وعودة لما قبل هذا ......الى الساعه أربع ونصف نشوف ويش اللي صار في شقة حسين ............

أبو حسين :- ويش يا ولدي بتسوي في إجازتك

حسين :- ابد يمكن نسافر

أم حسين:- وينه بتروحوا

زهراء :- ما يندرى عمه ، يمكن إيران خاطري في الرضا عليه السلام

أم حسين :- اييييييه ضامن الجنة الله ينولك مرادك يا بتي

حسين :- داواه زهور ...ما فيه ميوه له

زهراء :- الا فيه بس أخذتنا السوالف

أم حسين :- ولاويش ، ما حنا غرب إحنا ....اذا بغينا حاجه بنقول

زهراء :- لا يا عمه لازم على الاقل شاي ، مكسرات

وقامت تجهز الميوه ، وبقى حسين ويا أمه وأبوه

حسين :- ويش يباه ما بتشوفوا حل لرجل مريم له ، تراه مصخها ويا أختي

أبو حسين :- ويش اسوي اله هذا ... شقه وعطيناه ، عبالة الكهرب ودحنا ندفع عنه الفاتوره ، ويش بقى ما

سويناه له

حسين :- مو كافي يا يباه ، هذا ما يدري عنه أختي وبناتها أبد

أم حسين :- وهذي عاد تتعاشر هالبنيه ، هه شوفها مخليه بناتها ورايحه السوق عنهم

حسين :- حتى لو اماه بس مو يخليهم كده عاد

أم حسين :- صحيح وينه راحوا البنات ؟؟

حسين :- داكم نايمين في المجلس .

زهراء :- والله يا عمه ما أدري ويش أقول لش .

أم حسين:- قولي يا بتي قولي ، الله يرحم امش كانت الله يرحمها أعز صديقه عندي ، ما تغبي عني شي

ولا أغبي عنها شي أبد

زهراء :- الله يرحمها ، أني أقول لو تقعدوا وياه وتتفاهموا يكون أحسن للجميع

وأحس أبو حسين بمدى معاناة زهراء من ابنته مريم واللي تسويه

وقاربت الساعه على الخامسة والنصف وهم جالسون ضحك وفرفشه

أبوحسين :- يالله احنا نستأذن يا بتي

زهراء :- وين يا عمي تو الناس ما تونسنا وياك عمي

أم حسين :- يا بتي القعده وياكم ما تنمل بس تعرفي موعد الحبوب النحبسه له

زهراء :- الله يعافيكم ياااااااااااارب

أبو حسين :- الله يطول في عمرك يا بتي ويسلمش ،أجل ويش رايكم بكره تجوا تتغدوا عندنا

حسين :- خيرك سابق يا يباه

أم حسين :- ما يفيدكم ، بكره الغداء عندنا زين

زهراء:- لا تكلفوا على حالكم

أم حسين :- أي كلافه يا بتي ...تبونا نستانس ولا لا

حسين:- أكيد يماه نمباكم مستانسين على طول

أبو حسين :- خلاص أجل اسمع كلام امك وجهز روحك بكره للغداء ، ولا تجونا الساعه وحده

أم حسين:- ايه نمباكم من الساعه عشر عندنا نستانس وياكم

حسين :- ويش رايكم نخلي أختي مريم تجي ويانا ، يستاهلوا الجهال

أبو حسين :- ما أدري بس

أم حسين :- مره فانيه يا ولدي مره فانيه

أبو حسين :- يالله فمان الله

وقاموا طلعوا وجائت التفاكير لزهراء ، ويش فيها عمتي على مريم ؟؟؟ زين ويش ذنب الجهال ؟؟

الله يستر على عباده ، ويش عليي أني الحين اتدخل في أمورهم ، خلني كده وساتره على روحي ، بس

ما يصير كده ، واستفاقت مما تفكر فيه على صوت حسين يسألها عن بدلته الرياضه ، قامت وجابتها اله

وقام يلبس لبس الرياضه

حسين :- ان شاء الله ما تأخرت على الشباب

زهراء :- لا بعدهيه الساعه

حسين :- شااااااا الساعه كم الحين

زهراء :- الساعه خمس ونص وينك ووين الصلاة

حسين :- ايه صح يمدي الحين ما يأذن الا الساعه سبع الا .

زهراء :- داكوه الماي جاهز في الترمس بعد

حسين :- لعن الله يزيد

زهراء:- لعنة الله عليه

وأخذ حسين الترمس وطلع من الشقه وقامت زهراء تشيل باقي الاغراض من الصاله

نشوف الحين رجل مريم واللي على طول في القهوه

- وينك يا ابو عمران أمس ما شفناك

أبو عمران :- ويش تشوفني وهالأشكال اللي تقعد عندك ما تحترم نفسها

- قوم زين قوم خذ لك دور كيرم

أبو عمران:- ما لي خلق

- ايه ما لك خلق هاه ، من الصايمه أمس <<<صايمه يعني صفر الشباب يعرفوا

أبو عمران:- اي صايمه بعد وأنا صاكنك بفلاف قبلها

- ما عليه بس ولا وحده منهم صايمه

أبو عمران:- اقول ، يالله قوم وبنشوف

- يا صديق ، جيب الشير بنلعب لينا دور

-- سديق ما في نزل شير أول شي أبو عمران انته ما في سدد مال أمس مودييير واااااازيييد زأعلان

أبو عمران:- زين عاد خلاص قول لمديرك بنسدد يعني بناكل عليكم فلوسكم روح جيب الشير

-- لا لا مودير بأدين زأعلان واااااااازيييد

أبو عمران:- روح قول له ابو عمران بيسدد بكره خلاص

-- لا لا انته فيه روه هناك

أبو عمران:- الله ينعلك ، هذا وقته الحين ، الواحد جاي من الدوام ووده يشرب له راس يعدل راسه وانت

جاي تكتمها في وجهنا

- خلاص صديق هذا حجر انا با أدفعه روح سوي لابوعمران حجر وجيب الشير ليي أنا

-- سديق انته مسئوليه ما في مشكل

- ايه انا با اسدد حق الحجر والبيبسي

أبو عمران سوى روحه ما يسمع ولا كأنه توه زاغد اله قوطي بيبسي وطلب قوطي فاني بعد، وابتدا اللعب

لعبه لعبتين فلاف وتجمعوا الشباب وهذا يشجع وهذا يتمسخر وهذا يصفق ، انتهت القهوه الاولى لصالح ابو

عمران ، الثانيه للحين بعدهيه تنلعب ومن هذا كلمه من ذاك كلمة ومن هاللطيف كلمتين وقبت السالفه

أبو عمران:- ويش فيكم ما تسكتوا تخلونا نلعب ، تخلوا الابطال تلعب

- اي ابطال خلو اهل الحظ يلعبوا

أبو عمران:- ما قدرت تفوز في الملعب قمت تتكلم ، يالله عطيناك بطولة اللعب النظيف

وقام الشباب يضحكوا

- تراني مخلينك تفوز عليي علشان لا تقوم من اولها

أبو عمران:- قال ويش قال مخليني افوز ، طلع لعبك يا مارادونا الكيرم

- هالله هالله يااللاحوس ، اللي يشوفك الحين مره

أبو عمران:- ايه يالله ، شاطر بس تقول صايمه وما ادري ويش

- خلاص اجل من ويش نلعب

أبو عمران:- ما من شي الرهان حرام

- اقول لك شوف احد يضمنك وانا فلوسي تضمنني

أبو عمران:- من اللي يضمن البطل ، هاه منهوه

ما فيه احد من الشباب ضمنه ، وبدت تقاسيم وجهه بالتغيير ، غمز صاحبه ولواحد وقام ذاك وقال :- افا

على غيرك ابوعمران أنا اضمنك على طول ، ورجعت الضحكه على وجهه مره فانيه

أبو عمران:- تمباها من كم لعبه

- خمس لعبات وتعرف النظام

أبو عمران:- منهو الحكم بيننا

- ما يحتاج حكم كل واحد يعرف يلعب

أبو عمران:- لا لازم يصير فيه حكم

وحطوا ليهم حكم ، وجابوا الحجر الجديد لابوعمران وهات يا لعب وصراخ وكلام وفودر متطاير

والوجوه مره مبتسمه ومره متجهمه

طلعت اللعبه الاولى لصالح ابو عمران

الثانيه لصاحبه

الثالثه على ابو عمران

واللعبه الرابعه هي اللي يلعبوها .............

>>>>>>>>نكمل قريباً