العصر ...
هاجر جالسة تلف ورق عنب للسفرة ..
مريم : ياي ورق عنب متى بتسويه ؟
هاجر : حق السفرة الليله بطبخه وبوديه
مريم : امممم
ظلت مريم تطالع بهاجر ..
هاجر : خير وش فيج ؟
مريم : ولا شي
هاجر : اعرفج ترى .. فيج شي قولي
مريم : مضايقة شوي ..
هاجر : وش صاير ؟
مريم : تعرفي صاحبتي كوثر ..
هاجر : أي اعرفها وش فيها
مريم : انا ببالي من زمان هالكلام وابي اقوله لج بس اتردد ..
هاجر : قولي اسمعج
مريم : صحيح كوثر صاحبتي واعزهم بعد .. بس لما اشوفها احس بالضيق يعني لما اشوف الخير الي هي فيه .. لا ارادياً اجلس اقارن بيني وبينها واشوف الفرق الشاسع اتحسّر بداخلي واقول ليش حنا مو مثلهم .. احيان احس اني اقل منها والا لما تهديني شي احسها كأنها تتصدق علي مع اني عارفة نيتها مو جذيه .. تعبت من هالاحساس
هاجر : اممم .. اسمعي غناتي الله سبحانه وتعالى هو مقسم الارزاق .. وسبحانه له حكمته بكل رزق .. وله حكمته بعد لما خلى الناس طبقات .. منهم الغني والفقير .. ولو تلاحظي محد يستغنى عن الثاني .. الغني يحتاج الفقير والفقير يحتاج الغني ..
الاحساس الي تحسيه نتيجة المقارنة الي تفكري فيها .. لذلك اقولج لا تلجأي ابداً للمقارنة بينج وبين غيرج والا بين الي تملكية ويمكله غيرج .. لان المقارنة احياناً بهالامور تكون صعبة ومؤلمه .. ولا تحصري تفكيرج وتخليه مادي .. يمكن صاحبتج صحيح تنعم بالخير بس يمكن فيه امور معنوية اهم بكثير تفتقدها وهي موجوده عندج .. والا عند غيرج .. لا يجي ببالج واعرفي أن كل شي من عند رب العالمين خير ..
مريم : وي كلامج ريحني .. اقول هاجروه وش رايج تشتغلي تبع هذولين الي يعالجوا مشاكل الناس
هاجر ( تضحك ) : كان ودي بس الظروف ماتساعد يلا قومي وياي جيبي اغراش الورق عنب للمطبخ
مريم بإبتسامة : زين
...
بمكان ثاني ..
محمد : انا الحين متوهق .. اتسلفت منه مبلغ كبير ودخلت بالاسهم وخسرت .. والبقية يالله تكفي والحين يطالبني ارجّع المبلغ قبل لا يرجع لديرته
صالح : تستاهل علشان ثاني مره اذا قلت لك لا تتعامل وياا احد تسمع الكلام .. رايح متعامل ويا هاللحجي الي ماتدري بأي داهية بيرميك
محمد : محتار محتار .. وخايف ما اقدر ارجّع المبلغ .. الراتب ويالله يعيشني انا واهلي .. كيف بدفع ما ادري
صالح : تعرف لو عندي ما تأخرت .. بس حضرتك بلشت عمرك بمبلغ ماهو هين ..
محمد : الله يفرجها
....
بشمال المملكة ..
سلطان : هلا بميلاد
ميلاد : هلا بك اكثر
سلطان : اعرفّك على صاحبي زياد , زياد اعرفّك على صاحبي ميلاد
ميلاد : هلا والله تشرفنا
زياد : الشرف لي والله بس ميلاد اسم غريب واعتقد اسم ممثل سوري
ميلاد ( يضحك ) : الوالده الله يرحمها سورية الاصل ..
زياد : والنعم والله
ميلاد : ينعم بحالك
سلطان يكلم ميلاد : وينك الصباح مادوامت بالشركة
ميلاد : كنت رايح فيها ( نايم )
سلطان : ليش سهران البارح ؟
ميلاد : ماقدرت انام .. الا زياد وش تشتغل ؟
زياد : مدّرس
ميلاد : ماشاء الله .. وكيف لاقيها ؟
زياد : أنا مدّرس مرحله إبتدائية .. حلوه ولكن لا تخلو من التعب
سلطان : كل شغله تلقى فيها تعب ..
ميلاد : صح .. الا اقول ماتعرفون رقم شيخ يفّسر الرؤيا ؟
سلطان : يفسر رؤيا ؟!!! ليش ؟
ميلاد : حلمت حِلم غريب .. والمشكلة انه يتكرر .. ودي اعرف تفسيره
سلطان : خلاص نشوف لك رقم شيخ
ميلاد : على خير
.....
بالليل ..
راحوا يسمعّوا سفرة أم البنين عليها السلام .. ببيت خالتها .. اثناء القراية دعت ربها يهدي أخوها ويحفظه ويهدي ابو صاحبتها واعزهم سكينة ويحنن قلبه عليها ..
عقب ماخلصت القراية .. جلست مع بنات خالاتها .. واخذتهم السوالف ..
وماحسوا الا والوقت قرب عالساعه 11 .. استأذنوا ورجعوا البيت ..
أخوها كان موجود .. حست انها محتاجة تكلمه .. محتاجة تفهم منه وش الي صاير .. ماتقدر تتركه .. بس طلع نايم ..
.....
بمكان آخر ..
عرّق جبينه .. حرارة فظيعه يحس فيهاا .. كأنه نايم على جمر .. صورة الرجال لا زالت قدامه .. النور لا زال مغشي عينه .. يمد يدهـ ولا فيه فايده .. الحرارة تزيد تحته .. يحاول يتمسّك بالنور .. يحاول يستنجد بالرجال بس صوته مايساعده ..
فزع من نومه .. وانفاسه تتصاعد .. حمم .. والعرق مالي وجهه وثيابه ..
ميلاد : اعوذ بالله من الشيطان الغوي الرجيم , يالله
شرب كأسة موية كانت جنبه .. وجلس يقرأ المعوذات ..
....
الصباح ..
جاافاه النوم .. نزل للصاله .. لقى خالته جالسه لحالها .. حب يجلس معها ..قبل لا يروح لدوامه ..
ميلاد : صبحك الله بالخير
ام سلطان : صبحك الله بالنور والسرور يلا تعال إفطر ولا تقول ماتبي
ميلاد ( يضحك ) : لا لا جاي, سلطان طلع ؟
ام سلطان : ايوه طلع .. دق عليه عمك من الشرقية وطلع على طول
ميلاد : اها .. ماقال متى راجع ؟
ام سلطان : على نهاية الشهر ان شاء الله ..
ميلاد : على خير ان شاء الله ( وجلس يأكل )
( ميلاد يصير ولد عم سلطان وولد خالته .. ميلاد هو الابن الوحيد لامه وابوه الي توفوا من خمس سنوات .. وجاء يعيش مع عمه وخالته .. سلطان له اخت وحده واسمها سارة ) >> بيبرز دورها بعدين