في القطيف


في بيت يوسف .. برى الحوش..
((ايثار)) بنت اخته اماني ... صغيرونه 5 سنين وهدرتها ظريفه .. وهي اللي تسميه يوفف ..
و اخوها الوحيد ((باقر)) اكبر منها بصف ثالث ابتدائي...
وولاد خالهم حسن ..(( محمد))... قد باقر و ((علاء)) عمره سنتين
وبنت ((فرات)) بصف اول ابتدائي ..

محمد متسلق على السور يقبع لوز... وايثار و فرات تحت يصرخو.
.وحده تقول يسار ووحده تقول يمين و محمد بس شدخ بالعصاه يحاول يطيح هاللوز مو قادر..
والشجره في بيت جيرانهم ... ومع صريخ اخته وبنت عمته ... وتعبه وهو رافع ايده ورقبته .. فقد التوازن و ..........طراااخ ....
يطيح من فوق السور في بيت الجيران .. و العجيب انهم ما سمعو صوت شدخته !!
فرات صرخت: ــ اخووووووووي مااااااااات
علاء اخوها مفهي مو فاهم شي بس من شافها تصيح.. مع القوم ياشقرا اشتغل هو الأخر صياح ...
ايثار وقفت مفهيه ... مهي مستوعبه الأمر..!!
باقر طلع يركض بيت الجيران بيشوف ولد خاله ...
باب جيرانهم صدفه كان مفتوح من دف باقر الباب انفتح.. وعلى طول للزراعه لقى محمد منشدخ على جبل رمل كان موجود من حسن حظه.. وغايص فيه من ثقله وقوة الشدخه..

يمسكه ويسحبه بالسرعه ويطلع وياه من بيت جيرانهم .. ويا دار ما دخلش شر...!!؟؟

ليترك اثر جثته الهامده فوق جبل الرمل دليل لجريمته !!

فرات لا زالت في البيت مقلعه الدنيا صياح هي و علاء...
وتطلع ليهم امهم (( وداد )) ..
ــ ويش صااااير ويش فيكم؟؟؟
فرات وهي تشاهق ولا ينفهم ليها ويش تقول: ــ طب .. طب محمد
وداد مختلعه وبعصبيه تلتفت على ايثار : ــ ايثااااروووو ... ويش فيكم؟؟ وين باقروووو ومحمد.؟؟؟
الا باب الطريق ينفتح على مصرعيه ويتراكضو باقر ومحمد ..
وداد فتحت عواينها:
ــ يامجرمين من وين جااااايين؟؟؟
محمد توه بيتكلم .. سحبته امه وشافت شعره مليان رمل والحاله قايمه..
ــ من وييييييييين جاي؟؟؟
محمد يبغى يشرح الموقف بس خايف من امه ويش يقول ليها؟؟ طبيت في بيت الجيران.!!! حق تشدخه فوق شدخته .. قام يكذب:
ــ لا بس العب ويا باقر برى الشارع...
وداد : ــ تلعب وياااه وهالحاله قايمه فيك واخوتك صياح و نياح ..؟؟؟. والله اراويك يا باقروه... مردغت ولدي في القاع ... ويش هالحاله دي..؟؟ هين اراويك انت و امك...

محمد مو عارف متبلعم .. وامه تسحبه للداخل وبيدها الثانيه ماسكه علاء:
ــ بسرعه الحمام وحساب هالملاعين تالي ... فرات قداامي بالسرعه

ظل باقر مع ايثار وفرات في الحوش مفهيين و قلوبهم الصغيره تصافق من وداد المتوحشه اللي ماعطتهم مجال ابدا يدافعو عن نفسهم..
باقر بعصبيه:
ــ محمدووو الجبان الشداب..لو خليته مرمي في بيت الجيران احسن..
ايثار مفهيه وتحس روحها مهي عارفه تقول شي ...
فرات حاسه بأحراج من اخوها ومن نفسها خصوصا ان امها درت من صياحها وصريخها..
انسحبت بهدووء..
ايثار بقهر: ــ جبانه زي اخوش...
وطلعت لسانها تبحلس ...
باقر .. ــ ماعلينا منهم...
ايثار : ــ ولا نبغى نلعب وياهم...
وطغت دمعتها في عيونها:
ــ واذا جى خالي يوفف باعلم عليهم خله لا يلعب وياهم ولا يطلع وياهم البقاله...

وداد داخل البيت هدرتها واصله للجيران... اماني عرفت السالفه .. اكيد شبقه مابين اليهال وهي جايه تحط الحره وتسوي من الحبه قبه.. فظلت ساااكته عنها .. مرت عليها ولا كأنها تشوفها.. وفتحت الباب ونادت على ايثار وباقر ..
وداد بحمق:
ــ ساعدش الله على غرورش . الله يعينش.. ما بيكسر هالخشم الا اخوش .. جيته من العمل يتفاهم وياش .. ويا ولادش خراب الأمم والديار...

اماني صمت ولا كلمه دخلت المجلس وسكرت الباب عليها وعلى ولادها..
قعدت منهاره تحاول تكون قويه حضنتهم وصارت توصيهم وهي متمالكه نفسها..
ــ امي.. خلكم عاقلين مافينا شدة مرت خالكم وخالكم.. بعد لو عندي محل ثاني اريح من هالمحل كان رحنا وعشنا فيه.
ايثار:
ــ اماه خلنا نروح بيت بابا ابو مجتبى..
اماني: ــ امي مافي مكان ولا ابغى يتضايقو مني اعمامش .. وعمش احمد تخرج و رجع البيت.. . اصبرو .. كم شهر ويجي ابوكم بالسلامه وتتحسن الأوضاع..

وتنهدت من قلب:
ــ ردك الله لينا ياولينا سالم من كل شر...


كاظم يصب له شاي وهو يكح كحه مهي طبيعيه...
حبيب :
ـ من هالصاقعه اللي تشفط فيه ليل ونهار... مو زين لك ياخوك .. خل عندك عزيمه واقطعه..
كاظم طالع من المطبخ فوطته على راسه وفي ايده كوب الشاي...
ــ بداية زكام فيني عفر
حبيب : ــ زكام ويه في عز الصيف .. متحجج زيك ماشفت ...
صوت مفتاح في باب الشقه.....
حبيب يهمس:
ــ مايندرى شقيق لو مزاد..
الا بدخلة واحد يهدر:
ــ اوووووو .. تالي تالي .. تالي لا اراقع بك..
حبيب يهمس للشباب:
ــ بل من اولها.. مراقع..
ويسكر الباب ويدف شنطته برجوله وهو مستمر يكلم بالجوال ومنفعل ...
وآخر المكالمه:
ــ فااااااارق زين مانى فاضي الحين...... و اعلى ما في خيلك اركبه..
وقفل الخط..
التفت للجماعه ورفع ايده حدها لفووق :
ــ سلااااااام ..
سيد هادي رافع حاجب وحاجب.,, يوسف يطالع بهدوء..
كاظم مفهي وبعده واقف بكوبة الشاي..
حبيب : ــ ههه عليكم السلام .. ياهلا..
الرجال بأبتسامه عريضه :
ــ المهلي مايولي..
حبيب : ــ ماتعرفنا ...!!؟؟
ــ مراد آل .. خويكم اليديد ان شالله...
حبيب : ــ بل .. خوينا..!!
يوسف يهمس له و يضحك: ــ ههههه لا تفضحنا .. تراها كلمه طبيعيه في بعض القرى,... مثل ... وصار يعدد على حبيب ..
حبيب : ــ خبره ما شالله عليك...
ويكلم مراد:
ــ والنعم... من وين اخوك.؟
مراد : ــ من .,,,............
حبيب ضحك... لأن يوسف عرف و نبهه..
مراد بأستنكار : ــ على ويه تضحك؟
حبيب : ــ ها.. لا ياخوك اسولف ويا خوينا يووسف .. وياك حبيب وهذا سيد هادي وهذا كاظم .. منورنا..
يوسف فيه ضحكه على حبيب مسرع ما لقط له كلمه..
مراد يتوجه لكاظم وياخذ كوبة الشاي من ايده ويشرب له شوي.. يرجع الكوبه:
ــ سكرك زياده ربي يسلمك...
حبيب حاط ايده على خده ويطالع في هالمراد اللي مره فله من اول لقاء ومستنكر منه..
مراد يقعد على الجلسه ..
ــ آآآه تعبان حدي...
يفصخ دلاغه يربطه ويدعسه ورى المخدات ..
يوسف ما قدر ابتسم ودارى ضحكته..
انتبه عليه مراد:
ــ داري داري .. ههههههههه بتقول زي الضبعان.. لا يضيع وتالي اقعد ادور عليه..
الا يرن جواله .. وكانت اغنيه و صجه قايمه..
حبيب على طول طالع في السيد.. يدري به ما يسكت .. مع انهم كلهم مايسمعو .. بس السيد يعلق وما يسكت بالعاده...
مراد عطى المتصل بزي ,, وهو محمق فيه..
كاظم في باله: ــ هالمصفع الله يلوع شبده مايدري بي ما اشرب ورى احد
وراح المطبخ بيصب له غيره...
يوسف هدووء من حظر وياهم بس يراقب الأوضاع...
مراد : ــ ماعليكم امر.. بس ممكن اعرف وين غرفتنا .. تعبان وودي ارتاح... جاي بسيارتي ومره متكسر...
حبيب يأشر على الغرفه:
ــ هذي غرفتكم .. ووياك اخونا يوسف وواحد اسمه شقيق
مراد : ــ هااا.. ؟؟ شقيق...!! فلسطيني؟؟؟
يوسف ضحك: ــ ههههههههههه قصده.. شفيق شفيق..
مراد : ــ اف اغلط بحرف الفاء تقلبه قاف يعني؟ عجيبه!!
حبيب يطالع على جنب : ــ مو اغلط .. اتغيلط..
ــ اهااا.. حسبالي ..

في شقة نوري والشله...
الغبار قايم و قاعدين ينظفو ...
محسن نزل عليه شيطان الشعر:
ــ اشوف الغبار بعيوني .. و اندب حظي و احوالي... شلون انظف لا تلوموني .. و البيز صار سروالي ... اشوف صرصور يتمشى .. واتذكر ايام الفيران.. واشوف مصطفى يحاتي ويش بنتعشى و اشوف ايمن مبرطم و زعلان...
مصطفى قام يضحك.. ــ غربلك الله يا متعيلف
ايمن محمق : ــ اشوف اشوف .. من عذر ابو عواين..
محسن : ــ و نوري يا عيوني .. يفلت صواريخ للجيران..
نوري : ــ و محسن هدار و يحن زي النسوان...
ايمن : ــ سكتو خلاااااااص

شوووي الا يسمعو ... فوقهم على طول..
طاخ.. طاخ.. طخ طخ..
كأن احد يشادخ شي على الأرض
وفعلا .. مراد في الشقه فوقهم..
كان يدف شنطته ماقدر من الفرش .. شوي يشيل فيها ويشدخ.. يشيل ويشدخ..
نوري مع الشدخات:
ــ اف .. ويش صاير ؟؟؟
محسن يرفع راسه: ــ بل .. قايم الشدخ فوق..
نوري : ــ تتوقعو لويه عاد.. هههههههههه خذ لك .. ايوه .. ايوه...
ايمن : ــ جايز مو عاجبنهم شي لو سعرها غااالي على خرطي زينا..
مصطفى: ــ حكم المص.....
ايمن يقاطعه بقهر : ــ لا اجل عندهم واحد متين ويناطط...

مصطفى انجرح وانحرج.. خصوصا انه ماكان يقصد ايمن بالكلام وايمن فهمه غلط...

مصطفى يدافع عن نفسه: ــ انا.. قصدي حكم المصارعه.. يضرب بأيده على الأرض
ايمن : ــ وضح كلامك مره ثانيه..
مصطفى : ــ مو مجبور اذا حضرتك تقاطع ..
نوري : ــ.. ليش ويش فهمت يا سيد ايمن؟؟
ايمن : ــ مو شغلك..
محسن : ــ ادري به حسباله مصطفى بيقول المصفع..
ايمن : ــ انت ما دخلك بعد..
محسن: ــ ايه مو على راسك ريشه..
ايمن : ــ التهي في حالك و ماخصك فيني..
محسن : ــ بل عليك نحوووس اغبر..
ايمن : ــ انت اخر واحد تتكلم فيهم...
نوري : ــ اف اف .. صلو على محمد ياشبااااااااب .. تونا بسم الله اول يوم ..
مصطفى: ــ اللهم صل على محمد وآل محمد..
ايمن ترك المكان وراح الغرفه..
نوري : ــ لا تلوموه .. تعرفوه مايقدر على الصرف والشقه ماعجبته ,, فعلا مافيها شي يفرق عن اللي قبلها الا بالمساحه ...
محسن : ــ يمسك لسانه الزفر .. ويحترم حاله ... مو مجبورين حنا نتحمل والله بتقوم شبقات واحسن من هيك على قدنا ما بنلاقي..
نوري : ــ هههههههههههههه شدعوه ماقامت مذابح.. وتالي تتصالحو.. طيب هو ..
محسن : ــ اه.. بس هو..؟؟؟
نوري : ــ ههههههه لا تخاف حتى انت.. عشرة عمر ماتهون بيننا معلوم نشابق ونتراضى عادي...
التفت نوري لمصطفى:
ــ ماعلى هالقمر دا.. اطيب منه ما فيه..