أم سعيد تروي لنا ما جرى وما حدث

تقول ام سعيد ليكم ولينا >>>>>>>>>.............

قبل 25 سنه وأزيد بشوي
كنا عايشين في فريق من فرقان لول اللي الجار يدش على جاره ما احد يقول له شي ، النفوس أطيب من الحين
وما ميش تفاخر الا بالشي الزين ، بس كيد النساء موجود
وخبث الرجال موجود ، وهذا الشي من أبد الآبدين موجود
ولاهوه محدود بمكان ولا زمان عشان نقدر نقول لا مو موجود بعد هالشي

المهم بتي حميده كانت حيفها صغيره ما صار عمرها سنه ، تلعب في الحوي ولا عليها من شي وإحنا بعد نخليها على راحتها ، وابوها الله يرحمه ما يقصر وياها بس غفل عن شي
ما اهتم به ابداً

ما طعمها من اول ما جابوها ولا راح بها سبيتار
عشان يوتنوها ، عاد أقول ليكم لا تنسو توتنوا
جهالكم عشان لا يصيروا مفل ما صارت حميده هاه

المهم وكبرت حميده وكل يوم عن الفاني نشوفها تضعف واحنا يا غافلين ليكم الله
ما عرفنا انها مابتقدر تمشي ولا تخطي من وعت على هالدنيا وعرفتها
مسوى ابوها ما راح بها سبيتار صار ليها هالشكل
ونحمد الله ونشكره على هالشي هذا بعد ما بيدنا حيله

وهذا جارنا اللي هوه ولد الملايه أم علي بعد من وعى على هالدنيا وهوه ما يتكلم ، وامر الله جرى وصار

وأمه يا غناتي مهي مقصره عليه تعلمه وتربيه احسن تربيه
ومهي مقصره عليه في شي ابد
وابوه بعد مهو مقصر ايه مو مقصر بعد
من يروح الارانكوووه يجيب له من الكانتين اغراض حليوه
وهوه من يجيب الاغراض ابوه يجي لينا البيت ويقعد يعطي حميده اغراض ويدلعها بعد ويش
واني ينتابني شوي حاجات ما يقصر ويايي بعد

ومن اشوف اني قوطي عرانص من العزيه ولا ستروله عاطيني وياها العزيه اضمها اله
ولا كل يومين فلافه اعطيه بيض للملايه
مسوى البيض العربي ويا حليبة الغنم من تخلطوهم ويا بعض يصيروا زينين للحلق والبلاعيم ويروحوا الكحه عنكم
إخطشّرْ عنكم وعن ولادكم
وأبو سالم وابو فاطمه ربع من زمان
من قبل لا ابو سالم يشتغل في الأرانكوووه
وابو فاطمه يشتغل في شركة الكهرب

كانوا يروحوا ويا بعض عند البحر ويتحدقوا ويا بعض
ويتقاسموا اللي يصيدوه

ايييييييييه ايام راحت وايام جت
بس ما انقطعت الصداقه والمحبة والمودة بين الناس ، الله يديم النعمه يارب ويديم المحبة

المهم .........نتابع وياكم ان شاء الله
يالله ..فمان الله