غربة الأوطــــــــــــــــــان...

[Princess]

ماطلع كاظم لشفيق في الصاله الا هو ياكل بريد.. شكله جايبنه وياه .. والعجيب في الموضوع انه ياكله حافي بدون مايحط فيه شي ..
قعدو جميع.. حطو البيض .. توقعو منه يحط له منه في البريد او يشاركهم به.. بس هو ابد مستمر ياكل وحده وحده و لسا .. حافي !!!
لفت نظر حبيب بقعه خضرا في وحده من البريدات..
فتح عيونه : ــ اخوووك.. خله عنك من وينا جايبنه دا؟؟؟
شفيق يقلب فيها : ــ لويه..؟؟
كاظم : ــ اكي معفنه.. ماتشوف العفن ؟؟؟
شفيق يصدمهم وياكل جهة العفن وببرود :
ــ انا ما احبه الا كذا.. صار له اسبوع في شنطتي يالله خمر
حبيب وهو مذهول : ــ خمر!!!
شفيق : ــ الأكل احلى اذا ظل فتره
كاظم يحس روحه بيرجع ..
حبيب : ــ قصدك اذا قطن.. خلااااص لوعت شبدنا.. بيعورك بطنك..
شفيق حمل كيس بريده وقام عنهم الغرفه..
كاظم مسك بطنه..
ــ مانى مصدق .. هوسي نظافه وياكل عفن....!! وين تصير دي ؟؟؟
حبيب : ــ انا بديت اتوتر منه ماصار له يوم حتى وسوالفه سوالف...

في الشقة اللي تحتهم...
نوري قعد من النوم وصار يسوي تمارين ضغط..
محسن قاعد يجاكر فيه.. كل شوي يحط فوق ظهره كتاب .. على كتاب .. ونوري يسوي روحه قوي و يكمل التمرين..
ومحسن يصفق ويشجع..
ايمن قعد من الأزعاج وطلع ليهم :
ــ افففففف .. مزعجين .. ماتخلو الواحد يرتاح...
محسن يعاند في ايمن ويكمل تشجيع لين ما خلاص نوري رمى الكتب .. و انسدح على ظهره من التعب..
مصطفى في المطبخ يحوس :
ــ اوووه.. ياجماعه.. عفر مافيه غاز.؟..!! مخلص سلندرنا..
محسن : ــ بللللل من اولهااا...؟؟
ايمن : ــ والحل ... ويش هالحاله دي تجو شقه تنسو تبعو الغاز .. مفكرين روحكم في بيوتكم افران كهربا... ؟؟؟
نوري : ــ من حلاة دا فرن عاد... الحين اطلع منها تمرين حمل اثقال.. ومنها اشوف وين الغاز هنا .. ماتبغو شي بعد؟؟؟
مصطفى : ــ لا سلامتك كل شي موجود..

وحمل نوري السنلدر وطلع يشوف وين يعبيه..

في الطابور المدرسي
شهربان : ــ وووووفففف
ماريا : ــ ويش فيش؟؟
ــ قاع رجولي تحكني ..
ــ حكيها...
ــ تسخري كيفا وعلي الجوتي والدلاغ.. شلووون اف اف .. عورو راسنا بهالأذاعه الصباحيه.. لا وبالأنجليزي .. خلنا نفهم اللي في الكتب تالي نفهم هالرطنه..
ــ ههههه احمدي ربش مو كل يوم انجليزي
ــ دخيلش من حلاة الأذاعه بالعربي .. كلها هرار في هرار.. متى بيخلصو بس ..ابغى اقعد شان افصخ الجوتي دخيل الله و احك..

نور حماة اماني اخت ماريا.. كانت صافه مع غادة صديقتها و عضو رابع في الشله المتكونه من شهربان و ماريا بالعلمي و نور و غادة بالأدبي ..
طوابيرهم جيران بعض ..
نور خبيرة بالمدرسات تقعد تراقب الصبح مين جت مين ماجت.. فأنتبهت ان مدرسة الرياضيات تبع صف ماريا و شهربان ما جت لبدايه الطابور فحبت تبشرهم انها غايبه عفر..

صارت نور ترمي قرطاسة علك على شهربان اللي كانت تحرك في رجولها تحاول تخلي الحكه تروح..
ما انتبهت ليها.. ردت خذت نشافه لوتتها رمتها .. ماوصلت ليها...
شالت شباص من شعرها ورميته على شهربان..
الا بالغلط تمر فجأه مدرسة التاريخ (( حصه )) اللي كانت عليهم الحصه الأولى..
شان يصيبها الشباص قريب عيونها..
وتنتبه و تنفعل: ــ شهذااا؟؟؟
نور تصروعت.. خصوصا ان هذي المدرسه مايسموها الا قراقوشه.. << نسبة الى قراقوش وتعني النسر الأسود وهو قائد جيش في عصر صلاح الدين الأيوبي .. يعرف بقوته واستبداده و احكامة الغريبه..

التفتت استاذه حصه الى الموقع اللي جتها منه الشباصه.. وبصوت هادئ والطوابير تمشي ..
ــ جايتكم يا ثالثه ادبي و اعرف مين اللي سوت هالفعل..

غادة : ــ وووووووييييي .. الحين ويش يرقعنا ويا حصيص .. بتبدي الوقعه على بداية الحصه..

شهربان ونور مستغربين مو داريين ويش فيها الأستاذه ولويه محمقه على ثالثه ادبي..
و استاذة الرياضيات للحين ماشرفت ولا بينت .. ليتضح بعدها انها لم تصل ..

دخلو الفصل وهم فرحانين ومسووين هيصه على بالهم انها غايبه.. الا يتفاجأو بأستاذة الكيمياء تدخل عليهم وتعطيهم خبر انها بتبدل وقت الحصص مدرسة الرياضيات بتتأخر كم ساعه... << ويافرحة ماتمت..

بالصف الثالث ادبي ..
استاذة حصه مسويه تحقيق وهي تطالع في نور وغادة و الثنتين اللي كانو صافين وراهم واللي كانو صافين قدامهم.. منطقة الأشتباه :
ــ مين اللي رمت البنس ؟؟<< بنس = شباص الشعر..
نور في بالها : ــ والله دي متفرغه يعني لو احد متعمدنها كان جتها وهي محلها شدرانا انها بتتمشى...
غادة في بالها : ــ ياعلي الله يستر عليش يانورو.. ويش فيها دي متحججه تعديها هالمره..
حصه : ــ بتتكلمون والا انتو الستة راح انقصكم من المشاركه..
وحده من البنات الست : ــ بل استاذه .. يالله على علامه حنا .. ليش كذا..؟؟
حصة : ــ اجل علميني منو اللي رمتها..؟؟
والتفتت لغادة: ــ انتي اللي كنتي بجهة ثالثه علمي .. انتين اللي رميتيه.. او انتي او انتي .. << تقصد اللي ورى غاده وقدامها على طول ..
وحده من هالبنات كانت دافورة وتقتل روحها قتال على العلامه.. مامداها بتتكلم وبتعلم مين اللي رمت الشباص
نور سبقتها وقامت : ــ اني.. اني اللي رميته..
حصه : ــ والله ما استبعد هالشي منك .. وليش بالله..؟؟
ــ ابغى انادي شهربان بالصف اللي جنبنا
ــ وليش شعندكم من الصبح
نور عفست وجهها وسكتت..
حصه: ــ طلعي برى .. لأستاذه رمله .. و لا تجين الا بورقة من عندها..

رملة .. مشرفتهم الطلابيه..من الجماعه.. هادئه و بشوشه .. و اخلاقها حلوه مع البنات.. بالمختصر تعطي وجه بالقوه

راحت ليها نور وقالت ليها السالفه..ولويه رمت الشباص اصلا..
استاذه رمله صارت تضحك عليهم..
وبهدوء : عاذرتنكم اني سنه ثالثه ودكم على آخر السنه بشوية نفس شوية وقت تقضوه ويا بعضكم اكثر قبل التخرج.. بس مره ثانيه غناتي انتبهي لتصرفاتش لا تطيحي في مشاكل .. اووكي..
نور تحب المشرفه وتحترمها وايد... ردت وهي مستحيه : ــ ان شالله استاذه..
كتبت استاذه رمله لنور ورقه طلب من استاذه حصه تدخلها الصف وتسمح ليها هالمره اخر مره..

الساعه 8 السيد قعد من النوم..
حبيب : ــ صباحك جوري فواح.. وماي ورد وتفاح.. صباحك نور انور... و...
كاظم : ــ احسدها هاللي بتاخذها انت .. ياساتر عليك
السيد يضحك : ــ يصبحك بالخير والسرور حجي حبيب...
حبيب يوسع للسيد محل ويضرب بكفه على الأرض :
ــ بل .. غبار.. يبغى لينا ننظف ... تفضل غناتي هنا.. يللا قبل لا تروح لمحاضرتك.. غذي روحك عدل..
كاظم : ــ كح .. كح كح... ايييه لا بالله ما احسدها.. ابحسد السيد..
السيد جته ضحكه وشرق ..
حبيب : ــ خناقه كظموه حسود.. قوم جيب ماي...

يوسف قعد من النوم..
حبيب : ــ هلا وسهلا .. صبحك الله بالخير ابو يعقوب .. تفضل ..
يوسف : ــ زاد الله فضلك .. تسلم
غسل و قعد وياهم يفطرو...
حبيب : ــ الحين ويش ابو يعقوب ..بتروح ويانا الجامعه والا ماعندك شي؟؟
ــ مادري للحين يبغى لي اروح اشوف الوضع و ارتب جدولي ..
السيد : ــ الله يساعدك.. عاد اول يوم يصير دوخه بالعاده.. انا ماعلي الا محاضره وحده ساعتين باخلصها و اذا تبغى شي قبل لا ارجع الشقه اعطيك رقمي تكلمني واساعدك..
حبيب بهدوء : ــ انا باروح ويا السيد جميع بس محاضرتي بعد ساعه من وصولي للجامعه.. عادي اشوف وياك الوضع...
ابتسم يوسف : ـ ماتقصروا ... شدعوه.. ادبر اموري لحالي ..
حبيب يغمز له: ــ اخونا الصغيرون ولووو..

كاظم : ــ الكل الحين قعد.. باقي بس هالمراد... سؤال ... هل قعد صلى الفجر لو لا؟؟ << وجه السؤال ليوسف بحكم انه وياه في نفس الغرفه..
يوسف : ــ للأمانه ماشفته.. يمكن قام لما عودت نمت انا.. يجوز...
كاظم : ــ انا من جى هالمخلوق وهو موعاجبني صراحتن..
السيد مستاء : ــ الله يهديه..

طلعو السيد و حبيب ويوسف بيروحو الجامعه..
السيد يضغط زر الأصنصير,, وهم ينتظروه .. بطيء شوي..
حبيب : ــ اوووه .. خلني اسوي رياضه صباحيه احسن لي
ونزل الدرج ..
يوسف نسى جواله بالشقه فرجع يركض يشوفه والسيد ظل ينتظره على ما يفتح الأصنصير

نوري داخل العماره حامل سلندر الغاز معبأ فوق كتفه.. متوجه للشقه ... شقتهم كانت جنب الدرج للعماره والدرج يقابل باب العماره و الجهه الثانيه باب الأصنصير .....

حبيب يناطط عالدرج مروق حضرته وهو نازل على آخر الدرج لفت نظره نوري اللي كان اولا: غريب على العماره ..
وثانيا : صاير طول بعرض ولابس مزلط وشورت وعضلاته مره بارزين ...
ثالثا : حامل السلندر كنه حامل ياهل خفيف على كتفه..

.. شان يتعثر حبيب على آخر درجه .. وطراااخ يطيح على نوري ويصفق جبهته في السلندر..
نوري شهق شهقه ما توقع يطيح عليه .. فمسك روحه لا ينقلب لو تطيح من كتوفه السلندر وتصير مصيبه .....
حبيب طاح على الأرض : ــ آييييييي ...
الا بطلعة السيد ويوسف من باب الأصنصير ... ويشوفو حبيب مفلوت عالأرض ونوري متوقل والسلندر بعده على كتفه ماشاله.. ويطالع في جبهة حبيب :
ــ سلاااامااات اخوووك...
يوسف والسيد ركيض الى حبيب .. :
السيد : ــ خير ..؟؟ ويش صاير؟؟؟
نوري يقوم بخفه ولا كنه حامل شي ،!!،
ويوسف يطالع فيه بأبتسامه وفي قلبه يسمي عليه ويصلي على محمد وآله..
نوري: ــ مادري اخوك هو نازل وصفق فيني .. جبهته اكي تورمت.. قومه دخله الشقه نعالجه..سلامات اخوك .. آسفين..
والتفت ليوسف : ــ هلاااا خوينا.. شحالك..
يوسف : ــ حياك الله ويش اخباركم من البارحه..
ــ الحمدلله .. تفضلو ويانا افطرو,, الشباب توهم قاعدين ..
السيد : ــ تسلم فيه العافيه.. بنروح الجامعه..
نوري : ــ لا دا المنصمع خله يدخل ويانا نداويه اول تالي روحو..
السيد : ــ نسبقك انا ويوسف .. على ما تداوي روحك و تضبط وضعك...
ومشو عنه..
حبيب يحاول يمسك التورم موقادر :
ــ آآي .. يسلمك.. مني انا اعمي ما شوف ..
نوري اصر عليه يدخل عالأقل يحط له ثلجه عليها و يدلكها له..


في طريقهم للجامعه ... السيد سأل يوسف : ــ يقرب لك ؟؟
يوسف : ــ لا بس معرفه توني من امس في الباص .. وصار يحكي للسيد القصه...