بسم الله الرحمن الرحيم

اللهم صلّ على محمد وآل محمد وعجّل فرجهم ياكريم

هذهِ الروايةَ هيّ الثالثةَ .. مِنْ تجَاربي المتواضعة في الكتابة
فلتغفروا لي أخطائيِ .. فما أنا إلاّ هاويةَ ..!

مقدمة

الساعه تُشير الى الثانية فجراً
أحس بالنعاس ..
رمى بنفسهِ على فراشه
اغمض عينيه .. ثم غاب ..
أستيقظ ..
فأبصر نوراً
رجلٌ ذا هيبةً ووقار
لم يستطع تحديد ملامحه
نور هذا الرجل اغشى عينيه
مد يده في محاولةً منه لملامسة
هذا النور
ولكنهـ أختفى ..
إستيقظ ..
فعِلم ماهو الا حُلم ..
الجزء الاول
بطلة القصة ( هاجر ) فتاة لها إختين وأخ وحد .. توفي والدها قبل سنوات ..





اندق الجرس .. راحت تشوف من في الباب ..
هاجر من ورى الباب : من ؟
سوسن : أفتحي اني سوسن
هاجر وهي تفتح الباب : هلا والله تفضلي
سوسن وهي تنزل ولدها من على كتفها : وي ياعلي , وينهاا امج ؟
هاجر : طلعت راحت بيت أم كاظم تعرفي توهم جايين من إيران وتتحمد ليهم بالسلامة
سوسن : احسن انها طالعه لا انكدها
هاجر : اشوف خلقتج مقلوبة لا تقولي ليي خليلوه مره ثانية
سوسن : فيه غيره ياربي عينِ وصبرني
هاجر : قلت لج من قبل خلينا نتفازع انتين بمقله واني بسحاطه ونقضي عليه ونريحج ( وتضحك )
سوسن ( تضحك ) : الله يغربل ابليسج هو صحيح جلف وبخيل وماينطاق بس بعد ابو عيالي
هاجر : الله يخليه ليهم ويهديه يارب
سوسن : ربي يسمع منج
هاجر تداعب إبن اختها : هااه برهومي ويش حالك
سوسن : أما برهومي تزولي جبدي إسمه إبراهيم
هاجر : خلاص آسفين ويش حالك إبراهيم باشا ؟ عجبج كذا
سوسن : أي الا وش قاعده تسوي؟
هاجر : ويش اسوي بعد اغافص في المطبخ .. مريموه طالبه محشى ضريبة السبايسي الي ماشريته ليهاا البارحة
سوسن : ويلي عليها ام المحشيات .. خليني اساعدج
هاجر : لا غناتي مايحتاج انتين روحي ويا ولدج المجلس داكو المكيف مشّغل تبردوا واني اخلص الكوستين الي عندي واجيج ان شاء الله
سوسن : خلاص انتظرج
....
بعد عشر دقايق ..
دخلت هاجر المجلس وبيدها صينية الشاي والكيك
سوسن : كان ماسويتي شاي مايحتاج
هاجر : لا مايصير
سوسن : وانتين كل مره اجي جذيه
هاجر : ويش سويت بعد
سوسن : ما كأني اختج كأني غريبة , من اجي طلعتي الشاي والقهوة ولكيك
هاجر : يؤ استغفر الله شاابس الغريبين انضيفهم
سوسن : مو هذا قصدي بس لا تكلفي على عمرج
هاجر : اقول عن الخرابيط بس , اصب لج إستكانة شاي ؟
سوسن ( تضحك ) : صبي امرنا لله
هاجر : ابراهيموو تبغى ربيان نسمه .. تعال عندي واجد ترى ( وتغمز )
سوسن : هيه لا تسوي حركاات اغراء اخاف ينحرف ولدي
هاجر ( تضحك ) : اغريه كان يجي هالبغيض مايبغاني
سوسن : مايشتهيج , ويش يسوي بعمره
هاجر رافعه حاجبها : لا والله ..
سوسن ( تضحك ) : أمزح .. الا وينهااا مريموه ؟
هاجر : راحت وياا امي صديقتها تصير بنت أم كاظم
سوسن : اها
هاجر : يلا قولي لي اول ماجيتي خلقتج مقلوبة .. وش مسوي خليلوه هالمره ؟
سوسن : ياعلي جنني هالرجال .. زين اذا ماجاني الضغط والسكر منه .. اليوم على الغداء مسوية دجاج والله ياوخيتي البزار كان بس نص دجاجة اكلني آكال عليه .. وانتين تلعبي بالنعمة وانتين ماتقدري وشوفي الدنيا شابة ضو على الاسعار وانتين وانتين .. بالله عليج انا وهو وعيالنا اربعه الله يحفظهم وامه وابوه واخوه كلنا بهالنص ومستكثرنه .. والله اني واولادي اكلنا عيش فاضي وفوق هذا يقول العب بالنعمه
هاجر : ياعلي ويش فيه هذا .. صحيح ادري انه بخيل بس مو لهدرجة اعوذ بالله ربي يعينج عليه هالبُرص
سوسن : آمين يارب .. خلاص احس نفسي من الضغط بنفجر .. والمشكلة لو بتكلم امه تقول قليلة حياء وطويلة لسان وماتحترم رجلها ومدري ويه .. خليهاا على الله
هاجر : الله يعينج ياوخيتي .. اصبري واحتسبي .. علشان هالجهال على الاقل .. وربج يهديه ان شاء الله
سوسن : ان شاء الله , شيلينا من سيرته لا تسدي نفسي عن الكيك شكله حلو سوايج ؟
هاجر : احم احم شرايج يعني
سوسن وهي تآكل بالكيك : اممم حالي مره
هاجر : حلاته جذيه
سوسن : تسلم ايدج
هاجر : ربي يسلمج , بتروحي بيت خالج الليله بنقرأ مولد العباس عليه السلام ؟
سوسن : ما اعتقد الجلف الي عندي يقول بيت اخوه الكبير بيجوا بيتنا الليله
هاجر : يعني المغرب بتروحي
سوسن : أي بعد ويش اسوي .. يلا عليكم بالعافية و نعوضها مره ثانية ان شاء الله
هاجر : ان شاء الله
مريم : يقولوا سوسنوه في بيتنا
سوسن : سوسنوه في لطعج اسمي سوسن
مريم ( تضحك ) : آسفة عمتي ( ورخت تحبها وتسلم عليها ) ويش احوالج
سوسن : الحمدلله بخير وانتين ويش مسوية ؟
مريم : مااعرف اطبخ للاسف ( وتفقعها ضحكة )
هاجر : ياربي عالبياخه
مريم : محد طلب رايج
هاجر : ماانتظرج تطلبيه
سوسن : ابتدينا مع توم وجيري