غربة الأوطــــــــــــــــــان...

[Princess]

مرحبا
ياعمري انتون.. وحلااااوة تعاليقكم هناوبالتقييم
صراحه.. تخليني اتشقق وشوي اطير من الوناسه..
بيني وبينكم اني اول مابديت اكتب في هالروايه كنت محبطه شويات
وكل اقول ماني حابتنها
ومو بحلاوة ماعرفتوني
ولا بغلاوة وحلاوة ضعنا ياصبرنا عندي
بس مع الأستمرار
وتزايد الحماس

واشتعال الأحداث


وتعليقاتكم الروعه
عفر بديت اغير رايي..

وعلى عيني وراسي من فوق كلكم .. لا يحرمني الهي منكم



looovley منوره غاليه.. لش وحشه فعلا.. انتين وكم وحده اتمنى اذا يقرو كلامي يعرفو روحهم..
لأن مو عوايدهم ما يتابعو ويعلقو وياي...

فديتش صادقه .. متأخره خير من ماميش لا خلا لا عدم منش الهي


نكمل

[Princess]

يوسف .. دخل غرفة ماريا ..

وقعد على كرسي التسريحه.. وصار يطالع في الأسوار... وهو مو عارف ويش يسوي..!!



يتذكر العام الماضي عيد ميلاد اخته لما احتار ويش يشتري ليها.؟؟؟

.كان يبغى ياخذ ليها شي غالي وحلو.. صار يفكر بشي حلو يناسب امكانياته الماديه..

راح سوق الذهب و اختار ليها هالسوار .. فضه وفيه فراشات مطعمين بالكرستال الوردي.... كانت ماريا تحب الفراشات وايد...



يتذكر فرحتها به اكثر من أي هديه وصلتها في حياتها... و مدحها لذوقه ....

ضغط يوسف على كفه والسوار بداخلها..

مو مصدق اللي سمعه..



اخته... و ماعندها جوال حق يتصل عليها ويشوفها وين بالضبط ؟؟!!

واخوه حسن واخته اماني ماهو حافظ ارقام جوالاتهم..

يتذكر المكالمه ...

ــ وصلت ماريا.؟

ــ مين انت؟

ــ انا .. خويها.. ؟

ــ نعم... ويش تقوووول !!

ــ اقول لا يكثر الكلام .. اذا وصلت قول ليها بس تراني نفذت تهديدي .. ووقت ما تبغاني بتلقاني..

ــ ياحيوان يا زفت مين انت.. وويش عرفك بماريا..؟

ــ اتوقع شفت الأسواره على باب بيتكم صح؟

يوسف ساكت..

ــ واختك اليوم لابسه بنطلون جنز فاتح و بلوزه بنفسجيه...

ــ ويش تقول؟؟ ويش اسمك.. مين انت..

ــ وين اختك.؟؟ للحين ماجت.. الظاهر خايفه من الفضيحه..

ــ كذاب انت كذاااب.. قول لي مين انت على شان اصدقك.. خليني اشوفك..

ــ ههههه مجنون اعلمك مين انا على شان تقتلني.. اقتلها لحالها.. يكفيك جرم واحد ليش يصيرو ثنين.. واذا منت مصدقني ..!! طيب واذا قلت لك في بطنها شامه ..؟ مابتصدق بعد

صرخ يوسف بالمتصل صرخه... وبعد ما سمع هالكلام.. ظل منصعق .. بهت.. وتغيرت الوانه..و المتصل انهى المكالمه...



ساعتها..

يبغى يقوم رجوله ماتشيله,.. يحسها تيبست..

الا بوصول حسن ..

دخل لقى شنطة يوسف بالصاله...



راح المجلس والمطبخ مالقاه...

انتبه لغرفة ماريا مردود بابها.. وهو يدري ان ماريا قالت بتنزل في بيت ابو مجتبى اليوم ..

دخل لقى يوسف..

حسن بأبتسامه:

ــ هاا.. الحمدلله عالسلامه.. من متى جيت؟

يوسف ووجهه وصوته مبين عليه ان فيه شي :

ــ الله يسلمك .. من شووي..

ــ ويش فيك؟ ويش صاير؟

ــ وين ماريا....؟؟؟

ــ في بيت نسايبك..

ــ متأكد؟

ــ ويش تقول..

ــ متأكد انها في بيتهم..

ــ ايه .. ادق على اماني وتكلمها ؟

ــ ايه دق

ــ ويش فيك ؟؟

ــ دق اباشوف .. دق..

[Princess]

وعلى الحظ العالمي .. من بعد ما تغدو الصبايا .. و قعدو شوي زين... للعصر .. مالقو سياره ترجعهم بيوتهم .. عبدالأله اعتذر منهم فجأه طلع مشغول ..

اماني صارت تحايل فيهم ينتظرو احمد يوصلهم لو مجتبى .. بسيارة مجتبى لأن احمد ماعنده سياره.. بس هم استحو ومارضو وقررو يمشو..

وطلعو شهربان وماريا يتمشو للبيت..

وبالمشي المشوار يبغى له تقريبا نصف ساعه.. بالسياره ياخذ 10 دقايق تقريبا..

اتصل حسن باماني

ــ هلا خيه..

ــ اهلين..

ــ اخبارش

ــ الحمدلله تمام...

ــ يوسف رجع البيت..

اماني من سمعت هالكلام..

ــ ياعلي اخيرا.. ويش فيه .. عسى ماشر مايرد على اتصالاتي ولا رسايلي .. وينهو وينهو

حسن قام يضحك"

ــ بل بل زين اخذيه

ومد على يوسف السماعه..

يوسف يحاول يتمالك نفسه..

وحده يرد : ــ الحمدلله.. زين.. تمام

على اسألة اماني اللي جت له كالسيل ..

اماني:

ــ وويش هالغياب ولويه ماتتصل ابدا.

ــ جوالي منسرق صار له تقريبا شهر وشوي..

ــ اهاا.. واني اقول مو عوايدك
يوسف وبنبرة تساؤل مريبه:

ــ خيه وين ماريا

اماني انصرعت:

ــ يؤ ماوصلت البيت؟؟؟

يوسف فتح عيونه:

ــ لويه ..!!

ــ من دي ساعه ونص تقريبا طلعتها هي وشهربان من عندنا..

يوسف خلاص وصل حده من العصبيه.. وبلا وعي صار يصرخ في اماني:

ــ ولويه تخليها تطلع سااايبه هي المسأله

اماني اختلعت اول مره يوسف يرفع صوته عليها:

ــ ويش فيك؟.؟ لويه تصارخ. مو اول مره هي تمشي وبعدين مو لحالها وياها شهربان.. ويش بيصير فيهم يعني.. ياعلي خليتني اتهوس عليها.. متأكد مهي في غرفتها؟

يوسف بقهر وصوته يتقطع مبين عليه الخوف:

ــ غرفة ويه.. هذانا في غرفتها...

ــ يووو .. اطلعو دوروها .. وطمنوني اذا حصلتوها..

سكر يوسف. ومع الألحاح من حسن عليه لويه هالخوف على ماريا ويش صاير فيه..

يوسف بخوف و مهو عارف كيف يوضح:

ــ ماريا...

وصار يشرح لحسن تفاصيل المكالمه اللي وصلته..

وفي الشارع يتمشو..

ماريا: ــ تعبت احس نعالي بينقص علي الله يغربل دي شله سادين الطريق

شهربان: ــ ويش نسوي .. حكمتي علينا نسلك الطريق الأطول.. لو شاخطين ومتشجعين من زمان وصلنا..

ــ مجنووووونه امر جهتهم.. فرضا لحقونا.. واجد ويخوفو .. ماسمعتي صوت ضحكهم والأغاني .. من بعد 10 امتار.. وسادين الطريق بسياراتهم.. غير التفحيط.. مستغنيه عن عمرش شكلش..

ــ خخخ يمه منش...

ــ ماباقي شي .. كلها كم متر ونوصل..

ــ الله يغربل شرك يا عبود ماطلعت لك الشغله الا اليوم..

ماريا ساكته ماترد..

شهربان:

ــ تلاقيه يخلص اوراقه حق فنزويلا

ماريا ساكته ماردت ..

شهربان :

ــ عاد يبغى لينا نكلم البنات يشوفو ليهم باص ثاني و نشوف لينا وياهم حنا بعد..

ماريا :

ــ يبغى لينا..

شهربان في بالها:

ــ بل هذا اللي قدرتي عليه...

في امريكا..

قيصر قاعد مع الدكتور المسؤول عن حالة سام...

ــ نعم...يقول انه لا يتذكرني .. بل وحتى لا يتذكر ان اسمه سام.. عندما سألته عن اسمه قال انه ناجي و كان مرعوبا ويسألني لم هو هنا.. مالأمر يادكتور؟ مالذي حصل له؟

الدكتور :

ــ اووه.. مع الأسف هذه احد الحالات النادره التي تحصل مع فقدان الذاكره .. فبمجرد رجوع ذاكرته السابقه اليه قد تمحى جميع الذكريات التي عاشها وقتما كانت مفقوده..

ــ هل يعني ذلك ... انه نساني فعلا؟

الدكتور بأبتسامه هاديه:

ــ يبدو ذلك.. ولكن لا تتركه ..وابدأ معه من جديد ان كان يهمك امره

ــ اتعني انه يستحيل ان يتذكر أي شيء من ماضيه وقت فقدانه ذاكرته..

ــ مممم ليس مستحيلا.. فلربما هي عوارض وستعود له الذاكره بالكامل..عموما فالتحريات ستصل بعد قليل فهم يريدون التواصل معه لأجل اخذ افادته في بعض القضايا..

طلع قيصر من عند الدكتور وعلى شفته ابتسامه ساخره..

ــ ولك آني قلت ان شالله تنسى كل ذكرياتك الأليمه هاي مو تنساني ... !!

وصلو ماريا و شهربان البيت...

دخلت ماريا ... لقت شنطة يوسف بالصاله . فرحت .. صارت تنادي:

ــ يوووسف .. جيت؟

لقت باب غرفتها مفتوح .. توقعت انه فيها

دخلت وهي متحمسه وفرحانه برجعته.. الا تلاقي حسن قدامها وعيونه من الغضب تشعل نار..

مسكها من عباتها من قدام وسحبها وهو يصرخ فيها..

ــ وين كنتي؟؟

ماريا بخلعه:

ــ هذاني قايله لك.. كنت في بيت عيال اماني..

ــ كذااابه...

يوسف عالكرسي قاعد ويطالع فيها مو مصدق..

ماريا مختلعه ..

ــ والله.. والله كنت عندهم لويه اكذب .. اتصل واسالها..

حسن والغضب زايد:

ــ ومين قال ما اتصلنا وما سألنا.. كان مداش توصلي ساعه ونص وين كنتي؟؟

ــ والله .. والله نمشي في الشارع... كان مسكر بمجموعة شباب .. والله ..

حسن يرمي مفتاح السياره على يوسف اللي كان ابدا فعلا مو في الدنيا..

ــ شارع أي شارع.. روح يوسف شوف الشارع اللي تقول عنه مسكرينه الشباب..

طلع يوسف من البيت وهو يحس نفسه في حلم...

ويتمنى يكون الشارع مزحوم فعلا...

ويفكر ان كان مزحوم بويش يواجهوها.. خصوصا ان المتصل ماخلى شي الا يعرفه!

وراح ناحية الشارع اللي قالت عنه..

لقاه فاضي ..!!

يوسف ساعتها حس روحه بتطلع..

وفي راسه الف بليس والف مصيبه ...

رجع البيت بسرعه..

دخل لقى حسن لسا في الغرفه مع ماريا استجواب وهي مصره انها صادقه ومصره ان الشارع زحمة شباب ويتصل في شهربان يتأكد منها..

يوسف دخل الغرفه وعلى وجهه ملامح الصدمه تبين بالقوه..

حسن: ــ مافي احد الشارع .. صح.. مافيه احد..

يوسف يهز راسه اثبات لتوقع حسن

ولا يشوف حسن الا يرفع ايده ويعطيها كف قوووي

يوسف انصرع منه...شهق شهقه وبنفس الوقت مو عارف لا يدافع ولا يسكت عن اللي سمعوه..

حسن يصرخ :

ــ مافيه احد .. مسدوود ها.. مسدووود..... ماريو وين كنتي ؟؟ لا تكذبي لا اذبحش..

ماريا مصدومه حدها مهي عارفه ويش تقول ما عندها غير الحقيقه اللي قالتها وهم ابدا مو مصدقينها..

صارت تصيح وتترجى يكلمو شهربان واماني .. ويتأكدوا منهم..

ــ اتصلو وتأكدو.. ويش صاير؟؟ لويه هالمعامله الحين..؟؟ ويش سويت اني...

حسن :

ــ اتصل واحد.. يقول انش كنتي وياه... وقال كل شي عنش ..والأدهى والأمر يقول في بطنش شامه..

ماريا من سمعت انصعقت.. هالشامه مايدرو عنها اخوانها.. ما احد يدري عنها الا صديقاتها المقربات و اختها.... وما احد شافها الا اختها... التفتت لأخوها يوسف لقته منكس راسه للأرض ويتنفس بصعوبه..

ماريا متلعثمه وبأرتباك والدموع في عيونها :

ــ ويش تقووول

حسن بعصبيه:

ــ ويش اقول بعد.. الشارع وفاضي هذي كذبه.. بتكذبي بعد اللي انقال عنش..

ماريا التفتت ليوسف اللي قعد عالسرير هالمره ويحس نفسه بينهار:

ــ يوسف .. يوسف ... والله ما سويت شي .. والله اني بريئه... والله الرجال دا كذاب.. والله ما اعرف احد اني

يوسف صمت بس يطالع فيها ومصدوم..

حسن:

ــ يمكن الثياب جاب الوانها صدفه...ارفعي بلوزتش اباشوف .,.. فيش شامه لو يكذب دا بعد..

ماريا تحس بدنها يتنفض.. ويش تسوي؟؟

كيف بتتصرف .. خصوصا مع سالفة الشامه !!

[Princess]

ماريا وهي ترتجف :

ــ لويه ... ماتصدقني

حسن يمسك بلوزتها ويحاول يرفعها وهو معصب ...وهي مستحيه ماسكه بلوزتها كرد فعل عكسي وعفوي.. ويش بيشوف ؟ اثبات الكلام اللي انقال عليها !!

ماريا من حركة ومحاولته.. خلاص انهارت على ركبها وهي تشاهق وتصيح صياح مو طبيعي..

حسن صار يضرب فيها على راسها ويرفس فيها وهو يصرخ:

ــ فضحتيناااا.. وطيتي رووسناااا... ولش عين تكذبي بعد...

ماريا انحت على اقدام اخوها تضمهم وهي تحلف:

ــ اقسم بالله ورحمة ابوي وامي ما سويت شي ...

يوسف من طرت ماريا ابوها وامها... جت على باله الأحلام..

قام ومسك حسن يهدي فيه:

ــ خلاص ياخوي.. خلاص خلنا نشوف السالفه عدل اول..

ــ ويش نشوووف مانشوووف .. اذا حتى الشامه يدري عنها.. جعلش الموت ان شالله.. الله لا يبارك فيش ...

يوسف يسحب في حسن اللي كان مره مستميت ومو موقف عن الضرب ..

ماريا تصرخ:

ــ اذبحني .. اقتلني.. ولا انك تشك في شرفي .. احلف لك بالله ماسويت شي .. عندك شهربان اسألها..

حسن :

ــ ايه.. مو صديقتش الروح بالروح.. اذا ما هي زيش اكيد بتتستر عليش..

يوسف صرخ:

ــ خلااااااااص

وصار يسحب في حسن لين طلعه برى الغرفه..

حسن وهو يزبد ويرعد:

ــ والله يا الحيوانه .. لراويش.. ان طلعتي من هالغرفه كسرت رجولش .. ومدرسه مافيه... ويا انا يا انتين بهالبيت يازفته..

ماريا وهي تحبي على ركبها تحس رجولها ماتشيلها من هالتهمه...

ــ لا ياخوي.. لا عاد.. احلف لك بالله ماسويت شي

يوسف :

ــ اهدي .. اهدي الحين ..

ويسكر عليها الباب..

حسن برى الصاله.. وهو مره محمق:

ــ لا جوااااال وعندها.. لا نت وعندها.. وقدرت تسوي بلاويها.. صحيح الخربان خربان لو مهمها منعته..

يوسف حمق:

ــ خلاص عاد واجد هالكلام...

حسن يسحب وايرات التلفون..

ــ تلفون وخلاص بعد مافيه.. سودت وجههنا الله يسود وجههااا..آآآآه ويش هالأسبوع دا تجيك فيه المصاايب مجتمعه...

ــ خلاص قلت لك خلاص

ــ خلااااااااص انت بعد فارق عن وجهي ما جتنا من ورى جيتك الا المصايب..

يوسف مسك اعصابه .. و دخل المجلس وسكر عليه الباب...

جنب باب الغرفه ماريا حاطه راسها بين ركبها وتصيح بحرقه قلب وقهر..وفي بالها:

ــ والله اني مظلومه.. والله اني ماسويت شي .. ياربي ساعدني .. ياربي...

اماني تتصل عالبيت مااحد يرد .. الوايرات مفصوله..

نور :

ــ ويش صاير؟

اماني بخوف :

ــ مادري متصل حسن يسال عن ماريا من شوي .. كان مداها وصلت من زمان لما اتصل .. وللحين ما رد علي وصلت لو لا...هوسني عليها.. والحين هوسوني زياده ما يردو عالتلفون...

ــ يو الله يستر.. دقي على جواله..

ــ دقيت من شوي جواله مقفل ..

حسن من شاف اسم اخته اماني... مارد..

بس خلصت الرنات قفل الجوال ..

اماني:

ــ .. لا .. فيه سالفه شايده.. لازم اروح بيت اهلي .. لازم بس يرجع مجتبى من العمل..

عبدالستار بالمستشفى عطوه ترخيص .. صارت صحته ممتازه..

صار يتصل في حسن شان يوصله البيت.. لقى رقمه مقفل..

دق على اخته وداد وعطاها خبر انه بيجي البيت بتاكسي على أي حزه يحصله..

وداد صدفه كانت مع ازدهار .. اللي من سمعت اقترحت ان سواقها يروح يجيبه

بس قبل يوصلها الشقه ..

وداد: ــ لويه عاد خلنا قاعدين..

ــ لا توه اخوش راجع بالسلامه.. مالي مكان وياكم بستحي.. الحمدلله على سلامته وآخر السوء ان شالله..

ام عبدالستار : ــ ماتقصري يا بتي .. يعطيش العافيه

ازدهار : ــ الله يعافيش خالتي..

وفي بالها:

ــ سبحان مغير الأحوال !!

في بيت ابو مجتبى..

ابو مجتبى منسدح في الصاله .. مرت عليه نور

ــ تعالي يابوش شوفي لي حاجه اتغطى بها.. خلني اكسر النوده

نور ماشافت قدامها الا مشمر امها اللي طلعت لزبونه..

غطت ابوها به..

ابو مجتبى من نزلت نور المشمر عليه ..مع هبوب الهوا..

ــ اف.. اف... اف ريحته ابو فاس قويه << زيت ريحته قويه يستخدم لعدة اغراض

نور صارت تضحك..

ــ مارخه به يمكن...

ابو مجتبى يوخره عن وجهه:

ــ اححح .. ريحته تعمي .. ايه هي البارحه داقتنها الكحه ماميش الا تطبل طبول وانا اتطفر بالمنام..

ــ ههههههه مسكينه امي.. كان شربت دوا..

ــ امش.. امش تشيه تبغى ادويه... امش من اللي ينقال ليها عندي دوا للناس ماعندي دوا لروحي

الا بدخلة ام مجتبى راجعه.. وسمعته:

ــ ويش فيها امها بعد

ابو مجتبى :

ــ بل قطوه طريناها نطت

ــ هههههه اني قطوه.. ويش صاير على ويه هالهدره..

ابو مجتبى يرمي عليها المشمر:

ــ شمي.. تقولي متسبحه بالغرشه,..!!

شمت ام مجتبى :

ــ ماشم شي..

ابو مجتبى يغمض عيونه:

ــ يووو.. وي وي.. من عذر خشمش خلاص اخذ مناعه من هالروايح.. مو بس ريحه الا يعمي..

ــ اهوو ابو فاس ولا ريحة زفر << (( زعر ))

الا بدخلة ايثار من برى الحوش تراكض في الصاله وامير يلحقها.. وهي تصرخ فيه:

ــ ماني ماني عاطتنك اياها .. هذي حقت بنات,,

وامير منفعل:

ــ جيبيهاااااااااااا..

نور:

ــ اوووووو ويش فيكم..

ايثار تنخش ورى عمتها...

ــ يبغى ياخذ فراشتي..

ــ أي فرااشه؟

ايثار تفتح ايدها:

ــ دي فراشتي ام ذهب وردي.. << ايثار تسمي كل شي يلمع ذهب :p وماكل مايلمع ذهبا!!

نور:

ــ من وينا لش دي .. حقت ماريااا من اسوارها طاحت شكلها

ــ شفتها عند امير..

نور:

ــ امير من وين جبتها دي؟

امير يأشر على المرجحانه برى..

نور : ــ ماغير ماريوه اللي تمرجحت عليها.. شكلها طاحت من مخباها..

الا بجية اماني :

ــ ويشو اللي حق ماريوه ؟

نور : ــ دي

وتراوي اماني الفراشه..

اماني ابتسمت:

ــ ايه دي من اسوارة ماريا.... والله مايدري بها يوسف انها تقطعت بينقهر عليها.. .. شيليها عنهم خلني ارجعها ليها تركبها فيه....

نور: ــ يعني من عنده... ؟؟هههه واني اقول كل تلبسها... بس غريبه ماشفت عليها الأسواره اليوم..

اماني : ــ لااا .. شكلها فعلا انقطعت....

ــ زين نخشها والسبت نعطيها اياها

ــ توكم خلصتو تقولي .. الحين بتروحو السبت...!!

ــ ايه اني ماعلي شي بس باهايت ويا البنات.. ماريوه و شهربانو عليهم حصة كيميا تالي اختبار وبعدين فاضيين..

ــ ايوااا تعويض استاذة زكيه يعني..

ــ على قولش ..

ــ وويش الأخبار الحين..

ــ اوووه.. عال العال من بعد فصل طايحة الحظ رملوو..

ــ الله لا يردها... والله يعين المدرسه اللي بتصير فيها...

ــ هذي المفروض ينكتب على جبهتها .. خطررر.. خذ الحذررر..

[Princess]

كاظم ماسك ملف اوراق وطالع به من مكتب المحاماه.. مذهول من اللي سمعه.. ومن اللي ماتوقعه ابدا..

ركب تاكسي بيروح البيت .. ويتذكر كلام المحامي...

ــ طبعا يا اخ كاظم انت ماتدري ان عندك ورث عظيم جدا من جدك المرحوم لأبوك و لجدتك والك انت بعد..

كاظم مستغرب : ــ لا اللي اعرفه ان فيه لي ورث من عند ابوي بس عمي متحكم فيه او بالأحرى مالكنه بكيفه وما يصرف لي الا مصروفي بحجة ان مالي حق عنده وانه متفضل علي,..

ــ لا.. هالكلام مو صحيح.. انت لك شي وشويات من الممتلكات اللي يديرها عمك ومو عمك اللي كان يصرف عليك اصلا طول هالفتره بعد وفاة جدك المرحوم...وعندي اوراق تثبت ملكيتك..

ــ شلون.؟؟ مين اجل؟؟؟ وكيف ما سمعت جدتي تقول من قبل هالشي

ــ لأنه هذا كان شرط جدك.. تكون جدتك الوصيه عليك فترة حياتها.. واموالها واموال ابوك واموالك من ورث جدك وابوك يديرهم عمك وينميهم لك.. واذا الله اخذ امانتها ديك الحزه تبطل الوصايه و الورث لك الأحقيه في التحكم فيه طول ما انت بالسن القانوني وانت الحين ما شالله منت قاصر .. في سن يسمح لك تدير شؤونك الخاصه وتفتح لك حتى بيت وتعمل لك عايله..

كاظم منذهل ومو مصدق اللي سمعه:

ــ مانا قاصر ويش ؟؟ >> فهمها بمعنى ناقص ثقافته العربيه وماتفعل وياه !!

المحامي ابتسم:ـ يعني منت طفل .. انت بالغ وعاقل

ــ اهااا طيب عمي ليش كان ما يوضح هالشي لي .. ولا جدتي..

ــ خوفا من وقوع المشاكل فيما لو كنت ولد عاق ..

ــ طيب انا عمي اعرفه مايشتهيني.. ليش ماحاول يستغل وصية جدي لصالحه .. بيقدر ياخذ الأموال و يزور الوصيه..

ــ مو هذا الشي كان متوقع منه في أي لحظه.. وفعلا تقريبا خلال اسبوع او اكثر من بعد وفاة جدتك.. هالشي صار بس انا جدتك عطتني الوصيه الأصليه ... الموثقه من جدك.. الوصيه اللي كانت عند عمك وصيه نسخه مع اختلافات بسيطه.. فلذلك لما تزورت اكتشفنا الأمر بعد وفاة جدتك.. طلعت انا الأصليه .. وهددته بالمحكمه اني برفع قضية تزوير واحتيال.. بس خاف وترجاني وانسحب..

كاظم يتذكر حالته لما درى بوفاة جدته متأخر..

وعرف ليش عمه ماوصل له الخبر الا بعد هالمده.!!!

اتاريه كان يشتغل مثل الحيه تحت التبن.. يحاول يسرق ورثه بأي طريقه..!!

انتبه كاظم من سرحانه على صوت هرنات بالشارع....

وفي باله:

ــ الحين لويه عرفت سر هالعدواه من عمي لي ولجدتي.. والحين عرفت لويش عمي متحمل جدتي كل هالسنين...كل هذا على شان الوصيه !! الله يالدنيااا..

ويفتح كاظم الملف .. ويشوف الورث اللي انترك له.. 4 اراضي و عمارتين في كل وحده 3 محلات تحت..

ويتذكر المحامي :

ــ مابقى له طبعا الا حقه.. جدك كان مقسم الورث .. البيت كتبه جدك بأسم ام عمك المرحومه.. فورثه عمك اضافة الى المصنع والشركه...لأنه هو اللي فاهم بالعمل وهو اللي نماه وتعب فيه وهو المتصرف فيه من اوله لأخره.. اما الأراضي .. وكانو 6 الأراضي توزعو 4 لأبوك و الباقي على عماتك كل وحده وحده... اضافه الى عماره ... وحده له ووحده لجدتك المرحومه... و جدتك على فكره كانت تصرف عليك من اجارات شقق عمارتها وعمارتك اللي ورثتها عن ابوك.....

سكر كاظم الملف وهو مو مستوعب الأمر وفي باله:

ــ وانا اللي كنت احسبه من ماله.. ويعاملنا كنه يتصدق علينا.. طلع مال جدتي بعد..

كاظم يحس بالغصه من هالأكتشافات... !!

نزل من التاكسي .. وصل البيت... ظل واقف قدام البوابه خايف يدخل.. ذاك القصر اللي كان طول عمره يحس نفسه فيه مثل الغريب .. مثل الطرار اللي يستاهل الشفقه...

يفتح الباب الخارجي ويدخل يمشي في ذيك الحديقه الواسعه اللي ماعمره لعب فيها ... دايما عمه يصرخ فيه انه يخرب الزرع و يحبسه في غرفته اللي كانت بالمحلق الخارجي..

ويتذكر كلام المحامي:

ــ طبعا مع الأسف .. المصنع والشركه في حالة تدهور .. عمك اشترك بأسهم بمبالغ ضخمه جدا.. وهالأسهم طاحت.. و المساهمين محوطينه من كل صوب و الديون كاسره ظهره ... وعلى وشك الأفلاس...

وقف كاظم بنص الحديقه .. وتنهد:

ــ افلاس .... !! هذا اللي ماكنت اتوقعه في يوم..

وتوجه الى الملحق اللي كان مبني برى القصر هذا في الحديقه.. مبنى صغير .. عباره لسواق واهله..

غرفتين وحمام ومطبخ.. وكان كاظم يسكن مع جدته في هالمكان..

وهو ماشي بيروح يرتب اموره ويلم بقايا اغراضه ناوي يعزل من هالمحل ويسكن في أي شقه من العمارات ..

سمع صوت عمه يصارخ في غرفه مطله نافذتها عالحديقه.. ويتشابق مع مرته ( ام صادق )

ام صادق تصرخ فيه:
ــ لا تحط حرة العمل فيني .. ما احد قال لك تعطيهم وعود كذابه.. طاحت براسك الحين..

ــ لا تزيديني يامره وخليني افكر بحل..

ــ أي حل .. لا ترجع وتقول لي تبيع الفله.. مافي امل.. جعل الشركه تنهار .. تقدر تخليها ترجع مثل ما كانت عليه.. شد حيلك.. اما الفله ما بنطلع منها..ناوي تشردنا؟؟

ــ مابتلطعو.. واشردكم... اللي يسمعش مخلفه 10 .. مو 1 وماهو وياش

ــ تعايرني .. تعايرني بمرضي .. !!

ــ ماعايرتش الحين انا..

ــ كان عرست.. احد مسكك ,.. وجبت الـ 10..

ــ قادر على هم الوحده حق انهم بالثنتين...

ــ اني هم..!!

ــ و الآخير يامره

ــ لكن مو منك.. كل من هالجوهي المخرررفه اللي ماتت وما خلفت لينا غير الهم والكدر...ومن ابوك اللي ضاقت عليه الدنيا مالقى غير هنديه تاخذ الأولي والتالي عنا.. الله لا يريحهم بقبرهم..

ــ اووووووه اطلعي الحين عني......

كاظم اللي كان متسند على جدار البيت تحت النافذه... منذهل من اللي سمعه بأذونه..

الدمعه محتقنه في عيونه..

دخل الملحق ..

وراح غرفة جدته .. من وصل ما دخلها خاف تتقلب عليه المواجع ويسوي مشاكل مع عمه..

قعد على السرير يتحسسه بأيده...

التفت الى مشمر من مشامرها معلق قام له وصار يشمه ودموعه تنسل ..

دفن وجهه فيه واشتغل نوبة صياح.. وهو ينادي بآنات متقطعه:

ــ أماااااه... اماااااه..

[Princess]

في امريكا.. بمكتب التحقيق الفديرالي ..

وبداخل غرفه مغلقه .. ناجي .. (( سام سابقا)) جالس

هالغرفه ليها 4 جدران اسمنت وجدار واحد زجاج عاكس .. يفصله عن المحققين اللي كانو بالجهه المقابله.. هم يشوفوه وهو مايشوفهم يشوف روحه..

ويسمعهم بسماعات.. ومركب عليه جهاز كشف الكذب ..

المحقق:

ــ ما اسمك..

ــ ناجي علي آل....

ــ كم عمرك؟؟؟

ــ 25 عاما....

ــ جنسيتك؟؟

ــ سعودي

ــ ماذا تعمل..؟؟

ــ موظف في شركة ........... للألكترونيات

ــ هل تذكر اعصار كاترينا؟

ــ نعم... اذكر حدوثه..

ــ متى كان ذلك..

ــ لا ادري ربما.. من شهرين فقط..

ــ اتعلم انه قد مرت عليه سنتين؟ فعلى ذلك انت تبلغ من العمر 27 وليس 25 ان كنت تظنه قبل شهرين كما تقول..

ناجي وعلى ملامحه علامات الأستنكار..

ــ ماذا؟

ــ هل تعلم انك قد فقدت الذاكره منذ حوالي السنتين...

ابتسم ناجي..

ــ مالذي تقوله..!!

ــ حسنا سوف نريك اشخاص يؤكدون انهم يعرفونك.. فهل تعرفهم؟

ويدخلو مارك وتوم...

ــ هل تعرفهم؟؟

ــ لا..

ــ وهذا ؟؟

ويدخلو قيصر وياهم...

ناجي :

ــ لا ...

مارك بعصبيه:

ــ كيف لك ايها اللعين المحتال ان لا تعرفني .. تبا لك ايها الوغد..

المحقق :

ــ اصمممممت.. خذوه الى غرفة التحقيق سوف آتي اليه بعد ان اكمل الأجرائات هنا

طبعا كل هالأسئله وجهاز كشف الكذب يشتغل ويسجل اقوال ناجي كنمط مثل تخطيط القلب على ورق بواسطة محرك كهربائي ..

وبعد استلام الأورق ...

المحقق مع الخبيرين..

ــ انظرو الى نمط اقواله .. انه صادق فعلا... لا يوجد أي تذبذب في الرسم .. (( الجهاز يقيس نبضات القلب وسرعتها.. فلو كان كذاب .. راح يتوتر وان حاول يخفي توتره.. لكن القلب راح تتسارع نبضاته وراح يزيد افراز هرمون الأدرينالين بسبب الخوف والرهبه فيحدث الأختلاف في الرسم ويستنتج الخبراء الفرق بين الكذب والحقيقه ))

محقق ثاني :

ــ عموما.. لو كنا فعلا متأكدين من جرمه فأن جهاز الكذب هذا وان كان متحكما في اعصابه وانفعالاته واظهر الصدق لنا كما نرى الآن.. لم يكن ليفيدنا في الشهاده ولا المحكمه.. ولكنه خارج دائرة المتهمين منذ البدايه..

احد العناصر المسؤوله هناك:

ــ اعرف ذلك.. لذا لم نستخدمه مع جويل و اخاها.. فهم محتالون على اية حال..

ــ كما تعلم ذلك اجراء فقط للتحقق من اقوال توماس رامون ( توم ) ضده و للتحقق من اتهامات مارك له هل هي صحيحه ام لا فقط لا اكثر.. ومثلما رأيت مع توم قد اثبت الجهاز صدق كلامه..

ــ ايضا صدق كلام مارك.. فهل سنعتبره كاذبا رغم اثبات الجهاز؟؟

ــ مارك هذا مجرم لعين.. قد ينطلي على الجهاز حيله ومراوغاته.. فله تاريخ اسود كما تعرف..

((ملاحظه: يستطيع المتحكم بأعصابه وانفعالاته بشكل كبير ان يخدع الجهاز فلا يستطيع الجهاز تقييد أي كذبه عليه.. يعني هالجهاز مع المحترفين في الكذب ماينفع xd ))

مارك في غرفة التحقيق .. وحارس واقف من برى ..

في هالأثناء الحارس استدعوه فقفل الباب على مارك وراح

مارك معصب والقهر في داخله بركان..

ومن زود القهر رفع ايده المقيده بالحديد .. دخل راسه و طوق رقبته وحز الحديد عليها.. شبك كتوفه ورى راسه و دف روحه وهو على الكرسي على ورى..

طاح عالأرض وظلت كتوفه متشابكه وثقله بالكرسي عليهم... والحديد يحز على رقبته ويفقده الأنفاس.... وبعد ربع ساعه تقريبا دخل المحقق عليه.. الا يصرخ:

ــ اسرعوا.. يبدو ان هذا المجنون قد انتحر..

وجو الحراس يركضو له..

عدلو الكرسي وفكو الحديد

الا اياديه الثنتين تطيح بدون روح...

لمس المحقق رقبته..

ــ تبا له لقد انتحر فعلا.... خذووه .. ادفنوه .. واكملو اجرائات قضيته .. واغلقوها..

وكذا تسكر ملف القضيه.. بالقبض على عناصر العصابه كلهم..

توم و بقية العصابه اعترفو...

وانتحار مارك وجون..

جويل وفريديك عليهم ادله ثابته.. وجاري البحث عنهم ولا مفر .. بعد تبليغ السفارات عليهم ما راح يطلعو من البلد..

وكل واحد فيهم تحدد له عقابه المناسب...

ناجي:

ــ لا يوجد أي شي آخر تريدونه مني..

ــ لا فقط نود منك الذهاب الى السفاره فورا لللأبلاغ عن هويتك.. ليتم التواصل مع اهلك وترحيلك الى بلادك فورا..

ــ حسنا.. شكرا لك..

طلع ناجي من الوكاله... وقف على بابها الخارجي .. رفع راسه للسمااء .. وتنهد من قلب.. والأبتسامه تعلو شفاته..

قيصر يمشي بأنكسار و ألم... راجع لعيادته... مو مصدق اللي صار..!!

يحس هالموقف ولا في الأفلام.. بل وحتى ولافي الأحلام..

وفي باله:

ــ ايه .. يا سامي.. واطلعت ناجي..ههههه.. سامي.. ناجي.. شقد حلوه الصدف.. هههههه شبيني انجنيت...ايييه.. المهم انك نجيت.. وبترجع لأهلك بالخير ان شالله .. اما آني .. يكفيني اني تعرفت على واحد شراتك بهالغربه...

[Princess]

في شقة حبيب والشباب..

حبيب :

ــ ويش تتوقع الحين صار على كاظم...!! ودي اتصل به.. ايدي تحكني

السيد:

ــ ان شالله كل خير .. توه ما اخذ يوم اتوقعه بكره عندنا..ماله قعده هناك .. والله مايستاهل اللي صار فيه.. اجل جدته مايدري انها ماتت الا بعد فتره

حبيب :

ــ قصر حسك لا يسمعك صادق ..

ــ اه.. ويش قايل انا..!! وحشا ,,, في الغرفه وبيسمع

حبيب يلتفت لمراد اللي كان يفرفر في قنوات التلفزيون مو راضي يستقر على محطه..

ــ مراد.. هيه.. اخوك.. ويش فيك من راضي ترسى على قناه. قاعد تشاوط من وادي لوادي... تدور على شي معين؟

ــ لا.. بس مانى عارف وين اروح...

السيد : ــ طفيه احسن ماله داعي واقعد سولف ويانا..

مراد طفى التلفزيون وقعد..

وشكل وجهه متكدر .. بس يحاول يداري

حبيب يضرب ظهر مراد:.

ــ الله عاد عالبرطم.. يا بعد شبدي انتا.. هونها وتهون.. والله الدراسه في لندن احسن من هنا بمليون.. ولا تحاتي انك بتصير لحالك.. صبر علي بس سنه اتخرج و اجي اكمل وياك ماجستير .. بعد عمري انتااا.. تحصل صديق زيي في حياتك هاا؟؟ تحصل ؟؟؟

ابتسم مراد

السيد يطالع حبيب على جنب:

ــ من قبل لا تعرف مراد ومن قبل لا تدري عنه انه بيروح لندن وانت حاط في بالك هالشي ..

حبيب نقز:

ــ اصقع ابو الفضايح..

مراد قام يضحك...

حبيب : ــ زين لك ضحكته علي

السيد: ــ خله يضحك ويعدل هالبرطم شوي ..

حبيب يصفق صفقه قويه:

ــ فلهااااااااااا

مراد يطالع فيه ويضحك عليه..

حبيب يكمل كلامه وهو يدق رقبه:

ــ وربك يحلها..

السيد يضحك عليه:

ــ ايه.. ماغير رقبتك اللي انفلت.. ساعدك الله

صارو يضحكو...

حبيب يهمس:

ــ خلنا ننادي صادق ويانا عيب علينا قاعدين نسولف ونضحك وهو لحاله داخل

السيد يتحمق:

ــ من متى السوالف يعزمو عليها.. هو عازل روحه عنا .. لو يبغى جى وقعد ماحد بيقول له قوم..

حبيب يطالع في السيد على جنب ويقلد عليه عن سخريه : ــ طفي التلفزيون مراد وتعال اقعد وسولف ويانا..

السيد: ــ ههههههه ويا وجهك.. مراد غير..

حبيب : ــ لويه يعني؟؟؟

السيد: ــ والله بذمتك داك من متى هو شارك احد لو عطى احد وجه..

حبيب وهو يحك راسه : ــ ممممم اما في دي صدقت الصراحه

مراد : ــ كح.. كح.. اخجلتوني ياشباب..

السيد : ــ صحيح والله من جانا ماشوفه الا بهالكتب .. كنه دوده ما شالله عليه..

حبيب : ــ دوده وما شالله عليه. ايه شان زين لو تنفتح نفسي وانطبن اذاكر ماباقي شي .. .. خخخخ الحين الدوده مدحه لو سبه؟؟؟

مراد صار يضحك : ــ على كيفاتك..

حبيب : ــ اتخيل بس .. كان ما كظموه الحين مايعرف يوصل معنى عربي للمحامي يقوم يفلت عليه كم كلمه هنديه ويبلتش ..

السيد: ــ يسويها ترى..

مراد : ــ ههههههه ساعتها بيفكرها المحامي سبه..

حبيب : ــ لااااا.. وين يفكرها سبه.. ماغيري اللي يسبني ..

السيد : ــ ههههههه نصاب حبيبووو... اصلا تفهم له بس تبغى تجاكره..

حبيب : ــ هههههههه ايه حليوه عصبية الباردين.. تضحك..

هدأو شوي..

الا بتنهيدة مراد:

ــ والله مو متأسف على شي من طرف لندن الا صحبتكم و سوالفكم..

حبيب : ــ الله لا يحرمنا منك بيننا تواصل ان شالله عالأقل بيننا ماسنجررر

السيد : ــ ان شالله انت لا تقطعنا واحنا اكيد مابنقطعك

ابتسم مراد وفي باله:

ــ اخ بس لو اقدر اخذكم كلكم وياي لندن.. شان زين..

[Princess]

يوسف بالمجلس ويتأمل السواره.. ومو مستوعب للحين اللي صار..

الوقت تقريبا عالساعه 8 الليل

طلع لقى حسن دخل غرفتهم..

دخل على اخته الغرفه .. ومن شافها فطرت قلبه بس بنفس الوقت حاول يداري مشاعره..

كانت لسا على حالتها عند الباب وضامه راسها بين ركبها وتصيح صياح عنيف ..

سكر الباب وقعد قبالها..

ــ خيه .. قومي وكلميني..

ماريا بتعب وهي لسا دافنه راسها:

ــ ويش تبغاني اقول لك..؟

يوسف مو عارف ويش يقول

ــ ارفعي راسش .. وجاوبيني .. اسوارتش اللي عطيتش اياها وين هي...؟

ماريا كانت تلبسها على طول ماعدا في المدرسه لأن ممنوع..

فحطتها لما راحت المدرسه في جيب بنطلونها...

تفاجأت من اخوها يوم انتبه على ايدها الفاضيه.. وهي بكبرها نسيت مالبستها لأول مره من اعطاها اياها....

وقفت على ركبها بتطلع الأسواره من جيب بنطلونها..

تفتش يمين وشمال.. والجيوب الخلفيه..

فتحت عيونها وارتبكت ....

يوسف رفع الأسواره وبهدوء:

ــ دهي..

ماريا فرحانه انها ماضاعت بنفس الوقت منصرعه كيف صارت عنده..

مدت ايدها بتاخذها..

باعدها يوسف عنها.. وبسؤال مليان ريبه ..

ــ ما سألتيني وين شفتها.؟

ماريا بتساؤل مستغرب:

ــ يعني وين شفتها؟

ــ على باب البيت معلقه من برى قبل لا تجي

ــ ها..!!

ــ ويشو ها.. وبعدها جى الأتصال وصار اللي صار و قال انش نسيتي هالأسواره عنده وهو بهالطريقه اثبت كلامه انه بيوديش بستين داهيه والأسواره الدليل .. مابغاش تستمري في الكذب .. اترجاش ..

ماريا والكلام من يوسف جاها مثل السكاكين طعنت في قلبها طعن..

ــ مادري.. ماني قادره استوعب كلامك.. ماني متخيله هالموقف الخبيث اللي انحطيت فيه ابدا..

مادري ويش اقول.. حلفت وماصدقتوني.. وكل شي ضدي.... ابغى اختي.. ابغى اماني..

يوسف يمسك ماريا من كتوفها..وبألم:

ــ ويش بتسوي لش اماني.. تكلمي بس وريحيني.. قولي لي ويش ودى السوار عنده..

ماريا :

ــ مادري .. والله مادري ..

وتحاول تباعد ايادي يوسف عنها كان ضاغط عليها بالقوه بلا وعي

شوي قام يهزها ويضرب راسها بالجدار وبنبره مخنوقه متبوعه بنحيب:

ــ تكلمي عاد.. لا تخافي ماباخلي حسن يسوي فيش شي ... عاد ارجوش... بس قولي الحقيقه...

ماريا بصوت عالي يقطعه الصياح:

ــ يعني لو اكذب على روحي واقول لك ايه صحيح.. وطلعت وياه وفعلت وسويت ويش بيصير .؟؟ بيرضيك هالكلام.. اني ما طلعت.. ولا سويت.. ومنت راضي تصدقني !!

يوسف انهار .. نكس راسه وحط جبهته على ركبها.. ترك كتوفها ... وصار يطق على سيقانها ضرب خفيف :

ــ ليش .. ليش...

وانتابته نوبة صياح ...

ماريا بشرود وذبول وانكسار سندت راسها مغاوره عنه ناحية اليمين والدموع تصب بحرقه....

اماني من رجع مجتبى من العمل الساعه 9 الليل تقريبا ...

طلبت منه على طول يوصلها بيت اهلها...

مجتبى: ــ ويش صاير عاد..لويه بتروحي هالحزه؟؟

اماني : ــ يوسف راجع من الرياض.. وماريا مادري ويش فيها حسن متصل العصر يسأل عنها..

ــ متصل ؟ ليش !

اقول لك السالفه في السياره.. مشينا الحين..

الا بطلعة نور من الغرفه..

ــ خذي وياش فراشتها يمكن ما اروح السبت...

امريكا ..

والوقت عندهم صباح..

قيصر فاتح نافذة عيادته.. وقاعد ينظفها .. ويحس بتعب في جسمه مانام عدل من التفكير في اللي صار...

شوي طرت على باله ابيات للشاعر العراقي .. (حكمت البيداري) .. فصار يمول فيها عوايده مع صوته الحزين..

أبوس الأيادي

وأبوس القدم

لمين يردني؟

يامين ومَن!

بحضن أمي الحنونه ..

أغفى وأنام..

و ارتاحلي..

شي ساعة زمن .!

وأنسى المآسي

الدوخت راسي

إلقطعت أنفاسي

من غریب ..

ومن قریب...

ومن أعز ناسي ..

وأحب ناسي !!

اللي يبيهم ..

واللي بيهم..

قلبي المسكين

صدق وأئتمن ....... ..

ولا يسمع قيصر عند النافذة الا صوت وباضافه من عنده ..

ــ آآآآه يازمن....

الى الملتقى..