعيش الواحد في راحة بال.. حرام يحس بطعم الحياه بدون هموم.. شقيت وتعبت .. 23سنه وانا احس نفسي محروم من اشياء واجد في الحياه.. وصابر.. فقدت طعم السعاده.. فقدت البهجه .. دايم كتوم.. وبارد.. بعدت عنهم حق انساهم.. حق انسى الضيم اللي صابني منهم.. يقوم يجيني الى هنا.. ليش عاد.. !!؟؟
يوسف يقعد على السرير و يحط كفه على كتف كاظم ويمسح على راسه :
ــ هدي بالك اخوك وصل على محمد.
صوت كاظم يبين ان دموعه طاحت :
ــ اللهم صل على محمد وآل محمد.. ياما لبس احسن مني.. اكل احسن مني .. مع ان حالي من حاله.. اشياء وايد يتميز فيها على حساب سعادتي و راحتي .. مسكينه جدتي ياما لاقت الضيم منهم.. متحمله بس على شان لا يسفروها .. خايفه تخليني لحالي في هالدنيا.. تلاقي ابوه ضغط عليها تعلمه عنوان الشقه..
يوسف : ــ زين اخوك قوم الحين اخزي بليس وامشي ويا الشباب برى اكو السيد مسوي خووش صالونه .. و الله يحلها ان شالله..
ــ ان شالله.. شوي وجاينكم..

طلع يوسف من الغرفه للصاله .. والتقت نظرته مع صادق.. يوسف غض النظر يحس نفسيته متوتره من هالسالفه ورجع المطبخ للشباب..
حبيب : ــ هاا.. ويش .؟
ــ اكو شوي وبيجي.. بس ابغى اعرف حاجه.. ليش ولد عمه يعامله كذا ؟
حبيب : ــ لأن كاظمو احلى منه.. واذكى منه ..
يوسف مستغرب من هالسبب : ــ اذكى منه.. آمنا بالله.. احلى منه,,, ليش تفكير بنات حق يحقد لهالدرجه..
السيد : ــ استغفر الله.. حبوه فضيحه حدك..

حبيب ..بهمس : ــ صراحه احلى واحد في الشباب هو تالي انت << يقصد يوسف ..

يوسف قام يضحك ...: ــ صحيح انك ظريف كلكم حلوين ...

حبيب : ــ ممممممم.. كاظم طالع يشبه ابوه وجدته عدل.. ملامح هنديه بشره سمرا وعيون لامعه ملونه و شعره ناعم .. خشم سلالة سيف .. مره على قولة القايل يمشي ويطيح درزن بنات... عكس صادقو هالعتوي.. صادقو دا يحط باله لهالأشياء .. يكفي كاظم باق حب صادق الأول..
يوسف بأستغراب : ــ حبه الأول..؟؟؟

السيد : ــ ههههههه نحيس حبيبو.. سوالف هاليهال دي القديمه قاعد تنبش فيها.. وحده من بنات عمتهم مسميه لكاظم.. وهي ميته عليه.. بس كاظم مايبغاها... ولما خلاص شالو الفكره من بالهم
صادق قال لأبوه يكلم عمته انه هو يبغاها كان مره يحبها وبغاها فرصه ان كاظم متنازل .. بس هي رفضته..
حبيب : ــ ايه وصارو بنات العمات الثانيات يقارنو ويتكلمو ويقولو معلوم فلانه ترفض صادق ويش جاب الثرى للثريا
يوسف : ــ اف .. ياساتر لهالدرجه..
حبيب : ــ على ذمة الراوي كاظم.. فزاد حقد صادق على كاظم .. من سبب تافه..

مصطفى يكلم ابوه جوال...
الكل يراقب في ملامحه اللي تغيرت ونبرة صوته و كلامه اللي يخلع:
ــ من متى؟؟ ......... انا لله.......... والحين ويش ........... صارت احسن..؟؟ ........ باشوف اقرب وقت ينزل الباص القطيف وباجي اشوفها.......... زين .... الله يسلمك.... ..

نوري يهمس لهاني : ــ الظاهر امه طاحت مريضه ...
هاني : ــ هي كل تمرض بس هالمرضه شكلها شايده اللهم ادفع البلاء
محسن : ــ عفر .. بينزل القطيف هالمره...

سكر مصطفى..
نوري : ــ سلامات اخوك ويش صاير
مصطفى يبين على وجهه الغبنه:
ــ امي تعبانه وايد مرتفع وياها الضغط و بالمستشفى منومه...
محسن : ــ سلامتها الف سلامه..
مصطفى : ــ متى اقرب باص بينزل البلد.؟؟.
هاني : ــ نهاية هالأسبوع.. الأربعاء العصر تقريبا..
ــ تونا اليوم الأحد ... يعني مافيه قبل ؟؟
نوري : ــ لا ما توقع ....

استوت الصالونه.. وصارو يجهزو الغدا..

يوسف : ــ مراد شفيق .. كاظم.. يللا غدا..
طلع مراد كاشخ وتارس الشعر جل .. : ــ ويش غداكم..
حبيب مشمر عن ثوبه : ــ صالونه على كيف كيفاتك << يحب يقعد في الشقه بثوب النوم..
مراد بأنفعال شديد : ــ وع..
يوسف : ــ الحمدلله رب العالمين..
السيد : ــ رحم الله والديك..
مراد : ــ اباطلع انا اكل شي من برى.... تشاااووو..
السيد مستاااء حده من رد فعل مراد.. دخيل الله يقول يعطيكم العافيه.. عليكم بالعافيه.. ابد .. لا ذوق ولا احترام..

شفيق وكاظم و صادق .. قعدو وياهم على السفره..

مابين كاظم و شفيق طاسة فيها الصالونه .. وكلهم ياكلو في صحن عيش كبير وفوقه صالونه..
كاظم بعفويه ومتعود ويا الشباب نفس الملعقه اللي ياكل فيها ياخذ من طاسة الصالونه شوية مرق ويرش فيها جهته..
شفيق من شاف كاظم طلع الملعقه من بوزه وحطها في الطاسه مع انه ما غطسها بس من فوق لافوق حق ياخذ شوية مرق..
تنرفز .. ولاعت شبده.. رمى الملعقه وقام..
كاظم فتح عيونه و ظل ماسك الملعقه مستغرب.. الا بصادق يعلق :
ــ حركه مو حضاريه ابدا.. ماتعرف تستخدم ملعقه نظيفه ترش فيها المرق .. ماهي طاستك لحالك...
كاظم فلت الملعقه هو الأخر .. وقام :
ــ الحمدلله.. عوافي سيدنا تسلم ايدك..
دخل غرفته وسكر الباب عليه..

صمت ساد المكان .. الكل ياكل بدون نفس ..

شوي دخل حبيب على كاظم لقاه يتلوى.. ويشتكي مغص شديد في بطنه.. ويحس بغثيان..
جو بقية الشباب.. مو عارفين ويش يسوو
ولا هو راضي يقوم للمستشفى..
كاظم عنده مشاكل ويا المستشفيات.. مايقدر يبلع الحبوب يختنق ...و يخاف من الأبره...
يوسف : ــ عندكم خيط و ابراه؟؟؟
حبيب : ــ ايه.. لوويه؟؟؟
يوسف : ــ جيبهم وباعلمك...

في امريكا..
قيصر يسأل سام :

ــ هالشلاتيه اللي إدبحوني ضرب تعرفهم؟ >> شلاتي : ابن الشوارع غير الخلوق صاحب التصرفات السيئه..
سام يطالع في قيصر نظرات استغراب..
قيصر : ــ لا .. ما اقصد شي .. بس اشوف طاوعوك و تركوني في حالي..
سام يضحك : ــ لا .. خافو مني لأني كنت مسلح..؟؟
ــ هههههه.. آآآه اتاريك مو سهل .. عفيه عليك.. مشكورمره ثانيه ماقصرت يابه.. رحم الله والديك..
سام : ــ ممكن سؤال..؟؟
ــ اتفضل حبيبي..
ــ ويش هالخيط الأخضر على ايدك؟؟؟؟؟

الى الملتقى...

[حلم لطيف]

خلاص ماقدر قصة كاظم قطعت قلبي بقوة

الله ياخذ بحقه وان شاءالله حوبته مابتضيع من عمه الخايس نحيس البالة

ننتظر البارت الجديد بسررررررررررررعة

يعطيش العافية

[جـــــوان]

تسلم دياتك أختي اميرة

مسكين كاظم يكسر بالخاطر

وهذه وداد الله يغربلها ما عندها اسلوب ويا أحد

صار نفسي افقع وجهها الهبلة

[Ro7 AlM7bA]

بارت راااااااااااااائع ..

حركات شقيق مدري شفيق .. مو عاجبتني بنووب لو يفلتوه بره الشقه ابرك له ..


ناجي مدري سااام شكله بيرجع به الذاكره وبيهون عن افعال الشغب خخخخ


يسلمو اميره على البارت ..

لاخلا ولاعدم

بآنتظار الحلقه القادمه وبكل شوق ..

[جنۉن من ﺳـڱۉن]

أإووووووووه وش هالحمـآأإس
هذأإ صـآأإدقوه وشقيقوه بينطقوأإ عن قريب
وعفر يوسف بيشوي كاظم وبيترك عنه الطب المستحدث هع ,,!
<~ شواي بأبره ؛؛<< خرفت
أإي هذا سام شكله كان عايش في هذا الحي
وآصله عراقي ع ـلى عفر
عواإفي أموره
أإبدآع كـ العـآده ماننحرم

[MOONY]

رووعه أموره
بنتظار التكمله
يعطيج العافيه
تحياتي

[سجينة الآهات]

أكثــر من إبـداع .. أحس أفكـاارها غريبة وجديدة .. كمـا تعودنـا منك

.. الله ينتقم من الظالمين >> أمثـال وداد وعم كـاظم ...

بس الشخصـيات أحسها تلخبط ^_^

في انتظــاار التكمـلة غـلاتي

.. ومـا أنســى "" الله يتقـبل والحمـد لله على السـلامة

[لا تعليق]

كشخة .. عاشوا .. أحلى.. أحلى يأمورة أحلى.. الجزء فن .. فنـتـــكــــــــــة!! ابدآآآآآآآآآآآآآآآآآع ..تعجبيني
جزء الشقة تفاعلت وياه هالمرة أكثر من كل مرة وكاظموه احم أقصد كاظم شكله الله يحبه ويش هالبلوة الصراحة ..
بس.. احسه قوي وبيتغلب على المصاعب بكل جدارة والله مايضيع حق المظلوم>>شدي كانت المقولة؟؟
المهم ساموه كلما جا له يعجبني أكثر بس أخمن انه لما يتذكر بينفعل وبيسوي شي قوي وبينسجن فترة>>مجرد حدس .. ماريا عجبتني شكلها مأدبة لكن احتمال 86% ان مشاعرها مابتتغير والله يساعد عبوووود ..

صادق رغم كل اللي يسويه احسه طيب ويمبى يقعد ويا ولد عمه لأنه يشعر بالوحدة لكن تصرفه على الغدى ماكان لديك الدرجة سيئ لكن كاظم كان حده متضايق...... ايه وكل واحد له سلبياته وايجابياته..

ااخ شكلي طولت.. عليش ..

يعطيش العافية تسلم اياديش و ....

الله يسلمش

[نسيم الذكريات]

يعطيش العافية غاليتي أميرة على المجهود الرائع وتسلم
دياتش ..
بصراحة الأحداث كلمالها تطوروتحلو ..
عجبتني شخصية حبيب والسيد هادي مرة
حليوين ويوسف ومصطفى ذكروني بأيام الرياض
وأحداثها وذكرياتها ..
كل الشكر لك وعساااش على القوة إن شاء الله ..
خالص تحياتي لك ودمت بخير

[أموآج]

يعطيش العافية خيتوو

هالجزء بالرغم من روعته

الا انيي تأثرت وي سام

دوم هالآبداع خيتوو

ولا تطولي علينا