بيت ابو مجتبى..
ابو مجتبى قاعد في الصاله.. وحاط راديو عند اذونه.. ويفرفر في الموجه... وماميش الا صوت الراديو .. طووط و طوووط.. و الأنتل حق الراديو رافعنه حد ماعنده وكل شوي يحرك راسه ويا الراديو يمين ويسار وفوق و تحت .. والتشويش زايد مع الحركه...
<< راديو لول البني القديم...
كان احمد قاعد وياه.. يحوس في لاب توبه وشابك انترنت...
احمد : ــ هههههه يبه ويش تدور؟؟
ابو مجتبى : ــ ويش بعد يابوك.. اذاعة ايران.. الحين شيخ بيقرى... اتسمعه قبل لا انام..
ــ عاد يبه من متى هالراديو عندك.. قديم .. من وين تلاقي فيه ايران .. زين من يوم بعده يوش ما اخترب..
ــ اهووو .. قديمك نديمك.. اجل ستررتوات الحين حقتكم.. والا مسجلاتكم.. اخرطي
ــ عرفنا المسجلات.. ههههه الفانيه ستريوات يبه .. ستريوات..
ــ اللي هو .. هو..
شوي .. صوت عزاء بداية برنامج الشيخ ...
الا يمد ابو مجتبى رجوله بحماس:
ــ ايوااااا
شوي خفت الصوت .. عصب ابو مجتبى وصار يطق يطق في الراديو..
شوي ارتفع الصوت حده..
نقز ابو مجتبى مختلع:
ــ ناااايبه.. ويش هالراديووو..
الا احمد يضحك من قلب ..
ــ يبه.. تعال هذي الأذاعه هنا على الاب توب.. الصوت اللي تسمعه من شوي..
ابو مجتبى مو مستوعب الموضوع..
ــ تتمسخر بي انت.. استح على وجهك..
ــ لا والله يبه دي الأذاعه الأيرانيه .. فتحتها لك بالأنترنت
ابو مجتبى فتح عيونه: ــ ماخلى شي هالأنترنت.. ولا بقى... المفروض يسموه عنترنت...
يعني الحين اشوف وجه اللي يتكلمو بعد.؟؟
ــ لالالا.. بس صوتهم زي الراديو عادي..
ــ يعني... عجيب هالنت والله..
وصار يتسمع المحاضره على الأذاعه الأيرانيه
و احمد قام عنه يشوف اخوه امير المريض بالتوحد..
شوي الا ..
تطفر على الشاشه افلام كرتون لدجاجه عواينها طافره وتبدي تصرخ
ككوووو كو...كاااك.. كك .. كاااك كاك كاك...
<< دعاية نغمة الدجاج الغفيفه تبع الجوال.. >> وهل تخفى عليكم..!!
شان يطير ابو مجتبى من الخلعه ويصرخ صرخه:
ــ أواااااااااااااااااااه..
يجي احمد يركض ركض ..
ــ خير يبه ويش فيك؟
ابو مجتبى معصب : ــ لابوك لابو كاكك داويه دا اللي طلع لي ..
احمد ماقدر صار يدحن ضحك ضحك..
ــ دي دعاية نغمة جوال
ــ ويه.. جوال؟؟ خناقه مو جوال..
ــ هههههههههه ايه ترسل ليهم رقمك ويرسلوها عليك
ــ حسبن الله عليهم.. ما احلاك احد يتصل فيك الا جوالك يكاكي .. وين اخوك امير؟؟
ــ نام ...
ــ اكل؟؟
ــ ايه ... خوبل بي .. نفر اكله بكبر المطبخ..
ــ الله يعين.. كان خميته عن امك .. الحين بترجع البيت منهده.. انا مانى داري عنها دي بعد ويش تسوي.. باقي ساعه على نص الليل..؟؟
ــ بعدها عفر تمرخ الآدميه اللي على قولتها طايحه على درج بيتهم
ابو مجتبى مقهور:
ــ اما انا لو اطب من فوق عماره ما مرختني.. نايبه تصقع النسوان.. ماميش الا البقر تمرخ فيني وهي رايحه
ــ هههههههههههههه ولا يهمك انا امرخك وينا بس وينا
وصار يدلك رجول ابوه..
ابو مجتبى يتدلع:
ــ اهو عني بس .. قوم نام.. باقوم انا انطبن على عمري ..
الا بدخلة ام مجتبى ..
ابو مجتبى يتعيلف :
ــ حيا الله المراخه..
ام مجتبى متنرفزه:
ــ يحييك...
ــ ويش ,.. تمت عملية المراخ بنجاح..؟؟
ــ لا تقهرني .. ساعه امرخ امرخ في شحمها ولحمها.. وهي ماميش الا تون علي و تتأمر ... فوق وتحت .. آخرتها تعطيني بس 50.. تسخر علي دي.. لو الود ودي مردت شبدها ..
احمد : ــ عاد اماه الله يهديش ..كان شرطتي عليها قبل لا تبدي شغل..
ابو مجتبى : ــ ماحد قال ليها .. انتون يالمدرعات ماخليتو شي .. خدمة تمريخ بالمنازل .. حد قال لش تروحي ليها..
ام مجتبى : ــ ويش اسوي .؟؟؟ قلت بتزيد الأجر على مشواري ... طلعت بخيله حتى اجري العادي ماعطتني اياه كامل... لو اشوفها طايحه من فوق جبل ماباروح ليها تالي ....خلني ساكته بس .. الله كريم..
ابو مجتبى بأسى : ــ الله يغير الحال.. ويعطيش العافيه..
عبدالأله.. جيران بيت اهل يوسف .. سائق باص الثانويه.. منسدح على سريره.. جاينه ارق .. و يتذكر ايام الطفوله.. لما كان عمره 10 سنوات
ــ ابغى العب وياكم..
شهربان اخته و ماريا جارتهم اخت يوسف وكان عمرهم وقتها 5 سنوات... كانو يلعبو مع بعضهم..
شهربان : ــ مانلعب ويا صبيان .. روح ما نمباك..
عبدالأله يحمق فيها ويسحب لعبتها ويرميها بعيد..
تقوم تعصب وترمي عليه مكعب تفلع عيونه..
وتقوم الشبقه وتصير ماريا تصيح ..
يوقفو شباق .. ويصيرو يسكتو فيها..
وهي تشاهق : ــ خلاص خلينا نلعب وياه... لا تشابقو..
شهربان محمقه: ــ ويش يلعب كلها العاب بنات...
ماريا : ــ نلعب بيت..
شهربان : ــ الله .. وناااسه... اني الأم..
ماريا : ــ مايصير انتين الأم..
ــ لويه؟؟
ــ اذا انتين ام.. عبود ابو.. مايصير انتون اخوان.. يعني اني الأم.. وعبود الأبو..
شهربان : ــ ماني ماني.. واني ويه..
ــ انتين جارتهم
ــ ماعندي ابو؟؟
عبدالأله: ــ لا مات..
شهربان : ــ ويلي ويلي ..
وتقعد تصيح..
توقفت الذكريات مع ابتسامه لعبدالأله.. اللي انقلب على يمينه يحاول ينام... وفي قلبه:
ــ ياليت ديك الأيام تعود..
اذن اذان الفجر ... وصدفه انتبه يوسف على الصوت رفع جواله يطالع الساعه صار يحاول يتنبه ويثبت الوقت وعلى مايقوم ويتمسح ويجهز الا اذن الأذان عدل...
قام وفتح الباب وانتبه لشفيق انه لازال جالس ..وراسه الى الجدار..
يوسف انصرع.. ولع الليت من الخوف .. مراد كان اشبه مايكون بالمتكفن بالشرشف فما حس على الضوا.. قرب يوسف من شفيق وهو يحك عيونه يبغى يشوف عدل ..
شفيق نايم!! على هالوضع من البارحه... شلوون؟؟
والا ... فيه شي لا سمح الله وغافلين عنه هم...
تقرب منه اكثر وصار يتأمل جسمه هل يتنفس لو لا .. الا شفيق يفتح عيونه فجأه وبالسرعه وينفض ايده نفضة مختلع
..
يوسف من شافه هيك فجأه.. شهق من قلب ووخر على ورى.. ويتعثر برجول مراد ويطيح على الأرض ورجوله على سيقان مراد اللي فزع من نومته مختلع..
يوسف يقوم ويقعد على سريره ... يحاول يلقط انفاسه ..
ــ ويش فيك شفيق؟؟
شفيق واصابع كفه متشنجه ..:
ــ انت اللي ويش فيك خلعتني!!
ــ نايم كنت؟؟
ــ اييييه..
ــ كذاا !!
ــ ما انام الا كذا..
يوسف في باله :
ــ بسم الله الرحمن .. غريب عجيب ...
مراد بقهر: ــ وفففففف طفووو الليت وبلا ازعاج..
يوسف : ــ قومو صلاه اصلا .. وتالي عود نام..
مراد يرجع يغطي وجهه بالشرشف وينقلب الجهه الثانيه..
يوسف استاء بالمره من حركة مراد...
وبلع القهر وسكت مايبغى يسوي مشاكل من اول يوم.. قام الحمام وشفيق وراه...
بالصاله كان السيد فارش سجادته وبدى يجهر بالأذان...
حبيب طلع من الغرفه وهو يحك راسه وتقابل ويا يوسف :
ــ صباح الخير
ــ صباح النوور ...
حبيب : ــ سيدوو بس اذن مو تسبقنا بالصلاه..
يوسف : ــ لويه عاد..؟؟
حبيب : ــ هو اللي يصلي بنا
يوسف : ــ ما شالله...
حبيب : ــ حصران؟؟
يوسف حده مستغرب من السؤال.. : هااا..!!
حبيب : ــ ههههههههه انا ميت معصور حدي... اذا منت حصران مره بادخل قبلك و ماعليك امر كظموه العله قعده للصلاه..
يوسف : ــ ههههههه يعني.. اوكي ..
حبيب بالسرعه من طلع شفيق من الحمام وراه على طول وهو يقول ليوسف :
ــ اذا مافاد وياك عليك بالصفاري..
يوسف مو فاهم شي ...
راح يقعد كاظم.. بهدوء:
ــ كاظم.. كاظم..
الا كاظم يهربد كلام مو مفهوم اشبه بالهندي ..
ظل يوسف على راسه ولا قعد... طلع حبيب من الحمام... وراح الغرفه يشوف الوضع.. الا كاظم بعده نايم..
يوسف : ــ ماهو راضي يقوم ويهلوس علي كلام كنه هندي..
حبيب : ــ ههههههههههه صح هندي.. كاظمو يعرف هندي ههاااااااااي من امه العوده.. .. عفر سبك..
يوسف في باله... امه العوده؟؟!!
ويجيب حبيب صفريه وملعقه وقرب لكاظم وصار يطق :
ــ اصحى ياااانــــــــــــــايم واعبد الدااااااااااايــــــــــــــــــم..
كاظم على طول فتح عيونه وانتبه... وقام..
يوسف ماقدر صار يضحك ويضحك... وحبيب وياه ضحك:
ــ عرفت الحين أي صفاري اقصد...؟؟
وتجمعو كلهم ورى السيد وبدى يصلي بهم.. عدا مراد اللي ماقام ولا تزحزح.. !!
ابو مجتبى قام للصلاه.. حماماتهم برى البيت في الحوش.. المكان ظلمه .. عدا نور خافت للمبه
وفوق هذا نظر ابو مجتبى ضعيف بعض الشيء.. وبين ماهو يمشي لسانه يلهج:
ــ لا اله الا الله ..توكلت عليك ياحي ياقيوم..
الا يشوف قدامه شمطوط ابيض كبير يركض خلاه يتصروع و يصارخ ..
الى الملتقى..
رد مع اقتباس
المفضلات