في مقر الهيئة ..

مراد :

ـ والله العظيم اني مظلوم ماجيت المقهى الا العصر ... ماصار لي ساعتين من جيتو لينا... والله اني كنت ادور مواضيع لبحثي بالجامعه....

ــ بحثك بالجامعه .؟؟!! ايه هذي حجتكم يالشباب... طيب شمعنى الجهاز اللي انت جالس عليه ..؟؟؟. هو اللي لقينا به البلاوي ..؟؟



السيد فكره مشغول .. وخايف يتكلم و يصير كلامه ضده لو ضد مراد ويتورط وياه او يورطه اكثر بدل لا يساعده...

ساسر حبيب ...

بعدها قال لمراد:

ــ مراد.. بنروح مشوار وبنرجع لك .. اوكي..



مراد ووجهه شاحب .. وبعيون نظراتها تترجى مثل الأطفال ...

هز راسه وكله امل انهم ما يتركوه في هالمحنه.. وبلهجة الحاح:

ــ لا تخلوني هنا .. والله ماسويت شي انا...

السيد يهدي فيه:

ــ بنروح ونرجع .. عهد علينا.. لا تخاف... بس بنتأكد من شي ... وبنرجع لك..

واحد من المرشدين:

ــ ليه ترجعون .. ماراح يطلع بكفالتكم.. على هالسواه يبي له ارشاد وتوعيه واصلاح.. الله يهديكم و يصلحكم..

مراد يصرخ فيه:

ــ قلت لك ماسويت شيييييي قسم بالله .. والله العظيم..

المرشد بحمق ينهره:

ــ الله اكبر عليك .. تسوي السواه وتنكر.. وبسم الله تحلف .. استغفر الله .. استغفر الله.. بس ولا كلمه... الله يهديك ويصلحك...

حبيب : ــ مراد اهدى... وانتظرنا زين...



مراد بس طلعو.. تولوه ثنين وطاحو فيه اسأله ..

عن ولي امره وانهم يبغو يكلموه ويتواصلو وياه..

مراد بهدوء:

ــ ابوي برى السعوديه ..

ــ شغل يعني؟

مراد: ــ ايه..

ــ طيب عطينا جواله...

مراد : ــ ما راح يرد عليكم..

ــ ليش ... عطينا وانت ساكت..

مراد : ــ انا مايرد علي بالعاده.. اذا بغى يكلمني هو يتصل ..

بهدوء يكلمو بعضهم:

ــ اهمال اولياء الأمور يسبب انحراف الأبناء.. امر طبيعي..

ــ خذ الرقم الحين وكلمه يمكن يكذب علينا .. لا تستبعد هالأمر..



خذو الرقم و دقو .. لقوه مقفل بالمره....







يوسف في الشقة ... يفكر في مراد وهو مره مستاء ومتضايق ... وفي باله

ــ الله يامراد... وانا اللي كنت افكرك عقلت والله هداك...

كاظم بهدوء:

ــ افا بس .. والله مانى مصدق.. على تصرفاته ويانا مؤخرا.. ما احسه اللي صار صحيح.. حاس انه مظلوم...

صادق دخل عرض وبهدوء وسخريه :

ــ ايه.. قالوها.. ذيل الكلب اعوج.. عمره مايعتدل..

يوسف عطى صادق نظرة ..

صادق في باله:

ــ بل .. عاللي سواه وهو بعده ما يرضى عليه.. مانى داري انا ويش اللي عاجبنهم فيه.. عاطينه اكبر من قدره.. و مطنشين فيني.. خله ينفعهم الحين تقديرهم البايخ له..



جوال صادق يرن.. رد ....

ــ هلا هاني.. لا والله قاعد.. اوكيه.. جاينك الحين...

وقام طلع ..

يوسف يطالع في كاظم... وكل واحد فيهم مستغرب اكثر من الثاني.. من متى هالعلاقه بين صادق وهاني ؟

يوسف بتساؤل :

ــ من متى مخاونه.؟
كاظم بسخريه:

ــ خخخخخ شمدريني عنه.. عموما.. هانيو راعي مصالح شكله...ايه على قولة القايل.. صفرية ولاقت غطاها....





نزل صادق لشقة نوري و الشله....

بيشوف هاني.. كان هاني متصل عليه يبغاه يشوف مشكلة النت عنده..

الكونكت حقته مشحونه و سليمه.. بس مايشبك.. الأعدادات تبع الشبكه الظاهر فيها خلل....

و لأن صادق خبير بهالسوالف وتخصصه بالجامعه هالتخصص...

صار يحوس فيه .. ومن باب السوالف فتح سالفة مراد....وعلم هاني بها....







حبيب و السيد في مقهى الأنترنت ...واقفين على راس الهندي المسؤول ..

السيد:

ــ اقول لك افتح ملفات مال انت.. سوي سآين ان .... سـاين آوت.. بسرعه يبغى يشوف

ــ ايس في ساين ان ساين اوت.. ايس يبغى انتا؟؟

ــ لا اجيب شرطه و خليه يتصرف..

ــ مشكل كبير انت..

ويفتح ملفات النظام لأدارة المقهى..

حبيب : ــ ايواا.. انت تسجل متى كل نفر يشبك على جهاز.. ويحسب وقت.. على شان بس يخلص وقت ويخلص فلوس يفصل صح..

الهندي يهز راسه..

السيد:

ــ بسسس... وصلنا لدليل البراءه نسبيا..

حبيب :

ــ شلون؟

السيد:

ــ مراد دفع لكم ساعه.؟
الهندي :

ــ هذا جهاز رقم 12 يدفع حق 4 ساعات..

ــ وهو قعد ساعتين واقل بعد من ساعتين... و جت الهيئه بعدها على طول وسحبته.. باقي له ساعتين .. وشوي.. و للحين ما انفصل النت عنه يعني شغال... شوف المواقع اللي انفتحت خلال هالساعتين أي قد .. !!!

وااااااايد.. مايمديه.. ويش هالعجله عليه اذا كان فعلا هو اللي مسونها وناوي يفتح هالمواقع بيقعد فيها على راحته مو بهالسرعه...وماكان عنده لا فلاش ولا سي دي لأنه قال لي بيشتري سي دي من المقهى بس يخلص تجميع معلوماته ..... حبيب .. شوف المواقع الأخيريه.... الخاصه لبحثه .. واااايد بعد...



حبيب شالق بوزه ابتسامه عريضه:

ــ والله انك فهلوي سيدوه... خلنا نروح نقول ليهم...

السيد بهدوء وابتسامه عريضه:

ــ هه.. مفكر بيصدقو على طول.. زي ماجروه بدون تفاهم.. مابيصدقو انه ما يمديه يفتح هالمواقع دي كلها خلال ساعتين...

ــ وويش الحل.

السيد وهو يفكر قاعد على جهاز الهندي ويحوس.. فتح المحفوظات ... ويتصفح فيها الا يلاقي نفس المواقع تقريبا قبل كم يوم انفتحو عليه...

يفتح عيونه ويقوم يمسك بقميص الهندي:

ــ هذا انت ياحيوان... انت اللي يفتح المواقع صح...

الهندي خاف لما شاف المواقع:

ــ والله بابا انا مسكين مايسوي .. والله مو انا..

حبيب يقوم ويفك الهندي من ايد السيد... ويمسكه عند كتفه وبهدوء:

ــ اذا مو انت ... زين قول بس مين يقعد على جهاز قبل ما نجي... ؟؟ لا اخلي الحين هذا نفر يروح يجيب هيئه حق جهازك .. هم مافي شوف ...

الهندي شوي وبيصيح:

ــ لا بابا.. والله مو انا.. هذا ولد مدير مال مقهي .. يجي الفجر كل يوم.. عنده مفتاح.. هو يشبك على جهاز مال انا.. ويسوي كل مره كلين هستوري بس آخر مره جهاز طفى ومافي يسوي .. فهو يقعد على جهاز تاني ...



السيد :

ــ يجي الفجر ها..

حبيب :

ــ المشكله اخاف هالهندي شداب ونتبلى عالرجال ونروح بداهيه من تحت راسه..

السيد :

ــ هي خاربه.. واللي فيها فيها.. اقول انت ينام هنا لو بيت برى..؟؟

الهندي:

ــ لا هنا غرفه..

السيد :

ــ جيب رقم جوال .. بس يجي ولد مدير انت يتصل علينا ...

حبيب :

ــ ويش بتسووي..؟؟؟

السيد:

ــ اباجيب الهيئه له الفجر .. خلهم يشوفو المجرم الحقيقي...

ــ عاد بيتعنو لك الفجر...

السيد:

ــ يتعنو لا برفع قضية ...

ــ بل بل .. ههههههه الله يستر منك...



خذو رقم الهندي وراحو للهيئة...

السيد:

ــ احلف لك بالله و ارجوك تعطيني رقم واحد منكم و تتعاون معنا .. الهندي ممكن ماتصدقو كلامه وتقولو متعاون معانا.. بنراويكم الدليل بعيونكم...

الهيئه:

ــ عموما فيه دوريات تكون بالفجر ... راح اسلمك رقم كذا واحد .. بس ان طلع كلامكم غلط عارفين طبعا وش راح تكون العقوبه..

حبيب وهو يبلع ريقه وخايف ان خطتهم تفشل:

ــ ايه عارفين...

السيد :

ــ طيب نقدر نشوف مراد ونتطمن عليه

ــ شدعوه وين هو.. هذا مو سجن.. هذي اصلاحيه فيها الخير والهدايه لنفسه .. ماله داعي الزياره الحين..تيسرو الله ييسر لكم..