في القطيف .. في مزرعة ابو مجتبى..
ابو مجتبى .. فوق النخله وولده امير يداور في المزرعه .. ماسك العقفه .. وقاعد يضرب في نعال ابوه اللي فصخه تحت قبل لا يركب النخله.. شرحه له تشريح .. قطعه تقطيع..

(( العقفه : اداة من ادوات المزارعين سكين كبيره معقوفه على شكل هلال يستخدموها في حش الأعشاب و النباتات.. ))

انتبه ابو مجتبى لولده ماسك العقفه ويضرب فيها خاف عليه يصوب ايده ويقطع اصابعه..
صار يصرخ فيه.. يتركها.. فصار ينادي :
ــ اميرووو .. حطها.. اححح.. لا تتعور..
امير ابد.. يضحك على تعصيب ابوه ومستمر في الضرب..
ابو مجتبى يحاول ينزل بالسرعه من النخله وهو يسب:
ــ لابوك لا بو امك اللي بلشتني فيك .. اتركها اقول لك..

شان تنفلت رجوله من النخله ويزلح و تتشقق سيقانه من فوق لتحت..
اخذ العقفه من ايد امير .. امير صار يصارخ ويرفس .. وابو مجتبى مو قادر عليه ...
الا بجية ولده محمد:
ــ خير خير ويش صاير ..؟؟؟
ابو مجتبى وهو حده محمق ..
ــ أي خير .. دماميني تشخل ..
ــ ياعلي .. سلامات .. امشي وياي اترك كل شي المستشفى ..

ابو مجتبى قعد على الأرض و صار يرفع سرواله اللي مع النزله ارتفع وانشق شوي منه
و يلف وحده من سيقانه بغترته وهو مره يتمتم بعصبيه وهدوء ..

محمد اخذ امير ركبه السياره و صار يحايل في ابوه يقوم يعقمو له الجرح ويمكن يحتاج للجرح تخييط..

وهم بنص الطريق للمستشفى..
بعد ماعرف محمد سبب هالسالفه اللي صارت لأبوه...
محمد : ــ هانت يبه.. كلها كم شهر وتخلص اوراق امير وياخذوه ان شالله..
ابتسم وهو يكمل كلامه : ــ انا جاي بابشرك.. وظفوني مدرس في دار الرعاية .. اللي باودي امير ليها ان شالله .. باصير قريب منه و اقدر اشوفه بين فتره وفتره .... هانت يايبه بركات محمد وآل محمد... ندبر بس بقايا المبلغ و ان شالله سهاله...

<< محمد تخصصه تربية خاصه... مسار سمعي ... و ناويين هو ويا ابوه يرسلو امير بس يكتمل وياهم المبلغ الى مركز من مراكز الرعايه المتخصصه بهالأمور ..

يتكفلو برعايته و علاجه وتعليمه.. بس ام مجتبى ماتدري لأنها كذا مره كلموها في الموضوع تشابقهم و ما ترضى.. فأذا توفر المبلغ بيحطوها قدام الأمر الواقع..

هو محمد خلص كلامه ... الا بشهقة ابوه ..
انتبه ابو مجتبى لنفسه انه ركب السياره بالسروال والفانيله والوزار اللي يلبسهم وقت شغله..
فتح عيونه:
ــ عَووودْ.. عَودْ عَودْ عَوْد..


محمد وقف مختلع..:
ــ ويش صاااير؟؟؟
ابو مجتبى مره معصب : ــ ويش ماصاااار .. ماتشوفني جاي شلون وياك ..؟؟ فوبي في النخل
محمد :ــ ايه ماعليه مايضر ثياب الشغل دي .. تصوبت وانت تشتغل وحملناك مستشفى.. تتكشخ لويه؟؟
ابو مجتبى مو عارف يتكلم...: ــ أي فياااااااااب شغل. .. أي كشخه.. الله يلعن بليس... فوبي .. فوبي فيه محفظتي .. فلووس الفلووووس..
ــ فلوس...!!! كم يعني؟؟؟ << محمد ماخبره بأبوه يحمل مبالغ كبيره روحته النخل
ــ ابو رمزي .. ابو رمزي اليوم جاب الفلوس
محمد وقف ... وهو مختلع ...
ــ اووووه ... زين زين راجعين...

ابو رمزي واحد من معارفهم الله منعم عليه وقرر ابو مجتبى يتسلف منه مبلغ مو هين.. 10 الاف ريال على شان سالفة امير....

وصلو الزراعه.. نزلو هو ومحمد يركضو للصندقه اللي يريح فيها ابو مجتبى ويحط اغراضه..
ابو مجتبى يركض حافي .. نعاله قصصه امير..

ما انتبه لقوطي معدن مقصوص ومرمي عالأرض .. داس عليه .. وانشق باطن قدمه وزاد الطين بله على رجوله.. الألم ذابحنه.. بس طنش الموضوع من خوفه على ثوبه والمحفظه..

وصلو لقو الثوب مرمي على الأرض .. شاله محمد بسرعه صار يفتش في جيوبه
لقاه فاضي لا الجوال ولا المحفظه ..

ابو مجتبى .. دار راسه..
ــ آآآه.. آآه.. ورمى روحه دايخ..
محمد مره رجوله مو شايلتنه خايف على ابوه..
وامير مفزع الدنيا صريخ في السياره....


بعد حوالي ساعه ...
و ام مجتبى في بيت وحده تمرخها بعد ما دارت بيتين قبلها .. حست بشي يضايقها مو طبيعي.. صارت لا شعوريا تخفف من قوتها ..
المرأه: ــ ويش صاير فيش ..؟؟ تعبتي..!!
ام مجتبى ماترد .. سرحانه في عالم آخر ..
المرأه سكتت عنها .. شوووي وقفت ام مجتبى..
ــ مسامحه غناتي بس اليوم خلاص ماقدر بارجع البيت
المرأه معصبه : ــ ماخذتي الوقت كله.. شلون ادفع لش الحين اني..؟؟
ام مجتبى : ــ ماعليه مايحتاج هالمره لين اجيش مره ثانيه عدل .. اسمحي لي بس لازم ارجع .. من الصبح اني طالعه من بيتنا وولدي مادري به...

.. ابو مجتبى قعدته من النوم بيروح الزراعه لقى فطوره مجهز و ام مجتبى طلعت .. محمد ماكان موجود طلع يراجع اموره للوظيفه.. و امير صاحي من النوم فخاف عليه يخليه لحاله .. فأضطر ياخذه وياه الزراعه,, فصار اللي صار..

وطلعت ام مجتبى ركيض البيت .. وصلت لقت امير يداور في الحوش..
شوي الا تسمع ابو مجتبى يهدر و محمد يهدي فيه..
دخلت عليهم : ــ ويش صاير ويش فيكم..؟؟

ابو مجتبى : ــ ويش صاير يعني .. ويش صااااير.... ويش مطلعنش من غبشة الغباش هااا....؟؟؟
ــ رحت لأم حسنين دهنت راسها مصدع ومرخته .. و لأم علي.. طايحه من درج بيتهم ظهرها يعورها و لأم حسام بتها ماتنام في الليل و كل تهلووس
ابو مجتبى يقاطعها:
ــ ماغيري انا اللي مصدع و طايح و اهلوس وباظل طول عمري اهلوس
ويضرب كفه بفخذه :
ــ آآآه ويلي ويلي
ام مجتبى انتبهت للدم في الوزار
قعدت بالسرعه ومسكت سيقان ابو مجبتى رفعت الوزار وشافت الشقوق..:
ــ وي .. ياعلي .. من وين طايح...؟؟
ابو مجتبى يسحبهم:
ــ خليني بهمي ... يهون هالجرح يهون..رجولي يابسه اصلا مانا قادر احركها..
محمد : ــ صل على محمد يبه.. من القهر تشنجت... هدي بالك..

ام مجتبى مهي عارفه ويش تسوي ابو مجتبى معصب ولا يرد على تساؤلاتها..
محمد لاحظ على امه الأرتباك والخوف .. اخذها وطلع بها برى وعلمها بسالفة البوقه..
ضربت صدرها و صارت تصيح..
ــ ويش بنسوي الحين ياولدي .. من وين بندبرها.. لاحنا استفدنا منها .. و مضطرين نرجعها...
ويش هالنايبه دي .. ولويه ابوك متسلف 10 الاف.. أحد شكى له شي...؟؟؟ هذاني اشتغل وياه واعين واعاون ومستوره .. ماكلين شاربين نايمين.. لويه مااااخذنهم؟؟؟؟

محمد مو عارف ويش يرد.. نسى ان ابوه موصنه لا تدري امه بسالفة السلف لأنها ماتدري المفروض بعد بسالفة امير ....

فصار محمد يرقع الموضوع:..
ــ اماه.. لسياره .. باخذ لي سياره
ــ سيارة ويه ياولدي.. شوف اكي طاحت في راس ابوك..
محمد : ــ ابوي يبغى له مستشفى بس مو راضي يروح .. عاد اماه تصرفي وياه جرحه يبغى له تعقيم ..
راحت ام مجتبى تشوف جروحه وتعالجها له...


عند المدرسة... الثانويه للبنات... بعد انتهاء الدوام..

عبدالأله واقف يستنى اخته وبنات الباص يكتملو... مرت عليه وحده لابسه برقع و مكحله عيونها.. وريحة العطر تفوح على بعد متر.. << متعطره ومتعدله قبل لا تطلع من المدرسه..

هالبنت اسمها... ريماس ... معروفه في المدرسه بالشغب .. وسمعتها مو اوكيه.. وكذا مره تنصاد في الأداره على شان جوال و مجلات و اشرطة وسي ديات اغاني وافلام..
بس لأن ابوها صديق مسؤول في وزارة التعليم .. كلما تكررت انذاراتها و تقرر فصلها .. ترجع بسهولة.. فوق ان ابوها متبرع بمبالغ طائلة لتعديل المدرسه و صيانتها.. فمره صايره الكل بالكل و ماحد يتجرأ يضرها بأي شي ..


توجهت لعبدالأله.. و سالته وهي مسويه روحه مرتبكه:
ــ انت عبدالأله آل ....
عبدالأله منكس راسه للأرض ومستغرب منها .. ويش تبغى دي ؟؟
ــ ايه خيه.. خير ..؟؟
ــ اختك شهربان داخل المدرسه.. باقو عباتها.. و صديقتها ماريا اليوم غايبه .. فتبغاك تجيب ليها عبايه من البيت بالسرعه وبس توصل دق على هالرقم باطلع اني اخذها من عندك...

عبدالأله يدري ان ماريا فعلا غايبه.. بس مو عارف يمشي ويترك البنات...

اخذ الرقم من عند البنيه اللي اصرت عليه يتصل حق يتأكد...
اتصل الا شهربان ترد عليه..
عبدالإله: ــ خيه.. ويش صاير؟؟
ــ باقو عباتي .. وصل البنات اللي ركبو الباص بسرعه وجيب لي عبايه قبل لا تسكر المدرسه..
ــ هذا جوال مين؟؟
ــ جوال البنيه اللي جت لك الحين.. اني لو ماريا هنا شان دبرتني ..
ــ انا لله واذا جبت العبايه.. كيف ادخلها..؟؟
ــ ماعليه بتنتظر البنيه وياي شوي قالت لسواقها يروح عنها... لين تجي اتصل على هالرقم .. تالي نوصلها ..
ــ خير ان شالله.. ربع ساعه اجل وراجع..

ركب عبدالأله الباص .. و اتصل في امه تدبر عباه بسرعه لشهربان على ما يوصل البنات..