ورجع حسين وقعد في الإنتظار .................
ومرت عشر دقايق ..........ربع ساعه ..........نص ساعه
الدكتور:- الأخ حسين لو سمحت تجي معايا المكتب
حسين :- خير يا دكتور خير ...ويش فيه
الدكتور:- مفيش حاجه يا أستاذ ، بس شوية إجراءات
حسين :- مو خلصت ويا الاستقبال انا
الدكتور:- لأ بس عاوزك في المكتب
حسين :- لا تخلعني يا دكتور ويش صاير
الدكتور:- انته تعال معايا وحتعرف
حسين :- خير أجل يالله تفضل
ومشى الدكتور ووراه حسين لامن وصلوا للمكتب ودخلوا
الدكتور:- بص يا بيه الوضه دلوئت مش عاوز الا هداوة اعصاب
حسين :- ويش فيه يا دكتور قول بلا مقدمات
الدكتور:- انته بص حضرتك ، وضه أريبك مش ولا بد يعني وهو الحين دخل في غيبوبة مش عارفين متى حيفوء منها
حسين :- وشوووووه غيبوبه ، ويش صاير بعد فيه ويش سويتوا فيه انتون ، انا يوم أجيبه ما فيه الا ضيقه في الصدر
الدكتور:- لا لا إحنا ما عملناش حاجه ‘ إحنا اديناه ابرة مهدئ بس ومغدي ودي هيت اسم الإبره والمغدي لابد منه في الحالات دي ، وهو دخل في غيبوبة مفاجأة يعني
حسين :- انا لله وانا اليه راجعون ، والحين
الدكتور:- الحين بص حضرتك ، إحنا حنحاول معاه وان شاء الله يستجيب للعلاج ويمكن يفوء
حسين :- وهالشي فيه خطوره عليه
الدكتور:- لا مفيش خطوره ولا حاجه ، بس يعني الإحتياط واجب ، وانته تعرف إننا لازم نخبركو عن الوضع علشان يكون موقفنا سليم وتأكد يا بيه اننا حنبدل كل اللي نئدر عليه
حسين :- يالله بعد ويش نسوي ..........والله يستر
الدكتور:- وانته وئع الأوراء ديهيت علشان العلاج
حسين :- زين ويش المرض اللي يعاني منه أبوعمران
الدكتور:- هو لسا التحليل ما ظهرش ...بس إحتمال إنو يكون عندو فشل كلوي
حسين :- يا دافع البلاء يا الله ...علي يا علي
الدكتور:- أيوا يعني المؤشرات تدل على كده علشان كده مش حنستعجل في الحكم
حسين :- وهذي ليها علاج ولا خلاص يعني
الدكتور:- لا ...إزاي ..إن شاء الله ليها علاج ومتخفش يابيه توكل على الله وفوض أمرك ليه
حسين :- ونعم بالله ، ونعم بالله
الدكتور:- إنته رجل مؤمن وتعرف ربنا كمان
حسين :- الحمد لله رب العالمين على كل حال
وخرج الدكتور وتبعه حسين ...........أمر الدكتور وبناء على توصية حسين بنقل أبوعمران لغرفة خاصه ، وإبتدأ على الفور بعمل العلاج وكل شوي يتصل بالمختبر يتطمن على نتيجة التحليل ، وبعد عشر دقايق
جائت نتيجة التحليل كما قال الدكتور ........أبو عمران عنده فشل كلوي
الدكتور:- بص يا حسين دلوئت تأكدت إصابتو بفضل كلوي مزمن وإحنا حنواصل العلاج والبائي على ربنا
حسين :- ونعم بالله ، وان شاء الله يفيد العلاج معاه
الدكتور:- الحمد لله انوما عندوش فشل كلوي حاد ، يعني هو عندو فشل كلوي مزمن والنوع ده ليه علاج واذا مره مره يعني ...زراعة كليه
حسين :- الله المعين ويارب تفرجها يارب
الدكتور:- انته دلوئتِ إدعي لو بس وان شاء الله يصير أحسن
حسين :- يارب
الدكتور:- وإحنا حننتظر انو يفوء من الاغمائه وبعدين نبتدي نعمل لو تحاليل وربنا المعين
حسين :- لا تهتم للمصاريف يا دكتور ، إعتبرها مدفوعه
الدكتور:- المسأله مش مسألة مصاريف ، أنا ما بيهمنيش الا صحتو بس واللهي
حسين :- خير يا دكتور الله يوفقك ويرحم والديك
الدكتور:- دلوئتِ روح انته ارتاح وسيب ليا رئم جوالك وتلفونك علشان لو فيه أي تطورات نتصل بيك
حسين :- هذا كرتي يا دكتور وتقدر تتصل بي في أي وقت تحب صبح ليل أنا موجود
وطلع حسين وراح لسيارته وحركها ......بس الدمعه في عيونه ما فارقتها ............ويش يا ابو عمران ......
ويش اللي صابك .........الله يستر عليك يا أبو عمران ويعافيك ..........وترجع لبناتك ومرتك من جديد
يااااااااااااااااااااااارب
ووصل شقة أخته مريم وقف سيارته ودخل ليهم
مريم:- هاه يا خوك بشّر
حسين:- الحمد لله على كل حال يا أم عمران ، أبو عمران يمبى دعاش بس الحين وإن الله يفرج عنه
مريم:- ويش فيه أبو عمران ...قول يا خوي ولا تغبي عني شي قول
حسين:- أبو عمران الحين خيه يحتاجش أكفر من أي وقت ، يمبى منش تدعي له الله يفرج عنه
مريم:- ويش فيه خلعت قلبي يا خوك
حسين:- الحين هوه في غيبوبه
مريم:- يااااااااااااااااااااااااااااااعلي يااااااااااااااااااااااااعلي ،من ويش ولاويش وكيفه كده
حسين:- خيه إستهدي بالله يا خيه وصلي على النبي وآل النبي
مريم:- اللهم صل على محمد وآل محمد ، بس من ويش له
حسين:- خيه رجلش أبو عمران فيه فشل كلوي
مريم:- انا لله وانا اليه راجعون
حسين:- بس يا خيه إحمدي ربش ان اللي عنده قابل للعلاج ولا هوه مره ما اله علاج
مريم:- الحمد لله على كل حال
حسين:- وانتين بعد ادعي له ان الله يفرج عنه
مريم:- ياااااااااااااااااااارب
حسين:- وين البنات ؟؟
مريم:- نيمتهم وقعدت احارسك تتصل
حسين:- الحين انتين نامي وبكره اروح وياش الدختور
مريم:- كيفه بيجيني نوم وابو عيالي غايب
حسين:- ؟؟؟؟؟؟؟؟؟
مريم:- ياخوك انته ما دريت عنه وعن سالفته يا خوي
حسين:- ويش صاير ؟؟؟؟؟
مريم:- ابو عمران تغير عن اول مررررررره ، ترك سوالفه كلها وتغير ، ويوم تغير صار له هالشي ...إه
حسين:- الحمد لله ياخيّه .....إحمدي ربش الف على هالشي
مريم:- الحمد لله على كل حال يا خوك
حسين:- وإعرفي ان المؤمن مبتلى يا خيّه
مريم:- الف الحمد لله على كل حال
حسين:- يمكن هذا الشي صار من الله علشان يثبت أبو عمران على درب الهدايه
مريم:- ما نعتلاض على حكم الله يا خوك ، بس كيفه بيجيني نوم وأبو عمران فيه اللي فيه
حسين:- تمبي تروحي ويايي الشقه وتنامي هناك حاضر
مريم:- لا يا خوك تالي افقل عليك ، وزهراء تتضايق
حسين:- لا يا خيه ، الحين با اتصل بزهراء وبا اقول ليها
وبدون ما ينتظر إعتراض من مريم اتصل بزهراء وخبرها بالوضع وقالت له :- بالعكس يا غناتي جيبهم وداني با أجهز ليهم غرفة يناموا فيها
مريم:- ما يحتاج يا ابو أزهر
حسين:- وشوه اللي ما يحتاج ، قومي بس قومي شيلي لبناتش فياب وانتين بعد ما يصير تقعدوا لوحدكم
مريم:- دام انته تشوف كده خلاص أجل داني با اجهز فياب للبنات وبا احطهم في الشنطه
حسين:- يالله خيه بسرعه
مريم:- يالله الحين داني قمت
وقامت مريم وجهزت أغراض البنات وأغراضها وحملت سلمى وحمل حسين هدى وركبوهم السياره
وراحوا لشقة حسين ..............
أما محمود وفاطمه فوضعهم مختلف نوعاً ما ، فهم انشغلوا في العمل ولم يستطيعوا حتى أن يعرفوا أي أخبار عن أي أحد سوى بعض الاتصالات الخفيفة للسلام بين محمود وحسين وبين فاطمه وزهراء لا تتعدى بعض الكلمات ومن ثم يعودوا لعملهم
أتصل د أحمد بمحمود وطلب مقابلته لأمر ضروري جداً جداً
د أحمد:- الوه ....محمود
محمود:- هلا يا دكتور ، كيف حالك
د أحمد:- اهلين الحمد لله ، وينك انت
محمود:- موجود بس مشغول في العمل يا خوك
د أحمد:- الله يعينك ..با أسألك
محمود:- قول تفضل .
د أحمد:- تقدر تقابلني ، أمباك لحاجه ضروري يا خوك
محمود:- خير آمر
د أحمد:- لا ما تصلح ف يالتلفون امبا أقابلك
محمود:- خلاص ويش رايك نتصل بحسين ونتقابل
د أحمد:- لا لا ، أمباك انت لحالك
محمود:- هاااه ، ويش فيه يا خوك
د أحمد:- امباك في موضوع شخصي
محمود:- خلاص بس انا هاليومين مشغول مرررره
د أحمد:- يعني اقرب وقت متاه
محمود:- ما ادري ، دقيقه با أشوف الجدول حق الكوشات والتركيب ...دقيقه
وقام محمود يشوف الأوقات .......
د أحمد:- هاه يا خوك ويش
محمود:- خلاص بكره الظهر بس وينه
د أحمد:- با امر عليك الشقه ونطلع نتغدى في مكان ونتكلم في الموضوع
محمود:- وهو كذلك بس هاه ...ما بنطول لأن عندي تجهيز كوشه العصر بعد
د أحمد:- ما فيه مشكله ان شاء الله
محمود:- وهو كذلك اخويي
د أحمد:- يالله مع السلامه
محمود:- فمان الله
وقعد محمود يفكر في الموضوع .......ويش يمبى هذا ....وويش اللي فيه ..يمباني لحالي ولا يمبى حسين ويانا .......ما أدري اقول لحسين ولا ما اقول ...........الله يعين ..........ويش اسوي انا الحين .......والله بالي مشغول ولا هوه فاضي لهالحاجات بس يالله ........مهما يكون هذا صاحبك وتحمله ........يمكن عنده مشكله عائلية ........ولا يمبى شي ولا شي
>>>>>>يتبع
رد مع اقتباس
المفضلات