غربة الأوطــــــــــــــــــان...

[Princess]

مرحبا
ياهلا بالغوالي ياهلا...
وحي الله التعليقات الحلوه في البارت اللي طاف صراحه الكل ماقصر .. كل تعليق يقول الزود عندي
الهي لا يحرمني منكم ومن هالحماااااس....
يللا قربت النهايه قربت
تفضللو الجديد...

[أمل الظهور]

بارت يصيح


على قلبي ماريا مسكينه تعور القلب وبيهدلوها بالمستشفيات مسكينه



ماتستاهل الله ياخذ اللي كان السبب


يمهل ولايهمل



قيصروه بيرجع مع ناجي وبيلتقي مع اخته هناك


وناجي هو اللي بيبرأ أخته


او عفر مرادوه بيطلع براءة ماريا وبيتزوجها


عبد الستار راح ملح حب ازدهار شكله خلاص خخخ يتزوجها ويغطيهاماهي صعبه



يستاهل الدب هانيوه وصادقوه وحساموه جعل مراده يقتله



<تعبت وهي تقرا البارت ربي يعطيك العافيه على قد تعبك


بانتظار البارتات القنان

[دمعة على السطور]

اللهم صل على محمد وآل محمد وعجل فرجهم وفرجنا بهم ياكريم وألعن من آذى فاطمة ...


وش هالقهر...وش هالعلة ..!!


وش هالهاني وش هالكاذب !!>>تقصد صادق ماتتشرف تسميه بإسم الامام سلام الله عليه...


صراحة بالنسبة لي صادق العيوب اللي فيه هو إن ماعنده إدراك ولاعنده تدبير للأمور..ولايعرف يتصرف في شي ولايعرف يقول الكلام المناسب في الوقت المناسب...هذا غلط طبعاً......بس هذا مايعني ان قلبه مريض ....!! ويمكن بعد كل اللي سواه ماكان يقصد أذية أحد ....ولايقصد يسيئ ليوسف أو غيره........ يمكن ظروفه وعيشته ويا أبوه خلته بس همّه ياخذ الفلوس ويسكت.....ولايهتم بمشاعر غيره ...!!!!


والتقى بهاني اللي فاقد كل المشاعر....وصاير بس همه حاسة السمع ويتلوها اللسان ويتعرض للجميع بهم

لو بس أني رجال وأطولهم كان راويتهم شغل الله >>


بس برد قلبي مراد معوذ بالله والنبي...راواهم الشغل الزين....أجل وش مفكرين يقذفوا التهم على بنات الناس...وينسكت عنهم..


الله بيراويهم .......وكما تُدين تُدان >>منفعلة




غادة بدأ ضميرها يأنبها وإن شاء الله تروح وتنطق ليها كلمة تدخلها الجنة ......



اوووه الحين عرفت ...ناجي سوى حاله يعني عشان يحمي قيصر من الاستجوابات والشبهات..>>أصيل ياناجي...


وقيصر بعد كل هذا يطلع سعودي........أما قيصر الدنيا علمته صح ..صار حذر بتعامله ..حتى مااعترف لناجي بالبداية ....




على قلبي إيثار.....عورت قلبي بقوة

بس عجبتني نور وتعاملها وياهم...وعجبني مجتبى في تربية أولاده....عجبني أسلوبه من قلب ....



مااعتب على محمد...هو بعده صغير...وجايز مايفهم إن بهالصورة هو يأذي ولاد عمته ........العتب وكل العتب على وداد اللي المفروض تعلمه ........وحسن بعد.. ماأخذ باله من ولاده...ولافي رابطة قوية تجمعهم.....




تأثرت مع مصطفى ......!! ان شاء الله مايصيبه شي من هالكلام ....أحسه حساس بقوة ...



عبد الستار >> بحسب الاحداث اللي صابته حطيت رموز تفاعلي ويا الأحداث...


أمير الحمد لله راح يروح المدرسة ...وإن شاء الله يستفيد وتتطور حالته للأفضل يااارب..





الحين انتظر رجعة ناجي.....وانتظر براءة ماريا........لاتتأخري أميرة غناتي.....


ننتظر ..والحماس يعتلي نفوسنا....


سلم قلبك وسلم فكرك المميز....وسلمت روحك المُتجلّية بين السطور....




موفقة لكل خير إن شاء الله تعالى

دمتِ بحصن الاله..

[أحبك ياغلا عمري]

جزء حلووووو
ننتظر الجديد

[الفراش الفاطمي]

امووووره روعه البارت بمعنى الكلمه
متحسفه لان الروايه بتخلص قريب اهئ اهئ
واللــــــــــــــــــــــه الود ودنا ماتخلص
بصراحه ويش اقوول سام اقصد ناجي وقيصر يجننو
وماريا واثار يصيحو وخصوصا ماريا الله يعينها
وازدهار خلاص بانت هي وعبد الستار
ومراد شكله صحيح بياخذ ماريا ويصير قريب يوسف
وحبيب فطسني ضحك يوم يقول احح وخناقه خخ
وهذا صادقوه الخبل وحتى هانيوه الله ينتقم منهم
وغادوه ان شاء الله تعترف وريماسوه الله يغربلها
ومجتبى وباقر علاقتهم تجنن بالنسبه لابو وولده
<< سلفوني باقر يومين يصير اخويي هع<< عاجبني
وبـــــــــس بانتظار البارت الاخير او قبل الاخير ان شاء الله
تحياتيـ ..~_~

[looovely]

بآآآآآآآآآكـ,,
يعطيك ربي الف عافية عـ البارتات الروووووعة
مراد واعليا كسر خاطري..زين الي ثبت يرائته>>بعد ويش ..بعد مانقل صادقوه الخبر لوكالة cnn..ولا أخبار كذابة بعد
وعبد الستاررررررر..هداآآآآآويش ماقصرو فيه..أمه من جهه وضربة ازهار من جهه
روحووو دماغه في ستين نيله..ولا بعد طلع مو لد أمه وأبوه >>شكلهم ناويين عـ الرجل بجلطة
مسكين بس يرجع لذاكرته بتكون له ضربة ثانيه..مآ أقول غير الله يعينه
وزين الي انبها ضميرها هـ الأم لخرطي..أني قلت أم فتحي مو عبد الستار خخخخخخ
سام=ناجي بترجع له الذاكرة على هـ الضربة القويه
يعطيك العافيه غناتي..بج ـد استمتعت واني اقرأ بقية الرواية
ولي رجعة للتتمت ماتبقى منها:)
صادق الدعوات لكِ..
في حمى الله وأمانه,,

[أعراف]

بارت غاااااية في الروعة
بانتظار القادم
مو تمهلي لا أراويش شغلش

[حلم لطيف]

ياسلاااااااااااام عالإكشنات اللي تهبل
ننتظر البارت الجديد بسرعة بسرعة
درقن درقن درقن ههههههههههههههه

يعطيش العافية قمر

[طفلة تحت المطر]

بارت رائع و حزين ..

تعليقاتي نفسهم تعليقات الأعضآء ..

بإنتظار البارت النهائي ..!

[دلوعة المنتدى]

بااارت رااائع غاليتي اميرة ,,
وبجد حراام الي صار بمااريا ماتستاهل ,’’
وهالاجنبي الله يستر بعد مدري شنو يبي من قيصر’’
باانتظاااااار البارت ع احر من الجمر ,,

[حلم لطيف]

مستعجلييييييييييين احنا عفوووووور

[حلم لطيف]

أستنى خخخخخخخ
مافي إلا أني عفر ألح على البارت الجديد

[Princess]

طلع ناجي لقيصر اللي كان ينتظره برى ..

ناجي :

ــ كم يوم وبرجع للوطن..

قيصر بهدوء:

ــ الله معاك.

ناجي:

ــ مافكرت يعني باللي قلته لك..!؟

قيصر :

ــ الله ييسر لك امورك راح توحشني..

ناجي ابتسم على مضض:

ــ ايه .. على راحتك ياخوي...



وهم راجعين للعياده

لقو سيارة غريبه على باب العياده واقفه....

نزل منها رجال اجنبي وسأله:

ــ هل انت قيصر ؟

ناجي :

ــ مين دا !؟؟؟

قيصر:

ــ مادري...

ويتقدم للي سأله :

ــ نعم انا قيصر ,., بماذا اخدمك..

ــ سمعت انك دكتور وهذه عيادتك.. ويقلب لهجته عربي:

ــ ولك ما تذكرتني !!!!

ناجي فتح عيونه الشكل لأنه ابيضاني و اشقراني عيونه خضر حكم عليه انه اجنبي بس ويعرف بتكلم عربي بس اللهجه كأنها عراقيه ..

ابتسم قيصر :

ــ هاا.. لا والله .. مادري احس وجهك مو غريب علي...

ــ ههههههه معلوم ماتعرفني ... لما سافرت امريكا انا كان عمري وقتها 12 سنه ...

قيصر ابتسم وكأنه عرفه :

ــ لا تقووول ... مجييييييييد .. إنت مجييييد...

ضحك الرجال و ضرب كتف قيصر :

ــ إيييه مجيد يا خوي

وخذو بعضهم في الأحضان

وناجي واقف ومستغرب منهو دا ..؟؟ واخوي !!

قيصر وهو شاد على مجيد..

ــ ولك يابه شقد مر وقت ماعرفتك.. تغيرت و احليوت هواي..

ــ هههههههه ولا آني ظليت شاكك بيك

ــ شنو تشك يابه شيبنا حنا وكبرنا...

يفك مجيد الحضن..

ــ بعز شبابك يا قلبي بعز شبابك... شكو ماكو خبرني عن علومك !

قيصر تنهد وبأبتسامه التفت الى ناجي اللي مليون استفهام وتعجب فوق راسه ..

ــ هذا جاري بالعراق مجيد .. ماسبق وجبت طاريه لك ... عراقي لبناني...

مجيد يضحك:
ــ افا يابه افا.. نسيتني ...

قيصر :

ــ هههههههه الدنيا ما تخلي شي عالبال .. بس والله تغيرت وكبرت يا زغير ...

ــ ههههههه رايدني اظل طفل ..

قيصر :

ــ الله يخليك.. ويسلم هالقبال الحلو... فاجأتني هواي...هذا رفيقي بهالغربه.. ناجي الـ...... من السعودية..



مد مجيد ايده وصافح ناجي وشد عليها ..



قيصر :

ــ تفضل .. حياك

ويدخلوا العياده ..





في شقة الشباب ..

حبيب :

ــ هدي مراد والله مانعرف حنا غير رقم جواله وخبرك جواله ضايع

مراد:

ــ هالكلاب شلون سمحو لنفسهم يتكلمو بكلام مايدرو صحته من غلطه ولو صحيح اصلا ماليهم شغل يتكلمو في اعراض الناس وبالأسماء والعوايل

صادق خايف من مراد فقاعد في الغرفه وماطلع.. ماسك كتاب يذاكر وعقله مشغول باللي صار..



السيد :

ــ الله يغربلهم .. انا في حياتي ماشفت صبي كذا.. اعظم من النسوان سوالفه

حبيب :

ــ والله في الدنيا سبع عجايب وهانيو العجيبه الثامنه...

مراد :

ــ بس خل يوسف يجي واشوف السالفه بالضبط و ان طلع صدق ذباح حسامو على ايدي

السيد:

ــ بذمتك مراد حتى لو لا قدر الله .. الله لا يقولها.. كان صدق .. تتوقع يوسف بيقول لينا ؟؟

مراد :

ــ ها.. مادري .. شكلي انا اللي مابصبر وبنزل البلد واشوف السالفه..

حبيب :

ــ ويش فيك ياخوك .. ندري غلاوة يوسف عندك لأي درجه .. بس ويش بتسوي ؟؟ بتروح لدا اللي اسمه حسام.. وبتطيح في امه دست لين يعترف

السيد :

ــ ويش دخل امه..

حبيب ومو منتبه لعمره وويش قال من قبل :

ــ هااا..

مراد :

ــ مادري .. بعرف بطريقتي الخاصه



جوال حبيب يرن...

ابتسم حبيب وقام له..

ــ كاظموووه بطيخ اخيرا اتصل



ضحك مراد على النغمه :

ــ مخصص له نغمه بعد

السيد :

ــ هههههه ايه نغمه بارده تحسها حق كراتين... عاد من نزل الديره كظموه وجواله مسكر ولا اتصل ماقصر فينا هو ويوسف مخلينا نتهوس عليهم

[Princess]

حبيب طلع من الغرفه وهو يكلم كاظم .. ماسك طرف ثوبه النوم بأيده ورافعنه ومع كل حاجه يقولها كاظم .. حبيب يرفع ثوبه ازيد وبذهول وحماس:

ــ إييييييه...

السيد :

ــ خخخ الله يستر مايندرى ويش صاير ؟؟ شوي وبيتفصخ علينا

مراد:

ــ ههههههه اشوى عليه سروال..

السيد:

ــ ترى مو داري عن عمره...

حبيب بحماس:

ــ ياااااااااااااا ولد.. حركاااات والله وقام حظك يابو امويس .. << ابو موسى يسمي كاظم..

السيد :

ــ قام حظه.؟؟ لا يكون خطب ..

مراد :

ــ تشيه مايقوم الحظ الا بالخطبه..

السيد :

ــ ويش دراني اسمع الكبار كل يقولو للعزابيه رفع الله حظكم وغير الله حالكم..

مراد :

ــ هههههههه يعني وحبوه من دقة الكبار..

حبيب ويبرد حماسه وكأنه مصدوم من سالفه اخرى:

ــ لا عاد... يـــــــالله.. الله يساعده.. والحين ويش مسوي؟؟؟ ايه.... ايه....

مراد :

ــ انقلبت نغمة الحماس !!

السيد :

ــ الساتر الله..

حبيب:

ــ خلاص اباقول للشباب السالفه الحين و بنشور عليك .. وان شالله خير... حياك..

سكر حبيب..

السيد:

ــ تشور عليه .؟ ويش صاير..

حبيب :

ــ كاظم ورث ورث .. كبير من جدته.. وعمه مفلس ومنهار و مصنعه وشركته مرهونين وفي أي لحظه اذا ما سدد ديونه بينسحبو منه...

صادق داخل الغرفه رمى الكتاب من صدمته باللي سمعه..... الشباب نسو انه يصير ولد عمه .. راح عن بالهم..

طلع ليهم عالباب وقف ..

ــ ويش تقولو؟

حبيب متحمس ورايح عن باله:

ــ كاظم ورث ورث كبير من جدته ... حركااات

صادق بهدوء وذهول :

ــ لا .. ويش الشي الثاني اللي قلته..

حبيب استوعب الأمر :

ــ ها..

السيد ومراد صارو يطالعو في صادق اللي تغيرت الوانه..

حبيب مو عارف ويش يقول..

صادق بهدوء:

ــ ابوي ..؟؟ افلس ..!!

السيد يحاول يغير الوضع:

ــ لا ان شالله ازمه عارضه مافيه الا الخير..

صادق بهدوء:

ــ والشركه والمصنع مرهونين !

الكل ساكت مو عارفين ويش يقولو..

صادق ترك الصاله بهدوووء

حبيب يضرب على راسه...

ــ خبل انا.. خبل .. نسيت ان ماعنده الا عم واحد.. وهذا ولده ..

السيد :

ــ ويش نسوي وياه الحين

مراد بهدوء:

ــ هذا جزاته على اللي سواه ابوه في كاظم... اجل جدته تتوفى ولا يدري الا بعد اسبوعين

حبيب بتساؤل :

ــ اموت واعرف عاد لويه ماوصل له الخبر الا بعد اسبوعين..

السيد :

ــ لا تموت ولا شي ... سلامة عمرك... يرجع كاظم ويخبرك بالتفاصيل..

حبيب يحك راسه:

ــ ويش هاليوم وويش هالسوالف اللي صارت فيه...

مراد :

ــ الحين هو يبغى الشور يعني لويش؟

حبيب بهدوء:

ــ امشو الغرفه واعلمكم اخاف صراحه على صادق من الصدمه



ودخلو الغرفه...



صادق في غرفتهم قاعد وهو مذهول ماهو داري ويش يسوي..

دق على ابوه .. لقى جواله مسكر..

دق على امه.. ردت عليه وصوتها منهار..

ــ اماه ويش صاير

ام صادق تحاول تتمالك نفسها..

ــ مافي شي .. اخبارك انت واخبار دراستك

صادق منفعل :

ــ اماااه ويش فيكم.. ولويه ابوي مسكر جواله

ابو صادق مسكر جواله عن الديّانه .. و فوق هذا مريض مرتفع عليه الضغط..

ام صادق :

ــ خربان,,.

ــ خربان ..!! اماه ترى وصل لي الخبر لا تخبي عني .. لا والله بنزل الليله الحين الحين.,

ام صادق ماتحملت.. وقالت لولدها السالفه...



في الغرفه الثانيه...

السيد:

ــ اهااا يعني يفكر يشتريهم من عمه ..

حبيب :

ــ ايه لا يروحو للغريب .. ويسدد بفلوسهم للديانه ..

مراد :

ــ يتراوالي تصرف سليم.. عالأقل يظل ولد اخوه وماتوقع يطرده من الشركه بيخليه يظل يشتغل فيها

حبيب :

ــ وانت تتوقع عمه بيرضى يستمر فيها.

مراد:

ــ والله اذا الحاله زي ماقلت ليش لا .. يخلي كبرياءه على جنب اذا يبغى يعيش

السيد :

ــ بس تعال.... كيف كذا صارت السالفه.. اللي نعرفه انه المحامي نصاب و ساعد عمه ياخذ الورث عمارتين وارض اتوقع مدري ويش .. عطى المحامي عمه الصك حقهم مقابل مليون مدري كم !! لو لا !!

حبيب :

ــ اييييييييه والله.. كيف كذا صارت السالفه !

مراد:

ــ يمكن الله هداه..

حبيب :

ــ حتى لو الله هداه كيف رضى العم يفلس ويرجع الحق لأصحابه

مراد:

ــ يمكن الله هداه هو بعد

السيد :

ــ ههههههه ياهادي يادليل .. ولو اني اتوقع السالفه فيها إن... اتصل حبيبو فيه وقول له راينا على اللي اقترحه و اسأله..

اتصل حبيب في كاظم,,,



صادق :

ــ اماه.. هدي خلاص .. بكره بنزل البلد .. هدي وان شالله مافيه الا الخير..

وسكر صادق من عند امه ويحس جسمه كله يرتجف .. رمى الجوال على جنب وانسدح .. غطى كامل جسمه بالبطانيه.. غمض عيونه وبلا شعور صارت مواقفه اللي كان يقهر فيها كاظم بس على شان يثبت وجوده تتسارع قدام عيونه...



كاظم :

ــ هههههه والله انكم فلته.. وعمركم طويل .. هذانا افكر الحين ويش باسوي فيه ولد الحرام..

حبيب وهو حاط الجوال على وضع المايك على شان الكل يسمع :

ــ المحامي!

ــ ايييه... السالفه ومافيها ان جدي وكل على املاكه محاميين كل واحد وكله على النصف .. لورث كل واحد .. فصارت وصاية ورثي مقسمه بين محاميين.. واحد ولد حرام قدر عليه عمي ورشاه و سلمه الأوراق .. فأخذ نص ورثي ارضين و عماره.. والباقي ظل عند المحامي الثاني اللي حاول عمي ياخذ الأوراق منه وخبى موت جدتي عني لمدة اسبوعين عل وعسى يقدر يوصل للأوراق وياخذ بقايا الورث ..

مراد والسيد في نفس واحد:

ــ ايوااااا...

حبيب :

ــ لاااا ولد الحرام دا المفروض ماينسكت عنه,,

كاظم:

ــ ايه هذانا ابرفع دعوى عليه مع المحامي الثاني فباطول مابنزل الا بعد اسبوع...

السيد :

ــ الله يعينك ويوفقك....

كاظم:

ــ بيمديني اسبوع اذاكر فيه..

حبيب :

ــ قابل حلالك الحين وبعدين أي مساعده تبغاها حاضرين..

كاظم :

ــ تسلمو ماتقصرو.. خلاص انا بكره الصباح رايح للمحامي ومقترح عليه سالفة اني اشتري المصنع والشركه .. و رفع الدعوه

السيد:

ــ الله ينصرك..

كاظم :

ــ ههههههههه حرب .. يالله ياكريم دعواتكم...

حبيب :

ــ قلبنا ويااااك ... خبر دار.. خبر دار >> خبر دار = انتبه لروحك..

السيد ومراد يطالعو في بعضهم...

كاظم مات من الضحك على حبيب :

ـ شكريه .. خدا حافظ

وسكر الجوال..

[Princess]

السيد :

ــ بسسسس.. يتكلمو أردي .. والله وطلعت ياحبوه داهيه..

حبيب يرقص حواجبه:

ــ خوش آمديد

السيد يصفق حبيب عن مزح:

ــ وخررررر زين تفكرني ماعرف معناها دي .. شدخل اهلا وسهلا في السالفه.. تسوي حالك علي تعرف عدل ها..

حبيب :

ــ بل ههههههه صادني.. كلها كم كلمه حفظتهم..

السيد :

ــ احم.. كح.. يعني الحال من بعضه...

مراد وهو يفرك بطنه :

ــ ايقوو بيقوبا... << يا الهي .. انا جائع ..

حبيب والسيد يطالعو في بعضهم...

ــ دي ويش هاللهجه...!

مراد يعاند :

ــ تشنجا تشنجا بيقوبا... << حقا حقا انا جائع

حبيب :

ــ حسب الحركه جوعان.. بس ماعمري سمعتها من كاظمو لو سمعتها لقطتها

مراد وهو يضحك:
ــ تشيه بس انتون اللي تعرفو لغة اجنبيه...

السيد :

ــ عاد ويش تطلع دي ...

مراد وهو ميت ضحك :

ــ كورياااااااا...

حبيب :

ــ هههههه شنق .. هنق .. فنق .. منق ..

مراد ميت ضحك عليه ...

ــ غربلك الله خربط بس خربط..

السيد :

ــ الحين ويش قلت انت.؟ صدق جوعان..

ــ ايه جوعاااان..

حبيب :

ــ الحين .. ايقو و بن بن بقا عفر و تشنجا .. كلها دي جوعان..!!

مراد ماقدر على حبيب وصار يضحك عليه.

ــ ويلي منك الله يسعدك.. امشوا وياي المطبخ واعلمك بعد كم كلمه..

حبيب :

ــ مشينا. سيدوه.... انا بعد بنبقااا..

مراد :

ــ هههههههه مو بنبقااا ... بيقوبااا...

ــ اللي هي ... هههههههه





في بيت عبدالستار..

عبدالستار قاعد يطالع تلفزيون.. وام عبدالستار قاعده تقشر بطاطس لعشاهم...

اللي تقشرها ترميها على وداد تقطعها... وولادها يلعبو في الصاله وياه...

عبدالستار:

ــ مادريتي ويش فيه حسن.؟

ــ مادري شكلها سالفه شايده .. مو راضي اقعد في البيت و يقول حق يوسف ياخذ راحته بهاليومين اقعد في بيت اهلي .. ولا يندرى.. اشك مو هذا السبب..

ــ لويه يعني..

ــ مادري ماريا مريضه وحالتها حاله.. واماني كل يوم عندهم ..

ــ مافيه الا الخير ان شالله...



علاء يصيح... ومأذي امه وهي تقطع البطاطس..

اخذه عبدالستار شوي وصار يلعب وياه...



محمد ماسك كشاف اصفر ويسلط الضوا على عيون فرات:

ــ عيونش في الضوا تصير بنيه.. عيوني انا بنيه بدون ضوا.. انا احلى منش

فرات تبحلس عليه :

ــ مالت عليك شايف حالك على ويش مادري..

ــ ههاااي شوفي كشتش في الطوف..

<< ظل شعر فرات وكان منكوش في الجدار صاير تحفه..

فرات تعدل في شعرها:

ــ لاااااا تسخر...



علاء :

ــ ماما.. ممه ..

وداد:

ــ قومي فرات اخذي اخوش عن خالش و صبي له عصير في الرضاعه.. خله يركد...

ام عبدالستار:

ــ متى بتقطعيها عنه عوديه عالكاس لو المزاز بتخربي اسنانه..

وداد وهي مستمله :

ــ اهوو ويش اسوي له مايبغى الا هي..



جت فرات وهي ماسكه العصير .... بتاخذ علاء من حضن خالها..

ــ اصلا خالي احلى منك.. مالت عليك..

تقصد محمد بهالكلام..

محمد التفت ليها

عبدالستار صار يضحك عليها مستغرب من هالكلام المفاجئ

فرات :

ــ ايه عيونه خضرااا .. و ابيض منك ...

محمد:

ــ اماه انتين وخالي فتحي تتشابهو بس خالي عبدالستار غير

وداد وهي تقطع :

ــ ايه لأن ابوه غير .. وابونا غير ..

ام عبدالستار جرحت صبعها وهي تقشر ورمت البطاطسه..

والدم يسيل ..

قامت المطبخ..

وداد:

ــ ويش صاير.. يووو دم عالبطاطس..

عبدالستار قام ورى امه...

وداد:

ــ بسرعه امي يدور راسها من الدم... شوفه ليها...



دخل عبدالستار المطبخ...

لقاها عاطتنه ظهرها .. و مقابله المغسله .. فاتحه الماي .. وحاطه صبعها تحته وهي تصيح..

تقرب منها ..سكر الماي ... ومسك ايدها وبالنشافه صار ينشف الماي ويضغط على صبعها المجروح.. وبهدوء:

ــ طولتي وانتين تغسليه مو زين ماي واجد مع الدم ...

مامسكت نفسها صارت تصيح من قلب..

عبدالستار:

ــ فتحي حددو له ايام الزياره اذا حبيتي تروحي وياي انا باروح له ...

صياحها يزيد..

طلع تيب جروح ولف صبعها...



استدرا بيطلع....

ولا يسمعها بصوت مبحوح:

ــ سمعتني لما كنت بالغيبوبه.؟

ابتسم عبدالستار وفي عيونه الأسى يتخبى...

وبدون ما يلتفت ليها:

ــ ليش ويش قلتي...

ــ قلت اشياء كان لازم اقولها من زمان... اذا ما سمعتها برجع اقولها لك... احسك ماسمعتها على هالمعامله وياي... تعب قلبي ماني قاويه احمل هالحمل زود...



دار ليها عبدالستار وبهدوء:

ــ اذا عن اصلي ونسبي .. سمعت... اذا اشياء ثانيه اعتبريني ماسمعت..

ام عبدالستار مذهوله وتحس نفسها مخنوقه وبصوت متقطع:

ــ وابوك.. اقصد علي .. اني قتلـ..

قاطعها عبدالستار :

ــ قلت لش اشياء ثانيه باسوي روحي ماسمعتها...

مسكت كرسي طاولة الطعام.. وصارت تشد عليه وتنحب :

ــ سامحني .. سامحني على كل شي سويته فيك... قابله بأي شي تسويه فيني.. ابغى ارتاح واريح ضميري...

عبدالستار وهو لسا عاطنها ظهره.. انسلت من عيونه دمعه وبهدوء:

ــ الله غفور رحيم

الا بدخلة وداد عليهم .. انذهلت من شكل عبدالستار و الدموع اللي شافتها.. وموقفه من شافها دخلت بالسرعه يداري حزنه ويطلع من المطبخ

والا امها تنهار على ركبها حاضنه الكرسي وهي تصيح وتنوح:

ــ سامحني .. سامحني ...

وداد:

ــ ويش صاير اماه ...

وامها ابدا ماهي وياها وبس تترجى السماح



عبدالستار في غرفته قاعد على مكتبه ..

شاف القرآن قدامه فتحه وصار يقرأ ... انفتح القرآن على سورة فصلت...

وهو يقرأ وصل للآيه:

((وَمَا يُلَقَّاهَا إِلا الَّذِينَ صَبَرُوا وَمَا يُلَقَّاهَا إِلا ذُو حَظٍّ عَظِيمٍ))

لا شعورياً ... صارت دموعه تتقاطر على الصفحه.. كلما يبغى يمسحها ويكمل ..

ابدا.. مافي فايده... تزيد ولا هو قادر يشوف ..

سكر القرآن وحضنه .. وصار يصيح من قلب ... مو عارف ويش يسوي... كيف يفكر في حياته.. شلون يسامح من قلبه... محتار في عمره... !!؟؟



مثل الطفل الصغير .. صار ينوح..

الطفل بالعاده يكرر مع كل ألم .. اماااه.. اماااه..

وهو مايحس احد له غير الله...

ظل يكرر ..

ياربي ... يالله...

حط راسه على المكتب ... وغمض عيونه.. وفي البال تحوم الأفكار...