هو دخل الا يلاقي علبة نشاف تنحذف وطرااخ تصفق في الباب .. وهو لاف بيسكره...
يوسف اختلع... والتفت بالسرعه لمصدر العلبه... الا واحد جاي ومره خجلان حده ..
ــ آآآآآآآآآآآآسف ,,, آآآسف آآسف ,,, حسبالي كاظمووه...
يوسف ابتسم وبهدوء:
ــ سلام عليكم...
ــ عليكوووم السلاااام ياهلا بأخونا.. اتوقع انت يووسف آل ... صح؟؟
ــ ايه ..
ــ هلا فيك والله حبيب وغااالي موصننا عليك أحمد آل ..... انا حبيب آل .... ،، مسامح خيوو حسبالي اللي داخل كاظموو...
ــ هههههه مسامح.. خلعتني لكن خوش استقبال...
حبيب يضرب كتف يوسف عن مزح:
ــ افاااا عليك ... منورنا ياخوك .. بس خل يجي ساس البلا ... كُظموووه دا ,, اراويه شغل الله.. تفضل حياك ...
وفي الصاله لقى يوسف على الجلسه واحد منسدح
حبيب:
ــ سيدوو .. قوم طق سلام تحيه لضيفنا الجديد..
اعتدل السيد وابتسم: ــ عليكم السلام والرحمه...
وقام وصافح يوسف ...
ــ هلا فيك والله.. انا سيد هادي آل .... ،، مين حضرتك..؟؟ يوسف والا مراد والا شفيق...؟؟؟
ــ هلا فيك سيد.. انا يوسف ...
ــ منورنا ابو يعقوب ..
ــ النور نوركم تسلم...
حبيب : ــ كنا 6 في الشقه كل 3 في غرفه.. انا .. وكاظموه و السيد بغرفه و3 تخرجو السمستر اللي طاف .. وعن حساب بيجو بدلهم 3 هذا انت اولهم .. وواحد قالو لينا الشباب اسمه مزاد والفالف شقيق ..
السيد : ــ هههههههه حبوه ما بتهون عن النحاسه ... اتحداك تقول قدامهم اذا جو هلا مزاد هلا شقيق...
حبيب : ــ اقووول ليش ما اقول ...وانا زبيب ...
ضحك يوسف :
ــ الله يستر ما يندرى ويش كنت مسمني...؟؟؟
السيد : ــ ههههههههه لا.... لا تخاف ,,, تعب يبغى يقلب اسمك زيهم مافلح ,,, ما يفيد وياه ابو الحب..
حبيب : ــ شدعوه سابنهم؟؟
السيد : ــ لا .. بس فيه ناس تزعل ترى...
حبيب : ــ يوسف .. تزعل ...؟؟ انت تزعل..!!
يوسف : ــ هههههههههه لا ما اظن..
حبيب يرجع يصفق كتف يوسف :
ــ ايوااا تعجبني .. وتمون... سيدوووه...قالو لك بنيات حنا..؟؟ رجال ما ناخذ بخواطرنا
السيد يكلم يوسف :
ــ ههههههه يامالك ياخوك من الضرب من حبووب لين ما ينخلع كتفك .. متعودين عليه.. وعلى نحاسته..
ويغمز له .. ويكمل الكلام:
ــ مزووح بس طيب وايد...
حبيب يطالع على جنب :
ــ سيدوو عن النحاسه..
ــ هههههههه ويش قلنا..!!!.
وصار حبيب يعرف يوسف على الشقه ... و راواه غرفته مع النفرين الجدد .. حط فيهم اغراضه ...
الا بدخلة كاظم...
حبيب صفق : ــ اووووووو خساره مافيه شي ارميه عليك
كاظم يضحك وببرود:
ــ لووويه عااااد..؟؟
حبيب : ــ ياااااااربي ... سيدو من متى طالع البقاله يجيب شاي ؟؟؟
السيد : ــ ههههههههه من ساعتين و خمس دقااايق بالضبط
كاظم :: ــ خذ لك.. يحسبو ورايي..
حبيب : ــ ايه ايه... نحسب .. ماصارت دا شاي .. هونا ما نبغى لا شاي ولا صاقعه ... عافته نفسنا... كل منا اللي زي الشياب ما يمشي غدانا الا بشاي ..
والتفت ليوسف :
ــ مسامح ياخوك الواجب نضيفك لو استكانه... جوعان؟؟ نحط لك غدى؟؟
يوسف ابتسم : ـ لا تسلم..
التفت حبيب على كاظم: ــ بس هالباااااارد يخلي الواحد يعصب ..
كاظم : ــ ههههههههههه يللا عاد... بدت نشرة الأخبار CNN ويش بعد قال عني في غيابي..؟؟
السيد : ــ ههههههههههه لا تخاف كل خير
كاظم : ــ ايه... ادري ادري..
حبيب : ــ انا بس ابغى افهم .. ويش تسوي في البقاله كل هالوقت.؟؟. تتفقد تواريخ الحوايج...؟؟
كاظم : ــ ويش اسوي ماحصلت دخاني المفضل رحت بقاله فانيه
حبيب حمق: ــ اووووو رررررررريح... الحين كل هالتأخير على حساب باكيتك .. اف منك ومن دخانك اللي ماندري متى بتهون عنه....
يوسف في باله: ــ اف .. يدخن بعد.. كملت...
حبيب : ــ الا تعال... هالكيس الطشونه اللي في ايدك... فيه الشاي..؟؟
كاظم يطلع العلبه وويش صغارتها من الكيس..
حبيب : ــ أه... أه أه أه أه
السيد : ــ هههههههههههههههههههههههههههههه ما هكذا الظن بك يا كاظم..
يوسف ماقدر عليهم ،، و صار يضحك وياهم..
حبيب : ــ ويش هالبخل اللي حل عليك فوق برودك.. راسي مانى قادر .. شبدي منك... هذا كم كيس شاي فيه ؟؟؟
كاظم ببرود يقلب فيه ويدور وين عدد الأكياس .:
ــ ايواا.. ايه.. 10 اكياس .. وهذا بقايا الفلوس ...
حبيب يصفق كف بكف : ــ مادري.. مادري ويش اقول.. ؟؟؟ عن جد .... فعلننننن فعلننننن .. تخونني العبارات...
السيد مو قادر : ــ هدي هدي حبيبي حبيب ههههههههه خلاص تالي بعد محاضرتي امر البقاله و اشتري لا تعصب...
حبيب : ــ عساك سالم يابعد روحي ..
السيد : ــ هههههههههه هالضبعه دا... إلا لويه كاظم ماخذ هالعلبه ؟؟
كاظم : ــ البقاله اللي فيها دخاني المفضل مافيها شايكم المفضل الا هالحجم مخلصين العلب الكبار ويش اسوي.؟؟؟ اروح بقالة فالفه؟؟؟.. الحين ويه .. تبغوه لو ويش سالفتكم؟
حبيب يستفز كاظم من القهر:
ــ زين يالخناقه شان جبت فنتين لو فلاف بسعر الوحده الكبيره.. والا مخك منتهي..؟؟
كاظم عصب :
ــ يلعن شكلك زين.. قالو لك بهيم ..؟؟ قوطي؟؟؟ مافيه من هالنوع الا هالقوطي و الأنواع الفانيه انتون متحججين ما تحبوهم..
حبيب فلت روحه على مخده بالصاله :
ــ سيد.. فديتك.. ياغناتي انت...خذه من عنده وروح به المطبخ .. لا اشب فيه حريقه..
خذ السيد العلبه وهو ميت ضحك .. وكاظم طلع باكيت دخانه ودخل الحمام..
حبيب : ــ إيـــــــــــــــــــــــــــــــه ...مو هذا اللي خارب مخك ... شغل الهوااايه لو سمحت... انا مانى داري ما دخن قبل لا يجي لويه..؟؟؟
والتفت الى يوسف :
ــ استريح ياخوك استريح...
يوسف قعد وهو مابين ضاحك ومبهوت منهم..
وصار يشرح ليوسف وضعهم في الشقه:
ــ حنا يا بو يعقوب متفقين نسوي عزبه كل واحد يحط شوي ونشتري حوايج للمطبخ خفايف من شاي و زيت وبيض وجبن وبطاطس .. يعني حويجات نعرف نتصرف بها وتسد جوعنا و نغير بها عن اكل المطاعم... وهذا الله يسلمك هالكاظموو الحين ماخذ من فلوس العزبه وخذ لك ويش ماخذ لينا..مو يعصب .. !!! ؟؟؟ايييه مسامح ياخوك... يعني اول يوم لك والبدايه كفخه بنشاف وتالي شبقه ... افففف مننا ...
يوسف : ــ هههههههه لا تحط بالك عاد.. بس ما شالله عليكم تونسو خوش ناس باين عليكم..
حبيب : ــ تسلم والله انت اللي باين عليك خوش واحد... وعالأقل موصى بك ومن طرف صاحبنا.. ما ندري عاد عن مزاد وشقيق ويش بيطلعو ...
يوسف : ــ ههههههه ان شالله تمام .. اتمنى والله.. دام بيشاركوني بالغرفه...
ــ ان شالله يارب
الا السيد داخل المطبخ ينادي:
ــ حَبوووووووب.. مافي شخاااط..
حبيب يتحلطم :
ــ يااادا الشاي اللي بيطلع من شبدنا...
وينادي على السيد:
ــ تعاااال للي يقند راسه بالحمام... خذ ولاعته..
طق السيد على كاظم باب الحمام.. وفتحه لقاه مقفل ..
كاظم : ــ هااااااااا
السيد: ــ ويش تسوووي ...؟؟
كاظم : ــ ارقص .. ويش يسوي الواحد في الحمام يعني ؟؟؟
ــ عن حساب تدخن... افتح عطني الولاعه...
ــ اف اف .. الواحد يعني حتى بالحمام ما ياخذ راحته ...
حبيب : ــ ههههههههههههه خذ لك الله يلوع شبدك صراحه اليوم كاظمو بارتكب فيه جريمه...
السيد : ــ ههههههههههههه انا لله و الآخير وياكم..؟؟؟... يللا كاااظم...
فتح كاظم الباب وعطى السيد الولاعه ورجع سكره..
حبيب : ــ اوووووووف اف اف اف
يوسف صار يضحك مو قادر عليهم..
كاظم في الحمام يسمعه:
ــ اف في عينك .. الهوايه شغاله يا متعيلف.. قوم جيب لي فوطتي باسبح..
حبيب : ــ ههههههههههههه .. دا الواد وسخ نفسوو
كاظم طالع من الحمام : ــ حبوه... استح هااا.. استح...انحس منك ماشفت...
دخل غرفتهم و اخذ الفوطه...
حبيب يتحرش فيه:
ــ تفرك عدل هااا.. ترى باشمك..
كاظم يصفق باب الحمام..
حبيب : ــ هيييييييييه يقبع بعد تالي نتكلف به...
ويرجع ليوسف :
ــ حيا الله ابو يعقووب.. عورنا راسك هااا..
يوسف : ــ الله يحييك.. لا بالعكس .. تونسو والله
الا بجية السيد حامل تبسي فيه 3 ستكانات شاي ..
حبيب : ــ هلا بعيوني الساده.. شايهم فوق العاده...
السيد : ــ هههههههههه ما تجوز عن سوالفك...
يوسف : ــ وين اللي حق كاظم..؟؟؟
السيد : ــ أي والله نسيت..الحين بيحرقنا كفايه هو اللي جايبنه..
حبيب : ــ الله عاد .. بيسبح .. اكو الأبريق مليان يعود يغليه طلعته ويصب له..
حبيب مندمج وهو يهف الشاي بيشرب بنفس الوقت بيسأل يوسف سؤال...
ــ يوفف .. احححح ... غربال
يوسف ضحك ..
السيد : ــ اووو حصل له للأسم قَلْبَه.. قال ويه يوفف .. ما بتطير الأستكانه .. تكلم تالي اشرب
يوسف : ــ هههههههه لا ماهو اول واحد يقلبه... بنت اختي الصغيره ماتقول الا يوفف ..
السيد : ــ الله يحفظها ياارب .. ما شالله عليك خال يعني ..
حبيب : ــ اه .. نسيت شكلك.. مو احمد حمي اخته..؟؟؟
ــ اووو صح صح.. نسيت ...
يوسف : ــ ايه حبيب .. ويش كنت بتقول ؟؟؟
حبيب : ــ بسألك ويش تخصصك وهيكات..؟؟
وصار حبيب يسولف مع يوسف ... عن الجامعه والتخصصات ويعرفه اكثر عن الوضع في الرياض شلون راح يكون...
و في القطيف ......
الى الملتقى...
رد مع اقتباس
المفضلات