في شقة الشباب اللي تحت..
نوري ضام راس حبيب بذراعه ،، وماسك خلقه فيها ثلج و يدلك في التورم ..
حبيب يرفس برجوله زي الياهل : ــ آآه.... ويلي ..
محسن ماقدر صار يضحك..
مصطفى يحاول يداري ضحكته..
حبيب بألم : ــ اضحكو ماعطاكم الا ربكم..
فقعوها ضحك عليه ماهم قادرين على شكله..
ايمن : ــ شوي شوي عليه فطسته.. خمدت على انفاسه..
نوري حاقرنه ومستمر تدليك..
مصطفى: ــ خله عالأقل ينزل التورم شوي ..
الا الباب يطق طق ..
محسن : ــ بل .. نوريوه جوك الشرطه بتهمة صفع واحد بسلندر غاز
نوري : ـ خخخخ بااااايخ.. قوم بس شوف مين .. شدخ الباب..
محسن : ــ زييييييييييين لا تشدخ.. جاي جاي..
فتح الباب الا هو هاني ناط عليه ومتعلق ..
محسن : ــ هلاااااااا.. قردانوو .. >> محسن يسمي هاني قردانووو.. و هاني يسمي محسن النخله عن مزح.. لأن محسن طويل وهاني قصير ونحيف و كل يتعلق على محسن يأذيه..

بقية الشباب.. من سمع قولة قردانوو.. عرفو انه هاني .. اللي دخل عليهم ركض ومن شاف نوري ماسك حبيب بطريقة عجيبه فتح عواينه:
ــ ويش تسوووو..؟؟؟
محسن يبغى يسوي جو وبطريقة منقهره و خايفه :
ــ الحق علينا.. الحق .. نوريوه تشابق وياه وفلعه.. و سحبه داخل الشقه وناوي يكمل عليه .. محنا قادرين حنا نسيطر عالوضع..
حبيب فيه ضحكه عاجبنه الوضع..

شوي الا نوري يضغط على جبهتة فجأه بقوه كبيره خلته يدوووخ ..ويصرخ صرخه عالميه...
ما انتبهو الا مصطفى طايح فوق حبيب.. ومخمد على انفاسه..
هاني بلا وعي من السالفه دف مصطفى على نوري حق يترك حبيب .. ومصطفى ما توازن وطاح على حبيب بالغلط..
حبيب : ــ آآآآآآآآآآآآآآععععععععع
و اغمى عليه..

هاني شهق : ــ ووواااااه .. دبحنااااه..
مصطفى منحرج : ــ انتون امزحو وانا ادفع ضريبة مزحكم الفقييييل..
محسن : ــ سوووو له تنفس صناعي ..
نوري : ــ بهيم انت.. شه غرقان...؟؟؟
هاني بالسرعه رمى شنطته وطلع غرشة العطر وصار يرش على وجه حبيب و نوري يسطر خدوده.. لين اوتعى..
مصطفى بسرعه جاب له ماي وهو مره مرتبك وخجلان حده..
ايمن فيه الضحكه .. ويهمس لمصطفى..
ــ ويش فيك امس واليوم ما شغلتك الا تطيح على العالم..؟؟
مصطفى مره مو عارف ويش يقول ..
بأبتسامه مرتبكه: ــ آآسف.. والله هاني اللي رماني عليك..
حبيب يشرب الماي و يبتسم وهو ينافخ :
ــ قتلتوني هههه.. مو شقه دي ..هههه .. مقصبه..
نوري : ــ مسامح اخوك هههههه ... لا تشره على هانيوو
هاني مستحي : ــ شمدريني عنكم شلة صواريخ .. كنت ابغى اساعده..
ايمن : ــ ايه جيت تكحلها عميتها..
قعد حبيب وياهم شوي تعرف عليهم و حسهم خوش شله.. ووعدهم بزيارات تكون بينهم..


في الصف الثالث علمي .. شهربان فيها النومه.. واستاذة الكيميا زكية تشرح تشرح وهي تغمض وتفتح..
استاذة الكيميا امها عراقيه فماخذة اللهجه :
ــ شهربان .. تفاعل الصوديوم مع البوتاسيوم.. شينطيناااا..؟؟؟ << ويش يعطينا..
شهربان فتحت عواينها وقامت واقفه:
ــ صودييمد بوتاسييومي .. << بعدها نايمه ومفهيه
البنات صارو يضحكو..
أ‌. زكية : ــ معلوم ما تكونين ويانا بالدرِّس .. آني ما عطيتكم تفاعل هالعنصرين بالذات جِبتهم من راسي هالسا.. استريحي .. لو انج كنتي مركزه وياي عيني انجان اعرفتي إنّي جايبة هالشي من راسي ..
شهربان مفتشله .. قعدت وهي مره تحس روحها بهيمه..
ماريا فيها ضحكه صارت تهمس ليها وتجاكرها..
ــ اجل .. صوديوميد بوتاسيومي.. ولد مين دا..؟؟؟
شهربان تطالعها على جنب :
ــ ولدش ..


وقت الفسحه في المدرسة الأبتدائيه...
باقر ولد اماني نسى مصروفه... فقاعد على جنب .. انتبه له محمد ولد خاله وتوجه له:
ــ ويش فيك ماتاكل..؟؟
باقر نفسه عزيزه : ــ فطرت في البيت... << وهو ميت من الجوع..
محمد : ــ شداب .. ويش فطرت .. ؟؟؟ ماشفتك .. !!
ــ مانى جوعان..
ــ مو على كيفك..
وراح شرى لباقر زعتره وعصير ..
محمد جدا عفوي .. و تفكيره زي الأطفال مهما كبر ..
وبين ماهم ياكلو .. سال باقر سؤال:
ــ خلصت فلوسكم يعني .. ؟؟
باقر وقف عن الأكل : ــ لا ... نسيت مصروفي بس ..
محمد : ــ لا تستحي اذا خلصو... ادري ابوك بعيد وشغله مايعطوه فلوس وايد ,,على شان كذا ماعندكم بيت.. اذا صرت مفلس قول لي عادي اقول لأمي تزود مصروفي و اعطيك ريالين لو ثلاثه ريال ..
باقر وقفت اللقمه في حلقه..
حط الزعتره في حضن محمد:
ــ الحمدلله .. مابغاها كملها انت..
وعطاه العصير وكان لسا مافتحه:
ــ روح بدله في المقصف بحاجه..
محمد : ــ تعااال .. ويش فيك..
باقر تركه ودخل الحمام .. وسكر عليه الباب..
وظل شابح بعيونه.. ومنقهر من محمد .. اللي تصرفاته دايما طفوليه و دايما يستعرض الخير اللي معيشنه فيه ابوه.. وباقر من دون شي عزيز نفس ومايحب احد يعايره بأي شي..