ونزل تحت يدور على زينب…جرس البيت يرن..راح حسن يشوف من على الباب..
حسن يفتح الباب: أوو…هذا انته
كريم يطالعه: وش الي عافسنك جدي.!! انته من وينه طالع.! من حرب!!
حسن: البركة في ولدك وخطيبتك المستقبلية
كريم يضحك ويحط صبعته على خشم حسن: هههههههههههه وش هالشموخ بعد.!
حسن: آآآآآح..يحرق..ولا تتطنز فاااهم
كريم: ههههه والله يبي ليك صورة وانته جدي
حسن: صدق والله!! عجل يلا روح مكان ما جيت
كريم: هههه افاا بس افاا…انا ما خبري بيت حجي صالح ما يكرمون الضيف.!
حسن: انته قلتها الضيف…وانته واحد من اهل البيت يعني مو من الضيوف
كريم يباعد حسن عن الباب ويدخل: مدام انا من اهل البيت عجل تباعد
حسن: هي هي انته وينه رايح..وقف وقف مو مصدق روحك
كريم: توك تقول انا من أهل البيت
حسن: وانته ما صدقت خبر…سيده درعمت
كريم: انزين عاد بتخليني الى متى واقف بره؟؟
حسن: بدخلك لا تخاف على عمرك…والله حاااله
ودخلوا اثنينهم المجلس وقعدوا..
كريم: روح جيب ولدي..ابي اشوفه ابي اعاينه وافحصه
حسن: وش قالوا ليك.! مسوين فيه جريمة
كريم: كل شي جايز…روح جيبه بشوف فيه اصابات فيه جروح فيه رضوض
حسن: رضة ترضك…ما تستحي انته
كريم: والله انته ماليك امان… يعني مو بعيده عنك تشيل ولدي وتشدخه في الأرض
حسن: صبر ليي بس…انا ما شدخته من قبل..لكن الحين قبل لا اجيبه ليك بشدخ فيه شدخة ببرد حرتي فيه..قاهرني هالعفطي…من شوي قاعد فوقي ويضربني ويكفخني
كريم: تستاهل..يأدبك
حسن: هذا ولدك يبي ليه تسطر..يقهر
كريم: انته سطره وشوف الي بيجيك…مو انا الي بسطرك..لا هو الي بياخد حقه بأيده
حسن: ادري…مدام انته ابوه لازم ياخد حقه بأيده…لكن يبط جبدي اذا سوه روحه بريئ وما يسوي شي
كريم: ههههههههه..انزين روح جيبه
طلع حسن من المجلس وراح الصاله…شاف زينب لابسه عبايتها وشيلتها وساحبة اياها حسين
حسن: على وين العزم؟؟
زينب: ماليك خص…قلت الى امي اني بطلع
حسن: ادري بتطلعين..وينه بتروحين ؟؟
زينب: بيت خطيبتك
حسن متشقق: بجي ايااش.
زينب: ويش!!
حسن: وحقويش ساحبه هالعنز اياش.!
زينب: يا الثور هذا حسين مو عنز
حسين: توووووور
حسن: جب انته…خليه هني وروحي بروحش
زينب: لااا..حق تقعد تناحسه وتصيحه
حسن: ابوه جاي لييه
زينب: يووو قول ليه طلع وياييي
حسن: اقول ليش ابوه جاي ليه تقولين ليي اقول ليه طلع وياش..ما تفهمين انتين؟؟
زينب: روح قول ليه حسين ما يبي يرجع اياك يبي يقعد ايايي
حسن: لا يكون ولدش وانا ما ادري.؟؟ يا الغبيه كريم بعد ابوه ويبي يشوفه …وش فيش انتين مخرفة؟
زينب: اووهووو..واني حقويش اقعد واعور راسي اياك..اكو الولد عندك..أسأله
حسن: حسوون تعال بوديك ايايي
حسين يجود دفة زينب: ماااااانااا ماناا
حسن: تعال بوديك للباباا
حسين: اناا ابي انوووب
حسن يطالع زينب: انتين مسويه ليه سحر؟؟
زينب: ومن وينه يا حظي بعرف اسوي سحوور وطبووب
حسن: مو راضي يروح لأبوه بعد
زينب تطالع حسين: حسين روح للبابا..سلم عليه..اني بحارسك هنيه
حسن: طالع هاادي.!! ابوه بياخده اياه مو يرجع ليش
زينب: واني وش اسوي اذا هو مو راضي يروح الى ابوه..اسطره واسحبه اليه
حسن: جب بس جب…ما منش فايده..يلا انته تعال ادلع على ابوك مو عليي
حسين: ماااابيييي
حسن حمل حسين وهو يصارخ ووداه المجلس الى ابوه
كريم: بل بل وش فيه يصارخ جدييي..وش سويت ليه؟؟
حسن: هذا ولدك دليع واجد..وانا ما اتحمل دلع الجهاال
كريم: ضربته؟
حسن: لاا بس حملته وجبته ليك…الحبيب يبي يطلع ويه زينب وما يبييك
كريم: ما يبيني؟؟؟
حسن: اي انتهت مدة صلاحيتك يمكن…يبي زينب خلاص راحت عليك
حسين قاعد ويضرب في حسن
حسن: الله يغربل بليسه شيله عني
كريم: بس بابا عيييييب
حسين: هاداا الثبااااال
حسن: محد سبال غيرك
كريم: عيييب عيييب هذا عموو ما يقولون ليه جدي
حسن: لالا خله خله على راحته..وبيشوف بعدين عاد من الي يخليه ينام ايانا..خلاص وده بيتكم ولا تجيبه ما نبيه
كريم: اي الي يضرب الي اكبر منه ويسبهم ما نجيبه هني
حسين: بابااا انا ابي انوووب
كريم: والله بلووة اياك انته..حسن روح قول لأختك توافق..هذا بيفقع مرارتي
حسن: وانا وش يدخلني..الي عليي سويته..انته قلت ليي أكلمها وكلمتها..خلها تفكر شوي وتاخد راحتها بالتفكير..هذا زواج مو لعب جهال
كريم: ادري ادري..ما يحتاج تسمعني هالموال…يلا انته واجد مصختها قوم بنروح البيت
حسين: وأنووووووب؟؟
كريم:رد يقول ليي انوووب…انوب خلها في بيتهم واحنا بنروح بيتنا…ما تستحي انته كله مخيم عندهم
حسن: تبي نصيحتي..!
كريم: أتحفنا..
حسن: خل حسينوو يعيش عندنا لين ما توافق عليك زينب وتنخطبون
كريم: أحتفظ بهالنصيحة لروحك…ما ابيها
حسن: كيفك…مردك بتقتنع فيها وبتجيبه عندنا
كريم: يلا حسينوو قوم
حسين: اناا ابي انوووب
كريم: اي انا بوديك اليها..هي الحين طلعت واحنا بنروح ليها
حسين: حثن..وينه راحت انوووب؟؟
حسن يطالع كريم: كريم وينه راحت زينب..وينه اقول ليه؟؟
كريم: شلخ عليه يا الغبي..قول ليه بيتنا
حسن: اي زينب اكي راحت بيتكم…الحين انته روح بيتكم بتحصلها هناك قاعده
حسين مصدق: يلا باااباا نرووح البيت
كريم يبتسم: الله يساعدني عليه بعدين لين وصلنا البيت…
حسن: ههههه اذا ما سكت رجعه عندنا
كريم: مو على كيفه..بيقعد في البيت وما بيشوف زينب الى الخطوبة هذا اذا وافقت..عجل هو مستانس ومقابلنها 24 ساعه وانا قاعد متحسر
حسن: هههههههههههه مسكين حسين…يعني الحين انته قاعد تعاقبه؟؟
كريم: اسكت..انا بموت قهر اذا اختك ما وافقت عليي
حسن: لا ان شاء الله بتوافق عليك وبتستانس وبيستانس حسينو اياكم
كريم: ان شاء الله..يلا حسينو قوم
حسين: انذيييين...
كريم: يلا نشوفك على خير
حسن : الله وياك
طلع كريم من البيت وأخد اياه ولده حسين...وحسن راح الصاله الى اخته زينب
زينب: جان ما جيت بعد....وينه حسين؟؟
حسن: اوووو..خبرش عتيق..حسين راح ويه ابوه بيتهم
زينب: جيفه؟؟
حسن: شلخنا عليه وراح..قلنا ليه انتين تحارسينه في بيتهم
زينب معصبة: مسكين يكسر الخاطر..جان رفيقك خلاه ايانا له...الصرااحه ما عنده سالفة الا جاي وماخدنه...الا يسمع الحين احنا متضايقين منه عشان يجي وياخده
حسن: هدي اعصابش اختي...وش فيش على كريم.!!
زينب: لان هذا رفيقك يقهر..وتصرفاته ترفع الضغط
حسن يطالعها وهو معصب: وحضرتش نسيتين انه حسين ولده ...وانتين بصفتش من عشان تخلين حسين عندش وتقولين كل هالكلام...لا انتين امه ولا اخته ولا تصيرين ليه بعد...واذا فكرتين انش توافقين على كريم ديك الساعه تقدرين تخلين حسين اياش على طول..أما الحين ماليش كلمة
زينب سكتت ..ما عندها كلام تقدر ترد به...وطافت قدامه عشان تروح بيت زهرة
حسن: وينه بتروحين؟؟
زينب طالعته ومشت عنه...حسن لحق وراها وسحبها من ايدها
حسن يصارخ: ما تسمعين؟؟؟
زينب والدمعة واقفة على الباب: نار جهنم الي تحرقني
حسن: لا تسوين روحش مسكينة وتقعدين تصيحين ...قعدي مكانش مافي طلعة
زينب تطالعه: مثل ما اني ماليي كلمة في موضوع حسين...حتى انته ماليك كلمة عليي...مدام امي وابوي عاطيني أذن أطلع ..انته ماليك راي
وطلعت عنه بسرعة وشدخت بالباب وراها
حسن: ووجع يوجعش يا زنبوو...اراويش لكن...مطلعه هاللسان عليي انا هاا...والله ان ما وافقتين على كريم بالطيب ازوجش اياه غصباً عنش ....
في بيت حجي مكي
في حجرة زهرة
زهرة: انتين الحين ما بتقولين ليي وش فيش؟؟من جيتين وانتين نافخة وجهش..وش سالفتش اليوم؟؟
زينب: وش تبيني اقول يعني.!
زهرة: قولي وش فيش..
زينب تصيح: هذا كله من رجلش الله ياخده ورفيقه الأعوج
زهرة: رجلي؟؟
زينب: ايي حساانوو طايح الحظ
زهرة: هي هي انتين وش فيش قاعده وتدعين عليه..
زينب: اييي من حقش تدافعين عنه...اني الغلطانة الي جايه افضفض ليش
زهرة: انزين خلاص عاد...هو وش مسوي فيش؟؟
زينب: مو بس هوو حتى رفيقه قاهرني بعد...لا ويبي يتزوجني بعد عشان كل يوم نصبح بهواش ونمسي بهواش
زهرة: يا ربييي...انتين الحين فهميني وش السالفة بالضبط...حسن وكريم وش مسوين ليش؟؟
زينب: كريم الرزيل جاي بيتنا عشان ياخد حسين من شوي..وحسانو الغبي عطاه ايااه
زهرة: انزين وش المشكلة يعني...كريم ابو حسين..عادي يعني يجي وياخده..شي طبيعي..عجل تبينه يخليه عندكم طول العمر.!!
زينب: أصلا حسين ما يبي يروح اليه...خلاص تعود عليي واني تعودت عليه...
زهرة تقاطعها: وانتين بعد عقلش صاير عقل صغار...صايرة ما تعرفين تفكرين ولا حتى تتكلمين..!
زينب: وش قصدش.! اني جاهلة؟؟ ما أفهم؟؟
زهرة: زينب بسألش سؤال واحد..
زينب: سألي يا فهيمة
زهرة: انتين موافقة على كريم او لا؟؟
زينب باهتمام: أكيد موافقة
زهرة: انزين...انتين من أي ناحية موافقة عليه؟؟
زينب: وش قصدش؟؟لا تكلميني بالألغاز
زهرة: اني قاعده أكلمش عادي..لا ألغاز ولا شي..بس انتين الي عقلش مسكر...فتحيه شوي وفكري عدل...ما تشوفين روحش صايره واجد عصبية وحساسة وعلى أقل شي صحتين
زينب: انزين لا تسوينها ليي سالفة الحين...قولي ليي وش قصدش وبس.!
زهرة: اني اقصد انه هالموافقة جت بسبب حسين او لأنش مقتنعه بكريم.!!
زينب: زهرة اني صدق يعني احب حسين وتعودت عليه وهو بعد متعود عليي ومتعلق فيني...بس اني ما بضيع عمري ويه واحد ما ابيه ومو مقتنعه فيه
زهرة: متأكدة.!!
زينب: أيي متأكدة..وأصلا اني من أول ما شفته.....وسكتت
زهرة تطالعها: كملي...من أول ما شفتينه وش صار؟
زينب: لا ما صار شي...
زهرة: لا انتين كنتين بتقولين شي...قولي
زينب: لا ولاشي..
زهرة: زنبوو..بتقولين او لا؟؟؟
زينب: مافي شي أقوله اصلا
زهرة: عليناا...قولي قولي من أول ما شفتينه عجبش...ترى اني أعرفش زين...وكنت حاسه بالهشي....وبعد من المواقف الي تصير ليش اياه
زينب مبطله عيونها: وش دراش اني معجبة فيه.!!
زهرة: قلت ليش..من المواقف الي تصير ومن كلامش عنه والنظرات الي بينكم اذا تتلاقون..
زينب: حشى حشى حشى....محللة نفسية طلعتين واني ما ادري
زهرة: عبالش ما ادري..بس اني ساكته وما تكلمت ابيش انتين بنفسش تجين وتقولين ليي
زينب: اهاا...هيك يعني..
زهرة: لااا حلفي...وحقويش ما تجين تقولين ليي هااا
زينب: ما صارت في فرصة عشان اعبر ليش عن مشاعري
زهرة: ولو ما اني الحين سحبت من الكلام تسحب جان ما قلتين بعد
زينب: والله انتين متفرغة...بقوم اروح بيتنا الحين اكيد حسانو موصل حده عليي
زهرة: هيي انتين عدلي لسانش شوي...قولي حسوون..حساني..
زينب: روحي ولي مناك
زهرة: انتين يبي لييش تسطر عشان تتعدلين شوي
زينب: تصدقين عاد..أكتشفت شي
زهرة: ويش؟؟
زينب: انه انتين وحسن طينتكم وحده..
زهرة: لا صدق..إكتشااف عظيم...تستحقين جائزة عليه...مالت عليش يا الهبله...انتين ما تدرين انه اني وحسن مخلوقين عشان نكون لبعش..يعني شي طبيعي انه بنكون نفس الشي..اني وحسن واحد
زينب: صدق!!...لا تعلمين أحد عاد...يلا يا عاشقة حسن مع السلامة
زهرة: حياش الله يا معشوقة كريم..كل يوم تعالي
بعد في تحت
7
7
7
7
7
رد مع اقتباس
المفضلات