رد مع اقتباسفي اليوم الثاني في الليل
في بيت حجي مكي
في الصالة الثانيه عند حسن وزهرة
الهدوء سيد الموقف...زهرة منزلة راسها وعيونها تطالع الأرض....وحسن يهز رجوله بتوتر...يبي يكسر هالصمت بأي كلمة بس مو قادر>>>يلا تكلموا له
بعد ربع ساعه من الصمت...تكلم حسن
حسن: احم...احم
زهرة رفعت راسها بسرعه وردت نزلته
حسن: انا ما اعرف اتكلم ويه احد ما يطالعني
زهرة : والمطلوب؟؟
حسن انحرج: أ...أ...طالعيني شوي
زهرة: اني افضل اني اكون جدي
حسن: اممم على راحتش...انزين انتين ما عندش اسئلة
زهرة: امبلا..عندي بس انته قول الي عندك اول
حسن: لالا ليديز فيرست>>> اسمع ولد ميري
زهرة: انزين انته تدري انه اني ابي اكمل دراستي...وطبعا اني ادرس الحين عشان بعدين اشتغل..وعشان يكون لي كياني الخاص...يعني اني ما ابي الحين ادرس واتعب وبعدين ما اشتغل واعلق شهادتي في المطبخ
حسن: انزين انا ما بمنعش لا عن دراستش ولا عن شغلش..بس انتين تقدرين توفقين بين الدراسة او الشغل والبيت؟؟
زهرة: ان شاء الله بقدر
حسن: ان شاء الله...انزين وبعد ما عندش شروط او أي شي...يعني مثلاً تبين بيت بروحش لو عادي انش تسكنين في بيت ابوي بس طبعا بيكون ليش شقة بروحش...يعني عندش حريتش
زهرة: لالا اني في هالمسأله ما عندي أي اعتراض او شي..بس اهم شي عندي انه ما تصير مشاكل بيني وبين بيتكم
حسن: لا ان شاء الله ما بتصير مشاكل...وانتين تعرفين امي من زمان بعد مو توش تعرفينها
زهرة: أي الحمد لله ما شفنا منها شي...ممكن سؤال ثاني!!!>>> حل عليها الأدب البنيه
حسن: أي تفضلي
زهرة: اذا خلصت دراستي ان شاء الله وتوظفت...عندك مانع لو كان شغلي مختلط؟؟؟
حسن: الحين تقريبا في كل مكان صار في اختلاط...بس انا واثق انش بتلتزمين حدودش ويه الشباب الي بيكونون اياش في الشغل...فما عندي مانع من هالناحيه
زهرة في قلبها: اشوه ما طلع ليي متخلف
زهرة: اممم وانته ما عندك أسئلة؟؟
حسن مو عارف وش يسألها: هاا...أنا..هههه لالا ..أي أي عندي
زهرة تبتسم: تفضل إسأل
حسن: زهرة يعني ان شاء الله لين صار نصيب بينا بتوافقين نخطب من الحين!!!>>>خلصت الأسئله الا تسألها هالسؤال!!!
زهرة منحرجه: ما تحس انه توها الناس على هالسؤال؟؟
حسن باستعباط: هذا السؤال الي جا على بالي ...
زهرة: في نقطة انته الحين ذكرتني بها
حسن متشقق: وش هي!!
زهرة: لو صار نصيب وانخطبنا من الحين اني ما ابي اعرس بسرعه...افضل نكون مخطوبين لين ما اخلص دراستي..
حسن وعلامات التعجب على وجهه: يعني تعتقدين انه انا بأثر على دراستش بعدين
زهرة: ما اقصد انه انته الي بتأثر عليي...بس اني اخاف هالأشياء تلهيني عن دراستي..واني ما ابي اعيد السنه مرتين ابي اخلص بسرعه يعني...وانته عليك تساعديني وتوقف ايايي
حسن يبتسم: من عيونيي>>>اصطلب يا صبي
زهرة طالعت الأرض وهي متفشله حدها
حسن يغير الموضوع: طبعا انتين تدرين انا وين اشتغل
زهرة: أي
وظلوا ساعتين في هالمقابلة...كل واحد يسأل الثاني وحسن استحلى السالفة وقعد يسولف اياها شوي...وزهرة كان ودها تقعد أكثر إياه بس انتبهت للساعة واستأذنت منه وطلعت عنه
وأول ما طلعت قابلتها زينب وطاحت فيها أسئلة
زينب باهتمام: ها مرت اخووي وش قلتون وش سولفتوون؟؟
زهرة تضربها على راسها: بلا غباء يعني وش قلنا...فاتحين محضر وكل واحد يسأل الثاني..
زينب: بس!!!
زهرة: أي بس بعد وش تبين نقول
زينب: لا يعني اخويي ما قال ليش شي مني مناك...ترى هذا حسانو اني اعرفه زين ما زين
زهرة تسوي روحها عصبة: لا والله ... هذا الي ناقص بعد يقول ليي من هالكلام
زينب تضحك: هههههه لالا صدق يعني ما قال شي!!
زهرة: روحي ولي مناك عنيي...وبعدين حتى لو قال ما بقول ليش وش قال
زينب تغمز لها: اييي يعني قال قال..
الجدة: وش فيكم تتساسروون...
زهرة: لا مافينا شي بس هادي تسألني عن الكلية
الجدة: ايي...تعالي يا بتي تعالي قعدي صوبي
زهرة في قلبها: ايي بدينا...الله يصبرني
راحت زهرة وقعدت صوب جدتها
الجدة: هاا عجبش الصبي..لو للحين ما تبينه؟!!
زهرة مستحية: اوو جدتي الحين وقته هالسؤال...حارسي الأوادم يطلعون أول
الجدة تبتسم: اييي يعني عجبش.... ترى حسن ولد حلال ويخاف ربه وبحطش في عيونه...لأن يبين عليه يحبش بس انتين تتدلعين واجد
زهرة: لا والله!!
الجدة: واني الصادقه..
وبعد ما خلصوا سوالفهم بيت حجي صالح رجعوا بيتهم...وحسن كان في حالة ما تنوصف...كان عنده هاليوم عيد مستانس أول مره يقعد ويه زهرة بروحهم وأول مره يقدر يسولف اياها ويقول الي في خاطره...بس عاد مو كلشي....لأن لكل شي حدود.... وأول ما دخل حجرته أخد الدبدوب ماله الي هو مسمنه باسم زيزوو يا زعم اسم الدلع الى زهرة خخخ...وقعد يغني ويرقص اياه
حسن يغني: أول مره تحب يا قلبي وأول مره أتهنى....وهو يرقص ويناقز مثل الهبلان ويصارخ من الوناسه
سمعت زينب صوت مناقز وصراخ و طلعت تشوف وش السالفة....شافة الصوت جاي من حجرة أخوها...وراحت تدق باب الحجرة...بس ما كان يرد عليها...فتحت الباب بدفاشة
زينب تطالع أخوها: الحمد لله والشكر...استخفيت قاعد تناقز وتصارخ..تبي الحين يجي ليك ابووي ويسطرك
حسن ولا يدري بهوى دارها...قاعد يغني ويرقص
لما شافت زينب انه ما بيفيد اياه الكلام...راحت واخدت قوطي الكلينكس وفلعته عليه
حسن انتبه ليها واخد القوطي وفلعها به..
حسن: يا الدفشة ما تعرفين تطقين الباب
زينب: احلف يا الناعم...طقيت الباب جم مره بس انته يا العاشق ما تحس...غرقااااان في بحر الحب
حسن يجود قلبه: آآآآه آآآه آآآآه
زينب راحت صوبه تتطنز: وييي اسم الله عليك أخووي وش يعورك؟؟
حسن: قلبي قلبي قلبييي
زينب فيها الضحكة: لا يكون انته مريض بالقلب.!!
حسن يصفعها: اسم الله على قلبيي.... يلا قومي دلفييي خليني بروحي احلم
زينب: احلم احلم مالت عليك الحلم ببلاش
حسن يسوي لها حرة: وان شاء الله بيتحقق هالحلم....ويبحلس عليها
زينب سوت له مالت وطلعت عنه....
يوم الأحد
الصبح الساعه 8
في بيت حجي صالح
حسن يصارخ: زنبوووو يلا بسرعـــــــــــه اتأخرناااا
زينب: وصييييييييخ ...بطيت أدوني من صراخك...وبعدين توها الساعه 8 يعني لا تأخرنا ولا تهر واجد الا اني اعرفك على ويش مستعجل
حسن: شوفي عاد اني واحد مو فاضي ليش ولهرارش....بروح اشغل السيارة وبعد من الواحد الى العشرة وان ما جيتين بروح عنش وخلش تولين
زينب: افاااا...وتهون عليك زوجة المستقبل...بعدين بيطوفها التسجيل وبتخسر سنه كامله بدون دراسه...ويلا عاد بعدين بتحارس واجد ولا بتعرس
حسن: الله يغربلش ان شاء الله...يلا عاد بسرررعه
زينب: انزين انزين بس بشرب الجااااي
حسن: امشي حمليه ايااااش وشربيه في السياره
زينب: بس عاااد لوعت جبدي بطحنتك من الصبح...هداني جييت يلا اطلع
وركبوا اثنينهم السيارة ومروا على زهرة وخدوها اياهم...في السيارة
حسن يطالع زهرة من المنظرة: زهرة وش بتدرسين:
زهرة: صيدلة..
زينب تطالعه: لا والله ...اني اختك ما كلفت روحك تسألني وش بدرس...والحين تسأل زهرة.!!
حسن: ما ليش خص..يلا جب
زينب: الحين تقول ليي جب هااا...لكن انته ما ينفع اياك الطيب...مره ثانيه عاد احلم نركب اياك..نروح في تاكسي ولا نركب اياك
حسن: والله انتين بتروحين في تاكسي روحي...لكن في ناس ما يقدرون يسوون شي بدون ما ياخدون شوري
زهرة تطالعه: لا يكون انته ولي أمري!!!
حسن يبتسم: ان شاء الله عن قريب بصير ولي امرش
زهرة: وانته وش ضمنك اني بوافق يعني!!
حسن منصدم: وش تقولين!!
زينب: هههههههههههههه هي انتين وش قاعده تقولين الى اخويي المسكين طيحتين قلبه في الارض....خلينا نوصل بسلام لا يدعم بنا الحين
زهرة تضحك: طالع قدامك وسوق الله يخليك هههههههههه
حسن: انتين الثنيتن وش فيكم عليي اليوووم...ترى انا اعرفكم كله تتآمروون على الشر
زينب: اني!! الا اني برئية بس زهرة علمتني
زهرة تطالعها: الله واكبر يا الظالمه...اني علمتش؟؟ لا تقعدين وتألفين كلام عليي
زينب تغمز لها: هااا...تخافين بعض الناس يكنسلون علييش
حسن يغمز الى زهرة: لا والله انا ما اكنسل لو وش يصير....أحد يتخلى عن قلبه!!
زهرة تفشلت ونزلت راسها وهي حدها مستحية من حسن
زينب: هيي انته وش سويت في رفيقتي...وجهها صار طماطية...
حسن: هههههه بس خلاص سكتنا...
نزلوا تحت في تكمله
7
7
7
المفضلات