غربة الأوطــــــــــــــــــان...

[الفراش الفاطمي]

والله من يوم الخميس قريت البارت بس ماقدرت ارد
وااااااااااو امووووووره لش وحشه بصراحه وحشتينا
بارت روعه وماعليه كلام
اني اشك ان ماريا بتتزوج عبد الستار
وعبد الاله بيتزوج نور
وهذي ريماسوه الخبله وش بتسوي في ماريا ؟؟!!
ومسكينه ابله زكيه لكن اشوى نور كانت وياها عشان تشهد انها بريئه
واحمد ماسمعنا عنه خير ولا شفيق
واما كاظم عور قلبي <<<<شي طبيعي جدته وماعنده غيرها
وسام بعد ماسمعنا عنه خبر اما قيصرعجبني يوم يسأل توم
وبــــــــــــــــــــــس
تحياتيـ ..

[دمعة على السطور]

اللهم صل وسلم على محمد وآل محمد وعجل فرجهم وفرجنا بهم ياكريم وألعن من آذى فاطمة ...

ياماشااااء الله الأحداث وااااااااااااجد وكلها حماااس وحركاات

ويش أبدي وويش أخلي من كثرها....!! >> تقول كلام أمها >> دمعوووه بلاش فضااايح

من جد الأحداث مرة روووعة ماشاء الله

رملة هذي طلعت مي هينة ودي ازنطهااا >>من القهر....

مسكينة استاذة زكية ماتستاهل

وماااريااا صادوهااااا ...ههههه ضحكني هو اللي تغطى من الخلعة ...

شكلها بتحبه....عور قلبي عبد الاله :( >>بعده ماصار شي يابنت ترى دي تخيلاتش >اهااا يعني

عبد الستار صراحة أكثر واحد مظلوم بالقصة ....... تعاطفت لا مو تعاطف..إلا طيبة الشخصية وأصالتها يجبروا القارئ إنه يلتفت له بشكل من الأشكال...

ياعلييي كاظم صار مو كاظم لغيظه........!!

الله يرحمها جدته.....صحيح هي اللي كانت باقية له من الدنيا ..الله يكون بعونه يااارب...

صراحة صادق مايعرف يتصرف في كثير من المواقف>حللت شخصيته.....

بس قلبه طيب ترى والأحداث الجاية بتوضح هالشي >>حلفي

قيصر زين يسوي ......يلا إن شاء الله يتصل له ساااام عااد

وهذي أم عبد الستار صحيح ....وش فييها ..هذي أم هذي..حتى لو ولد البخيل ..ولدي اعامله كذا بظلم وافضل عليه اخووه غمضي.....حرام :( >>وش يسكتها اللهم ياكافي .... قصة قالوا لك قصــــــــــة حتى لو فيها واقع اقرأي واسكتي

حسن طلع خوش رجاااال....بيّضها ...ماشاء الله عليه..بس مادرى إن راح يصير هالموقف مع أخته

أمورة وحشتينا بقوة حبابة :)

تسلم أياديك على هالبااارت الغيييير شكل .....مررة ابداع ماشاء الله عليك

دعواتي لاأنسى أن أعقدها بأطراف السحاب ....ورجائي أن تفتح لها أبواب السماموات بحق الأنوار السادات

موفقة لكل خير إن شاء الله تعالى

دمتي بعين المولى الجليل

[MOONY]

وحشتينا اموووره
يعطيش ألف عافيه
وكل مايجي للبارتات اتحمس أكثر
موفقه غلاتوو
تحياتي لكِ

[* Red Rose *]

مرحبا اموووورة

تسلمي والله على البارت الرائع جدا

ننتظر البارت الجاي على احر من الجمر

[نور البدور]

واااااااااااااااااااو
احداث مشوقة كثير
با انتظار البقية بفارغ الصبر
^_^

[حلم لطيف]

مت البارت الجديد

[Princess]

مرحبااا حبايب
توي اليوم خلصت اختباااارت
:) انتظروني
قريباااا

[حلم لطيف]

موفقة
من زمان ننتظر والله

[Princess]

مرحبا...
عدنـــــــا و العود أحمد...
:) تفضلو الجديد....

[Princess]

ازدهار كانت متفقة مع وداد انها بتجيها تفطر وياها في يوم الثلاثاء... من اول الصبح طلعة ولادها المدارس...



ليلة الثلاثا صادف المصيبه في بيت اهل وداد... حادثة عبدالستار و فتحي... فباتت وداد في بيت اهلها مع امها تواسيها...



بينما عبدالستار رجع مع حسن بعد اصراره ونام في مجلسه...

حسن طلع العمل من اول الفجر..



ازدهار .. تدق على وداد.. ماترد عليها...

نست وداد جوالها في البيت من الربكه الليله الماضيه..

ازدهار..:

ــ مو على كيفها دي ام النوم..بس ماتوقع نايمه اكيد قعدت لولادها مدرسه.. اباروح ليها عساها عودت نامت اباطفرها ...





ولما قريب توصل .. شافت محمد وفرات طالعين للمدرسة ..

ــ امممممم قاعده البطيخه بش شكلها مشغوله مع ولادها فما ردت علي...



نزلت من السياره... باب البيت كان مردود ماتسكر عدل من طلعة فرات ومحمد...

دخلت وهي فيها الضحكه ناويه تخلع وداد..

الا تسمع صرخة ...

طفرت من الخلعه ودخلت تركض الصاله تشوف ويش صاير



الا تشوف ماريا ماسكة باب المجلس الداخلي حد ماعندها وهي ترتجف

ازهار بذهول :

ــ ويش فيش ؟؟ ويش صاير

ماريا ماانتبهت لأزهار لما دخلت فمن سمعت صوتها .. دقت السقف من الخلعه:

ــ امااااااااه...

ازهار ركضت لماريا مسكتها لقت جسمها مثلج مع ان الجو صيف .. وفوق هذا مستمره بالرجفه..

صارت تفرك بدنها:

ــ بسم الله على عمرش الرحمن... قولي لي ويش صاير ويش فيش !!

ماريا وهي بعدها ماسكه عروة الباب وهي تشاهق:

ــ مافي مفتاح.. مافي مفتاح...

ــ لويه ويش فيه؟؟

ــ رجااال غرررريييب

ازهار فتحت عيونها:

ــ هااا... متأكده؟؟ ويش يسوي داخل المجلس عاد ؟ حرامي؟؟

ــ مادررررري شكله دخل ... من... الباب الخارجي ..

ــ وين اخوش.. ؟؟؟ وين وداد..؟؟

ــ ووو دددداااد من البارحه مهي في البيت بيت اهلها.. وحسن مااادري وينهوووو ...

ازهار خلاص تحس ماريا بعالم ثاني :

ــ اتصلي بحسن .. بالسرعه



ماريا.:

ــ ماااادري وينهووو ولا اااني حااافظه رقممممه ..

ازهار :

ــ لا حووول... صح ماعندش جوال انتين بعد... خلاص الشرطه... مالينا غير الشرطه...

طلعت جوالها من شنطتها:

ــ ويش هالعله.. نسيت ماشحنته مخلصه البطاريه...

التفتت للتلفون بالصاله لقت بس الجهاز بدون اللاسلكي ...

ــ وين السماعه؟؟؟

ماريا مهي مستوعبه ...

ازهار :

ــ التلفووون وينهووو..

ماريا وخلاص الدموع مهي قادره توقفها:

ــ في المطبخ ...



عبدالستار راح يدور جواله وين...سمعهم وهم يطرو حسن.. يبغى يتصل فيه ويهدي الوضع.. بس من الربكه اللي هو فيها مو قادر يلاقيه ولا قادر يتذكر هل نساه بسيارة حسن من الليل !!





عبدالستار خايف ومو عارف ويش يسوي فكر انه يطلع من الباب الخارجي .. بس يبغى اول يبرر موقفه.. جى بيقوم الا يحس زي الصعقه تسري في بدنه بداية من مكان الضربه على ذراعه وتمشي بكتفه ويحس بنخزات في صدره....



رجع قعد ويحس انفاسه مخنوقه ... العرق يصب .. و الجو مره حاااار...

بس من سمع ازهار تقول الشرطه حاول يقاوم الألم يتعثر كلما قام.. فصار يحبي حباي يحس جسمه كله مكسر ...

ويش يرقعه من الفضايح اذا جت الشرطه وسحبته على ما يستدعو حسن و يقول ليهم الحقيقه... !!!



وصل للباب و صار يطقه..
ــ خيه... ابطلع لا تخافي ...انا عبدالستار





ازدهار تدور اللاسلكي بالمطبخ......

ماريا مهي مستوعبه ويش يقول ومين عبدالستار اصلا رايح عن بالها بالمره .. ومع طق الباب تصرخ صرخه تقلع البيت



ازهار شافت التلفون اخيرا جنب سلة المواعين محطوط .. من شافته جت بتدق الا تسمع صوت صريخ ماريا ..

بلا وعي لقت في سلة المواعين .. مقلى ...

شالته وراحت تركض باعدت ماريا وفتحت الباب الا قدامها عبدالستار على طوول كان متسند عليه فقد التوازن .. هو فقد توازنه من جهه .. هي عاجلت عليه برضبة قويه بالمقلى ... على راسه..

عبدالستار خلاص .. داخ والدم بدى يطلع من راسه .. وطاح عالأرض

ماريا مختلعه ..

ازهار اعظم منها.. رمت المقلى وقعدت على ركبها... تطالع في وجهه.. تحس تعرفه .. مر عليها من قبل ..

ازدهار والدموع متجمعه في عيونها بعد ماتذكرته واستوعبت الأمر وهي ترتجف الأخرى:

ــ عبد .. عبد السسسستتتااار دا..

ماريا قعدت ورى ازهار وهي ميته رعب ...

ــ مين !!

ــ اخو.. وداد..

ماريا ...

ــ هاااا..

ازهار بدت تصيح:

ــ ويش نسوي.. قتلته.. شكلي قتلته...



برى عبدالأله يدق هرنات .. دايما يمر على كل البنات قبل...

بعدين يرجع لأخته و ماريا بيتهم الأقرب على طريق المدرسه فما ياخذهم من الصبح....

ظل 10 دقايق .. مو عوايدها تتأخر .. ولكنها ماطلعت..

شهربان :

ــ صبر دقيقه باشوووف ويش صااير

ونزلت تشوف ماريا

دخلت الصاله وهي تنادي:

ــ ماريا.. وينش يللا تأخرنا..

الا تلاقي واحد متمدد عالأرض بدمه .. و ماريا و وحده ماتعرفها قدامه وحالتهم حاله

شهربان دقت صدرها وبشهقه عظيمه:

ــ مننننهووو داااا.. ويش صاااير



ماريا تزحف ليها وهي تشاهق :

ــ مادري ويش نسووي.. فكرته حرامي.. ضربناه بالمقلى.. ياعلي بيموت الرجال ..

مسكت عباة شهربان وهي تسحب فيها:

ــ ويش نسووي هاااا.. شهربان قولي لي ويش نسووووي

شهربان مذهوله ولا هي عارفه ويش تقوول :

ــ لا تخافي ...باشوف اخوي يصرفنا.. لا تخافي...

طلعت لعبدالأله وقالت له ينزل من الميكرو...

عبدالأله مستغرب والبنات اللي في الباص مستغربين اكثر ..

نزل ...

شهربان علمته بالسالفه..

عبدالأله منصرع:

ــ ويشش ... ياسااااتر ... زين الحين اباوصل البنات و برجع.. ظلي ويا ماريا ..

ركب الميكرو وانطلق للمدرسه..

شهربان رجعت دخلت الصاله لقتهم على وضعهم.. لاهم عارفين يحركوه ويسعفوه.. ولا هم ساكتين من الصياح..

راحت غرفة ماريا بالسرعه وجابت عباتها وبوشيتها وصارت تلبسها حق اذا دخل عبدالأله يشيل الرجال...



ماريا ساعتها صايره مثل الميته.. بلا وعي وبلا حواس...

مسكتها شهربان هي وازهار وقعدتهم عالكنب ...

10 دقايق الا بجية عبدالأله... دخل الحوش .. وصار ينادي:

ــ يــــــالله.. شهربان.. وينش

طلعت له تركض .. ودخلته..

من شاف حالته انصرع.. حمله :

ــ لا تخافو خواتي ان شالله خير ..

ازهار مهي قادره تتحمل .. وهي تصيح..:

ــ باروح وياك ...

عبدالأله مستغرب .. منهي دي اللي كشف ما تتغطى واول مره يشوفها..

شهربان:

ــ وين بتروحي خيه..

ازهار:

ــ باروح .. اني اللي ضربته .. اباروح اتطمن..

ماريا بهدوء وهي تشاهق:

ــ باروح اني بعد..



التفت عبدالأله لجهة صوت ماريا .. لقاها قاعده وشكلها مره مرعوبه..

شهربان:

ــ زين قومو اجل باروح اياكم اني بعد..



ركبو الميكرو.. سدح عبدالأله عبدالستار في اول 4 اسيات في الميكرو..

شهربان ركبت مع ماريا وازهار في الأسيات اللي ورى عبدالستار على طول....



وصارت تهدي في ماريا اللي ماسكتت من قول:

ــ كل مني اللي دخلت عليه وهو مايدري.. كل مني اللي ماعرفته



عبدالأله .. وافكار سلبيه تتراود لمخيلته..

ــ يعني دخلت عليه وهي بلا ستر وشافها...والحين بتروح وراه المستشفى.. ياررربي ويش هالموقف ...

ويرجع يهدأ روحه:

ـــ ويش فيني انا.. الرجال مسكين بيموت وانا ابليس وياي .. اففففف...



وصلو المستشفى ونزلوه... وعلى طول ازهار راحت الرسبشن ونقلت ليهم اللي صار بالضبط لا يتورط عبدالأله وياه...

وعلى طول خذوه الطورائ يشوفو حالته...

[Princess]

في بيت ابو مجتبى ...

ام مجتبى فتحت الباب على نور:

ــ اليوم فالف من غيابش .. تبغي تكملي الأسبوع كله.. ويش فيش ويش صااير؟؟ لا يكون فصلوش..

نور تحت بطانيتها عيونها ماليها الحزن .. و هلالات سود من قلة الراحه :

ــ لااا.. بس تعبانه شوووي ...

ــ تعبانه قلت لش خلي اخوش مجتبى يوديش المستشفى.. مايفيد فيش ماتطاوعي..

ــ تعب بنات عارض .. عادي اماه.. خليني ارتاح شوي..

ــ قلت لش تعب البنات العارض دا.. خليني امرخش وبيخف الألم..

ــ اماااه.. خليني عاد..

ــ اف ويش هالبنات ديلا بس دلاعه.. والله يوم اني بعمرش عندي مجتبى و اماني اختش .. غير السقوط اللي جبتهم.. لا شكيت لا من تعب عارض ولا غيره.. قومي قعدي ويا ابوش ونسيه صاير هو الآخر صمت .. غيري له الجو عاد يابتي ...

نور ساكته بس دموع تصب ..تحس نفسها خايفه.. اول مره تشوف هالمشهد قدامها ومن مرشدة طلابيه مع طالبه في آمان الله..

كانت تسمع بهالسوالف بس ما كانت تتوقع انها تصادف المنظر في يوم من الأيام...

كانت مرعوبه من روحة المدرسه ومن شوفة وجه استاذة رمله في أي لحظه..

مادرت عن استاذة زكيه واللي صار ليها.. ولا كانت ترد على أي اتصال من شهربان وماريا .. بحجة انها يا نايمه يا تعبانه.. وحدهم يتركو ليها السلامات...

ظلت بسريرها... وهي تسمع الأصوات.. باقر وراح للمدرسه من زمان.. ايثار توها تودع امها للروضه...

شوي هدأ البيت...

الا بصوت باب غرفتها ينفتح مره ثانيه..

نور وبصوت مبحوح:

ــ قلت ليكم مافيني شي بس برتاح .. ابغى انام..

ما احد يرد عليها...

شوي الا تحس احد قعد على سريرها.. وصار بصبعه يدق بظهرها .. ضربات خفيفه ورى بعض ..

شالت البطانيه من على راسها والتفتت .. لقته امير . رجعت و قلبت وجهها...:

ــ ويش مقعدنك من الصبح...

امير وهو يحاول يتكلم:

ــ نور .. نور ...

قعدت نور قعود وهي مذهوله ,, لأول مره تسمع امير ينطق بأسمها.. صارت تتأمله بسعاده .. و تهمس له:

ــ نور.. نوور

امير يضحك ويعيد الأسم .. وهو مره مبسوط...

مد عليها ورقه ... فيها رسمه.. مسكتها تشوفها.. لقته راسم بنيه حليوه.. وجنبها قلووب ..

ابتسمت :

ــ مين دي ؟

امير فرحان ويأشر على البنيه:

ــ نور .. نور

نور ضحكت وصارت تمسح على راسه.. وتأشر على القلوب :

ــ مين اللي علمك ترسم ديلا ؟

امير وهو مره الدنيا مو سايعتنه من الفرحه:

ــ ايثار ... ايثااار

نور ماتحملت صارت تصيح وتضحك.. لأول مره يتكلم امير بهالطريقه وينطق الأسامي ... ويحددهم.. كان بس يعيد الكلام اللي يسمعه..

ماعمره نادى احد او سماه بأسمه..

عانقته وهي شاده عالورقه وتصيح.... وبصوت مبحوح:

ــ اميري .. احبك واجد.. شكرا حبيبي .. شكرا...

في امريكا.. الساعه تقريبا 9 الليل .. ستيف يحاول يتصل على سام من ثلاثة ايام مادرى عنه ولا سمع له خبر... وخايف لايكون مارك سوى اللي في باله وفعلا قتله...

راح يدور على مارك لقاه يكلم جوال.. انخش وصار يسمعه عوايده..

مارك منفعل وكان يكلم اخو جويل :

ــ قلت لك لا ادري اين اختفى ذلك الحقير .. لم اره منذ ثلاثة ايام... ............ كيف لي ان اعرف .......... ماذا.............. أكلامي لا يؤخذ على محمل الثقة منك............ لقد وعدتك بأن تكون نهايته على يدي وانا عند وعدي.............. حتما سأجده .. صدقني..

ستيف انصرع... وتراجع ..

ــ يااااه يالك من حاقد ...

تنهد من قلب:

ــ على الأقل لم تصل يدك حتى الأن اليه...

توم طالع من الفندق بيرجع لسكنه.. الا يلاقي قدامه سام واقف وحالته حاله..

توم من شافه خاف من شكله الذابل ..

ــ مابك.. اخفتني .. تبدو كالشبح

هو ماخلص كلامه الا سام مرتمي عليه ..

توم مسكه:

ــ مابك.. تماسك...

سام وهو مره يهمس:

ــ اشعر بالتعب.. من ثلاثة ايام لم اذق النوم ...

توم منذهل منه:

ــ لماذا .. ماذا كنت تفعل...

سام خلاص غاب عن الوعي..

توم حمله وصار يسحب فيه... رجع لغرفة التنظيف بالفندق :

ــ ابقى هنا لتبعد الشبهات عن نفسك... وعني . . فالتحري في نشاط هذه الأيام... سأقفل الباب عليك... وسآتي لك غدا صباحا...

وفي السعودية...

تقريبا الساعه 10 الصباح... رن التذكير بجوال حسن...

انتبه الا موعد تحاليل فتحي و استكمال الأجرائات...

ــ غريبه مااتصل عبدالستار للحين مع اني راسل له.. شكله بعده نايم.. ماينلام من المصايب اللي شافها البارحه..

استأذن من رئيسة بالعمل .. صار يتصل في عبدالستار .. مايرد عليه...

ركب السياره .ومشى... شوي وهو بالطريق رد يتصل في عبدالستار.. الا يسمع رنة جوال في سيارته...

قفل الأتصال وصار يتصوخ.. مافيه صوت..

فكر يتهيأ له..

رجع واتصل .. الا يسمع صوت رنين.. وقريب منه..

وقف على جنب و خلى جواله مفتوح على الأتصال والرنين مستمر..

نزل من السياره وراح الجهه الثانيه في السيت المجاور له.. نزل يطالع تحته.. لقى جوال عبدالستار مرمي ..

حسن مسكه .. فتحه لقى بس اتصالات منه ورسايل .. تنهد بأسى:

ــ ايه.. ماكلفت على روحها امك حتى تتصل عليك البارحه تسأل عنك .. وينك.. قسم بالله اشك انها امك.. الله يعينك ياخوي ويساعدك..

في المستشفى..

فتح عبدالستار عيونه. راسه ملفوف والدكاتره بس ينتظروه يصحى حق يحددو حالته... لقى عبدالأله قاعد جنبه..

عبدالستار بتعب :

ــ مين انت.؟

عبدالأله ابتسم:

ــ اووه الحمدلله عالسلامه اخوك... مو مهم مين انا.. مين انت؟

عبدالستار مستغرب :

ــ ويش تقول؟

عبدالأله:

ــ مين انت..

عبدالستار بأستغراب:

ــ ها... انا.....

سكت شوي وشبح بعيونه...

ــ انا....

عبدالأله خايف عليه:

ــ ويش فيك اخوك.؟؟

ــ مين انا...؟؟؟

عبدالأله ضرب فخذه بقبضة ايده:

ــ يـــــــــــالله....!!

عبدالستار قعد قعود.. وهو يتأمل المكان.. تحسس راسه الملفوف:

ــ آآي.. اخوك.. مين انت... وويش اسوي انا هنا..

عبدالأله وقف :

ــ قول لي اسمك كامل..

عبدالستار يمسك راسه:

ــ آآآآه... والله مانى ذاكر.. احس راسي بينفجر...

عبدالأله طلع من الغرفه لقى ازهار و شهربان و ماريا قاعدين برى على كراسي الأنتظار..

قامت له ازهار :

ــ ويش صار ؟ قعد لو لا؟

شهربان تهمس لماريا:

ــ بل قوية عيون دي ماتتغطى وعادي تكلم اخوي ... << مقصدها تبغى تحرك غيرة ماريا (( جدا متفرغه ))

ولكن ماريا ابدا في عالم آخر..

عبدالأله بهدوء:

ــ شكله فقد الذاكره.. زي ماكانو الدكاتره خايفين..

ازهار:

ــ هااا..

مسكت الطوفه تحس نفسها بتنهار...

ماريا من سمعت صارت تصيح صياح مثل الأطفال..

وشهربان تهدي فيها..

وعبدالأله مو قادر يحس الموقف ما ينوصف ..

جو الدكاتره وخذو عبدالستار ...

ازهار وقفت احد الدكاتره:

ــ دكتور لو سمحت .. ويش بتسوو له..

الدكتور:

ــ راح نعمل له فحص بأشعة الرنين المغناطيسي على شان نحدد حالة فقدان الذاكره اللي عنده..

ازهار خلاص تحس ركبها ماتشيلها.. وتحاول تتصل في وداد .. ووداد ابدا ماترد..

وبيت اهلها ماتعرف رقمهم غيروه من كم سنه ...وماعندها رقم جوال ام وداد....

راحت لعبد الأله ...

ــ لو سمحت اخوي خلي بالك على ماريا بتركها مع اختك .. رجعها البيت بعدين .. وطمني على حالة عبدالستار اذا طلعت نتيجته.. وهذا رقمي اتصل علي وطمني على طول

عبدالأله:

ــ وين بتروحي انتين؟

ــ اباروح بيت اهله .. اباقول ليهم..

[Princess]

حسن وصل البيت بعد مشوار طويل من عمله على مايوصل .. ... دخل وانصرع.. لقاه فاضي ...

وعلى باب المجلس لقى على الفرش دم.. و مقلى مرمي على جنب.. والمجلس فاضي ..

وقف قلبه.. صار ينادي ...

ــ ماريا.. عبدالستااار... وينكم...؟؟!!

مسك جواله مو عارف يتصل لمين... دق على وداد.. الا يسمع صوت جوالها على مكتبة الصاله..

صار يفرك وجهه بالسرعه مو عارف يتصل في مين...

طلع الشارع يركض ...الا يشوف ميكرو عبدالأله جاي صوب بيتهم...

وقف .. راح حسن يركض الا يشوف شهربان تنزل وتنزل ماريا وياها..

وهيئة جسم ماريا مو طبيعيه .. صاير ليها شي كايد.....

ــ ويش صاير .. ويش فيكم.. !!

عبدالأله نزل لحسن و حكى له القصه ..

حسن منصرع:

ــ هااااااا.. ويش قلت؟؟

ــ يقولو فقدان ذاكره مؤقت.. كم يوم وبترجع له ذاكرته ان شالله بس يبغى له راحه واحد قريب منه يذكره بتفاصيل حياته..

حسن يضحك بأستغرب منفجع:

ــ هه.. ههههه.. ههههههه .. قلت لي مقلى .. وفوق الراس ها.. ومن مين..صديقة مرتي ... ياسلاااام.. مو ناقصنك شي يا صديقي غير تفقد مخك موليه... وين بأي مستشفىىىى !!!

وعلى طول ركب سيارته بيروح له ..

شهربان تتحمق :

ـ بل بل بل .. ماكلف على روحه حتى يشوف اخته ويش حالتها... تعالي بس ياخيه وياي بيتنا وهدي بالش وان شالله مابيصير الا الخير...

في المدرسه ... آخر الدوام..

ريماس :

ــ ممممم لا ماريا ولا الجنيه صديقتها ماداومو اليوم.. ونور لا حس ولا خبر من دي 3 ايام. وغادوه ماتدري عنهم كلهم... ويش فيهم هالشله... مممممم اروح اشوف عبدالأله بس..

لبست عباتها ورشت العطر.. وطلعت تتبختر .. وصلت لعند ميكرو عبدالأله..

وكان عبدالأله عوايده واقف برى ومتسند على الميكرو من قدام ينتظر البنات يكتملو..

مرت قدامه.. ووقفت بعد ماعدته بكم خطوته.. والتفتت له.. وبمياعه:

ــ وين شهربان اليوم ماداومت..

عبدالأله انصرع منها .. :

ــ تعبانه..

ــ حتى ماريا اسمع جارتكم وتوصلها وصديقة اختك.. اكيد تدري عنها.. ونور توصلها انت بعد ماداومو كلهم لويه....؟؟؟ كلهم تعبااانييين...؟؟

عبدالأله بعفويه:

ــ لا ماريا مع اختي .. نور مادري عنها..

ريماس بقهر وتحاول تهدي روحها:

ــ ويش تسوي مع اختك.. لايكون ممرضه..

عبدالأله بالمره مو عاجبتنه ريماس .. وقلة حياها.. و تدخلها اللي ماله أي داعي..

نكس راسه. والتفت صوبها...

ــ اختي لو سمحتي بركب السياره..

ريماس تسوي روحها ماتسمعه .. ولا وخرت عن طريقه..

قام عكس الأتجاه واخذ فره كامله على الميكرو لين وصل للباب .. وركب ...

ريماس انقهرت ...

راحت جهة السيت المجاور .. وكانت النافذة مفتوحه.. تسندت عليها :

ــ عمومـــــا .. سلم لي على شهرباااان و مـــــاريـــــــا,, وقول ليهم وحشووووني مررره مررره .. باي

عبدالأله وده يشيل الميكرو بكبره ويرقعها به.. بس ماسك اعصابه وحاقرنها.. وماهو عارف منهي هالبنيه دي ولا يتجرأ يسأل اخته عنها يخاف من المشاكل تجيه لو تجي لأخته من طرف هالأشكال قويين العيون...

البنات في الباص منصرعين.. ومستغربين منها.. وبدو الحش .. فسمع وحده منهم تقول..

ــ مو غريبه عليها ريماسو دي .. ام الصبيان.. ماتستحي قسما بالله..

وحده ثانيه:

ــ تصدقو سمعتها مره تعترف تقول كل الصبيان اللي تعرفت عليهم يموتو عليها ويترجوها تطلع وياهم بس هي مهي راضيه..

وحده ثالثه :

ــ لالا .. سمعت ان فيه واحد مو عاطنها وجه وهو اللي لو يقول ليها تطلع وياه بتطلع لو تقوم قيامتها...

رجعت الأوليه وسألت:

ــ يؤ مين اللي قال لش ..؟؟

ــ مصادري الخاصه..

ــ زين منهو,,؟؟؟

ــ كنت ما ادري .. بس شكله على مايبدو .......

واشرت ناحية عبدالأله بهدوء وبخفيه عليه...

البنات بهدوء يتاهمسو .. مو مصدقين ...

عبدالأله شابح بعيونه وفهم كلامهم كله وفي باله...

ــ ياربي .. عمري ماحطيت بالي لسوالف هالبنات. مو ناقصني الا هالأشكال.. لويه حاطه العين علي دي ... ويش هاليوم هذا اللي كله مصايب من اوله.. الله يستر من تاليه...

في امريكا...

قعد سام من النوم حصران يبغى يروح الحمام..

انتبه لروحه...انه في غرفة التنظيف بالفندق وتذكر انه جى لتوم بعد ماضاقت به الأماكن... نفسيته منسده من المقر اللي كان يسكن فيه ..

و عنده شعور غريب ان اخو جويل ممكن يوصل له لو راح هناك... خصوصا ان ستيف حذره من عواقب العمليه الأخيره و قال له انه اكتشف بأن اخوها تعامل مع العصابه في امر .. في يوم من الأيام..

بس ما قال له انه درى من مارك وويش يخطط مارك ....

فتحاشى سام انه يتواجد بالمقر بالفتره اللي طافت...

فتح باب الغرفه..الا يلاقيه مقفل ..

سام منصرع..

ــ وووه.. ويش هالحاااااااله ...

خاف يحرك الباب زياده .. ويجي حارس الأمن ويروح بداهيه... هو مع توم..

فقعد يحاول يتمالك نفسه...

طالع الجوال الا الوقت بدري عالصباح.. يمديه ينفجر ...

صبر نصف ساعه تقريبا.. خلاص مو قادر..

التفت يمين وشمال .. يبغى صرفه ...

لقى سطل فيه عدة للتنظيف ..

قام يركض وشالهم...

ــ نشاف .. ابغى نشاااف..

راح للدروج يفتش فيها... فتح واحد منهم... لقى فيه مناديل .. سحب مجموعه.. الا تطفر ورقه وتطيح عالأرض ... تجاهلها سام .. وراح يدبر عمره مع السطل والنشاف وخلص المهمه..

رجع انسدح ..

ــ الله يقطع شرك ياتوم على هالورطه وهالموقف اللي حطيتني فيه..

انقلب على يمينه.. لقى الورقه الصغيره مرميه...

مد ايده وفتحها.. لقى توم كاتب لأجل سام ...

ومكتوب رقم شكله لبيت ... مو لجوال..

سام مستغرب:

ــ ويش سالفة هالرقم...:.؟؟؟

اول ماخطر على باله:

ــ لا يكون احد يعرفني .. ويعرف هويتي الحقيقيه.. انا ماذكر شي الا توم قدامي بعد ماقعدت من حادثه...

حط الرقم في مخباه .. وقرر انه بالصباح يتصل ويشوفه مين....

[Princess]

ازدهار تتجادل مع ام عبدالستار

ــ وربي ماتوقعت هالرد منش ..

ــ والله انتين اللي ضربتيه تتحملي النتايج ويش تبغي اسوي..؟؟

ــ ليش قلت لش تحملي نتيجة فعلتي... قلت لش روحي زوريه و تطمني على احواله.. يمكن يتذكر شي لما يشووفش .. الدكتور قال فقدان الذاكره المؤقت يتعالج بسهوله مع الناس القريبين من المصاب ....

ام عبدالستار ساكته..

وداد تحاول تهدي في علاء ولدها كان يصيح ... جابه ليها حسن لما قررت تبات الليل مع امها... ومهي عارفه لا تسكته ولا تحل الوضع مع امها و ازدهار..

ازدهار بعصبيه:

ـ كيف لش قلب انتين امه وبهالبرود اقول لش عنه بالمستشفى وابد ماتحركي ساكن..

ام عبدالستار وبجواب كالصاعقه نزل على راس وداد:

ــ مو ولدي اللي يورط اخوه و يحبسه بالسجون...

وبنفس الوقت وداد فقدت اعصابها مع صياح علاء وعطته كف خلته يزيد صريخ..

ازدهار حد ماعندها صرخت فيهم:

ــ آآآآآآآآآه.. تسموووو روحكم امهاااااااااااات.. الله ينتقم منكم....

ام عبدالستار عصبت:

ــ ينتقم منش ومن اشكالش .. قليلة الأدب ..

ازدهار حست روحها غلطت بس غصبن عنها ... مهي عارفه ويش تقول كيف تبرر موقفها:

ــ ياخاله مو قصدي .. بس والله عصبت.. ولدش اقول لش مرمي بالمستشفى وحالته حاله و انتين....

ام عبدالستار تقاطعها وهي تحاول تكتم قهرها وبغضب:

ــ قلة تربيه وجايه تعلمنا الأصول

ازدهار فتحت عيونها:

ــ لا عااااد... مربيه وغصبن على الكل ... تدري اساسا الشرهه علي اللي جايه لش .. احساس عدم وربي ..

ــ اطلعي برى.. براااااااا

ــ بطلع.. بس بيجيش يوم بتندمي انش فرطتي بولدش .. وبتتذكري كلامي ..

ام عبدالستار شالت مخدات من الكنب وصارت ترميهم على ازدهار:

ــ اقووووووول لش اطلعي

وداد مهي عارفه ويش تسوي فصارت تحاول تهدي في امها....

ازدهار طلعت من عندهم وفي القلب حره..

في الرياض ...

يوسف ..:

ــ مراد من بعد اذنك بغيت استخدم جوالك بتصل في بيتنا مر اسبوع وشوي ماكلمتهم...

مراد: ــ افا عليك اخيرا استسلمت من متى وانا اقول لك استخدمه لين تنزل المكافئه وتاخذ لك شريحه وجوال منت راضي تطيعني..

يوسف والخجل بادي على ملامحه..

مراد يضرب كتف يوسف:

ــ افا عليك بس .. تستحي من مراد.. ماهكذا الظن بك..

يوسف مو حافظ ولا رقم الا رقم بيتهم...

دق عليه.. ماحد يرد..

حسن راح المستشفى لعبدالستار يشوف وضعه..

ماريا مع شهربان في بيتهم..

اماني وولادها خلاص رجعو بيت ابو مجتبى .. يوسف ماعنده خبر انسرق جواله لما بغت اماني تتواصل وياه..

سكر يوسف :

ــ ما احد يرد....

مراد فتح لاب توبه ....

ــ حاول ان تتصل بهم لاحقا..

يوسف :

ــ غريبه لكن الحين ظهر وما احد يرد .. مو عوايدهم يصيرو برى البيت هالحزه .. خصوصا انه لا يوم اربعا ولا خميس ولا حتى جمعه..

ــ لا تحاتي اخوك .. ماعليهم شر ان شالله عادي طلعو يغيرو جو .. سحبو الواير بالغلط.. لا تحط افتراضات سلبيه... الا وين الكونكت حقتي..

وقام يدورها.. وهو يدور مايسمع تحت رجوله تحت الشرشف كان مرمي عالأرض الا .. صوت طقه..

مراد فتح عيونه:

ــ أه أه أه .. لا عاد.. لا عااااد..

رفع الشرشف الا يلاقي الكونكت منشلخه.. شهق شهقه:

ــ انكسرررررررت..

شالها وهو يضحك:

ــ ماتوقعت روحي فقيل لهالدررررجه.. ذبحتها.. مسكينه..

يوسف ماقدر عليه صار يضحك..

مراد : ــ وصاقعه عاد عندي بحث مستعجل .. اشوف تالي كيف اتصرف وياها دي .. شكلي باروح مقهى...

الا بدخلة حبيب عليهم :

ــ مراااد بعد شبدي إنتاااا.. نبغى لاب توبك وكونكتتك سلف ..

مراد : ــ هههههه ويش صاااير

حبيب : ــ بنحمل لكاظمووو فلم كوميدي لو أي شي يغير جو الكآبه اللي عايشنه..الغرفه ماتنطاق لا هو راضي يخفف عن روحه ولا هو راضي ينزل البلد ..

مراد يرفع الكونكتته لحبيب:

ــ الغاليه عطتكم عمرها..

حبيب : ــ انا لله وانا اليه لراجعون..

مراد: ــ اخوك باروح مقهى بعد ساعه... روحو وياي كلكم .. نغير جو..

حبيب: ــ تتوقع يعني .. اوووووكي...

في المستشفى حسن مع عبدالستار .. ماسك ايده يتأمله وهو نايم ويتذكره اول ماوصل للمستشفى لما استقبله بأبتسامه وكان اول سؤال:

ــ مين انت... شكلك مألوف .. كأني اعرفك..!!

شد على ايده... وتنهد:

ــ إييييه يا صاحبي ويش تخبي لك الأيام اكثر من كذا.. الله يرد لك الصحه والعافيه و يعديك من هالأزمه بسلامه..

[Princess]

باب غرفة التنظيف انفتح مع اول الفجر ...

توم:

ــ اوه.. هل استيقظت..؟؟ صباح الخير..

سام بأبتسامه ذابله.. وهو بيطلع:

ــ صباح الخير يا سجاني.. شكرا لك.. ولكن تأكد من المرات القادمه .. ان تترك لي متنفس .. الى اللقاء..

توم مستغرب :

ــ متنفس .... الغرفه بها نوافذ.. ماللذي يعنيه..

جى بيشيل اغراض التنظيف بيستعد لشغله.. الا ينتبه للسطل واللي فيه..

فتح عيونه:

ــ ماهذا...!!!!

قام يضحك:

ــ سام ايها الـ....... هههههههههه اهذا المتنفس المقصوود.. تبا لك..

سام وهو يتمشى.. حط ايده في مخابيه.. وتذكر الورقه.. طلعها و صار يطالع في الرقم..

ــ أتصل فيه .. والا اطنشه.. مين هذا.. وليش توم خاشنه عني... غريبه والله...

وفي الشارع نفسه وللصدفه الألف .. ينتبه له احمد مع صاحبه طالعين من الفندق قررو يقعدو من بدري بالمره... بما انه اليوم اخر يوم عندهم في امريكا .. قبل بيرجعو البلد .. صديق احمد:

ــ شووف الرجال اللي خبرك هناك..

احمد التفت:

ــ يــــالله.. ويش هالصدف العجيبه دي .. هذا كم مره يطلع لي على شان يذكرني بالمرحوم اقرى له الفاتحه.. الظاهر منسي من الرحمه.. والله راسل لي هالأنسان حق اشوفه واذكره..

طلع سام جواله و فتحه.. الا تتدافع عليه المكالمات الفائته غير الرسايل ...

ونص المكالمات كانت من ستيف .. والنص الباقي من قيصر ...

سام في باله:

ــ قيصر .. والله لك وحشه.. آسف يالغالي .. وربي آسف .. بس شكلك خلاص بتنسى شي سميته بحياتك سامي..

قيصر بالعياده.. قدام مراية الحمام يحلق لحيته ويفكر في سامي..

فجأه جرحها وهو يحلقها...

ــ آآآه شفيني آنا ...

حط الموس على المغسله...

ــ وين ارضك وين سماك... شنو تسوي وشنو اللي حدك على هالطريق..

ازدهار راحت المستشفى... بتتطمن على حال عبدالستار... فتحت باب الغرفه بهدوء .. لقت حسن قاعد.. دخلت والباب مفتوح وعلى نياتها:

ــ آآآ.. ابو محمد... قواك الله

هو انتبه ليها .. وبلا وعي من قهره في وداد و امها وفتحي ... وتالي هي سبب هالمصيبه وهي صديقة وداد.. حط الحره فيها:

ــ ويش جااااااايبنش بعد....؟؟

ازدهار جاها الرعب :

ــ اباشوف حالته.. ان شالله بخير..

ــ هه.. خير.. أي خير يجي من وراكم لا بارك الله فيكم..

ازدهار طغت في عيونها الدموع..

عبدالستار فتح عيونه مو داري ويش صاير فيهم...

حسن:

ــ تيسري بيتش الله ييسر لش .. وتجهزي يمكن الشرطه تفتح وياش محضر بالقضيه .. بس ينتظرو عبدالستار ترجع ذاكرته حق يشوفو ويش بيصير حكمش ..

ازدهار دموعها تصب على خدودها..

حسن عصب زياده:

ـــ مو وقتها دموع التماسيح.. تيسري قلت لش..

طلعت ازدهار وهي منهاره ...

عبدالستار بهدوء:

ــ اخوك لويه صيحت البنيه..؟؟

حسن يشد على ايد عبدالستار:

ــ ها صحيت.. ان شالله صرت احسن...

ــ اقول لك لويه صيحتها؟ ومنهي دي اصلا؟

ــ ماعليك منها.. غلطانه بالغرفه...

ــ غلطانه بالغرفه ..؟؟ شكلك تعرفها على هالتهزيأ اللي حصلته منك..

حسن مو عارف ويش يقول....

ــ اقول اخوك.. هي اللي ضربت راسك زين.. وهي سبب اللي انت فيه الحين..

ــ ههههه والله.. هالنتفه دي صغيرونه.. منها انا بهالحاله.. عجيب والله...

حسن ابتسم:

ــ شفت شلون.. نسوان.. ماتجي من وراهم غير المصايب ..

ــ بس تصدق وجهها مألوف احس اعرفها ..

حسن فرح:

ــ صدق .. كم مألوف ومعروف اليوم.... بس بتعرف روحك.. مين انت؟ بيرتاح بالي..

ــ والله اسمعكم تقولو عبدالستار ولا ادري ..

ــ انا لله... !!

ماريا رجعت البيت على شان ولاد اخوها تذكرتهم لحالهم ...

لقتهم قاعدين في الصاله رجعو البيت من الظهر .. والوقت الحين 4 العصر من شافوها ارتمو عليها خايفين ويصيحو من الدم اللي شافوه والمقلى المرمي... الجوع ذابحهم...

هدتهم وقالت ليهم انها قطوه دخلت البيت وهي خافت منها وصفقتها بالمقلى ....

سوت ليهم بطاطس .. وحطته ليهم ياكلوه... وقعدت وهي سرحانه... تفكر باللي صار وتحس نفسها ماكنها بالدنيا...

الا بدخلة حسن..

على طول طارت له..

ــ هااا.. ويش صار عليه؟؟ تذكر شي ..

حسن وهو مره منهار القوى.. رمى روحه عالكنب ..

ــ غبيه انتين.. ماتفهمي.. لو ماتعرفي تقري .. حاط لش ملاحظه كبر وجهش على مرايا تسريحتش .. لو ادري شان فزعتش من نومش .. جنيتو عالرجال الله ينتقم منكم..

ماريا ودموعها تسيل :

ــ ماشفتها.. والله ماشفتها.. ما قربت ناحية تسريحتي اليوم... مادريت...

ــ وحتى لو مادرررريتي .. شدعوه ماتعرفيه دا منهو..

ــ ماشفته في حياتي قسم بالله .. ونسيت ان اخو وداد اسمه عبدالستار.. ما اسمعها الا كل تقول فتحي..

ــ الهي لا يفتح عليه ولا عليها ياربي امين.. اففففففف دا بعد على طاريه مادريت ويش صار عليه... والله اني ميت هلاك..

وقام رجع طلع بيروح قسم الشرطه بدل عبدالستار وبيشوف الوضع..

في مقهى انترنت... مراد و الشله كلهم... ماعدا صادق ماجى معاهم.. تحجج انه وراه اختبار..

قاعدين كل واحد في كبينه.. شابكين وسوالف ...

اللي عالمسنجر واللي يتصفح.. و كاظم فتحو له فلم كوميدي نصح به مراد..

ومايسمعو ساعتها الا ضحكه كل شوي...

مر الوقت بدون أي شعور... وقرب آذان المغرب .......

الا بدخلة الهيئة على المقهى...

وعلى طول عالكباااين تفتيش..... وبعد ربع ساعه.. سحبو مراد وهم يصرخو فيه

ولما صار يرد عليهم ويحلف ليهم انه مو هو اللي فاتح هالمواقع ..

ضربوه و جروه للسياره ...

الشباب انصرعو من اللي صاير وركض وراه .. يسألو ليش وويش مسوي..

واحد منهم جاوب عليهم:

ــ فاتح مواقع اباحيه .. لقينا على جهازه بالمحفوظات الدليل ... لا و مركب برنامج فك الحجب عن المواقع... الأتصالات السعوديه ماقصرت تبي لكم الخير يالشباب وانتو تحفرون قبوركم بيدكم.. الله يهديكم .. الله يصلحكم..

راح يوسف يركض لجهاز مراد.. لقى المواقع مفتوحه من شوي فتحوها للتأكيد.. وانصرع..

طفى الشاشه وهو مو مستوعب .. ويش كان مراد يسوي .. ويتذكره وهو يدور على الكونكت حقه بحجة البحث وانه مو قادر يصبر واقتراحه بالمقهى.. وتالي هذا آخرتها..

حبيب والسيد يحاولو يتفاهمو مع الهيئه بس ابدا.. مافي شي بنظرهم يثبت برائته..

مراد يصرخ فيهم من قلب .. وهو بالسياره:

ــ مظلوم والله انا مظلوم

هددو باقي الشباب ان ما وخرو عنه بياخذوهم وياه..

السيد:

ــ طيب ويش بتسوو فيه..

ــ اصلاحيه وتأديب كم يوم وتغريم.. وبنطلعه..

السيد في باله: ــ الله يستر من تأديبكم .. ويهديك يا مراد على هالفعل..

يوسف طلع من المقهى ومر جنب السياره .. الا مراد يطق في النافذه وهو يصرخ:

ــ يوووسف .. قسم بالله انا بريء .. والله مظلوووم ...... مو انااااااااا....

يوسف مو قادر يصدق.. يحس آماله خابت في مراد.. بس مو قادر يكذب اللي شافه بعيونه .... عطى مراد نظره قويه...

و مشى عنه و اخذ تكسي .. لأن مراد اللي موصلنهم بسيارته..

خلى الباب مفتوح... ونادى:

ــ شباب بتمشو والا ويش .. بمشي انا..

حبيب والسيد مستغربين حدهم من يوسف وهو اقرب واحد لمراد..

كاظم رجعت له حالة الكآبه.. ركب التكسي مع يوسف .

حبيب :

ــ امشو باروح مع مراد انا..

السيد: ــ وانا بعد.. تيسرو..

ومشى التكسي...

مراد يحس في قلبه جرح اعظم من طعن سكين..

من النظره اللي عطاها اياه يوسف وهو يناديه و يترجاه ويأكد له انه مظلوم..

صدمه بالمره هالتصرف من يوسف وما توقعه ابدا..

ولأول مره في حياة مراد.. من طفولته... ماحس بهالشعور.. تنسل دمعه قهر وضيم على خده...

الى الملتقى...

[أمل الظهور]

ويلي على عبد الستار كانه هذا الي كان ناقصه وامه هذي بلا قلب بس كله فتحي وفتحي


بل بل عليهم مو حريم لو حرامي صج ماضربوه خخخ



وهذي الي مااحب اطري اسمها جعلها الوجع على هالجراءة ريماسوه


ويارب يتعرفوا على احمد وياخذوه معاهم


لوعتي كبدي بهالسطل


شكلها هالازدهار بتحب عبد الستار او حبته


مسكين مراد حاسه انه مظلوم والي قهره زود يوسف ليش صدق


مايستاهل والله



البارت قنان ننتظر الجديد