في كوافير ازدهار ...
وداد منسدحه و في وجهها قناع لتنظيف البشره بعد ما حفت وعملت التقشير.. و تسولف مع ازدهار...
الا بالفلبينه العامله تقاطعهم ...
ــ مِس ازدهار هذا جهاز حق بخار خراب مره تانيه..
ازدهار بزهق :
ــ اوهوو مو مره تانيه .. إلا قولي مره عاشره .. كم مره صلحناه دا ولا يفيد وياه.. هو بس لا يفقع في راس زبونه ويودينا بداهيه...
ــ لازم يشتري جديد..
ــ هذا اللي بيصير .. عاد محل الـ .. جربناه بهالجهاز وهذا هو خرطي .. ومحل الـ.... غاليه اسعارهم...
تقاطعهم وداد :
ــ يووو اخوي محله يبيع هالحوايج ...
ازدهار : ــ افا بس .. و توي ادري .. توش تقولي عاد... من متى اني فاتحه الكوافير ..
ــ ويش دراني ما سالتي ومايجي على بالي اقول لش
ــ حلاتي اسألش عن اخوانش ويش دخلني ...!!
ــ ويا وجهش ..
ــ ويش اسمه محله؟ ووين .؟ وكيف اسعاره؟؟
ــ بل بل .. اسمه كيرتفتي .. وين عاد وكيف اسعاره مادري..
ــ خابت عليش حق اخوش ولا تدري..
ــ ما يفيدني بشي ولا خطر على بالي اسأله..
ــ لحظه... قلتي كيرتفتي .. مار علي الأسم بس مو حق معدات تجميل !!!
ــ ايه .. تشيه طلعتي تعرفيه..؟؟
ركضت ازدهار لشنطتها...
فتحتها ... وفتحت المحفظه وطلعت الكرت.. اللي عطاها اياه عبدالستار..
ــ المدير عبد الستار آل ... صح ؟
وداد تطالع في ازدهار وهي مستغربه:
ــ عندش كرته اكووو ... يعني تعرفيه..
ازدهار ومهي مستوعبه الأمر..
ـ اولا ياحظي معدات تصوير مو تجميل .. صحيح انش خوش اخت... وبعدين كيف اخوش..؟؟ عبدالستار دا اخوش؟؟ من امش يعني؟؟
وداد صارت تضحك:
ــ هههههههه صدق تصوير ..!! شمدريني عنه... ايييه من امي .. اكبر واحد هو...
ازدهار تشخط راس وداد بالكرت :
ــ تسمي روحش صديقه.. مالت عليش وعلى وجهش .. توي ادري ان عندش اخوان من امش..!
ــ ما سألتي ..
ــ بذمتش صار لي 7 سنوات من عرفتش... خابت عليش وعلى سوالفش ماعندش الا الحش و الشكوى.. اجل عندش اخوان من امش وتوي ادري..
ــ هههههه انا لله بتسوي لي سالفه الحين من لا شيء .. هو بس الوحيد من امي و عندي فتحي خليصي..
ــ ايه مو انتين تدري عن اخوتي و عن اهلي واني حدي ريلش وحمواتش .. الخنين والخايس اعرفه عنهم.. هذا اذا فيه خنين ياحسره..
وداد انقهرت : ــ ويش قصدش يعني اني حنانه شكايه و اعور راسش بالهدره..
ازدهار : ــ فسري على كيفش الأمور .. ويش عليش ..
ــ زين هذا انتين دريتي الحين .. كرته عندش يعني تعرفيه..
ــ لاااا.. سالفه طويله ..
ــ ويش !!؟؟
وبين ما ازدهار تحكي لوداد سالفة اخوها لما صدمهم...

علاء يدور في المحل ويحوس ..
حرك علبة حمام زيت كبيره فطاحت عالسراميك و انبطت..
جت الفلبينه تصرخ ووخرت علاء لأمه:
ــ روووح لمامااا..
وداد عصبت:
ــ بسم الله على ولدي .. تفداه هالغرشه.. لا تصرخي عليه.. ادفع لش سعرها.. والله حاله شغاله وتنفخ..
الفلبينيه عصبت: ــ امسكي بيبي .. كم مره يقول روح لماما مايسمع كلام..
ازدهار : ـ خلاص حصل خير .. نظفي هذا لا نزلق منه.. دافعة بلاء عن عمره..
الفلبينيه صارت تمسح الزيت وهي تتحمق بالفلبيني
وداد : ــ ومصيبه .. لا تسبي فينا مانفهم لش تقومي تاخذي حيفش ..
مسحت الفلبينه عالطاير وانحاشت عنهم..
ازدهار وفيها ضحكه:
ــ ياعلي ماحد يسلم من شرش ..
ــ اجل تصرخ على ولدي صروعته.. الله يلعن ماريوه يوم ما ترضى تخليه عندها
ــ انـــــــــــا لله حتى وانتين مو وياها مهي سالمه من دعاويش.. حرام عليش والله .. خافي ربش..
والله ماحد صابر عليش و عارفنش غيري
وداد وبقهر : ــ زين والله... اجل لله صبرش..

في الرياض..
وفي الحديقه بعد ما نزلو الشباب اغراضهم ..
نوري : ــ ها شباب .. جاهزين..
السيد توه واصل ليهم جايب آخر غرض :
ــ ويش بتسوو؟
محسن : ــ بنلعب كوره قبل لا تغيب الشمس و نتعشى..
حبيب : ــ اوووكيييه

وزعو روحهم فريقين...
شقة نوري وعددهم 5 و شقة حبيب وعددهم 7
حبيب : ــ اوكي انا باروح لفريق نوري ... حق نتساوى... يللا مين بيكونو الحراس.؟؟ لو نسوي قرعه..
صادق وبعفويه وبدون قصد :
ــ لويه تسوو قرعه.. كاظم في فريقنا و مصطفى في فريقكم..
كاظم وبقهر:
ــ لاااا والله... على كيفك هو.. ليش يعني
صادق يرد على كاظم بنفس النبره..:
ــ انت تدخن و الركيض ما ينفع لك.. و مصطفى....
سكت وارتبك وماعرف يكمل كلامه..

مصطفى صار يطالع في صادق .. وفاهم مقصده..
يوسف يطالع في مصطفى وحاس عليه من عيونه ان اسلوب صادق واقتراحه احرجه و جرحه..
نوري يدافع و بثقه :
ــ اقوول لا يغرك مصطفى .. ترى سريع وخفيف و هداف بعد..
صادق ابتسم و بأرتباك :
ــ لا .. مو قصدي..
مصطفى تنحى على جنب وبهدوء:
ــ انا باصير حارس..واللي فيه خير يدخل الكوره شباكي
صادق مو عارف ويش يقول...
حبيب : ــ ياجماعه انا باصير الحارس مافيني شدة ركيض انا ووراي شواي تالي بيتقطع ظهري..
السيد يتأمل حبيب مع انه في البدايه سأل مين بيصير حارس..
بس على شان يحل الموضوع و سوء الفهم اللي صار فيه تنازل و حط روحه حارس مع انه لعيب و يحب الجري ...
وهمس ليوسف :
ــ هذا هو حبيب..
ابتسم يوسف وفهم على السيد وفي باله:
ــ يوم عن يوم احب هالحبيب اكثر و اكثر..

وتوزعو فريقين وبدى اللعب.. وبين ماهم يلعبو..
على بُعد كان يراقبهم الرجال مع شلته...وناويين على الشباب بنيه شينه ...
وبين ما خلو واحد منهم يراقبهم وهم يلعبو كوره لا ينبتهو للبقيه ويش يسوو..
توجهو البقيه لسيارة مراد... واحد بغرشة كوكا .. فتحها بمفتاحه واخذ الغطا المعدني معاه ودار بهم على سيارة مراد شمخها تشميخ...
و صب الكوكا فوقها غسلها تغسيل..
وبنفس الوقت .. ثنين منهم ينسمو الكفرات ...
اما الرئيس ( الرجال الثلاثيني ) توجه الى بقاله قريبه وشرى منها العاب ناريه ...



ام مجتبى ونور رجعو البيت.. ابو مجتبى يبغى له يوم راحه عالأقل في المستشفى لأن السكر عنده ارتفع بعد العمليه..
فتحت ام مجتبى الباب و الضيقه تملى قلبها:
ــ دخيلك يــــــاعلي..
دخلت الصاله .. الا بطلعة مجتبى من الحمام كان يسبح .. لابس ثوب نوم اخوه أحمد .. والفوطه على راسه.. وقاعد يمسح وجهه عن الماي ... وعلى طول في وجهها هي ونور ..
من شافته ام مجتبى صرخت .. ونور عاونتها عالصريخ..
ام مجتبى تغطت و خلاص حست نفسها مهي بالدنيا:
ــ منهوو انت .. ووين اهل البيت.. .. امااااني .. اميررر
نور بتطلع بتستنجد بالجيران..
اماني طلعت من غرفة امير كانت ترتبها على صوت الصريخ ومسكت نور بالسرعه وبالقوه:
ــ هذاا اخوووش...

مجبتى شال الفوطه من على وجهه:
ــ اماااه.. اماااه انا مجتبى..
ام مجتبى تحس نفسها مهي قادره توقف .. مسكت الجدار بأيدها... الصوت فعلا صوت ولدها..
فتحت وجهها وصارت تطالع فيه..
عيون مجتبى غرقانه دموع و ملامحه اللي اكلها الحريق يملاها الأسى...
ام مجتبى مدت كف ايدها الثانيه وصارت تتحسس وجه مجتبى بهدوء .. ودموعها تنساب .. وبصوت بح وتلاشي نسبيا من الصدمه:
ــ آآآآه ياولدي.... ويلي عليك ياولدي .. هذا انت امي. !!؟؟ . آآآآه..
وبدت نوبة صياح ..
نور واقفه مهي عارفه ويش تسوي ودموعه تنحدر بعفويه اماني صارت تحاول تمسك نفسها..
مجتبى يحاول يبتسم.. مسك كف امه وباسها..
ارتفعت كف امه وصارت تمسح على راسه...
حضنها الى صدره .. ضمته :
ــ آآه.. الحمدلله يوم ردك لينا سالم ياولدي.. لا خلا ولا عدم..
مجتبى يمسح ظهر امه ويهدي فيها:
ــ لا تصيحي اماه الحمدلله كلها حروق بسيطه و تشفى مع الوقت و تتعالج..
ــ منى عيني اشوفك و المك في حضني .. الحمدلله اللي رجعك لينا..
ــ وين ابوي ؟؟ اماني تقول راح وياكم على شان السكر ويش فيكم راجعين بدونه..؟؟ فيه شي ,.؟؟
اماني : ــ ويش عمه .. طمنينا .؟؟. طولتو من الصبح روحتكم...
ام مجتبى مهي عارفه تتكلم تحس نفسها مره تعبانه..
قعدها مجتبى وشال عباتها من عليها . وتوقل قدامها يبغاها تتكلم تقول له ويش فيه ابوه..
. اماني تداركتها بكاس الماي ...
ام مجتبى بعد ماشربت الماي وبصوت بالكاد ينسمع :
ــ سوو له عمليه..
مجتبى بأنفعال:
ــ هااا.. عملية ويه؟؟
ام مجتبى رفعت ملفعها غطت وجهها وصارت تهتز وهي تصيح بألم ..
مجتبى خاف ,,, مسك كتوف امه :
ــ اماه .. ويش صاير ..؟؟
اماني: ــ نور ويش فيه عمي..؟؟
نور وهي تشاهق :
ــ قالو فيه غرغرينا و قصو اصابيع رجوله وارتفع عليه السكر والحين .. مرقد..
مجتبى فقد توازنه وقعد قعود...
اماني حطت ايدها على صدرها وبهمس مذعور :
ــ ياعلي .. يـــا علي..

امير طلع من غرفته.. يتأمل حالهم .. الكل يصيح ومذهول ... صار هو الآخر .. يصيح.. صياح مرتعب.. خايف ..
يجهل اللي صاير ..!!
صار يون أنات متكسره و اعتلى صريخ..
صارت نور تهدي فيه...
لأنه ان زاد خلاص بيهيج عليهم وبيكسر الدنيا..
ضمت اياديه و مسكته تحاول تقعده ..
وبالموت قعد عالأرض .. حطت راسه على صدرها..
هو يون و مو عارف ويش كاين حواليه..!!؟؟
وهي مع ونينه تصيح ودموعها شلال..


خلصت وداد تنظيف بشرتها وخلاص بترجع البيت..
وهي قايمه مرت جهة حمام الزيت اللي كبه ولدها وما انمسح عدل..
وتتزحلق .. وطرااخ تنشدخ على ظهرها..
وكان في المحل زبونه ..
هي والفلبينيه فيهم ضحكه بس يحاولو يداروها ...
الفلبينه تطالع في وداد بنظرات شماته..
ازدهار تحاول تشيلها .. وكلما شالتها عودت وداد وزلقت وتصرخ:
ــ وطاعووون..
كان جوتي وداد املس ... وفوق هذا الأرض سراميك ومزيته ..
ازدهار جتها الضحكه ماقدرت وصارت تضحك وهي تحاول تشيل وداد..
علاء استحلى الموقف وصار هو الآخر يضحك..
الفلبينيه والزبونه بغوها فرصه ففرطو ضحك..
وداد :
ــ حسبي الله عليكم.. اضحكو..
ازدهار نادت الشغاله من شقتها تمسح الزيت عدل.. ... بين شقتها والمحل باب...
وداد بتدفع القيمه ..
ازدهار وبأبتسامه تحاول توقف ضحكها بها:
ــ مايحتاج غناتي مايحتاج
وداد بحمق :
ــ اني ما جيتش ببلاش ..
ــ بل بسم الله على عمري... انا لله هههه ويش فيش محمقه.. اعتبريه ثمن شدختش واهمالنا في تنظيف الأرضيه..
ــ تسخررري هااا
ــ ههههههههه باسطرش زين.. فارقي .. لا تقولي بعد اركب وياش الحين رجعتش البيت..
ــ اكييييييد
ــ غربلش الله .. امشي قدامي..

وبين ماهم في السياره..
ازدهار :
ــ خلاص غناتي .. ابغاش تكلمي اخوش وتسأليه مايعرف احد يبيع معدات تجميل بالعاده الأستديوات يتعاملو وياه واغلب الأستديوات تبعهم كوافير ... فيمكن اذا ما يعرف هو يفيدوني زباينه...
وداد : ــ وحق ويه ماتكلميه انتين..
ازدهار بأستغراب: ــ عندي اخته اكلمه مباشره حق ويه؟؟!!
ــ حاله حال أي عميل تتعاملي وياه.. مالي شغل اني ...
ــ ياعلي عليش صدق نحوووسه اني مابغاه لتصوير حلاتي اكلمه على شان شي مو تخصصه.... اف ما نستفيد يعني منش بشي .. خلاص لا تسألي ولا تسألي ..