...............
بالليل ..
هاجر ماقالت لامها عن الدوخة الي صابتها .. ماتبي تخوفها ..
هاجر : امااه
ام محمد : ويش ؟
هاجر : لحم وعيش ( تضحك )
ام محمد : حتى اني تتسبلي عليي
هاجر : هتااوه اماااه أمزح
ام محمد : زين ويش بتقولي ؟
هاجر : امممم قلنا لمحمد نبغى نطلع بركة والا مزرعة وهو وافق وبيكلم صلووح وش رايج يعني ؟
ام محمد : زين نغير جو
هاجر : زين متى نخليها ؟
ام محمد : يوم الاربعاء مريم ماعليها مدرسة واختج سوسن موجوده ويانا
هاجر : خلاص على خير
ام محمد : وينها مريم ؟
هاجر : طست تنام , البارحة مانامت الا متأخرة ومن قعدتها الصبح مانامت
ام محمد : زين يمديها تشبع نوم
.....
بجهة ثانية .. محمد يكلم صالح بالجوال
محمد : زين خلاص انت احجز المزرعة
صالح : بس على أي يوم ؟
محمد : اتوقع الاربعاء ..
صالح : مافيها تتوقع والا لا .. روح اسئل خالتي واتأكد
محمد : لا الاربعاء لان سوسن ماتجي الا الاربعاء واذا طخت براسها الخميس العصر وعلشان ريموه وراها مدرسة .. انتون يناسبكم الاربعاء ؟
صالح : يناسب
محمد : خلاص توكل على الله واحجزها
صالح : زين .. وش صار بموضوعك وياا ابو سلطان
محمد : ماادري لحد الحين
صالح : ترى نهاية الشهر ماباقي عليها شي
محمد : ادري , يادفعنا ياانسجنا
صالح : وتقولها بسهولة
محمد : وش تبيني اسوي يعني .. كنت محتاج وماكان قدامي غيره
صالح : بس انت وراك مسئولية وراك امك وخواتك الي ماليهم غيرك لو انسجنت منهو ليهم
محمد : صالح والي يرحم والديك سد الموضوع لا انسجنت تالي تعال قول هالكلام
صالح : وانا بستنى لين تنسجن .. حاول ودبر المبلغ وادفعه , ان شاء الله لو تطيح بسلف ثاني ولا تظل مديون له
محمد : ان شاء الله يلا مع السلامة
صالح : ربي يهديك مع السلامة
قفل من ولد خالته .. بداخله حيرة تقتل .. صالح صادق بكل كلامه .. بس خلاص ماعاد يمدي .. كلها ايام ويخلص الشهر.. من وين يقدر يجيب هالمبلغ .. الله يسهلها ...
..........
بيوم ثاني ..
صحى ميلاد من صباح الله خير .. اتصل على رقم الشيخ الي اخذه من سلطان .. وعرف مكانه .. وقرر يزوره ويحكي له .. احسن من التلفون ..
وبالفعل .. راح لعند الشيخ الي استقبله بحفاوة .. ووجهه للمجلس ..
جلس ميلاد .. وحكى للشيخ الحِلم الي يتكرر بنومه ..
واثناء ماميلاد يتكلم ويحكي الحِلم .. وجه الشيخ كان كل شوي يتلون بلون .. وميلاد كان ملاحظه ..
ميلاد : هذا الحِلم وابي تفسيره ياشيخ
الشيخ وباين عليه التردد : خير ان شاء الله .. تقدر تجيني بوقت ثاني وتلقى التفسير
ميلاد : متى ارجع ياشيخ ؟
الشيخ وبنفس التردد : بعد يومين بنفس هالوقت
ميلاد : على خير يلا في أمان الله
الشيخ : في أمان الله
طلع ميلاد مستغرب من إسلوب الشيخ .. ليه كل هالتردد الي لاحظه من قِبل الشيخ .. ومن متى كان تفسير الرؤيا يتطلب يومين .. الله اعلم .. ركب سيارته .. وطول الطريق صورة الشيخ وتردده مافارقت خياله .. بداخله مليون سؤال مستغرب ..
......
الظهر ..
مريم : يلا خلينا نتصل لبنات خالتج , نبغى نتفق على حوايج الطلعه
هاجر وهي تآكل ملاس : اممم قومي اتصلي
مريم : زين .. ( وأخذت التلفون دقت )
مريم : هلا زينبوه ويش احوالج ,, أي اسمعي الطلعه خلاص يوم الاربعاء ان شاء الله واليوم الاحد يعني يوم الثلاثاء تعالوا علشان نتفق على حوايج الطلعه , زين ؟ وقولي لبنات خالتج ام عيسى بعد , سلمي على خالتي , مع السلامة ,, ( وسكرت السماعه )
مريم : هداكو قلت ليهم وقالت خلاص بيجوا
هاجر : يعني سؤال بداخلي يقرقع , الحين البنية مسكينة مداها تتكلم اصلاً ؟!!!
مريم ( تضحك ) : توفير للفاتورة ..
هاجر : بُرصة على رجل اختج خليلوه ( وتضحك )
مريم : وش جاب لجاب .. طسي بس ( وقامت عنها وراحت جنب التلفزيون )
هاجر ظلت مع ملاسها ( حلاوة ملاس مو تفكروا ملاس تبع الصفرية ) .. دق التلفون .. رفعته ..
هاجر : الووو
ابو سلطان : السلام عليكم
هاجر : وعليكم السلام , نعم ؟
ابو سلطان طخ عقله على صوتها : محمد موجود ؟
هاجر : لا طالع من نقوله ؟
ابو سلطان : خلاص أنا اتصل فيه وقت ثاني بس انتي مين ؟
هاجر على طول سكرته في وجهه ..
مريم : منهو ؟
هاجر : واحد يبغى محمد شكله بدوي بعد الظاهر من بتوع الشغل .. لكن هالفأر يقول منهي اني .. قليل هالادب سكرته في وجهه ( وتضحك )
مريم ( تضحك ) : ويلي عليج ماعندج تفاهم
هاجر : ابداً , ترى اني اذا عصبّت ما أرحم ( وتفقعهاا ضحكة هي ومريم )
.......
ابو سلطان دق على ولده سلطان ..
سلطان : هلا يبه آمر
ابو سلطان : هلا , رحت لابو مازن ؟
سلطان : أي يبه رحت
ابو سلطان : وعسى دفع بس ؟
سلطان : دفع يبه دفع
ابو سلطان : حلو , طيب أنا كلها أيام ان شاء الله وراجع للشمال
سلطان : على خير وحنا بإنتظارك
ابو سلطان : في أمان الله
سلطان : في امان الله
..........
بعد يومين ..
يوم الاربعاء ..
ميلاد رجع للشيخ .. مثل ماطلب منه وبنفس الوقت بس مالقاه .. قرر يرجع بوقت ثاني ..
.......
هاجر واختهاا مريم قعدوا من صباح الله خير يجهزوا للطلعه .. متحمسين مره لها ..

مريم : ياعلي وناسه مره
هاجر : أي والله وناسة ,
ام محمد : يلا ماخلصتوا
هاجر : لا خلاص خلصناااا
ام محمد : سوسن بعد ماجت للحين صارت الساعه تسع ونص
هاجر : اني دقيت عليها قالت جاية في الطريق
محمد : يلا نمشي
ام محمد : اختك سوسن ماجت
محمد : توها جت وخليتها تركب السيارة , سالفة تدخل البيت بعد , يلا يلا خلصوا وإطلعوا
هاجر : زين
جمعوا اغراضهم .. لبسوا عباياتهم وطلعوا ..
.....
وصلوا للمزرعة الي استأجرها محمد وصالح .. وكانوا خالاتهم موجودين ومرت خالهم ..
سلموا عليهم .. وجلسوا ..
هاجر : هاه جبتوا الي وصينا عليه
فاطمة : أي جبناااه وانتون
هاجر : أي جبناه , افا عليج شي ماينسى
مريم : يلا طلعوه
زينب : لا تخيلي لو احد شافنا
زهراء : صحيح وش بيقولوا عنا
سلمى : خلوه بعدين ننخش في مكان مافيه احد يشوفنا
هاجر : شوفوا اني مو قادره اصبر , ماادري كيفه صبرت ونمت وهو عندي ومافتحته
مريم : زين قوموا خلوناا ننخش بين الزرايع محد بيشوفنا
زينب : فرضي طبوا علينا
هاجر : ويش بيسووا بيذبحونا يعني خلهم يذبحونا عادي
زهراء : خلاص يلا قوموا
وقاموا كلهم .. يدوروا زراعه ينخشوا فيها ..
هاجر : تعالوا هنا هذي كبيرة محد يشوفنا
واتجمعوا تحتهاااا ..
هاجر وهي ماسكة شنطتها : يلا افتحوا شنطتكم وطلعو
زينب مسكت شنطتهم وفتحتهااا .. وهاجر فتحتها وياهم ..
هاجر بصوت عالي شوي : ياقلبي يـ ( لجلو )
مريم وهي تآكل : لو يشوفونااا بس ( وتضحك )
زينب : كأنا مسوين جريمة لو مرتكبين حرام
هاجر وهي توزع : يلا يلا اكلوا هناء وعافية ( وتضحك )