السلام عليكم ورحمة الله وبركاته


ومسائكم / صباحكم قشطة وبسبووووووووسة،


من منا ما يحب البسبوسة، أكيد الكل يحبها وخصوصاً حزة لمة الأهل،



إنزين عاد شفت طبخة البسبوسة في الإنترنت، وحبيت إني أطبقها عندي وغيرت فيها إشوي





نبتدي بالطبق الرااائع



بسبوسة الأوريو



المقادير:


نص كوب سكر
نص كوب زيت
ثلاثة ارباع كوب سميد
ثلاث بيضات
نص ملعقة صغيرة فانيلا
ملعقة كبيرة بينكغ بودر
8 حبات بسكوت أوريو
باكيت شعيرية باكستانية>>عاد أني هالشعريه ماعرفها ولاعمري جربتها أو حتى شفتها
ثلاثة أرباع علبة حليب محلى







الطريقة:


- قبل كل شي شغلي الفرن على درجة 175 وبعدين نبتدي الشغل، أول شي كسري الشعيرية وخليهم في صحن، وكسري بسكوت الأوريو وخليهم في صحن بروحهم وترى ما يحتاج تشيلين الكريمة البيضة






- أحين في طاسة كبيرة، خلي البيض + السميد + الزيت + السكر + البيكنغ باودر + الفانيلا وخلطيهم زين ما زين بالخلاط،






- أحين ضيفي بسكوت الأوريو، وحركيهم بالملعقة الخشبية ما يحتاج بالخلاط،







- صبي الخليط في البايركس عقب ما تدهنينه بالزبدة وبيكون بهالشكل








- أحين ضيفي من فوق الشعيرية، ووزعيها بالتساوي على كبر البايركس، واضغطي بيدج بنعومة على الشعيرية علشان إشوي تنزل على تحت بس مو تهوسين بقوة وتخربين الطبخة ، لين ما تخلصين الجيسة كاملة








- أحين خلج معاي، غطي البايركس بالألمنيوم، زين ما زين، ودخلي الطبق في الفرن، وخليه في الفرن تقريبا نص ساعة أو أكثر إشوي، بس حاسبي لا تحترق البسبوسة عليج،



بعدين إكشفي الغطاء وخليها خمس دقايق، أو كفاية حرارة الفرن،


- طلعيها وهي حااااارة، صبي عليها الحليب المحلى بهالصورة، ولا تخافين تشوفينه مغروق، عااادي كله بينزل تحت بعدين، ورشي المكسرات اللي تحبينها، بس لا تكثرين






وخليه البسبوسة برع، لين ما تبرد بروحها، خليها على راحتها ساعة ساعتين، لين ما تبرد عدل،


وبعدين قصصيها بهالصورة، وتلاحظين إن الحليب المحلى كله نزل تحت،






وخليهم كلهم في صحن واحد، أو في قوالب ورقية صغيرة، وبتشوفين روعة الألوان بين الأبيض والأسود في البسبوسة، والريحة بعد كلش روعة في البيت،


وهاج زهبي معاها القهوة مرة وحدة،








وعليكم بألف عافية عاد ناطرة تطبيقات منكم يا بنات،


تراها سهلة وما تاخذ وقت