مراد :
ــ ما شالله عالشباب شكلهم خوش ناس .. كشخات..
يوسف : ــ ايه الحمدلله كنت احاتي هالشغله...
مراد : ــ وحليوين.. بس صراحه... انت احلاهم... اسم على مسمى ما شالله عليك..
يوسف ارتبك من كلام مراد..
مراد يضحك : ــ هيه .. ياهوو .. لا يروح فكرك بعيد.. بس انا احب الكاشخين والمرتبين والحليوين.. يلفتو نظري ..
يوسف ابتسم..
مراد: ــ ايه لا تخاف.. كيري ميري ماعندي...
طفو الليتات وسكرو الباب .. انسدحو .. خمس دقايق انفتح الباب .. وكان حبيب ..
ــ شباااب هاا شخباركم الوضع وياكم اوكي..
ضحك عليه يوسف :
ــ ايه لا تخاف اوكي .. تسلم ..
ــ طيب تصبحو على خير واحلام سعيده.. بكره الصبح الساعه 9 ورانا انا وكظموه محاضره فبنقعد من 8 اللي حاب يفطر ويانا يقعد اووكي
مراد : ــ ويش فطوركم..؟؟
حبيب : ــ الله يحيينا..
يوسف : ــ هههههه زين.. على خير
سكر حبيب الباب ...
الغرفه عتمه.. شوي مراد من تحت يحوس في جواله وينور الغرفه..
انتبه يوسف لشفيق لا زال قاعد ومسند راسه عالجدار ...!!
حط مراد شاشة الجوال على المنام بحيث لا تضوي عليهم ..
شوي .. يوسف يسمع صوت طقطه و كأنها اغاني؟.!!
يحاول يتجاهل الصوت مو قادر .. سأل :
ــ تسمعو اللي اسمعه..؟؟
شفيق و مراد ساكتين مايردو..
يوسف يحس ان مراد مانام من حركته .. فجأه ارتفع الجوال و صار يحوس وانتبه له حاط السماعات في اذونه..
يوسف : ــ مراد.. مراااد ..
نزل يوسف ايده ولمس جبهة مراد..
مراد انصرع وشهق شهقه..
يوسف جته ضحكه..
ــ بسم الله على عمرك.. آسف .. خلعتك
مراد شال سماعه وحده من اذونه اللي جهة يوسف.. وصار يضحك
ــ هلا ..هههههه ويش فيك ..؟؟
ــ هذا انت اللي تتسمع اغاني؟؟
ــ ايييييه هاااك تسمع وياي..؟؟
ومد على يوسف السماعه.. يوسف بأستياء..
ــ اعووذ بالله.. قبل لا تنام بعد ؟؟؟ تسمع هالمنكر..
ــ اووبس .. لا يكون مطوع!!
يوسف والتعليق هذا ماعجبه بالمره:
ــ ليش لأني ما اسمع صرت مطوع.. !!
مراد ارتبك : ــ لا.. ولا شي .. بس انا حاط سماعات.. شلون تسمع الصوت؟؟
ــ قصر عليه ماعليك امر.. تعبانين ونبغى ننام.. ماكأنك حاط صراحه..
مراد بنبرة غير مقتنعه: ــ ان شالله عمي...
يوسف ماعجبته طريقة مراد في الأخذ والعطا.. شكله من النوع اللي يصر على ارائه ومبادئه وما يحب يسمع النصيحه...
يوسف طنشه ما يبغى يصير بينهم أي نقاش مو اوكي من اول ليله.. قلب روحه على الجهه المعاكسه ... ونام...
الى الملتقى..
رد مع اقتباس
المفضلات