غربة الأوطــــــــــــــــــان...

[Princess]

في كوافير ازدهار ...
وداد منسدحه و في وجهها قناع لتنظيف البشره بعد ما حفت وعملت التقشير.. و تسولف مع ازدهار...
الا بالفلبينه العامله تقاطعهم ...
ــ مِس ازدهار هذا جهاز حق بخار خراب مره تانيه..
ازدهار بزهق :
ــ اوهوو مو مره تانيه .. إلا قولي مره عاشره .. كم مره صلحناه دا ولا يفيد وياه.. هو بس لا يفقع في راس زبونه ويودينا بداهيه...
ــ لازم يشتري جديد..
ــ هذا اللي بيصير .. عاد محل الـ .. جربناه بهالجهاز وهذا هو خرطي .. ومحل الـ.... غاليه اسعارهم...
تقاطعهم وداد :
ــ يووو اخوي محله يبيع هالحوايج ...
ازدهار : ــ افا بس .. و توي ادري .. توش تقولي عاد... من متى اني فاتحه الكوافير ..
ــ ويش دراني ما سالتي ومايجي على بالي اقول لش
ــ حلاتي اسألش عن اخوانش ويش دخلني ...!!
ــ ويا وجهش ..
ــ ويش اسمه محله؟ ووين .؟ وكيف اسعاره؟؟
ــ بل بل .. اسمه كيرتفتي .. وين عاد وكيف اسعاره مادري..
ــ خابت عليش حق اخوش ولا تدري..
ــ ما يفيدني بشي ولا خطر على بالي اسأله..
ــ لحظه... قلتي كيرتفتي .. مار علي الأسم بس مو حق معدات تجميل !!!
ــ ايه .. تشيه طلعتي تعرفيه..؟؟
ركضت ازدهار لشنطتها...
فتحتها ... وفتحت المحفظه وطلعت الكرت.. اللي عطاها اياه عبدالستار..
ــ المدير عبد الستار آل ... صح ؟
وداد تطالع في ازدهار وهي مستغربه:
ــ عندش كرته اكووو ... يعني تعرفيه..
ازدهار ومهي مستوعبه الأمر..
ـ اولا ياحظي معدات تصوير مو تجميل .. صحيح انش خوش اخت... وبعدين كيف اخوش..؟؟ عبدالستار دا اخوش؟؟ من امش يعني؟؟
وداد صارت تضحك:
ــ هههههههه صدق تصوير ..!! شمدريني عنه... ايييه من امي .. اكبر واحد هو...
ازدهار تشخط راس وداد بالكرت :
ــ تسمي روحش صديقه.. مالت عليش وعلى وجهش .. توي ادري ان عندش اخوان من امش..!
ــ ما سألتي ..
ــ بذمتش صار لي 7 سنوات من عرفتش... خابت عليش وعلى سوالفش ماعندش الا الحش و الشكوى.. اجل عندش اخوان من امش وتوي ادري..
ــ هههههه انا لله بتسوي لي سالفه الحين من لا شيء .. هو بس الوحيد من امي و عندي فتحي خليصي..
ــ ايه مو انتين تدري عن اخوتي و عن اهلي واني حدي ريلش وحمواتش .. الخنين والخايس اعرفه عنهم.. هذا اذا فيه خنين ياحسره..
وداد انقهرت : ــ ويش قصدش يعني اني حنانه شكايه و اعور راسش بالهدره..
ازدهار : ــ فسري على كيفش الأمور .. ويش عليش ..
ــ زين هذا انتين دريتي الحين .. كرته عندش يعني تعرفيه..
ــ لاااا.. سالفه طويله ..
ــ ويش !!؟؟
وبين ما ازدهار تحكي لوداد سالفة اخوها لما صدمهم...

علاء يدور في المحل ويحوس ..
حرك علبة حمام زيت كبيره فطاحت عالسراميك و انبطت..
جت الفلبينه تصرخ ووخرت علاء لأمه:
ــ روووح لمامااا..
وداد عصبت:
ــ بسم الله على ولدي .. تفداه هالغرشه.. لا تصرخي عليه.. ادفع لش سعرها.. والله حاله شغاله وتنفخ..
الفلبينيه عصبت: ــ امسكي بيبي .. كم مره يقول روح لماما مايسمع كلام..
ازدهار : ـ خلاص حصل خير .. نظفي هذا لا نزلق منه.. دافعة بلاء عن عمره..
الفلبينيه صارت تمسح الزيت وهي تتحمق بالفلبيني
وداد : ــ ومصيبه .. لا تسبي فينا مانفهم لش تقومي تاخذي حيفش ..
مسحت الفلبينه عالطاير وانحاشت عنهم..
ازدهار وفيها ضحكه:
ــ ياعلي ماحد يسلم من شرش ..
ــ اجل تصرخ على ولدي صروعته.. الله يلعن ماريوه يوم ما ترضى تخليه عندها
ــ انـــــــــــا لله حتى وانتين مو وياها مهي سالمه من دعاويش.. حرام عليش والله .. خافي ربش..
والله ماحد صابر عليش و عارفنش غيري
وداد وبقهر : ــ زين والله... اجل لله صبرش..

في الرياض..
وفي الحديقه بعد ما نزلو الشباب اغراضهم ..
نوري : ــ ها شباب .. جاهزين..
السيد توه واصل ليهم جايب آخر غرض :
ــ ويش بتسوو؟
محسن : ــ بنلعب كوره قبل لا تغيب الشمس و نتعشى..
حبيب : ــ اوووكيييه

وزعو روحهم فريقين...
شقة نوري وعددهم 5 و شقة حبيب وعددهم 7
حبيب : ــ اوكي انا باروح لفريق نوري ... حق نتساوى... يللا مين بيكونو الحراس.؟؟ لو نسوي قرعه..
صادق وبعفويه وبدون قصد :
ــ لويه تسوو قرعه.. كاظم في فريقنا و مصطفى في فريقكم..
كاظم وبقهر:
ــ لاااا والله... على كيفك هو.. ليش يعني
صادق يرد على كاظم بنفس النبره..:
ــ انت تدخن و الركيض ما ينفع لك.. و مصطفى....
سكت وارتبك وماعرف يكمل كلامه..

مصطفى صار يطالع في صادق .. وفاهم مقصده..
يوسف يطالع في مصطفى وحاس عليه من عيونه ان اسلوب صادق واقتراحه احرجه و جرحه..
نوري يدافع و بثقه :
ــ اقوول لا يغرك مصطفى .. ترى سريع وخفيف و هداف بعد..
صادق ابتسم و بأرتباك :
ــ لا .. مو قصدي..
مصطفى تنحى على جنب وبهدوء:
ــ انا باصير حارس..واللي فيه خير يدخل الكوره شباكي
صادق مو عارف ويش يقول...
حبيب : ــ ياجماعه انا باصير الحارس مافيني شدة ركيض انا ووراي شواي تالي بيتقطع ظهري..
السيد يتأمل حبيب مع انه في البدايه سأل مين بيصير حارس..
بس على شان يحل الموضوع و سوء الفهم اللي صار فيه تنازل و حط روحه حارس مع انه لعيب و يحب الجري ...
وهمس ليوسف :
ــ هذا هو حبيب..
ابتسم يوسف وفهم على السيد وفي باله:
ــ يوم عن يوم احب هالحبيب اكثر و اكثر..

وتوزعو فريقين وبدى اللعب.. وبين ماهم يلعبو..
على بُعد كان يراقبهم الرجال مع شلته...وناويين على الشباب بنيه شينه ...
وبين ما خلو واحد منهم يراقبهم وهم يلعبو كوره لا ينبتهو للبقيه ويش يسوو..
توجهو البقيه لسيارة مراد... واحد بغرشة كوكا .. فتحها بمفتاحه واخذ الغطا المعدني معاه ودار بهم على سيارة مراد شمخها تشميخ...
و صب الكوكا فوقها غسلها تغسيل..
وبنفس الوقت .. ثنين منهم ينسمو الكفرات ...
اما الرئيس ( الرجال الثلاثيني ) توجه الى بقاله قريبه وشرى منها العاب ناريه ...



ام مجتبى ونور رجعو البيت.. ابو مجتبى يبغى له يوم راحه عالأقل في المستشفى لأن السكر عنده ارتفع بعد العمليه..
فتحت ام مجتبى الباب و الضيقه تملى قلبها:
ــ دخيلك يــــــاعلي..
دخلت الصاله .. الا بطلعة مجتبى من الحمام كان يسبح .. لابس ثوب نوم اخوه أحمد .. والفوطه على راسه.. وقاعد يمسح وجهه عن الماي ... وعلى طول في وجهها هي ونور ..
من شافته ام مجتبى صرخت .. ونور عاونتها عالصريخ..
ام مجتبى تغطت و خلاص حست نفسها مهي بالدنيا:
ــ منهوو انت .. ووين اهل البيت.. .. امااااني .. اميررر
نور بتطلع بتستنجد بالجيران..
اماني طلعت من غرفة امير كانت ترتبها على صوت الصريخ ومسكت نور بالسرعه وبالقوه:
ــ هذاا اخوووش...

مجبتى شال الفوطه من على وجهه:
ــ اماااه.. اماااه انا مجتبى..
ام مجتبى تحس نفسها مهي قادره توقف .. مسكت الجدار بأيدها... الصوت فعلا صوت ولدها..
فتحت وجهها وصارت تطالع فيه..
عيون مجتبى غرقانه دموع و ملامحه اللي اكلها الحريق يملاها الأسى...
ام مجتبى مدت كف ايدها الثانيه وصارت تتحسس وجه مجتبى بهدوء .. ودموعها تنساب .. وبصوت بح وتلاشي نسبيا من الصدمه:
ــ آآآآه ياولدي.... ويلي عليك ياولدي .. هذا انت امي. !!؟؟ . آآآآه..
وبدت نوبة صياح ..
نور واقفه مهي عارفه ويش تسوي ودموعه تنحدر بعفويه اماني صارت تحاول تمسك نفسها..
مجتبى يحاول يبتسم.. مسك كف امه وباسها..
ارتفعت كف امه وصارت تمسح على راسه...
حضنها الى صدره .. ضمته :
ــ آآه.. الحمدلله يوم ردك لينا سالم ياولدي.. لا خلا ولا عدم..
مجتبى يمسح ظهر امه ويهدي فيها:
ــ لا تصيحي اماه الحمدلله كلها حروق بسيطه و تشفى مع الوقت و تتعالج..
ــ منى عيني اشوفك و المك في حضني .. الحمدلله اللي رجعك لينا..
ــ وين ابوي ؟؟ اماني تقول راح وياكم على شان السكر ويش فيكم راجعين بدونه..؟؟ فيه شي ,.؟؟
اماني : ــ ويش عمه .. طمنينا .؟؟. طولتو من الصبح روحتكم...
ام مجتبى مهي عارفه تتكلم تحس نفسها مره تعبانه..
قعدها مجتبى وشال عباتها من عليها . وتوقل قدامها يبغاها تتكلم تقول له ويش فيه ابوه..
. اماني تداركتها بكاس الماي ...
ام مجتبى بعد ماشربت الماي وبصوت بالكاد ينسمع :
ــ سوو له عمليه..
مجتبى بأنفعال:
ــ هااا.. عملية ويه؟؟
ام مجتبى رفعت ملفعها غطت وجهها وصارت تهتز وهي تصيح بألم ..
مجتبى خاف ,,, مسك كتوف امه :
ــ اماه .. ويش صاير ..؟؟
اماني: ــ نور ويش فيه عمي..؟؟
نور وهي تشاهق :
ــ قالو فيه غرغرينا و قصو اصابيع رجوله وارتفع عليه السكر والحين .. مرقد..
مجتبى فقد توازنه وقعد قعود...
اماني حطت ايدها على صدرها وبهمس مذعور :
ــ ياعلي .. يـــا علي..

امير طلع من غرفته.. يتأمل حالهم .. الكل يصيح ومذهول ... صار هو الآخر .. يصيح.. صياح مرتعب.. خايف ..
يجهل اللي صاير ..!!
صار يون أنات متكسره و اعتلى صريخ..
صارت نور تهدي فيه...
لأنه ان زاد خلاص بيهيج عليهم وبيكسر الدنيا..
ضمت اياديه و مسكته تحاول تقعده ..
وبالموت قعد عالأرض .. حطت راسه على صدرها..
هو يون و مو عارف ويش كاين حواليه..!!؟؟
وهي مع ونينه تصيح ودموعها شلال..


خلصت وداد تنظيف بشرتها وخلاص بترجع البيت..
وهي قايمه مرت جهة حمام الزيت اللي كبه ولدها وما انمسح عدل..
وتتزحلق .. وطرااخ تنشدخ على ظهرها..
وكان في المحل زبونه ..
هي والفلبينيه فيهم ضحكه بس يحاولو يداروها ...
الفلبينه تطالع في وداد بنظرات شماته..
ازدهار تحاول تشيلها .. وكلما شالتها عودت وداد وزلقت وتصرخ:
ــ وطاعووون..
كان جوتي وداد املس ... وفوق هذا الأرض سراميك ومزيته ..
ازدهار جتها الضحكه ماقدرت وصارت تضحك وهي تحاول تشيل وداد..
علاء استحلى الموقف وصار هو الآخر يضحك..
الفلبينيه والزبونه بغوها فرصه ففرطو ضحك..
وداد :
ــ حسبي الله عليكم.. اضحكو..
ازدهار نادت الشغاله من شقتها تمسح الزيت عدل.. ... بين شقتها والمحل باب...
وداد بتدفع القيمه ..
ازدهار وبأبتسامه تحاول توقف ضحكها بها:
ــ مايحتاج غناتي مايحتاج
وداد بحمق :
ــ اني ما جيتش ببلاش ..
ــ بل بسم الله على عمري... انا لله هههه ويش فيش محمقه.. اعتبريه ثمن شدختش واهمالنا في تنظيف الأرضيه..
ــ تسخررري هااا
ــ ههههههههه باسطرش زين.. فارقي .. لا تقولي بعد اركب وياش الحين رجعتش البيت..
ــ اكييييييد
ــ غربلش الله .. امشي قدامي..

وبين ماهم في السياره..
ازدهار :
ــ خلاص غناتي .. ابغاش تكلمي اخوش وتسأليه مايعرف احد يبيع معدات تجميل بالعاده الأستديوات يتعاملو وياه واغلب الأستديوات تبعهم كوافير ... فيمكن اذا ما يعرف هو يفيدوني زباينه...
وداد : ــ وحق ويه ماتكلميه انتين..
ازدهار بأستغراب: ــ عندي اخته اكلمه مباشره حق ويه؟؟!!
ــ حاله حال أي عميل تتعاملي وياه.. مالي شغل اني ...
ــ ياعلي عليش صدق نحوووسه اني مابغاه لتصوير حلاتي اكلمه على شان شي مو تخصصه.... اف ما نستفيد يعني منش بشي .. خلاص لا تسألي ولا تسألي ..

[Princess]

اذن اذان المغرب .. ووقفو الشباب عن لعب الكوره...



مهلو شوي ربع ساعه هيك على ما يجي وقت الصلاه عدل..

وتوجهو لمغاسل قريبه منهم حق يتمسحو...

شفيق كان يبغى الحمام... بس مو داري وين يكون..

صادق كذلك...

صادق سأل :

ــ شباب .. ما احد يدري وين الحمام...؟؟

مراد كان جاي هالحديقه من قبل فدلاه عليه وكان بعيد شوي عن المكان اللي هم فيه..

صادق :

ــ احد بيروح وياي ؟؟؟

شفيق :

ــ انا باروح..

ومشو للحمام..



من بعيد الرجال الثلاثيني ويا ربعه يراقبو..

ــ تركي .. نواف .. لحقو هالأثنين اللي مشو و تصرفو معهم...



شفيق و صادق يمشو .. وهدووء كأن كل واحد فيهم يمشي لحاله..

و تركي ونواف وراهم ..

شفيق وصادق عادي الوضع ما عطو خبر للي وراهم يمشو متوقعينهم زيهم يبغو الحمام ووقت الصلاه دخل ...

وصلو الحمام.. وكانت الحديقه شبه فاضيه.. يوم بوسط الأسبوع.. فما فيه عوايل ..

الحمام كان فاضي ..

دخلو شفيق و صادق .. ودخلو وراهم تركي ونواف..

صار شفيق يعاين الحمامات وهو متنرفز .. ولما حصل انظف حمام اكتشف ان مافيه قفل ..

صادق :

ــ ادخل انت اول وبنتظرك

دخل شفيق ...

ووقف صادق ... في هالوقت تركي ونواف يحومو في الحمام.. بطريقه تجيب الريبه.. فلا هم يعاينو الحمامات ولا ناويين يدخلو.. ولا يبغو المغاسل .. وكأنهم ناويين على شي ..

صادق يراقبهم على جنب شويه وشويات يغض النظر..

صادق يطق الباب بهدواه على شفيق :

ــ ماخلصت.؟؟

شفيق داخل الحمام متنرفز : ــ لا بعدني..

ولا يسمع صادق وراه وقريب من اذونه الا همس واحد :

ــ ليه تعجله.. خليه على راحته..

طفر صادق والتفت وراه لقى واحد منهم وكان نواف .. لاصق وجهه عدل قريب من صادق بأبتسامه تخوف و نظرات تخوف اكثر واكثر .. هف وجه صادق وكان شعر صادق ناعم فطار من على جبهته..

تركي و بلهجه تثير الرعب والشكوك:

ــ ياعيني حرير حرير..

صادق يرجع على ورى كان نواف بحجم اطول منه واعرض .. يمديه يكسره..

تسند صادق على جدار الحمام ويحاول يجمع شجاعته:

ــ ويش تبغى؟

نواف بهدوء و ابتسامه جانبيه...

ــ آآه... شرقاوي بعد...وش ابي... وش ابي ياحلووو منك وش ابي ..

و يمسك نظارة صادق ويشيلها ويعلقها على قميصه (( قميص صادق )) .. ويمسك خصلات شعره ويباعدها عن جبهته..

صادق خلاص ارتعب منه .. دفه بالقوه وطيحه عالأرض .. وانحاش يركض ...

تركي يبغى يلحقه.. نواف :

ــ تعااال خليه...

و اشر براسه على الحمام..

ــ في واحد هنا..

شفيق حس السالفه برى فيها إن ...!!



بالسرعه خلص .. مامداه بيفتح باب الحمام بيطلع.. الا يلاقي الباب انفتح.. ويصقع بالجدار..

شفيق انصرع و شهق شهقه..

تركي : ــ تؤتؤتؤ .. رعبناك.. بسم الله عليك.. تعال حبيبي تعال.. وش فيك خايف ..

شفيق : ــ ويش تبغى.. تباعد..

ويحاول شفيق يطلع من الحمام الا ان تركي كان يجاكره ويسد عليه الباب..

شفيق صار يضرب فيه.. تركي صار يضحك عليه.. تباعد عنه شوي طلع شفيق يركض الا نواف قدامه وكان جثه اعظم من تركي ..

وحاوطوه لين رجع ودخل الحمام مره ثانيه و حكروه في الزاويه..



صادق يركض ركض لين وصل للشباب وكانو ينتظروهم حق يصلو جماعه....

من شافو شكل صادق مرعوب و بدون شفيق..

حبيب صرخ:

ــ ويش صاير ؟؟

السيد : ــ وين شفيق..!!!

صادق مو عارف ويش يقول .. ينافخ.. و الخوف ماكلنه..

ــ شفيق .. في الحمام.. فيه صبيان.. منحرفين.. الحقو عليه..

يوسف :

ــ هااااا

وراح يركض ناحية الحمام.. تبعه مراد .. السيد .. حبيب ...

كاظم صار يطالع في صادق وصرخ فيه:

ــ يـــــــا جباااااااان تركته لحاله و جيت..



نوري ومراد لحقوهم .. ركض ..

ظلو الباقي مع الأغراض .. صادق شابح بعيونه و الرعب قاضي عليه..

وصلو الحمام كلهم ..

تركي ..

ــ بل .. الحق جونا جماعة كثيره.. ..

نواف :

ــ احلف ... اطلع .. اطلع..

وطلعو ركض من الحمام.... الا يصادفو نوري ومراد قدامهم وكانو اثنينهم زيهم في الجثه بنفس مستواهم في القوه وزود .. نوري مسك نواف من كلر ثوبه من ورى وسحبه ودحنه في الأرض.. و مراد فغص تركي وفلته عالأرض..

نوري يمصع شعر نواف:

ــ وش كنت تسوي بالحمام..؟؟؟

مراد وهو فاغص تركي وتركي يصرخ:

ــ هيه اتركني يا ......... ياإبن الـ.......... ذبحتني..



دخلو الحمام يوسف و السيد وحبيب ..

شفيق قاعد بالزاويه ويتنافض ومتكتف بالقوه..

يوسف يحاول يقومه الا ان شفيق ابدا شابح بعيونه ويرتجف ....

كلهم خايفين عليه ..

السيد : ــ بسم الله عليك قوم قوم عن ارض الحمام..

حبيب يحاول يحمله ... بس ابدا مو راضي يتحرك..

يوسف صار يصرخ

: ويش سوو فيك الحمير .. ... شفيق قوم عاد من هالمكان...

شفيق ابدا جمود.. بس ينتفض ..

ثلاثتهم مسكوه وقدرو يشيلوه ويطلعو به من الحمام ووقف وياهم عند المغاسل وحالته حاله .. قميصه مقطعه ازرته.. و وجهه كأنه مسطر من الرعب..

صار يوسف يغسل وجه شفيق ...

حبيب طلع يشوف البهايم اللي سببو المشكله.. وصار يصرخ فيهم..

ــ اتصل عالشرطه ليكم ياحمير يتصرفو وياكم...

تركي :

ــ لا تكفى اللي سووه فينا ربعك مو قليل .. اذبحونا..

حبيب بصرخه

ــ تستاهلو يالمعفنين.. ليش قليل اللي سويتوه في هالفقير المسكين.. بالسرعه لا اشوفكم قدامي لا اتصل عالشرطه..

قامو تركي ونواف ركض و تركو المكان..



حبيب اتصل على كاظم:

ــ كاظم .. انت واللي وياك بالسرعه لمو الأغراض للسياره بنرجع الشقه شفيق حالته حاله..

كاظم : ــ اوكي ..

سكر كاظم الجوال وصار يكلم هاني ومحسن ويضرب ضربات لصادق:

ــ قومو بس نلم عفشنا.. المسكين شفيق جت له صدمه من اللي شافهم ومن اللي تركه لحاله و هرب ...

كل واحد شال حاجه.. صادق قريب من كاظم اللي همس له بقهر..

ــ شرم شرم << يال العار .. (( سودت وجهنا ))

صادق يبلع في ريقه ويحس وكأن احد طاح فيه بدست..

ومن وصلو لسيارة مراد ..

كاظم فتح عيونه..

محسن: ــ بل مين اللي سوى في السياره كذاااااا

ايمن : ــ خسااااره غاليه عااااد...

مصطفى يلمس المكبوب عليها ويشمه:
ــ ببسي .. كابين عليها ببسي ...

هاني يتحسس الشماميخ:

ــ ببسي امره هين ينمسح.. قول الشماميخ دي شوهوها له... اولاد الحرام..

كاظم : ــ اه.. التواير .. طالعو التواير ... منسمين..

حطو الأغراض داخلها..

كاظم اتصل في حبيب .. حبيب عطاه مشغول ..

التفت كاظم لقاهم جايين ناحيتهم..

مراد ونوري ماسكين شفيق وحالته حاله..

حبيب : ــ ها لميتو الأغراض .. بنصلي في الشقه.. ماتسوى علينا هالطلعه..

السيد: ــ اه.. اه اه.. ويش فيها السياره..

مراد فتح عيونه: ــ ويشووو داااا ...!!!!

مصطفى: ــ ببسي .. سبحوها بببسي .. وشمخوها..

مراد يحاول يخفف عن روحه الموقف .. وبضحكه ساخره وبارده وبهدوء:

ــ كل شي .. كل شي يتصلح.. اركبو الحين خلنا نرجع وبعدين اوديها

هاني :

ــ ياخوك الكفرات مفششه يبغى ليها نفخ...

مراد : ــ يــــــالله بعد...!!! اركبو واقرب ورشه نوقف وانفخهم...

حبيب :

ــ ما تتضرر لكن ..؟؟

مراد بأبتسامه:

ــ تفداكم .. خلنا نرجع البيت سالمين..

[Princess]

ركبو السياره .. ومامداه مراد يدق سلف ويشغلها.. الا يسمع تحت السياره صورت متفجرات..

طاااخ ... طاااخ طاخ...

الكل صرخ داخل السياره ومن على بعد الرجال وربعه مدحنين ضحك... وبس شغلتهم يشغلو الألعاب الناريه و يفلتو تحت السياره وتتفجر ويطلع الدخان..

التفجير يزيد ... نزلو يركضو .. طل مراد تحت السياره شاف اثار الألعاب الناريه .. مسك وحده في ايده وبقهر فلتها.. وصرخ:

ــ اطلع ياحيوااان ...

هدووء ما حد حوله...

الرجال الثلاثيني و الثلاثه اللي بقو وياه فيهم ضحكه ويحاولو يبلعوها لا يصيدهم..

ــ ياجبان اذا في امك خير اطلع..

ابدا لا حياة لمن تنادي..

حبيب نزل لمراد:

ــ اخزي بليس اخوك وخلهم يولو اكيد هذيلا تبع اللي اذوا شفيق..

صادق يسمعهم وفي باله:

ــ اذو شفيق بس.. وبيرجعو على شان شفيق وبس .. .. واما انا لا.. جبان وهربت وكل اللوم علي..

ركب مراد السياره... وصار يمشي شوي شوي لين يوصل لورشه..

شفيق مسند على كتف يوسف و عيونه مابين غافيه و صاحيه .. ولسا يرتجف..

ولا يسمعه الا يهمس بصوت مبحوح ومتقطع...:

ــ اماااه..... اماااه

غبنه جت ليوسف .. حس بغصه .. خصوصا انه بعد فاقد امه... وحاس بأحساس شفيق عدل.. غير انه عارف سالفة امه والضيم اللي جرى عليها..

لَم شفيق بين ذراعه وصار يواسيه و يهديه..

وصلو ورشه ووقفو عندها ينفخو الكفرات... وصار مراد يسألهم وين ممكن يصبغ السياره و يزيل هالشماميخ...!؟

يوسف يتأمل في مراد ويتذكر مواقفه لما عاون نوري على المعتدين و لما دارى قهره على سيارته لأجلهم ولما تحملهم جميعا فيها برحابة صدر...

ابتسم:

ــ والله وتغيرت يامراد ويوم عن يوم تكبر في عيني.. عساك دوم

دخل مراد البقاله وطلع شاري عصير بارد وزع عليهم:

ــ اشربو عن الروعه..

صادق :

ــ مابغى انا...

حبيب :

ــ انت اهم واحد.. ها اعطو شفيق..

يوسف :

ــ شفيق .. شفيق ... نمت؟

شفيق بهدوء :

ــ لا..

يوسف يفتح العصير :

ــ هدي بالك واشرب ..

شفيق :

ــ مابغى...

يوسف :

ــ لااا لازم تشرب ..

شفيق .. يدف غرشة العصير بأنفعال:

ــ قلت لك مابغى..

وانكب منها شوي على ثياب يوسف ..

يوسف بعفويه من البروده شهق شهقه..

شفيق شال راسه من على كتف يوسف .. ومسك طرف قميصه وصار يمسح العصير عن بنطلون يوسف .. وبهمس متقطع..

ــ آآسف .. آآسف

يوسف سكر الغرشه وحطها على جنب ومسك ايد شفيق يوقفها عن المسح.. :

ــ ماصار شي اخوك..

هاني جته غبنه من شكل شفيق مثل الطفل المفزوع خايف ومرتبك مو عارف ويش يسوي وعلى نياته..

محسن يراقب وجه هاني ويهمس في اذون نوري :

ــ طالع وجه هانيو.. بنوته عدله خخخخ.. تفاعل وشويه يصيح

نوري يدف راس محسن ويهمس له :

ــ نحاستك مسكين شفيق لو تشوف حالته وهو في الحمام كيف صايره كان صحت..

على الماسنجر .. ريماس تكلم غاده اللي ترد عليها كل عشر دقايق بكلمه لأنها كانت تسولف مع حسام..

ريماس : ــ غادوه ووجع فرحانه بعمرش يوم قال لش صوتش حليو وسولف وياش كم سولافه خسرتيني ربع ساعه بالجوال يادفشه والحين ماتردي علي .. غادوه وحريقه

غاده : ــ هاا ويش فيش..

ــ اعطيه رقمش وفكينا يالطرمه..

ــ نسيتي؟؟؟ .. ماعندي جوال...

ــ ادري بيتكم ياغبيه..

ــ مجنونه اعطيه بيتنا فرضا رد ابوي لو واحد من اخواني تبغي انذبح..

ــ وليش هو غبي حق اذا ردو يسألهم عنش .. بيسكت الا اذا رديتي انتين بيتكلم..

ــ ولو .. ماني مايندرى.. يمكن يغلط بين صوتي وصوت وحده من خواتي..

ــ بهيمه انتين فارقي .. تبغي تكلميه على جوالي يا يتصل هو يا تشحني لي اذا بتتصلي ..

ــ زين يا بخيله..

ــ الحين اني صرت بخيله.. نسينا ما كَلينا..

ــ لالا .. امزح وياش افا عليش بس..

ــ ايه حسبالي .. على طاري الأرقام.. ودي برقم وحده بس ماني عارفه اوصل له .. عندش اياه لو لا؟؟

ــ منهي؟؟

ــ ماريا ...

الا بحسام يكلم غاده:

ــ عيوني.. حياتي.. عمري .. وينش .. ليش سكتي؟؟

غاده تترك صفحة ريماس وترجع لحسام تسولف وياه:

ــ هلا .. هنا.. اكلم ريماس..

ريماس تهز المحادثه:

ــ غادوه يالعله .. عطيني الرقم وباقوم..

غاده:
ــ ماعندها جوال هي بعد..

ــ بيتهم زين..

ــ لويه تبغيه؟

ــ معجبه فيها اولا.. وثانيا.. هي دافورة و تنفعني وتساعدني لو بغيت حاجه..

وتسكت غاده عن ريماس وترجع تكلم حسام

ريماس بقهر:

ــ بتعطيني وياه لو اخلي حسام يقاطعش ولا يكلمش ولا اخليش تتصلي عليه و اقول له يحذفش من الماسنجر..

غاده : ــ بل بل يمه منش .. زين اخذي.

وكتبت رقم بيت ماريا لريماس..

ريماس تسجله عندها وبأبتسامه خبيثه:

ــ جاش الموت ياماريو..

[Princess]

وداد واقفه قدام المرايا تطالع في بشرتها:

ــ ممممم نظفت شوي.. بس مو بصفاية بشرة دفشو ماريو.. من الروب يعني عفر.. اقوم اشوف الفلاجه فيها روب لو لا..

طلعت تدور مالقت .. راحت غرفة ولادها تطل عليهم لقت فرات تاكل روب ..

وداد :

ــ لا تاكليه كله..

فرات بأستغراب :

ــ لويه؟؟؟

ــ ابغى منه شوي ..

ــ علاء قال يبغى قلت بعطيه منه..

ــ مايحتاج.. باسوي له حليب..

فرات مستغربه من امها... ويش عندها تبغى نص الروب..

خذته وطلعت به...

ماريا كانت ماره عليهم صدفه فسمعتها ..

وداد من شافت ماريا قدامها ارتبكت.. دخلت غرفتهم على طول وسكرت الباب..

ماريا بأبتسامه ساخره:

ــ اما اني روب منتهيه مدته قلعت فيني الدنيا وولادي وولادي .. وهي تاخذه من ايد ولادها يصقع شيفتش من مرأه.. لوعتي شبدي ..

وداد قدام المرايا.. وتدعبس في هالروب على وجهها..

ــ وييي باااارد... اففف حامض ريحته..

ما اخذ 10 دقايق ويبس ..

الحين تبغى تطلع تغسله ..

فتحت باب الغرفه شوي شوي .. لقت ماريا في الصاله قاعده تطالع تلفزيون..

سكرت الباب:

ــ افففففف شلون اطلع الحين ودي برى ويش يفكني من تفكيرها اذا شافتني..

ردت فتحت الباب .. التفت ماريا لقت وداد حاطه على راسها الفوطه وتركض ودخلت الحمام..

ماريا تضحك:

ــ هالغيوره تفكرني ما دريت بها..

غسلته وصارت تطالع في روحها:

ــ الحين سوينا تقشير و تنظيف و حطينا روب .. هالحبوب دي بس لو تروح.. كان في ماريو زيهم بس مادري ويش سوت حق راحو ماتوقع روب وبس .. اسألها يعني.. ماني سائلتنها... مممممم يبغى لي ادخل غرفتها في يوم واشوف كريماتها ويش تستخدم..

طلعت من الحمام الا بقومة ماريا وهي شالقه ليها البوز بأبتسامه عريضه وتضرب ضربات :

ــ حسبالي بتسبحي ابادخل اني اجل اسبح..

حملت فوطتها وروب الحمام ودخلت تسبح..

وداد و بوزها مشلوق شبرين ونص:

ــ ايووااا نشوف الحين الكريمات..

دخلت الغرفه لقت كريمات وايد.. رفعت واحد شكله عجبها و لا كلمه عليه عربيه.. صارت تقلب فيه...

فتحته شمته حست ريحته شوي غريبه وفي بالها:

ــ مممممم والله شكله من النوع الغالي ما يندرى هالمصفعه من وين ليها خبره بهالحوايج...

حطت في ايدها شوي و صارت تفرك في وجهها وطلعت من الغرفه تركض .. وفي بالها:

ــ نشوف النتايج واذا تمام اخذ لي زيه..

في امريكا الوقت اول الفجر ..

مارك نايم ..

ستيف كان اقرب واحد لسام في مكان النومه..

ستيف يحس على سام انه صاحي بهمس يسأله :

ــ سام.. هل استيقظت ...؟؟
ــ ممم .. ماذا هناك.؟؟

ستيف بأرتباك ومو عارف ويش يقول:

ــ انتبه لنفسك..

ــ ههه مابك .. ما مناسبة هذه الوصايه؟

ــ لا ادري فقط انني بدأت اقلق عليك مؤخرا .. اصبحت كثير التغيب عن المهجع وكما تعرف الشرطه يبحثون عن أي فرد من افراد العصابه في كل مكان من بعد عملية السطو الأخيره تلك..

ــ لا تقلق فأنا غير معروف لديهم وهذا ما جعل جون يوكلني بأكثر المهمات صعوبه..

ستيف مو عارف ويش يقول:

ــ الخوف ليس من الشرطة فحسب ..

ــ ماذا تقصد...؟؟

ستيف بتردد:

ــ لا ادري .. يخالجني شعور ان هنالك احد ما يتربص بك الأذى .. كن حذرا فقط..

ــ دع عنك هذه الخيالات .. و اخلد للنوم..

ــ حسنا فقط تذكر كلامي دائما ارجوك..

سام بأبتسامه:

ــ شكرا لأهتمامك بي .. اقدر لك ذلك..

ستيف في باله:

ــ ليتني استطيع ان احذرك من مارك مباشره.. ولكنني احاول ان اثق به ولا ازيد العلاقة سوءا بينكما...

قام سام يتمسح لصلاة الفجر .. من قعدته ويا قيصر يحس نفسه تذكر اشياء كان ملتزم يسويها و تركها من فارقته الذاكره و عاشر هالقوم..

ستيف مستغرب منه اول مره يصيده هالوقت ويشوفه يصلي..

وفي باله:

ــ عربي هو .. ومسلم بلا شك.. تلك صلاتهم..ولكن لما للتو اراه يفعل ذلك !! ممم بالعاده انا نائم في هذا الوقت

وبأبتسامه ينقلب الجهه الثانيه بيكمل نومه ..:

ــ دعه يفعل مايحلو له .. المهم ان يكون بعيدا عن انظارك يامارك..

قصير في العياده منسدح في السطح ينتظر وقت الصلاه ويتأمل السما.:
ــ إييييه يادنيا .. لو على مودي أريد ارجع لك ياعراق .. و احضن ترابــك ..

الأذان يشتت السكون في ذاك الحي العربي ..

وبالصلاة على محمد وآل محمد.. بعد ما فرغ قيصر من صلاته.. قعد على مكتبه وصار يكتب يكتب لأخته رساله..:

ولك خيتي زكيه... شحالــچ شعامله فيـچ الدنيا... مابيننا الا المكاتيب كل كم شهر مكتوب .. اسمحي لي يابه على قد الحال بيجيچ السؤال ... كُل إشي هنانه غالي وما ودي تكلفين على روحــچ بالمكالمات.. واحشتني هواي .. شحال الصغار .. و زوجـــچ ،، ماعندي الــچ أي خبر جديد غير اني يوم عن يوم تتزايد في قلبي نيران الأشواق..

الغربه صعبه.. نار ياخيه .. بس شنو بمقدور الواحد يسويه غير الصبر ... دعواتش ياخيه ..

دخيلـچ ادعي لي..

وداد في غرفتها حاطه ثلج على وجهها و حالتها حاله من استخدمت كريم ماريا لهبها لهاب وتحس كأنه انتفخ وفعلا صار احمر والحاله حاله..

ــ ويلي ويش هالكريم اللي حطيته ..ماتوقع من الروب ....

الا بدخلة حسن عليها الغرفه ..

يطالع فيها وهو مستغرب:

ــ داااويش اللي في وجهشش...

وداد وهي شوي وبتصيح:

ــ ويش فيه..

ــ ويش مافيه.. ويش مسووويه..

ــ اهئ .. اهئ.. تنظيف بشره..

ــ ويش حاطه ؟؟

ــ من عند ماريا اختك كريم..

ــ عطتش اياه وانتين على طول مابغيتيها من الله و تستخدمي ...

ــ لا ماتدري بي ..

ــ يعني من راسش تصرفتي .. اعظم من الجهال .. يحرش ؟

ــ اباموت احسه ملتهب ...

ــ قومي جيبي الكريم اللي استخدمتيه من عندها اباشوفه..

ــ ماني ويش بتقول عني بعدين ..

ــ تقلقلت حنوشش... من غبائش و لقافتش ويش بتقول يعني .. اف منش

وداد وشوي وتصيح:

ــ اف من هالرجل ماعنده غير الدعاوي والسب

حسن طلع لماريا وطلب منها تعطيه كريمات البشره اللي عندها ..

ماريا مستغربه.:

ــ لويه؟

ــ جيبيهم الحين وبعدين اعلمش

عطته اللي عندها .. ودخل على وداد بهم..

وداد : ــ ولا واحد منهم..

حسن عصب:

ــ بتقومي ليها تجيبي اللي تلقفتي به حق اذا رحنا المستشفى تقولي للدكتوره عنه لو اراويش شغلش الحين..

ــ زين زين .. اباقوم..

دخل حسن مع وداد غرفة ماريا

وماريا مستغربه حدها .. من شافت وجه وداد في بالها:

ــ عفرررر فهمت السالفه...

وداد ترفع العصاره اللي استخدمت منها..

ــ دي ..

حسن يمسكها ويقلبها بيقرأ المكتوب ..

ــ دي ويش ..

ماريا بهدوء وبرود:

ــ كريم شعر حق الحمايه من الأستشوار ..

وداد فتحت عواينها :

ــ هاااا...

حسن حمق فيها وصار يصرخ:

ــ ولا ماتعرفي تقري انجليزي .. هير كريم ويش كبرها .. بتجلطيني انتين.. ومين آمرش تستخدميه...

ماريا :

ــ مو لهالدرجه لكن لو حطته مابيسوي كذا في بشرتها.. مسويه شي من قبل في الكوافير روحتش ويا ازدهار..

حسن:

ــ ازدهار ؟ كوافير ؟ طلعتي من البيت العصر يعني بدون ماتقولي لي .. مين وداش .. وكيف تطلعي بدون اذن..

شب حسن حريقه,,

وداد تطالع في ماريا وودها تدوس في بطنها من القهر:

ــ رحت كوافير ازدهار مر علي سواقها

حسن بصرخه:

ــ وركبتي لحااااالش؟؟

وداد برعب : ــ لاااااااا هي وياه ومرو علي ..

ــ ويش سويتي هناك وصار وجهش كذا..

وداد متبلعمه : ــ تق تق تقشير وتنظيف بشره..

ماريا :

ــ ايوااا فالمسام لسا مفتوحه وقمتي عبيتيها بكريم الشعر على شان هيك التهبت واني اقول مو لهالدرجه بيلتهب ..

حسن شدخ العلبه على الطاوله وصرخ فيها:

ــ تستاهلي ماجاش حق تتلقفي مره ثانيه.. الليله نامي وبكره اوديش المستشفى..

وداد وعيونها غرقانه دموع و بصوت متقطع:

ــ ان شالله..

وفي بالها:

ــ ويش ينومني الليله ووجهي يحترق حراق..

طلعتها من الغرفه .. ماريا:

ــ مرت اخوي دهني وجهش بفازلين قبل لا تنامي حق يبرد عليش..

عطت وداد ماريا نظره و طلعت من الغرفه

ماريا ميته ضحك:

ــ ماحد قال لش تتلقفي ..

وبين ماوداد تدهن وجهها بفازلين..

وحسن في الحمام يسبح..

دق جوال حسن..

وكانت المتصله.......

الى الملتقى..

[حلم لطيف]

ياسلام على البارتات تجنن بصراحة
وأحداثها فضيعة
يعطيش العافية يارب
وننتظر ليلة الأربعاء بسرعة للتكملة

موفقة لكل خير

[الفراش الفاطمي]

وااااااااااااو روعه اموره
ويش اعبر ويش اقوول
ماشاء الله عليش
البارت يجنن يهبل روعه ماادري ويش اقول
بصراحه تاثرت وايد بامير
وزي ماقالو عندش قدره تفسري المواقف عدل
لدرجه تخلينا نتاثر عدل والي مايتاثر ماعنده احساس
بصراحه دموعي على خدي هو من الفرح عشان البارت وطوله
ولا من الحزن على ام مجتبى وموقفها ويا ولدها
والله لو اقعد من اليوم لبكره واني اشكرش مابوفي جزء من عطاءش لينا
وبصراحه اكثر رواياتش رووعه بمعنى الكلمه تدري ان روايتش ماعرفتوني كثر ماعرفني
هذي عاشر مره اقراها حفظتها وبعدني اقراها ولا امل منها <<< كنش طلعتي برا الموضوع
اما دا البارت ودادوه وغادوه بس دليني بيتهم باروح اطيح فيهم دست
وماريا الله يستر عليها من ريماسوو شكلها هي المتصله
وبعد عبد الستار ماسمعنا صوته في ده البارت
واما طيحت ودادوه فطست عليها من الضحك ودي اقول ليها الله مايضرب بعصا <<<< اموره وصلي ليها الكلام خخ
ووجها مسكينه يوم يحترق خوش حرق عشان يصير وجهها علامه الجوده خخ
وبــــــــس اتمنى اكون مانسيت شي <<<< عورت راسش صح ؟؟
بانتظارش ليله الاربعاء
تحياتيـ ..

[أحبك ياغلا عمري]

يسلموووووووو
ننتظر الجزء الجديد

[أمل الظهور]

من المتصله بعد


لاتقولي ازدهار خخخ


يمكن اخته اماني!!


شفيق مسكين ,,مراد صار خوش رجال ,,صادقوه الجبان يابيصير تمام يا بيزيد عليهم بلعانته


وهالثلاثيني صاقعه قولي خمس طعشريني


هههههههههههههههههههههههههههه

ودادوه بردتي قلوبنا فيها بالطيحة والكريم اجل حق شعر ها هههههههههههههههههههه


احداث تجنن وبارتات احلى واحلى

تسلمي برنسيسه

[*زهرة البنفسج*]

وحشتنااا هللروايا يالغلا اموره ,,

::

اللهـ يعطيك الف عافيه ونستينا ابهاا اشويات وتستاهل وداد هللخبله ههههههههه غيوره طلعت

::

ننتظر الجديد

موفقينـ

[* Red Rose *]

بصراحة بارت من جد رائع

وفي انتظار المزيد من ابداعاتش في البارت الجديد

[طفلة تحت المطر]

صرآآحه أمووره بآآرت ...<< موو عآآرفه تعبر عن شعورهآآ من شدة روعة البارت

تعجز الأقلآم عن شكرش

و تجف الأقلام من كتآآبة تعاليق على البارت

ننتظر بآآرت الليله

اسمحي ليي ما حبيت أطلع ومآآ أكتب شي

[دمعة على السطور]

اللهم صل وسلم على محمد وآل محمد وعجل فرجهم وفرجنا بهم ياكريم..



هههههههه غربل الله أبو اللقافة ...كنت حاسة ان الكريم مو حق بشررة >يم احساس


اتوقع المتصلة ازدهاار...


عااد هالوداد كم فشلة حصلت اليوووم......ههههه مافي على الزحلقة كان الوصف خيااالييي


مابتشمت على قولة المثل من عاب استعاب والعيب واقف على الباب>كل هذا ومابتتشمتي





ياعلييي عور قلبي صادق ....الكل مهتم في شفيق وكأن صادق سوى جريمة مسكين...

يمكن هو من النااس اللي ماتعرف تتصرف وقت العركة ..مو لازم جبان >محامية ...


اي نعم شفيق حالة خاص ولازم الكل يهتم فيه ...بس بعد لازم يقدروا شعور الكل....



مراد ماشاء الله عليه ...... طلع رجااااااااال..........والرجال قليلُ ....


ويوسف طبعاً غني عن الوصف ....



حبيب حبوووب حده.....ويخاف تُخلق مشاكل بين الاصحاب...



سام عجبني انه قام وصلى ....الله يهديه ياارب...




أمووور الحبوبة ...


ولك شو هالباراتات اللي بتجنن...يخزي العين ....


لامن جد ابداع وماتحتاجي لشهادتي......تحرسك عين الله ..




سلمت راحة الأيدي....

وسلم قلبك...



لازلتُ انتظر...


دعواتي اغمركِ بها...


موفقة لكل خير إن شاء الله تعالى

دمتي بعين المولى الجليل

[جـــــوان]

بصراحة روووووووووووووووووووعة الجزء

بس طيح الله حط البدوان الخايسين
هذه فخرهم يعني عساهم طاعوون يشيلهم

[حلم لطيف]

كلنا شوق للأحداث الجديدة

[دلوعة المنتدى]

بصراحة حدي مستانسة ع اللي صار في ودادوو ,,
باانتظارك يالغلااا